مصر النهاردة كلها أهلي

[se_ Elsyed]

النهاردة كل مُحبي لعبة كرة القدم في مصر لازم يقفوا وراء فريق النادي الاهلي ... الذي سيخوض مباراة الذهاب في الدور النهائي لدوري الأبطال الأفريقي للمرة الرابعة عالتوالي وهو إنجاز يُحسب لمصر كلها .... حيث أصبح المنتخب المصري والأندية المصرية - ما عدا الزمالك wst:: - .. أصبح إسمهم مرعب لجميع تلك الفرق ..

ففوز النادي الاهلي ببطولة الأندية الأفريقية 3 مرات خلال أقل من 5 سنوات - 2001 ، 2005 ، 2006 - وفوز المنتخب ببطولتي الأمم الأفريقية لعامي 2006 و 2008 ... كان له أثر بالغ على أرتفاع أسهمنا قارياً وعقبال ما يبقى عالمياً يارب ..

وسيقابل الاهلي فريق القُطن الكاميروني الذي تأسس منذ 20 عاماً فقط ولا يوجد في جعبته أي بطولة قارية وأول مرة يصل النهائي ..

عشان كده هنا مكمن الخطورة .. فالفرق اللي بدون تاريخ بتدخل مثل تلك المباريات وهي لا يوجد لديها ما تخسرة ... ومجرد وصولها للنهائي في حد ذاته مكسب كبير.. بالتالي فهي تلعب للفوز والفوز فقط لتسطير تاريخ لها يكون بداية إنطلاقة .. أما إذا خسرت فكما قلنا لا يوجد لديها ما تخسره ...

يارب تكون مباراة حاسمة عشان الاهلي يلعب مباراة العودة يوم 16 نوفمبر وهو مرتاح ونحتفل كلنا هناك في حقول القطن الكاميرونية ...

قول ورايا يا موديست " مصر هاتفضل غالية عليه ... مصر هاتفضل غالية عليه "

[mamdowh]

طبعا ربنا يسهل وكلنا أهلي وان شاء الله الأهلي هيفوز 3/0 مش اقل من كده

بس أنا عايز أعرف هل الماتش متشفر بالنسة للغلابة اللى عايشين فى الرياض والا قناة النيل الرياضية دي فضائية وهاتبثه فضائي والا ساعة الماتش هاتكون أرضى للموجدين فى مصر واحنا ولاد البطه السوده هاندور على قهوه والا ايه الحكاية

الاعلان اللى بينزل فى قناة النيل الرياضية تحس إنه عايم مش عارف فضائى والا أرضى والا إيه

[Diab]

مشاركة بتاريخ اليوم, 11:31 AM

النهاردة كل مُحبي لعبة كرة القدم في مصر لازم يقفوا وراء فريق النادي الاهلي ... الذي سيخوض مباراة الذهاب في الدور النهائي لدوري الأبطال الأفريقي للمرة الرابعة عالتوالي وهو إنجاز يُحسب لمصر كلها .... حيث أصبح المنتخب المصري والأندية المصرية - ما عدا الزمالك - .. أصبح إسمهم مرعب لجميع تلك الفرق

لازم تفكرهم يعني

وسيقابل الاهلي فريق القُطن الكاميروني الذي تأسس منذ 20 عاماً فقط ولا يوجد في جعبته أي بطولة قارية وأول مرة يصل النهائي ..

إن شاء الماكنة هتطلع قماااااااااش

بس أنا عايز أعرف هل الماتش متشفر بالنسة للغلابة اللى عايشين فى الرياض

هما مين دول اللي غلابة يا كابتن ممدوح " بتوع الرياض "

أمال احنا نعمل ايه

معاك دياب

زعيم غلابة جدة :closedeyes:

[ابو محمود]

من أغنياء مصر الى فقراء الرياض

المبارة حقوق بثها ملك راديو وتليفزيون العرب نحن الأغنياء وصلنا الى اعلى حدود الرفاهية فى مصر الحبيبة

ونستعمل ابتكار مرفة جدآ عبارة عن جهاز فى صورة سلكة وتعرف فى مصر بالوصلة

علشان مصر كلها ناس أغنياء ولايوجد بيننا غلابة كان معكم محمود مصطفى مراسل المحاورات ............................من قاهرة المعز

[mamdowh]

معلش أصل اللى ايده فى الميه مش زي اللى ايده فى النار , المشكله ان كل اللى فى مصر فاكرين ان اللى فى السعودية قاعد يغرف فى فلوس , كل ما اتمناه ان ربنا ينصر الاهلى النهارده وانا اسف انى اثرت مشاعرك يا اخ محمود انت والاخ دياب, واخر دعاء ليكم ربنا ما يحكم عليكم بالغربه وبرضه الاهلى حديد , واحب اوضح سبب سؤالى انى باكره تشفير المباريات لانه ده يعتبر حجر حريه وفى نفس الوقت ابتزاز لان الرياضه يفترض انها متنفس للواحد سواء شاهدها او مارسها, واخيرا لعنه الله على من ابتدع التشفير وبرضه الاهلى حديد وهايفوز 3/0

[se_ Elsyed]

طبعا ربنا يسهل وكلنا أهلي وان شاء الله الأهلي هيفوز 3/0 مش اقل من كده

بس أنا عايز أعرف هل الماتش متشفر بالنسة للغلابة اللى عايشين فى الرياض والا قناة النيل الرياضية دي فضائية وهاتبثه فضائي والا ساعة الماتش هاتكون أرضى للموجدين فى مصر واحنا ولاد البطه السوده هاندور على قهوه والا ايه الحكاية

الاعلان اللى بينزل فى قناة النيل الرياضية تحس إنه عايم مش عارف فضائى والا أرضى والا إيه

متشفر طبعاً .. اومال أبويا الحاج صالح اوب كامل ياكل عيش منين .

لكن لما بتبقى في مباريات على في مصر بيذيعوها ارضي على لقاناة لاثانين وقناة النيل للرياضة .. وفي نفس التوقيت بتلاقي قناة البنيل للرياضة بتذيع مبارة لهوكي الجليد .ز أو بطولة كمال عظام .. وكده يعني ..

[mamdowh]

اشكرك على التوضيح يا سي السيد, ويبدو ان الواحد لازم يروح الشلال بس على الله ما يكنش فى ماتش سعودى والا هاتبقى زحمة.

[ايهاب سالم]

بيب بيب أهلي

في كندا ايضا الفقراء عندهم وصله .. لكن مش سلك

هنا الوصله عباره عن رسيفرات مفكوك شفرتها

[mamdowh]

من ولاد البطه السوده فى الرياض الى ولاد البطه السوده الكبيره قوى فى مصر يا بختكم عندكم وصلات واحنا ها نركب المواصلات عشان نشوف الماتش وان شاء الله الاهلى يفوز

الله يخرب بيتك باللى فى بالى

[Diab]

ريحت دماغي بعد الماتش علي طول أدخل موقع (في الجول) هتلاقي الاهداف كلها ( ده لو في اهداف اصلا )

www.filgoal.com

اصل احنا نحبوا نجيبوا من الأخر علي الرأي الإسكندرانية

يعني نخلي الناس تدفع فلوس وتضيع وقت واحنا نتفرج ع الجاهز

:closedeyes:

تم تعديل 2 نوفمبر 2008 بواسطة Diab

[Diab]

النتيجة 2 صفر بعد نهاية الشوط الاول

هدف من وائل جمعة

الثاني من فلافيو

[ايهاب سالم]

كان المفروض الماتش يخلص 4 / صفر على الأقل ... ثلاث فرص مؤكده لبركات و تريكه و فلافيو .. كان ييجي منهم 2 على الأقل

نفسي بس المعلم أبو تريكه يبطل يلعب كل كوره بخارج رجله ..

محسسني إن رجله ملهاش بطن ...

بس جون فلافيو حدوته ... لعيب كبير قوي

لا تقولي وراجو و لا أجوجو

و أحلى حاجه في ماتشات أفريقيا السنه دي إن كلها يوم سبت أو أحد

يالا ربنا يستر هناك

[ELSHAMY]

كان المفروض الماتش يخلص 4 / صفر على الأقل ... ثلاث فرص مؤكده لبركات و تريكه و فلافيو .. كان ييجي منهم 2 على الأقل

نفسي بس المعلم أبو تريكه يبطل يلعب كل كوره بخارج رجله ..

محسسني إن رجله ملهاش بطن ...

بس جون فلافيو حدوته ... لعيب كبير قوي

لا تقولي وراجو و لا أجوجو

و أحلى حاجه في ماتشات أفريقيا السنه دي إن كلها يوم سبت أو أحد

يالا ربنا يستر هناك

بس أنا قلقان...

العيال دول ممكن يكونوا وحوش على أرضهم....و مش حيفوتوا الفرصة بسهولة...

الستار موجود...

[se_ Elsyed]

من أغرب المباريات اللي شوفتها في حياتي ...

ماتش المفروض يطلع 7-0 ... وهدفين في اول ربع ساعة المفروض يخلوا المباراة مولعه

إلا إن لاعبي الأهلي تنافسوا في إضاعة أهداف .. لو واحد لعيب في فريق النور والامل لكرة الجرس .. كان أحرزها بمنتهى السهولة ..

وكان الاهلي لا يُريد إفساد عُرس النهائي وبالتالي يؤجل إعلان البطل ليوم 16/11 .. أو إن الاهلي نظر للمباراة على إنها مسلسل ميكسيكي ممل من عدة اجزاء ..

عزاءنا الوحيد إن الأهلي يعرف كيف يتعامل مع المباريات الأفريقية خارج أرضة .. وبإذن الله هدف أهلاوي في الكاميرون يُريح الجميع تماماً ..

بس أنا مازلت متغاظ ومستغرب من اللي حصل إمبارح

[Modest]

فعلاً المفروض كان الماتش ينتهي بنتيجة اعلى من كده و خصوصاً فرصه فلافيلو أفندي اللي في آخر الماتش و اختار إنه يصطاد عصافير بالكورة بدل ما يحطها في المرمى الخالي... 3-0 كانت تفرق كتير عن 2-0 لكن ملحوقة إن شاء الله يحرز هناك هدف بدل اللي ضيّعُه.

الهدف التاني رائع إتمزّجت منُّه بصراحة

الله يرحم ايام زمان أول ما فلافيو لعب للأهلي و جاب هدف وحيد في الموسم و كان بالصدفة لما الكورة خبطت في قفاه و دخلت جول :lol: .. معلش ما انا مش هافضل أقول يا حلاوتك يا أهلي و يا جمالك يا أهلي من غير ما أحط بصمتي كزمالكاوي متغاظ شوية

[Modest]

قول ورايا يا موديست " مصر هاتفضل غالية عليه ... مصر هاتفضل غالية عليه "

مصر هاتفضل غالية عليه ... مصر هاتفضل غالية عليه :lol:

طلبتك يابو الكباتن أغنيهالك في التليفون بس حلقتلي كالعادة .. مع إن وشي حلو على الأهلي من يوم ما عرفتك .. كانت معرفة هَم

[se_ Elsyed]

قول ورايا يا موديست " مصر هاتفضل غالية عليه ... مصر هاتفضل غالية عليه "

مصر هاتفضل غالية عليه ... مصر هاتفضل غالية عليه :lol:

طلبتك يابو الكباتن أغنيهالك في التليفون بس حلقتلي كالعادة .. مع إن وشي حلو على الأهلي من يوم ما عرفتك .. كانت معرفة هَم

خدوهم بالصوت قبل ما يحلقوا لكو ...

شوفت مكالمتك وكان معايا تليفون تاني .. وبعدها على طول إتصلت بيك وكرفتني يا معلم .

وبالإمارة وصلتني رسالتك بعد الجون التاني " الرجالة حطوا القطن في الغسالة "

شوطه حلوه يا موديست

معلش ما انا مش هافضل أقول يا حلاوتك يا أهلي و يا جمالك يا أهلي من غير ما أحط بصمتي كزمالكاوي متغاظ شوية

أي بُني .. هون عليك

بُكره الزمالك يكبر وتعيش وتشوفه في النهائي .. اي نهائي بقى مش هاتفرق المم اهو نهائي وخلاص ..

[Modest]

معلش ما انا مش هافضل أقول يا حلاوتك يا أهلي و يا جمالك يا أهلي من غير ما أحط بصمتي كزمالكاوي متغاظ شوية

أي بُني .. هون عليك

بُكره الزمالك يكبر وتعيش وتشوفه في النهائي .. اي نهائي بقى مش هاتفرق المم اهو نهائي وخلاص ..

مش باحب التفاخر علشان أنا متواضع جداً زي ما انت عارف بس الزمالك سحق البدرشين 8-0 امبارح .. و ما أدراك ما البدرشين (اللي هي جنب الجيزة انت عارفها)

انا مارضيتش اقول كده هنا في نفس الموضوع علشان مافسدش عليكم فرحتكم بالـ 2-0 اللي فرحانين لي بيها.

[محمد عبدالعزيز]

ألف مبروك لمصر كلها وعقبال الماتش الجاى - بس أنا بصراحة قلقان... العيال بتوع القطن دول شكلهم مش حيفرطوا فى الماتش الجاى بالساهل وربنا يستر.

الهدف التاني رائع إتمزّجت منُّه بصراحة smoke.gif

الله يرحم ايام زمان أول ما فلافيو لعب للأهلي و جاب هدف وحيد في الموسم و كان بالصدفة لما الكورة خبطت في قفاه و دخلت جول biggrin.gif .. معلش ما انا مش هافضل أقول يا حلاوتك يا أهلي و يا جمالك يا أهلي من غير ما أحط بصمتي كزمالكاوي متغاظ شوية whistling.gif

عمرك أطول من عمرى يا حاج موديست, والله أول حاجة خطرت ببالى لما شفت الجون التانى هو جون القفا بتاع فلافيو وقلت زيك "الله يرحم".

[قاهريه]

صحيح الماتش كان ممكن يخرج بأهداف اكتر من كده بس اللعيبه كانوا رجاله وعلى قد المسؤوليه

كفايه ان جوزيه في المؤتمر بعد المباراه انه فخوربكونه بيشتغل مع لعيبه زي دول

وربنا يوفقهم هناك ويرجعوا بالكاس