نقل ملكية أصول الدولة إلى ٤١ مليون مواطن

[عصام أبوالفتح]

فى أولى مداخلاتى بالموضوع طلبت ان نتحاسب أولاً .. قبل هذا الطرح

ورد المسئولين امس فى برنامج 90 دقيقة على ما كنت اعنيه ان ما تم بيعه سابقا دخل فى موازانات الدولة للسنوات السابقة وتم مناقشته فى مجلس الشعب ومراجعته من خلال الجهاز المركزى للمحاسبات !!!

يعنى ننسى الموضوع !!! ... والحساب يوم الحساب

أنا اطالب المسئولين اللى بيحاسبوه نفسهم انهم يحاسبوا الشعب .. لان التاريخ لن ينسى ما يحدث وما حدث .

اذا كان لابد ان نسلم بحقيقة ان نصف البلد تم بيعها بثمن بخس فهذا الثمن أيا كان لابد ان يمثل الأصول الاولى لصندوق الاجيال المزمع انشاؤه .. ويكون بمثابة دين داخلى حكومى واجب السداد على الحكومة الحالية وجميع الجكومات القادمة ..

اذا ينبغى مراجعة كل عمليات الخصخصة السابقة .. وعمليات التخصيص الفاسدة وابطالها .. واضافة قيمه كل العوائد مما سبق بعد حساب معامل التضخم الى اصول صندوق الاجيال ..وحيث انه قد تم استغلالها فيما سبق لسد عجز الموازنات فانه لابد من تحويلها لديون حكومية .. واذا كان لهذه البلد نهضة فى المستقبل .. فلتكن نوايانا لصالح اولادنا واحفادنا .. او احفادهم حتى

[الحاج فوزى]

بالفعل .. هى الضربة الأخيرة قبل الهروب .. على ما تبقى من بقايا ..

هى كالتاجر الذى تولى تجارة ففشل فيها فأخذ يبيع منها ما ينتقى .. ثم قرر قبل تسليمها طوعاً أو كرها ، أن يبيعها بالكامل ..

أرى الأمر كما عرض حتى الأن فى الصحف القومية وفى أحاديث السادة المسؤولين كارثة .. كارثة ستمرر لتأخذ شرعية القانون ..

وسأصبح أنا المواطن المصرى صاحب الأرض والأصل .. صاحب سهم فيها .. سهم مباع لا يحمل قيمته الورقية ..

يسقط حقى فى ما أملك سوى ورقة بكام جنيه ..

تم بيع زبدة الأصول .. والأن ما تبقى لا يباع فرادى .. فليباع "لوكشة واحدة " وليلقى لكل مواطن لهايته .. التى سيفرح بها البسطاء .. وسيجرى لبيعها الكثيرون فرحاً بملاليمها ..

ومن يرفض أن يستلم سهمه .. يكون متبرعاً به لسارقه .. سخرية عجيبة الأصل والإخراج ..

[se_ Elsyed]

اذا ينبغى مراجعة كل عمليات الخصخصة السابقة .. وعمليات التخصيص الفاسدة وابطالها .. واضافة قيمه كل العوائد مما سبق بعد حساب معامل التضخم الى اصول صندوق الاجيال ..وحيث انه قد تم استغلالها فيما سبق لسد عجز الموازنات فانه لابد من تحويلها لديون حكومية .. واذا كان لهذه البلد نهضة فى المستقبل .. فلتكن نوايانا لصالح اولادنا واحفادنا .. او احفادهم حتى

الموضوع لسه في إيدنا يا عصام ...

ده لو في ناس عندها دين وضمير وتعرف ربنا وتخاف من يوم الحساب ..

والدليل على ذلك .. المهازل التي تحدث الان في الصرح العملاق الذي كان يُسمى عمر أفندي ..

وتم التواطيء من جميع المسئولين في الدولة على بيع بثمنٍ بخس .. مقابل عملات مهولة طبعاً .. واتحدى من يثبت منهم عكس ذلك ..

وبيتوا أمر دُبر بليل ووافقوا على بيعه لشركة انوال السعودية بكل فروعه بممتلكاته بسلطاته ببابا غنوجه بـ 500 مليون ج ... والله العظيم يا بلاش ...

في حين ‘ن فرعين تلاتة منه بس يجيبوا المبلغ وزيادة .. وزي الأفلام العربي .. كانوا على وشك التوقيع لولاش بعض صرخات التحذير هنا وهناك ... فأرتعدت فرائس الحرامية وقالوا إنهم أقنعوا الشركة السعودية إنها ترفع المبلغ إلى 900 مليون ..... بكل بساطة وأريحية !!!!!!

ولكن بعد 3 أو 4 سنوات من بيعه اهو ... قدموا ميزانية هذا العام بخساير مهولة ... وفي أفرع كاملة منه تحولت إلى خرابات وتم غلقها ... وكل ده إنتظاراً لدق المسمار الأخير في نعش هذا الصرح لبيعه بالحتة عشان أصحابه يلموا من وراه مليارات ...

بالمناسبة .. المدير التنفيذي الذي عينته أنوال لإدارة عُمر أفندي وقلوظت هذا الوضع هو " يهودي " ولا تعليق

[محمد عبدالعزيز]

توزيع صكوك الملكية العامة عن طريق البنوك ومكاتب البريد.. والقانون أمام البرلمان خلال أسبوعين

القانون اتحط فى الحلة وجاهز للسلق

كلها كام أسبوع ونشربه كلنا من غير مانعرف إيه اللى حوه الحلة!!!

يا جماعة عاوزين طريقة نشارك بيها فى المناقشات دى, ماشفناش خير من الحزب الوطنى ومجلس شعبه وقوانينه, مش معقولة نسيبهم يتلاعبوا بمستقبلنا ومستقبل البلد بالشكل ده.

هل فى طريقة الشعب يشارك بيها فى المناقشات ولا لأ؟

[madzoro]

انا عايز افهم ما هو سبب تشريع سياسة جديدة

هل الحكومة اقرت بفشل سياسة الخصخصة

طيب ما وجه المقارنة بين السياستين الخصخصة و توزيع الاسهم ؟ ايه اللي ممكن يكسبوا الشعب و ايه اللي ممكن يخسره في الحالتين

مش عارف يا ترى و صلت المعلومة و لا ايه

بمعنى اخر الافضل اننا نستمر بالسياسة القديمة ( الخصخصة ) و لا ننتقل للمشروع الجديد ؟ هوه اكيد في حلول تانية افضل من المذكوريين بس للناس اللي يعرفوا ربنا

تم تعديل 12 نوفمبر 2008 بواسطة madzoro

[ابو حودة]

زي ما وزير الاستثمار بيقول ان الصك ده هيبقى لحامله ( زي كارت التليفون المحمول) يعني لو كان 41 مليون او أكتر مين اللي هيعرف يراجع عليهم هو احنا عندنا صحة توقيع لهم دي نقطة والنقطة التانية اذا كان بيقولوا انه زي كارت التليفون المحمول لو حملونا بالديون ( الداخلي منها والخارجي ) كدة يمكن نصيبا ما ينفعش يدي ميسد كول

[أبو محمد]

توزيع صكوك الملكية العامة عن طريق البنوك ومكاتب البريد.. والقانون أمام البرلمان خلال أسبوعين

القانون اتحط فى الحلة وجاهز للسلق

كلها كام أسبوع ونشربه كلنا من غير مانعرف إيه اللى حوه الحلة!!!

يا جماعة عاوزين طريقة نشارك بيها فى المناقشات دى, ماشفناش خير من الحزب الوطنى ومجلس شعبه وقوانينه, مش معقولة نسيبهم يتلاعبوا بمستقبلنا ومستقبل البلد بالشكل ده.

هل فى طريقة الشعب يشارك بيها فى المناقشات ولا لأ؟

قرأت الخبر وقرأت التعليقات (التى بلغت حتى وقت قراءتها 25 تعليقا) ..

أصدق تعليق :

اللى فاهم..

تعليق عاشور -محاسب واقتصادى تـاريخ

١٢/١١/٢٠٠٨ ٥٧:١٣

مش فاهم حاجه واللى فاهم يفهمنى

أعلي الصفحة

ويلاحظ أن المعلق وصف نفسه بأنه "محاسب واقتصادى"

أفضل تعليق :

عبرة الأمور بخواتيمها

تعليق ibrahim tawfick تـاريخ

١٢/١١/٢٠٠٨ ٤:١٤

أتعجب من تبريء الناس وتنصلهم من المسئولية ... لأول مرة قرارنا حيبقى في ايدنا .. لو مش عايزين حد يشتري مش حنبيع وأهي الأسهم معانا .. أيه اللي حنخسره... ما تخلينا نقول ان الشعب له ارادة ومش حيبيع.. يعني هو أي واحد كان مستني القرشين اللي جايين من ورا الموضوع ده ... نفكر ونحسبها بالعقل الأول قبل ما نهتف ضد الموضوع.. أنا شايف ان الكلمة والقرار حيبفى لينا في البيع مش للحكومة...

أعلي الصفحة

أفضل سؤال :

احتمالان

تعليق حلمى تـاريخ

١٢/١١/٢٠٠٨ ١٨:١٣

بعد ان كشف الاعلام وغيره ما شاب الخصخصة من انحرافات خطيرة ضيعت المال العام بشكل بشع ومقزز فهل هذاهو البديل الجديد الذى يحمل فى طياته احتمالين لا ثالث لهما اما انه تكفير عن ذنوب الخصخصة او انه اسلوب تنكرى من اساليب الخصخصة البغيضة0

أعلي الصفحة

باقى التعليقات (23 تعليقا) عبارة عن تنكيت سخيف ، بكائيات و (ولولة) ، شورعة

[se_ Elsyed]

بالله عليك ده كلام يا عم أبو محمد ؟!!!!!!!!!!!!!

أتعجب من تبريء الناس وتنصلهم من المسئولية ... لأول مرة قرارنا حيبقى في ايدنا .. لو مش عايزين حد يشتري مش حنبيع وأهي الأسهم معانا .. أيه اللي حنخسره... ما تخلينا نقول ان الشعب له ارادة ومش حيبيع.. يعني هو أي واحد كان مستني القرشين اللي جايين من ورا الموضوع ده ... نفكر ونحسبها بالعقل الأول قبل ما نهتف ضد الموضوع.. أنا شايف ان الكلمة والقرار حيبفى لينا في البيع مش للحكومة...

قرار إيه وفي إيد مين ؟ هو أنت يا عم يا صاحب التعليق بتكلم ناس قاعدين مع بعض في أوضة الجلوس وكلهم فاهمين إقتصاد وقانون العرض والطلب وبإشارة واحده ممكن إرادتهم تتوحد ؟

هانفترض إن أنا وعم أبو محمد ومعانا 15000 واحد بالصدفة كلنا معانا اسهم شركة " البطاطس المسلوقة عبر البحار "

فبالله عليك إرادة إيه وكل واحد فينا ممكن يبقى عنده ظروف مختفة ولازم يبيع .. انا مثلاً بأجهز مبروكة بنتي اللي على وش جواز وبأشتري لها شوار وألمونيات ونحاس و و و و و .. فمضطر أبيع .. وفلان الفلاني هايعمل عملية البواسير وراح موشتيشفى حكومة قالوا له تعالى كمان شهرين عشان مافيش لك دكه فاضية فالراجل قال أسلك أسهم البطاطس واروح أعملها في مستشفى " كلنا لها الإستثماري " ...... وعم فهمي جارنا عنده عيال داخله المدارس ومحتاجين مرايل وشنط وحركات ..... يبقى إيه اللي هايجمعنا كلنا مع بعض ويبقى عندنا إرادة وما نبعش ؟

ولا نعمل إعلانات بقى نناشد فيها حملة الأسهم بعدم بيع أسهم البطاطس عشان حضرتك عارف إن لو كلنا بيعنا مره واحده .. فالبطاطس كده هاتتهرس والسهم هايبقى بتلاتة تعريفة وهاينزل الأرض ؟

وكمان إيش ضمنني إن مافيش كام واحد يتكتلوا مع بعض ( بيسموهم في البورصة - الهوامير - حيتان يعني ) ويتفقوا على سهم ويمرمطوه تقوم الناس تترعب و تبيع والشركة تروح في داهيه

[محمد عبدالعزيز]

أعتقد يا سى السيد إن الأسهم مش حتكون موزعة بالشكل ده, بمعنى إنها مش فى شركة معينة أو مصلحة معينة, ده بيقولك إنه سيتم تقييم كل الأملاك وتتقسم لأسهم, بمعنى إن السهم حيبقى فى الأملاك كلها على بعضها, حد فهم حاجة؟

[أبو محمد]

..... يبقى إيه اللي هايجمعنا كلنا مع بعض ويبقى عندنا إرادة وما نبعش ؟

وكمان إيش ضمنني إن مافيش كام واحد يتكتلوا مع بعض ( بيسموهم في البورصة - الهوامير - حيتان يعني ) ويتفقوا على سهم ويمرمطوه تقوم الناس تترعب و تبيع والشركة تروح في داهيه

سؤالان مهمان وفى غاية الأهمية ياعم سين سين

المشروع سيطرح للبحث والمناقشة لمدة 4 شهور ..

ما تيجى كل واحد يقول رأيه بعد ما يكون فهم المشروع ، وقرأ الآراء الموضوعية المؤيدة والآراء الموضوعية الرافضة

[أبو محمد]

أعتقد يا سى السيد إن الأسهم مش حتكون موزعة بالشكل ده, بمعنى إنها مش فى شركة معينة أو مصلحة معينة, ده بيقولك إنه سيتم تقييم كل الأملاك وتتقسم لأسهم, بمعنى إن السهم حيبقى فى الأملاك كلها على بعضها, حد فهم حاجة؟

ده اللى انا فهمته .. وهذا ما يسمى محفظة استثمارية .. فيها الكسبان بيشيل الخسران لحد ما يقف على حيله ... أيضا فهمت أنه لن تُطرح أى شركة من الشركات الخاسرة .. بل ستوزع أسهم الشركات الرابحة أو التى كانت خاسرة وأعيد هيكلتها (بمبلغ 8 مليار جنيه من حصيلة الخصخصة) وأصبحت الآن من الشركات الرابحة ... أعتقد الشركات المساهمة دى بيبقى لها جمعيات عمومية بيطرح عليها تقرير سنوى ومن حقها مناقشته ... يبقى على كل واحد له نصيب فى هذه الشركات يفتح عينه ويحاول المشاركة فى إدارة ما يملك ... هذا هو ما قصده صاحب أفضل تعليق (فى رأيى) بكلمة المسؤولية وكلمة الإرادة ... أما إذا استمرت "الأنامالية" ... فلا يلومن أحد إلا نفسه عندما يجد أنه فى لحظة من لحظات الغفلة التى نغرق فيها قد باع نصيبه ليشتريه من يعرف قيمته

[محمد عبدالعزيز]

أستاذى الفاضل أبو محمد

أعلم أن هذا القانون الجديد أو المشروع قد يكون فى مصلحتنا, ولكن أن يخرج هذا القانون من مطبخ الحزب الوطنى هو أكثر ما يقلقنى, فكم عانينا من منتجات هذا المطبخ بدات بتعديلات الدستور حتى وصلنا لقانون المرور الجديد.

كل الطبخات بدأت بكلام جميل ومعسول ويبدو علمى ومنطقى ومتوافق مع ماتريده الأغلبية العظمى من الشعب, وتنتهى بكارثة تجعلنا نترحم على الأيام الخوالى.

تعديلات الدستور أدت إلى تفصيل مقعد الرئاسة على مقاس الوريث المنتظر, ممكن نقول حاجة متعودين عليها ويمكن يجد فى الأمور أمور وربنا يعدلها.

علاوة ال 30% رفعت أسعار كل شئ على كل المواطنين بنسبة أكبر من 100% عشان موظفين الحكومة ياخدوا 30%. أدينا برضه لسه عايشين وبندبرها من هنا مرة ومن هنا مرة.

قانون المرور, رفع قيمة الرشاوى والضرائب والتراخيص, مفيش جديد برضه حاجات متعودين عليها وبنعرف نتأقلم معاها.

أخشى ما أخشاه أن يؤدى القانون المنتظر إلى بيع الجلد والسقط, وساعتها مش ممكن ينفعنا الندم.

[YaserK]

الشعب يملك؟؟

أنا شامم ريحة القذافي في الموضوع ده!!

[ssmaly]

انا فيه عندى اقتراح بسيط نقدم فيه محاولة بسيطة لنقل اراءنا فى موضوع هام وخطير مثل موضوع بيع مصر بالكامل (لوكشة واحده )بعد ان كانت بالقطعة (تاتا تاتا) مع الاعتذار الى صابر الطيب

برنامج العاشرة مساء سوف يخصص حلقة لمناقشة هذا الموضوع

ان اقترح ان نرسل للبرنامج ايميال بأسم المنتدى نعرب فيه جميعا وبأسم المنتدى وعن المغتربين أيضا عن كل مايدور من مخاوف وتوقعات ذكرنا البعض منها وممكن ان نحددها فى نقاط وبذلك نوصل صوتنا الى اى حد (حتى لو كان اطرش ومابيسمعش كلام احد)

بيقى عملنا اى شىء حتى ولو محاولة بسيطة

ارجو من الادارة الاهتمام بهذا الاقتراح

انا مصرى بحب بلدى ولست عواد اللى باع ارضه clp::

[boat]

عواد باع ارضة يا رجالة

[مشمش]

يعرف هذا الموضوع بـ "Voucher Privatization" و قد كان من السياسات التي يدفعها صندوق النقد الدولي بقوة, و قد اثبت فشلاً ذريعاً في العديد من الدول, و كان معارضيه من كبار الشخصيات الاقتصادية مثل جوزيف ستيجليتز (الحائز علي نوبل الاقتصاد)

هذه الورقه تحمل نقداً موضوعياً للغاية:

http://cog.kent.edu/lib/Ellerman5.htm

ان شاء الله سوف احاول تلخيصها ان اسعفني الوقت (او ربما قام احد الافاضل ممن هم اقدر مني بالتعليق علي خلاصتها clp:: )

[سكر]

انا بقترح انشاء لجنة من الاقتصاديين فى المنتدى وانشاء حلقة نقاش واسعة باسم المنتدى

خلاص الحكومة بتقول بالبلدى اخدم نفسك بنفسك

يعنى خلاص كله بعد كدة لازم يبقى زنبة على جنبه

العالم كله بقى قريب منك بضغطة زر وانا بفكر فى الموضوع دة من زاوية تانية

فاكرين قضية مراكز القوى فى اول ايام حكم السادات اتحلت ازاى

كل الوزراء تقريبا قدموا استقالتهم عشان يعملوا فراغ دستورى

السادات تعلب قلب الطرابيزة واستفاد من الموضوع

مش عايز اكتب تفاصيل اكتر من كدة

بس انا قصدى

لية الشعب ميكونش السادات ويستفيد من حركة الحكومة

الشعب مش غبى ومش عبيط بس كسول او سلبى على راى الشعراوى يرحمه الله

ودة دور الناس المتعلمة على الاقل يكفى واحد يعرف فى الاسرة يعلم باقى الاسرة

نقاط المشروع الواضحة حتى الان هى

1-البيع هيكون على شكل صكوك لمن هو اكبر من 21 عام

2-الصك لحاملة

3-البيع لا يشمل الشركات السياديه مثل قناة السويس و المؤسسات الصحفية

4-البيع لايشمل الشركات الخاسرة

5-البيع للمصريين فقط

6- البيع على شكل محفظة مجمعة لكل الاصول وليس لشركة بعينها

7- المستفدين منه حتى الان يقدروا بعدد 42 مليون جنيه

نقاط للمشروع غير الواضحة حتى الان هى

1-من صاحب التقيم المالى لاصول

2- ماذا عن من هم اقل من 21 عام

3- هل هناك مصاريف ادارية للبيع والشراء

4- من هم مديرى الشركات بعد البيع وهل يحق للمساهمين تغير مجلس الادارة

اقتراحات خاصة للمشروع من مجهودى

1- البيع يكون باكتتاب بحد اقصى 5% للفرد

2- مفيش حاجة اسمها الصك ببلاش (easy come easy go)

لازم الى عايز يشترى يدفع قيمة السهم

اولا لتفعيل قانون العرض والطلب حتى يتم معرفة القيمة الحقيقة للسهم ممكن يعمل دعايه بان السهم 2000 جنية وهو لا يساوى اكتر من 2 جنية

ثانيا حتى يعرف المشترى قيمة ما اشترى ولا يحدث هرولة فى البيع

3- من لا يستطيع الشراء

يتم التعامل معة بطريقة مختلفة عند توزيع الارباح (خصم قيمه السهم من الارباح )

اقتراحاتى قد تكون صح او تكون خطاء لكن انا عايز الناس تناقش المشروع على شكل نقط محددة

ونخرج من الحوار بقرار لمنتدى محورات المصرريين

خلاص الحكومة مش بتهرج وبترمى الكورة فى ملعب الشعب ولازم الشعب يكون جاهز بالرفض او بالقبول

تم تعديل 12 نوفمبر 2008 بواسطة ataamer

[سكر]

ايوة يا عم مشمش هو دة الى انا عايزة منك لازم كلنا نسيب مقاعد المتفرجين وننزل ارض الملعب

ومش لازم النزول يكون بالاضراب او العصيان او التخريب نشر الوعى ومعرفة الحقوق اقوى بكثير والحمد الله على نعمة الانترنيت

لو كنا فى عصر الثمانينات على الاقل كان ممكن الموضوع خلص فى اسبوع من غير لا حس ولا خبر

[عصام أبوالفتح]

اذا ينبغى مراجعة كل عمليات الخصخصة السابقة .. وعمليات التخصيص الفاسدة وابطالها .. واضافة قيمه كل العوائد مما سبق بعد حساب معامل التضخم الى اصول صندوق الاجيال ..وحيث انه قد تم استغلالها فيما سبق لسد عجز الموازنات فانه لابد من تحويلها لديون حكومية .. واذا كان لهذه البلد نهضة فى المستقبل .. فلتكن نوايانا لصالح اولادنا واحفادنا .. او احفادهم حتى

الموضوع لسه في إيدنا يا عصام ...

ده لو في ناس عندها دين وضمير وتعرف ربنا وتخاف من يوم الحساب ..

فى إيدنا أزاى واللى نقدر نعمله يا س س .. مين اللى هايحاسب الناس دى فى الدنيا .. قبل ما نموت ويموتوا ؟ .. لانهم ميعرفوش يوم الحساب وإلا ما كان منهم ماكان .

ملحوظة : أتحفظ على كلمة شورعة لوصف مداخلات الزملاء اياً كانوا ومن أياُ أتت هذه الكلمة ..لان الموضوع يهم جداً رجل الشارع العادى وكلنا هذا الرجل ..

الا اذا كان فى وزراء ولا سفراء معانا واحنا منعرفش .

[أحمد سيف]

هل ينبغي لنا أن نضع ثقتنا في حكومة الحزب الوطني ونعتقد جازمين أنها تعمل لمصلحة البلد؟ طبعا لا

هل تجاربنا وخبراتنا السيئة مع ما يسمى برنامج الإصلاح الاقتصادي تجعلنا نتوقع خيرا من مثل هذا الطرح؟ طبعا لا

هل يمكن أن يلومنا أحد على التشكيك بدوافع وأهداف القائمين على هذا المشروع والافتراض أن هناك مؤامرة تحاك من وراء الستار لسرقة مقدرات هذا الشعب؟ طبعا لا

ولكن ... ولنضع عدة خطوط تحت كلمة ولكن

ماذا لو كانت الحكومة صادقة هذه المرة وتسعى فعلا لتحقيق ما تتصور أنه مصلحة الشعب والوطن

هل يمكننا أن نناقش الموضوع بصورة مجردة متناسين ولو للحظة أن من اقترحه وسينفذه هي حكومتنا الرشيدة، وحين نصل الى نتيجة حول جدواه الاقتصادية ومشروعيته القانونية يمكننا بعد ذلك أن نناقش نوايا القائمين على تنفيذه؟ لا أعتقد أن ذلك صعب، وهذا ما سأفعله في مداخلتي هذه.

لنبدأ بالجانب الأسهل وهو القانوني ... هذه الشركات هي ملك للشعب حسب الدستور والقانون ... والحكومة كانت تديرها نيابة عن الشعب بافتراض أنها منتخبة بواسطته وتمثله ... وحيث أن هذا (الاختيار بواسطة الشعب والتمثيل الحقيقي له) لم يحدث (ولن يحدث في المستقبل القريب) بشكل صحيح، فإنه من الأسلم قانونيا والأفضل منطقيا أن يتولى الشعب بنفسه إدارة أملاكه بدل أن يتولاها عنه طرف لا يمثله ولا يراعي مصالحه ... وبذلك تعود للشعب القوامة على أملاكه.

الجانب الأكثر إثارة للجدل بالطبع هو الجانب الاقتصادي والاجتماعي ... برأيي أنه إذا تم دمج جميع الشركات المطروحة تحت شركة قابضة وتوزيع أسهم هذه الشركة على المواطنين ومن ثم إدراجها في البورصة بعد سنه كما تشير الخطة ... فإن عددا كبيرا من المواطنين ال 40 مليون سوف يسعون فورا للحصول على سيولة عن طريق بيع أسهمهم في البورصة الأمر الذي سيؤدي لهبوط كبير في سعر السهم، مع تذبذب سعري واسع نتيجه العوامل النفسية وتقلب العرض والطلب، ولكن في النهاية سيتمكن عدد لا بأس به من المواطنين من بيع نصيبهم والحصول على سيولة مناسبة تعينهم على مواجهة أعباء الحياة.

على الجانب الآخر ستكون الفرصة لباقي المواطنين من ذوي الدخل المتوسط والعالي شراء هذه الأسهم وتوسيع ملكيتهم في الشركة ... وفي النهاية أتوقع أن تقتصر ملكية أسهم الشركة على أقل من مليون شخص بينهم عدد محدود من كبار المساهمين ممن يمتلكون خبرة بكيفية إدارة الشركات وتحسين إنتاجيتها، ولن يكون لأي منهم سيطرة مطلقة أو تأثير كبير على الشركة بل إن تأثير صغار المستثمرين سيظهر وسيكون هدف الجميع تعظيم عائد الاستثمار

لنقارن هذا الأمر مع ما يحدث حاليا في حالة بيع شركات القطاع العام لمستثمر استراتيجي أو وحيد ... في حالة الخصخصة التقليدية إما أن تنجح الشركة وبعد ذلك يطرح جزء من أسهمها للمواطنين بعلاوة اكتتاب مرتفعة وفي النهاية من يحقق أكبر مكسب هو المستثمر الاستراتيجي أو أن تفشل الشركة ويتم تسييل أصولها وتحقيق مكسب رأسمالي يدخل في جيب المستثمر الرئيسي أيضا ... أما في حالتنا فإن المواطنين سيحصلون على الأسهم مجانا وسيشاركون في أرباح الشركة التشغيلية والرأسمالية منذ البداية، وهو نظام أكثر عدالة وكفاءة وسيعالج كثيرا من المشاكل والشكوك التي تثار عادة بخصوص تقييم الشركات واختيار المستثمرين في مثل هذه الحالات

لنقارن هذا المشروع بالإصلاح الزراعي الذي تم في عهد عبد الناصر حين تم توزيع الأراضي المملوكة للدولة والملك والإقطاعيين على الفلاحين ... الأمر الذي أثمر ثورة اجتماعية وتوزيع أكثر عدالة للثروة الوطنية وأتاح للكثيرين فرص الترقي الاجتماعي وتعليم أبنائهم. الفارق هنا أن المشاكل التي رافقت مشروع الإصلاح الزراعي مثل تفتت الملكية لن تظهر بنفس الحدة لأن الشركات ستظل قائمة بنفس حجمها وسيتم فقط توزيع شهادات ملكية أسهمها على المواطنين.

بالمناسبة مصر ليست الدولى الأولى في العالم التي تتيح لمواطنيها تملك أسهم في الشركات العامة بل كثيرا من الدول فعلت ذلك بنجاح مثل السعودية (اخترت السعودية لأني أعرف عنها أكثر من غيرها ولتشابه الظروف مع مصر) التي باعت (ولم توزع مجانا) للمواطنين أسهما في الشركات الكبرى مثل سابك والاتصالات والكهرباء، وأعتقد أن نفس الأمر حدث في مصر مع شركة الاتصالات المصرية ... فما هي المشكلة هذه المرة.

نأتي لنقطة احتمال سيطرة الأجانب على الشركات ... أولا احتمال حدوث ذلك في الخصخصة التقليدية أكبر لأن الشركة تباع كاملة الى مستثمر أجنبي ... وثانيا فإن طرح أسهم الشركة في البورصة سيتيح رقابة وقيودا أكبر على نسب تملك أسهمها ... وأخيرا فإنه حسب ما جاء في الخبر فإن الحكومة ستستثني بعض الشركات الاستراتيجية من الخطة وستحتفظ بنسب مهيمنة أو مؤثرة في شركات معينة لتلافي هذا الاحتمال.

أنا شخصيا مع أي خطوة تتيح للشعب مزيدا من السيطرة على موارده وحقوقه والحرية - المقترنة بالمسؤولية - في اتخاذ قراراته دون وصاية من الحكومة.

أعتقد أنني قد ناقشت المشروع بشكل مجرد ... ويبقى أن أناقش نوايا ودوافع الحكومة المعلنة والخفية من وراءه ... وهذا ما أفضل أن أتركه لغيرى من الزملاء.