نصائحكم : سفر للسعودية

[أبو حميد المسافر]

السلام عليكم :

انا محاسب خريج 2005 ومتزوج رحت مقابلة - انتر فيو - لشركة معرفتش لحد دلوقتي مجالها بالضبط فى الرياض بالسعودية وبعد ما الراجل اختبرني قالى عايز مرتب قد ايه قلتله مش اقل من 3000 ريال وهو لمدة سنتين والسفر طبعا عليهم والسكن برضه وقالي اي تفاصيل تانية لما نعمل التصفية النهائية وعرفت انه سافر من اسبوع للسعودية عشان يبعت ال ok للناس اللى هيسافروا .

مطلوب لو اتصلوا عشان امضي العقد اركز على ايه بالظبط فيه ؟

وهل الشركة الوسيطة دي - مكتب السفر - بياخد فلوس هنا مني فى مصر ولا بتتخصم من المرتب هناك ؟ ولا الكفيل هو اللي بيدفعلهم ؟ ولو المكتب بياخد نسبة بتبقي ف حدود كام ؟

[Melhakim]

بالتوفيق ان شاء الله

بس انا عايز اعرف على اى اساس طلبت 3000 ريال اعتقد انه راتب قليل بالنسبه لواحد متزوج

بخصوص المكتب اللى هيخلصلك الورق انا المكتب خد منى 3% من الراتب السنوى وانت اللى بتدفعهم مش الكفيل بس معرفش ده قانون ولا بيختلف من مكتب لمكتب

[أبو حميد المسافر]

انا سمعت ان ده رنج مرتبات الشركة فخفت ازود اكون ببالغ واترفض

والمكتب سمعت انه هياخد حوالي 8000 جنيه

ايه رأيك ومتشكر جد للتواصل

تم تعديل 5 نوفمبر 2008 بواسطة أبو حميد المسافر

[Melhakim]

انا شايف ان 8000 كتير اوى انا زى ما قولتلك قبل كده المكتب خد منى 3 % من الراتب السنوى واتحسب على اساسى الراتب بدون اى اضافات

احسبها انت بقى وانت ادرى بظروفك اكيد

[eng hoss]

غريبه موضوع المكتب ده أنا اللى أعرفه أن أقصى حاجه ياخدها المكتب هى 1500 جنيه

وأن الكفيل ممكن يجبر المكتب أنه يخلص التأشيرات للناس اللى أختراها مقابل الرسوم العاديه

والا عليك وعلى عائشه عبد الهادى وهى تقفلك المكتب واللى جابه المكتب

تم تعديل 5 نوفمبر 2008 بواسطة eng hoss

[أبو حميد المسافر]

يعني ايه ؟؟؟؟؟؟؟؟؟

شكلها نصباية ولا ايه ؟؟؟؟

يعني ممكن يكونوا بيبالغوا بس بيسفروا حقيقي ولا عشان المبلغ كبير يبقوا نصابين

دلوني ارجوكم

ولا يمكن عشان المكتب فى حتة نضيفة فى مصر

[drosama]

يوجد تحديد قانونى للنسبة التى يتقاضاها المكتب وهى محددة ب 2.5%من اجمالى راتب العام الاول .

[marconi]

هتشحت ف السعوديه ب ال 3 الاف

[أبو حميد المسافر]

ربنا يكرمكم على التفاعل

بس بجد خلتوني مقلق

شايفين اني اصرف نظر عن الموضوع ولا ايه ؟

[Diab]

3000 ريال راتب سكرتير هندي مش محاسب مصري

ومتقعش في الغلطة اللي الكل بيحسبها

3000 ريال يعني 4200 جنيه مصري

مستوي المعيشة هنا عالي يعني السكن لو لوحدك ألف ريال ومفيش ميكروباصات ولا مترو

يعني مصاريف الانتقال زيهم

هتشتغل بس عشان ألف ريال ومنين هتحوش

ده غير انك لازم تتجوز وتصرف كمان

لو هتتغرب يبقي لازم يكون الموضوع يستاهل

ارجو انك تعيد النظر في الموضوع ده وخصوصا انك لو شديت حيلك في مصر يعني كورسات و self study

هتفرق كتير معاك

تحياتي

تم تعديل 8 نوفمبر 2008 بواسطة Diab

[ابو حودة]

يا جماعة لازم نقسم الموضوع الى جزئين

الاول موضوع الراتب خلينا واقعيين الراجل دفعة 2005 يعني بالكتير عنده 25 سنة وخبرة حوالي سنتين بس يعني موضوع المرتب لازم يتحدد بناء على ذلك مش هأقول كتير أو قليل لكن الحسبة تكون في الحدود من كذا الى كذا

ثانيا موضوع المكتب

المكتب لو هو اللي جايب التأشيرة بياخد في الحدود اللي قال عليها 8000 جنيه لكن اذا كانت التأشيرة مش بتاعة المكتب كل اللي ممكن ياخده زي ما الجماعة هنا بيقولوا في حدود 1500 الى 3500 جنيه وعلى فكرة مفيش ورق بالكلام ده لان هما مش هيدوا حاجة تيجي الضرائب توجع دماغهم بيها

[أبو حميد المسافر]

كان كان المفروض اطلب كام وانا طالع ؟

سألت قالولي مش أقل من 3000 ريال

بس بجد كلامكم خوفني

لكن برضه كلام ابو حودة صح انا عندي 25 سنة فقلت لو اطلب 5000 ريال هيصرفوا نظر ويكبروا دماغهم

وفعلا المكتب هو اللى هيجيب التاشيرة وكل حاجة وتذاكر السفر على الكفيل والسكن كمان بس معرفش قريب ولا بعيد عن العمل

المهم هما فى خلال اسبوع او كام يوم بالكتير هيصلوا يقولولنا تعالوا امضوا العقود والراجل وافق عليكم

شايفين لما اروح ابص على ايه فى العقد وادقق فى ايه واتلكك على ايه م الاخر

لأن كلامكم ده هيخليني احط العقدة فى المنشار

مش صح برده كده

لو متمسكين بيا ممكن يزودوا لقيت العقد مش اد كده - حسب ما هتنصحوني - ممكن اكنسل واحلقلهم

وادي الواحد فى شغلانته ومش خسران حاجة

هو الواحد هيلاقى ال 8000 جنيه دول فى الشارع

[msayed]

بالنسبة للمرتب،

والله يا ابو حميد الموضوع يرجع لك انت اساسا ولظروفك وطابع حياتك وخبرتك طبعاً ووظيفتك وراتبك فى مصر.

فيه شوية نقط لازم لازم تتأكد منها:

1- الرعاية الطبية شاملة للأسرة ولا لك فقط وحتى كام طفل؟ لأن العلاج هنا غالى .

2- المواصلات للعمل عليك ولا على الشركة.

3- فين مكان الشركة بالظبط لأن هناك أماكن السكن فيها غالى يبدأ من 25000 ريال فى السنة وأماكن شعبيةقد يبدأ من 8000 ريال فى السنة ويستحسن فى بداية وجودك فى المملكة يكون سكنك قريب جداً من عملك فهذا أوفر لك وأكثر راحة للأسرة . وذلك عند اصطحاب الأسرة لأنه طالما انت بمفردك فعادة الشركة توفر لك سكن عزاب أو تتشارك أنت مع غيرك من العزاب فى شقة. وغالباً الشركات تعطى بدل سكن 25% من المرتب فاطلب أن يكون هذا فى العقد.

4- تذاكر السفر والأجازات كل سنة ولا اثنين والتذاكر تغطى كام شخص من الأسرة.

السعودية ليس بها مواصلات لكن لو انت سكنت فى منطقة بها جميع الخدمات وقريبة من العمل فممكن تهمل نسبياً بند المواصلات الداخلية.

نصيحتى اهتم بكل التفاصيل واسأل على أى شيء يقلقك وربنا يوفقك إن شاء الله وبداية موفقة.

أهم شيء أهم شيء انك قبل ما تييجى توضح لزوجتك طابع الحياة هنا لأنها ممكن تتعب من عدم القدرة على الخروج وحدها نهائياً وحتى عدم وجود بلكونة أو شباك تشوف الدنيا منه (غالباً وحسب المكان) وبعدها عن الأهل والأصدقاء ولازم توضحلها كويس الهدف الذى سافرت من أجله وتجعله هدف مشترك بينكما.

فيه حاجة مهمة جداً، التأشير هايكون المسمى الوظيفى فيها بتخصصك ولا عامل، العامل ليس له حق قانونا فى استقدام زوجته.

تم تعديل 9 نوفمبر 2008 بواسطة msayed

[أبو حميد المسافر]

يا جماعة انا هكون لوحدي

ومش معايا مراتي و لا اي حد

والسكن سكن عزاب

من الاخر سنتين بالمرتب ده كويس ولا المفروض بسنتين خبرة بالمهنة دي يبقا مرتبي اكبر ؟؟؟؟؟؟؟؟؟؟؟

[أبو حميد المسافر]

بعد لف ودوران وردود مشكور اصحابها

احيانا احس اني اتسرعت فى المرتب اللى طلبته وانه قليل والسفرية مش هتجيب همها

واحيانا الاقي مواضيع تبين ان المرتب ده كويس فى حدود تجربة محددة فى ظروف محددة

حيرااااااااااااااااااااااااااااااااااااااااااااان جدا

دلوني على السبيل

[msayed]

يا ابو حميد الموضوع نسبى

أولاً انت وقبل أى حاجة استخير ربنا ليل ونهار

وثلاثة آلاف فى ظروفك كويسين جداً لو مالى إيدك من الشركة وهايتحملوا السكن والتأمين الصحى والمواصلات للعمل على الأقل.

وانت كل ما بتقعد فى السعودية مرتبك بيزيد.

أما بخصوص الزوجة انت بتقول إنها مش هاتكون معاك، تقصد يعنى لو قعدت فى الشركة خمس سنين مش ها تجيب زوجتك خالص ولا مش هاتصطحبها فى الفترة الأولى؟ لأن ده يفرق طبعاً

معلهش انت مستعجل وعاوز رد من الآخر والحاجات دى نسبية والقرار فيها بإيدك لأن انت أعلم بظروفك وأعلم بأهدافك.

تم تعديل 9 نوفمبر 2008 بواسطة msayed

[أبو حميد المسافر]

بص يا باشا

هو العقد سنتين وانا مستحمل اقعدهم من غير زوجتي - وطفلي الرضيع - :blush2:

تمام ؟

لو مليت ايدي م الشركة والكلام ده كله

هل لو قعدت السنتين دول باختصار هقدر اعمل تحويشة كويسة

بمعني لو بعت لهم مثلا كل شهر 500 ريال وصرفت زيهم ع الأكل

وحوشت 2000 ريال هل ده يبقي كويس ؟ ولا العملية تبقي مش جايبة همها ؟

لكن طبعا لو جددت العقد معاهم لازم هجيب زوجتي وساعتها يبقا فى كلام تاني

انا بكلمك على الظروف دية

خصوصا ان مكتب السفر هياخد 8000 انت شايف ان ده كتير ولا قليل

وربنا يكرمك على التفاعل

ومستني ردك

[GoldenTiger]

انت مقلتش المرتب اللي انت قلته اللي هوه 3000 ريال ده شامل بدل الإقامة وبدل الانتقال ولا لأ علشان الاخوة يقدروا يحكموا كويس

[شاب مصري]

هتبعت لزوجتك وطفلك 500 ريال = 750 جنيه

اعتقد لا يكفي والله أعلم

وانت هيكفيك في السعودية 500 ريال ؟

اعتقد لا يكفي والله أعلم

اعتقد 5 الاف ريال كحد ادنى والا الموضوع مش مستاهل

ربنا يوفقك .

[قديم]

والله يا عزيزي انا شايف ان ثلاث الاف افضل من الفيــن ..واربعه افضل من ثلاثــه وهكذا ..

واللي يحدد المرتب ليس قدرتك على التوفيـر او كثرة التزاماتك الخاصه . بقدر ما هي المؤهل اولا وسنوات الخبره ثانيا والوضع العام للمرتبات في تلك الشركــه او البلد ثالثا

بغض النظر عن هل يكفي او لا واطلب كام .؟ طبعا لو كان المرتب 4 او 5 افضل لكن زي ما بيقول المثل اذا اردت ان تطاع فامر بما هــو مستطاع ..

وجابتي على سؤالك في اصل الموضوع فانا اقول لك .

زي ما سالت عن مستــوى المرتبات في الشركــه . يبقي عليك ان تسال عن مقر الشركـه وعن طبيعه الشغل فيها وهل هناك فرص اخــرى تقدر تشتغل اوفرتايم ...

بعدين لازم تعرف طريقه السكن في الشركه هل هناك سكن جماعي ولا ازاي .؟؟؟والشركه في اي مدينه ؟؟ وكيف تعامل القائمين على الشركه .

عموما مرتب 3000 ريال محاسب بخبرتــك انا شايف انها كويسه بل ممتازه جدا . لكن اذا هذا المبلغ ما يوفي معاك لضروفك الخاصه . فانت الوحـيد الي تقدر تقرر .؟

تم تعديل 10 نوفمبر 2008 بواسطة قديم