نقل ملكية أصول الدولة إلى ٤١ مليون مواطن

[ziad]

طيب فين أوجه الأستفاده من مشروع زى ده؟؟؟ إزاى مواطن بسيط يستفيد من فرصه لن تحدث أو تكرر تانى؟؟؟

الأجابه على السؤال فى كلمتين

الأولى هى البسيطه والسهله ومكسبها قليل وهى إن المواطن يبيع وقتى يعنى يستلم من هنا ويبيع من هنا

التانيه هى الصعبه بس مكاسبها أكيد أكتر بس مخاطرها أعلى,وديه الى المفروض نناقشها هنا بس للأسف كتير من الأعضاء الموقرين أفشوا على زورار التريقه قبل حتى منعرف التفاصيل

على ما فهمت من كلام الوزير محى الدين فى القاهره اليوم

ديه هتكوون حزمة أسهم فى شركات القطاع العام بنسبه لا تخل بقدرة الدولة على الأداره زى شركات الحديد والصلب,المطاحن وغيرها

مكنش واضح طريقة التوزيع يعنى ليه سامح هياخد أسهم فى المطاحن والسياحه والمطابع ومحمد ياخد فى الغزل والصلب والزراعه,أظن هتكون عشوائيه لكنى لا أعرف ده مجرد ظن

فى حد عنده إضافه أو تعديل

http://www.investment.gov.eg/MOI_Portal/ar...ministerassets/

تم تعديل 14 نوفمبر 2008 بواسطة ziad

[سكر]

الى الاخ ziad

مكنش واضح طريقة التوزيع يعنى ليه سامح هياخد أسهم فى المطاحن والسياحه والمطابع ومحمد ياخد فى الغزل والصلب والزراعه,أظن هتكون عشوائيه لكنى لا أعرف ده مجرد ظن

الاجابة هى

6- البيع على شكل محفظة مجمعة لكل الاصول وليس لشركة بعينها

[se_ Elsyed]

للأسف كتير من الأعضاء الموقرين أفشوا على زورار التريقه قبل حتى منعرف التفاصيل

أنا من الناس اللي قفشت على زرار التريقة وعندي أسبابي اللي منها :

1- إن تلك الوجوه الموجودة في السُلطة من أول حُسني مبارك لحد أصغر موظف في أي وزارة .. لا أتوقع منهم أي خير بعد 26 سنة خراب ودمار وبيع في البلد بأبخس الأثمان .

2- مهما كانت قيمة السهم أو الصندوق خلينا نقول 10 لأ 20 لأ 30 ألف .. يالله إن شالله ما حدش حوش .. هل تعتقد سيادتك إن 30 ألف جنيه في إيد كل مصري هايحلوا مشاكل البلد أو هايحلوا حتى مشاكلنا الشخصية ؟

3- من يتولى هذا الموضوع ويسايق الزمن لتنفيذة ؟

أقول لسيادتك : جمال مبارك إبن الريس وحبيب رجال الاعمال اللي بيقدم لهم البلد على طبق من فضة

وتابعه محمود محي الدين اللي بيسمى " وزير الإستثمار " واللي الإستثمار في قاموسة يعني البيع ... حتى لما بييجي يبيع .. بيبيع بعبط وتسمعه بودانك والله على ما أقول شهيد وهو بيقول : إننا لما بنبيع أصل من الأصول لا يتم تقييم الأرض المقام عليها هذا المشروع ولا تدخل من ضمن ثمن الصفقة !!!!!!!!!!!!! لا تعليق

4- هل لما يفرقوا علينا الأسهم دي .. بكده هايضمنوا نجاح تلك الشركات او المصانع والدنيا هاتبقى زبادي في الخلاط ونبقى دولة متقدمة ؟

[محمد عبدالعزيز]

أخيراً سمعت معلومة موثقة عن الطريقة المقترحة لتوزيع الأسهم على المواطنين.

المعلومة سمعتها اليوم على لسان الدكتور محمد البنا أستاذ الاقتصاد فى جامعة المنوفية, وتم تقديمه فى برنامج صباح دريم فى حلقة اليوم على أنه أحد القائمين على وضع مشروع القانون فى الحزب الوطنى.

قال الدكتور فى رد على سؤال من أحد المشاهدين عما إذا كانت الأسهم ستكون فى شركات بعينها أم على المشاع, فأجاب بكل وضوح أن الأسهم ستكون فى مجموعة محددة من الشركات وستحاول اللجنة أو الشركة القائمة على التوزيع أن "تراعى العدالة" فى توزيع هذه الأسهم على المواطنين.

يعنى مجموعة الأسهم بتاعتى تكون فى شركات الحديد والصلب والألومنيوم مثلاً, ومجموعة الأسهم بتاعة أخويا ممكن تكون فى شركة غزل المحلة والأسمدة مثلاً.

صباح العدالة

[se_ Elsyed]

أخيراً سمعت معلومة موثقة عن الطريقة المقترحة لتوزيع الأسهم على المواطنين.

المعلومة سمعتها اليوم على لسان الدكتور محمد البنا أستاذ الاقتصاد فى جامعة المنوفية, وتم تقديمه فى برنامج صباح دريم فى حلقة اليوم على أنه أحد القائمين على وضع مشروع القانون فى الحزب الوطنى.

قال الدكتور فى رد على سؤال من أحد المشاهدين عما إذا كانت الأسهم ستكون فى شركات بعينها أم على المشاع, فأجاب بكل وضوح أن الأسهم ستكون فى مجموعة محددة من الشركات وستحاول اللجنة أو الشركة القائمة على التوزيع أن "تراعى العدالة" فى توزيع هذه الأسهم على المواطنين.

يعنى مجموعة الأسهم بتاعتى تكون فى شركات الحديد والصلب والألومنيوم مثلاً, ومجموعة الأسهم بتاعة أخويا ممكن تكون فى شركة غزل المحلة والأسمدة مثلاً.

صباح العدالة

على رأي الفنان علاء مُرسي في فيلم " إوعى وشك "

والله ما حد فاهمممممممممممم حاجه

يا جماعة إذا كانت هاتبقى صناديق إستثمار يبقى الموضوع مختلف وماحدش هايعرف هو معاه أسهم في انهي شركة .. لإن الصندوق عبارة عن سلة من الأسهم .. وكل صندوق يعامل كوحدة واحدة .. يعني ما أنفعش يبقى مع صندوق إستثمار وأبيع نصفه مثلاً ...

كمان لما بأجي أشتري من بنك صندوق إستثمار فما بعرفش ده هايخص أنهي شركات

اللهم إلا لو كان صندوق معاملات إسلامية .. فبأكون متاكد إنه لا يدخل فيه أسهم شركة سجاير او خمور مثلاً ..

[yasser mostafa]

الموضوع مهم جدا ان نفهمه من كذا وجهة نظر يعنى فى تصور للى ممكن يحصل و هو كالآتى :

ممكن الحكومة بسبب مشروع زى ده تلغى الدعم عن كثير من النتجات لأنها بمشروع زى ده بتكون شالت أيدها من أدارة الشركات و حولت الأدارة الفعلية للشعب نفسه بصكوك الملكية اللى حتكون معاه

الشعب اللى أخد صكوك الملكية أو الأسهم ( لا أعرف مدى صحة التعبيرين ) فيه منه الدكتور و المهندس و الصيدلى و الكاتب و المفكر و العامل و خريج الدبلوم و ساقط الأعدادية و اللى معاه شهادة محو الأمية بالعافية و العبيط .................... يعنى فئات (محدودة) تستطيع أدارة ممتلكاتها و فئات أخرى (قاعدة عريضة) ليس لديها القدرة و لا العلم الكافى لأدارة الملكية مما سيؤدى ألى حالة من الهرج و المرج يستفيد من هوامير السوق و البورصة مما سيزيد الفقير فقرا رغم ملكيته للشركات !!!! و يزيد الثرى ثراء فاحشا

بعد فترة من اللخبطة و الحوسة الشعب الغلبان و اللى مش عارف ممكن يبيع عند أول عرض بالشراء و لأى حد عشان ما يخسرش من جهة و ينفض من دماغه المسئولية من جهة أخرى يعن مستثمر أجنبى و لكن هذه الحاله مختلفة لأن المستثمر ده حيحل محل المواطن فى ملكه و أدارته يعنى من حقه يوفر لنفسه الشكل و الكيان الأمنى المناسبين لحماية كيانه و أملاكه

التصور وبالشكل ده مرعب و الواحد لو فكر فيه ممكن يرفض حاجة زى دى أنها تحصل عشان يحافظ على حرية و تماسك الوطن و أحنا بنعرض التصور ده أو المخاوف بمعنى أصح على المختصين لأفادتنا عن أحتمالية حدوثه عشان نكون مستعدين لذلك

[se_ Elsyed]

وبناء عليه

تخيلوا منظر ملايين الناس من الأُميين أو الناس الغلابة اللي عايشه اليوم بيومه .. وهما مدخلين وصلة دي إس إل في بيوتهم ومشتركين عند حد من البروكرز وتحديداً في الـ online trading ويصبح هم المواطن المصري اليومي هو متابعة أخبار البورصة عشان يعرف القطن عامل إيه النهاردة

قس على ذلك إن الـ 42 مليون داخل فيهم من أمثال أحمد عز وهشام طلعت وأحمد بهجت و ملايين من أمثالهم .. فهل دول برضوا هايروحوا يقفوا في طالور مكتب بوسطة العتبة عشان ياخدوا صندوق بكام ملطوش ؟

وعيش بقى .. عندك ملايين تانية .... مساجين ... ومهابيل .. وناس في أقاصي الأرياف وبدو .. وناس هاتعيش وتموت مش هاتسمع عن الموضوع ده أساساً و و و و .. ده غير الـ 6 مليون مصري اللي عايشين أو مهاجرين خارج مصر ..

وأتفق مع رأي الزميل يوسف مصطفى بإن عملية سحب إيد الحكومة هاتبقى بصورة تدريجية ..

يعني بعد كل واحد ما ياخد نصيبة .. هانيجي في يوم هانلاقي رغيف العيش بقى بجنية .. وتذكرة المترو بعشرة جنية وبتاعت الأتوبيس بحته بخمسة .. ومكاتب التومين تقف لا صابون ولا زيت ولا بطيخ ..

ولما نصرخ ونسأل الحكومة : الحاجات دي راحت فين يا حكومة .

فهاترد الحكومة بعد فترة وتقول : يالا ياض إنت وهو إلعبوا بعيد .. إنتو مش كل واحد خد حقه ناشف ؟ يبقى عايزين إيه تاني ؟ ... جيتكم القرف

------------------

وأريد من أي عاقل - ولو إن اللي بيعملوا مبارك معانا من 26 سنة يخلي المجنون يعقل والعاقل يفتح دماغه ويحطة مخه في ساندوتش وياكله بالهنا والشفا- ..

عايز كل واحد يسأل نفسه قبل أي تحليلات إقتصادية وإرهاصات أرتوازية :

1- هي يا ترى الحكومة بتعمل كده عشان ضميرهم صحي وهايطلعوا كلهم يحجوا السنة دي ويتوبوا لربنا وبالتالي بيكفروا عن ذنوبهم وعايزين يرفعوا أحوالنا المعيشية ويشركونا في المورتا بعد ما كلوا الزبدة ؟

2- يا ترى توزيع الكام ألف ملطوش دول اللي ناس بتقول 2000 ج لكل واحد وناس تقول خمسة وفي إذاعة الدبليو بي سي قالوا 10 .. إلخ .. يا ترى دول مقابل إيه ؟ أيوه يعني بيطعموا فمنا عشان نستحي من إيه بعد كده .؟ ويا ترى الفلوس دي لما تتصرف أو الواحد يخسرها في أي وقعه للسوق زي اللي حاصل اليومين دول السوق في خلال 4 أو 5 شهور ينزل من 12 ألف نقطة لحد ما قرب دلوقت يلمس الـ 4 آلاف نقطة يعني بالبلدي وعشان نبسطها للناس إن أجدع وأجعص واحد في البورصة خسر ما لايقل عن 75 % من راسماله وده وضع طبيعي لإن البورصة في العالم بتتأثر بأشياء كتير جداً منها السياسية والإقتصادية وحتى الصحية ... إيه اللي هايحصل لو خدت صندوق وكل عيل فوق 21 سنة من عيالي صندوق ويادوب لسه بأفتحهم لقيت خبر عاجل في الجزيرة عن وفاة كلب سيادة رئيس المجلس المحلي لمحافظة كفر الشيخ فراحت البورصة واقعة حزناً على الكلب .. وبعد ما كان في إيدي كام صندوق يعملوا لهم خمسين باكو .. لقيتهم بقوا 10 بواكي فرط ؟

3- السيد المبجل وزير الصناديق .. قصدي وزير الأستثمار .. صرح بإن اللي مش هايتقدم وياخد صندوقه خلال سنة من طرحه لعامة الشعب .. فستوضع تلك الصناديق في صندوق تاني يخصص دخله وقيمته للصرف على التعليم والصحة ..... لووووووووووووولي - دي زغروطة إتعلمتها في عصر المبارك - أومال الضرايب مصلحتك أولاً ومليارتها اللي بتلموها تحت إشراف الأسطى يوسف بطرس غالي بتصرفوا منها علي إيه ؟ إوعى حد يقولي على البومب والمراجيح

3- السؤال الأخطر بقى ... بالصلاتو عالحبيب إحنا شعب منتج وبنجيب مليون وربع عيل كل هلال السنة ما يهل ده مع تحديد النسل وتسليت النحل كمان .. طب العيال اللي هاييجوا بعد توزيع السبوبة دي .. مصيرهم إيه ؟ أيوه يعني هايخمسوا معانا في صناديقنا ولا الحكومة هابتني لهم شركات وتخربها عشان تفرق صناديق عليهم ؟.

أنا عن نفسي اللي هايهوب من صندوقي هاشرحه .. حتى لو كانوا عيالي اللي ما خلفتهمش لسه ..

آه

عض قلبي ولا تعض صندوقي ..

وكل واحد يخلي باله من صندوقة

[se_ Elsyed]

والله لسه ما كملتش كلامي إلا وأقرأ مقال برضوا لسليمان جوده المهتم بهذا الموضوع بالمصري اليوم وتقريباص بيكتب عنه كل يوم دلوقت بيكرر نفس كلامنا .. وعايزكو تاخدوا بالكم من تعليقات القراء المصريين العاقلين واللي لما بينضحك عليهم .. فبينضحك عليهم بمزاجهم

خصخصة الخصخصة!

بقلم سليمان جودة ١٥/ ١١/ ٢٠٠٨

إذا التقى مصريان، هذه الأيام، دخلا فى رهان حول قدرة أى منهما على فهم موضوع نقل ملكية أسهم شركات قطاع الأعمال العام، إلى المواطنين، ولا تزال الرهانات قائمة، بين المصريين بعضهم وبعض، بينما الموضوع غامض للغاية، وليس واضحاً بالدرجة الكافية أمام الناس!

ولا أحد يعرف، ما إذا كانت هناك علاقة مباشرة، أو غير مباشرة، بين تاريخ الإعلان عن نقل الملكية، وبين توقيت انعقاد مؤتمر الحزب الوطنى الخامس هذا العام.. فالمؤتمر انعقد من ٣ إلى ٥ نوفمبر،

وما كاد يمضى على انتهاء أعماله أسبوع، حتى كانت الحكومة قد أعلنت فجأة عن حكاية نقل ملكية الأسهم، صباح الأحد ٩ نوفمبر، بما يعنى بشكل أو بآخر، أنه كانت هناك نية للإعلان عنه، فى مؤتمر الحزب، ثم تأخر لأى سبب من الأسباب!

وإذا كانت حملة الدعاية لعملية نقل الأسهم، تقول إن الهدف من ورائها تحقيق نوع من العدالة الاجتماعية بين المواطنين، فالكلام هنا شكله حلو، ولكن مضمونه يجب أن نتوقف عنده طويلاً، وأن نذكر على سبيل المثال، أن حركة التأميمات والحراسات فى مطلع الستينيات، قيل وقتها، إن الهدف من ورائها، هو أيضاً تحقيق العدالة الاجتماعية،

فانتهى الأمر كله إلى كارثة محققة.. ليست ٦٧ بالطبع.. ولكن كارثة أخرى، على المستويين الاقتصادى والاجتماعى جعلتنا فى النهاية، نعود إلى المربع صفر، كما نفعل الآن، حين نقرر العودة إلى وضع تكون فيه الكلمة والسيادة للاقتصاد الحر، وهو ما كان قائماً قبل التأميمات!

وإذا كان هناك من يقول، إن تجربة نقل الملكية هذه، كانت لها تجارب مماثلة سابقة فى أوروبا الشرقية، فنرجو أن يقال لنا، ما هى هذه التجارب بالضبط، وفى أى دولة كانت، وكيف تمت إلى نهايتها؟!

إن المسؤولين الثلاثة الذين خرجوا لشرح العملية للمواطنين، كانوا هم: صفوت الشريف، أمين عام الحزب، والدكتور محمود محيى الدين، وزير الاستثمار، ثم جمال مبارك، رئيس لجنة السياسات فى الحزب، بما يفهم منه أى متابع، أن الفكرة ابنة لجنة السياسات،

وأن الحزب هو الأب الشرعى لها، ومع ذلك، فلا يزال الأربعون مليون مواطن، الذين قيل إنهم سوف يستفيدون من إجراء نقل الملكية، نهباً لحيرة بالغة، ناتجة عن سوء تسويق الفكرة، وسوء بيعها لكل مواطن سوف يكون طرفاً فيها، وسوء ترويج كان من المفترض أن يسبقها.

إن لجنة السياسات فى الحزب الحاكم، فيها فكر جاد، وفيها رجال جادون، رغم أنها ممتلئة بالزمارين، والمطبلين، والمنافقين، فكيف فات على الجادين فيها أن الموضوع برمته، كان فى حاجة حقيقية، منذ البداية، إلى تبشير لدى الناس به، حتى لا يخرج عليهم فجأة هكذا، وكأنه قضاء وقدر؟!.. وهل يعقل أن ينام كل مصرى، ثم يستيقظ صباح الأحد الماضى،

فيكتشف - إذا كان من بين الذين سوف يستفيدون منها - أنه تحول من إنسان معدم، لا يملك شيئاً، إلى رجل صاحب أسهم، يستطيع أن يتصرف فيها، كما قيل، بما يشاء، وأن يبيع فيها، وأن يشترى.. هكذا، دون سابق إنذار، ودون مقدمات، فإذا سأل كيف؟! وجد نفسه أسيراً لحسبة أقرب إلى حسبة برما!

صحيح أن عملية عمر أفندى، قد خلقت عقدة لدى الحكومة، من ملف الخصخصة فى إجماله، وصحيح أن الهجوم المتواصل على الخصخصة، بوصفها اتجاهاً معاصرا فى الاقتصاد العالمى، قد أدى إلى نوع من الجزع الحكومى منها،

وهو جزع أدى إلى خوف أفضى بدوره إلى شلل تام وعجز عن استكمال باقى الخطوات، وكانت النتيجة هى تصريح وزير الاستثمار بأن الخصخصة سوف تتوقف إلى حين الانتهاء من نقل ملكية الأسهم، إلى ٤١ مليون مواطن، هم إجمالى المستفيدين..

كل هذا صحيح، ولكنه لا يبرر مطلقاً، أن تلجأ الدولة إلى خصخصة الخصخصة - إذا صح التعبير - دون أن تُشرك الملايين فى نقاش عام كان مطلوباً بالضرورة، فى مرحلة التبشير بالعملية، وهى مرحلة غابت ولا تزال!

ونرجو ممن لا يستوعب ما يقال، ألا يشك فى سلامة قواه العقلية، لأن الموضوع فعلاً «مش واضح»، والناس بصراحة «مش فاهمة حاجة»!!

التعليقات

فاقد الشيء لا يعطية ؟؟؟؟؟؟؟؟

تعليق mokhtar تـاريخ ١٥/١١/٢٠٠٨ ١٩:١١

فاقد الشيء لا يعطية ؟؟؟؟؟؟؟؟ انها المهانة والأستهانة بعقولنا ،،انها تغطية مغلوطة؟؟!!!، كيف نشترى ما نملكة فعلا،، انها الحرب الآن ..

------------------

المسمار الأخير فى نعش الوطن!!!!!!

تعليق أيمن ممدوح تـاريخ ١٥/١١/٢٠٠٨ ١:١١

الحمد لله الذى لا يحمد على مكروه سواه، فقد تصدق علينا الخزب الوطنى بما تبقى من عظام الدجاجه (القطاع العام سابقا) بعد أكلها و مصمصه عظامها،إن توزيع لأسهم القطاع العام على الشعب ما هو الا مخطط جهنمى لبيع البقيه الباقيه من القطاع العام بأبخس الأسعار. اعتقد ان السيناريو التلى هو ما سيحدث: - 50% من مستحقى الأسهم هم تحت خط الفقر (20 مليون مواطن حسب تصنيف البنك الدولى)، وبالتالى لا تعنى هذه الأسهم لهم اى شىء سوى انها مصدر محتمل لمكسب مادى سريع . - سيقوم رجال الأعمال أو المستفيدين من الأسخاص الأعتباريين !! بجمع هذه الأسهم بأبخس الأسعار ، و بالتالى يتم بيع القطاع العام بأبخس الأسعار و بدون مزايده . - هنا سييتم البيع بدون أى ضابط مهما حاولت الدوله و مهما اصدرت من قيود على اعاده البيع ، حيث اى كل قانون ستوجد له ابواب خلفيه. - سيكون الشعب هنا الملام على جريمة بيع القطاع العام (مثلما يلام الفلسطينيون الأن على جريمة بيع فلسطين).

---------------------

الموضوع سهل جدا

تعليق ابن مصر الغلبان و الحيران تـاريخ ١٥/١١/٢٠٠٨ ٢٣:١٠

الموضوع سهل جدا ... انت اخدت نصيبك .. يبقى لية الدعم ... ماهو حقك عندك بيعة ارمية ... و طبعا الشركات تخسر و نكون احنا الغلابة السبب .. يبقى النصيب سعتها صفر و الى فاضل من حقهم و يبيعوة للزينهم يشتروة ... و الفلوس بتاعة البيع تروحلهم ... سؤال مش عارف لة جواب ... هى الشركات الى تبعها الدولة ملك للحكومة و لا ملك الشعب يعنى بيعها مش لازم يكون بموافقة الملاك الاصلين لان الحكومة السابقة او الحالية او القادمة...ليست هى المالكة انما الشعب ... طب انهة شركات الى حتتوزع ... طب النصيب قد اية ... قيمة النصيب قد اية... و اية حاجة يشغلونا بيها لغاية لغاية ميعادة ماتش الاهلى ...

------------------

خبر أهديه لوزير الاستثمار ...!!!

تعليق د.أحمد تـاريخ ١٥/١١/٢٠٠٨ ١٣:١٠

"تحقق نيابة بولاق أبوالعلا بإشراف إيهاب السعيد رئيس النيابة في واقعة قيام ربة منزل ببيع طفلها منذ 6 سنوات لسيدة أخري قامت بنسب الطفل لزوجها العقيم مقابل 200 جنيه"..مثل هذه السيدة البسيطة التي باعت طفلها مقابل 200 جنيه هي من سيمتلك أسهم نقل الملكية ومن المفترض أنها ستحافظ علي ثروتها من الضياع !!!أهدي ذلك الخبر لوزير الاستثمار.

[se_ Elsyed]

أنا هاحط جنيه عالترابيزة أهو

وهاديه مكافأة لأي حد يدلني على شعب في التاريخ أو الجغرافيا حتى عنده خفة الدم دي والتلقائية والتفاعل اللحظي مع الأحداث زي الشعب المصري ..

الموضوع مابقلوش أيام إلا وتلاقي كمية تعليقات مالهاش حل ..

انا شخصياً وقعت من الضحك وأنا باقرأ بعضها في منتدى هريدي

خدوا شوية ضحك على ما قُسم

عايز حقققققققققققققققي

[أحمد سيف]

ممكن الحكومة بسبب مشروع زى ده تلغى الدعم عن كثير من النتجات لأنها بمشروع زى ده بتكون شالت أيدها من أدارة الشركات و حولت الأدارة الفعلية للشعب نفسه بصكوك الملكية اللى حتكون معاه

سواء نفذوا المشروع أو ما اتنفذش يا ريت والله يلغوا الدعم عن كل حاجه ويستخدموا فلوس الدعم في زيادة المرتبات وتطوير التعليم والتدريب ودعم المشروعات الصغيرة وبدء مشاريع حكومية يعمل بها الشباب العاطل وسداد جزء من قروض مصر اللي بندفع عليها فوائد من لحمنا الحي

ويا ريت كمان ننتهي من التكية اللي اسمها القطاع العام اللي أصبحت عبء على اقتصاد البلد والموازنة الحكومية بدل أن تكون رافد لهما، وكل حاجه في البلد يبقى ليها صاحب لإن المال السايب يعلم السرقة

وأخيرا يا ريت نتعلم كشعب أزاي نتحمل مسؤوليتنا وما نفضلش معتمدين على الحكومة في كل حاجه، وده مش دفاع عن حكومة الحزب الوطني

[مصر عشقى]

اقول لكم الحق .. حكومتنا دى غلبانه معاكم .. بعملوا بطاقة التموين الذكية .. ومن اجلها يتسوردوا السكر والزيت واللحمه والرز والشاى وكل حاجة بتشتهوها مش نافع .. تبيع الفنادق والشركات المهمة بملاليم عشان تجيب فلوس يستوردوا بيها الهم هم .. برضه مش نافع .. تعطى 8آلاف فدان ببلاش عشان المعلم طلعت واخوته يبنوا لكم فيلات وشقق تسكنوا فيها وتقيقكم حر الصيف وبرد الشتاء وايضا مش نافع .. حتوزع على الشعب كل واحد 200 جنيه يعنى 2 كيلو لحمه وكيلو سكر وكيلو زيت وفرخه هفتانه .. وايضا مش نافع .. جعلت حزب الاغلبية يملأ من اجلكم شنط فريده فيها مالذ وطاب ووزعتها فى رمضان وايضا مش نافع .. تقطع نفسها يعنى عشان ترضوا عنها ؟؟ دا من شوية عرضت القناة الفضائية فى برنامج سيدتى فساتين جميله بلون البشرة ولون الشعر كله عشان خاطر اناقة الحريم عندنا وينافسوا حريم باريس وايضا مش عاجب ..

يعنى يعملوا لكم ايه ؟؟

الم يقنعكم هلال الصفر الثلاثى بنظريه انت بابا وانت ماما ..وانت انور وجدى ؟؟

من فضلكم راجعوا ما قاله مرة تانية .. وكفايه على المواطن سهم ب 200 جنيه وقابلونى بعدها فى سوق العتبة .. الجزمه هناك بتسعة جنيه .. فسوف نحتاج الى جزم كثيرة .. عندا يحاسبوا النهابين . او تعالوا معايا نهاجر الى جمهورية شرم الشيخ

تم تعديل 15 نوفمبر 2008 بواسطة مصر عشقى

[se_ Elsyed]

ممكن الحكومة بسبب مشروع زى ده تلغى الدعم عن كثير من النتجات لأنها بمشروع زى ده بتكون شالت أيدها من أدارة الشركات و حولت الأدارة الفعلية للشعب نفسه بصكوك الملكية اللى حتكون معاه

سواء نفذوا المشروع أو ما اتنفذش يا ريت والله يلغوا الدعم عن كل حاجه ويستخدموا فلوس الدعم في زيادة المرتبات وتطوير التعليم والتدريب ودعم المشروعات الصغيرة وبدء مشاريع حكومية يعمل بها الشباب العاطل وسداد جزء من قروض مصر اللي بندفع عليها فوائد من لحمنا الحي

ويا ريت كمان ننتهي من التكية اللي اسمها القطاع العام اللي أصبحت عبء على اقتصاد البلد والموازنة الحكومية بدل أن تكون رافد لهما، وكل حاجه في البلد يبقى ليها صاحب لإن المال السايب يعلم السرقة

وأخيرا يا ريت نتعلم كشعب أزاي نتحمل مسؤوليتنا وما نفضلش معتمدين على الحكومة في كل حاجه، وده مش دفاع عن حكومة الحزب الوطني

يا أحمد حرام عليك وبطل قسوة ..

يلغوا الدعم متفق معاك .. لكن البديل إيه للناس الغلابة ؟ .. اللي معظمهم مش موظفين اساساً واللي لو موظف فهاتلاقي مرتباتهم مضروبة بالنار

وبعدين عايزنا كلنا نتحمل مسئوليتنا ولا نعتمد على الحكومة وعندنا 20 مليون تحت خط الفقر وعندنا 27 مليون أُمي يجهل القراءة والكتابة بفعل فاعل ؟

لكن أتقف معاك لما تقول إن المفروض يحصل العكس .. يعني أرفع مستوى المعيشة ولما اتأكد إن كل حاجه تمام والدنيا زبادي في الخلاط ..يبقى أرفع الدعم بقى أو أرفع الراية السودا .. مش هاتفرق

--------

عايز أعرض هنا رأي لمشترك في منتدى هريدي بيوضح فيه السبوبة اللي عايزه تعملها الحكومة بشكل مبسط

اشرح ليكم قصة الصكوك كما هو متعارف عليها في الاقتصاد والمتبع في اي دوله ...

اولا : لما تتوزع النسبه ال ها تتوزع ها تكون 49 % للمواطنين و 51% للحكومه وده معناه ان لو فرضا كل الصكوك اتباعت لغير المصريين تفضل الملكيه للدوله ..

ثانيا : الفكرة دي اصلا متبعه في عدد من الدول بس مش بطريقتنا احنا ..

يعني .. تطلع شركات جديده وتكون ملك الدوله ( شركات جديده ) وتطرح اسهمها للمواطنين الافراد ايا كان سنهم حتى لو كانوا لسه نازلين من بطن امهم يشتروا السهم بمبلغ بسيط جدا وبعدين يتقفل باب الشراء وتنزل الشركه السوق وتبدا تشتغل وتبدا الشركات وغير المواطنين بالتداول فا يعلى سعر السهم فالمواطن يكسب ووضعه يتحسن ويعلى مستواه المادي ويبقى كويس جدا جدا ... وتشتغل الشركه دي عادي .. والشركات كلها مدرجه بالبورصه وفيها هبوط وارتفاع بس في الاصل المواطن كسب من الاول لانه شاري السهم بمبلغ قليل وباعه بعد ما ادرجت الشركه في سوق الاسهم وبالتالي هدف الدوله من رفع مستوى اي مواطن تحقق .

ايه اللي حاصل عندنا ؟

دلوقتي كل الشركات المفروض معروضه لبيع اسهمها وصكوكها للمواطنين قيمتها قليله ليه بسبب الضربه الاخرانيه ال حصلت في الاقتصاد وال قدامها مش ااقل عشر سنين على ااقل تقدير على ما تفوق ويبدا سعرها يتحسن ...

طيب ايه فايدة ده للمواطن المصري ...

مفيش فايده ...ليه ؟؟؟

اولا الصك قيمته نازله يعني ال كان 10 بقى بواحد ...

وقت عرض الصكوك على المواطنين في وقت وصل فيها نسبة الفقر اكتر من نص الشعب تحت خط الفقر يعني لو الواحد منهم لاقى ابنه جنيه ها يشتري بيه عيش ..

طيب معناه ايه ده ..

معناه ان الناس دي لما تاخد الصكوك دي ها تبعها مباشره وبالتالي قيمتها ها تقل اكتر وفي نفس الوقت المشتري سواء حراميه او يهود او اجانب ها ياخدوا الصك بتراب الفلوس ...

ها يحتكر فتره ...

ويجي يمتلك المشترين على عدد الصكوك ال اشتروها ..

ولما الدوله تعمل كده بالتالي ها يتقال ان حقك اخدته ..

وظايف مش مسؤولين عنها

بطاله مالناش دعوه بيها

تامينات اجتماعيه ومعاشات ( روحوا اشربوا من البحر )

طيب والفائده ... ال ها تعود على المواطن ..

انه ها يبقى اسهل انه يفهم انه ما بيفهمش وانه كان في نعمه ورفسها برجله ..وان النعمه دي متمثله في الحكومه ال بطر عليها سنين طويله ..

الغريب بقى إنك لو نزل الشارع المصري دلوقت وطلعت اي اتوبيس او مترو الأنفاق يا عم وحاولت تتكلم مع الناس في موضوع زي ده .. هايبصوا لك نظرات إشمئناط وأستغراب لإن معظمهم لديه هممممممممممممممممممموم كثيرة أخرى ومش فاضي لصناديق او صكوك وكلام فاضي من ده ..

وده حصل أيام تغيير الدستور والمادة المتفجرة بتاعت 76 وإنتخابات الرئاسة .. أقسم بالله كان هايجيلي إنفجار في مخي من كتر التفكير والخوف على البلد .. ونزلت مصر بعدها على طول أجازتين في خلال أقل من 4 شهور .. ولقيت ناس كتييييييييرة ومنهم إخواتي .... أبيض يا فل وصباح الخير يا معلم لا لهم دعوة بدستور ولا بطرطور وكل اللي عملوه إن يوم الأستفتا بتاع الدستور اخدوه اجازة ونفضوا سجاجيد الشقة .. ويوم إنتخابات الرئاسة ... اخدوا برضوا اجازة وغسلوا ستاير الشبابيك لإن السجاجيد كانت لسه نضيفة وما لحقتش تتبهدل ...

[Virus]

مش عارف هل المداخلات التي لا تحمل تحليلاً اقتصادياً مرحب بيها أم لا في هذا الموضوع..ها أفترض إن الإجابة بنعم..وها أعلق كمواطن عادي ..

الحقيقة كل الشكر للفاضل س س لأنه عبر تماما عن وجهة نظري والتي أزعم -طبقاً لمشاهداتي- أنها وجهة نظر أغلبية ممن مازالوا يهتمون لأمر هذا البلد..والتي سأحاول تلخيصها كما يلي..

1- بدون أي تشاؤم وبموضوعية شديدة.. لا يمكني أبداً الانبهار بهذه النظرية الاقتصادية وتصور أن بإمكاننا التأثير على تطبيقها ليسير في صالح مصر...هذا التصور يتضمن ثقة ساذجة في نوايا النظام الحالي وهو الأمر الذي يصدمني أن البعض عنده ذرة اعتقاد بعد 27 سنة أنا عصابة مبارك يمكن أن تفكر او حتى تسمح بتمرير أي شيء لصالح هذا الشعب

2- "النصباية" الجديدة في نظري لا تعدو كونها محاولة لخصخصة ما تبقى من القطاع العام وبيعها لحيتان الحزب الوطني أو لمستثمرين أجانب ولكن بطريقة غير مباشرة وهي عبوراً من من خلال المصريين وإلقاء بعض الفتات لهم في المقابل..

س: وكيف سيتم ذلك؟؟

ج: تماما كما شرح س س وآخرون..شركة قيمتها 100 مليون جنيه مثلاً..الناس تستلم الكوبونات وتندفع لبيعها تهبط قيمة الشركة (أو الجزء المكتتب عليه) ل 10 مليون جنيه..فيشتريه شخص ما وليكن أحمد عز مثلاً..وشكراً يا شعبي الكريم الصبور العطوف المهاود..!!

س:لماذا يفعلون ذلك وبإمكانهم الخصخصة دون أن يسألهم أحد؟؟

ج: يمكنني استنتاج عدة أسباب..

* الشركات والقطاعات التي ليس من السهل خصختها كالبترول والبنوك الحكومية

* لتفادي أن يتساءل أحدهم عن السعر الغير عادل -كما في حالة عمر أفندي- أما الآن فلا يمكن لأحد أن يفتح فمه لماذا بيعت شركة مصر للبترول ب بمليار جنيه بس مثلاً..!!

* أيضا كما تفضل الأخوة.. في الخصخة يتساءل البعض عن مصير الأموال ..أما بعد توزيع الكوبونات ستكون الحكومة قد نفضت الشعب من كل ملكيته مقابل الفتات

نفس أسلوب دس السم في العسل الذي طبقوه في المادة 76 وملؤا الدنيا صراخاً بالفتح الديمقراطي العظيم وهو ما هو...بس المرة دي ملعوبة صح لدرجة إن البعض صدق..نفسي أعرف من ال (...) اللي طلع بالفكرة السافلة دي..

[se_ Elsyed]

..نفسي أعرف من ال (...) اللي طلع بالفكرة السافلة دي.

ما سمعتش إسماعيل ياسين قال إيه للشاويش عطيه في فيلم إبن حميدو ؟

بحر الأذى واسع يا عطعط

للأسف الشديد كما كتبت تعليق على الحوار الذي أُجري مع علي الدين هلال الشهير بــ " علي زيرو " وقلت إن كثير من المثقفين والمتعلمين باعوا ضمايرهم ودينهم وشرفهم عشان الفلوس والمنصب ..

تصور إنك لو قرأت أسماء فطاحل القانون اللي شاركوا في تأييفه وتفصيلة للسادات سنة 80 عشان يضيفوا حرف واحد .. هاتتخض

مادة 76 - مدة الرئاسة ست سنوات ميلادية تبدأ من تاريخ إعلان نتيجة الاستفتاء ، ويجوز إعادة انتخاب رئيس الجمهورية لمدد أخري.

شالوا التاء المربودة وحطوا بدلاً منها د

فبدل ما هي مدة اخرى بقت مدد أخرى ..

ومع ذلك كنت ترى هؤلاء الفطاحل يلقون محاضرات على طلبة الحقوق والجامعات الأخرى وبيربوا نشأ ومع ذلك هم مجرمون في حق الوطن .. وكإنهم ولا عملوا حاجه

كذلك الموجودن الان ... في ناس عباقرة جداً وعندها أفكار ممكن تنقلنا نقلة تانية .. لكن عبقريتهم بيسخروها في خدمة الشر الجالس على كُرسي العرش لكي يرضى عنهم ويمنحهم بعض الهبات ...

[Alshiekh]

إضافة للأخوة اللى مش فاهمين

أضم صوتى اليهم وأقول بكل فخر

أنا مش فاهم حاجة !!!

السؤال اللى محيرنى

ايه الفرق بين ان تظل الشركات على وضعها الحالى مملوكة للدولة يعنى مملوكة للشعب ، وبين ان يعطوا للشعب شهادات بأنهم ملاك لبعض الشركات ، وماذا عن باقى الشركات؟

هل يعنى اننا سنتملك اسهم فى شركات بعينها ، هل يعنى هذا اننا ليس لنا الحق فى ادعاء ملكية باقى الشركات؟

أم أن هذه هى احدى افكار صاحب شركة ميدانفيست التى اشترى وتاجر فى ديون مصر من قبل ، فتفتق ذهنه عن شراء هذه الشركات ولكن ليس من الحكومة بل من الشعب الذى سيهرول بعد حصوله على الصكوك الغير اسمية ليبيعها لحساب صاحب ميدانفيست عن طريق عملائه الذين سينتشروا فى انحاء مصر؟

كل شيئ ممكن

[لونا]

سمعت امبارح فى برنامج ( صباح دريم ) د . محمد البنا أحد المشاركين فى وضع مشروع القانون بيقول ان توزيع الاسهم مش هيكون common pool و لكن كل مواطن ياخد

صكوك لعدة شركات من الشركات المطروحة و ليس ( لكشة واحدة ) , النهاردة واحد من دكاترة الاقتصاد الموالين للحزب الوطنى فى نفس البرنامج بيقول ان الصك

هيكون كوكتيل من كل الشركات المطروحة زى سلطة الفواكة جزء من كل نوع ( على حد وصف الخبير ) !!!

يعنى حتى خبراء الحزب الوطنى مختلفين فى فهم المشروع .

أيضا د . جودة عبد الخالق رئيس اللجنة الاقتصادية فى حزب التجمع لفت الانتباه ان عدم توزيع الصكوك على من هم اقل من 21 سنة مخالف لمبدأ المواطنة الموجود فى

الدستور و يمكن الطعن عليه فى المحكمة الدستورية

[se_ Elsyed]

مش عارف ليه عندي إحساس داخلي - قلب الأم بقى - إن مبارك وإبنه وبطانة السوء بيدبروا لنا أمرٍ بليل ... وهايسيبونا كده كام شهر نضرب اخماس في أسداس والناس تكلم بعضها في الشوارع والحواري وأمام المدافيء وتحت أشجار الزيزفون والكل محتار: لوكشه واحده .. ولا تاتا تاتا ؟ طب يا ترى هاييجي حظي في أسهم شركة جامدة زي شركات الحديد والسماد والكيماوي ... ولا هالبس في الحيط وأخد مكرونة وصلصة ودقيق وتبقى نهايتهم إني اضربهم كلهم في الخلاط واعمل طاجن طورللي ؟

كل ده بقى وهما في المطبخ عمالين بيسبكوا موضوع الرئاسة ويا ترى اللي جاي هايبقى جمال مبارك ..... بس كده في إشكالية إن المؤسسة العسكرية ممكن ترفض لإن قائدها الأعلى هايبقى مدني وما يعرفش الفرق بين البُندقية و عصاية المقشة ......... طب نخلي آبيه جمال يتطوع في سلاح المشاة وأهو يبقى عسكري وخلاص وبكده يوافقوا ؟

ولا يا ترى نجيب رئيس عسكري كُبارة كده زي حسين طنطاوي ويبقى منصب شرفي وراجل بياكل زبادي وقاعد في دار المسنين وجمال يحكم من وراء الستارة ؟

مش بأقول لكم قلبي متوغوش والموضوع في ريحة نظلة وحاجة مش مريحة حاجة .. لإن بالعقل يا جماعة .. موضوع الصناديق ده عبارة عن إن الجنازة حارة والميت بوبي جربان .. ده كلهم كام ملطوش في الاخر مش هايجيبوا حتى ربع عجل مع شكارتين رز ..

[ziad]

القاهرة - محرر مصراوى - قال الدكتور محمود محيى الدين وزير الاستثمار أن هناك ما يقرب من 20 مليون مواطن سيتم توزيع صكوكهم على منافذ متسعة وموزعة على كافة بقاع الجمهورية يمكنهم من خلالها امتلاك صكوكهم بالاضافة الى ان المدة ستكون حوالى 6 أشهر لمنع اى تزاحم فى عملية الحصول على الصك ، مشددا على ان كل مصرى سيأخذ نفس الصك الذى يحمل نفس الاسهم بنفس القيمة "ولا تفرقة بين مصرى ومصري".

وعن تقدير قيمة الصك، قال وزير الاستثمار "ان القيمة ستكون بالمئات وليست بالالاف ، كل صك سيكون فى حدود المئات من الجنيهات ، ولن يكون مائة او مئاتى جنيه".

وعن اشكال الصك ، قال انه سيكون مثل كروت الشحن ، اذا تم فقدانهم سيتم عمل بدل فاقد ولكن بتكلفة ، وسيكون لكل مواطن صك مسجل فى قاعدة المعلومات الرئيسية برقم معين ولن يتم دفع اى رسوم عند الحصول عليه ...ولكن سيكون هناك رسوم عندما يتم بيعه.

وأكد أن تجربة مصر فى مشروع برنامج الملكية الشعبية "توزيع أسهم شركات قطاع الاعمال العام على المواطنين بالمجان" لها خصوصية وتختلف تماما عن التجارب التى تمت فى عدد من دول شرق اوروبا.

وقال وزير الاستثمار ان قدر التشابه بين تجربة مصر وتجارب دول شرق أوروبا هو مخاطبة الجموع الغفيرة من المواطنين ، "ولكن الاختلاف معها فى التجربة المصرية كبير، فتمت دراسة مزايا وعيوب التجارب التى تم اجراؤها فى شرق أوروبا ، فان المعروض المصري 153 شركة ، منها مايقترب من النصف مستبعدين ، والباقين مقسمين ما بين حصص اغلبية وحصص اقلية ، اما التجارب الاخرى فكان البيع بالكامل ..فكانت الدفعة الاولى فى التشيك 1700 شركة دون وجود مؤسسات رقابية.

وحول توقيت عرض هذه المشروع تزامنا مع الأزمة الاقتصادية العالمية الراهنة ، قال وزير الاستثمار أكد الدكتور محمود محيى الدين"ان مشروع القانون سيتم عرضه على مجلس الوزراء قريبا ، بعد ذلك يعرض على السيد رئيس الجمهورية ، ثم يحوله الى مجلسي الشعب والشوري ، مما يؤكد وجود فترة طويلة حتى يكتمل القانون وهو ما بين 12 الى 14 شهرا ، بالاضافة الى ان هذا البرنامج لا يتأثر ولايؤثر فى الاجواء العالمية الخاصة بالازمة الاقتصادية ، فنحن نتحدث عن برنامج لنقل اصول مالية ليمتلكها المصريين بطرق محددة واساليب مختلفة" .

وأضاف وزيرالاستثمار ان عمليات تداول صكوك الملكية ستتم بين المصريين لفترة طويلة، وبعد تعافى البورصات العالمية من ازمتها المالية الراهنة - ومعها البورصة المصرية - سيتم تسجيل هذه الصكوك وبعد ذلك يتم تداولها فى البورصة المصرية.

وحول مفهوم تفتيت الملكية وامكانية ان يشكل ذلك خطورة على الشركات المطروحة ، قال انه تم تقسيم الشركات الى اربع فئات لكل فئة نمط معين ، "فهناك فئة غير موجودة فى المشروع ، وفئة اخرى ستكون الدولة مشاركة فيها بنسبة اغلبية حاكمة بنسبة 67 % او 51% ، كما ان مجموعة اخرى سيكون حد الدولة 30% مما يعطى لها السيطرة الفعلية كونها أكبر المالكين"، مشددا على أن الدولة اثببت نجاحا فى ادارة عدد من الاصول.

وبشأن طريقة التوزيع على المواطنين ، قال محيى الدين "سيتم تقسيم الشركات الى الفئات وفقا للقواعد المعتمدة فى عملية التقسيم يتم الاعتماد على بطاقة الرقم القومى لاثبات الجنسية المصرية ، بالاضافة الى ان هناك 5ر6 مليون مواطن يعملون لدى الحكومة او مؤسسات أخرى ، بالاضافة الى ان هناك ضعف هذا الرقم من ارباب المعاشات ، سيتم صرف صكوكهم وفقا للالية التى يتم من خلالها صرف المرتب او المعاش".

[alaa elshafiey]

السلام عليكم

بعد التحية : اخوانى فى المنتدى العظيم الذى اكن له كل الاحترام

بنظرة بسيطة للموضوع الذى يمكن ان يكون فى نظر البعض موضوع يشيوبة بعض من الاستخفاف والتعليقات البسيطة على انة موضوع عادى

ولكن بالتفكير سوف نكتشف ان هذا المشروع المقدم ( هو مشروع الذى سوف يكون تغير فى نهج الحياة فى مصر أما للافضل أو للاسواء )

اخوانى كل من درس اقتصاد وتجارة وسياسية ( والله لا يقدر على فهم ما يحدث الان ) تخيلوا انتم وهى فئة عريضة فى المجتمع انهم لن يفهموا شئ ولو بعد حين

الاهم ما يجب ان نعرفة ان ما يحدث ( من وجهة نظرى البسيطة ) وانا متعامل ومستثمر فى البورصة من حوالى سبع سنوات

أنها عملية سرقة البلد ولكن ياريت تكون للابناء البلد والله والله لن اتكلم لن من سيشترى مصرى يعنى بمعنى اخر مهما حدث انة مصرى

ولكن ما سوف يحدث وسوف تتذكررون هذا الكلام هناك كثير من المصريين ضعاف النفوس

1- انتم تعلمون ان من شروط اخذ الاسهم ان تكون مصرى الجنسية

لذلك هناك اناس كثيرون من دولة مثل اسرائيل لا يعنها المال فى شئ وهناك دول اجنية كثيرة المال لا يعنها فى شئ كل ما يعنها هى مصر ون يكون لها حق فى مصر التى تباع بتراب الفلوس

سوف يدخلون البلد عن طريق بعض المصريين ضعاف النفوس

2- سلة الاسهم التى يتكلمون عليها أن حدث واردا الشعب ان يبع الاسهم كما يقولوا ب 2000 جنية للافرد ان سعر الاسهم عند النزول لن يتعدى 800 جنية لكثرة البياع وهناك من سوف يشترى وبشراة ولكن الذين سوف يشترون هما

الهوامر ( فى السوق وهم معروفيين )

الاجانب عن طريق مصريين وانتم سوف ترون ذلك

3- الدعم الذى سوف تجدون الحكومة ترفع ايدها عنة بالتدريج لاى اسباب والحكومة تجيد ان تسبب اى شئ للمصلحة الخاصة بها

انها روئية بسيطة من شاب درس اقتصاد ولة نظرة بسيطة فى سوق المال

ما يحدث الان اخوانى كارثة على الشعب صدقونى وانا لا ارد ان مصر ذاهبة الى الهواية

أننى لا اتحدث عن هى السنة او القادمة او التى تلحقها اننى اتكلم عن

سنة 2013 وما بعدها

وايضا هناك خطأ تشريعى دستورى فأن الافراد فى المجتمع كلة لهم حقوق فى الدولة فكيف توزع الاسهم على افراد أكثر من 21 عام

والاقل ماذا سوف يأخذ

مصيبة دستورية بكل المقاييس انتظر الرد عليها من السادة المحاميين والدارسيين القانون

اخ لكم فى الحياة / مصرى الجنسية

علاء

الدوحة

[se_ Elsyed]

ما هو ده اللي عمالين نتكلم عليه من الصبح يا عم علاء

وقولنا ان الناس فاكرة إن مبلغ 2000 ولا حتى 50 ألف في إيد كل مصري هايرفعوا من مستوانا ويخلونا دولة حلوه ومتقدمة ..

وبرضوا الناس ناسية أهم حاجه وهي " غول التضخم " واللي بمنتهى البساطة ومن غير فذلكة إقتصادية شوفناه جميعاً في زيادة الرواتب الملعونة بتاعت الـ 30 % من كام شهر واللي قبل ما تنزل والناس تستلمها لقينا الأسعار إرتفعت بشكل جنوني إلتهمت الت 30 % وقدهم 5 مرات .. والكل قال بدون غستثناء ( ليتها لم تكن )

كذلك الحال سيحدث بالتمام والكمال مع موضوعا الصناديق .. فالناس هاتجري في إيدها الفلوس والكل سيسارع بالبيع وذلك لشراء السلع والكماليات اللي نقصاه يقوموا التجار رافعين اسعار كل حاجه ... وعليكم السلام ..

المسائل الإقتصادية إذا لم تكن مدروسة بعناية .. فممكن تؤدي إلى كوارث حقيقية يستمر تأثيرها لسنوات عديدة ..