مصر بتتقلوظ .. بيهم

[se_ Elsyed]

العبد لله كان من أوائل من أطلقوا مصطلح القلوظة اللي بينفذها بحرفنه الراجل الكبير لإبنه عشان يحكم العزبة عن قريب .. واليوم مقال في الجون قراته بالمصري اليوم .. وهو موجه للسيد الرئيس جمال مبارك حبيب الملايين

مصر «بتتقلوظ» بينا

بقلم محمود الكردوسى ١٠/ ١١/ ٢٠٠٨

ليس مهماً أن تأكل البيضة كلها لتعرف أنها فاسدة.. يعنى: ليس مطلوباً منك أن تغرق فى تفاصيل أى مشكلة، مهما كان حجمها وتأثيرها، طالما ستنام آخر اليوم على موسيقى «مفيش فايدة».. يعنى: خذ العنوان، واكتب إحساسك الحقيقى.

١- «جمال مبارك للمعارضة: تريدون العودة بنا ٤٠ عاماً إلى الوراء.. المعارضة لجمال مبارك: فشلكم أسقط ٤٠% من المصريين تحت خط الفقر».. هذا هو العنوان الوحيد الحقيقى لخامس مؤتمرات الحزب الوطنى، ولكل مؤتمراته السابقة واللاحقة، وتلك رسالته الحقيقية.

يا أستاذ جمال.. كنت جالساً مع الصديق المخرج خالد بهجت فى أحد كافيهات حى المهندسين، وتطرق الحديث إليك، أنت وحزبك ودستورك ولجنة سياساتك ورجال أعمالك وبلدك الذى لم يبق فيه شبر واحد سليم، فحكى لى حكاية، مفادها أنه كان يقود سيارته ذات يوم وابنه إلى جواره.

كان يصور آنئذ مسلسل «الفنار»، الذى يتناول كفاح بورسعيد أيام الزعيم الراحل جمال عبدالناصر. وبينما يستمع إلى أغنية عبدالحليم حافظ «يا جمال يا حبيب الملايين».. لاحظ أن ابنه «ثمانى سنوات» يتمايل طرباً وإعجاباً، فسأله متشككاً: «إنت عارف مين جمال اللى بيغنى له؟».. فقال الابن بثقة وعفوية: «جمال مبارك طبعاً».

يعنى: حتى إذا افترضنا أنك لا تسعى إلى الحكم، وصدقنا أنك تخدم البلد لوجه الله.. فقد أصبحت «أمراً واقعاً» دون أن تقصد.. وأنا أطمئنك: لو استيقظ المصريون غداً ووجدوك رئيساً لمصر..

فلن يحركوا ساكناً، لأنك أنت وحزبك ودستورك ولجنة سياساتك ورجال أعمالك «بططتموهم»، وجعلتوهم يخافون من المرض لأنهم سيموتون فى المستشفيات، ويخافون من الخطأ لأنهم سيهانون فى أقسام الشرطة. يخافون على أبنائهم من سواقط كادر المعلمين، وعلى أعراضهم من ذئاب الشوارع، وعلى أموالهم من مقالب البورصة.

يا أستاذ جمال.. مصر «بتتقلوظ» لتحكمها.. فلا تخف، ولا تضع اعتباراً لمقال هنا أو استطلاع هناك. هؤلاء «نباتات ظل» ترعرعت فى دفء الصالونات وبرودة الغرف المكيفة.

أما المصريون أباً عن جد فلم يسبق لهم أن اختاروا أو أسقطوا حاكماً «والمرة الوحيدة.. قتلوه!».. واسأل منظرى لجنة سياساتك. المصريون يا أستاذ جمال مجرد فئران لتجارب الحكم.. فلتجرب. لكننى أنصحك أولاً بأن تنصب على رأس كل شارع وكل حارة.. مشنقة، وتعلق فيها فاسداً أو ظالماً أو متخاذلاً، وأن تدخل على الناس بعد ذلك بـ «رغيف وحتة جبنة قديمة»، وعلى وجهك ابتسامة.

٢- «مدرس يقتل تلميذاً فى الإسكندرية لأنه لم يحل الواجب.. ضربه بقسوة حتى غاب عن الوعى، وقال إنه أراد تأديبه فقط».. وفوق العنوان صورة لطفل كالقمر يدعى «إسلام»، وأنا أبوه لا قدر الله: مش مهم إذن القانون والتعليم والحكومة والدولة وأى كلب فى البلد يطالبنى بتحكيم العقل وضبط النفس و«حسبى الله».. وما إلى ذلك من تصبير.

لو كان «إسلام» ابنى لما فكرت لحظة: سأفك وديعته التى ادخرتها من اللحم الحى، وأشترى بندقية آلية، وأحشو مشطها بست وثلاثين طلقة، وأدوس على حاضرى ومستقبلى بالصرمة، وأعيش بقية عمرى باحثاً عن هذا المدرس القاتل: لا لأقتله فحسب.. بل لأنتزع قلبه، وأشويه، وآكله فى رغيف، ثم أصفى مزاجى بكنكة شاى ثقيل.. وبعدها نتفاهم.

٣- «ليبيا تطلب شراء جثث بشرية من مصر.. والمجلس الأعلى للجامعات يرد: لا مانع».. هذا هو العنوان، فلا تنشغل بتفاصيل الخبر عن جاذبية الفكرة: إذا كانت نخبة الحكم فى مصر ترى أننا شعب «مالوش لازمة»، وعبء على موارد البلد، ولا يخيف أو يخاف.. فلماذا لا تساهم فى خدمة العلم، وتبيعنا «جثثاً» لجامعات أوروبا وأمريكا؟ لماذا لا يكون «موتنا» مصدراً للدخل القومى؟

لا أظن أن تصدير الجثث يحتاج إلى ضمانات أو معايير جودة، لأن البشر فى الموت سواسية كأسنان المشط، لكننى أخشى أن تؤدى زيادة أعداد المصريين الذين يستحقون القتل من وجهة نظر الحكومة «وهم ٥٠ مليوناً على الأقل،

وفقاً لتقديرات مركز معلومات مجلس الوزراء» إلى اتخاذ تدابير وإجراءات من شأنها ضمان استقرار أسعار الجثث فى السوق العالمية، الأمر الذى قد يضطر أحد الموردين مثلاً إلى «إغراق» جزء من حصته.. بدلاً من اتهامه بـ «إغراق» السوق.

[moheltohamy]

هوه أنا ليّا رأي واحد بس في الموضوع ده...

إلحق استخبّى يا س س قبل ما يوصلولك <_<

لأ بجد والله... مش ملاحظين إن في الوقت الحالي (Nowadays يعني) ... الناس عمّالة تخبّط في الأسرة الحاكمة ، وبالإسم كيداهوه ، وعيني عينك ، ولا أدب ولا خِشا؟!! cld:

كان المعتاد فيما سبق (أيام المدرسة يعني) إنك تشوف الناس بتخبّط من بعيد لبعيد في الوزراء ، أو مثلاً تلاقي مصطفى حسين مستلم رئيس الوزرا في كاريكاتيراته!

لكن حد كان يقدر يهوّب ناحية مهيب الركن (هااء هيئ)؟! إنسوا! :o

إيه اللي بيحصل بقى اليومين دول؟!

هامش الحرية بتاعنا وسع أوي! داحنا بقينا ولا كندا يا جدعان cld:

[se_ Elsyed]

هامش الحرية بتاعنا وسع أوي! داحنا بقينا ولا كندا يا جدعان

إحنا داخلين في 5 سنوات تقريباً ومن ساعة ما بقى في اكثر من 500 جريدة ومجلة تصدر في مصر شهرياً ... ومن ساعة ما بقى الإنترنت في متناول الجميع وبقى في بلوجر ومنتديات و و و

والامور بهؤت من الحكومة وبقت خارج السيطرة وهايراقبوا إيه ولا إيه ولا إيه .. وبقت الريح العاصفة أقوى منهم

وبقى النقد بيطول كل تخين في الدولة من اول الرئيس لحد عم عبدو البواب اللي شغال في عمارة في منشية ناصر ..

إنها رياح التغيير يا صديقي التي لن يستطيع أحد ان يقف امامها .. لكن علينا أن نستغل الريح دي بشكل صحيح والشراع بتاع مركب التغيير يتوجه صح أحسن المركب تتقلب بينا

[spain]

يمكن هما اليومين دول بيسمعوا ويطنشوا لا يجدي الكلام بشئ

يمكن مش فاضيين يسمعوا

يمكن الوقت اللي المفروض بيرودا فيه بطريقتهم بيعملوا حاجة <_< اهم ليهم

يمكن عارفين ان ايامهم قليلة فكله بيقول الحق اكسب كل ثانية لصالحي

[moheltohamy]

معلش أنا كنت علّقت من ازبهلالي من الحرية اللي مفتوحة اليومين دول ع البحري ، ونسيت اقول رأيي في صميم الموضوع يا سي السيد...

بصراحة... لازم جمال مبارك يمسك البلد (العزبة بتاعت بابا) ، ولو ما مسكهاش يبقى إخص علينا!

يعني هوه كان اقل من بشار الأسد؟ ولاّ أقل من الملك عبد الله بتاع الأردن؟

وجحا أولى بـ ... بعزبة أبوه!

وإذا كان - ودي فعلاً حقيقة - مهما تعمل في المصريين الطيبين دول ؛ محدّش منهم بيتكلم! ولو جه جمال مسك الحكم ؛ آخرهم يبرطموا بكلمتين... يبقى الراجل غلطان وراكبه الغلط من ساسه لراسه لو ما سلّمش العزبة للواد!

بس انا كان ليّا اقتراح لفخامته:

ما تستأذن من دلوأتي وتتنازل عن السلطة ، وتقول أنا عشان راجل ديمقراطي ؛ هاسيب الحكم ؛ ومجلس الشعب يرشّح حد يستلم الكرسي... وانتا عارف إن مجلس الشعب كلهم بتوعنا ، و ولادنا برضه!

والميزة ف الموضوع ده حاجتين...

1. تضمن إن مفيش كلب هيتجرّأ ويُؤَف أصاد جيمي ، طول ما الشبل الأسد واقف وراه! وبكده الكرسي واخدينه واخدينه ، ومنها نرسّي الواد ع الفولة واللعبة بتتلعب ازّاي (ده لو ما كانش راسي عليها من بدري)!

2. نضمن إن الإضاءة اتشالت من علينا شويّة ، وبرضه ما زلنا إحنا اللي سايقين ولو من خلف الستار ، وتفضل صفحتنا بيضا ، ومحدش ينخور ورانا! ماحنا كده كده عرفنا مين اللي ورانا!

وعلى ذكر النقطة رقم 1 ... تحضُرُني نكتة دمها خفيف جداً كنت سمعتها... النكتة بتقول:

جه المعلّم حب يعلّم إبنه أصول السياسة. راح جابلُه قفص فيه 80 كتكوت ، وقال له عاوزك تطلّعهم من القفص ، وترجّعهم فيه تاني في نص دقيقة.

جه يطلّعهم من القفص ، وكل كتكوت جري في إتجاه! <_<

جه المعلّم الكبير يعلّمه أصول اللعبة ، ويفطّمه ع الفولة...

قام ماسك القفص ، وبدأ يهز ويمخمط فيه وجوّاه الكتاكيت ، وبعد كده طلّعهم بره القفص!

والكتاكيت دايخة ومش شايفة أدامها ، وف 10 ثواني كان لاممهم ، وحادفهم جوه القفص.

آدي أصول اللعبة... لازم الكتاكيت تكون دايخة على طول ، وما تفوقش!

حد فاهم حاجة؟ :o

[mizo]

ممكن نشوف الصوره من وجهه اخرى

جمال مبارك شاب فى الاربيعينات متعلم جيدا دارس علوم سياسيه واقتصاد تربى وشاف اخطاء والده ومميزاته فى الحكم يعنى اكتسب الخبره لاداره الدوله

ماهواالمانع الفعلى لعدم تولى جمال السلطه

فعلا اريد رد مقنع غير انه ابن الريس ومن هو فى رائى كاتب المقال

مناسب لهذا المكان

فى اتتظار الرد وشكرا :wub:

[se_ Elsyed]

ماهواالمانع الفعلى لعدم تولى جمال السلطه

فعلا اريد رد مقنع غير انه ابن الريس ومن هو فى رائى كاتب المقال

مناسب لهذا المكان

فى اتتظار الرد وشكرا :wub:

المانع ان خلال الثلاث او اربع سنوات الاخيرة والتي اصبح فيها الاخ جمال بيحكم بالفعل من خلال المناصب العديدة التي احتلها .. اصبح الخراب يعم البلاد على يده والبلد اتبعات لمعارفه واصحابه ... وقام المدعو بإحاطة نفسه بما يسمى برجال الاعمال على هيئة ما يسمى لجنة السياسات وقام بزرع معظمهم في العديد من الوزارات .. واحكم انت بنفسك حضرتك عمل ايه احمد عز ومحمود محي الدين والمغربي واحمد نظيف في البلد ؟

اما سؤالك من هو مناسب لهذا المكان : اقول لسيادتك

اللي مناسب لهذا المكان هو اي مصري محترم لديه القدرة على العمل الجماعي ويقوم بإسناد الامر لأولي الخبرة وليس الثقة لإن الثقة تأتي من وجود نظام محترم وقوي تُحكم به البلد

وبص لأمريكا .. هل كان حد يتخيل من كام شهر ان واحد زي اوباما يبقى زعيم اكبر واقوى دولة في العالم ؟

وهل تعتقد ان اوباما يعتبر سوبر مان زي الرؤساء اللي عندنا اللي بيفهموا في كل حاجه ومافيش غطا بلاعه بيتركب في شارع الا والمسئولين بتوعنا يطلعوا يقولوا : ان هذ الغطا ركبناه بناء على توجيهات سيادة الرئيس

واخيراً : من اعطى الفرصة لجمال لكي يتسلق على اكتاف الشعب ليصل الى الكرسي .. لماذا لم يعطيها لغيره من الثمانين مليون مصري ؟

[مشمش]

جمال مبارك شاب فى الاربيعينات متعلم جيدا دارس علوم سياسيه واقتصاد

يوجد لدينا الكثيييير من الشباب المثقف المتعلم الدارس للعلوم السياسية و الاقتصادية!

نريد ان نختار الافضل!!!

لماذا نقيد انفسنا بشخص واحد! أم هل تعتقد انه الوحيد الذي يمتلك هذا العلم و لا يوجد في 80 مليون من هو مؤهل!

(ده طبعاً غير رأيي الشخصي و الذي يتفق عليه الكثيييير. انه مالوش فيها زي ابوه بالظبط)

تربى وشاف اخطاء والده ومميزاته فى الحكم يعنى اكتسب الخبره لاداره الدوله

استنتاج خاطئ.

قربه من دائرة الحكم في نظام مستبد و بلا معارضة حقيقية يجعله يري "المزايا" فقط. بل الادهي انه من غير المستبعد ان تكون النظرة الي المساوئ و الاخطاء علي انها مزايا و حسنات!!!

(يعني تفتكر في حد من المستشارين دخل مرة علي الريس و جيمي قاعد جنبه و قاله : (ايه اللي انت هببته ده الله يخرب بيتك, البلد كده هتولع و الناس هتشحت!))

ماهواالمانع الفعلى لعدم تولى جمال السلطه

اترك سرد الكثييير من هذه الموانع الي احد اخر من الاخوة الافاضل حيث لا يوجد لدي ما يكفي من الوقت (او الاعصاب)

تحياتي لك اخي الكريم, و تحية اخري علي هذه الصراحة :wub:

[Sherief AbdelWahab]

سيمبا كوَّن شلة من رجال الأعمال والأكاديميين والصحفيين يستمع لهم باستمرار .. كانوا وبالاً على الحزب وعلينا .. وأنا شخصياً لا أرتاح للشخص "الودني" في منصب قيادي..

خلص الكلام

[Khiber]

أرشح أ.د. حسن نافعه و د. أسامه حرب

ناس نظيفه رفضوا رغم الإغراأت أن يكونو من قطيع المنتفعيين من حزب جمال وسياسيين وإقتصاديين ممتازيين

[tarek hassan]

الأخوة الكرام

ما دعاني للدخول للموضوع هو أنني وجدت عنوانين متناقضين تماما

1- الأول في انتخابات الرئاسة وهو : مبروك يا جماعة مفيش ورث

2- الثاني في سياسة داخلية وهو : مصر بتتقلوظ

فلذا لزم التنويه للتصحيح كالتالي :

1- الأول يكون : مبروك يا جماعة فيه ورث

2- والثاني يكون : مصر بتتقلوظ

أو التصحيح هكذا :

1- الأول : مبروك يا جماعة مفيش ورث

2- والثاني : مصر مش بتتقلوظ

وشكرا للإدارة وخاصة المشرف العام : سي السيد

تم تعديل 11 نوفمبر 2008 بواسطة tarek hassan

[mizo]

حقكم عليا انا غلطان واكيد مش عارف ايه اللى بيجرى فى مصر wst:: wst::