هل ستكون هناك مفاجآت في مؤتمر الحزب الوطني ؟

[hyoussif]

ذكر فى صحيفة المصريون امس ان مفاجأة كبيرة ستعلن فى مؤتمر الحزب الاوحد فى نوفمبر القادم غير التغييرات الكبيرة اللى هتحصل زى ركن عزو لوجود خلافات بينه وبين ولى العهد وركن على الدين هلال صاحب اكبر صفر عرفته مصر عن لجنة الاعلام بالحزب زى ماركنوا قبل كدة المحروس الشاذلى وابراهيم سليمان والتصفية شغالة المفاجأة هى تنازل مبارك الاب عن رئاسة الحزب لصالح مبارك الابن أظن لو حصل كدة فعلا تبقى مكشوفة اوى وكل شيئ بالخناق الا الانتخابات بالاتفاق :blink:

[محمد عيسى]

ذكر فى صحيفة المصريون امس ان مفاجأة كبيرة ستعلن

كون انها "ستعلن" فهذا يعني انه توقع و ليس خبر كما ذكرت في العنوان

إذا كانت صحيفة المصريون اصلا الواحد مبيصدقش اخبارها، يقوم يصدق توقعاتها !!!

[se_ Elsyed]

تم تعديل العنوان ليُعبر عن محتوى الموضوع

----------------------------------------

أولاً : صحيفة المصريون هي صحيفة إلكترونية صفراء معظم اخبارها تخمينات وفرقعات وحركات

ثانياً : نظام الحكم الذي يتبعه مبارك مع شعبه هو نظام يُسمى في الحياة السياسية بــ " حوريني يا طيطا " يعني تيجي له يمين يجيلك شمال ... الناس تقول بنحب أبو غزالة يقوم نفخه ... طب نشاور على احمد رشدي المُرعب ونقول ده رجل محترم .. يروح ركنه في التلاجة ... يطلعوا أغاني ويقولوا بنحب عمرو موسى وصالح سليم ... يروح باعت عمرو موسى مشوار لحد شارع جامعة الدول العربية حيث التحرش الجنسي وحيث البطالة المُقنعة ... وهكذا دوخيني يا لمونه ..

أينعم في أرهاصات ومقدمات إن دور احمد عز هايتقلص وتقريباً كده هو اخد السيخ المحمي لإن لما تقرا كل ما يتعلق بتحضيرات مؤتمر الحزن اللي هايبدأ يوم 4 نوفمبر . لن تجد أي وجود لأحمد عز ولكن كل البروباجندا تخص آبيه جمال .... و محمد كمال بتاع النيو لوك - الراجل ده بيفكرني بالحلاقين أو ببتوع الماكياج ... فهو اللي لبس الرئيس القميص أبو ياقه زرقا وهو اللي بيصبغ له شعره عالفتله وهو اللي مسكه قلم بانكر يسوى الشيء الفلاني - وفي الصورة أيضاً علي الدين هلال .. وطبعاً لا ننسى كبيرهم الذي علمهم السحر .. السيد صفوت الشريف اللي مجلسه إتحرق وبقى قاعد بشمسية في شارع عابدين دلوقت لحد ما يخلصوا المرمه بتاعت مجلس الشورى ..

ترددت إشاعات قوية إن هناك تعديل وزاري قوي هايتشال فقيه نظيف ورؤوس أخرى وذلك بعد عيد الفطر ... لكن اهو الفطر خلص ودخلنا على الأضحى بتاع الدبح ومافيش حاجه حصلت وكل شيء تمام ومبارك المصايب نازله ترف على نافوخه وهو ولا هنا ...

لإن ببساطة إحنا اللي بنشيل الليلة وبندفع الثمن غالياً ..

[Sherief AbdelWahab]

أتوقع أدواراً أكبر لـ"هاني الناظر" و "عبد الله كمال"..وقد تؤول حقيبة الإعلام لصحفي..

خلص الكلام

[hyoussif]

وفيه اسم كمان ابتدى يلمع ويلعلع لوزارة التعليم العالى وبيحضروه فى القريب العاجل هو احمد زكى بدر رئيس جامعة عين شمس

تم تعديل 27 أكتوبر 2008 بواسطة hyoussif

[SAW]

إن المفاجأة الكبرى فعلا في مؤتمرهم الكوميدي أن هذا النظام لم يعلن تنحيه و القبول بمحاكمته محاكمة عادلة على عكس معظم المحاكمات التي تمت في عهده.

[dawn walker]

المشكلة ان جمال مبارك ملوش كاريزما ولا حضور ولا اى انجاز وطنى (عسكرى على الاقل زى ابوه يستند عليه)...!!! المفروض المؤسسة العسكرية يكون لها حضور فى مأساة المجموعة الحاكمة ..اللى باعت مصر