اللهم اجعله خير

[se_ Elsyed]

من كام يوم كده شوفت عدد اعضاء المنتدى كان خلاص قرب على الالف ، صحيت من النوم النهاردة أبص ألقي خير اللهم اجعله خير العدد أتشفط وبقى 877 بس ...

فانا مستغرب جداً !!! وفى نفس الوقت باتخيل لو كل واحد من الاعضاء المسجلين شارك بموضوع ولو بسيط للمناقشة .. بالتأكيد سوف نكون نواة لمجتمع صغير سرعان ما سيكبر وستكون له قوة وسيمتلك أدوات لتغيير الواقع الذي نعيشة .

تحضرني هنا جملة لأخونا سكوربيون لما أبتدى يتجرأ ويشارك معانا ، فقال " أنا بقى لي فترة بأتفرج وماكنتش عايز أشارك لأني ماكنتش شايف نفسي عندي الفصاحة والقدرة على التعبير زي الأعضاء المشاركين ،" وشوية بقى من زباين المنتدى الدائمين وسحب من تحت رجلينا الكليم .

فيا اخواننا ياللي مسجلين وعندكم فرصة للمشاركة . أحنا مش فى أمتحان هاتخدوا فيه درجة وحشة لو كان أداءكم مش كويس !!!!

أنا عارف أن فيه ناس بتستمتع بقرأة المواضيع فقط .. لكن هذا ليس كافياً .. وكما قال ناظر المنتدى الأستاذ عادل أبو زيد نحن نريد " مواطنين لا متفرجين "

لكن أرجع أقول ده عيب فين من صغرنا .. أنهم ماعلموناش فى الأسرة والمدرسة على حد سواء حرية التعبير عن الرأي .. سواء كان مخالف أو متفق مع الآخرين ... لكن برضوا أنا غلس ولسه بأقول أنه طالما لسه عايشين يبقى فيه أمل للتغيير .

[farasha79]

فيا اخواننا ياللي مسجلين وعندكم فرصة للمشاركة . أحنا مش فى أمتحان هاتخدوا فيه درجة وحشة لو كان أداءكم مش كويس !!!!

مافيش سقوط و لا دور تاني :lol: و اللي يشارك له بسكلته 3 عجلات من سي السيد على ضمانتي :baaa:

[tiger1411]

.. بالتأكيد سوف نكون نواة لمجتمع صغير سرعان ما سيكبر وستكون له قوة وسيمتلك أدوات لتغيير الواقع الذي نعيشة . 

اشك ان ده ممكن يحصل وعندى احساس قوى ان ما يحدث هو حرث

فى البحر او قبض الريح

من يوافقنى هذا الراى؟؟؟؟؟؟؟؟

[se_ Elsyed]

.. بالتأكيد سوف نكون نواة لمجتمع صغير سرعان ما سيكبر وستكون له قوة وسيمتلك أدوات لتغيير الواقع الذي نعيشة . 

اشك ان ده ممكن يحصل وعندى احساس قوى ان ما يحدث هو حرث

فى البحر او قبض الريح

من يوافقنى هذا الراى؟؟؟؟؟؟؟؟

متشكرين يا عم تايجر ... تشكرات يا حاج وايت هارت ... يا أخواننا أحنا فى ميتم .

كن جميلاً ترى الوجود جميلاً

أومال فين التفاءول ؟ ده على كده أروح أخنق الواد عمر أبني الصغير علشان مايطلعش فى مجتمع مافيش منه امل وعلشان النفق ضلمه كحل .

أنا عن نفسي طالما بأتنفس طبيعي ومش متعلق لي جهاز التنفس الصناعي هافضل عندي أمل فى بكره وأمل فى التغيير .....

[إبن مصر]

صحيح انا عمر ما نظرتى ما تخيب..

قلى يا سى السيد ... هو عمر مرتبط ؟؟

علشان لو لا واحد زى ابنك انت ابوه انا اصيغ بنتى واجيبها لحد باب البيت عندك واجوزها لابنك واموت وانا مطمن عليها وعلى كل عيلتها...

روح يا شيخ ربنا يسترها معاك ويحقق مرادك..

اما عن الموضوع الذى قمت بفتحه.. فلقد اخذت الكلام من على فمى واراك مصيبا تماما ..

اين الجميع ؟؟؟ والا المواضيبع ما تحلوش الا لو كتبنا

قد ..

ممكن..

يجوز ..

( وش واحد .... والا بلاش )

[هشام عبد الوهاب]

كل فترة يتم حذف الأعضاء المسجلين ولم يرسلوا اى مداخلات.

[se_ Elsyed]

صحيح انا عمر ما نظرتى ما تخيب..

قلى يا سى السيد ... هو عمر مرتبط ؟؟

علشان لو لا واحد زى ابنك انت ابوه انا اصيغ بنتى واجيبها لحد باب البيت عندك واجوزها لابنك واموت وانا مطمن عليها وعلى كل عيلتها...

روح يا شيخ ربنا يسترها معاك ويحقق مرادك..

اما عن الموضوع الذى قمت بفتحه.. فلقد اخذت الكلام من على فمى واراك مصيبا تماما ..

اين الجميع ؟؟؟ والا المواضيبع ما تحلوش الا لو كتبنا 

قد ..

ممكن..

يجوز ..

( وش واحد .... والا بلاش )

يا عم داحنا يزيدنا شرف ... عمر بالصلاة عالنبي بيلعب فى سنتين ونص .. وفي كام واحده متكلمين عليه بس هو لسه بيفكر ، وحيث أن الواد طالع لأبوه فممكن يبدأ بأربعة على سنة الله ورسوله .. وأحنا عايزين أسم الله ععليها بشنطة هدومها .. كفاية نسبكم.

هشام كتب

كل فترة يتم حذف الأعضاء المسجلين ولم يرسلوا اى مداخلات.

ماحنا عارفين يا أتش .. بس حتى الـ 800 الباقيين الواحد نفسه

أن شالله نصهم يشاركوا ساعتها المنتدى كله هايبقى شعلة نشاط وأفكار.

[tiger1411]

الاخ سى السيد زعل لما خالفته فى الراى ورد على وعلى وايت هارت بسخريه واستهزاء مع انه هو اللى

قال فى مداخلته الاولى ((لكن أرجع أقول ده عيب فينا من صغرنا ..

أنهم ماعلموناش فى الأسرة والمدرسة على حد سواء حرية التعبير

عن الرأي .. سواء كان مخالف أو متفق مع الآخرين))

انا مش باقول كده لانى زعلت بالعكس لكن انا عايز الفت انتباه الاخوه

جميعا لحاجه وارجو محدش يزعل او ياخد الكلام بصفه شخصيه

المنتدى ده بقاله اكتر من سنتين وانا مشترك فيه من زمان(يوليو

2001) واشتركت قبله فى منتديات تانيه وبعد ما يقرب من 3سنوات

امضيت معظمها معكم هنا

ماهى النتيجه؟؟؟؟

انا اولا سعدت وتشرفت بمعرفتكم جميعا ولاانكر اننى استفدت كثيرا

جدا من اراء الجميع واسمتعت بالنقاش والحوار والقفشات الظريفه من

ناس دمها خفيف جدا

ولكن ليس هذا ما اتحدث عنه

لقد استفزنى قول سى السيد ((وستكون له قوة وسيمتلك أدوات

لتغيير الواقع الذي نعيشة))

ازاى؟؟؟؟؟

احنا عاملين فى معظم الوقت زى مانكون فى مكان ترفيه ودردشه

بنتكلم مع بعض ونسال عن بعض(احيانا)

ونهزر ونهرج........... ما باقولش ان ده غلط او مش مطلوب بالعكس ده

شىء مهم فى الحياه

لكن لو اقتصرنا عليه( واحنا بقالنا سنتين بالمنظر ده) يبقى ازاى

هنبقى قوة راى ونملك ادوات تغيير؟؟؟؟؟

اوضح اكتر وارجو مره تانيه محدش يزعل منى:

كتير بتتفتح موضوعات جاده ومهمه ويتم النقاش حولها وطرح افكار

جيده ......احنا كاعضاء نستفيد منها وانا شخصيا استفيد من اراء كثير

من الاخوه الافاضل المثقفين هنا

لكن فى النهايه هل نستطيع تكوين راى عام او التاثير فيه؟؟ هل

استطعنا او نستطيع مستقبلا بهذه الطريقه التاثير فى وتغيير طريقة

تفكير وتصرفات غيرنا خارج حدود هذا المكان؟؟؟؟

شىء اخر غالبا ما نفتقد طرق واسس الاختلاف الصحيحه ونتيجه لذلك

يبدا الموضوع جادا ثم يحدث شىء من الاتى:

اما ان يقلب تهريج والخروج بلا شىء او يقلب بخناق وبرضه الخروج بلا

شىء .....واما يظل يتوارى تحت سيل الموضوعات الجديده حتى

يموت وينسى وبرضه ....لاشىء

انا عندما قلت اننى اشك فى ان يحدث او يتمناه سى السيد لم اكن

متشائما وانما كنت واقعيا

المنتدى مكان جيد لتبادل الافكار والتثقيف والترويح والفكاهه محدش

قال لأ

لكن ان نصل لان نمتلك ادوات تغيير وتاثير وفعل فلا اظن

وارجو الا يزعل احد مره اخرى... هناك افه اخرى وهى ليست خاصه

بنا فقط ولكنها من خصائص مجتمعنا المصرى وهى الشلليه بمعنى:

راقب ما يحدث كما افعل انا( فاننى على الرغم من وجودى لما يقرب

من سنتين فان مداخلاتى قليله وذلك لاننى ممن قيل انهم يفضلون

القراءه والمتابعه عن الاشتراك فى الحوارات ) فاذا ما تابعت او راجعت

الموضوعات المختلفه ستجد عجبا:

وجود شلل معينه فى الحوارات بمعنى عضو معين لو كتب اى حرف

فى اى موضوع شخصى او عام لابد من توالى الردود والمداخلات عليه

من اعضاء معينيين يتسابقون فى المناقشه والتاييد بالحق والباطل.....

لازم لابد ان تتوالى المداخلات حتى لو كان الامر لايستدعى

((دردشه)) ليس الا....وارجع واقول ان هذا ليس مشكله حتى

لايفهمنى احد خطأ ولكن ان نصل لامتلاك ادوات للتأثير والتغيير بهذه

الطريقه فلا أظن

شىء اخر ويمت بصله لموضوع الشلليه وهو المجاملات فنحن شعب

مجامل بطبيعته ...ولذلك ما ان يكتب احد من شلة ما فى موضوع الا

وتنهال عليه ردود الاستحسان والمديح وياسلام ايه العظمه دى مع ان

الموضوع قد لايحتمل كل ذلك ولكن أهو مجاملات بقى والذى منه

انا لااقصد احدا بعينه ولا اريد ان يزعل منى احد واكيد كلامى ده

هيكون تقيل على ناس كتير وهيكون دمى اتقل عليهم لكن معلش

هى دى الحقيقه زى ما انا شايفها بدون تجميل ولا مجامله

ارجع لعدد الاعضاء واحصر المداومين على الكتابه وشوف نسبتهم

للمسجلين والباقى لا يكتب ليس لانه من النوع الذى يفضل القراءه

فقط.....انا واثق ان هناك الكثيرين يودون المشاركه ولكن اسلوبنا

لايشجعهم وهو ما حدث مع الاخ(اسف غير متذكر اسمه الان)الذى

ظل مترددا الى ان تشجع واشترك

هناك الكثير ممن يقراون المنتدى لايشاركون لان احساسهم انهم امام

شله مترابطه لن تسمح بسهوله بانضمام احد اليهم وسيكون

الاحساس بالتهميش والنبذ هو ما يواجهه حتى مع كلمات الترحيب

المصطنعه التى نقابله بها اول الامر.....

معلش يا جماعه انا حاسس انى تقلت عليكم فكفايه كده ولكن مره

اخيره باقول محدش يزعل منى او ياخذ الامر بمحمل شخصى وارجو

ممن قد يهتم بما قلت ان ينظر لما اثرته من موضوعات ويفكر فيها بحياد وموضوعيه قبل ان يرد

[se_ Elsyed]

تايجر كتب

الاخ سى السيد زعل لما خالفته فى الراى ورد على وعلى وايت هارت بسخريه واستهزاء

........ أنا أسف جداً أنك اخدت كلامي على أنه أستهزأ ... لكن أقسم بالله أن عمري فى حياتي ماستهزأت بإنسان مثلي .. وأبشع أحساس عندي هو لما أشعر أن اللى قدامي فهمني غلط أو خد كلامي على محمل تاني .

النقطة الأخرى ... لماذ يا أخي تقلل من شأن الفرد والجماعة فى التأثير على المجتمع ككل ، كلنا تعلمنا تاريخ وكلنا نعرف إن اللى غيروا وجه التاريخ وأقاموا حضارات ودول منها الكائن ومنها البائد هم الأفراد سواء أنبياء أو قادة أو سياسيين ،

إذا لماذ لا تكون أنت أو انا هذا الشخص ... وما الفرق بين غاندي أو صلاح الدين أو حتى جمال عبد الناصر وبيني ....؟!

يا أخي تصور لو المنتدى فيه 500 عضو فعال ومشارك وكلهم مؤمنين بفكرة تغيير مجتمعنا إلى الأفضل .. وكلهم بالتأكيد عندهم عائلات وأصدقاء وأقارب ممكن يأثروا فيهم وينقلوا لهم هذه الأفكار ، ألن تجد عننا مجتمع أو مجموعات اعدادها بالألاف ؟

- اما عن موضوع الشللية ... فأنا مختلف معك تماماً .. فأنا عن نفسي أنضميت للمنتدى بناء على دعوة صديقتي وأختي الكبيرة ست أمينة فى شهر نوفمبر 2002 وماكنتش أعرف أي حد هنا .. والحمد لله أظن أن فيه ألفه الأن بيني وبين جميع أعضاء المنتدى الذين لم أتشرف برؤية أي واحد فيهم .

أما موضوع المجاملات وخلافه فلا يوجد بالتأكيد .. وإن وجد هل يمكن أن تفسرلي سبب وجوده ، يعني مثلاً في ناس هنا بتدفع لحد علشان يشجعها أو يجاملها !!!!

لا تأخذ الأمور بحساسية أكثر من اللازم يا عم تايجر .. الحياة بسيطة وسهلة ومش ناقصة نعقدها .

[بنت شعنونة]

انا اؤيدك في كلامك يا سي السيد ( شعنونة هانم وكيلة شلة سي السيد)

لا بجد بقى..

انا بس عاوزا افهم منك ا تايجر

ايه التغيير اللي انت عاوزة بالضبط ينتج مننا اهل المنتدى للمجتمع؟

هل هوا تغيير اري؟

تغيير فعل؟

يعني فهمهولي من فضلك..؟

دي حاجا

الحاجا التانية ..

لو تلاحظ هتلاقي المنتدى ابتدي يتدرج في العلاقات..

ابتدينا اننا نتقابل مع بعض بجد

البال توك عشان نتكلم مع بعض

يعني بناخد خطوات نحو الفعلية.. صحيح هي بطيئة حبتين لكن احسن من مافيش

تغيير الراي

في اكتر من عضو في اكتر من موضوع سواء سياسي او عادي اعترف انه عضو اخر صححله مفهومه او غيره او على الأقل خلاه يفكر من زاوية ماكانش شايفها قبل كدا.... (اهوا دا نوع من التغيير برضه حتى ولو كان صغير جدا)

تغيير...

في ناس عايشة برا مصر كانوا مرعوبين من مصر.. من كلام ناس كتير هنا ابتدوا ياخدوا فكرة عن حقيقة الواقع بحلوة وبمره.. مش مرعععب زي ماكانوا متخيلين او يكوز مرعب بدرجة اقل او درجة اكتر..حسب (يرضه تغيير)

تغيير فعلي...

المنتدى هنا كان سبب في عمل عملية لطفل صغير ومازال سبب في علاجه هو وطفل اخر (تغيير مادي وفعلي ستحالة يطلع من اي منتدى كان)

تغيير..

اقتباس يعض عنواين للموضعات هنا من يعض الصحفيين ونشرها ونسبها لنفسهم زي ما حصل...تغيير

اعلان الوفد عن عدم مسؤوليتها عن هذا المنتدى وقت الموضوع اياه

اثبات قاطع على ان المنتدى له ثقل فعلا و "ممكن" يعمل التغيير اللي انت بتدور عليه دا

كل دي مش دلائل؟

[تصحيح]

الاخوة الافاضل

سأتكلم من خلال تفريعة صغيرة من موضوعكم الهام

لماذا نتكلم علي صفحات المنتدي ؟

فضفضة في بعض الاحيان .. ربما

سؤال عن معلومة .. ربما

بحث عن مشاركين في حلم .. ربما

تبادل معلومات او غذاء فكري .. ربما

بحث عن أمل ضال في بحر الخيال .. ربما

..... .... النتيجة في النهاية ارتقاء بالوعي

ثانيا كيف يتم التغيير

قراءة التاريخ تقودنا الي حقيقة أن التغيير لابد ان يسبقه ثورة في الوعي

الوعي بالحقوق

الوعي بالواجبات

الوعي بكيفية التغير

و ما نفعله بالمنتدي سواء اتفقنا أو اختلفنا هو تبادل لبعض الوعي

tiger1411 قال:

لقد استفزنى قول سى السيد ((وستكون له قوة وسيمتلك أدوات 

لتغيير الواقع الذي نعيشة)) 

ازاى؟؟؟؟؟

عزيزي تايجر كيف يكون التغيير

مراحل أو محطات يتكون بعد المرور عليها قوة التأثير في الرأي العام ( راجع تاريخ الثورات )

الاخت شعنونة .. اتفق معك

و بالاضافة للكتابة علي المنتدي هناك لقاء اسبوعي كل يوم خميس علي البال توك و هو ايضا محطة لتبادل الأفكار و التقريب بين اعضاء المنتدي

و شكرا

[kokowawa1979]

فراشة كتبت :

فيا اخواننا ياللي مسجلين وعندكم فرصة للمشاركة . أحنا مش فى أمتحان هاتخدوا فيه درجة وحشة لو كان أداءكم مش كويس !!!!

يمكن البعض خايف يشارك لايكون بيحسب ان احنا مسجلين خطر في ملفات أمن الدولة

[se_ Elsyed]

فراشة كتبت : 

فيا اخواننا ياللي مسجلين وعندكم فرصة للمشاركة . أحنا مش فى أمتحان هاتخدوا فيه درجة وحشة لو كان أداءكم مش كويس !!!!

يمكن البعض خايف يشارك لايكون بيحسب ان احنا مسجلين خطر في ملفات أمن الدولة

لأ معليش بأه يا كوكو انا اللي كتبت الجملة اللى فوق دي مش فراشة .

مع تحيات / س س رئيس لجنة المصححين.

[Spider]

لاغى حتى لا يتشعب الحوار للتنكيت

[Scorpion]

شفتم بقي... اهي حتقلب تنكيت...

[tiger1411]

الاخوه الافاضل

اشكر كل من تفضل بالرد واحترم وجهات نظر الجميع

باختصار انا لم اطلب ثوره ولا اجراءات للتغيير

كل ما تساءلت عنه هو كيف سوف نمتلك ادوات التغيير هذه

بهذا الاسلوب الذى هو اقرب ما يكون لجلسات السمر والدردشه؟؟؟

ولم انتقد احدا بل اشرت اكثر من مره ان هذا مطلوب فى الحياه

ومفيد وكلنا-وانا اولكم- استفيد من افكار وحوارات جميع الاخوه الافاضل

من ناحية التغيير اكيد بيحدث تغيير على المستوى "الشخصى"لبعض

الاعضاء مثل ما اشارت الاخت شعنونه

ولكن لاحظوا ان الكلام كان عن امتلاك ادوات واحداث تغيير فى

المجتمع كله

تحياتى للجميع

[Set_Amina]

أنا من المستفيدين في هذا المنتدى من تصحيح أو بمعنى أدق توضيح صورة الحياة في مصر والتي ابتعد عنها من عشرات السنين ولو دققت كثيرا في الاستفادة الأخرى فأقول احتمال كبير ان التعرف على الشخصيات المتعددة من خلال طريقة حوارها قد أثرتني فعلا واضافت الكثير الى شخصيتي.

اعترف اني تحولت بعض الشيء من شخصية رومانسية بحتة الى انسانة تنظر الى حد ما بعيدا بعض الشيء عن تحت القدم وذلك من خلال الانصهار الفكري بين الاعضاء احيانا وحتى في تعارضهم واختلاف وجهات نظرهم تجدني استفيد.

قد أكون من العضوات غير الفاعلات ولكن تواجدي القليل واشتراكي القليل أيضا يكفيني في احساسي بالتواجد ويصحي بداخلي احساس الترابط مع كل ما هو مصري من خلالكم.

[Salwa]

الاخtiger 1411 الفاضل .

ولا انسى باقى الاخوة والاخوات الافاضل .

مجاملة برضه علشان متزعلش .

اعتقد اننا اتكلمنا فى الموضوع ده قبل كدة ......بصراحة المنتدى اصبح بالنسبة لى شىء اساسى ....ومن ضرورات الحياة ....

لازم تصلى ....لازم تأكل .......لازم تاخد دش .....لازم تشتغل ....لازم تقرأ ...لازم تكتب ......لازم تحب ....لازم تتخانق ....لازم تضحك ....لازم تبكى ...

لازم تدخل المنتدى .....لازم تقرأ لكل اخوانك ....لازم تعارض ...لازم تؤيد .....

تضع بصمة ....

تقول كلمة .....رأى.....تشيل اليد التى كانت تكمم الافواه .

تفرح لفرح ناس تعرفهم ....وماتعرفهمش .

تزعل لزعل ناس برضه تعرفهم وما تعرفهمش.

تحس انك ....حر ........ودى حاجة جميلة جدا جدا ..

انا شخصيا استفدت كتير من ناس كتير .....

اللى بتفق وبختلف معهم ..............بحترمهم ...

ناس كتير وحشونى ...اختفوا ....او ...قللوا من دخول المنتدى .

اعذرهم لانى ايضا وقتى ليس ملكى واحتاج ان يزيد اليوم ويبقى 36 ساعة .

وعند مشكلة غلق المنتدى قامت الدنيا ولم تقعد ...بالنسبة لنا .

وصدقونى.

وراجعوا ردى فى اليوم ده ...

الدنيا كلها لما رجع المنتدى .......كانت بتضحك ....يبقى ده شىء يسعد نفسيا ...انك تلاقى نفسك مع ناس بيفكروا زيك ويتكلموا نفس لغتك .......

كنتم فين من زمان.

الحق على بيل جيتس .

سلامى .

[tiger1411]

الاختان الفاضلتان العزيزتان الست امينه والست سلوى

تحياتى

اتفق معكما وردى الاخير لم يخرج عن معنى ما اردتما قوله

وما كنت اخشاه واشرت له اكثر من مره ان يفهم كلامى بغير ما اقصد ويبدو اننى لااجيد التعبير عما اريد قوله انا قلت ان المنتدى مكان جميل للتعارف والحوار وتبادل الاراء والدردشه بما يشبه النادى الاجتماعى ولكن ليس هذا هو طريق امتلاك ادوات تغيير وتأثير فى المجتمع (واضع تحت المجتمع خطين)

اظن ان هذا لاينقص من قدر ومكانة هذا المنتدى فى انفسنا جميعا وانا فى المقدمه منكم ولا يعنى انه دوره غير مهم او غير مطلوب فقد اشرت الى اهمية وجود المنتدى بالنسبة لمعظم المشاركين فيه ولكنى اردت القول بمحدودية تاثيره على من هم خارجه

تحياتى لكما وللجميع واعتذر عن اى الم او سوء فهم سببته لاى اخ او اخت

والسلام

[White heart]

tiger1411 كتب:

اعتذر عن اى الم او سوء فهم سببته لاى اخ او اخت

يا عزيزى لا داعى للأعتذار، فأنت محق فى معظم ما قلته و انا أتفق معك... و مع ملاحظتك و فى النهايه هذا رأيك...

فشكرا لك..