كتب المدارس العالمية بالسعودية

[ترنيم]

السلام عليكم ورحمة الله

إخوانى جزاكم الله خيرا على كل ما تكتبوه من مواضيع لأفادة إخوانكم

أرجو منكم الافادة عن كتب المدارس النترناشونال فلقد أتيت ألى جدة من فترة قصيرة وكنت محتارة جدا كى أجد مدرسة لابنتى وهى داخلة أولى ابتدائى وطبعا قرأت مواضيعكم فى المنتدى والى تناولت الموضوع ده بإسهاب وفى الآخر دخلتها مدرسة الآفاق العالمية وده بعد ما مدرسة الجلوبال مرضيوش يقبلوها لأن لازم تكون داخلة جراد 1 وهى بتعرف تقرأ وتكتب جمل كاملة باللغة النجليزية

المهم المدرسة الى هى فيها دلوقتى لسه ملسلموهمش الكتب حتى الآن وبيصوروا لهم كل يوم ورقتين تلاتة يدرسوهم لهم

فحد منكم يعرف أى معلومات عن المدرسة دى ولا هو خلاص معتش يجى منه السنة دى

ولو ممكن حد يعرفنى فيه عندهم هنا اختراع الكتب الخارجية زى الى عندنا فى مصر من أمثال الاضواء وكراون ومى تيتشر والحجات دى ولا لأ

وفيه هنا أماكن لبيع كتب أطفال وهى فين مش لاقيه لهم قصص غير فى الهيبر بنده أو جرير closedeyes.gif closedeyes.gif closedeyes.gif

وجزاكم الله خيرا

[أبو عبدالرحمن]

واضح إنك بتدوري على مدارس قريبة من حي الحمراء ، وإلا كنت نصحتك تروحي مدرسة الثامر بحي السلامة أو دار جنى بحي الروضة

عموما مدرسة الآفاق أقل مستوى وتنظيم من هاتان المدرستان ومن جلوبال أيضا

أحيانا بيكون في تأخير في شراء بعض الكتب من قبل المدرسة وبالتالي توزيعها على الطلاب ولكن ده بيكون في بعض الكتب فقط وليس كلها ، لكن المدرسة لازم تقولك حتوصل الكتب اللي ناقصة إمتى

لاتوجد كتب خارجية لمناهج اللغات زي مصر

أنصحك تسألي في مكتبة العبيكان اللي في شارع الأمير سلطان فأنا شخصيا إشتريت منها بعض الكتب لأولادي السنة اللي فاتت ، وكمان توجد مكتبة تهامة يمكن تلاقي فيها

[ترنيم]

جزاكم الله كل خير وهبحث عن المكتبتين دول والمدرسة الحقيقة ما سلمتناش غير كتاب عربى وفرنساوى وكمبيوتر متصورين فقط

[Modest]

الأخت الفاضلة أم هاجر

الأفضل الاستفسار من المدرسة عن مواعيد وصول الكتب كما قال الأخ الفاضل أبو عبد الرحمن حتى لا تقومي بشراء كتب مغايرة لما ستقوم المدرسة بتسليمه.

و بالإضافة إلى المكتبات التي تفضّل بها أبو عبدالرحمن ، أنا أحبّذ أن تبدأي البحث في مكتبة "أفنان" و ذلك عن تجربة شخصية.

مكان مكتبة أفنان قريب من تقاطع شارعي السبعين و التحلية و يمكنك الاتصال بهم على رقم 6190025 لمعرفة المكان تحديداً.

[osaimi]

التعليم بقى مسخرة وبالذات للي عايشين بره مصر ، نا س يقولولك أحسن حاجه المنهج العربي وتنزل تمتحن الثانوية العامة فى مصر وناس تقولك ال آي جي هي المستقبل ودي عاوزة فلوس كتييييير أوي وناس تقولك السات ، والله تعبنا ومش عارفين نعمل ايه فى المدارس الإنترناشيونال دي ، شكلنا فى الآخر هنضطر ندخلهم كليات خاصة واهو بقت عيشتنا وغربتنا كلها عشان مصاريف التعليم !! معلش الكلام خارج النطاق ،، و انا فى المنطقة الشرقية مقدرش افيدك لكن حبيت اشارك - البركة فى الإخوه ماقصروش وربنا ييسرك ولنا جميعا الخير

[spain]

بصي انا كلامي مش حيضيف لك كتير بخصوص الموضو ع ده تحديدا

بس انا رايي انك ما تعتمديش علي المدرسة اعتماد كلي وجزئي في موضوع التعليم ده مهما كان مستواها

في حاجات كتير بيحتاجاها الاطفال في التعليم غير اللي بيعطوه في الشرق الاوسط في المدارس مهما كانت عالمية

زي الابتكار القدرة علي التفكير العلمي والمنطقي والتامل والابداع

في مواقع حلوة كتير علي النت بتعطيكي الفرصة للتعرف علي التعليم الامريكي والكندي(لانهم الافضل حاليا) وانتي في بيتك

زي

إضغط هنا لزيارة موقعي

في حاجات جميلة جداخصوصا للطفال اللي بالفعل درست انجلش بمدرسة انترناشونال او حتي بتعرف لغة كويس في مختلف الاعمار بس خدي فكرةعن طريقة عرض المعلومة حتي في السنوات الاولي وشوفي الاختلاف ولو عندك ألة طبع حيسهل كتير معاكي في اي وقت فراغ طبعا الفرق بيبان اكتر مع تزايد الاعمار

ده بس كمثال .........في مواقع اخري كتير

[ترنيم]

جزاكم الله كل خير والله أنا مش عارفة من غير تواصلكم الجميل ده انا وغيرى كنا هنعمل ايه فى الغربة ان شاء الله هتصل بالمكتبة دى وزى ما تفضلتم أنا سألت المدرسة وكل مرة يقولوا الاسبوع ده وطبعا الاسبوع مجاش حتى الآن

شكرا مودست هتصل بيهم ان شاع الله

من ساعة ما وصلت هنا وموضوع المدارس عامل لى دوشة فى راسى من أول ما بدأت أدور على مدرسة ودلوقتى الكتب والمذاكرة وخاصة ان الطريقة مختلفة عن مصر والبنت كانت متفوقة فى مصر وجت لقت نظام تانى ومناهج تانية

وزى ما تفضل osaimi وقال التعليم بره مصر والله وفى مصر كمان بقى مشكلة وفعلا الواحد زى مايكون هيشتغل هنا طول عمره

بس علشان يصرف على مدارس الولاد

وأنا فعلا شايفة دكاترة زمايلنا كبار فى السن وهم هنا فى جدة من زمان -والى منهم دخل ولاده مدارس انترناشونال- كل الى جابوه فى السنين الى فاتت دى مصروف على تعليم العيال وفى الآخر الولدكان جايب 103% وراح مصر مش عارفة ليه منفعش يدخل غير أعلام

والحقيقة الواضحة إن الى نفع من ولاد زمايلنا دول ه هو الى كان مدخل ولاده مدارس سعودية عادية ابنه دخل التنسيق المصرى وماشاالله عليه دخل هندسة بس الصراحة المدارس السعودى تخوف من الى بنسمعه

وطبعا شكرا ل spain على مشاركتك والموقع فعلا رائع والله يكرمك لو تعرف الكثير من مثل هذه المواقع تبعت لنا لينكاتهم لأننا بحث دائما عن الأفضل لأولادنا وكنت عايزة أوصل لمواقع زى دى ومعرفتش

[عصام أبوالفتح]

نصيحة للاخوة ... الثانوى لازم فى مصر

وقبل كده خير الامور الوسط .. المدارس العالمية بتمسح شخصية الولاد .. والمدارس الحكومة مستوى الاعداد والدراسة ضعيف

المدارس الاهلية الكويسة افضل شئ من وجهة نظرى مع التركيز على اللغة كمان فى الصيف ولغاية الاعدادى فقط .

[ترنيم]

والله يا أستاذ عصام رأى حضرتك فعلا جدير بالإخترام وأنا فعلا روحت أقدم لابنتى فى الأول فى مدرسة أهلية وتقريبا مصاريفها زى العالمية بس زى ما حضرتك قلت المشكلة فى اللغة وإذا رجعنا مصر بيتهئ لى مش هتدخل مدرسة اللغات الى كانت فيها

[عصام أبوالفتح]

الأخت الفاضلة ام هاجر

صحيح المصاريف واحدة .. بس فى الاهلية الولاد بتعرف عربى .. عربى ... عربى .. الانترناشيونال منهاجها عجب.. تاريخ وجغرافية الولايات المتحدة .. والعيال تقعد تتكلم انجليش طول النهار .. انما قرآن وحديث .. بلاطة .. ميح .. تخيلوا انهم بياخدوهم بالانجليش .. فى الاهلية بيعرفوا المنهج السعودى بالعربى.. صحيح برضو بلد تانية .. بس مفيش تغريب زى الولايات المتحدة .. و يضاف منهج موازى هو اللغة والكومبيوتر والانشطة

واللى ضامن تقوية أولاده فى الجزئيات دى فى البيت او غيره فى الصيف .. يبقى مدارس الحكومة مش وحشة بل انها افضل من العالمية من وجهة نظرى .. لانها تضع اساساً قوياً للاولاد بجانب البيت .. بينما المدارس العالمية تنزع كل جذور الانتماء والدين بجد

فى حاجة لاحظتها فى اولاد زمايلى اللى فى المدارس العالمية

العيال قدامك هادية جدا .. مفيش صوت خالص ومفيش تواصل بينها وبينك ولا مع اهلها .. بينما اصحابى بيشتكوا من سلوكهم دايما .. ده من وجهة نظرى نتيجة الازدواج اللى بيعشيوه العيال فى المرحلة دى .. عالم تانى خالص فى المدرسة بيوصله انه ينفصل زهنيا عن الواقع والحياة فى البيت ويكون مجتمع خاص بيه خصوصا لو توافرت وسائل الاتصال مبكرا سواء موبايل او كومبيوتر ويبدأ التشات وبالتالى متعرفش تقعد مع ولادك .. يا إما فى المدرسة او مع الجروب او قدام البلاى ستيشن .

أخيراً المدارس العالمية بدايتها كانت اصلا موجهة لأولاد الأجانب .. احنا بقى اجانب ولا فاهمين غلط ؟

[spain]

في كتير مواقع يا ام هاجر وعلي فكرة مبلغها مش مبلغ لانه لو قارنتيه بتصرفيه في ثمن شئ بسيط مهما كنتي في اي بلد

المهم في مواقع تانية جميلة ومجانا افضلهم

ل Liverpool University

إضغط هنا لزيارة موقعي

يعني ممكن حتي اللي عندهم اولاد وكبروا برضه حيفيدهم حتي لو رجعوا لسنوات اصغر اكيد حيلاقوا حاجات كتير تفيدهم ...من غير ما تاخد العيلة..... علي كندا وا امريكا ..يععععععععععععني شويييييييييييية

وبصراحة فعلا انا مع الرأي اللي بيقول العربي هو الاساس واللي ما اتعلمش عربي عربي صح من الاول يبقي مش حيعرف يمشي

[عصام أبوالفتح]

الاخ spain

شكرا جزيلا على الرابط .. اكثر من رائع

[ترنيم]

فعلا شكرا جزيلا......................اكثر من رائع

[sasaroka]

شكرا جزيلا علي الرابط اكتر من ممتاز وجزاك الله كل الخير

[ترنيم]

لو أمكن ما دمنا قد تكلمنا عن المدارس ممكن كل واحد ممنا يقول لى هو بيصر ليه على ادخال ولاده مدارس لغات ومش مثلا مدارس خاصة عربى سواء فى مصر أو خارجها

[ترنيم]

نسيت أقول لكم ان السؤال ده منقول عن لسان جدة أولادى ربنا يبارك لنا فى عمرها وهى دايما بتنصحنا اننا ندخل البنت مدرسة عربى ونهتم لها باللغة الانجليزية بس مايبقاش دراسة كل المناهج بالانجليزى وعلى فكرة هى مديرة مدرسة سابقة وهى بتقول ان ده لود على الولاد ملوش أى لازمة وبتستشهد على كده بينا أنا وزوجى إننا مكناش فى مدارس لغات ومع ذلك تفوقنا ونجحنا فى كلياتنا وكل أما أقول لها إن الزمن اتغير ماتقتنعش بالكلام بتاعى

[galaxy]

ازيك يا ام هاجر ........................

انا ابن اختي في نفس المدرسه grad 3وهما استلموا الكتب النهارده ولو تحبي تعرفي اي معلومات عن المدرسه ونظامها والكتب وغيره للتواصل من خلال الناس الملتحقين بيها راسليني ع الخاص وانا تحت امرك .................وان شاء الله تستفيدي وربنا يقدم الخير في انتظارك لاي معلومه ان شاء الله.....................تقبلي تحياتي........ :wub:

تم تعديل 5 نوفمبر 2008 بواسطة galaxy

[galaxy]

عموما يا ام هاجر الكتب كانت متاخره عن المدارس كلها ومنها دار جني والثامر وجلوبال ولكن المعظم استلم وفي ناس من الصف الاول استلموا النهارده عادي ............صديقه اختي بنتها استلمت وهي في الصف الاول.................وقالوا في المدرسه انهم هيراجعوا اللي اخدوه من اول السنه لان الناس كانت بدات تصور ورق بس ان شاء الله هيراجعوا لما الكتب وصلت........بس هي المشكله في الافاق دلوقتي ان في مدرسين كتير مشيوا ليه مفيش بديل................ودا ملخبط الوضع شويه................وانا تحت امر حضرتك في اي تفاصيل تاني.......................تحياتي

[ترنيم]

فعلا المدرسة حاسة ان أوضاعها مش مستقرة وده كان قلقنى قوى

[galaxy]

بصي حضرتك هي معايا الان ع الماسينجر وبتمليني والله................عموما المدرسه متميزة بس هي حكايه اللخبطه دي عشان نقص المدرسين بس هتظبط علي اخر الكوارتر ان شاء الله....................وهي لا تنصح بتلجلوبال وكمن في مدارس سمعه ع الفاضي...........................افضل مدرستين هما الاميريكان للمنهج ا لامريكي والانتركونتينتال بريطاني وطبعا هما غاليين جدا لا نهم تبع السفارات....................الجلوبال فيها نوع من العنصريه شويه تجاه الطلبه لصالح اللبنانيين الي حد ما ..........

الثامر من اقدم المدارس بس طبعا تعتبر غالية مش قوي وهي لسه نقله السنة دي لحي البوادي ومصاريفها زادت 3000 ر يال .

دار جني كله بيشكر فيها وخصوصا النظام لان مديرتها الفلسطينية كانت مديرة المنارات بنات ا لانجليش سيكشن 20 سنه د ا طبعا ليه وضع جامد..................

زعموما هي حتي قررت تنقل الولد السنه القادمه مدرسه جديده لانها شايفه ان الافاق مستواها قل كتير جدا لكن العربي فيها ممتاز جدا ولكنها افضل من غيرها بس بعد السنه دي ان شاء الله هي هتنقله رغم انهم بيشدوا ويظبطوا في الكوارتر التاني جامد وهما برضه وعدوا بكه بس هي هتنقله للمستوي عموما لان في كتير مدارس لغات لكنها سمعه بس مش اكتر وكمان الطلبه اولاد صاحبتها بيقولوا انهم مش بيفهموا من المدرسين حاجه.....................