انطباعات مغتربين عن مصر بعد زياراتهم لها

[khedr]

استاذي العزيز...الافوكاتو

معلومه محتار اقولها والا اخليها من داخلي واسكت...................

طبعا هأقولها....انا سيادتك اصلا من مدينه متوسطه في مصر ...تقريبا كده في الصعيد طيب وبعدين ...

كان عملي يستلزم اني ازور قري وبيوت اخوانا في تلك القري والنجوع ...

وصعقت... وفوجئت.... وفوجعت... مما عرفت .... ان معظم بيوت هذه القري لا تعرفمايسمي بدوره المياه.. او المرحاض ... او بيت الراحه ... اوبيت الادب .. سميه كما تريد ولكنه غير موجود................................................!!!!!!!!!!!!!!!!!!!!!!!!

طيب كيف يقضون حاجتهم........ ويلبوا نداء الطبيعه

الرجال يعتمدوا علي مراحيض المسجد بالقريه ولا تسألني ماهي تلك المراحيض

السيدات تأخذ الاطفال الصغار من بعد الظلام ما يلف مخارج تلك القري والنجوع ويذهبوا الي خارجها الي الكوم.(مكان تلقي فيه بواقي الحقول والبيوت...)

لا تسألني عن الاستحمام ولا استعمال الماء في النظافه

وارجوك اوعي تقول لي طيب وفين يغسلوا اسنانهم وكيف يستخدموا الفرشه والمعجون

استاذي العزيز يؤلمكم جميعا ما ترونه مما يحدث في القاهره.... والمهندسين ....والدقي...والزمالك.... ولكن هناك ناس ابعد مما تتخيلون عن ابسط اساسيات الحياه

...

ملحوظه: تلك القري والنجوع التي اتكلم عنها في الصعيد مش الجواني كمان لا في المنتصف...اشكرك علي سعه صدرك

[last_Samurai]

بجد يا جماعه اى حد بيجى مصر بعد فتره يلاقى العمليه فى تدهور ومفيش اى خدمات انا نزلت مطار دوبى حست انى برنس علشان المعامله الطيبه والاسلوب المهذب

ونزلت مطار هونج كونج حسيت ان بجد ان فيه خدمه للمسافر ان كان عابر على المطار او مقيم فى البلد

فرق شنيع بين مطار القاهره ووقاحه التعامل فيه وبين اى مطار اى دوله اخرى

فى مره احتجت رقم تليفون ارضى علشان استقبل عليه مكالمه دولى وده كان فى مطار هونج كونج

وما ادراك ما هو مطار هونج كونج

مطار هونج كونج مصنف احسن مطار فى العالم من حيث الخدمات والتنظيم

فطلبت من موظف بالمطار لوسمحت انا عاوز رقم تليفون ارضى علشان استقبل عليه مكالمه

قالى حضرتك مسافر على اى شركه طيران

قلتله الخطوط الاماراتيه

قال حضرتك ممكن تتفضل وتروح للمكتب وهما حينفذولك طلبك

وبالفعل نفذوا طلبى

يعنى الواحد بيحس ان احسن حل نخلى شركات اجنبيه تنظم وتدرب العاملين فى القطاعات اللى فيها تعامل مباشر مع الناس ان كانوا مصريين او اجانب

وشكرا

[nancy]

انا بانزل مصر كل سنة وفى ملاحظات عامة زى ان عمال المطار وبعض الموظفين مصرين على كل سنة وانت طيب ولو نازل من غير مناسبة وبعدين لو عطيت فلوس عربية المطار بالغلط من عملة غير مصرية علشان اتلخمت تبان فى عنية نظرة ولاهى ماهى راجعة ولو غلط زى حالاتى واعترفت انك معاك كاميرا كانك معاك مخدرات يفتشوك بجد لان مستحيل حاتقول معاك حاجة الا لو مخبى حاجة اكبر لان مفترد ان الى داخل دة مهرب لدرجة وانا بادفع تامين الكاميرا علشان ادخل بيها الموظف بيسال ولادى بخبث هى ماما معاها اية تانى فمردوش علية اصلا لانهم حسوا انة اكيد متخلف

وكل واحد يقلب الكاميرا ويقولى هى دى كانة عاوز يقولى كنت خبتيها بلا وجع دماغ

دة اول ما تدخل

تاخد اللموزين لان اكتشفت ان السوبرجيت سىء جدا من ناحية كرسى يخنق وفيلم اجبارى وبنت تخينة فى الزحمة دى مصرة تبعلك اى حاجة وخلاص وتتحك فى كل الرجالة الى فى الاتوبيس كانها متقصدش

فى اللموزين يشتكيلك الهم ولو نسيت حاجة فى العربية وتتصل علية يقولك ولا شفتها خالص

انا باقول الى بشوفة من خلال 14 سنة سفر يعنى حوالى 28 مرة مريت بالموضوع دة

نيجى للاجرائات الحكومية تلاقى كل الموظفين مش عوزين يعملوا حاجة ميتحركوش الا للشدشد القوى

الناس تتعامل معاك كانك من كوكب تانى

بس ملاحظة شفتها الصيف الى فات بجد ان المشاكل الاسرية ونسبة الانفصال وعدم الرضا عن الطرف الاخر مرتفعة بشكل فوق الوصف

دى بعض ملاحظاتى.. وشكرا لو حد قدر يقراء كل الى كتابتة

[ATHENA]

لسه شايفة الموضوع ده و لقيت ان وقت رفعه حان

هنزل المحروسة كمان تلت اسابيع انشاءلله و بصراحة من قرائتي للي كتبتوه نفسي اتفتحت للنزول اكتر مما كانت مفتوحة :wub: :wub:

نورت مصر :lol:

تم تعديل 13 يونيو 2006 بواسطة ATHENA

[Tafshan]

لسه شايفة الموضوع ده و لقيت ان وقت رفعه حان

هنزل المحروسة كمان تلت اسابيع انشاءلله و بصراحة من قرائتي للي كتبتوه نفسي اتفتحت للنزول اكتر مما كانت مفتوحة ;) :D

نورت مصر ;)

انتِ ايه اللى جابك هنا :P

الموضوع ده احنا بنكتب فيه بعد ما نرجع ... و ده عشان نخزى العين طبعاً :unsure:

تروحى و تيجي بالسلامة ... روحى اقري شوية في موضوع الرمرمه و انتِ يتفتح نفسك :D

[ATHENA]

لسه شايفة الموضوع ده و لقيت ان وقت رفعه حان

هنزل المحروسة كمان تلت اسابيع انشاءلله و بصراحة من قرائتي للي كتبتوه نفسي اتفتحت للنزول اكتر مما كانت مفتوحة :D :D

نورت مصر :D

انتِ ايه اللى جابك هنا :P

الموضوع ده احنا بنكتب فيه بعد ما نرجع ... و ده عشان نخزى العين طبعاً :unsure:

تروحى و تيجي بالسلامة ... روحى اقري شوية في موضوع الرمرمه و انتِ يتفتح نفسك :)

طب متزقش كده ;)

انا فعلا نازلة يمين شمال على مواضيع الرمرمة لحد ما بقى كل ما حد يقولي مصر اقوله مطاعم ... عايزة اكل عايزة ارمرم...... ;)

تحب نجيبولك حاجه من مصر على حساب اخونا الكبير ياسر ابوقلب ابيض ... هو حالف ايتوها حاجه حد من الرابطة عايزها هنا هو رقبته سدادة فلين:o

[Tafshan]

لسه شايفة الموضوع ده و لقيت ان وقت رفعه حان

طب متزقش كده :rolleyes:

انا فعلا نازلة يمين شمال على مواضيع الرمرمة لحد ما بقى كل ما حد يقولي مصر اقوله مطاعم ... عايزة اكل عايزة ارمرم...... :wub:

تحب نجيبولك حاجه من مصر على حساب اخونا الكبير ياسر ابوقلب ابيض ... هو حالف ايتوها حاجه حد من الرابطة عايزها هنا هو رقبته سدادة فلين:wub:

الله يخايكِ يا فندم تروحى و تيجي بالسلامه :wub:

[أسد]

لسه راجع من مصر ..

وحاكتب كثير خلال اليومين القادمين في الموضوع ده ..

السنة دي انا مش مبسوط !!!!!

[se_ Elsyed]

لسه راجع من مصر ..

وحاكتب كثير خلال اليومين القادمين في الموضوع ده ..

السنة دي انا مش مبسوط !!!!!

أنا بقى على العكس والحمد لله :lol: عملت دماغ عاليه قوي

وأفضى بس وبعدين أحكي

[أسد]

البداية كانت في مطار الرياض مع مصر للطيران ..

كل شئ رائع وتمام التمام ..

الائرة أقلعت في موعدها ..

الطائرة حالتها جيدة ..

طاقم الضيافة .. جيد جداً ..

مطار القاهرة ..

صالة الوصول ..

الأمور عادية .. جداً ..

النهاية ..

مطار القاهرة ..

صالة السفر (1) .. مصر للطيران ..

المطار جميل ورائع .. نظيف ومرتب ..

الطائرة في موعدها ..

كل شئ تمام ..

حمامات المطار نظيفة وجديدة ..

ولكن هناك من يقف ليناولك المناديل .. الموجودة أصلاً في مكان خاص بها .. ولكن في الحمام شخص المفروض أنه موجود ليحافظ على نظافة الحمام .. ولكنها عادة مصرية أصيلة ..

فور أن يجدك تمد يدك لتحصل على مناديل لتنشف يدك تجده ينقض عليه ليسبقك ويناولك المناديل ليحصل على البقشيش ..

توجد لوحات في أماكن متفرقة في المطار تنصح بعدم دفع بقشيش أو إكراميات ... بثلاث لغات .. العربية والإنجليزية والفرنسية ...

هناك تطور ملحوظ في هذا النطاق ...

شوارع القاهرة ...

أقل نظافة وأكثر فوضى من أي وقت مضى ..

شركات النظافة والحكومة .. أهملوا موضوع النظافة وتفرغوا للنزاع فيما بينهم كل منهم يريد أن يحصل على حقه من الآخر ..

وفي النهاية ..

تتوقف شركات النظافة عن أداء عملها .. وتتوقف الحكومة عن سداد مستحقاتها ..

القاهرة في منتهى القذارة .. (للأسف الشديد) وقد إختفت صناديق القمامة البلاستيكية من الشوارع أو أغلبها وحل مكانها أكوام من القمامة .. وتمر عربات الزبالة ليقوم العمال بنقل الزبالة من على الأرض بدلاً من قيامهم بتفريغ الصناديق غير الموجودة أصلاً ...

فوضى المرور في القاهرة ..

فوضى عارمة في كل مكان .. كالعادة .. لا شئ جديد ..

باستثناء المناطق التالية ..

منطقة العروبة .. وصلاح سالم ..

شارع لبنان بالمنهندسين حيث يقع سكن حبيب العادلي ..

شارع قصر العيني .. وشوارع وسط المدينة ..

باقي القاهرة والجيزة .. فوضى عارمة ..

محافظ القاهرة .. ومحافظة القاهرة ..

القاهرة في ظل محافظها عبد العظيم وزير تعمل بالدفع الذاتي ..

فلا تطوير .. ولا تحديث .. وهي مدينة للأسف تتهالك يوماً بعد يوم ..

عبد العظيم وزير محافظ غير مناسب للقاهرة الضخمة ..

عبد الرحيم شحاته كان أفضل منه بمراحل ...

الفوضى عارمة ...

عارمة ..

لا يوجد قانون يطبق في أي مكان ...

الأخلاق في إنحدار .. وسلوكيات المصريين أسوأ يومأً بعد يوم ..

الإهمال والإستهتار أصبح عادة أصيلة عند كل الناس ..

الإستغلال هي السمة الغالبة ...

الأسعار غير معقولة .. لا أصدق كيف يعيش المصريون في ظل هذا الغلاء الفاحش ..

الأسعار في مصر أغلى من السعودية في كل شئ .. حتى مع تحويل العملة .. وحساب أن الريال بجنيه ونصف ..

فمثلاً .. علبة البيبسي في السعودية ريال في مصر جنيهان

كيلو اللحم يبدأ من 20 ريال في السعودية وفي مصر يبدأ من 33 جنيه .. يزيد السعر إذا شاورت للجزار على حتة معينة

الخبز .. الأربعة بريال .. في مصر الإثنين بجنيه .. يعني الأربعة باثنين جنيه (مع ملاحظة أنني أقارن الخبز الشامي)

قس على ذلك أي سلعة ..

شئ غير معقول وغير مبرر ..

مش قادر أفهم إيه إللي ممكن يحصل علشان الحال ينصلح ..

المشكلة ليست في الحكومة وحدها ..

فالحكومة والنظام الحاكم في مصر في منتهى السوء ..

ولكن الشعب المصري أصبح سيئاً أيضاً ..

والناس تغيرت للأسوأ ..

والشباب لم يعد صالحاً في أغلبه ..

رأيت في أحد المناطق .. أمام أحد المساجد الشهيرة في القاهرة .. سوق .. يباع فيه الكتب الدينية والشرائط الإسلامية .. والإسدال والطرح وخلافه .. رأيت هذا العام سلعة جديدة ..

حليب النوق ...

أي حليب الجمال ..

الذي يشفي إلتهابات الكبد الوبائي أ ، ب ، ج

مين إللي قال الكلام ده ...

ومين بيراقب صلاحية تلك المنتجات ...

وبأي حق يدعي هؤلاء مثل تلك الإدعاءات ...

رأيت إعلانات في التليفزيون .. عن العسل ..

عسل السدر ..

الذي يشفي كل الأمراض ..

وعسل البردقوش ..

وخرافات كثيرة ..

إعلاناتها في التليفزيون ...

ما كل هذه الفوضى ...

ما كل هذا الإجرام ...

وللحديث بقية ..

[القرموطى]

السلام عليكم ورحمه الله وبركاته

اتفقنا كلنا على شىءواحد بعد ما نزلنا مصر انها فعلا فى النازل وفى الحضيض كلنا وبلا استثناء اتصدمنا الصدمه الاولى اول ما نزلنا الى المطار ........الغباوه بتاعت الموظفين والابتزاز العنيف والسرقه عينى عينك من سواقين التاكسى فى المطار وطبعا حكاوى وشكاوى الناس فى مصر من الفقر والغلاء المجنون لما البيه توصل ل 75 قرش يعنى الدنيا كده خلاص لو الواحد لربنا يكرمه ويعرف يبيض 20 بيضه فى اليوم مكنش اتغرب فى بلاد الناس كده

..........................اوك الحاله زفت طيب والحل ...هنكمل باقى العمر فى الغربه حسين اننا بشر من الدرجه الثانيه

هنكمل حياتنا فى احساس غريب من عدم الامان وكل يوم تصخى الصبح وتقول يارب مكنش اتفنشت الناهرده

طيب لا بلدنا تنفع نعيش فيها ولا الغربه برده تنفع نكمل فيها باقى حياتنا

طيب ايه الحل الناس كلها قذفت بمدفعيات ثقيله قنابل من الهموم والمشاكل ونقاط الضعف جميل جدا طيب مفيش حد يدينا بريق امل

عشان بصراحه بعد الى الواحد بيشوفه وبيسمعه عن حال مصر بيقول لو الظروف حكمت انه يرجع مصر يبقى الموت احسن ...... هل اصبحنا شعب بلا بلد ........ ام هل اصبحنا شعب بلا امل ....

[se_ Elsyed]

رأيت في أحد المناطق .. أمام أحد المساجد الشهيرة في القاهرة .. سوق .. يباع فيه الكتب الدينية والشرائط الإسلامية .. والإسدال والطرح وخلافه .. رأيت هذا العام سلعة جديدة ..

حليب النوق ...

أي حليب الجمال ..

الذي يشفي إلتهابات الكبد الوبائي أ ، ب ، ج

إوعى تكون ساكن في الزيتون ؟ أصل المسجد اللي قلت عليه ده هو " مسجد العزيز بالله " في الزيتون .. وكنت معدي المرة من أمامه ولاحظت الموضوع ده فعلاً . خلي بالك يا اسد ما هي المجتمعات العربية مش مثالية برضوا .. وأديك عايش هنا في السعودية وبالتأكيد رأيت ناس فارشه على الرصيف في الشارع بأعشاب وكلام فاضي ومعلقين يُفط بالأمراض اللي بتشفيها هذه الأعشاب ومنها العُقم والكبد الوبائي إلخ ... وهانروح بعيد ليه .. إفتح جريدة الوسيلة " الوسيط " في أي عدد وشوف كمية إعلانات الدجالين بتوع العسل والأعشاب وما إلى ذلك ...

مشكلتنا كمغتربين بكل صراحة تكمُن في " عقد المقارنات " بشكل دائم طوال الـ 24 ساعة بين الدول التي نعمل بها وبين الوضع في مصر

أتفق معكم إن الصح صح والغلط غلط في أي حته .. لكن هناك أشياء ممكن ننتقدها في بلدنا في حين الـ 70 مليون اللي عايشين هناك شايفينها عادية جداً ولا غُبار عليها ...

أنا عن نفسي بأحب مصر جداً جداً على قدر ما بأكره مبارك وأيامه السودا واللي متأكد مليون الميه إنه هو راحل وسيُمحى إسمه من التاريخ لكن مصر ستظل باقيه لنا ... ولما أجي أتكلم عن مشاكل مصر لا يجب أن أستثني نفسي وأحاول أصلح نفسي الأول وأُصلح من حولي وبعد كده هالاقي مصر إتصلحت من نفسها

ودايماً أقول لنفسي يا واد يا سين سين "لا تنهى عن خلق وتأتي بمثله عارٌ عليك إذا فعلت عظيم "

نزلت الأجازة دي لقيت الناس بيمشوا بالعربيات عكس الإتجاه .. تخيل حتى في طريق المحور والطريق الدائري .. وده عشان مكسل يعمل يو تيرن من المكان المخصص .. بل يصل الإجرام ببعضهم إنهم بيطلعوا الكوبري بالعكس في عز النهار ( ملحوظة بالليل يعربد كل واحد ويعمل اللي هو عايزه ) .. أقسم بالله كنت هاموت أنا وأولادي في مره وده لإني كنت نازل كوبري ولا بي ولا عليه ومش مدي خوانه وفجأة أجد سرب عربيات وميكروباصات أمامي جاي عكسي يبقى ما فيش حل ساعتها غير إنك ترمي نفسك من فوق الكوبري .. مع أخر الأجازة بقيت أعمل زيهم بس كنت لسه مبتدأ.. يعني لو حته كده 20 متر ولا حاجة مممكن أخدها عكسي وأقوم غامز العسكري بجنيه عشان يعديها .. والحمد لله إن أجازتي خلصت بسرعة وإل اكنت لقيت نفسي رايح إسكندرية عكس الإتجاه ومحضر كبشت جنيهات في جيبي لزوم الطريق :wub: ... بس الحاجة اللي ما قدرتش أعملها بصراحة هي إني أرمي زبالة ولو حتى منديل كلينكس في الشارع ....

[أسد]

أصل المسجد اللي قلت عليه ده هو " مسجد العزيز بالله " في الزيتون

نعم .. هو المكان المقصود ..

أنا عن نفسي بأحب مصر جداً جداً

وأنا كمان والله .. ويمكن أكتر منك ...

لكني مستاء بشده لما يحدث للناس .. ومن الناس .. أقصد الأشخاص العاديين .. وليس مبارك وعصابته ..

المؤسف جداً أنني وأنا في مصر أشعر وكأنني أتعرض لعمليات من الإبتزاز المستمر .. وهذا يؤذيني بشده ..

حتى لو تكلمنا عن الفوضى وعدم النظام .. وقلة النظافة .. وكل تلك الأمور هي من سلوكيات الأفراد .. فهي من سئ لأسوأ ..

للأسف الشديد ..

عارف ياسي السيد ..

إحنا هنا بنقول كلام جميل .. وبننصح بعض بنصائح هائلة .. وندعوا لمكارم الأخلاق .. والنظام . . والنظافة .. والأخلاق الكويسة .. والذوق في التعامل .. والأمانة ...

وأنا في مصر كنت بادور علينا في الشوارع .. وفي كل مكان أروحه ..

ملقيتش ولا واحد فينا ....

لقيت الكل .. من نفس النوعية إللي بتزعلنا ..

مش دي حاجة غريبة ..

ولا أنا إللي غريب ؟؟؟؟؟؟

[م الغزالى]

إحنا هنا بنقول كلام جميل .. وبننصح بعض بنصائح هائلة .. وندعوا لمكارم الأخلاق .. والنظام . . والنظافة .. والأخلاق الكويسة .. والذوق في التعامل .. والأمانة ...

وأنا في مصر كنت بادور علينا في الشوارع .. وفي كل مكان أروحه ..

ملقيتش ولا واحد فينا ....

لقيت الكل .. من نفس النوعية إللي بتزعلنا ..

مش دي حاجة غريبة ..

ولا أنا إللي غريب ؟؟؟؟؟؟

- ما هى دى السياسة التى يتبعها هذا النظام الفاشل فى مصر سياسة طاردة لزيدة المجتمع وهناك من يأثر السلامة فى الداخل ويتقوقع على نفسه

- أصبح الوجود خارج البلد شئ كده فى نفوس الناس واحلامهم كالقاعدة والبقاء فيها هو الإستثناء تماما مثلما تجد الأن إنسان أمين وجد شئ غالى وثمين ورده لصاحبه او إنسان شريف قام بعمله على الوجه الأكمل هذه النماذج الأن هى الإستثناء

- عمركم شفتم نظام أفسد شعبا ؟

أخى العزيز أسد أحيك على إنطباعاتك ومشلهداتك التى نقلتها لنا وتقبل تحياتى

-

[مصري جدا]

السلام عليكم

حبدء وأقول أه.....

اه م الغربه أه ياني ...دي سجن وفلوسها سجاني....ولما تعبت م الغربة رجعت لبلدي......لقيتني غريب من تاني....وعجبي :)

وتاني حأسأل و حأقول

ليه يا مصر تقسي علي ولادك....وتخلي شبابك يخرجوا من بابك......وبعيد عنك هناك في الغربه.....يعيشوا في عز...وذل بعادك.....وعجبي :lol:

وفي الآخر

حبيبتي ياست الكل يامصر.....محتار بسؤال في كل عصر ....ليه اللي يحبك يسكن كوخ... واللي يخونك تديله قصر ,,,وعجبي :)

طبعا بعد نزولي الآجازة ب عشرة أيام كنت عاوز أروح {بفتح كل الحروف} كان

احساسي اننا المصريين واقفين في طابور وكل واحد أيده في جيب اللي قدامه ....وانا أول واحد....كمان الناس مش طايقة بعضها .....مش عارف حسيت أني مش عاوز أخرج من البيت... ولولا أالأهل ماكنتش خرجت....كنت أعاني من مجرد محاولاتي لأيقاف تاكسي وكنت عاهدت نفسي اني لن أتخانق مع اي سواق تاكسي وعلشان كده كنت بأقف مددة طويلة لما واحد يحن علي ويرضي يوصلني رغم اني أسكن في منطقة راقية وعلي وش الدنيا.....[ المهم خلصت الأجازة وسافرت وانا خايف.. خايف من حبيبتي وخايف عليها....مش عارف رايحين علي فين لأني شفت المشكلة في معاملات الناس مع بعض والسؤال هل الحالة اللي وصلت لها البلد في كل المجالات واللي طبعا الحكومة مسئوله عنها هي السبب ؟ولو حصل تغيير الناس حتتصلح ؟ أشك ....... انتم ايه رأيكم....وشكراcolor=#33CCFF]

[نبض الابداع]

بعيداً عن المطار القاهرة في منتهى القذارة .. (للأسف الشديد) انا بانزل مصر كل سنة صيف وشتاء

دة غير لاشياء اللى اتفضلتوا حدراتكوا وقلتوها ؟؟ !!

[sayed_ossman]

هل يمكن ان نقول ان العشوائية والاهمال والفساد وقذارة الطرق متعمد من النظام المصرى

من اجل ان يشعر المواطن المصرى ان مصر انهارت بالفعل فى كل شىء

ثم بعد ذلك نرى علاء الدين اقصد جمال مبارك يطلع لنا من الفانوس السحرى ويقلونا هييييييييييييييييييه يا ولاد

انا هحللكم كل مشاكلم علشان تعرفو ان انا الرئيس الممنتظر اللى هيريحكم وهيبسطكم وهيحول مصر اللى بقت صففففففففففففففففففففففر كبير

على ايد الغير ماسوف عليه ابى " سوسو هانم "

[nancy]

انا لسة راجعة من مصر امبارح بالليل .. كانت رحلة ممله

المهم انطبعاتى عن مصر

ان الناس فاهمة كل حاجة بس مش عرفة تعمل حاجة لان عندها حاجات عملة زى الحديد فى رجليهم

1- التعليم .. كم المواد كبير والواجبات وفى الاخر النجاح صعب ولو نجحوا مفيش مكان فى الكلية ولو دخلوا مفيش مكان يشتغلو ولو اشتغلوا العائد ميستحقش تعب كل السنين دى

2-الجواز .. مكلف جدا الشقق المتر من الف لحد 3 الاف وكمان التصميم فاشل وانت بتشترى يا موقع يا فيو والى جوة سىء جدا والغريبة تقريبا معظم الشقق محجوزة وصالات الافراح مفيهاش يوم فاضى

3-الغلاء فى مصر رهيب حتى لو بتجيب حاجات هايفه .. طيب احنا بنصبف مش مشكلة الناس عايشة ازاى بمرتباتها دى

4-احساس عام بالاحباط والتعايش مع الاحباط

اكتر حاجة لفتت نظر ولادى ان فية حمير وقطط كتير فى الشارع والزحمة لدرجة انهم رفضوا الخروج الا للنادى او السنيما او زيارة انما مشى فى الشارع لا

وان في كل مكان راحوة فية اطفال بتشتغل وسؤال اتكرر 100 مرة لية الاطفال دى بتشتغل ولية اهليهم سيبنهم يتبهدلوا كدة

وكل الناس بتبص على بعض فى الشوارع بس من غير اى تعبير على الوش يعنى شيفينك ومش شيفينك

حتة الاستغلال محستهاش اوى لان انا من الاول نازلة وعاملةحسابى انى حدى اى حاجة تنطلب منى لان دة فى الاخر استغلال مقدور علية ولة اسباب

[أسد]

كنت في أحد المطاعم ..

دخلت الحمام ..

وجدت طفل عمره في حدود 10 سنوات .. يعمل في الحمام ...

يعمل بكل جد ونشاط .. الحمام زي الفل . فيه صابون .. ومناديل .. وكولونيا ...

شعرت بقسوة الأمر عليه .. سألته .. إنت بتروح مدرسة ..

قاللي .. باروح .. بس باشتغل في الصيف ..

سألته .. بتاخد كام ؟؟

قاللي .. ماباخدش .. ده حتى أنا إللي باشتري الحاجات دي على حسابي .. (الصابون والمناديل والكولونيا .. الخ) ..

وقلت له إزاي ..

قاللي الإتفاق كده .. وأنا وشطارتي مع الزباين .. وكل واحد واللي يجود بيه ..

أضاف .. أنا كل يوم آجي قبل ما يبدأ الشغل هنا بساعة لحسن أي حد ييجي يشتغل مكاني ..

!!!!!!!!!!!!!!!!!!!!!!!!!!!!!