يا مصر تقبلى منى فائق الاحترام

[فنان محتار]

مش عارف ليه انا دايما شايف نفسى مصرى اللى فى فيلم المواطن مصرى ..

مش عارف ليه مش قادر اكون الولاه ابن العمدة مش قادر اكونه ..

جوايا غربة غربة كبيرة حاسس انى جوه بير عايش جوايا

نفسى ارجع زى زمان اسمع صوت العصافير واشم ريحة الحبايب وهوا النيل ..

انا حزين .. مع انهم كانوا بيسمونى المتفائل ..

دانا حتى مش قادر اطول عقد عادى .. كمان مش طمعان فى مميز من عند الوزير ..

انا اللى كلهم شهدولى لدرجة الدكتورة بتاعتى فى الكلية قالتلى انت هترجع الوان عصر النهضة ..

مش عارف اضحك على الكلمات ولا ابكى على حالى ..

امبارح بيقوللولى افرح لوحتك بتاعة مشروع التخرج ( ساكبة اللبن ) فى اودة العميد وعليه اسمك ..

قلت اروح اتصور جمبها علشان النعى والتحذير .. خلاص يا مصر كفاية كده انا تعبت من كتر التخدير ..

ارحمينى ارحمى ابنك ضناكى من الذل للولاد الكـ .. خلاص اتعلمت يبقى بالى طويل ..

خلاص يا مصر لكى كل احترامى وسلام بقى سيبينى وشفيلك بديل

بيشوى فنان محتار 6 / 11 / 2008

[Salwa]

ليه بس كدة ؟؟ ليه يافنان ...ليه يابيشوى .

انت لسا يادوب ....بتبدأ اول خطوات النجاح ..( ان شاء الله ).

عود على بدء ...

لاتيأس وبداية الغيث قطرة ...اليوم ترغب فى التصوير بجانب ..( صورتك ) .

وغدا ؟؟ ...بالتأكيد ستحتل صورك ورسوماتك اجمل الامكنة واشهرها ..

عد كما كنت ...متفائل.

وصدقنى ...صدقوا حين قالوا ...(( اضحك للدنيا تضحك لك ))..

اعرف شابا مثلك ..

يأس فجأة من كل شئ ...قرر الرحيل ..لايعرف الى اين ؟؟

قرر ترك كل شئ ...قال...ان اخسر بعض من ما املك خير من ان اخسر نفسى وهى كل ما املك حقيقة ..

اتفهمنى ؟؟ وتفهم ما اقصد ؟؟

هذا الشاب حاول اولا ...فى وطنه...فى ارضه ...وعندما اعيته الحيلة وذاق طعم الظلم ...قرر الرحيل .

لنحاول بكل التفاؤل ...توجد مخارج كثيرة لكل الدروب ..(( احيانا تكون خافية عن الاعين رغم وضوحها ))..

وان لم تجد فى نهاية المطاف اى ...بصيص امل ..او نور .

توجه الى باب الخروج المعلن عنه ..

وفى كل الحالات ...لاتيأس .

اليأس بداية الفشل ..

تفاءل...فالشمس تشرق كل يوم بنور جديد .

[عصام أبوالفتح]

أهم كلمات فيلم قص ولص لحنان ترك مع شريف منير

أنا كمان ماما صورتها هاتفضل فى قلبى .. كل ما هابعد ..كل ما توحشنى ..صورتها هاتبقى أحلى

جايز قوى أعرف أحبها من جديد

لا أدرى لماذا أحسست من صميم قلبى ان الكلمات لمصر

وكذلك احسست بان كلماتك يا فنان .. من صميم قلبك

مش عارف اقولك ايه .. غير ان البطل دايما فى مصر .. كومبارس

[أبو محمد]

مش عارف اقولك ايه .. غير ان البطل دايما فى مصر .. كومبارس

تطول أو تقصر المدة تبعا لصلابة وإصرار البطل .....

من يومين كنت أتابع حلقة قديمة من حلقات مسلسل زيزينيا ... المسلسل كان من أكتر من عشر سنين وكان على جزءين .. يعنى أكتر من ستين حلقة (لأنه كان بيعرض فى رمضان والعيد) ...

لاحظت فى الحلقة وجهين كومبارس .. طالعين فى مشهد واحد (مشهد حفلة تنكرية) .. مشهد واحد من ستين حلقة أو أكثر .......

كان الوجهان هما غادة عادل ... وأحمد عز ....

كومبارس الأمس أصبحوا لأبطال اليوم ... لم أر بطلا يبدأ بطلا

بيشوى ...

إطلع السلم درجة درجة .. اللى عاوز ياخد خمس درجات فى خطوة واحدة بيقع يابنى وبيتعور ... واللى بيطلع السطح عشان يتمتع بالشمس والهوا بينهج الأول من طلوعه على السلالم

[لولا]

فنان .. املى قلبك تفاءل زى ما كنت مليه ديما.. عمر اليأس ما كان الحل

مش عايزه اقولك كلام شعارات ..لكن مهما الحياه وقعتنا مش مفروض نستسلم

ديما نفض العفره وقوم اوقف من جديد.. افتح صدرك للدنيا للحياه للأمل

تفتكر الحياه ممكن نحقق فيها حاجه من غير امل ؟؟

خلى املك كبير وايمانك كبير وربنا يفتحلك كل الأبواب.

انت مش لوحدك اللى مريت وبيمر بالإحساس دا.. كلنا مرينا بيه فى وقت من الأوقات

لكن الأمل كان هو بجد النور اللى بينور الطريق..اعمل ديما اللى عليك

وكن على ثقه تامه بالله سبحانه وتعالى .. عندما يغلق باب سيفتح باب آخر

وغدا ان شاء الله سيكون افضل.

لك منى كل الدعوات الصادقه بالتوفيق والخير والنجاح.

لولا

[فنان محتار]

انا برغم كل شئ لو كلمة بتنحت فيا ..

كلماتكم دى امل وجايز تكون فكرة تخلينى استنى .. بتمنى انى اقدر اكمل ومنزلش ..

لانى خلاص زهقت ..

عارفين ان وديت شغل لامريكا بس برضه اشتغلته من غير روح يعنى كده نسخ ..

عارفين العنين فى كل اللوحات بتطلع حزينة علشان انا بحب مصر عايز عيش واموت فيها لاكن مش عارف ليه هى مش بتحبنى ..

متعرفوش قد ايه كلماتكم دى دبت فيا روح جديدة حتة محاولة ويمكن الواحد يحاول ويلقى بس انا برضه خايف ..

خسارة .. خسارة ان كل حاجة الواحد بيحبها بتخلص بسرعة ..

لاكن انا هاحاول .. وهاحاول ومش هيأس على الاقل عندى حاجة اعملها حتى لو اللوحة نزلت دموع فالدموع احيانا بتريح ..

واسف انى بتكلم كده لاكن والله يعلم قد ايه فرحتى لما لقيت حد بيرد عليا بعد ما كتبت كل اللى كان جواي فى لحظة كانت فيها روحى قوية على انها تقدر تعبر عن اللى جواى والحمد لله انى لقيت حد عنده وقت يسمعنى وكمان يرد عليا ويسندنى ويزقينى نقطة امل يمكن تخلينا احاول اشوف بكرة يمكن تكون لسه باقية عليه الوان

[عصام أبوالفتح]

الورق اللى فى ايدك يا فنان لو مش ابيض .. هاتتغير درجات كل الالوان

ولو انك حبيس غرفتك ام باب واحد .. مش هاتقدر تشوف باقى البيبان