سيادة الرئيس : ليس إبراهيم سليمان هو الفاسد الوحيد

[se_ Elsyed]

إبراهيم سليمان وزير الإسكان الأسبق إسم على علم في عالم الفساد ...

ومع ذلك مبارك كرمه احلى تكريم بعد خروجه من الوزارة واعطاه على اوسمه ممكن يحصل عليها إنسان مصري ...

ده عشان نقفل الباب بس على الناس اللي بتقول إن الريس ما يعرفش إن وزراءه مفسدون ...

وعشان بس نتذكر شيء في البلد المفروض يبقى إسمه "إقرار الذمة المالية " بالذمة ده إسمه كلام ؟

وزير يقعد في الوزارة سنيييييييييييييييين طويلة ويدخل ويخرج وما نعرفش كان عنده كام وبقى عنده كام ويا ترى تربح من وراء منصبه ولا لأ ؟ لأ دي طبعاً مستحيلة في القطر المصري

طب بلاش كده البتاع اللي بيقدموه كل سنة وفيه ممتلكاتهم وثرواتهم وثروات زوجاتهم ... إيه بيبقى مضروب هو راخر وبيمر مرو الكرام ؟

تعرفوا إن منطقة الدويقة تدخل ضمن الدائرة الإنتخابية لإبراهيم سليمان والمفروض إنه يُمثلها في مجلس الشعب ومع ذلك لم نراه او نسمعه أو نشوف خياله في الكارثة الإخيرة ؟ بل بالعكس

بالعكس ... ده أنا باحب الإنسان الحرامي بس ما بيأذيش الناس ...آه والله ... يعني مثلاً اللي كان بيحصل في أفلام نجيب الريحاني من ناظر العزبة اللي بيكتب إن عدد الانفار اللي أشتركوا في جمع الدودة هم 100 نفر وهما في الحقيقة 20 وضرب أجرة الثمانين في جيبه .. أهو ما أذاش حد مع إنه حرامي وإبن ستين ... ده مثال يعني

لكن حرامي ومؤذي ومجرم حرب وقاتل عشرات الأرواح ومع ذلك يتبوء - حلوه يتبوء دي - أعلى المناصب في الدولة ورايح جاي قدامنا وهو بيقول " أنا شريف وعفيف وصفحتي بيضا " أهو ده الإجرام بعينه ؟

انتو عارفين بأقول كده ليه ؟ عشان هو نفسه إبراهيم سليمان تلقى تبرعاً من الشيخ زايد رحمه الله في أواخر التسعينات بعدة ملايين من الجنيهات تحديداً وخصيصاً لتطوير منطقة الدويقة ومنشية ناصر .. ومع ذلك مافيش طوبة إتحطت هناك وراح بجرة قلم مباصي الهبرة دي لميزانية وزارة الأيسكان عشان ينأ نأ فيها براحته ويسلكها بمعرفته

عاوزين تقولوا لي إن الريس ما يعرفش وإن الجهاز المركزي ما يعرفش وإن مجلس الشعب ما يعرفش ؟

ولا هاتقولوا " دي عصابه يابا " أوعى حد يقول كده أحسن اخد على خاطري منه

طب تعرفوا كمان إن إبراهيم سليمان ما بيعتبش مجلس الشعب أساساً وإن اللوائح المنظمة للعمل بمجلس الشعب بتقضي بإسقاط عضوية العضو اللي يتغيب عن الحضور لعدد معين من الجلسات ومع ذلك مطرمخين على الحبوب ده وماحدش بيشوفه يسقف حتى في المجلس ؟

وخدوا الحته التقيلة دي من المصري اليوم وبالمستندات يا معلم .. لكن مقدماً الموضوع هاتطرمخ ومش بعيد الريس يكافأه ويمنحه وسام نجمه شبرا تقديراً لمجهوداته وعلاء عبد المنعم بتاع الزاوية الحمرا ده هايتنفخ وبكره تشوفوا

إوعى وشك

مستندات رسمية تكشف: إبراهيم سليمان باع أراضي مميزة في التجمع الخامس وفيلات بمارينا لزوجته وأبنائه القــُصّر خلال توليه الوزارة

كتب محمود محمد ٢٧/ ١٠/ ٢٠٠٨

صورة من المستندات المقدمة للمحكمة: بيان بممتلكات أسرة إبراهيم سليمان وأقواله أمام مجلس الشعب

كشفت مستندات رسمية، حصلت عليها «المصري اليوم»، عن بيع الدكتور محمد إبراهيم سليمان، وزير الإسكان السابق، ٤ قطع أراضي بمناطق مميزة بالتجمع الخامس.

وصل إجمالي مساحتها لحوالي ١٠ آلاف متر و٣ فيلات فاخرة بمنطقة مارينا العلمين السياحية لزوجته وأولاده القصر، أثناء توليه الوزارة، علي خلاف ما ذكره في جلسة مجلس الشعب يوم ٢٧ أغسطس ٢٠٠٧، بأن جميع ممتلكاته آلت إليه قبل توليه الوزارة،

وذلك أثناء مناقشة المجلس طلب النائب المستقل، علاء الدين عبدالمنعم، و٥٤ نائبًا آخرين بإحالة سليمان لجهاز الكسب غير المشروع، بسبب تضخم ثروته بطرق غير مشروعة.

وتؤكد المستندات امتلاك أسرة إبراهيم سليمان ٩ سيارات فاخرة و٣ قطع أراض بأرقي مناطق مصر الجديدة، منها فيلا النقراشي باشا، قام سليمان بشرائها مع أبنائه القصر وزوجته خلال توليه الوزارة،

ومن المقرر أن تنظر محكمة شمال القاهرة اليوم هذه المستندات، ضمن استكمال الدعويين القضائيتين بين إبراهيم سليمان والنائب علاء عبدالمنعم، الذي أكد لـ«المصري اليوم» أن الوزير السابق النائب الحالي عن دائرة الجمالية، خالف الدستور، الذي يوجب علي أعضاء الحكومة عدم شراء أو استئجار شيء من أموال الدولة أو ممارسة التجارة.

وأضاف عبدالمنعم أنه سيرفع دعوي قضائية ببطلان العقود التي أبرمتها وزارة الإسكان مع أولاد وزير الإسكان وقتها، وسحب الأراضي والفيلات منهم وبيعها بالمزاد العلني،

موضحًا أن سعر الأرض التي تم بيعها بحوالي ٣٠٠ جنيه للمتر، وبالتقسيط، يصل إلي أكثر من ١٠ آلاف جنيه للمتر حاليا، كما سيجدد بلاغه لجهاز الكسب غير المشروع في ضوء المستندات الجديدة.

وانتقد عبدالمنعم تقديم سليمان صورة من الوسام، الذي منحه إياه الرئيس مبارك إلي المحكمة، معتبرًا أن هذا يمثل سوء نية لإعطاء انطباع بأنه تحت الحماية، مؤكدًا أن الوسام لا موضع له في هذه الدعوي.

[عاشق الترحال]

السلام عليكم ورحمة الله وبركاته

معلش وضح كلامك من فضلك لأني عمري ما أصدق الكلام ده!!!!!!!!!!!!!!!

أنت عاوز تقول أيه أن الحراميه في بلدنا هما اللى بيتكرموا علشان الحاشيه حراميه والمسؤلين حراميه وحاميها حراميها يعنى ولا ايه

لأ أنا ماأسمحلكش بالكلام ده !!!!!!!!!!!!!!!!!!!!!!!

ولا عاوز تقولى أن أغلبية أعضاء (مجلس الأنس ) قصدي الشعب مبيحضروش الجلسات ولما بيحضروا بيقعدوا يتسلوا ويتسامروا ويقصقصوا لب ومنهم اللى بينام وساعة لما يسألهم رئيس المجلس موافقون يصحوا ويقولوا ( مناااااافقون ) قصدي موافقون .وكمان بتقولي أن أحد المصوريين صورهم كده ونشرها في الجرائد.....

لأ أنا ما أسمحلكش بالكلام ده !!!!!!!!!!!!!!!!!!!!!

بتقول ايه تاني أن بعض الوزراء والمسؤلين سرقوا أموال الدولة بالمليارات وأخدوا بالمثل اللى بيقول (( لو سرقت أسرق جمل )) يا أخي حرام عليك الكلام ده

لأ برضة أنا ما أسمحلكش بالكلام ده !!!!!!!!!!!!!

وبعدين كمان عاوزهم يقدموا إقرار ذمة ماليه حقيقي وواضح وصريح عن ثرواتهم وثروات زوجاتهم ؟؟؟؟؟؟؟؟؟؟؟ لأ بصراحه أنت زودتها !!!!!!!! مفيش أمانه ولا صدق ولا ثقة ؟؟؟؟ عيــــــــــــــــــــــــــــــــــــــــــــــــــــــــــــب يا أستاذ

ما أسمحلكش بالكلام ده !!!!!!!!!!!!!!!!!!!!!!1

أيه أيه أيه علي صوتك بتقول أنهم لما بيلاقوا مسؤل عاوز يعمل تصحيح للأوضاع الغلط ويمسك الحراميه و رأيه فيه نفع للبلد زى (( كمال الجنزوري )) يطيروه !!!!!! يجيبوا مكانه ناس فاشلين !!!!!!!!!!!!!!!!!!

لألألألألألألألألألألألألألألألأ

بس أسكت خالص معتش تكمل هتقول أيه تاني يارااااااااااجل كفايه ظلم وافترى عالناس الأشراف وتوزيع التهم عالمسؤلين اللي مموتين نفسهم علشان راحة الشعب المصري ليلاَ ونهاراَ دول من قله أكلهم ونومهم خاسين خالص ومصفوتين والواحد منهم لو نفضته متطلعش من جيبه جنيه ولا عشره جنية فكه فلوسهم ضايعه عالصدقات وإطعام المساكين و إيواء المهجرين والشحاتين وغيرهم من الناس التعبانين كل ده ومش عاجبين!!!!!!!!!!!!!!!!!

وبعدين بقى بتوع الدويقه هما اللي غلطانين لما الحكومه تبقى موفره لهم الشقق في كل مكان زي (( مدينتي )) مثلاَ وبأسعار مفيش أرخص من كده (( مليون وأنت طالع))

يعني مش فلوس كلام فارغ وأهالي الدويقة مصممين أنهم يقعدوا في مساكنهم تحت الجبل تبقى غلطة الحكومة ولا الأهالي ؟؟؟؟؟؟؟

الحكومة هتقطع نفسها يعني ولا أيه ؟؟؟؟؟؟؟؟

ناقص بقى تقولي أن الناس اللي غرقت في السفينه بتاعة السيد النائب / ممدوح اسماعيل كان هو مسؤل عنهم وهو اللي غلطان ؟؟؟؟؟؟ وأن المحكمة برأته كوسه؟؟؟؟؟؟

لازم تعرف يا أفندي يا محترم شيئين مهمين

أولهما // أن الغلط غلط الناس لأن بعضهم مبيعرفش يعوم ومتعلمش العوم !!!!!!! والبعض الآخر مكنش بيمارس رياضه ونفسه قصير علشان كده مقدرش يكمل للبر و غرق ؟؟؟؟

والدليل (( قالوله )) أن بعض الناس نجت من الحادثة وأولهم القبطان بتاع السفينة (( اللي أحنا بنشوفه فى الأفلام بيغرق مع السفينه )) يبقى الراجل يعمل ايه ؟؟؟؟؟؟؟؟؟؟؟

ثانيهما // أنه لا تعليق على أحكام القضاء

أنت شكلك مبتعرفش في السياسه ولا ( المهلبيه و .... اطيه ) أعمل فيك أيه بقى أسكت عيب هتحبسنا بكلامك ده وإفتراءاتك دي !!!!!!!!!!!!

فاكر الفيلم بتاع فيروز لما كانوا بيرقصوا ودخلت عليهم واحده لابسه عبايه لف وقالتلهم ((بس اسكتوا ! بس أخرسوا ! عيب ترقصوا وتهيصوا ! عيب ! عيب !عيب ! عيب))

شكلك عاوز تودينا في دهيه يا سي السيد !! أنت سمعت شرين وهيا بتقولك يبقى أنت أكيد أكيد في مصر

أنت إبن مين في مصر يا عم الحج ؟؟؟؟؟؟؟؟؟؟

السلام عليكم ورحمة الله وبركاته

[مسرور جدا]

السلام عليكم

عارفين الراجل ده(ابراهيم سليمان) عمل ايه كمان

خد قطعة ارض كانت تملكها امراة لها ابن معاق وهذه المراة خصصت قطعة الارض لبناء مركز للمعوقين

اخد المشروع واعطاه للزوجة المصون حرمه لتكملة الوجاهه او البرستيج بحيث تكون السيدة الفاضلة التي تعمل مشاريع للمعاقين والمعاقين منهم براء

وطبعا المراة التي اخذ منها المشروع جاء لها اكتئاب بالاضافة الي اعاقة ابنها

المركز اسمه اصدقاء الغد المشرق

هذة الواقعة حدثت بالفعل لانني كنت قريبه من اصدقاء المراة التي اخذ منها هذا المشروع

وحسبنا الله ونعم الوكيل