سأذهب للسعودية فيزا حرة !! كيف أبدآ هناك ؟

[momazad]

السلام عليكم ورحمة الله وبركاته

أخواني أنا عضو جديد معاكم علي المنتدي الطيب دا ولسه والله مش اعرفه غير امبارح بس لكن بجد لقيت فيه معلومات مفيدة كتيره جدا وربنا يجعلها في ميزان حسنات كل من كتبها أو أعان علي نشرها ... ولكن أخواني ليا هنا مشكلة بسيطه جداااااااا وهي أنا فعلا مسافر خلال اسبوع للسعودية في جده وبجد بجد مش عارف اي حاجه في اي حاجه ولا حتي عارف انا رايح فين بالضبط لان الفيزا بتاعتي فيزا حره وبالتالي الكفيل بتاعي مهتمه تنتهي وقت ما يعمل ليا الاقامة ويديني الطرشه .. طيب دلوقتي أنا مسافر وكمان في بلد غريب ومع ذلك مش عارف هبات فين ولا هروح فين يا ريت اذا كان فيه حد عنده فكرة طيبه كدا زيكم يا ريت يدلني ويكون له الاجر والثواب وهنيااااااااااااالك يا فاعل الخير والثواب .ههههههههههه :blink: قضيناها شحاته من اولها ربنا يستر :lol: ... اخوكم مومازاد محمد

[momazad]

يا رب يا مسهل محتاج افادة يا ولاد الحلال

[ahmedezzat]

اكتب عن خبرتك و مؤهلك و خبراتك و مجالات عملك عشان لو حد عنده معلومه يفيدك

معلش عندى سؤال .............. انت دفعت كام فى الفيزه الحره؟ و طالعه بمهنه ايه؟

[عاشق الترحال]

يعني انت دفعت ثمن الفيزا وخلصت كل حاجه ولسه جاي تدور هتنام فين وهتنزل على مين ؟

يعنى لك أقارب أو أصدقاء ممكن يستضيفوك فى البدايه لحد متلاقي شغل ولا أيه ؟؟؟؟؟؟؟

مش لازم تعرف راسك من رجليك ولا نرمي نفسنا فى البحر ونقول سيبها لله ؟

ولازم تبقى عارف المهنه اللى فى الإقامه ايه علشان تعرف إن كانت هتساعدك تلاقى شغل بسهوله ولا هتعاكسك وهتضطر تغيرها علشان تعرف تشتغل .

وعلى العموم اكتب مؤهلاتك وخبراتك وإعرضها في المنتدي ممكن حد يقدر يساعدك

وربنا يوفقك ويكتب لك الخير

[eng hoss]

ده رقم موبايلى

0540072402

أتصل بيه وانا أحاول ادبرلك سكن مؤقت لمدة شهر او اتنين

فى غرف فى حى الصفا للعزاب يوجد بها مطبخ وحمام تقريبا ب 750 او 800 ريال شهريا

وأكتب ال c.v بتاعك علشان نحاول ندور على شغل من غير نقل كفاله على حسب مؤهلاتك وخبراتك

وكان لازم قبل ماتييجى يكون عندك قريبك او صديق أو مظبط مع شركه

وتحيـــاتى لك

[momazad]

السلام عليكم ورحمة الله وبركاته،، اشكر اخي احمد عزت علي ردك واهتمامك انا الفيزا اخي كلفتني مبلغ كبير شوية ولكن كان دا هو المتاح ادامي خاصه اني انا كان جاي ليا عقد علي شركة ولكن الراتب كان بسيط رغم مميزاته ولكن ناس كتير في السعودية قالوا ليا تعالي بفيزا حرة وهتلاقي شغل براتب اعلي من كدا وممكن بعدها تغير كفاله لو عجبك الشغل في اي شركة دا اللي اتقال ليا وعليه شفت واحد هنا بيجيب فيز حره وكان معاه فيز كتيره حرة ولكن اللي كان جاهز معاه اتنين واحده عامل والتانية حلاق فالكل شكر في الحلاق وقالوا ليا انها كمان بتغير المهنه وممكن تجيب بها حد زيارة ناس جيراني قالوا ليا كدا وهم كانوا طالعين وفيز زيها

وكفتني الفيزا دي حوالي 13500 ريال تقدر تقول 14000 بالمصاريف

ورغم إن الواحد مضايق من المصاريف دي كلها ولكن بقول اهو يمكن ربنا يكون رايد في دي الخير خاصه ان وجهتي الاولي قبل الشغل اني عايز اكمل دراستي في جامعة الملك عبد العزيز وكنت براسل الجامعه وخاصه مركز الاقتصاد الاسلامي ولكن المركز مكنش فيه منح وكانت موقوفه والدكتور رئيس المركز ربنا يبارك فيه كان دياما بيرد عليا رد طيب ففيه ناس اعرفهم قالوا ليا ممكن تسافر وهناك ممكن تقدم علي اساس انك معاك اقامة وساعتها موضوع المنح دامش هيقف امامك كتير وناس عملتها قبل كدا

المهم علشان مش اطول عليك اخي انا حاصل علي بكالوريوس تجارة اقتصاد بتقدير جيد جدا مرتفع

وكنت تالت دفعتي ولكن سنة تخرجي كانت شبه نحس شوية علشان الجامعه سنتها وقفت تعيين المعيدين لمدة سنتين وكنت اول سنة تخرج بعد قرار الغاء تعيين العشرة الاوائل ربنا يجزيهم .. المهم انا قدمت لكلية الاقتصاد والعلوم السياسية واخدت التمهيدي ماجستير في الاقتصاد وبعمل الرسالة ولكن علشان ضغط الظروف في مصر فكان لازم اني اسافر وفي نفس الوقت مش اضيع حلمي في تكملة دراستي ففيه دكتور اعرفه في الاقتصاد عرفت قدرا وانا عنده في جامعة طنطا انه رايح امعة الملك عبد العزيز يحاضر فيها وهو دكتور مشهور وله صبغة اسلامية في دراسته يعني نفس اتجاه دراستي فدا ان شاء الله رب العالمين هيساعدني هناك لموضوع التسجيل وانا دلوقتي بوثق شهاداتي منالخارجية والملحق الثقافي السعودي علشان اقدم وادخل علي نفس الرسالة وان شاء الله يكون خير وكمان الحمد لله ليا خبرة كويسه في الكمبيوتر وبرامج اقتصادية تانية... دي كل الحكاية يا عم احمد شفت ليه انا قلت حيران ؟؟؟؟؟؟؟؟؟؟

اخويا عاشق الترحال حلمك عليا شوية يا طيب انا مش مقطوع اوي كدا يعني والحمد لله ليا اقارب هناك ولكن مش في جدة في الرياض ليا اخويا وشغال الحمد لله عند راجل سوري ودا اخويا الصغير ولكن مش موجود من زمان في السعودية دا من حوالي سنه وهو مرتبط بالمكان اللي هو فيه اللي هو الرياض بس وميعرفش كتير عن جدة لانه مش راحها وكمان انا مقدرش اشوف شغل بالرياض لاني انا كمان مرتبط بجدة علشان حاجه بسيطه ان جامعة الملك عبد العزيز بجدة والمركز العالمي للاقتصاد الاسلامي بجدة فمقدرش اشوف شغل بمحافظة تانية زي ما انت عارف ولازم اكون قريب من الجامعة علي الاقل في نفس المحافظة علشان كدا انا محتار اروح فين هناك لان مفيش حد من اللي انا اعرفه هناك .. هقولك علي حاجه بس مش تضحك حضرتك ودي فعلا حقيقه أنا ليا اكتر من 56 واحد من العيله بتاعتي في السعودية وكلهم في انحاء متفرقه من السعودية الاااااااااااااااااااا جدة مفيش حد منهم هناك شفت القدر ؟؟؟ ربنا يعزك اخي والله انت مش عارف اللي جوايا ايه لكن الظروف هي الي بتجبرنا علي اشياء ربنا الاعلم بيها دمت بخير اخي الحبيب ..

اخويا المهندس hoss اشكرك بجد لشعورك النبيل دا وعرض مساعدتك دي ربنا يجعلها ليك في ميزانك يوم القيامة .. اخي كما شرحت سابقا المشكلة مش مشكلة حد هناك اد ما هي مشكلة اني عايز اكون جنب الجامعه علشان كدا بقول جدة .. والله يا اخي ربنا اعلم انا تعبت اد ايه علشان اخلص الاوراق بتاعتي خاصه اموضوع تغيير المهنه في البطاقه دي لولا ان ربنا ييسر الحال وكان فيه ضابط معرفه في السجل الرئيسي بالعباسية منكش حاجه خلصت ولكن الحمد لله خلصت واهو خلاص خلال ايام هكون بجدة اذا ربنا اراد لنا الحياة

اشكرك لتعاطفك الطيب

[أحمد سيف]

أخي الكريم ... طالما هدفك من البداية تكملة دراستك والدخول الى السلك الجامعي فكان من الأفضل أن تحاول أكثر مع الجامعات الخليجية والأجنبية، يمكن تطلع لك منحه وتبقى في الحالة دي طالع كطالب أو موظف في الجامعة وتاخذ مرتب وتكمل دراسة مرتاح ... لكن ضغط العمل وتكلفة المعيشة في السعودية ستجعل من الصعب عليك اكمال دراستك. هناك خيار آخر وهو أن تدرس للحصول على مؤهل مهني CPA - CMA ثم تطلع على وظيفة عالية ومن ثم تكمل دراستك بنفس هادي. والخيار الثالث والأخير أنك تصبر شويه في مصر وتخلص ماجستير وبعديها هايكون موضوع القبول والمنح أسهل بكثير للحصول على الدكتوراه.

عموما انت أدرى بظروفك ... ربنا يوفقك وييسر لك تحقق أهدافك.

[عاشق الترحال]

السلام عليكم ورحمة الله وبركاته

أخويا العزيز عذرا لو أنك فهمتني غلط بس أنا مقصدتش أزعلك أو أكون قاسي عليك لأني مريت بنفس الظروف اللي أنت مريت بيها ويمكن أصعب بس أنا كان صعبان عليا بهدلتك وأنت دافع الفلوس دي كلها زي ما أنا اتبهدلت .

وحقك عليا تاني يا عم ولو محتاج أي خدمه لما تيجي شوف هتيجي امتى وأنا نازل على أول شهر ديسمبر لو هتيجي خلال الشهر ده إن شاء الله هدبر لك كل احتياجاتك وهشوفلك السكن و الأثاث وكل حاجه .

ومتزعلش مني لأني والله مش عاوز أي بنى آدم يتبهدل أو يشوف أيام صعبه فى الغربه زي اللى أنا عشتها0

ورقمي معاك أهوه ومن عنيه الاتنين 00966565292547

السلام عليكم ورحمة الله وبركاته

[ozoozo]

خدها قاعده لو مكانش البحث العلمي اكل عيشك ماتعملوش والشهاده اللي ماتجيبلكش فلوس مالهاش لازمه فلو انت شايف ان شهادتك هاتجيبلك فلوس بعد كده اتكل علي الله غير كده لا ماتدخلش في سكه العلم لايكيل بال........... والحاجات دي وانا مش ضد التعليم ولا حاجه بس احنا اتعلمنا التعليم الاساسي اللي لغايه الجامعه انما بعد كده لازم يكون ليه مردود مادي زي الاطباء مثلا شهادتهم بفلوس الدبلومه غير الماستر غير الدكتوراه

[elshafey]

خدها قاعده لو مكانش البحث العلمي اكل عيشك ماتعملوش والشهاده اللي ماتجيبلكش فلوس مالهاش لازمه فلو انت شايف ان شهادتك هاتجيبلك فلوس بعد كده اتكل علي الله غير كده لا ماتدخلش في سكه العلم لايكيل بال........... والحاجات دي وانا مش ضد التعليم ولا حاجه بس احنا اتعلمنا التعليم الاساسي اللي لغايه الجامعه انما بعد كده لازم يكون ليه مردود مادي زي الاطباء مثلا شهادتهم بفلوس الدبلومه غير الماستر غير الدكتوراه

انا اؤيدك في هذا الكلام

انا ليا واحد قريبي قعد 5 سنين يمتحن الـ CPA ويسقط لغاية ما خدها في السنة السادسة

بس كان كبر علي واحد لسه واخد الـ CPA ويدوبك لقي شغل بس اقل من خبرته كمحاسب ب 5 سنين

[momazad]

السلام عليكم ورحمة الله وبركاته

أخواني ربنا يبارك في عمرك وفي حياتكم يا رب

بجد مش عارف ارد واقول ايه ليكم وفعلا دي هي روح المصريين الحلوه واللي مفتقدينها الايام دي كتير أخواني يعلم الله انني احببتكم في الله وفعلا لو كنا كلنا يدا واحده في بلد الغربه كنا بقينا لينا وضع تاني لكن انت تريد وانا اريد والله يفعل ما يريد

أخي الحبيب أحمد سيف جزاك الله كل خيرا لردك المبارك ربنا يبارك فيك يا رب بس انا اخي حابب جدا مجالي دا وكمان حاولت كتير جدا اني الاقي منح له لكن الامر جد صعب وطبعا الاصعب بيكون ان اغلب المنح دلوقتي بقت اصعب ما يكون انا بئالي فترة كبيرة بدور علي منح ولكن دون جدوى لما يئست ولكن جاء الفرج او بصيص بالفرج لما عرفت امر اني ممكن اكمل في مجالي ولكن محتاج تضحيات فقلت اضحي وربنا يتمها علينا يا رب بالخير .. والله اخي قبل ان انظر للفائدة الشخصية نظرت ماذا سأقدم لبلدي وديني من خلال دراستي يمكن ساعتها ربنا يرضي عليا ويكون خير ليا ... وكمان الشهادات المهنيه او زي ما بيسموها الماجستير المهني مش بيكمل للدكتوراه وانا عايز اكمل للدكتوراه بامر الله واكيد هيكون فيه عائد علي دا وموضوع اني كنت اصبر بجد صبرت كتير اوي ولكن بجد ظروفي محتاجه تحرك شوية والا مش هقدر احقق اي حاجه .. ربنا يعزك اخي والله انا شرفت بحضرتك واتشرف بصداقتك....

أخويا عاشق الترحال أنا اسف والله اذا كان وصل الي خاطرك اني زعلان لا والله ومتاكد كمان من كلامك فيه صحه كتير ولكن اعمل ايه وانا حلمي بيضيع وكمان حياتي بتمر بدون حتي ما اعمل اي حاجه .. والله اخي انا بحب مجالي حب شديد جدا ونفسي اقدم بيه حاجه ولكن الظروف كانت دايما بتعاكسني شوية ولكن املي في الله كبير واملي انه ينير ليا طريقي للوصول الي مبتغاي وباذن الله اكيد هحقق اللي بحبه بتوفيق من ربنا ثم بارشادات حضراتكم لانكم بسفركم قبلي فاصبحتم اهل خبره وكما يقولون اذا اردتم شيئا اسألوا اهل الخبرة .. وأنا ساقني قدري لهذا المنتدي الطيب حتي اقرأ مشاركنكم واحسست ببصيص امل يظهر لي من جديد خاصه انني تعرفت علي احوال تلك البلد العربي من خلال كتاباتكم الطيبه .. وانا بجد متشكر لحضرتك كتير جدا لتعاونك الطيب دا وربنا يجزيك خير عليه ويعوضك ما هو افضل دائما ... أخي انا قادم الاسبوع القادم لجدة واذا أمرتني بشيئ أقضيه لك من هنا فلن أمانع وبدون اي مقابل والله وصدقني والله من قلبي لله تعالي عسي أن يجزيني الله عنك خيرا وربنا يجمعك بالاهل علي كل خير اللهم آمين وهذا رقمي اذا احتاجت أي شيئ من هنا ووربنا يوفقك ويوفق الجميع اللهم آمين

0180658756

أخي الحبيب أوزو ربنا يبارك فيك اللهم آمين .. أخي شهادتي ومجالي فعلا عظيم خاصه أنه يرفع الله به شأن الدين وهذا في المقام الاول مبتغاى .. وبعد ذلك النظر للعائد ولكن احب أن أوضح لحضرتك شيئا أن مجال الاقتصاد الاسلامي مجال جديد وله مستقبل باهر بامر الله واصبح الان داخلا في كل مجالات الحياة حتي أن لي صديق ناقش من عدة سنوات الماستر في الاقتصاد الاسلامي وطلب نفس المجال من خلال السفارة الامريكيه لاحتياجهم اليه وقدم طلب وقبل وهو الان يدرس هناك ربنا يوفقه ويبارك فيه

ودا مش لشيئ سوي مصلحتهم بالاول والاخير ولكن علمي يقين أن الامر هذا له مستقبل ومطلوب بامر الله غير ذلك أن مجالات البحث فيه ليست كثيرة ومطلوبه كثيرا في هذا العصر ومطلوب باحثين كثر ... ولكن كما قلت مبتغاي الاول هو تقديم شيئ لديني ثم بعد ذلك الامور الشخصية وبعدين أخي الحبيب الامر كله تجديد للنوايا فقط وبعد ذلك الامور بتسير كما هي فتجديد النيه في هذا الامر لله شيئ عظيم ربنا يجزينا عنه الخير يا رب آمين .. ومع ذلك العمل لدنيتي هو مطلوب وهو ما اسعي لتحقيقه سويا مع امر دراستي .. ربنا يوفقك اخي لمرادك ويبارك لك في كل امورك

أخي العزيز amelshafey الامر كما ذكرت هو حلم اريد تحقيقه وربنا يجزيني عنه خيرا ليس أكثر واكيد مع سعيى ربنا هيوفقني لاني اتخذت كل السبل لتحقيقه ولم اتواكل علي اي انسان في ذلك الحمد لله وانا هنا والله اخي عرضت موضوعي علشان بس اخد الخبرة من حضراتكم واكسب اخوتكم ودا اهم عندي من اي شيئ اخر ... والله أخي قد تستغرب لو قلت لك أنني اعرف اناس في السعودية لو عرفت من هم لاستغربت ولكن حيائي يمنعني من ان اطلب منهم شيئا أحب أن ابدأ من نفسي ولا احمل اي جمايل من احد وكانو زملاء لي في الماستر وكانوا يتمنون اي طلب مني ومن فترة ليست بالقصيرة اعطوني تليفوناتهم المنزلية والشخصية بالرياض وغيرها ومع ذلك لم اعلمهم انني ذاهب للسعودية رغم أنهم من السعودية وذوي مراكز عالية جدا ... ومش حابب اخسر نظرتهم ليا علشان افضل في نظرهم الصديق الذي يعطي ولا يأخذ وأفضل في نظرهم كبير زي ما انا الحمد لله رغم انهم لو عرفوا انني هنا ولم اتصل عليهم سوف يغضبون جدا ولكن .. ربنا يديمها علينا نعمه أخي

بس ربنا ينير لنا طريقنا بعيدا عن اي مصالح خاصه اللهم آمين

تم تعديل 15 نوفمبر 2008 بواسطة momazad