ســــــــــــؤال هام لواحد مسافر السعودية لأول مرة

[sokkary]

السلام عليكم ورحمة الله وبركاته

مساعدة الله يكرمكم

انا مشى دلوقتى فى مشوار سفر باذن الله للسعودية

بس عندى كام استفسار :-

- اولا هو الكفيل هناك هوا اللى هيبعت التأشيرة فهل هحتاج اعمل كشوف المستشفى والخطوات الكتيرة دى برده كده كده ولا لأ

- تانى مشكلة انا مكتوبلى فى البطاقة طالب بكليه الحاسبات والمعولمات فالراجل فالسعودية فالى مش هتنفع طالب لازم تغيرها الى استشارى تطوير برمجيات ,,, المشكلة انى شغال فى شركة خاصة ومليش اى تامينات ومش هينفع اكتبها غير حاصل على بكالريوس حاسبات ومعلومات بالشهادة بتاعتى

فهل دى فيها مشكلة انا بعت للراجل فالسعودية ورد قال هنعملها وعلى الله تقبل فالقنصلية بس تجيب شهادة من الشركة الىل انت فيها بالمسى الوظيفى دوا :: استشارى تطوير برمجيات وابعتله صورة منه عشان يطلع تأشيرة زيارة العمل من هناك ويبعتها باذن الله

انا عايز اعرف ايه المطلوب مى هنا ,,,

انا دلوقتى معايا الاستمارة المستعجلة فاضية ولسه مملتهاش ولسع بعدها هطلع الباسبورت اللى غالبا باذن الله هيكون بمهنه حاصل على بكالريوس حاسبات ومعلومات

سؤالى دلوقتى هل بحتاج اختم الاستمارة من الكليه ,, ولا بنزل العباسية بيها علطول بالشهادة بتاعتى وخلاص وبتتغير المهنخة

ولو احد من الاعضاء يقدر يقولى ايه الخطوات اللى بعد كده وهل فيه كشوفات او اى حاجة اقدر اخلصها بسرعه ,,, ياريت حد يرد عليا الله يكرمكم ويوفقكم

أول مرة سفر بقى

[sokkary]

ايه ياجماعه هتعملوا زى موظفين الحكومة ولا ايه

ياولاد الحلال اى حد عنده خبره ياريت يفيدنى الله يكرمكم

الف شكر مقدما

[sokkary]

سؤال تانى فوق الاولانى

الكفيل باذن الله هيبعتلى التأشيرة بمسمى وظيفى أستشارى تطوير برمجيات وطالب تعريف من الشركة اللى انا فيها يقول انى استشارى تطوير برمجات ,, لكن فالبطاقة والباسبور اللى لسه هطلعم باذن الله هتكون المهنة حاصل على بكالريوس حاسبات ومعلومات لانى معيشش غير الشهادة بس بتاعه الكليه

ياريت حد يفدينى ياجماعه هل هتكون فيه مشلكة لو رحت استلم التأشيرة باذن الله ,, انا هيكون معايا اصل التعريف من الشركة اللى انا فيها دلوقتى ان شاء الله اللى بيقول فيه انى استشارى تطوير برمجيات

وهل ممكن تطلع المهنه بالباسبور بمهنه غير اللى موجودة بالبطاقة ولا لازم هتكون هيا

جزاكم الله خيرا مقدما

[se_ Elsyed]

ايه ياجماعه هتعملوا زى موظفين الحكومة ولا ايه

ياولاد الحلال اى حد عنده خبره ياريت يفيدنى الله يكرمكم

الف شكر مقدما

يا أخي الكريم من فضلك .. لو سمحت .. أجروك

إنت داخل منتدى عام .. لا هي مصلحة حكومية ولا هي محل بقالة داخلها بفلوسك وبتتشرط على الناس .. انا جاوبت على الرسالة الخاصة اللي حضرتك باعتها وأجب على جميع أسئلتك .. لكن لما دخلت المنتدى ولقيت موضوعك ونرفزتك عشان الموضوع قعد ساعتين بحالهم ماحدش رد عليه فقمت داخل وواصف الناس بإنهم موظفين حكومة .. فزعلت وإتضايقت لإن ماحدش مُجبر يجاوبك .. خصوصاً لو ماعندوش فكرة ومايقدرش يجاوبك .

وهذا الرجاء موجه لجميع الزملاء ولمن يقرأ مواضيع المنتدى .. يا جماعة الرحمة شوية ويكون في ود متبادل بيننا ..

اللي داخل يسأل ما بيبقاش معاه عقد به شروط جزائية ممكن يوقعها على من لا يُجيبه ..

واللي بيجاوب بيبقى ذوق وكرم أخلاق منه وشيء لوجه الله ..

أنا لاحظت النبرة دي بدأت تزيد في المنتدى واللي داخح يدور على وظيفة وأعضاء المنتدى تجرأوا وماحدش عرض عليه وظيفة بالدولار وبمنصب مرموق خلال ساعة من تاريخ كتابة موضووعه فبيقوم داخل شايط وشاخط وناطر ..

فكده غلط وياريت يكون في تقدير شويه لظروف الناس

[melhamy]

السلام عليكم ورحمه الله و بركاتة

الأخ المسافر السعودية ... طول بالك شوية علشان انتى زعلت القائد الأعلى للمصريين / سى السيد ... وده شيئ مش لطيف و على فكرة نادر جداً لما الراجل ده يقفش على حد و ياريت تفهم ان الناس بتبقى مشغولة و مش أون لاين 24 ساعة ... على العموم حصل خير يا أخى و بعتذرك لك يا سي السيد و أدى ياعم 21 طلقة نارية فى الهواء تحيه على الصبح علشان تهدى بيهم أعصابك ووردة كمان

شوف يا سيدى الفاضل الموضوع بسيط جدا وهو أن ( لازم المهنة فى جواز السفر تطابق المهنة فى الرقم القومى تطابق المهنة فى تأشيرة العمل ) حلو الكلام الجانب التانى فى حالة المسميات الوظيفية اللى بيبقى فيها خبرة و استشارات و حركات من دى يبقى الطبيعى إن السفارة هتطلب منك شهادة غير شهادة الكلية لان المهنة اللى انت طالع عليها مش مهنة عادية دى فيها نوع من الأحترافية شوية ... بس دى كل القصة

بخصوص التفاصيل الدقيقة أزاى تعمل الرقم القومى و الأستمارة المستعجلة و الكلام ده كلة ده دورك انت يا بطل و شد حيلك و تعالى إنضم لصفوف المصريين اللى عايشين فى السعودية متنغنغين بخيرها و عزها و متنساش معاك عدد 2 شوال -كيس كبير الحجم - و احد للريالات السعودية و التانى للدولار الأمريكى و اليورو .

و يجعله عامر

[se_ Elsyed]

و ياريت تفهم ان الناس بتبقى مشغولة و مش أون لاين 24 ساعة ...

يا أخي أقسم بالله من أمبارح عندنا سيول في الرياض ومطر لا ينقطع .. لدرجة إن المياة تسربت إلى غرفة الكهربا الرئيسية والتيار أنقطع إمبارح وكلنا روحنا بيوتنا ... وحتى لو مشيت في الشارع فتلاقي أشارات المرور مش شغالة والدنيا معجونة وما حدش عارف يروح ولا ييجي ...

ده أنا باكلمك كده وانا متأكد إننا بالمنتدى لا أحنا موظفين حكومة ولا ملتزمين أمام أحد بالرد او تلبية طلب ...

ولكن كله لوجه الله لا أكثر ولا اقل ...

[MZohairy]

و ياريت تفهم ان الناس بتبقى مشغولة و مش أون لاين 24 ساعة ...

يا أخي أقسم بالله من أمبارح عندنا سيول في الرياض ومطر لا ينقطع .. لدرجة إن المياة تسربت إلى غرفة الكهربا الرئيسية والتيار أنقطع إمبارح وكلنا روحنا بيوتنا ... وحتى لو مشيت في الشارع فتلاقي أشارات المرور مش شغالة والدنيا معجونة وما حدش عارف يروح ولا ييجي ...

ده أنا باكلمك كده وانا متأكد إننا بالمنتدى لا أحنا موظفين حكومة ولا ملتزمين أمام أحد بالرد او تلبية طلب ...

ولكن كله لوجه الله لا أكثر ولا اقل ...

اللهم اسق سي السيد غيثاً مغيثاً مريئاً نافعاً غير ضار ،عاجلاً غير آجل

[عمر الجميل]

أول مرة سفر بقى

[hgalal]

سلامو عليكم، افيدكم علما بان ماهو مكتوب في الرقم القومي سيكتب في الباسبور ووجود المهنة وهي حاصل على بكالوريوس لا تمنع قبول السفارة لها. ولكن يجب الحصول على شهادة الخبرة لإرفاقها مع باقي الإوراق ويجب كتابة استشاري حاسب بشهادة الخبرة.

اما بما يتعلق بالكشوفات الطبية وإعادتها فأعتقد انة لن يكون لك حاجة لها حيث انك ذكرت ان التأشيرة المرسلة لك هي تأشيرة زيارة عمل اى محددة المدة وفي هذة الحالة يجب عليك مراجعة الشركة التي قمت بالتعاقد معها. لإني اعرف احد الإصدقاء جاء للعمل بواسطة تأشيرة عمل و كان علية الرجوع الى مصر كل ٦ او ٩ شهور على الإكثر لتجديدها فهي تعتبر تأشيرة مؤقتة وفي حالة قدومك الي السعودية بها واذا رغبت الشركة في استمرارك معها فيجب عليها ارسال تأشيرة عقد عمل ال مصر ورجوعك مرة اخرى الي مصر لعمل الكشف الطبي وخلافة والله اعلم.

نصيحة بخصوص تأشيرة العمل بعض الشركات تصدر هذة التأشيرة اما لحاجتها لإستشاري فعلا والتعاقد معه لفترة قصيرة ٦ شهور مثلا واما لعدم قدرتها او رغبتها في استقدام موظف ثابت وان تتحمل هي الشركة مصاريف التأشيرة وباقي شروط عقده معها ومميزات البدلات الخاصه به.

[sokkary]

السلام عليكم ورحمة الله وبركاته

انا لسه قارى الرساله طبعا لما سى السيد بعت الرد ع الخاص انا انشغلت بتخليص الاوراق زى مافدنى

انا بس مش عارف انت ليه اخدت الجملة على محمل الجد ,, هوا انت مش مصرى يعنى انا بهزر بيها لا اكتر ولا اقل

لكن مقصدتش بيها انى اقل بمقام حد فى المنتدى نهائى انا بتريأ ع نظام الموظفين الحكومة فى مصر ومقصجتش بيها اى حاجة ومكنش ليه لزمة خالص ورياى انك عملت من الحبه قبه زى مابيقولوا

انا شكرت حضرتك كتير على ردك السريع ليا فالخاص ,,, هنا فالمنتدى وفاى منتدى بشترك فيه بحترم الجديد قبل القديم

ومكنش ليه لزمه الكلام اللى انت قلته ده نهائى

[sokkary]

انا برده بقدم اعتذار منى صريح لكل اعضاء المنتدى ومش هقول اللى فهمه رسالتى غلط بس

وياريت ميكنش فيه حد زعلان او قافش وربنا يهدى الامور ويوفقنا لفعل الخير

والف شكر لكل اللى ردوا ع الموضوع

[غريب الخبر]

انا شكرت حضرتك كتير على ردك السريع ليا فالخاص ,,, هنا فالمنتدى وفاى منتدى بشترك فيه بحترم الجديد قبل القديم

ومكنش ليه لزمه الكلام اللى انت قلته ده نهائى

عموما ربنا يوفقك فى تخليص ورقك وفى سفرك كمان

بس الكلام اللى قاله سى السيد مش موجه بس ليك . الكلام لاى حد عنده مشكلة او سؤال عن اى حاجة لازم يعرف كويس ان الناس اللى موجودة غير ملزمة بالرد او اعطاء اجوبة . لانه كتير ممكن يكونوا بيقروا الموضوع لكن معندهمش الرد السليم او الكامل للاجابة علشان كده بيفضلوا يخلوا الاجابة لاهل الخبرة والمعرفة. ودى طبعا حاجة كويسة جدا علشان المعلومة تبقى موثوق منها . فمن الطبيعى ان الرد يتاخر يوم اتنين مش مهم . المهم انك هتلاقى فى المنتدى الخلاصة .

يعنى ناس على اعلى مستوى من التعليم والخبرة الكافية وده طبيعى عمرك ما هتلاقيه فى الحكومة .

توكل على الله . واعلم انه لايبخل عليك احد . والكل فى خدمتك.

مع تمنياتى بالتوفيق والنجا