تعليمنا وتعليمهم والله يسامحك يا شامي

[se_ Elsyed]

أخويا الشامي من غير ما يقصد داس على جرح عندي يؤلمني كثيراً هو مش جرح بل شيء اشبه بالكالو .. بالرغم من اني حذرته كذا مرة وقلت له انا عندي كالو اسمه التعليم في مصر .. ومع ذلك رايح كاتب بعضمة ايده هذا الكلام

أخوانى...أخواتى

السلام عليكم و رحمة الله

اليوم - عذرا - سنخرج قليلا عن السياق الزمنى للقصة و ندخل مؤقتا للحديث عن أهم ما يميز كندا ..و هو موضوع التعليم...

حلقة اليوم شيقة جدا...و هى مهداة للسادة مسئولى وزارة التربية و التعليم. ..يمكن يعرفوا ليه كندا أصبحت الأولى فى التعليم على العالم...و احنا مش على الخريطة أصلا...اذا كان الأمر يهمهم...

يشمل مصطلح الهاى سكول (4سنوات دراسية) يعنى الأطفال ابتداءا من الصف التاسع و حتى الصف الثانى عشر...

خلال هذه المرحلة يدرس الطالب 32 مادة مختلفة بواقع 8 مواد دراسية كل عام على حدة...

كل عام دراسى بيكون 2 سيمستر...يعنى 4 مواد فى كل سيمستر...

سهلة دى...؟

يختار الطالب المواد التى يحب أن يدرسها على مزاجه...و خد بالك من "يختار" دى...لأن ذلك بيتم حسب ميول الطالب و رغباته و تطلعاته المستقبلية...يعنى مثلا الطالب غير مجبر مثلا انه يدرس مادة التاريخ اذا كان ميوله فى الأخر أنه يدرس طب....ليه نعكنن عليه و على عيلته اذا كانت ميوله مش تاريخية...

يجلس الطالب فى أول أيام الدراسة مع مسئول أو مسئولة توزيع المواد الدراسية و يتم اختيار المواد المرغوبة بحرية تامة مع بعض النصائح اللطيفة من المسئول حول اختيارات الطالب و ماهية المواد التى سيدرسها حتى لا يفاجأ بمكونات فى المنهج غير متوافقة مع اسم المادة التى اختارها للدراسة...

و كمان مع معرفة رغبة الطالب فى المستقبل يتم مساعدته فى اختيار مواد أخرى قد تكون مكملة لأختياراته...

و هناك مواد كنا نظنها ترفيهية كمادة الألعاب الرياضية و الموسيقى و الدراما و الفنون....الا انها تعامل بنفس الجدية التى تعامل بها المواد الأخرى و لها نفس الدرجات فى التقييم النهائى....

و يبقى أن المطلوب من الطالب قضاء عدد معين من الساعات الدراسية فى كل مادة يختارها...و يتم تقييم الطالب بامتحانات دورية مع مراقبة شديدة لتقدمه فى المادة المختارة و استيعابه لها خلال كامل فترة الدراسة...و قد يتدخل مدرس المادة و ينصح بعدم ملائمة ميول الطالب لهذه المادة اذا لاحظ عدم قدرته على التجاوب...و ساعتها يتم اخطار الأهل و الطالب بذلك ليتم احتيار مادة أخرى بديلة....

أيضا من حق كل طالب بنفسه أن يغير فى اختياراته حسب قبوله للمادة بعد بدأ الدراسة...فقد يرى الطالب أن اختياره لم يكن دقيقا و أنه مش مرتاح للمادة...للمدرس ...لزملائه... للكرسى اللى قاعد عليه ....أى شىء .....فيكون من حقه تغيير هذه المادة فى الأيام الأولى للدراسة...

طبعا لكل مادة مدرس و فصل خاص لتدريس هذه المادة... و يتحرك الطلبة الى مكان الفصل وليس العكس ...يعنى الفصل و المدرس ثابتين و يقوم الطلبة بعد كل حصة بالذهاب الى مكان الحصة الجديدة...

لكل فصل طاقة استيعابية...يعنى لازم كل طالب يكون محضر المواد اللى حابب يدرسها و يحجز مكان بدرى قبل بدء العام الدراسى...

فى حالة الطلبة اللى حضروا متأخرين (زى حالاتنا)...فان الست المسئولة قامت بكل ود و تفهم لظروفنا كمهاجرين جدد بأن تم استثناءنا من ذلك و قام الأولاد باختيار المواد التى يرغبوا فى دراستها براحتهم...بل أكثر من ذلك ذهبت معنا بنفسها لكل مدرس تستأذنه (مش عايز أقول تؤمره) انه يقبل طلبة جداد عنده حتى لو كان استكفى...

ناس ذوق...ذوق...ذوق...

الفصل مساحته مهولة...و هناك حرية للطلبة فى الجلوس على طاولات متفرقة دائرية منتشرة فى مساحة مفتوحة...و يجلس الطلبة فى مجموعات نقاشية...تدار فيها المناقشات بحرية تامة....و يترك للطالب فيها المجال للتعبير عن أراؤه...و هى فى الوقت ذاته فرصة يقتنصها المدرس لوضع تقييم للطالب دون أن يشعر عن مدى فاعليته فى الصف و اشتراكه فى المناقشات و قدرته على الخلق و الابداع كذلك اعتماده على نفسه...

الفصول التى يكون بها جزء عملى فى الدراسة تحتوى على أحدث الأجهزة للتدريب و التطبيقات المختلفة...

طبعا ناهيك عن الفصول الخاصة بمهارات معينة...و المكتبة الكبيرة...و ورش العمل و المعامل و معامل الكمبيوتر.... و غرف الموسيقى...و المسرح...و الصالة المغطاة للألعاب الرياضية و هى بحجم ملعب كرة السلة....و المطعم..و المتحف...و صالة الكئوس و الدروع التى حصلت عليها فرق المدرسة...

المدارس هنا ليس لها سور ...سور ليه ؟ مافيش سور عشان مافيش حد حينط من عليه و يزوغ....ثم يزوغ يروح فين...عدم حضوره للفصل يسجل عليه و بالتالى يسقط تقييمه فى هذه المادة....و هو الخسران...

معظم المدارس محاطة بكمية خضرة غير عادية...مدرسة بنتى محاطة بملعب كرة قدم...و ملعب كرة قدم أمريكية...و 8 ملاعب تنس...

الحصة الواحدة مدتها 75 دقيقة...و يكون يوم الطالب عبارة عن أربع حصص بينهم فترة راحة و غذاء مدتها 75 دقيقة أيضا يمكن خلالها للطلبة الخروج من المدرسة حتى الى البيت و العودة.

يستلم كل طالب فى بداية الدراسة دولاب خاص به (لوكر) يضع فيه كل احتياجاته عشان مش لازم يشيل على ضهره شنطة كبيرة....و ياخد معاه فى البيت الحاجات فقط اللى يحتاجها لمراجعة مادة معينة أو عمل مشروع على الكمبيوتر أو ما شابه...

لا يوجد زى مدرسى معين...

كل ما سبق ذكره مجانى...ماعدا 5 دولار تمن القفل بتاع اللوكر و 25 دولار تمن الصور التى ستلتقط للطلبة خلال الدراسة و كارنيه المدرسة....استغلال فظيع..

بمناسبة الصور...مسئولة المدرسة جاءت لتستأذن اذا كنا لا نمانع ان يظهر الأولاد فى الصور الجماعية خلال المباريات و المناسبات المختلفة التى يقوم التليفزيون و الصحف بتصويرها فى المدرسة...كوميديا و الله...

ولإن هذا الموضوع يثير في نفسي شجوناً كثيرة .. الا انني وغصبٍ عني افتكرته بالامس بعد ما تداولت وسائل اعلامنا جريمة ارتكبها حيوان بيشتغل مُدرس ابتدائي واسف لكلمة حيوان لإني بأغلط كده في مخلوق ليس لديه عقل وبالتالي لا يُحاسب على افعاله وهو الحيوان

هذا المدرس الذي يبلغ من العمر 23 عاماً اخذ يركل طفل بريء عنده 11 عام .. اخذ يركله في قلبه برجله اللي يستاهل قطعها لحد ما الطفل مات وكل ده ليه ؟ عشان ما عملش الواجب بتاع امبارح ... وياريته ضربه في الفصل .. ده جره خارج الفصل ونزل فيه ضرب بافترا حتى مات وكإن المدرسة دي خرابة ماحدش موجود فيها

الان فقط يُعرض في برنامج العاشرة مساءً صورة للطفل اسلام اللي اتقتل .. اقسم بالله ملاك بريء يشع وجهه بالنور .. اللهم انتفم من هذا المجرم .. وانتقم من كل من يتستر عليه وعلى فساد امثاله

وحسبنا الله ونعم الوكيل

ولنا عودة في تعليمنا وتعليمهم

تصبحوا على خير

[se_ Elsyed]

دي صورة المرحوم اسلام

[سكر]

الله يصبر اهلة

انا بتفرج على الاب حاليا وهو بيتكلم

ولا حول ولا قوة الا بالله

والله الواحد قلبه بتقطع على الطفل

انا ابنى وقع على وشة كوب شاى حرق وشة وهو 8 شهور منذ اكثر من اسبوعين

والله ما بيجيلى نوم لحد دلوقتى

وجالى امراض الدنيا والاخرة فى الاسابيع دى

ربنا يصبر اهلة والله صعبان على الاب والام جدا

[Sherief AbdelWahab]

بكرة في العاشرة حتلاقي ألف حد من النقابة حيسمعوك تواشيح أعلى مستوى وحيدافعوا عن المعلم وكرامة المعلم وحيتعمله اعتصامين تلاتة وحيطلع بطل في الآخر..

عزيزي س س .. تخيل أي شيء مستفز وبكرة الصمح-على رأي بوحة- حتلاقيه حصل..

خلص الكلام

[Ghost]

لا و كمان في عيل نط من الفصل و انكسر ستين حتة علشان خايف من المدرس لما دخل و باين كان عاوز يديلوه الطريحة

و بقيه العيال انهيار عصبي

و على جانب اخر

في الثانوي العيل يعرف ياخد حقة من المدرس بره المدرسه

هو و معاه الشله اللطيفة مع كام مطوه و جنزير يخلو المدرس ما يعتبهاش تاني و لا يفكر انه يمد يده على حد بعد كده

العنف ده مرفوض من الجانبين

انا كنت في الثانوي و الله المدرس ما كان بيضرب غير بالقلم على الوش

ده معقول

خلو الي عاوز يتعلم يروح و يدرس

لو ما فيش تقدم من ناحيتة

المدرس ما يضربوش

و نرجع لدائره مغلقة ان المدرس مظلوم و مش واخد مرتب معقول

فما يشرحش كويس و يعمل دروس و العيال تروح الدروس

و طريقة تدرس = تلقين و حفظ من غير فهم و لا يحزنون

و للاسف الكلام و المهزله ديه راحت لحد الجامعة

و استاذ الجامعة بيشحت بس بطريقة بنت ناس و الدروس تتعمل في مراكز و فنادق كمان

و عليه العوض في العلم و التعليم اللي ميزانيه امن الدوله قده عشورميت مره

[أبو محمد]

وفى البيت بيتك كانت هناك فقرة عن مدرس اعتدى بالضرب على 15 تلميذا صغيرا أثناء توزيع وجبة البسكويت وتم نقلهم إلى المستشفى ... تم الاعتداء "بإيد مقشة" .. وأداة الاعتداء كانت معلومة جديدة فى الخبر أضافها السيد / محمد قاسم وكيل مديرية الترعليم بمحافظة الغربية أثناء مداخلته التليفونية

المدرس الذى قتل إسلام .. والمدرس الذى ضرب التلاميذ بإيد مقشة حديثا التخرج تم تعيينهما هذا العام فقط .. عرفت عمر مدرس الغربية وهو 26 عاما .. وأعتقد مدرس الاسكندرية من نفس العمر

هل أصبح التعامل بالعنف حتى مع الصبية والأطفال سمة من سمات المجتمع المصرى ؟ هل أصبحت ظاهرة اجتماعية تستدعى التحليل والدراسة ؟ .. أم أنها مصادفة أن يقع الحادثان فى يومين متتاليين ؟

[madzoro]

حسبنا الله و نعم الوكيل

يارب يصبر اهله و يرحمهم و يرحمنا و ينتقم لنا من مثل هؤلاء

[ام بلال]

شيء مؤسف جدا ربنا يخلف على أهله ويربط على قلبهم فعلا ، سبحان الله الولد فعلا شكله ابن ناس ، يا ترى المدرس ده هيقدر يحط راسه على المخدة وينام ؟؟!!

[قاهريه]

لا حول ولا قوة الا بالله ربنا يصبر اهله ويعوضهم عنه خير

انا سمعت برده عن مدرسه حدفت سسلسة المفاتيح في وش ولد صغير

هي طلبت من العيال يلموا الورق من الفصل قبل ما يروحوا البيت فولد صغيركان بيحط الورق في قفا زميله وفضل الولد ينادي عليها يا أبله يا أبله فهي طبعا اتعصبت لانه كان بيقطع كلامها مع صاحبتها ومش عارفه تكمل لوك لوك

فحدفت المفاتيح في وشه وقالتله الله يخرب بيوتكم

ومن حظه المفاتيح تسيب الدنيا كلها وتيجي في عينه تعمله انفصام شبكي ونزيف في قاع العين ويفقد البصر في عينه بسبب استهتار مدرسه

وربنا يستر

[blbl]

طبعا اللي عمل الحيوان المصري ده ملوش مثيل بس برده التعليم في المدارس في كندا مش سحر يعني. قارن عدد براءات الاختراع من كندا ودول تانية لن تجد كندا ماجيك يعني. ومن ضمن مخترعين كندا كم واحد منهم نتيجة التعليم الكندي ستجد نسبة قليلة. انظر الي اعضاء هيئة التدريس في جامعات كندا وخاصة التخصصات المعقدة ستجد بعض الاقسام مفهيش استاذ واحد "تربية" كندا ستجد هنود وصينين ومصريين وقليلا من الاوربيين. نظام التعليم في مصر يؤهلك للنحت في الصخر والعمل 24/7

[se_ Elsyed]

.

نظام التعليم في مصر يؤهلك للنحت في الصخر والعمل 24/7

مع إحترامي لرأيك وإنت حر فيما تقول .. فهل تقصد بنظام التعليم في مصر .. اللي هي دولة مصر بتاعتنا بتاعة الثانوية العامية والتنسيق والدروس الخصوصية والناس اللي بتجيب 100 % وما بتلاقيش كلية تدخلها ... هل تقصد مصر دي ؟

عفواً يا جماعة .. لا أريد أن ينحصر موضوعنا هذا في مناقشة قضية واحده فقط وهي مقتل هذا الطفل البريء .. ولكن نريد مناقشة حلول لمشاكل التعليم خصوصاً قبل الجامعي ..

لإن دي قضية مقتل أجيال كاملة .. نفسياً ومعنوياً ..

واللي مش شايف إن في مشاكل زي الزميل الفاضل بلبل .. ياريت يشرح لنا مزايا التعليم المصري الذي يؤهل للنحت في الصخر والعمل 24 ساعة على مدار الأسبوع بدون راحة ...

بالمناسبة يا أستاذ بلبل .. براءات الإختراع وعددها ليس دليلاً على جودة التعليم في بلد ما ....

فهل تعلم إن حتى نهاية عصر صدام حسين وقبل الإختناق بالعقوبات الدولية الصهيو أمريكية كان التعليم العراقي يُصنف في المرتبة الأولى على مستوى الدول العربية جميعها ؟

قرأت إمبارح معلومة غريبة جداً عن الدنمارك .. تخيل يا عزيزي إن في إحصائية إتعملت سنة 1925 يعني داخلين على 100 سنة أهو .. ولم يجدوا شخص أُمي واحد في الدنمارك ........ يـــــــــــــــــــــــــاه وإحنا لسه بنتكلم في 28 % نسبة رسمية - بعد التعديل والحبشتكانات - يعني 22 مليون شخص لا يقرأ ولا يكتب في مصر .... وسلامات يا نظام التعليم

وهل تعلم إن في سنة 2007 .. السنة اللي فاتت ... رئيس جمهوريتنا صحي من النوم كعادته وقام بتشكيل لجنة على أعلى مستوى تضم 15 شخص مهمتها ضمان جودة التعليم في مدارس مصر .. .. مش 15 ألف ماحدش يقرأ الرقم غلط ... 15 نفر ...

اللجنة دي هاتعمل إيه يا ريس ؟

ج : قال الرئيس حفظه الله .. إن اللجنة دي امامها فرصة 5 سنوات فقط - يعني لحد 2012 ربنا يدينا ويديكو ويديله طولة العمر وطويل العمر يطول عمره وينصره على مين يعاديه - للتأكد من إن جميع مدارس مصر والتي تزيد عن 40 ألف مدرسة .. جميعها تكون حامله لشهادة الجودة وتنطيق عليها شروط التعليم العالمية الموحدة ....... أنا راجل أينعم لكن في عهد الرئيس مباك إتعلمت ازغرط .. فأسمحوا لي أزغرط لووووووووووووووووووووووووولي

صباح الخير يا جودة .. ومساء الخير يا عالمية ...

15 سوبر مان هايركبوا سيارتهم النفاثة ويعدوا على 40 ألف مدرسة ويجوددوا المناهج والدكك والحمامات وملاعب الكورة والمعامل وكانتين المدرسة بتاع الساندوتشات .... يعني طبقاً لتوجيهات سيادة الرئيس .. على سنة 2012 كده هايبقى عندنا ييجي 50 ألف مدرسة زي مدارس دكتور الشامي الثانوية بنين اللي في كندا ويبقى في ملاعب بيسبول وأيس هوكي وسوكر ....

بس سيادة الريس ما قلناش إن لو ده ما حصلش يبقى هايحصل إيه ؟ والا مش هايحصل حاجه زي ما هو حاصل ؟

- من 3 أيام .. قامت ماما سوزان .. عقيلة السيد الرئيس - ما هي بتحكم هي كمان .. أصلنا بنتحكم بنظام البرين ستورمنج .. حكم عائلي ديمقراطي فوحلوقي .. فالريس بيقعد مع زوجته وأولاده كل يوم عالغدا وكل اللي عنده فكرة يقولها وينفذها كمان ... المهم ماما سوزان تبنت فكرة إسمها " مشروع تطوير الـ 100 مدرسة " وحصلت على دعم من رجال الاعمال وإبتدوا يصلحوا 100 مدرسة ..

المهم برضوا راحت منطقة الزيتون وأفتتحت 3 مدارس .. انا عارفهم كويس لإني قريب من المنطقة دي ...

وحد يقولي إشمعنى الزيتون .. أقو لهم أصل آبية زكريا عزمي هو عضو مجلس الشعب عن هذه الدايرة بالوراثة وبيفوز كل دورة بالتزكية ...

المهم مش عارف إزاي إفتتحت المدارس بعد شهر ونصف من بدء الدراسة ؟ و العيال كانوا فين الفترة دي كلها وهما ما عندهمش مدارس ؟ خصوصاً إنهم جابو المدراس عاليها واطيها وانجزوا المشروع الحضاري ده في 3 شهور فقط ؟

ما علينا ... والله العظيم تلاتة .. عرضوا صور للمدارس دي .. ومنها مدارس عريقة من زمان وثانوية بنات كمان .. الصور دي أُلتقطت من 3 شهور قبل الإصلاح فقط ... وأستطيع ان أقول بالفُم المليان إن لا مؤخذه أقذر زريبة مواشي تعتبر أنضف من أي مدرسة فيهم ...

جابوا منظر الحمامات ... شيء بشع .... وكان من الأفضل يخلوا البنات الكبار دول اللي قد العرايس - ثانوية عامة ... يعني لو واحده فيهم كانت إتجوزت كانت ممكن تبقى عندها عيال دلوقت - يعني كان من الأفضل للمدرسة إنها تخليهم يقضوا حاجتهم في الحوش أهو وسع ونضيف أفضل من هذا الشيء اللي لا هو حمام ولا هو أرض فضاء شاسعة يمرحوا فيها براحتهم ...

وإدخل يا معلم عالفصول والدكك المدغدغه و و و و و و

عارفين بيصحل كده ليه ؟

واحد يقول لي علشان ما بنصرفش كويس ؟

لأ يا حبيبي بنصرف وعندنا إدارة في وزارة التعليم إسمها " إدارة الأبنية التعليمية " فيها ألاف الموظفين والمهندسين والمصممين والمقاولين ووظيفتهم الوحيدة إنشاء وصيانة المباني التعليمية ... لكن صباح الخير .. الإدارة كلها كانت مكرسة مجهودها لصيانة وإنشاء بيوت وعيادات الوزير السابق حسين كامل بهاء الدين وإبنه الدكتور اللي ما كفاهوش الهبر على حس أبوه .. لأ ده شغال سرقة في كلاوي المرضى الغلابة وبيبيعها بالكيلو ... فهذه الإدارة مش فاضةن للتعليم والبلاوي دي ...

وهم لا يعلمون او يعلمون ويطنشون .. إن المشكلة مش إن إنت تُنشأ مدراس .. لكن المشكلة إنك تحافظ على هذه المدارس وتصونها كويس ..

بالظبط زي مشروع مترو الأنفاق ... حاجه حضارية ومصروف عليها مليارات .. وبقى لها بالظبط دلوقت 20 سنة .. تخيلوا لو مافيش صيانة بما يرضي الله لها .. طبعاً كان زمانها إتحولت لتكاتك - جمع توك توك - أو على الأقل بابور سكة حديد بيمشي بالفحم

كل ده بالنسبة للمدارس كحيطان وجدارن وأسقف .. أما المناهج والحشو والتعبئة والتغليف ... فلنا حديث اخر .. وياريت تسمعونا صلاة النبي وكل اللي عنده فكرة يقولها عشان على الأقل نبقى خلصنا ضميرنا أمام الله ..

[HDarwish]

زميلتي (هندية) في الشغل شافتني وأنا بقرأ الموضوع ... شافت الصورة وسألتني مين ده؟ ... حكتلها اللي حصل ... كان هاين عليها تعيط وقالت نفس كلام سي السيد ده حيوان والطفل ده صغير وبرئ ليه ...

كل ده علشان ما عملشي الواجب ما انشاله ما اتعمل الواجب ولا يوعيه يتعمل ... حسبي الله وهو نعم الوكيل ... إنا لله وإنا إليه راجعون

[Sherief AbdelWahab]

تذكرت - إذ فجاة- الفنان الكبير "أحمد مظهر" في أشهر أدواره "الأيدي الناعمة".. وعلاقة شخصية الأمير التي مثلها باقتدار بنياشينه التي يعيش عليها ويتعالى بها على الناس ولم يبعها إلا بعد أن أجبره شظف العيش على ذلك..

الشيء نفسه مع وزير التعليم..

صدعنا - وصدعتنا صحيفة "الأهالي" التي روجت له في أيامه الأولى- بما يعرف بـ"تجربة الإسكندرية" والتي عمل فيها سيادته البدع من أجل "رفع جودة كفاءة التعليم" و "تفعيل المشاركة المجتمعية" و "تقديم خدمة تعليمية أفضل".. التجربة التي تم تعميمها في عدد من "الأحياء الفقيرة" في المدينة الساحلية الأكبر و..و...

حتى بعد تربعه وتربعنه على الكرسي الموقر ظل وظل منافقوه يذكروننا بهذه الأسطوانة المشروخة..

بالمناسبة.. جريمة قتل الطفل إسلام وقعت .. في الإسكندرية..

خلص الكلام

[DIA ELDIN]

ربنا يصبر اهله فعلا ملاك برئ اللهم انتقم من اللي كانوا السبب مش بس المدرس هوا السبب

[blbl]

يا عزيزي يبدو ان مداخلتي لم تكن واضحة

ما اريد ان اقوله ان التعليم عندنا متطرف نحو اللانظام والاعتماد علي الطالب في كل شئ بداء من الطالب اللي بيمشي كيلو واتنين لحد المدرسة والطالب اللي بيجري وراء المدرس عشان يحجز عنده الدرس. في المقابل التعليم هناك (شمال امريكا واستراليا) متطرف في الاتجاه الاخر. فالطالب متدلع علي الاخر والنتيجة انهم يعانون الويل في البحث عن طلاب لاقسام الرياضيات في الجامعة. لان الطالب متعود علي spoon feeding وعدد ساعات شغل قليل. عندما تطرح بعض الجهات الحكومية بعض المشاريع البحثية ستجد معظمها مغلق علي حاملي جنسية الدولة فيما عدا العلوم الصعبة لن تجد هذا الشرط لكي تتيح للصيني والهندي والباكستني والمصري التقدم لان العيال ديه هي بتاعة اخبط دماغك في الحيطة24/7 . واكرر سؤالي معنا هنا في المنتدي عدد من طلاب الدراسات العليا في كندا وامريكا يا ريت اي حد في تخصص غير الطب والكليات النظرية يقولنا نسبة اعضاء هيئة التدريس وطلاب الدكتوراة ممن تلقوا تعليمهم في النظم المتقدمة لمن تلقي تلعيمه في النظم المتخلفة.

اذا كانت مدارسهم بمثل هذه الجودة لماذا تقوم كثير من الاسر المقتدرة (ولا اعني الملوينيرات) باحضار مدرسين في البيت لكل المواد والذهاب فقط للمتحانات العامة. يعني حاجة زي الدروس الخصوصية عندنا.

من وجهة نظري

نظامنا سئ نعم ونحتاج لتعديلة

نظامهم سئ نعم ويحتاج الي التعديل

نحن نتطرف في الحفظ وهم يتطرفون في عدم الحفظ اسئل طالب من عندهم عن رقم اساسي حاجة كدة نظام صلاة الظهر كام ركعة وشوف كام واحد هيجوب

نحن نتطرف في العنف والقسوة وهم يتطرفوا في التدليل

اما موضوع نسبة الامية فعفوا كيف تحاسب المصنع علي فساد مادة خام لم تصل اليه. معظم الامية تتركز في المناطق لفقيرة. حيث الاحتياج للجنية اكثر من الاحتياج للعلم. لماذا يتعلم هل دخله سيزيد? احيانا اه وغالبا لا. لماذا لا يوجد تشريع واحد يمنع ممارسة اي مهنة ن المهن الصناعية الا لحامل دبلوم الصنايع او ا شابة? الدول التي نقارن بها لا توجد اسرة ستموت من الجوع ان لم يعمل الجميع

هناك ان انقطع ابنك عن الدراسة ستذهب انت الي المحكمة. يعني الامية اخر من يتحدث عنها هو نظام التعليم واول من يتحدث هو المجتمع و مجلس الشعب رئيس الوزراء.

يجي بقي لعدد براءة الاختراع

براءة الاختراع يا عزيزي تماثل حصد البطولات في الرياضة فاذا كان نظامك التعليمي لم يحصد بطولات فانت تمارس العلم كهواية وليس احتراف. ما هي فائدة ان انا ادفع ضرائب عشان التعليم ما لم يكن هناك عائد مباشر علي وعلي الدولة. قلة الاختراعات معناها قلة العائد علي الاصول. عدم وجود ابحاث منشورة تعني اننا ما زلنا هواة وان التعليم مازال هواية ولم يوظف لحل مشاكل قائمة لزيادة الناتج القومي. عندما ندرس العائد علي رآس المال في البحث العلمي تكون كلمات مثل $100,000/ peer reviewed paper او 1000000/برئة اختراع وتجري مقارنات مع الدول الاخري لتري هل نظامك التعليمي مربح ام لا. كان عندي برسنتاشن محسوب فيها حاجات زي دية لعام 2004 لمعظم الدول المحترمة اذا وجدتها ساحاول رفعها علي المنتدي

[جويرية]

القاتل و المقتول الأتنين ضحية

[جويرية]

التعليم الجامعي

[ELSHAMY]

أخى س س

احصائية جديدة عرفتها تزيد من حرقة الدم...

تبلغ ميزانية الحكومة للتعليم فى مصر حوالى 26 مليار جنيه سنويا يذهب 93% منها للرواتب و الأجور....

و يبلغ ما تصرفه الأسر المصرية على التعليم حوالى 30 مليار جنيه سنويا يذهب معظمها للدروس الخصوصية...

شفت التخبط....و عدم التخطيط...

[se_ Elsyed]

و يبلغ ما تصرفه الأسر المصرية على التعليم حوالى 30 مليار جنيه سنويا يذهب معظمها للدروس الخصوصية...

عُمرك أطول من عمري يا دوك ..

كنت لسه هاتكلم عن المجانية التعليمية الهلامية ....

بس هاروح دلوقت وأبقى أكتب الموضوع براحتي بالتفاصيل .. لكن خد رؤوس الأقلام دي وأبقى رجع الأقلام عشان مش بتاعتي ...

ولإن الشيء بالشيء يُذكر

من 3 أيام جابوا في العاشرة مساءً موضوع عن بيع مستشفى الرمد العام بالجيزة لمستثمر .. ودي مستشفى حكومي .. فالناس عملوا مظاهرات والاطباء رفضوا لإن المستشفى بتخدم قطاع كبير جداً من الناس. وقيمة الكشف هي 1 ج فقط والعمليات مجاناً ويكفي إنها بتغطي المنطقة اللي بعد الجيزة كمان زي العياط وبني سويف ... إيخ

تخيل إن وزير الصحة صرح إن ماعندوش فكرة خالص عن بيع المستشفى اللي كانت خلاص الطبخة إستوت والراجل المستثمر هايستلمها !!!!!! لوووووووولي زغروطة يا حبيايب

فلما جابوا أراء ناس فاهمة الموضوع إتضح إن مافيش إعتمادات كفاية للمستشفى لإن جنيه واحد ده ما يشتريش قرطاس ترمس وإعتمادات الحكومة حدث ولا حرج .. فقلت لزوجتنا العزيزية اللي كانت بتتفرج معايا .. طب ما يخلوا قمية الكشف دي 5 أو 10 ج .. وأهو بكده هايدخل لهم إيرادات محترمة .. وهو يعني يا حاجه أم عمر اللي بيدفع جنية واحدة كل مرة يكشف فيها - ودي مش حاجه بيعملها كل يوم زي شراء الخبز كده - مش هايقدر يدفع 10 ؟ ده لا مؤخذه لو أخد توك توك يوصله او تاكسي .. فهايدفع له أضعاف المبلغ ده

فرمقتني المدام بنظرة نارية معناها " إنت هاتعملي زي ماري إنطوانيت اللي الناس المسحولة إشتكوا لها إنهم مش لاقيين العيش فقالت لهم كلوا حلاوه كلو جاتوه .. كلو كل اللي تحبوه "

بذمتك مش عندي حق يا دوك ؟

يارب يكون المعنى وصل لك ..

يعني مجانية إيه اللي نتلكم عنها ؟ آه المصاريف في مصر 40 و 50 ج سنوياً وهي شيء خرافي وممتاز جداً وبيشيل عن ناس كتيرة مش قادرة عبء كبير ... لكن إحنا كده بنضحك على نفسنا .. لإن نفس الناس الغلابة دي كلها بدون إستثناء بتصرف أولوفات على الدروس الخصوصية وبتبيع اللي وراها واللي قدامها عشان تعلم عيالها .. وده عشان مرتبات المدرسين معدومة العافية فبيضطروا يسلقوا الحصص لو كانت في حصص أصلاً فالعيل بيضطر ياخد درس خصوصي وينحل وبر اهله ... فلو إتكلمنا عن المجانية يبقى كده بنضحك على انفسنا لإنها على الورق فقط ..

طيب ليه ما أخليش المصاريف 500 ج مثلاً وتُدفع على أقساط .. والغير قادر أو اليتيم او اللي حالته تستدعي المجانية هو ده اللي يستفيد من الدعم ؟

وبكده يبقى هابني مدارس نضيفة .. وهاروشن المدرسين وأخليهم يركبوا مرسيدس ويسكنوا كلهم في العبور جنب كارفور .. بس الإوله شرط أخر ضلمه يا حلو .... يعني اللي هاظبطه بيقل ضميره في الحصة وبيجبر العيال إنها تاخد دروس خصوصية عنده .. يبقى هاعلقة من حواجية على باب المدرسة

عداني العيب يا عم شامي ولا أنا راجل باتكلم من فوق البرج العاجي وماسك في إيدي سيجار هافانا ولابس في صابعي خاتم ألماظ ؟

[ELSHAMY]

و يبلغ ما تصرفه الأسر المصرية على التعليم حوالى 30 مليار جنيه سنويا يذهب معظمها للدروس الخصوصية...

عداني العيب يا عم شامي ولا أنا راجل باتكلم من فوق البرج العاجي وماسك في إيدي سيجار هافانا ولابس في صابعي خاتم ألماظ ؟

س س

عداك العيب و فات...فات...وفى ديله سبع لفات...

بس الثعلب المكار اللى ماسك التعليم عارف أصلا انه وارث تركة سودة من اللى قبله و عارف جوه نخاشيش قلبه انه ممكن يتزحلق من على الكرسى بسرعة.....

اضف على ذلك شوية قلة ضمير...على لا مبالاة ...على اهمال...نراهم رأى العين من الكبير و بالتالى لا نستغرب انسحاب ذلك على الصغير...

منظومة بايظة....

أثناء أجازتنا بمصر من كام شهر بنتى الصغيرة شخصت الموضوع و وضعت له حل...

قالت لى مصر دى لازم كل اللى فيها يموتموا (قصدها على الحكومة).... و معاهم الجيل اللى بعدهم....يموتوا خالص ...و نبدأ نربى جيل جديد من صغره على نضافة...

تعتقد عندها حق ؟