يوميات " كلية بهية الخاصة"

[Scorpion]

يا جماعة والله أخجلتم تواضعنا... ما كنتش متوقع رد فعلكم ده... ربنا يجبر بخاطركم جميعآ.. و علي العموم آسف للتأخير.. بس مجبر أخوكم لا بطل.. العبد لله متجوز و يعول و الفاميليا ليها برضه عليّ حق.. و لو ما عملتش كده الجماعة حيمنعوني اني أهوِِب ناحية الكمبيوتر من أساسه..

بس كفاية... نرجع ليومياتنا....

[Scorpion]

يوم جديد.... و في الكافيتريا بعض الطلبة يتناقشون موضوع المؤامرة، و من الراديو يتصاعد صوت المغني الصاعد الروش شعبان عبد الرحيم في أغنية جديدة من تأليف سي السيد و تلحين سمير رجب :

أنا بحب جيمي و جيمي يحبني.. أركب المرجيحة و هو يزقني.. ترالالام

و لما آجي أبعد و أطير من حبه ليّ يشدني..

أقع علي بوزي ما لاقيش اللي يلمني...

و آكل العدس طول العمر علشانه ما يضرني...

و تعب السنين في خدمة أهله ما يهدني...

أنا بحب جيمي و جيمي بيحبني... ترالالام ترالالام ترالالام...

في أيده أنا حتة عجينة يمطني و يفشني...

ده أنا كلامته المتقاطعة رأسي و أفقي بذكاوته يحلني...

أنا لقمته ياكلني و يهضمني و في الحمام يهُرِني...

ما هو الحق عليّ اللي سبت الكلب يشمني...

أنا بحب جيمي و جيمي بيحبني... ترالالام ترالالام ترالالام...

Freefreer : وطي الهباب ده يا عم محمود و حياة ابوك.. و الا أقولك أطفيه خالص.ده أيه الهم ده ورانا ورانا في كل حتة.

ست أمينة: هو الجو ملبد كده ليه يا جماعة من كام يوم .. هو فيه أيه ؟

Freefreer : أفهمكم انا فيه أيه... الموضوع بالمفتشر كده اننا زي ما أنتم عارفين كلية خاصة... يعني مالناش أعتمادات و لا تمويل ولا ديواله.. و كل دخلنا بييجي من المصاريف اللي الأستاذ طفشان أتنبح صوته علشانها و معظمكم مطنشين... ديون الكلية زادت و في الخباثة و حتة حتة.. الجامعة الأمريكية أشترت كل الديون دي.. و بقينا قانونيآ تبعها .. يعني زي ما قال Faro في يوم من الأيام بقينا الكلية ال17... و حاليآ حيبعتولنا مندوبين يتابعونا و لازم نبتدي نقرا ال New York Times و USA Today .....ايه رأيكم بقييييييييييييي ؟

حالة من الوجوم التام حطت علي جميع الموجودين أعقبتها نوبة غضب كاملة تمثلت في تعقيب الطلبة...

أسد : الكلام ده لا يمكن حيحصل.. علي جثتي.. أحنا أتولدنا كلية مستقلة و حنفضل كده دايمآ.. خليهم بس يهوبوا ناحية الكلية .. و ديني ليخدوا علقة عمرهم ما كانوا يحلموا بيها...

الكباريتي : أسلوب المقاومة لازم يكون مختلف. أحنا الأول لازم ندرس تحركاتهم..

محمد أبو زيد: هو أحنا لسه هاندرس.. يا جماعة جه الوقت اللي ممكن نطبق فيه عمليآ اللي عمال أعلمهولكم نظري كل الفترة اللي فاتت ديه.. أحنا نلبدلهم في الدرة.. و أول ما يقربوا هوبااااا ننط عليهم و هات يا Shuto Uchi علي كام Oi Zuki علي حبة Haito Uchi تلاقيهم حطوا ديلهم في سنانهم و يا فكيك...

الأفوكاتو : درة أيه دي بس اللي حنلبدلهم فيها يا أبو زيد... يا جماعة أهدوا شوية... نشغل الطاسة ... الله يجازيكم رجعتوني لأيام زمان لأيام ثورة عرابي....( لحظة سكون و تأمل ) ... الموضوع لازم ندرسه من الجانب القانوني و ندور علي الثغرات اللي ممكن نطعن فيها قرار الضم ده.. بس نهدي شوية و مادام لغاية دلوقتي ما حصلش أي تغيير جذري... هنلاقي حل أنا متأكد.. العملية مخرمة من كل ناحية.. مش ناقص بعد العمر ده كله ان واحد غريب ييجي و ......

في نفس اللحظة علي باب الكلية ترتفع أصوات الحارس و فلاح بسيط في حالة واضحة من الغضب..

Spider : سيبه يا مصطفي... فيه ايه بس يا عمدة ؟

الفلاح : انا مانيش عمدة و لا هباب..انا حتة فلاح غلبان علي باب الله

Spider : حصللنا الشرف يا حاج ... ايه بس المشكلة ؟

الفلاح : اني جاصد لفندي االي اسمه حشيش... لبسني في زكية و خلع..

Spider : معلهش يا حاج.. واحدة واحدة علينا... زكية مين ؟

الفلاح . أستني... و غاب للحظات خارج الكلية ثم عاد ساحبآ جاموسة تلوك حزمة من البرسيم... اهي دي زكية يا سيدنا.. و لا حتعملوا نفسيكم مش فاهمين..ده اني أسورلكم جتيل النهارده... جال يشاركني جال.. خلاني أدفع تمنها كلاته و بجالي 4 تشهر عمال أكع في مصاريفها و لا شفت مليم أحمر..

الأفوكاتو : يا سيدي الفاضل.. أرجو أن ألفت عنايتكم بأن السيد حشيش في وقتنا الحاضر يوجد خارج البلاد في مهمة لبنانية..فللأسف ليس بيدينا حيلة و لا محيص الا من أنتظاره لحين آوبته حتي نجد معآ حلآ لهذه المعضلة.

الفلاح : محيص ؟... و النبي كلمني عربي يا سيدنا لافندي.. انا اللاوندي ما فهموش... بجولكم ايه.. انا ما تاكلش اونطة.. عليّ الطلاج بالتلاته ماني متعتع من هني لحد ما ييجي لا تلاجولي حل.. اِيوه ما هو جاللي انكم ضامنينه في العملية دي...

Spider: يا دي النيلة.. و احنا ناقصين.. طب معلهش يا عمدة.. من فضلك أركن زكية في الParking .. و أتفضل خدلك فنجان شاي في الكافيتريا علي حسابي.. مش معقول المنظر اللي احنا عاملينه ده في حرم الكلية...

الفلاح : باركين.. باركين ايه و كافيريا ايه و حرم مين... ما تكلمونا عربي ياخواننا.

ٍSpider : يا عمدة Parking ... اللي هي زريبة العربيات اللي هناك علي شمالك ( في سره : الله يخرب بيتك يا حشيش فلسعت و لبستنا في زكية..معلهش مسيرك حترجع )..

الفلاح : ماشي يا سيادنا... بس و دين المصطفي ماني ماشي من هنا لحد ما تلاجولي صِرفه... فاهمين ؟

توجه الجميع في سكون الي الكافيتريا... و أخذوا يفكرون في مخرج لكل هذه المشاكل.. و فجأة قفز White Heart علي منضدة صائحآ بأعلي صوته : و جدتهههههههها .....

يتبع

[se_ Elsyed]

يا سلام سي سكوب ، يعني عمال توزع الأدور وعلى حظ اهلي تطلعني فى دور واحد ميت ... وبعدين مالقتش واحد ريحته حلوه تخليه يلحن الأغاني بتاعتي غير سمير عجب .. ماعندك المحنين سدين عين الشمس .....

عالعموم إستمر على بركة الله بس وحياة أبوك طلعني المرة الجاية كومبارس متكلم من اللى بياخدوا 5 جنية الحالة ضنك خالص يا سكوب ............. أنا موهبة مدفوسة يا ناس ونفسي حد يستكشفني .

[amir]

طبعا زكيه اللى فى الباركين محتاجه حراسه !!

اوعى تحطنى أنا حراسه عليها ، أنا حرست القفص بتاع الحريم فى ميدان التحرير لما الشمس قورت نافوخى

[optimistic]

جامدة جدا يا سكوب

الحقيقة انا لسة قاريها حالا

مستنيين البقية

[Scorpion]

White Heart : و جدتهههههههههههههههههههههههههااااااااااا

الطفشان : و عهد الله لو قلت تحديد النسل ..هنط في كرشك

White heart : لأ لأ يا جماعة ... المشكلة مش مشكلة فلوس ؟.. خلاص.. أتحلت.. أحنا نعتمد علي نفسنا و نعمل أكتفاء ذاتي علي كام مشروع صغير... نلم قرشين و ندفع ديوننا للجامعة الأمريكية و بكده ما يبقلهمش عندنا حاجة... و بالشلوت بره..

....... : و راس المال يا ناصح هنجيبه منين ؟

White Heart : القرشين الي مخبينهم كلنا تحت البلاط جم وقتهم دلوقتي..نبتدي بزكية .. دي حتكون اول مشروع عملي لينا .. و نضرب عصفورين بحجر.. نرضي العمدة.. و نبتدي مشروع البان صغير.. و بعدين نفتح مركز لأعادة تصنيع المخلفات... يعني ناخد البتاع ده االي عمال يقع من زكية و نعمله سماد.. و كل واحد فينا يفكرله في مشروع صغير كده بس المكسب يبقي كله لصالح الكلية من غير حمرقة.. وأنا اول واحد أهه حاحط أيدي في جيبي آدي حق زكية عالترابيزة.. كنت ناوي أشتري العربية النص عمر النهاردة.. لكن زي بعضه خلينا زي ماحنا.. نوفر بنزين..

و ما كاد وايت يضع المبلغ فوق المنضدة، ألا و أختطفه الفلاح و أنطلق في الجري بأقصي سرعته حتي أختفي تمامآ عن الأنظار

....... : مع أني يا أخي باكرهك كده لله في لله.. أنما المرة دي أنا موافقك.. عفارم عليكيا وايت..حركة جدعنة منك..

كوكوواوا : وايت.. يخرب عقلك.. خليتني أفكر في فكرة جهنمية... أيه رأيكم الجنينة الهلمة دي بتاعت الكلية.. هي ديتها شوية تقاوي و أحنا نزرعها منجة و عنب و المجنونة و مكرونة و المكسب مش حيقل عن 650 %... و السماد اهو عندنا.. بس المشكلة في منافذ البيع.. يعني مثلآ مافتكرش ان وايت ممكن يلف طول النهار عالبيوت بعجلة و قسط لبن.. و لا أنا ممكن أسرح بعربية كارو... البرستيج الجامعي برضه..

سي السيد : سمع ههُهههس .. المعلم سيد شغل الطاسة و و الأمبيرات عالفولتات عملوا ترابانتينا مع بعض.. و أسمعوا الحل اللي مافيش منه... أحنا نأجر سور الكلية بوتيكات.. نعمل يافطة صغيرة أعلان و بالمقدم اللي حيخر زي الحنفية.. نبني محلات.. و نحجزلنا كام بوتيك نعملهم منافذ بيع..ايه الحلاوة دي يا سي السيد ياللي مافيش زيك... و أنا بخبرتي الكبيرة ممكن أعمل كوافير عجب.. و الصالون يبقي مليان مرايات.. حاكم أنا من غير مراية ما أقدرش أبتدي يومي.. يعني لزوم التسخين الذاتي... صقفولي بقي....

Optimistic: مِية مِية يا ابو السيد.. أنا بقي حافتحها كهربائي.. و نأجر لُمض و زينات في الأفراح و الموالد.. مشروع يكسب دهب.. مش نزرع مكرونة يا أسباجيتي أفندي.. يا واد يا أوبتي يابو الأفكار..

أبو حلاوة : بما أننا مجموعة المعاشات هوايتنا كلنا صيد السمك.. فأنا من رأيي نفتح شادر سمك آخر موديل...

Farasha79 : أبقي أفتحه من فدلك بعيد عني خالص.. أُووووف.. يعني ما بين ريحةالسمك الفزيعة.. و دخان البايب بيتاع حدرتك. مش حاقدر ابدآ أأجر البوتيك بيتاعي مفروش.

Mgramoun : أنتي خلاص ياختي عملتيه بوتيك و أجرتيه كمان.. أنا يا خواننا محلي حأعمله مكتب صرافة و ابيع العشرين قرش السعودي و الرورارات الخضرة الأمريكاني بالكيلو... حنكسب دهب..

بنت شعنونة : كلكم عملتوا مشاريع خلاص و كسبنا و العملية مزهزهة.. من غير راس مال يا فالحين مش هانقدر نعمل اي خطوة.. دول حتي القرشين اللي شفناهم بتوع وايت أتحولوا لجاموسة... عارفين ( فترة صمت و تفكير ثم بكل هدوء و كبرياء خلعت الحلق و الكولييه و خاتمين من أصابعها و ووضعتهم علي المنضدة ) و بكل عنطزة قالت : دول أنا كنت أشتريتهم من الشيراتون ب 25 ألف جنيه حتي ساعتها كنت لابسة شيك خالص خالص .. بس مش خسارة في الكلية.. نعمل بيهم مشروع ميكروباص ، بس يسوقه مودي اٍكمنه لَبط و نشغله حدايق القبة / كوبري عبود .

الطفشان : شانا..دي لفتة كبيرة أوي منك... بس معلهش.. عشان خاطري ما نبتديش نهجص.. ما أحنا كلنا عارفين جم منين و تمنهم كام.. و ربنا يخليلنا والدك... بس جدعة يا بت.. طول عمرك أصيلة.. و آدي تاني مشروع فعلي... عقبال الباقي... بس أرجع و أقول لو كنتم بتدفعوا المصاريف مش كنا زماننا دلوقتي في حال تاني جتكم الهم..

الجميع في نفس واحد : يييييييييييييييييييييييييييييييه

و أخيرآ رجعت الأبتسامات و الضحكات و التفاؤل تجوب أنحاء الكلية.. و أبتدأ الجميع يفكرون في أصلح الطرق لتري هذه المشاريع النور.. و بينما هم يتحادثون.. نادي مصطفي الحارس علي منمان :

يا سي منمان فيه ناس بتدور عليك....

يتبع

[الطفشان]

السرد بيفكرني بقصة الاوتوبيس

حلوة الزيادة السكانية، و جدعنة شعنونة، و رد فعل فراشة

دماغك متكلفة فعلا يا سكورب

ممكن تفشي السر و تقول لنا ايه الصنف اللي بتدخنه

(وش بيغمز، و ماسك سماعة التليفون مع مباحث المخدرات يبلغ عنك)

[Scorpion]

mnman: خير يا عم مصطفي .. مين ؟

مصطفي : تعالي شوف بنفسك يا خويا.. ياما جاب الغراب لأمه

و ما كاد ينتهي من هذه الجملة حتي هوت يد بكل ثقلها علي قفاه... و ظهر من وراءه ضابط و 2 مخبرين ..

الضابط : أنت باتمان بن شومان ؟

mnman : لأ يا سيدي.. أنا منمان بن هفتان

الضابط : منمان و الا باتمان كله واحد... قدامي عالقسم...

mnman : يا نهار أسود.. عالقسم ليه يا عمي ؟

الضابط : عمك ده ايه يالآه .. أنت هتاخد عليّ و الا أيه.. عليك حكم في قضية نصب ... بتبعلي الباتموبيل ل 4 انفار في نفس الوقت ... البطريق و روبين و باتوومان و كمان الجوكر...آديك أتقفشت يا فالح...ياالا يا خويا ما تضيعش وقتي.

Tiger: يا حضرة النقيب ده أكيد تشابه أسماء... منمان أخونا و زميلنا في الكلية و بيتابع أنتساب من بلد الخابور في السعودية.. أنما باتمان ده أمريكاني عايش في جوتنهام سيتي.. معلهش.. العملية أحتمال تكون لخبطت معاكم علشان موضوع الجامعة الأمريكية.

الضابط : أمريكية أيه ياد أنت و هو .. أنتم بتتكلموا في السياسة بقي و الا ايه.. الله... ده أنتم باين عليكم تنظيم أرهابي شيوعي أمبريالي عايز يقلب نظام الحكم... طب قدامي كلكم يالا أنت و هو عالقسم..نهاركم أسود... و الخابور هتتعرفوا عليه شخصيآ.

أبن مصر : يا حضرة العميد نحكمها بالعقل... سياسة ايه و تنظيم أرهابي أيه ده الل عايز تلبسهولنا... ده أحنا بنتكلم عن باتمان... طب بالعقل كده اللي عرفوا ربنا بيه...ألأستاذ منمان أهو قدامك أهه.. راجل بيدرس و هادي و عاقل و كافي خيره شره...انما التاني ده اسمه باااااتممممان... واحد أمريكاني و لو خشيت أي سيما درجة تالتة في المنيرة هيقولولك أنه شكله وحش.. حتي مخبيه بقناع أسود... ده حتي غبي يا باشا... عمر سعادتك شفت واحد بيلبس الSlip فوق البنطلون ؟

أبو حلاوة : يا حضرة اللوا.. انا أوافق علي كل اللي قاله الأخ العزيز أبن مصر.. و أسمحلي أن ألفت نظر سيادتك أن شيوعي و أمبريالي حاجتين مختلفتين تمامآ... علشان كده من فضلك...

الضابط : بلا من فضلك بلا زفت.. أنت حتتفلحصلي فيها.. بطاقتك يا خويا.. و الا أقولك من غير بطايق.. خدهم كلهم عالبوكس يا حنفي و وورايا عالقسم...

لم تجدي أصوات الأحتجاجات و سرد نصوص حقوق الأنسان.. و بعد عدد من اللكمات و الصفعات و كام قفا... صعد الجميع الي البوكس و تحركت القافلة خارج الكلية.. و بقيت الأناث فقط في حالة وجوم..

ست أمينة : يا لهوي دول خدوا كل الرجالة و سابونا هنا... يا عيني عليك يا منمان يا يا خويا... دول هيعملوا فيك أيه أنت و الولاد.. ده المنيل علي عينه ده كان بيتكلم عن خابور... ده ايه الحظ المهبب ده.. ما فيش واحد من الأدارة موجود النهاردة... هنعمل ايه يا ربي ؟

و فجأة أطل Optimistic برأسه بمنتهي البطء من باب الحمام.. و بصوت هامس قال : هما مشيوا ؟ و بعد أن تلفت مرات حوله نادي قائلآ :

أطلع يا سي السيد.. الدار أمان

Crosfield : انتم كنتم فين ؟

سي السيد ( و براءة الأطفال في عينيه ) : أصل... أحححممم... أصل أحنا كنا خرمانين و دخلنا الحمام نشربلنا سيجارة... هو.. هو حصل ايه بالظبط؟

Croosfield : حصل ايه ؟ حصل أيه يا سي السيد يا شجيع السيما و أنت يا سي أوبتي يا ملك الشطرنج.. حبكت السيجارة دلوقتي.. هو أنت مش كنت بطلتها و الا كله فشر... يالله يا بابا أنت و هو .. مش عايزة أقطمكم دلوقتي.. بعدين... شوفوا الأفوكاتو فين و فريرة علي قسم الأزبكية.. خدوا الولاد هناك.. عايزين يلبسوهم قضية.

و أنطلق سي السيد و Optimistic بالسيارة زوبة كالسهم يجوبون جميع الأماكن التي يرتادها الأفوكاتو بحثآ عنه...

(عفوآ أذا بالغت قليلآ في تشبيه سرعة زوبة بالسهم )

يتبع

[Lancelot]

أوبتي و سي السيد ... شيدوا حيلكم شوية .... الدنيا برد هنا في الزنزانة ..... إرررررررررررررر ....

[الطفشان]

دة يا اما منعطف درامي في التشويق و الاثارة

يا اما دة فيلم هندي يحتوي على جميع العناصر (حب، عنف، شجيع، غنا، الخ)

كمل يا سكورب يا بتاع سيناريو السيما

[optimistic]

مِية مِية يا ابو السيد.. أنا بقي حافتحها كهربائي.. و نأجر لُمض و زينات في الأفراح و الموالد.. مشروع يكسب دهب.. مش نزرع مكرونة يا أسباجيتي أفندي.. يا واد يا أوبتي يابو الأفكار..

بقى كده .... طب خليك في الزنزانة لحد ما تنشف

و فجأة أطل Optimistic برأسه بمنتهي البطء من باب الحمام.. و بصوت هامس قال : هما مشيوا ؟ و بعد أن تلفت مرات حوله نادي قائلآ :

أطلع يا سي السيد.. الدار أمان

لعلمك انا كنت ساعتها مزنوق فعلا (وش واحد بيستهبل)

و أنت يا سي أوبتي يا ملك الشطرنج.. حبكت السيجارة دلوقتي.. هو أنت مش كنت بطلتها و الا كله فشر... يالله يا بابا أنت و هو .. مش عايزة أقطمكم دلوقتي.. بعدين...

طيب هي كروسفيلد هتفرح لو كنا اتاخدنا معاهم... عجايب

الحكاية محبوكة و مستنيين البقية

[tiger1411]

و بعد عدد من اللكمات و الصفعات و كام قفا... صعد الجميع الي البوكس

يعنى ورانا ورانا حتى هنا

أى أى أى

(وش وارم من الترحيب الرسمى)

[White heart]

امى بتسلم عليك و بتقولك هو المسلسل امتى؟!

و بالمرة بعتالك الصورة دى بتاعه طلبه الكليه لما كانوا فى الأبتدائيه، يا ترى مين فيهم ......... ؟!

بس بصراحه القصه فعلا "محبوكه" و من كتر خفتها و ظرفها بقت عامله زى "مسلسل شيق" الواحد بيستنى الحلقه الجديدة بفارغ الصبر...برافو، يا ريت تكمل...

[se_ Elsyed]

أنا معترض وحاسس أنك بتكرني يا سكوب ، يعني يتطلعني فى دور واحد ميت يا فى دور الندل ( محمود المليجي ) وأستخبى فى الحمام أنا وأوبتي لما الحكومة تيجي تقفش زمايلنا فى الكفاح .. إش عرفك يا أخي يمكن كان عندي ظروف حقيقية قهرية أضطرريت إني أطول شويه فى الحمام وتصادف ذلك مع مداهمة الشرطة لمقر الحزب قصدي مقر الجامعة.

إصحى كده معايا وعدل الدور واكتب ان أنا وأوبتي أقتحمنا سجن ليمان طره بسيارتي السوبر تيربو وخلصنا زمايلنا من زبانية السجون وفضل البوليس يطاردنا فى حواري وأزقة القاهرة إلى ان تخلصنا منهم جميعاً ورجعنا إلى المنتدى سالمين ولقينا مدام سلوى وست أمينة دابحين الجاموسة بتاعت حشيش وعملين لنا فتة بالكوارع علشان الناس اللى كانت محبوسة وعايشة على العدس والفول يرموا عضمهم .

أنا مش بأحجر على موهبة التأليف عندك لا سمح الله ولكن ده تفتيح مواضيع من واحد مؤلف قديم ومتقاعد .

إتوكل على الله يابني ... انا من هنا ورايح هاتبنى موهبتك لحد ما أخرج بيك للنور .

مع تحيات الآسطى س س الكهربائي.

[الطفشان]

تعلن شركة طفشانكو الوكيل الوحيد للاديب الكبير سكوربيون

انها بصدد طرح باقي المسلسل في صورة كتيبات

و باب الحجز مفتوح الان

سعر العدد 20 يورو

و خصم 5% عند حجز ال 100 عدد كاملة!

و ليس لنا فروع اخرى

(ما هو لو ماكنتش قلت كدة، كان حد حيقول الطفشان مستني اشتراكات او بتاع، يبقى بيدي لا بيد عمرو)

[amir]

تعلن شركة طفشانكو الوكيل الوحيد للاديب الكبير سكوربيون

انها بصدد طرح باقي المسلسل في صورة كتيبات

و باب الحجز مفتوح الان

سعر العدد 20 يورو

و خصم 5% عند حجز ال 100 عدد كاملة!

و ليس لنا فروع اخرى

(ما هو لو ماكنتش قلت كدة، كان حد حيقول الطفشان مستني اشتراكات او بتاع، يبقى بيدي لا بيد عمرو)

ممكن تعمل لنا CD ؟

[farasha79]

حقوق الطبع محفوظه لدى شركه فراشكو للانتاج و التوزيع

[Scorpion]

اوبتي كتب

اقتباس:

مِية مِية يا ابو السيد.. أنا بقي حافتحها كهربائي.. و نأجر لُمض و زينات في الأفراح و الموالد.. مشروع يكسب دهب.. مش نزرع مكرونة يا أسباجيتي أفندي.. يا واد يا أوبتي يابو الأفكار.. 

بقى كده .... طب خليك في الزنزانة لحد ما تنشف

الله.. مش عاجبك.. مش انت اللي كتبت :

لو كان راس المال صغيرا افتح مكتب كمبيوتر صغير او صيانة اجهزة كهربائية

ايه حنرجع في كلامنا ولا ايه ؟

[Scorpion]

سي السيد كتب :

أنا معترض وحاسس أنك بتكرني يا سكوب ، يعني يتطلعني فى دور واحد ميت يا فى دور الندل ( محمود المليجي ) وأستخبى فى الحمام أنا وأوبتي لما الحكومة تيجي تقفش زمايلنا فى الكفاح .. إش عرفك يا أخي يمكن كان عندي ظروف حقيقية قهرية أضطرريت إني أطول شويه فى الحمام وتصادف ذلك مع مداهمة الشرطة لمقر الحزب قصدي مقر الجامعة.

و الله انت أكتر واحد تاعبني يا سي السيد.. مش عاجبك حاجة.. اطلعك في دور زعيم معارضة تقوللي حتوديني في داهية.. اعملك اغنية عجب و اخليك مطرب السلطة. تقوللي عملتني ميت.. و عايز دور كومبارس من ابو 5 جنيه.. خلييتك صاحب الفكرة الجهنمية بتاعت تاجير سور الكلية بوتيكات تقوللي اني بكرهك... مادخلكش الحجز مع التانيين تقوللي طلعتني ندل.. الله مش انت اللي قولت : احنا اسامينا جوا السجون بس ما داخلناهاش... حنحمرق و الا ايه.. بقولك اييييه.. خليك قنوع احسن اطلعهم كلهم و البسك تهمة فيها ست سنين و كمان جوا زنزانة من غير مرايات... Capito Signor Si El Saiid

[Scorpion]

الطفشان كتب:

تعلن شركة طفشانكو الوكيل الوحيد للاديب الكبير سكوربيون

انها بصدد طرح باقي المسلسل في صورة كتيبات

و باب الحجز مفتوح الان

سعر العدد 20 يورو

و خصم 5% عند حجز ال 100 عدد كاملة!

فراشة 79 كتبت :

حقوق الطبع محفوظه لدى شركه فراشكو للانتاج و التوزيع

بما اني صاحب الموضوع.. فجميع حقوق الطبع و التوزيع... و الأرباح بعد دفع الضرايب تقسم كالتالي :

50% للمعلم حشيش بمناسبة عودته بالسلامة

45% للمساهمة في دفع ديون مصر...

5% مناصفة بين الطفشان و فراشة بالعدل : اي 4% للطفشان و 1% لفراشة