بقت رسمي يا حلو !!!!

[الأفوكاتو]

خبران, فى يوم واحد, فى صحيفة واحدة, ( حزر فزر أنهى؟)

جمال مبارك أمام مجلس العلاقات الخارجية الأمريكي :

العلاقات المصرية الأمريكية أكثر نضجاً..نناقش الخلافات بالحوارلا أحد يستطيع المزايدة.. علي دورنا الريادي في المنطقة

قال جمال مبارك رئيس لجنة السياسات بالحزب الوطني الديمقراطي إن العلاقات المصرية الأمريكية مرت بالكثير من الاختبارات عبر السنوات الطويلة الماضية مما يتيح القول بأنها أصبحت أكثر نضجا عقب تحديات واختبارات مختلفة

سوزان مبارك بحثت مشروعي توثيق التراث العربي لأدب الطفل ومبادرة المليون كتاب

بحثت السيدة سوزان مبارك قرينة الرئيس مع أعضاء المجلس العربي لكتب الأطفال البدء في تنفيذ مشروعي توثيق تراث أدب الطفل في العالم العربي ومبادرة المليون كتاب والخطوات التنفيذية والبرنامج الزمني المقترح للمشروعين

[الوطني]

لماذا لا نرسل برقية احتجاج للرئيس ويكون نصها هو التالي:

" جري ايه يا سيادة الرئيس , ولا هو عشان ساكتينلاك؟"

التوقيع : مواطن نفذ صبره

[الطفشان]

شوف

موضوع الهانم مع كتاب الطفل و تراث الطفل

بصراحن تعمل اللي تعمله

مش مهم

لانه على اسوأ الفروض مضيعة وقت وزارات و فلوس

لكن دي بقى لها اعتبار تاني خالص:

جمال مبارك أمام مجلس العلاقات الخارجية الأمريكي :

العلاقات المصرية الأمريكية أكثر نضجاً..نناقش الخلافات بالحوارلا أحد يستطيع المزايدة.. علي دورنا الريادي في المنطقة

قال جمال مبارك رئيس لجنة السياسات بالحزب الوطني الديمقراطي إن العلاقات المصرية الأمريكية مرت بالكثير من الاختبارات عبر السنوات الطويلة الماضية مما يتيح القول بأنها أصبحت أكثر نضجا عقب تحديات واختبارات مختلفة

بصفة ايه؟

و الى اين سيؤدي هذا المنزلق؟

[Salwa]

هو مش ممكن برضه الواحد يقول رأيه .....واختصارا للوقت ...

ممكن استعير التوقيع؟

[Spider]

جمال مبارك: الإصلاح في مصر مرتبط بجيل وليس بشخص

قال جمال مبارك أمين لجنة السياسات بالحزب الوطني الديمقراطي أنه ليس من الدقيق الحديث عن شخص واحد في تناول عملية الإصلاح في مصر ويتعين بدلا من ذلك تسليط الضوء علي جيل بأكمله من الشباب المصري يتقدم للمساهمة في عملية التغير بمصر

وأضاف جمال مبارك ردا علي سؤال في حديث لمحطة بي بي إس الأمريكية أذيع فجر اليوم حول إمكانية توليه منصب قيادي في مصر مستقبلا بدلا من الحديث عن الأشخاص يجب النظر إلي حقيقة الإصلاحات الجارية في مصر في القطاعات المختلفة والقادرين علي لعب دور في قيادة مصر وتشكيلهما والإسهام في تدعيم دورها في القرن الحادي والعشرين والتعامل مع تحدياته

وكان جمال مبار ك - عضو الوفد المصري رفيع المستوي الذي ينهي اليوم جولة بالولايات المتحدة - قد تلقى سؤالا مشابها خلال مشاركته في إحدى جلسات مؤتمر موسع عقد بواشنطن الليلة الماضية حول العلاقات المصرية الأمريكية

وقال إنه يسعى دائما إلي القيام بدور نشط في الوقت الحالي من خلال موقعه في الحزب الوطني الديمقراطي ونشاطه في مجال العمل الأهلي

وأضاف جمال مبارك إنه يشعر بالرضاء عما يقوم به حاليا ويتطلع للعمل مع أبناء جيله في السنوات القادمة لتوفير المناخ الكفيل بدعم عملية التحديث والإصلاح في مختلف قطاعات العمل في مصر

وقال إن عملية الإصلاح والتغير لا تتعلق بشخصه

http://news.masrawy.com/masrawynews/270620.../146514news.htm

بقية المقال بيتكلم سيادته عن القضية الفلسطينية ثم القضية العراقية

ولم يظهر أى وزير ممن رافقوه

[ســيد مرزوق]

ماهو إحنا اللي نستاهل برضه ... بسلبيتنا وسكاتنا لغاية مالفاس تقع في الراس ونبص نلاقي سعادته ناطط فوق راسنا وبيحكمنا وشلة شباب روشين من أصحاب سيادته من زملاء الدراسة أو أبناء الشلة الحالية من حاشية السيد الوالد ..

والله العظيم حاجة تنقط ... ( وشض بيلطم بقبقاب ) فين الشعب يا عالم؟؟؟؟ فين الرجالة ؟؟؟؟ قاعدين نتفرج ولا كأنها بلدنا دي اللي بتتباع وتتورث كأنها عزبة مبارك ؟؟؟

بصراحة لو حصل اللي بيقولوا عليه ده يبقى فعلا إحنا نستاهل أكتر من كده .. كفاية سلبية وجبن وتخاذل .... فلندافع عن مستقبل أبنائنا وأحفادنا .... أما مستقبلنا فقد ضااااااااااع بين أفراد العائلة الملكية المصرية اللي مكوشين على البلد من جميع النواحي ولا حد قادر يفتح فمه بكلمة والمثقفين بين منافق وجبان ومتفرج ....

العالم دي اتسرعت عالكرسي والحكم وفاكرينها سايبة .... يمكن هي سايبة فعلا وأنا مش عارف .

أنا قربت أكره الدنيا وأكره نفسي وأكره السياسة وأكره بكره وأكره بعده

عشان بعده هايكون موضوع مناقشات أولادنا هو لا لتوريث أيمن جمال مبارك !!!!!!

( وش ورم من كتر اللطم بالقبقاب إياه )

[Spider]

( وش بيلطم بقبقاب )

رغم أن الموضوع جد الجد ألا أننى وصلت للأقتباس السابق ومقدرتش أمسك نفسى من الضحك...

تخيلت حضرتك بجد ماسك قبقاب وشغال لطم بيه معلش متزعلش منى أصل فعلا اللطم باليد مش كفاية فى الأيام السودة اللى أحنا شايفنها دى

حضرتك سألت الناس فين!!!

الناس الفقر والجهل والخوف خلاهم فى عالم تانى ومش شايفين ولا سامعين ولا حاسين بحاجة

سياسة الفقر والجهل لم تأتى من فراغ فهو فكر مدروس ومقصود لأن النتيجة واضحة ذى الشمس والناس لم تعد تعرف أى حاجة فى أى حاجة ومبقتش فارقة مع حد خلاص

الأستاذ صغير السن والخبرة

أصبح فى يوم وليلة يتكلم بأسم الدولة ولا عزاء للشباب الذى أراد حظهم العاسر ألا يكونوا جميعهم أبناء لرئيس الجمهورية فكان مكانهم الطبيعى صفيحة الزبالة... وعجبى

(ممكن أعرف ماركة القبقاب اللى حضرتك بتستعمله يا أستاذ سيد؟)

[Spider]

وخلال شهور أو سنوات قليلة سيبدأ المحروس فى حكم جمهورية مصر العربية وستسير كلمته على الكبير قبل الصغير وستمضى مصر فى عصور الظلام لمدة 30 سنة أخرى وطبعا الأعمار بيد الله وقد تزيد...

ولا أعلم كيف سيدير دولة قبل أن يدير أسرة

وسيمتد حكم الذل والطوارىء لسنوات أخرى لا يعلمها الا الله

طالما جهل الشعب بحقوقه فلن يحصل عليها فالله مع المجتهد أينما كان حتى وأن كان كافرا فاجرا ... لقد نسينا الأخذ بالأسباب فأنسانا الله أنفسنا... لقد رضينا بالذل فأذلنا الله... لقد رضينا بحكم الفاسد فأفسد الله أبناءنا... لقد أضعنا أعمارنا فى الكلام وتركنا العمل فكان الجهل هو عين العدل الألهى...

[ســيد مرزوق]

(ممكن أعرف ماركة القبقاب اللى حضرتك بتستعمله يا أستاذ سيد؟)

قبقابي ماركة ( خيبيتكو فيري هيفي ) !!!

لاحظت الخبر في الاهرام ( منصب الباشا الصغير : رئيس لجنة السياسات وليس أمين لجنة السياسات ) عشان نتعود على كلمة رئيس بعد إسم المحروس إسم النبي حارسه وصاينه .

آآآآآآآآآآه يا خيبتنا التقيلة

لازم يحصل حاجة .... لأن لو ماحصلش حاجة ..... هاضطر فعلا للتخلي عن جنسيتي وإكتساب جنسية جمهورية ( موزمبيق ) وأتجوز واحدة موزمبيقية وأخلف عيال مزمبقين ...

حد يديني تلفون دكتور نفساني .

( وش واحد محول وشعر حواجبه منكوش وسنانه طالعة لجوه )

[Sharkiah]

أنا زرت موزمبيق ياأبو السيد وماأرشحهالكش لأنهم بيتكلموا برتغالى

جنبها لزق بلد جميله وهاديه ولسه يادوبك شامه ريحه المدنيه والعمران إسمها ملاوى ، العاصمه بجلال قدرها عباره عن شارعين لاأكثر والباقى لسه أحراش فى أحراش ، على الأقل لغتهم إنجليزى وهناك بدون مبالغه بألف ألفين دولار هاتبقى من المميزين والصحافه المحليه هاتابع تحركاتك وتبقى من نجوم المجتمع

(وش واحد وشه فقد خلاص القدره على الإيحاءات)

[arabawy]

ونبص نلاقي سعادته ناطط فوق راسنا وبيحكمنا وشلة شباب روشين من أصحاب سيادته من زملاء الدراسة أو أبناء الشلة الحالية من حاشية السيد الوالد ..

)

ياعم سيد . ياعم سيد دي ناس بتاكل في اتة محلولة محدش بيقول لهم انتوا بتعملوا اية. وهما دول راس الفساد الحقيقي في مصر مع طبالينهم وزمارينهم الخالدين فيها ابدا الذين ما ان تري سحنتهم حتي تصاب بالقيء. وقبل كدة كانوا بيحاكموا اساتذة الطب اللي كانوا عايزين ينجحوا اولادهم بالتزوير. اللة !! هي دي نقرة ودي نقرة ؟ اليوم قالت قناة الجزيرة ان محكمة في نيجيريا استدعت الراءـيس للاستفسار عن كيفية نجاحة في الانتخابات واحنا اعدين كل واحد بياكل في نفسة كمدا وغيظا من المشخصاتية والممثلين والكمبارس علي خشبة المسرح السياسي المصري

[Scorpion]

حنفضل طول عمرنا ندور في نفس الحلقة... حنفضل نعيط و نشتكي لطوب الأرض أن أحنا مظلومين.. محكومين بعصابة من أيام الأتراك لغاية يومنا ده... و المستقبل ؟ .. مش باين فيه أي تغيير.. لو سألت أي بنى آدم في أي حارة في مصر.. هيرد أن العيشة بقت منيلة بستين نيلة.. و ربنا ياخده.. و لو بأيدي كنت.. و كنت.. و و و و..

و أي واحد فينا بيفكر نفس التفكير.. لكن لو حتة عسكري أمن مركزي سألك نفس السؤال.. الرد مليون في المية هيكون.. الحمد لله.. كله رضا.. انا ماليش دعوة يا عم.. يعني أنا اللي حصلح الكون..

أحنا هنا.. في منتدانا ده.. مش أكتر من صورة مصغرة لكل مصر... بل فيه نقطة زيادة في صالحنا... كلنا مثقفين.. لكن الحلول هي هي... نفس اللي بيفكر فيه عم فكري المزين و الأسطي شحاتة الميكانيكي و جرجس بتاع البليلة و هما يشدوا نفسين جوزة بعد المغرب عالقهوة هو هو اللي أحنا بنقولوا هنا... نتخانق و نكره بعض..و لو بأيدي أعملها أسلامية.. لأ علمانية.. لأ كذا و كذا... و في الآخر نقلبها تنكيت... ده هو سلاحنا الوحيد من ايام الأنجلبز لغاية دلوقتي ... نفتح الموضوع و بعدين يتقلب تنكيت... يا سلام... يا فرحتي بيقول والينا في سره.. خليهم ينكتوا عليّ... و علي أبني و أحفادي كمان.. ما دام ده هو أكتر ما يقدروا عليه...

يعني عمالين نقول .. جمال لأ... الا ده.. احنا أستحملنا كتير .. و مش مستعدين لسنين تانية بنفس الشكل...يا حلاوتنا.. هو أحنا عملنا أيه غير التنكيت و الرفض في السر علشان نغير أوضاعنا...و مستنيين دايما حد .. أي حد يعمللنا اللي أحنا لازم نعمله.. مستنيين سوبرمان ينزل من السحاب و يعمل زي شجيع السيما يضرب الأشرار و يسيب الحلوين يحكموا البلد و نعيش في تبات و نبات.. يعني مثلا لو صحينا الصبح و سمعنا خبره... ايه اللي حيحصل... بعد كام شكل قانوني..و فلان يبقي الرئيس لحد الأستفتاء.. و الأستفتاء بنسبة مية في المية الشهيرة ( اللي اصواتنا جزء منها ) حيكون جيمي...

هتعمل ايه بقي يا حلو ؟

الحل فينا... لكن للأسف لازم نستحمل جيمي رئيس في نفس الوقت.. بس من دلوقتي ما نقعش في غلطة أجدادنا و أباءنا.. اللي خلونا دايمآ في دايرة الضل.. اللي ما علموناش الأختيار... خلونا جيل ما لكش دعوة... علمونا الخوف و ساعدوا علي أعطاء النظام حجم المارد اللي ما يتلمس... لازم نعلم أولادنا عكس كل ده.. ما قفش في طريقه حتي لو خوف الأب دايمآ أقوى... لازم نعلمهم يطالبوا بابسط حقوقهم... و لما يكبروا هيطالبوا بحقوقهم كاملة... و علي أيامهم أكيد الرئيس مش هيبقي أسمه أيمن مبارك...

و لغاية اللحظة دي.. بشرب شربة زيت خروع.. و و نحط كمامة علي مناخيرنا , نحيي ببرود الريس الجديد ابن العمدة.. بس المرة دي الوقت اللي هنضيعه في التنكيت عليه نضيعه في تعليم ولادنا المطلبة بحقوقهم...

[yasser6666]

الخيبة اننا البلد الوخيدة في الكون ده كله اللي بتناقش ازاي تمنع رئيس دولتهم انه يولي ابنه السلطة من بعده !!! والنبي مش خيبتنا تقيلة حبتين عن العالم ده كله ... فعلأ مصر ام الدنيا واللي بيجري فيها مش مابيحصلش في دولة تانية ...(وش متبلد ومتنح)

عشان بعده هايكون موضوع مناقشات أولادنا هو لا لتوريث أيمن جمال مبارك !!!!!!

علي فكرة ايمن مين اللي بتتكلموا عليه?? اللي اعرفه ان الراجل مش متجوز حتي ....والايكون عملها من ورايا ....(وش واحد فاتح بقه ومدلدل لسانه)

بصراحة مافيش امل في الجيل بتاعنا ودي حقيقة انا مقتنع بيها تماما لابد يكون علي الاقل جيلين تلاتة لما يقدروا يتكلموا ويفتحوا بقهم من غير خوف

[ابو حلاوه]

اعتقد انه كمان كام شهر هيطلع علينا العزيز سمير رجب بمقالة ان السيد جمال مبارك فيه عرق قرشي و من نسل سيدنا علي ...

و شاف حلم فسرهوله الشيخ ابو خيمة زرقه ان خير مصر هيجي علي ايديه

اما ابراهيم سعدة هيطلع بمقاله ان الرئاسة اتعرضت علي نعمان جمعة

اما ابراهيم نافع فالمقالة بتاعته رزينة و مظبوطة عن استمرار المسيرة الي بدأها الوالد وجيل الشباب و ما الي ذلك

انــــــــــــت فيــــــــــــــــــــــــــــــــــــن يـــــــــــــــــــــــا فــــــــــــــــري ؟؟؟

[تصحيح]

انــــــــــــت فيــــــــــــــــــــــــــــــــــــن يـــــــــــــــــــــــا فــــــــــــــــري ؟؟؟

الاخ فري فري اعترض ( و كنا معه ) بشكل عملي .. من خلال حملة .. علي خطوات النخاسين المستمرة لبيع شعب مصر في سوق الندم.

لم تستمر الحملة لاسباب كثيرة أهمها كثرة المتفرجين و قلة المشاركين

و في الغالب ستتم الصفقة و الثمن أكثر من بخس لفقدان البضاعة ( و التي هي نحن ) الاحساس بالخطر و انعدام الرغبة في المقاومة

[الطفشان]

البيه قال ان التغيير مش متعلق بشخص

انا باعترض

التغيير متعلق بشخص

لكن ليس في شخص جديد يمسك

بل في شخص حالي يغور هو و عيلته

انت فين يا فري؟

[maksoof]

الحمد لله على نعمة اللمون

[tiger1411]

نفس اللي بيفكر فيه عم فكري المزين و الأسطي شحاتة الميكانيكي و جرجس بتاع البليلة و هما يشدوا نفسين جوزة بعد المغرب عالقهوة هو هو اللي أحنا بنقولوا هنا... نتخانق و نكره بعض..و لو بأيدي أعملها أسلامية.. لأ علمانية.. لأ كذا و كذا... و في الآخر نقلبها تنكيت... ده هو سلاحنا الوحيد من ايام الأنجلبز لغاية دلوقتي ... نفتح الموضوع و بعدين يتقلب تنكيت... يا سلام...

يا حلاوتنا.. هو أحنا عملنا أيه غير التنكيت و الرفض في السر علشان نغير أوضاعنا..

مستنيين سوبرمان ينزل من السحاب و يعمل زي شجيع السيما يضرب الأشرار و يسيب الحلوين

بصراحة مافيش امل في الجيل بتاعنا ودي حقيقة انا مقتنع بيها تماما لابد يكون علي الاقل جيلين تلاتة لما يقدروا يتكلموا ويفتحوا بقهم من غير خوف

بدون تعليق

[أسد]

في برنامج على القهوة بالأمس ... جاء إبراهيم عيسى بخبيرة في لغة الإشارة ... الصم والبكم ...

على إعتبار أن الناس اللي في الحكومة طرش ... أو بيستطرشوا ... ويعملوا مش سامعين ...

وقال لهم .. انهم خيبتهم تقيلة ... وطلب منهم أن يذهبوا .. أو يرحلوا .. وطلب مجموعة من المطالب ..

وترجمتها خبيرة لغة الإشارة ..

كل ده علشان مايبقاش لهم حجة .. ويعملوا مش فاهمين الناس عايزة ايه ...

لكن الكارثة ..

ان مفيش فايده ...

والرئيس ابن الرئيس شكله حيلبد على قلبنا 30 - 4- سنة كمان ...

أصل العيلة دي معمرة ...

وزي مانتم شايفين ... اللي بيقعد على الكرسي ...

ولا بالطبل البلدي ...

مبدئياً ... وحتى إشعار آخر ..

ولأننا نرفض نبدي آرائنا هنا .. حتى يمكن لنا أن نبدي رأينا في مكان آخر ....

فأنا أطالب بتنحي الرئيس مبارك في أسرع وقت ممكن ...

وأرفض تولي جمال مبارك الحكم من بعده .....

ولا لجمال مبارك ....

من الأعماق ....

[ابو يوسف]

فى البداية ... اود ان اقول انكم قد أوحشتمونى جميعاً ... و ما منعنى عنكم غير ضغط العمل ...

لى شوية تعليقات على هذا الموضوع ... اتمنى ان تتسع صدوركم لها ...

يبدو ان هذا الموضوع لن يقفل و لن ينتهى ... و لن يستطيع أحد اخماد النيران التى تحرق صدورنا و تنتقل بينها كالقش ..

حتى أصبح هذا الموضوع هو الموضوع الاكثر تشويقا فى أى مناقشة ... بدءُ من شلة العواطلية على قهوة اسماعيل فى الجيزة ... الى اجتماعات الناس الهاى فى سميراميس !!!

الكل رافض جمال ...

الكل يستنكر الطريقة الفجة التى يفرض بها علينا ..

الكل يرى ان النظام آيل للسقوط ...

ثم ماذا ؟؟

الا يدرى فخامة الرئيس و الذى يمتلك حنكة و خبرة سياسية تدرس فى الكليات العسكرية أن الشعب المصرى رافض توريث السلطة ؟؟؟

الا تصل اصوات المصريين ابداً الى كوبرى القبة ؟؟؟

انها اصوات مبحوحة .. تتلفت حولها خائفة . تقول الكلمة و تخفى العشرة .

انها اصوات لكلاب تعوى ... اما القافلة فتعرف طريقها جيداً ..

ثم يأتى سؤال ...

ذكرونا بيوماً اخترنا فيه حاكما و اجمعنا و اتفقنا عليه و التففنا حوله ... لنرفض جمال كل هذا الرفض ؟؟؟

الم يفرض كل حكامنا علينا ؟؟

الم ينبح قبلنا آباؤنا الشرفاء .. و لم غير النباح من الامر شيئاً !!!

من لديه حل فلبقل ... أثابه الله ...

و من ليس لديه غير الكلام .. فليصمت و كفانا كلام ..

أعزكم الله