سؤال من الزميل almasry عن تغيير المهنة

[almasry]

القبول بالعمل بتأشير عامل للجامعيين على أمل تغيير المهنة بعد ذلك

ج : لا غُبار عليه لو تأشيرتك طالب وخصوصاً للمقيمين مع عائلتهم هنا ... أساساً ما ينفعش تيجي من بدلك بهذا النوع من التأشيرات ... وبالتالي بشهادتك الجامعية ممكن تغير مهنتك عند نقل الكفالة على الشركة .... وبالتالي ينطبق عليه ماينطبق على اي موظف عادي .

الأخ سي السيد جزاك الله عنا خيرا على هذا التفرد والمجهود الرائع .. والأكثر روعة انه جاء في توقيت حاسم بالنسبه لي .. فأنا بقالي 4 شهور بأجل السفر لشئ مؤرقني جدا ولابد من أخذ قراري اليوم ان شاء الله .

فالموضوع ان الراجل السعودي لما جه وعمل معايا المقابلة واتفقنا على كل شئ وامليت عليه شروطي كلها .. هو نفسه كان محرج وهو بيقول وهو ان المهنة متسعوده ومافيش غير تأشيرة عامل ، انا الحقيقة قمت وقفت وقلتله شكرا ، قالي اعذرني مافيش حل تاني ودي سهلة انها تتغير وحصل كتير عندنا كده وعندي اللي حايخلصهالك ، وبعدين كلمت واحد صاحبي وهو اللي جابلي الشغلانة دي وقالي مافيش مشكلة خالص ، وسافر السعودي وبعتلي عقد العمل بوظيفة مدير مالي كما اتفقنا وبالشروط كلها ، ولما حاولت محاولة اني اغير المهنة (وفي شئ في نفسي برضه (باقدم رجل وآخر رجل ) وخصوصا اني باشتغل في المطار في وظيفة ممتازة وشكلها حيبقي وحش قدام زمايلي اللي حايخلصولي الاوراق ) قالولي في السجل المدني لازم عقد عامل موثق ، فبعتهولي امبارح ، فانا معايا عقدين دلوقتي ، وانا في حيرة من امري هل حقا استطيع ان اغير المهنة قبل ما اطلع الاقامة ؟ وكم تستغرق من الوقت ؟ لاني اريد ان احج انا وزوجتي هذا العام ان شاء الله .

طبعا الامور كلها بيد الله وحسب التساهيل ولكن احب اعرف مبدئيا كم يستغرق تقريبا كل هذا ان شاء الله ؟ ( تغيير المهنة ، الاقامة ، الاستقدام )

لأن لو في أي مشكلة يراها ذوي الخبرة هنا مش حاسافر

القبول بعدم توفر تأمين صحى

ج : قانون العمل الجديد المُطبق من شهر يناير 2006 يُلزم صاحب العمل على توفير تأمين صحي للموظف وعائلته بدون حد أقصى وكذلك تذاكر سفر للعائلة بدون حد أقصى .. وبالتالي اللي مش عارف حقوقه يبقى يستاهل اللي يجرا له .

طيب لو مكتوب في العقد علاج طبي عائلي حسب المعمول به في جهة العمل .. يبقى ايه اللي ملزم ؟ .. قانون العمل والا العقد لو حصل اي اختلاف ؟

اشكرك شكرا خاص على المعلومات المفيدة والمجهود الرائع واسأل الله ان يجعله في ميزان حسناتك يوم القيامة

رأيك يهمني جدا

محمد

[se_ Elsyed]

فضلت فصل المداخلة في موضوع مستقل لكي لا يختلط بموضوع دليل المغترب

------------------

بص يا أخي الكريم .. إنت في حيرة دلوقت ما بين :

1- الراتب المغري اللي عرضوه عليك بالسعودية

2- الوظيفة المرموقة في مصر

لكن كله ده إتهدم على صخرة مهنة " العامل " ولك الحق إنك تفكر 100 مرة قبل أن تقبل .. لإن فرق كبير بين الوعود البراقة وبين الواقع

الوعود البراقة هي إن صاحب العمل قالك إنه هايغيرها لك .. وقد يصدُق وقد لا ...

فحتى لو صدق .. هاتبقى عندك مهنة متغيرة في الإقامة والجواز .. ومش متغيرة في السيستم الخاص بإدارة الإستقدام وده نظامهم هنا وبالتالي معاملتك هاتترفض .. وساعتها كفيلك هايقول لك : أنا عملت اللي عليه وغيرت لك المهنة وعيش إنت مع نفسك في الإستقدام اللي هاتضطر تلجا لسكة الرشاوي من تحت الطرابيزة وتدفع ما لايقل عن 12000 ريال والله أعلم هايتنصب عليك ولا لأ وده هو الواقع

هل حقا استطيع ان اغير المهنة قبل ما اطلع الاقامة ؟ وكم تستغرق من الوقت ؟ لاني اريد ان احج انا وزوجتي هذا العام ان شاء الله .

لأ طبعاً .. مستحيل تغير المهنة قبل ما تصدر الإقامة ...

وبما إن فاضل 43 يوم على الحج .. فانا بأقول لك من دلوقت لو جيت بكره السعودية .. مش هاتلحق تطلع إقامة وتغير منهة وتعمل إستقدام وتاخد تأشيرة الحج

لإن ببساطة إبتداءً من نصف ذو القعدة .. الجهات الحكومية بما فيها إدارة الجوازات ومكتب العمل بيآنتخوا وبيبقى شغلهم الشاغل إنهاء تأشيرات الخروج والعودة للمسافرين فقط وماحدش بيلحق يجدد إقامته لإن ده المفروض يحصل مكن بدري .. بالإضافة إلى إن القنصلية السعودية عندك زمانهم ملخومين في الـ 70 ألأف تاشيرة حج للمصريين ..

طيب لو مكتوب في العقد علاج طبي عائلي حسب المعمول به في جهة العمل .. يبقى ايه اللي ملزم ؟ .. قانون العمل والا العقد لو حصل اي اختلاف ؟

قانون العمل هو اللي بيمشي طبعاً لكن معنى كده إنك تدخل في مشاكل قانونية مع الشركة

[almasry]

الأخ سي السيد ..

أشكر لك تعاونك .. وسرعة ردك وجزاك الله خيرا

[عاشق الترحال]

السلام عليكم ورحمة الله وبركاته

يا أخواني الأعزاء من فضلكم دقايق عاوز أقولكم أننا بنتبغدد على أيه هو أحنا كنا لقينا في بلدنا الشغل وسبناها وجينا الغربه أنا بتكلم عالناس اللي مستواها زي حالتنا غلابه وملهاش ورث ولا ليها حد غير ربنا وكفى بالله

بس ياريت لما نتكلم نتكلم بموضوعيه وحياد وبلاش البعض ينظر للأمور من برج عالي لأني أنا واحد من الناس أتعلمت وأبويا صرف عليا دم قلبه علشان يطلعني بني آدم وبعدين أنا طول عمري عارف أن مصر مفيش فيها مكان للي في مثل حالي مع العلم أني والحمد لله أتعلمت في مدارس خاصة ومعايا ليسانس حقوق بس كام ألف واحد معاه ليسانس في البلد وكام مليون واحد معاه بكالريوس وكام مليون واحد قاعد من غير شغل وكام ألف واحد من اللى متعلمين تعليم جامعي بيشتغلوا في المعمار وبعضهم بيشتغل في الفاعل وحلاقيين وجميع المهن اللي تخطر في بالكم والي متخطرش (( مع العلم أن منهم بكالريوس هندسه وتجارة وتربية وأزهريين و.......)) وده بعد ما اتعلموا وأهاليهم صرفت دم قلبهم عليهم ومنهم اللي بيجري على أخوات بنات ومنهم اللي عاوز يتجوز ومنهم اللي أبوه مريض أو أمه مريضه يعني فيه ناس مطحونه بجد فيه ناس مش لاقيه ثمن الدوا ولا ثمن رغيف العيش أو الغموس اللي تاكل بيه العيش ..

بلاش نبقى جلاديين أو قضاه معظم اللي بيضطروا للقبول بالفيزا وفيها مهنة عامل أو مزارع أو غيره بيبقى شايف أنها بالنسبة له طوق النجاة اللى هيقدر من خلالها يلاقي حل لمشاكله الماديه والإجتماعيه وتحسين أوضاعه وظروفه ...

الشباب بتاعنا غلبان وأنا واحد من الشباب دول أنا إشتريت فيزا حره بمبلغ ( 12.000 ) إثني عشر ألف ريااااااال منذ حوالي عام ونصف وكانت مهنتي (( علاف دواجن )) وذلك نظير أن يتركني الكفيل أعمل في أى مكان بحريتي وكانت غلطتي أننى عندما سألت الوسيط عن هذه المهنة وهو للأسف أحد أصهاري (( نسيبي يعني )) قالي أنك ممكن تشتغل في أي مكان ومفيش مشكله وعندمل أتيت هنا أصطدمت بأول شجرة وهي المهنة التي لا تقبل التحويل إلا على شركه تعمل في نفس المجال (( الدواجن والمزارع ))

وبعدين أعمل أيه إضطريت أني أغير المهنة ((لعامل عادي )) علشان أعرف أنقل كفالة وأشتغل في أى مكان أنا عاوزه ودفعت (( 2000 ريال )) ..

يعني مجبر أخاك لا بطل ........ ولسه اليومين دول هنقل كفاله وأغير مهنه بقى علشان أعمل زياره لأهلى وأسرتي يعملوا عمره وأشوفهم ...

مع العلم أني من أنصار الهجرة لأوروبا أو أمريكا أو كندا أو أى مكان فيه إحترام للآدميه وتحس أنك لو حتى بيعاملوك أنك حشره بس بيعاملوك أنك حشرة نافعة زى النحل كدة ولا مؤاخذة .........

وأنا والله مكنت عاوز أسافر السعوديه ولا أى دوله عربيه كان حلمي لأوروبا وخصوصا إيطاليا أو النمسا وكنت رتبت لموضوع وهمشي فيه لكن الله يجازيهم ولاد الحلال بقى هما اللي إضطروني للسفرية دي ...

وأنا الوقتى بقالى سنه وكام شهر ولسهه والله بسدد في ثمن الفيزا غير الديون اللى عليا في مصر ولكن الحق يقال (( وأما بنعمة ربك فحدث ))والحمد لله الأوضاع تعتبر أحسن من مصر بكتير لأنك حتى عندك أمل في بكره لما الديون اللى عليا تنتهي بإذن الله هقدر أوفر شئ أو أقدر أجيب مراتي وإبني اللى مشفتوش من يوم مااتولد غير بضعه أيام وتركته وسافرت..

مع العلم أني لازالت فكرة الهجرة لأوروبا تستحوذ علي أفكاري وتأسر عقلي وكيان بل تأخذني تارة إلى التفكير في الهجرة بحراَ أو بأي طريقة بدون مبالاة ولكني أفكر في هذا الصغير الذي لم يرى أباه ولا يعرفه ماذنبه؟؟؟؟؟؟؟؟؟ فأتراجع وأحاول التوصل لطريقة شرعيه لدخول أوروبا .

وأعتقد أنكم تشاركوني الرأى ان هؤلاء الذين يهاجرون لأوروبا بالبحر ويركبون سفنا ومراكب الموت لا يذهبون هناك ويدفعوا المبالغ التي يعلم الله من أين أتوا بها وهو يعلم أنه ينتحر

(( فبعضهم باع أرض أبيه وبعضهم باع مصوغات زوجته أو أمه أو أخته ودفعها للسفر )) إنهم ينظرون لذلك على أنها بصيصة أمل من الممكن أن تغير حياتهم ويحققوا حلمهم كما فعل من قبلهم من الذين قدر الله لهم الوصول لهناك

ولعل آخرهم كانوا منذ أيام قلائل وأعمارهم ما بين 15 : 20 عاما من أحد قري محافظتي الدقهلية (( نوسة الغيط )) وكانوا في حوار مع الأستاذ / وائل الإبراشي في برنامج الحقيقة بعد ما إتصل بهم من على الهواء من فرنسا وهم مع ممثل الجالية المصريه في فرنسا وتتعجب عندما يرد هؤلاء الأطفال على ا/ وائل عندما سألهم لماذا سافرتم إلى هناك بالبحر وأنتم تعلمون مايحدث من غرق للسفن مجيبين إياه (( لو عدينا هنساعد أخواتنا البنات وأباهاتنا وأمهاتنا على الظروف اللى عايشينها ,, ولو متنا هنبقى وسعنا مكان لغيرنا من أخواتنا نوفر لقمتنا لهم ))

بالله مش حاجه تقطع القلب لما يبقى حالنا كده وأحنا عندنا خير في بلدنا ربنا وحده يعلم أد أيه (( شوفوا من بداية التاريخ كام دوله إحتلتنا وكام دوله سرقتنا ونهبت خيراتنا ومع ذلك لسه فيه خير بس للأسف مش للغلابة اللى زينا ))

والله أنا بحب بلدي دي ربنا وحده يعلم أد ايه بس صعبان عليا حالي وحال كتير من الشباب اللى اتعلم واتبهدل وملقاش وسافر واتغرب في بلاد الناس ... بالذمة ده اسمه ايه

ولسه بعد ده كله هنلوم اللى بيقبل بمهنة عامل ياعم عامل عامل كله عند العرب صابون...

أنا آسف على الإطالة التي تعدت الدقائق التى طلبتها منكم ولكن معذرة أنظروا للشباب بعين الرحمة ولا تكونوا أنتم والظروف عليهم إلتمسوا لهم الأعذار

والسلام عليكم ورحمة الله وبركاته

[DIA ELDIN]

كلامك صح يا اخ عاشق الترحال انت فين في السعودية؟