إستفسار بخصوص تحليل فيروس سي

[كارما نور الدين]

السلام عليكم ورحمة الله وبركاته

اولا انا سعيده جدا بتسجيلى فى هذا المنتدى الرائع واتمنى من الله ان تساعدونى فى محنتى ولو بتوضيح الامر

زوجى مهندس مدنى وبعد البهدله والمرمطه هنا للعمل فى مصر والمرتب اللى مش ولا بد ( استغفر الله والحمد لله على كل شئ ) جاله عمل فى الكويت عن طريق الاقارب وبعد فرحة العمر كله و السعاده اللى مرينا بيها لمده شهر هى مده عمله هناك رجع لمصر لعمل الكشف الطبى وفجأة ومن دون اى انذار اكتشفنا اصابته بفيروس سى اللعين وحمدنا ربنا وصبرنا و هو الان بيتعالج بالانترفيرون والحمد لله احمد الله على استجابته للعلاج ........ الامل لسه ممتش عندى ولا عنده اننا ممكن نسافر تانى وخاصه ان العقد اللى مضاه لسه سارى المده فقلنا يتعالج اهم شئ ويبقى كويس وبعد كدة تجيله عدم ممانعه مرة اخرى و نعيد كرة الكشف الطبى واللى ان شاء الله هنكون عملين قبلها تحاليل البى سي ار و كدة علشان نتأكد من اختفاء الفيروس ........ المؤلم بقى و اللى مخلينى حسه الدنيا سودا فى عينى ان عرفنا ان فيه تحليل للاجسام المضاده ممكن يتعمل له فى الكويت وممكن يكشف انه كاااااااااااان مصاب بالفيروس سي السؤال بقى هنا ....ايه الحل ؟؟؟؟؟ ايه الحل علشان يمر الكشف الطبى بتاعه هنا وهناك - الكويت - بسلام من غير اى عرقله وهو كدة كدة بيتعالج و ان شاء الله خير بس ايه حكاية الاجسام المضاده دى وايه حلها ؟

ارجوكم ساعدونى وقولولى فيه حل ولا خلاص مفيش أمل ؟؟؟؟؟؟؟؟؟

[roka]

أسمحى لى ارد عليكى فى حدود تجربتى بنفس الموقف مع فرق الزمن والظروف

أنا مريت بنفس الموقف من أربع سنوات حلمت انا وزوجى بحلم السفر ولأنى لى اخت مقيمة بالكويت ساعدتنا على تحقيق ذلك الحلم وبعد محاولات كثيرة تحقق الحلم وعلى أساسه تزوجنا ورسمنا كل الأحلام وكانت المفجأة عند نتيجة الكشف الطبى فى مصر وطبعا أنت عارفة الإحساس البشع ده وكانت المشكلة اننا بدون شقة ولا عمل ولا أى شئ كل شئ كان مرتب على السفر لكن الحمد الله الأيام مرت والحياة أستقريت ورزقنا ببنت وهو حاليا سافر لدولة أخرى من شهرين

بصى الحلم حلو لكن لا تجعليه الحلم الوحيد أنا أيامها عرفت انى الصعوبة هنا فى مصر لأنهم بيحللوا اجسام مضادة لكن على فكرة ليها حل لو تعرفوا حد بس بفلوس كتير

أما هناك فكان الحل برضه عن طريق معرفة وكان الشرط انه يعالج علشان يثبته عدم الخطورة انا حقيقى مش عارفة بالظبط القوانين أيه اليومين دول

لكن أنا نصحيتى ليكى ولزوجك سبيها على ربنا صدقينى أنا وجوزى مع مرور السنين ولما نبص ورا بنكتشف أنى اللى حصل هو ده المصلحة ممكن يكون الموضوع بيخوف فيرس وعدم سفر لكن هو ده بيكون الخير من ربنا وأنا حتى لما زوجى سافر الحمد الله طبعا على كل شئ لكن مش بالحلاوة اللى واحد كان فاكرها

فمهمتك أسألى وأدرسى الموقف كويس لكن فى نفس الوقت صلى وأدعى رنا يقدمله اللى فى الخير سواء هنا أو هناك

وربنا يكرمكم ويشفى زوجك يارب

أسفة على الإطالة

[مغتربة]

حقيقه لا املك لك ردا كونى لست على معرفه بانظمه دوله الكويت و لكن حبيت امر و ادعو لزوجك ان يشفيه الله و يعافيه و يرزقه من حيث لا يحتسب باذن الله تعالى

[HDarwish]

أسمع إن الإمارات ما بيحتاجوش كشف عن فيروس سي وبي ... وأظن أهل الإمارات أدرى بشعابها ...

الأخت روكا بتقول إنه ممكن يخلص بالفلوس

هو فعلا ممكن يخلص بالفلوس سواء كان في مصر أو في الكويت ممكن يخلص من البلدين لكن المشكلة مش في كده ... المشكلة إن اللي هيخلص بالفلوس ده بياخد نتيجة واحد سليم ويبدلها مع نتيجة واحد مصاب يعني هتبقى المصلحة على حساب واحد تاني سليم ... ممكن تتحل المسألة دي برضه إن الشخص السليم ده ممكن يطلب إعادة كشف ويعدي لكن إذا كان من الناس اللي بتاخد الصدمة وتقعد تغني على وايلاه وياخد بعضه ويرجع يبقى ده هيشيل ذنبه الشخص اللي اتبدلت عينته بيه ....

أخت (يارب يسر لي)

للأسف لو كنتم إتأكدتم ميه في الميه من الموضوع ده وعملتم التحليلات اللازمة وفي أماكن موثوق بيها يبقى مافيش حل إلا إن يتم العلاج نهائي من الفيروس والأجسام المضادة كمان لإن هما هنا بيعرفوا إن الشخص ده مصاب بالفيروس ولا لأ على أساس الأجسام المضادة .....

وعايز أقولك على حاجة الكويت مش جنة الله في الأرض .... وما حدش بيبقى عارف الخير فين بالظبط ... أعرف مهندس كهربا جيه هنا الكويت ويادوب هما ست شهور أو ثمانية ونزل ومرضاش يرجع تاني والشركة تتصل عليه وتبعتله لمدة تزيد عن أربع شهور علشان يرجع لكن هو رفض علشان حسبها لقى إن العملية مش فارقه كثير (وعلى فكرة كان شغال في شركة من أكبر الشركات وراتبه ممتاز وله بدالات وحوافز مغرية بجد)

ربنا معاكم ويوفقكم إلى مافيه الخير إنشاء الله

[se_ Elsyed]

لي تعليقان على هذا الموضوع :

1- الجُملة الرائعة التي ذكرتها الاخت roka وهي

الحلم حلو لكن لا تجعليه الحلم الوحيد

ولازم يكون في حياة الإنسان بدائل ... ولو ربنا ما كانش كاتب لكم موضوع السفر للكويت .. يبقى بالتأكيد هناك فرص أخرى يرتبها لكم .. لكن عليكم بالإجتهاد والسعي .

2- الموضوع الاخر هو إنكم تخلصوا نفسكم بالفلوس في مصر والكويت ... وإسمحي لي إن ده هايدخلكم في سكة النصابين والآفاقين ومش هاتخلصوا وهاتكون بداية مش ظريفة بالمرة . فأبعدي عن الموضوع ده أفضل لكم .

[كارما نور الدين]

السلام عليكم ورحمة الله وبركاته اخوتى الكرام جميعا

جزاكم الله خيرا وكفيتم كل انواع الشرور فى الدنيا والاخره

طبعا كل شئ بيد الله وكل شئ خير وده كله انا مقتنعه بيه جدااااااااااا و دايما بمشي اردد واقول حسبى الله لا اله الا هو عليه توكت وهو رب العرش العظيم

بس احب اوضحكلم شئ هو انى اتربيت فى هذه البلد - الكويت واتولدت فيها واهلى كلهم هناك و اختى برضه هى اللى ساعدتنى ولما تزوجت تزوجت وبنتيت احلام انى هاخد زوجى لهناك علشان نقدر نعيش بالرغم من ان مرتبه هناك مش كبير زى ما اى حد ممكن يتخيل بس مهما كان احسن من هنا بكتير زوجى مهندس لكن للاسف تأخر فى سنة التخرج لظروف مش خيابه ابداااااااااااا وربنا اللى عالم انه مهندس زكى وشاطر و بيحاول يعمل كل اللى عليه فى عمله لكن هنا فعلا فى مصر مش قادر ياخد فرصته ابدا ومفيش تقدير خالص لان سنة التخرج دى معرقله كل حاجة واحنا الان بقالنا متزوجين حوالى سنتين وهما دول اعوام الخبره بتاعته واناوقفت جمبه فى فترة الخطوبه علشان يحصل على البكالريوس ساندته وشجعته على حصوله على الشهاده وكانكل املى اللى عايشه عليه انى اسافر هناك لاهلى ولبلدى التانى الكويت اللى بعشقها من كل قلبى وبحلم باليوم اللى اكون هناك ولما سافر هو هناك كانت نفسيته غير خالص وحس ان هناك مختلفين فى التعامل والتقدير بيشتغل وبيلاقى لكن هنا فظااااااااااع الله المستعان

والحمد لله شئ كمان متمسكة بيه اوى وهو علاجه علشان ده زوجى اللى بصحته دى هيربى اولادى معايه واللى بيها هيقدر يشتغل ويثبت لنفسه انه رجل طبيى زى اى رجل بيشتغل وبيقبض و بينفق على بيته احنا معتمدين الايام دى بعد الله على اهله وعلى اهلى والوضع ده مش هينفع ولا احنا الاتنين مستريحين له

انا اسفه جداااااااااااااااا على الاطاله سامحونى مصدقت الاقى حد اتكلم معاه

اقسمت عليكم بالله ان تدعو لى انى الاقى مخرج للموضوع ده وان ربنا يجمعنى بأهلى فى كويت على خير ولو بعد حين وان يشفى زوجى و يعوض علينا عوض الصابرين

جزاكم الله خيرا واستودعكم الله

[Alrefaey]

اختنا الفاضلة

هو فيه حل بس صعب شويه ويعتمد على مؤهلاتك الدراسيه

واضح من كتاباتك ان الاهل كلهم فى الكويت ووجودك هناك بجوار اهلك مهما جدا بالنسبه لكى

ايه رأيك لو بدلنا الوضع يعنى الاهل يحاولو يشوفوا لكى فرصة عمل هناك وبعد ما تتعاقدى تعملى استقدام لزوجك اذا كانت مهنتك تسمح بذالك فى دولة الكويت

طبعا زوجك وهو مسافر لحضرتك استقدام هيعمل تحليل فيرس وهيطلع اجسام مضادة بس ده لا يمنعه من السفر بس هياخدو عليكى تعهد بعدم شغل الزوج لما يسافرلك وبعد مايسافر يحاول يشتغل فى اى مؤسسة فى الكويت بدون ماينقل كفالته

هو حل صعب بس هو ده الحل الوحيد من وجهة نظرى

[كارما نور الدين]

السلام عليكم ورحمة الله وبركاته

جزاك الله خيرا على ردك يااخ رفاعى بس متهيألى الموضوع ده صعب تحقيقه ولو فى الفترة الحاليه لانى منتظرة اول طفل يارب ييجى بالسلامه ويكون سليم ومعافى فى ظل الظروف الصعبه اوى اللى الواحد عاشها فى طول فتره حمله لكن الحمد لله على كل شئ

منتظره منكم كلكم من الاخت روكا و الاخ اتش درويش و الاخ سي السيد و الاخ الرفاعى وكل اللى شاركو الدعاء بالرزق والعمل لزوجى والشفاء العاجل الذى لا يغادر سقما هو وكل المسلمين يارب اللهم امين

[عنبو]

بصى حضرتك انا ليا رايى فى الامور اللى زى دى ربنا اللى جاب المرض وهو ال الوحيد اللى يقدر يشفى منه فادعى ربنا وان شاء الله انا متاكد انه ربنا هيعوضكم احسن من هذا العقد بكتير لان ده رزق وبلاش موضوع الرشاوى وضرب الشهادات لان ده يعتبر خيانه للقوانين الدوله اللى هو رايحها وزى لما بقلك عن تجربه شخصيه والله ربنا هيعوضه احسن منها فى بلد احسن منها والله الموفق وبعدين انا ليا اخ مهندس مدنى مش ناوى يسافر وبقول الشغل هنا فى مصر ليهم زى الفل

[سهران]

الأخت الفاضلة كارما نور الدين

دعواتنا لزوجك بالشفاء و أن شاء الله يتعافى و بعد كده كل شيء مقدور عليه .... أقلبوا الصفحة و أستنهضوا همتكم في طريق آخر و أن شاء الله سيهيء لكم من أمركم رشدا .... الدنيا ما وقفتش و أبواب العمل مفتوحة و الرزق بأيد مالك الملك و أن شاء الله القادم سيكون أفضل . ... تذكري دائما ... ربما منعك ليعطيك .. و ربما أعطاك فمنعك ... و أن شاء الله في المنع ستجدون منحة من رب السماء

تحياتي

تم تعديل 29 نوفمبر 2008 بواسطة سهران

[Amr Radwan]

اختنا الكريمة .. كارما

نتمني كلنا الشفاء لزوجك و لكل مرضانا و مرضي المسلمين ..

حبيت اقولك حاجة صغيرة .. السفر يعتبر وسلية من وسائل طلب الرزق .. و قد تكون ناجحة او غير ناجحة .. يعني "عسى ان تكرهوا شيئا"

علي فكرة فيه ناس كتيرة جت و مش عارفة ترجع و كل يوم ليها هنا خسارة

و فيه ناس كتيرة استمرت في مصر و ربنا كرمها و رزقها و حققوا اهداف اكتر مما كانوا هيحققوا لو سافروا ..

في النهاية ..

انا شايف ان تاجيل او الغاء موضوع السفر بالنسبة لكم اكيد خير .. و خاصة انه كما قالت الاخت "روكا" لابد من وجود اكثر من حلم

و انصحكم و نفسي بحاجتين ..

الزموا الاستغفار في كل وقت ...

و الزموا صلاة الفجر ...

لان لهم فضل كبير في زيادة الرزق و البركة فيه .. و هذا عن تجربة شخصيه

تحياتي لكم جميعا ..