انطباعات مغتربين عن مصر بعد زياراتهم لها

[se_ Elsyed]

عفوا ايها السادة مصر فوق الجميع واللى بنمر بية دة ما هو الا ازمة من ازمات عشناها من 7000 سنة وحتمر واحنا اللى حنضل موجودين

لية دايما بننتقد وبندور على السلبيات

طيب الاول شوف الايجابيات ونطورها

يا عم اكرم إنتقادنا لبلدنا اللي بنحبها بينبع من حبنا لها ورغبتنا إننا نشوفها في تقدم مستمر ..

والدليل على ذلك إن كثير منا مغترب بره مصر ويرى سلبيات في البلد التي يعيش فيها ، ولكن لا نركز ولا نعلق على تلك السلبيات كثيراً لإنها تخص أصحابها ولا تهمنا سواء صلحوها أو زادت ...

إنما المُحب لبلده والغيور عليها ما يقدرش يشوف فيها حاجة غلط وما يتكلمش ...

[drhusseinali]

بكل اخلاص انقل لكم مقتطفات عن نزولي السابق للمحروسة

اول لقطة المسافرين:

اجتمعت انا و زوجتي (يابانية الجنسية) :D و ابواها في مطار اوساكا و ذلك لاستقلال طيران الامارات الى القاهرة. وكنت قد سعدت كثيرا بالاهتمام و الحب البادي في اعينهم عن مصر حتى اني فوجئت ان والدة زوجتي تطلب مني ان تاكل كشري عند وصولها لمصر.

بصراحة انا كنت متخيل ان تطلب زيارة الاهرام او المتحف المصري, بس موضوع الكشري ده كان بعيد شوية.

ثم علمت بعد ذلك ان كتيب السفر الياباني الي مصر يعرض الكشري كاحد المعالم الرئيسية في الوجبات زيه زي الاهرام كده مع وضع صورة لطبق الكشري, بصراحة تفتح النفس . :o

طبعا مش محتاجة كلام عن النظام في المطار, و عند استقلال الطائرة, كله منتظر موعده لاستقلال الطائرة بدئا بكبار السن و المصاحبين للاطفال ثم بالترتيب من المقاعد الاخيرة اولا وصولا الى الاولى. ده طبعا غير الخدمة الممتازة طول الرحلة حتى الوصول الى دبي حيث الترانزيت . :o

[drhusseinali]

تاني لقطة مطار دبي للترانزيت:

بصراحة المطار اكثر من ممتاز, و صادف وصولي موعد صلاة الفجر, و كانت اول مرة اسمع صوت الاذان بحق و حقيق منذ اكثر من سنتين, و طبعا كان احساس لا يوصف لا يشعر به الا من اقضى فترة في بلد اجنبي.

المهم بعد اللقاء مع افراد العائلة في بوابة الصعود للطائرة بدات اول المفارقات مع الصعود للطائرة, فمع ان شركة الطيران واحدة, و الاجرائات واحدة الى ان الاستجابة من الركاب مختلفة تماما. فقد كان الجمهور متحفز للصعود للطائرة تحفز الاسد لفريسته. فاول ما بدا الاعلان عن صعود العائلات بالاطفال و ذوي الاحتياجات الخاصة فاذا بكل الركاب بقدرة قادر امام باب الدخول في زحام اشبه ما يكون الى ركوب الاتوبيس. حتى الاجانب و اليابانيين الذين اتبعوا امامي النظام في المطار السابق, عندما راوا النظام الجديد تزاحموا ايضا على البوابة مع القاء التعليقات. :D

حاجة تانية من الحاجات اللي تفرس و شفتها كتير انك تلاقي اللي قاعد جنبك مصري, و شكله مصري, بس مايكلمكش غير انجليزي و من طرطوفة منخيره كانك بتكلم حسني. :o

المهم الحمد لالله وصلنا القاهرة.

و كان من سعادة الاجانب, و فرحتهم الغامرة بالوصول الى مصر, و محاولاتهم لرؤية البلد من الشباك و كانهم في حلم, ما اثلج القلب, اذ انه في الاخر مهما كان, لا تزال بلادنا هذا الحلم الجميل في قلوب الاخرين. :o

تم تعديل 1 أبريل 2005 بواسطة drhusseinali

[زعلان]

في اخر زيارة وقبل ان تنتهي كنت قد اقسمت ايمانا مغلظة الا تطأ قدمي هذه البلد مرة اخرى الاستهبال والاستعباط وقلة الذوق والسخافة سمة تكاد تكون عامة في البلد حتى الفنادق والمطاعم الكبيرة لا يعرفون اساسيات التعامل مع الضيف ,غير عدم النظافة والغباء والتخلف المروري والشوارع المكسرة . لكن الواحد بينسي ةبيفكر ينزل تاني يمكن اجازة اقصر من المعتاد كانت شهر واصبحت اسبوعين والان اسبوع واحد يكفي يشوف ماما واخوانه ودنيا بنت اخويا وبس خلاص

[se_ Elsyed]

في اخر زيارة وقبل ان تنتهي كنت قد اقسمت ايمانا مغلظة الا تطأ قدمي هذه البلد مرة اخرى الاستهبال والاستعباط وقلة الذوق والسخافة سمة تكاد تكون عامة في البلد حتى الفنادق والمطاعم الكبيرة لا يعرفون اساسيات التعامل مع الضيف ,غير عدم النظافة والغباء والتخلف المروري والشوارع المكسرة . لكن الواحد بينسي ةبيفكر ينزل تاني يمكن اجازة اقصر من المعتاد كانت شهر واصبحت اسبوعين والان اسبوع واحد يكفي يشوف ماما واخوانه ودنيا بنت اخويا وبس خلاص

لأ بقى كده نزعل منك بجد يا زعلان ..

مهما كان دي بلدنا ..

لا توجد بلد ليس بها مساويء او عيوب وبالتالي صعب جداً غن حد يكره بلده إلا لو كان جاحد او ليس له جذور ..

وبعدين بدل ما تزعل وتحلف إنك مش هاتزورها حاول تصلح ولو بإقتراحات مكتوبة .....

[Arabisc]

سلام عليكم

في اغنية قديمة لحنان بتقول كنا زمان سكنين هنا. في الحي ده من كم سنة. ياهل ترى اتغيرت انا . ولا الزمان عدى و غير حينا

الحقيقة هي الاثنين معا . احنا بنتغير في الغربة - للافضل أو للأسوأ - و البلد كمان بتتغير - للافضل أو للأسوأ . والنتيجـــة غالبا أننا نشعر بشيء من الغربة في الزيارات القصيرة للبلد

يمكن علشان أنا أخدت على الغربة من صغري و كذلك لا يمر علي أكثر من سنة - بالعافية - من غير ما أرجع مصر , يمكن علشان كده لا أشعر بالصدمة عند النزول لأن التغيير ما بيكونش عنيف يعني

المهم يجب أن نتعامل مع التغيير كحقيقة من حقائق الحياة التي تؤثر فينا أيضا

كذلك من العدل و الأنصاف النظر ألى التغييرات الأيجابية التي تحدث في البلد و ان كانت أقل وضوحا و تأثيرا من السلبيات

لا أستطيع الأنتظار حتى ميعاد نزولي القادم , أن شاء الله في يوليو

سلام عليكم

[Scorpion]

موضوع مشابه قد يكمل هذا النقاش :

عدت الي مصر و لكني لم أعد الي وطني

ما قدرش اتخيل سنة كاملة تعدي عليا بره مصر... ولما برجع بشوف كل اللي بتقولوا عليه... لكن ما بحسش بالغضب... لما بتنطط بين مية المجاري الطافحة فيه دايمآ كام طوبة واحد تاني حطها للي زيي علشان يقدر يمشي.... لما واحد او واحدة عجوزة شايلة حمل بلاقي دايمآ اللي بيقول عنك يا أمي...و أنا أولهم... لما حد بيشتم.. فيه دايمآ واحد تاني بيوبخه...لو حد قال أمسك حرامي.. كل الشارع تلاقيه بيجري وراه ... و زي ما حاجات كتيرة اتغيرت للأسوأ .. حاجات تانية أتحسنت... يعني مثلآ المية ما بقتش تنقطع ( علي الأقل في شبرا ).. الشوارع زحمة صحيح.. لكنها ماشية... النور ما بيتقطعش كل ليلة زي زمان... و البلد مهما قلتم فيها فلوس.. و بقي في أماكن ترفيه كتيرة.. و مشاريع بتطلع كل شوية... صحيح ما بكونش حزين جدآ ساعة السفر... بس أول ما برجع هنا ببتدي أعد الأيام علشان أرجعلها تاني..

اللي عايش جنب أبنه أو بنته.. عمره ما بيحس أنهم كبروا..لأنهم دايمآ جنبه... لكن لو ليهم عم عايش بره و بيرجع كل فترة.. هو اللي بيلاحظ التغيير اللي بيجرالهم...يااااااه ده انتي بقيتي عروسة...

نفس الحكاية ..اللي عايشين المشاكل مش بتأثر فيهم أوي بل بيتعودوا عليها و بالأمكانيات البسيطة الي في أيديهم بيحاولوا يلاقولها حل.. لكن اللي جاي من بره بيكون تأثيرها مباغت عليه... و تغيير العادات و التقاليد... تغيير الأخلاق... بيحصل في الدنيا كلها.. و مصر جزء من الدنيا دي... و كل اللي عايشين فيها بيشوفوا اللي بيحصل في العالم...

تحياتي ...

[زعلان]

في اخر زيارة وقبل ان تنتهي كنت قد اقسمت ايمانا مغلظة الا تطأ قدمي هذه البلد مرة اخرى الاستهبال والاستعباط وقلة الذوق والسخافة سمة تكاد تكون عامة في البلد حتى الفنادق والمطاعم الكبيرة لا يعرفون اساسيات التعامل مع الضيف ,غير عدم النظافة والغباء والتخلف المروري والشوارع المكسرة . لكن الواحد بينسي ةبيفكر ينزل تاني يمكن اجازة اقصر من المعتاد كانت شهر واصبحت اسبوعين والان اسبوع واحد يكفي يشوف ماما واخوانه ودنيا بنت اخويا وبس خلاص

لأ بقى كده نزعل منك بجد يا زعلان ..

مهما كان دي بلدنا ..

لا توجد بلد ليس بها مساويء او عيوب وبالتالي صعب جداً غن حد يكره بلده إلا لو كان جاحد او ليس له جذور ..

وبعدين بدل ما تزعل وتحلف إنك مش هاتزورها حاول تصلح ولو بإقتراحات مكتوبة .....

يا عزيزي ارجع واقول اني ديما بفكر انزل تاني ولو اجازة صغيرة ماتزدش عن اسبوع كفاية :P

[TOXIC]

انا كنت في الكويت 7 شهور

و بعدين رجعت مصر

حسيت ان الدنيا ضلمة مش عارف ليه حتي افتكرت كلمة عادل امام لما أضرب

(( مين طفا النور )) :blink:

ياترى ليه كدة ؟

[se_ Elsyed]

انا كنت في الكويت 7 شهور

و بعدين رجعت مصر

حسيت ان الدنيا ضلمة مش عارف ليه حتي افتكرت كلمة عادل امام لما أضرب

(( مين طفا النور ))  :blink:

ياترى ليه كدة ؟

<{POST_SNAPBACK}>

يمكن لما نزلت كان النور قاطع :huh:

بس أنا شايف إن 7 شهور مش كثير عشان حاجات تتغير وُعطيك هذا الإحساس .. يا عم ده الطيارة اللي ودتك الكويت بتلاقيها لسه ما رجعتش مصر ..

[ممنوع من الدخول]

السلام عليكم و رحمة الله و بركاته

انا راى ان مصر بخير . لكن ينقصنا حاجة واحدة غايبة عنا من فترة طويلة.

هى القدوة

فى ايد خفية فى مصر بتدمر النجاح و تحارب الناجحيين. الضوء مسلط من زمان على الفاشليين فقط لحد ما بقوا القدوة. العظماء رحلوا من فترة و سابلهم البلد. ومن ساعتها مفيش قدوة حسنة .

اما مصر نفسها هى هى احنا اللى العيب فينا . مفيش مبالاة مفيش طموح مفيش عيب مفيش ... قدوة.

انا سافرت الامارات، البحرين، عمان و قطر و دول كتيير فى غرب افرقيا. مصر دولة. عارفيين يعنى ايه دولة ؟ بلد وامةو شعب.

اخر مرة وانا راجع من الامارات من كام يوم كان قاعد فى الكرسى اللى ورايا فى الطيارة بنت اماراتية و امها. اول ما الطيارة حلقت فوق القاهرة و شافوا المبانى على مدى البصر و الزراعات و الخضرة و الكبارى . لقيت البنت بتقول لامها ( وبنجول ليش المصريين شايفيين حالهم.... ). احنا عرفيين نفسنا وبلدنا . لكن الناس اللى برة مش شايففين غير الفاشليين اياهم فى وسائل الاعلام.

المشكلة ان فى الفترة اللى مفروض نطلع لقدام رجعنا لورا مع ان مصر هى هى . العيب فينا من كبيرنا لصغيرنا.

انا اشكر كل مصرى نفسه يغير بلده. لكن صدقونى احنا اللى لازم نتغير.

وللحوار بقية

[بــــــحــــــر]

السلام عليكم ورحمة الله وبركاته

انا مواليد الكويت

ماجتش مصر غير للتقديم في الجامعه

وكانت االمفاجاه

طبعا قبل كده لاكنت عرفه ان المفروض مصر بلدي وان ليا فيها اهل ولا حاجه خالص

طول عمري عايشه في الكويت وفي نفس المدرسه من الروضه للثانويه

واغلب اصدقائي بالمدرسه تقريبا نفس النظام

في منهم كان معايا كل مراحل الدراسه

طبعا مش هتكلم على نظافة الحمام في مطار مصر :huh:

عشان اطلع من الحمام لقيت اتنين ستات من حجم xxxlواقفين على الباب

كل واحده تقول النشيد بتاعها :

حمدالله على السلامه 0مصر نورت00000مافيش كده حلاوه رصولك بالسلامه 00000

والتانيه حامل وقاعده تدعيلي وتسلم ووووو وتقولي هاتي اي حاجه كده كويتي ولا دولارات هاتي اللي تجيبه عشان النونو00000000000000

انا طبعا خفت من المنظر وانا لوحدي بالحمام وحجمي ضئيل وهما كتل ضخمه

طبعا لبيت طلبهم حتى اضمن اني هخرج من الحمام

وفي الطريق من المطار للبيت طبعا شفت حاجات كتير عمري ماشفتها

وشفت حيوانات في الشارع :blink:

وزحمه ودوشه وزباله ولاحظت ان الناس بتف كتير !! :D ............

وياسلام بقه على اول يوم انزل فيه الشارع مع ماما واخويا عشان اروح الكليه :D

واللي شفته في الكليه

(ده فيلم تاني يطول شرحه)

تم تعديل 17 يوليو 2005 بواسطة بــــــحــــــر

[الشبح الغاضب]

علي العموم يا بحر هي الكويت متفرقش كتير عن مصر ...

يعني هما كمان لهم عادات و حاجات اللعن من المصريين 100 مره بس الفكره هي ان فلوسهم بتعمي العين عن بلاويهم ...و الحابيب المصريين اللي راحوا هناك بحث عن الرزق بيتغاضوا عن الحاجات اللي هناك عشان سواد عيون الفلوس

مشكلة مصر مش حيوانات في الشارع او ناس بتف او او او اللي انتي كتبتيه كله

مشكلة مصر مش حكومة و نظام حكم و علي فكره يعني (الحكومات نتاج الشعوب)

المشكلة في التغير الرهيب اللي حصل في نفوس المصريين من فترة و اصبح في حالة تصاعديه مرعبة زادت بشكل مرعب للغاية خلال 15 سنة الآخيرة ...لامبالاة

غش في كل شيء,استهبال و عبط و نفاق و رياء للركب ,واساطة ,محسوبية تظلم ناس اخريين.... تفاخر و منظرة عمال علي بطال علي بعض تصل في بعض الاحيان الي حد الآستحقار و وصلت حتي للموبيلات كل واحد عايز يشيل موبيل احدث موديل حتي يتفشخر علي غيره و يقول لي واحد شايل موبيل قديم اييييييييييييييييييه ده انت لسه شايل الموبيل القديم ده انت ايه يا ابني من العصر الحجري !!!!!!!!!! و كأن هو اللي اخترع الموديل الجديد مش ادين عشان يجيبوا !!!!! ديه نقطة من نقطة في محيط علي الحياه اليومية في البلد

عشان كده يا بحر المشكلة مش في الشوارع و الكلام ده ..... المهم اللي في القلب و النفوس .... و بعدها الله سوف يمد الايادي و العقول بالطاقة و النور و يفتح علينا من اوسع ابوابه لكن لازم نغير اللي في نفوسنا عشان الله يغير حالنا زي ما القرأن الكريم ما قال ....

مصر فيها الكويس و الوحش لكن الفكره المرعبة ان نسبة الوحشين هي الغالبة الآن و ده مؤشر خطير

احنا كان ممكن نكون بلد كويسة و جميلة و متقدمة كمان و يضرب با اهل مصر المثل في الطيبة و الاخلاق لكن ...

الفهلوة و العبط او ادعاء العبط و حاجات تانية كتير هي اللي جايبنا لي ورا

مش حقول انظر لي اليابان او المانيا ما هي كانت من 50 سنة مطحونة و مهزومة و نهضت اهي لآ يا بشر مش المانيا ولا اليابان ...

المدعوقة اسرائيل

كانت غير موجودة اساسا من 50 سنة لا وجود لهذه الدولة اساسا !!!

و كان اهلها مشردون في العالم و من احقر البشر و ليس لهم وطن او ماوي !!!

اليوم ..............

5 مليون بدولة قد بولاق مرقصة 250 مليون عربي !!!!

شالوم !! :D :D

[وائل عبده]

بسم الله الرحمن الرحيم ـ وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْراً أَن يَكُونَ لَهُمُ الْخِيَرَةُ مِنْ أَمْرِهِمْ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالاً مُّبِيناً ـ صدق الله العظيم

اللهم اعدنا الى مصر سالمين اللهم امين

[مصرى00]

حبايبى الغاليين

الكل بيعلق على شماعة يراها مناسبة من وجهة نظرة

لكن إحنا السبب ..... بكل صدق

لعلي ماأطيل عليكم ولكن هذه تجربتـــــــــــــــــي :

دايماً معظم اجازاتى بالسيارة وأفضل طريق السعودية الأردن مصر ( طريق نويبع العقبة ) وده لأنه أوفر وأسرع ولا عراقيل ... ممكن نفيد من يطلب التفاصيل

كان الموسم ده زحام شديد حيث نزول المدرسين وبداية الموسم .. كلنا مسافرين .. كلنا معانا عوائل منهم الرضيع والكبير ... كلنا تعبنا من الطريق ... الأهم كلنا معانا فلوس !!

 بالسعودية الكل كان في غاية الانتظام والكل خد دورة وأنهى الإجراءات

 بالأردن إحنا نفس الأشخاص ولكن العرق المصري بدأ بالعمل بدأت الهرجلة والفهلوة كنا بانتظار العبارة .. الكل صافف بطوابير تم إركاب المسافرين بالدور وخلى بالك يبدأ الصف من اليمين أو اليسار لا أذكر ولكن كان الناس منظمة جداً السيارة التي بجواري كان صاحبها طريقة مقفول هو أتى بعدى فعلا سمعته يتحادث مع صديق له ويقل له عند خروجك لاتمشي ولكن عرض بسيارتك أمام السيارات الأخرى حتى اخرج أنا طبعاً بدون حق ولأن العبارة كان يلزمها فقط 14 سيارة حتى تمتلئ وبدأت الفهلوة من الجميع والتدافع جعل المسئولين عن المينا يوقفوا إركاب السيارات وخرجت العبارة وتركت الجميع لاهم أخدوا حقهم ولا صاحب الحق ركب وبات الجميع بالمينا ... طبعاً لو فيه رشوة بالأردن كانت سلكت الأمور كويس !!

وصلنا مصر إحنا إحنا نفس المجموعة من السعودية .. الأردن ... ثم مصر ... الكل بان على حقيقته جميعنا كما قلت " كلنا مسافرين .. كلنا معانا عوائل منهم الرضيع والكبير ... كلنا تعبنا من الطريق ... الأهم كلنا معانا فلوس !! " بايتين ليله بالأردن وتعلم التعب وخاصة مع الأطفال بدأ الملاحم والفتوحات المصرية من المصريين .. ليس من الكل ولكن من البعض بالرشاوى والهدايا تكون واقف بالطابور مدة وعند وصولك للشباك تجد من يقف أمامك من العساكر أو المرتزقة طبعاً مربطين مع الموظفين الطابور متواصل وحول الطابور يمين وشمال تجد كثير المهم من وقف بالطابور تقريبا وقف حتى لا يعطل إجراءات من هم خارج الطابور ... طبعاً بفلوسهم أساؤا للجميع ,اخدو حق غيرهم ,تسببوا بمشاكل للعائلات الشريفة

ده نقول عليه إيه نظام ولا إحنا سبب ذلك

زى ماقلت لو كل واحد مابصش لحاجة غيرة حيلاقى حاجته ماحدش بص لها

وعايزك تقارن أنت حتبص على كام حاجة .... كام واحد حيبص لحاجتك

النسبة كبيرة جداً وعشان كده نصلُح نفسنا أول ساعتها تجد كل حاجة أصبحت كويسة وليست كوسة الفرق بسيط حرف واحد بس "ي"

ولابد من تكسير الشماعة .. نعم لها بعض التأثير ولكن يمكن إبطاله بعد تشجيعة

وبحبك يمصر .... أرض وشعب فى كل وقت وعصر

سلام

[se_ Elsyed]

بصراحة ما كانش لي نفس أحكي عن إنطباع الواحد خلال زيارته لمصر لإن أعتقد اللي هأقوله مش جديد عليكي .. لكن نعمل إيه بقى ..من حبنا لبلدنا لازم نحكي عن السلبيات اللي مش عجبانا ونحاول نغيرها .. وندعي على اللي كان السبب ..

فبالفعل الجميع يعلم ويعرف إن سبب كل الظواهر الإجتماعية الموجودة في مصر الآن هي المشاكل الإقتصادية اللي النظام الفاسد غرق البلد فيها طوال 25 عاماً ...

فأصبح في مصر كإنهم يعيشون في غابة .. وبالتالي إذا لم تكن أسداً أو على الأقل تستأسد لكي تستطيع أن تتنفس ..

ما علينا ومن غير فلسفة .. ندخل في الموضوع ..

أول الظواهر اللي بتقابل الواحد هي

" الواسطة وما يتبعها "

- فبدون مبالغة لما تحب تتعامل مع أي جهة وخصوصاً الحكومية لو معاكش واسطة يبقى هايتقطم وسطك .. وبالتالي فأنت مُجبر على التفتيش في دفاتركم القديمة عشان تشوف لك واسطة ، ويعلم الله إن الواحد بيحاول يتفادى ذلك ولكن لو عملت فيها شريف يبقى ربنا يديك طولة العمر وطول الأجازة عشان تعرف تخلص ورقة حتى ...

وعلى سبيل المثال ..

شركة الإتصالات المصرية مستقصداني من دون الـ 70 مليون نسمة الموجودين في مصر .. فالعام الماضي حكيت لكم على العذاب اللي إتعذبته عشان أرجع خط التليفون اللي كنت مبلغ على إني مسافر وبالتالي أحفظ حقوقي .. ولما نزلت حاولت أرجع الحرارة فبهدلوني لحد ما قولت ما بدهاش وجبت واسطة رجعت الخط في خلال دقائق ... السنة دي ما بلغتش وسبت الخط زي ما هو وبرضوا حصل نفس الشيء . أنا مسافر خارج مصر حوالي 10 شهور وأخويا بيدفع لي فواتير الإشتراك بإنتظام وأنا الوحيد اللي معايا مفتاح شقتي اللي هي في بيت العيلة .. ومع ذلك جه علي مبلغ 50 ج مكالمات زيادة !!!!!!! .. الراجل دفع .. ومع ذلك لقيت الخط مفصول عشان ما سددتش الفاتورة .. وفضيحة بقى كل واحد يتصل يسلم عليه ترد عليه الرسالة المُسجلة اللي بتقوله إن س س كليفتي وما سددتش الفاتورة وبيحاول يستلف عشان يسددها ... بعد ما أرتحت يومين تلاتة أخدت اخويا والفاتورة وروحنا نخزق بها عنيهم في السنترال .. فالموظف قال لنا إنه نسي يدخلها على السيستم بعد ما أتسددت من حوالي إسبوعين .. وإن شاء الله الحرارة هاترجع بعد يومين لإن كنا يوم الخميس .. وتعيش إنت يا حاج ..

طب يابا إيه نظام المكالمات الزيادة دي ؟... قالي عليك وعلى مدام فتكات رمش العين اللي في أخر مكتب ... روحت لمدام فتكات .. إيه يا ستي المبلغ ده ؟... والله العظيم يا جماعة ما ردت علي بأي كلمة .. ولكن إكتفيت بتمثيل مشهد بانتوميم وشاورت بإيدها في حركة زي الفراعنة كده لما كانوا بيصلوا لآتون إله الشمس وهزت راسها زي الهنود وبس .. فقلت لها يا ست فتكات أنا لا أفهم لغة الصم والبكم .. حضرتك أعمل إيه ؟.. نفس الطقوس بتاعت الصلاة .. فأنفجرت فيها ولقنتها درس في معاملة الجمهور وروحت رازعها كلمة خليتها نطقت ووشها جاب ألوان.. فقولت لها إنتي في مصلحة خدمية وبالتالي لما واحد من الجمهور يسأل عن حاجة لازم تجاوبيه لإن أنا وغير اللي بندفع مرتبك أخر كل شهر .. وهنا بقى حصلت المعجزة ونطقت وقالت لي يعني لو إنت ما دفعتش الفاتورة مره يبقى أنا مش هاخد مرتبي ؟ فقلت لها نعم .. لو أنا وغيري ما دفعناش يبقى أنتي مش هاتخدي مرتبك .. وسممت بدنها بكام كلمة في العضم مع إني عارف إني مش هاخد لا حق ولا باطل معاهم .. لإنهم في دولة ليس فيها ثواب أو عقاب وإذا ما كناش بنقدر نحاسب رئيس الدولة ولا أي حد من التابعين له .. يبقى هانقدر نحاسب دول ؟ ونتيجة لهذا الشعور كل واحد بيبرطع في الميغه زي ما هو عايز وعارف نهايتها القصوى حتى لو أتمسك متلبس برشوى أو غيره .. إنه هايتنقل حته تانية وخلصت على كده .. وأتفضل شاي يا ريس ..

وقمت بالإتصال على الراجل الواسطة ده اللي كان في إجازته السنوية ومع ذلك رجع لي التليفون في خلال ساعة ...

يُتبع

[se_ Elsyed]

الغلاء الفاحش ومحدودي الدخل

عندما أتحدث هنا عن محدودي الدخل فأنا لا أكرر ما يتشدق به الرئيس القائد الأخ حسني مبارك اللي أساساً لا يعرف عن محدودي الدخل شئياً ولا يشعر بهم على الإطلاق وذلك ببساطة شديدة جداً لإنه لا ينزل الي الشارع ولا يختلط مثلنا بالمصريين البسطاء أصحاب الأرض والمال اللي بينهبوه وبيحولوه بره على بنوك سويسرا...

والله العظيم يا جماعة أكاد أبكي يومياً من معاناة هؤلاء البسطاء الذين أراهم وأسمع عنهم وأستفسر عن أشياء كثيرة يعانوا منها ..

ومنها على سبيل المثال

- رغيف العيش ... اللي هو المُكون الرئيس لغذاء غالبية الأُسر المصرية .. وعرفت إن الدولة إخترعت نظام هامايوني لأفران العيش البلدي وهو إن الأفران في كل منطقة تتقسم حسب فترة عملها .. أفران تشتغل من الصبح لحد 12 ظهراً وأفران تانية تشتغل من بعد الظهر للعصر كده وكل فرن يتصرف له حصة معينة من الدقيق .. وعرفت وتأكدت بعيني إن جميعهم بيبعوا الدقيق المُدعم اللي بيتصرف لهم في السوق السوداء تحت مرآى ومسمع من وزارة التموين والشرطة والكل كليلة .. الدقيق اللي أصبحنا بسببه أذلاء ومديونيين لطوب الأرض وأصبح المصري لا يستطيع أن يرفع رأسه من ذل الديون .. وبالرغم من إنهم درسوا لنا في المدارس إن في حاجة إسمها النيل وإن عندنا أرض خصبة وفي كمان كليات إسمها كليات الزراعة بتخرج ملايين من خبراء الزراعة من عينة يوسف والي ويوسف عبد الرحمن وراندا الشامي وأحمد الليثي إلا إننا فشلنا في تحقيق الإكتفاء الذاتي من القمح .. وسيبكوا بقى من كلام إستصلحنا 2 مليون فدان وهاندخل في مليون كمان لو إنتخبتوني فكل ده كذب في كذب وأهو كلام وما حدش بيعد ورا الريس أو جايب قصبة وبيقيش بها الأطيان والفدادين اللي بتتزرع .. وربنا يجازي محمد علي باشا الكبير خيراً اللي لولاه لكنا متنا من الجوع أو على الأقل أصبحنا كالبدو الرُحل نعيش على الكلأ ونجوب دروب الصحراء بحثاً عن العُشب وأبرا المياه الجوفية فالمعروف تاريخياً بإن مساحة الأرض المنزرعة في عهده بلغت 6 مليون فدان وده طبعاً في مطلع القرن التاسع عشر يعني بنتكلم في سنة 1805 م تقريباً ... ومن بعدها الكل عايش في خيره .. وأتحدى الرئيس يقول مساحة الأرضة الطينية المنزرعة كام دلوقت ..

وسألت في موضوع الدقيق المسروق ده وعرفت إن أقل مخبز بيطلع له 1000 جنيه في اليوم من الهواء يعني 30 ألف في الشهر .. يبقى يشتغل ليه ويجيب عمال ليه ويأكل الناس ليه ؟ .. إن شالله عنهم ما أكلوا ...

أما بقى من يدفع الثمن فهو المواطن البسيط اللي مالوش غير ربنا بس ... فوالله العظيم يا جماعة قالوا لي إنهم بيضطروا يستيقظوا من بعد صلاة الفجر ويذهبوا إلى الفرن عشان يحصلوا على بعض الأرغفة لهم ولعيالهم ...

واللي مش عاجبه عليه وعلى الرغيف الطباقي أبو ربع جنية اللي بيتباع في الشارع ولا يقدر عليه غير أبناء الطبقة الأرستقراطية فقط .. وعلى فكرة ده برضوا معمول من الدقيق المسروق المدعوم من الدولة ... وكل ده ما بيعملهوش منظمات سرية أو خلايا نائمة هنا وهناك .... لأ بالعكس ده كله على عينك يا تاجر واللي ما يشتري يتفرج ...

يُتبع

[se_ Elsyed]

أما عن أسعار الخضار والفاكهة فحدث ولا حرج .. وبرضوا لا عزاء للبسطاء اللي ما فاضلش لهم إلا الطوب عشان يأكلوه ..

وعلى سبيل المثال وعشان تبقى الصورة واقعية .. أقل كيلو خضار سألت عنه بحوالي أربعة جنية ... ده غير طبعاً مستلزمات الخضار من طماطم وبصل ... إلــخ والثوم اللي وصل ثمنة 6 ج للكيلو .... تخيلوا ؟ ومش هاقول بقى والعياذ بالله إن البني أدم لازم ياكل سلطة خضراء جنب الطبيخ .. ده يبقى درب من دروب الخيال ومن سار على الضرب وصل ..

وطبعاً البني أدم برضوا مش هايطبخ قرديحي ... ولا إيه يا سعادة الشيف بودا ؟

يبقى لازم على الأقل شوية لحمه عشان المرقة ..

كيلو اللحمة بكام دلوقت يا أفاضل ؟

بـ 28 ج ... فحد بقى يقولي الموظف اللي بقى له 25 سنة ومرتبة 257 ج يدوق اللحمة إزاي وإمتى وفين ؟

فسألت عن اللحمة بتاعت أثيوبيا والسودان وبلاد تركب الأفيال ...فقالوا لي دي سعرها 15 ج في الجمعية .. وما حدش بيقرب لها لإن طعمها وحش وبدل ما تأكلها تأكلك هي ...

وبالتالي الفقراء دول مش ولاد البطة السودا عشان نأكلهم حاجة غصبٍ عنهم .!!!!

وعلى فكرة بقى نصيبها من حظ بتوع الكباب والكفتة اللي بيشتروها بكميات .. وإضرب يا جدع على شوية بهارات على دهن على غيره وبيع كيلو الكباب اللي وصل 70 ج دلوقت .... وكله بيسترزق ...

طب بلاش لحمه ... بلاها لحمه ... إديها فراخ ..

يبقى على الأقل فرخه إتنين كيلو العيلة تخمس فيها كلهم ودي بحوالي 15 ج ...

بلاها فراخ وبلاها لحمه ... إدخل على الفسفور وأديها سمك وإدخل على النوع الشعبي حبيب المصريين " السمك البلطي "

بالصلاتو عالنبي سمك بلطي صاحي وبيلعب بـ 8 ج الكيلو على الأقل .. يعني لو عيله من أب وأم وطفلين مثلاً يبقى ياكلوا أكلة سمك بـ 50 ج على الأٌقل يعني ربع مرتبه الشهري ..

بالله عليكوا ده يرضي ربنا يا بلد النيل وأعالي البحار ؟

يُتبع

[se_ Elsyed]

إنتقلت إلى رحمة الله المرحومة الفاكهة المصرية

لا أُخفى عليكم بإن الفاكهة المصرية كانت من أكثر الأشياء اللي بتحبب الواحد في إجازته السنوية .. ومع إن الفاكهة متوافرة هنا بكافة أنواعها على مدار العام .. إلا إن الفاكهة المصرية شكل تاني وطعم تاني ..

ولكن وللأسف .. أستكثر الفاسدون واللصوص هذه الفرحة علينا وسمموا الفاكهة عشان يتخلصوا من الثلة الباقية من فلول الشعب المصري ..

ونزلت لقيت نص عائلتي بدون مبالغة بيصارعوا الموت بسبب البطيخ المُسمم ... حتى البنت الغلبانة أختي الصغيرة اللي كنا مرتبين سوا نتقابل السنة دي في مصر في أجازتنا وهي نازلة من أقصى شمال أوروبا هي وزوجها وأولادها لبلدها وأهلها لقيت عندها حالة تسمم بسبب البطيخ اللي ما كانتش تعرف إنه مُسمم وكانت في حالة يُرثى لها ...

فبقى الواحد يزور كل مريض منهم ويسأل الأول .. بطيخ ولا مشمش ؟ يقولك لأ خوخ ..

ويطلع أحمد الليثي وزير الزراعة بكل بجاحة يقول ما فيش حالات رسمية والناس موهومة بس واهم حاجة عشان تاكل البطيخ صح صح وتبقى في السليم عليك وعلى غسل القشرة من بره .... شوفت الخيبة ؟ كان ناقص يقول إن المئات اللي إتسمموا دول ناس ما بتعرفش تاكل أساساً ... إش عرفكوا إنتوا بأكل البطيخ يا رعاع ...

وعلى فكرة ده قال الكلام ده على قناة أوربت !!!!!!!!!!!!!! يعني لو ما إنت مش مشترك في أوربت يبقى حضر كفنك وأترك وصيتك قبل ما تاكل شقة بطيخ .

حتى المانجا .. غذائي المُفضل صباحاً ومساءً في الإجازة لقيتها غالية جداً السنة دي وسألت الفكهاني .. ليه كده يابا الحاج ما أنت كنت حلو السنة اللي فاتت وكنت بأشتري منك كميات .. يبقى السعر تضاعف ليه ؟ قالي يا بيه أصل المحصول السنة دي إنضرب ... وتعيش إنت يا حاج ..

لكن برضوا ماحدش بيبات من غير عشا .. فعرفت سكة سوق العبور بتاع الجملة وبقيت أروحه بالعربية وأشتري بالجملة أفضل الأنواع بالظبط بنصف السعر الذي بيبيع به تجار التجزئة ..

يعني بإختصار ما بين نار التسمم العذائي وسندان تسمم الأسعار ما بقاش قدام غير الغلابة إلا العنب اللي سعره مناسب ويتراوح ما بين 2 ج إلى ج للكيلو .. وأهو مفيد عشانهم لإنه يحتوي على عناصر الجلوكوز والفراكتوز والسليلوز والأراجوز النوز النوز ....

يُتبع

[أسد]

من أبرز ما رأيته خلال زيارتي لمصر .. وأعتقد أنه شئ لا يمكن إخفاؤه ..

تردي مستوى السلوك العام للمصريين ..

وأنا هنا أتحدث عن عامة الناس ... وليس عن الحكومة ..

مستوى النظافة متردي للغاية ..

الجشع يملأ قلوب أغلب الناس .. التاجر والعامل والشرطي والموظف ..

الكل قلبه مملوء بالجشع ..

لا أحد يحترم القانون ..

(ولا يوجد من يقوم بتطبيق القانون على المخالفين)

الفهلوة هي أساس التعامل بين الناس ..

قيادة السيارة في القاهرة تتطلب مهارة خاصة لا تتطابق مع أي قواعد أو أصول في الدنيا ..

ضوضاء وأصوات الكلاكسات غير طبيعية .. والغالبية يستخدمون الكلاكس دون حاجة أو داعي ..

فالكلاكس في مصر هو أسلوب حياة لدى قائدي السيارات ..

الأسعار مرتفعة بشكل قياسي ..

يمكنك الحصول على أي شئ بنفس سعره في أي مكان في العالم .. أو ربما أكثر في حالات كثيرة ..

علبة المياه الغازية في السعودية قيمتها 1 ريال أي 1.53 جنيه .. بينما في مصر سعر علبة المياه الغازية 1.75 أو 2 جنيه ..

لا يوجد رابط للأسعار .. كل بائع يضع السعر إللي على مزاجه ..

على مستوى البيزنس والتجارة .. لا توجد آليات معروفة للسوق في مصر .. سوى ألية الفهلوة وإللي تغلبه إلعب به ..

أصبح الكذب لدى الكثير من الناس أسلوب حياة أيضاً ...

لا توجد أي قيمة للروح الوطنية أو الإنتماء للوطن ...

الناس في مصر لا تنام ..

الشوارع مليئة بالبشر طوال الوقت ..

لاحظت أن هناك أوقات غريبة للذروة في القاهرة .. زحام وإختناقات مرورية من الساعة السادسة وحتى الثامنة ..

ومن الساعة العاشرة مساء وحتى الثانية عشر منتصف الليل ...

مش عارف ليه ..