الحقوني بسرررررعة...

[kokowawa1979]

الدكتورة شعنونة كتبت :

واتفقنا اننا نديلة فرصة لو طلع فعلا راجل محترم زي ما هوا مبين كدا  

يبقى انا موافقة على ال 3000 دي و الكفاح معاه مدام راجل وها يصوني

ا

لقرار الأخير  

فرررررررررككككككككككككششششششششششش

إيه اللي جرى يابنت الحلال فجأة وخللاك تاخدي القرار ده بسرعة ؟

عموما ياأخت شعنونة انت انسانة ممتازة من مجاميعه وتستاهلى كل خير وصدقيني من كل قلبي باقول يابخته وياهناه اللي هيكون عريس المستقبل

[abofasad]

اعتقد يا دكتورة شانا ان الراجل ده من النوع الحويط جدا

لأنه كونه يقولك ان دخله 1500 جنيه شهريا وانتي بتقولي انه عنده مصنع وانه عنده شغل الصبح .. فأنا بقولك ان دخله لا يقل عن 15000 جنيه وليس 1500 حتى لا تطمعين انتي فيه، وده السبب انه في اول زيارة ماكانش حاطط بارفان وان جزمته معفنة.. دي كلها اساليب بيمتحن فيها العروسة. وبعدين لما يحصل اتفاق يقولها عن المستخبي وانه عنده عربية مرسيدس وانه دخله كبير جدا وعلشان كده مش عاوز واحدة بخيلة.

انصحك التريث .. واعطائه ليس فرصة واحدة بل فرص كثيرة لأن دي عشرة عمر مش لعب عيال.

وطبعا والدك العزيز (حفظه الله ورعاه) حيكون اقدر واحد على مصلحة بنته اللي هي انتي.

مع تمنياتي لك بمستقبل سعيد

وزوج يهنيكي ويدخل البهجة والسرور الى حياتك

Hasta luego

[بنت شعنونة]

ابو فصااااااد

حمدلله ع السلالالالالالامة

فينك مختفي؟

حمدالله على السلامة تاني

موضوع بقى انه مدكن وبتاع

لالالالالالالالالالا هوا فعلا على الحمييييييييد المجيد

انما كل اللي يتقابل معاه يطلع بكلمة واحدا

ايه رايك فيه يا عم

ما اعرفش!!!!!!!!

كله بيقول ما اعرفش؟؟

لا باين منه هل هوا فعلا بجد ككويس والا بيمثل؟؟

استاذ كوكو انت بتسال عن سبب الفركشة

تصدقني؟

والله العظيم

ما اعرفش

انا قررت كدا بدون سبب محدد "وش تايه بجد"

بس تعرفوا

اخر مرة كلمني قال نفسسسسسسسسس الكلام اللي عمي الطفشان قاله!!!!!!!

انه كل ما يتقدم لواحدة اول خاجا يسالوه عن فلوسه وعربيته وشقته ومش مهم اي حاجا تانية

اخلاقه او دينه كل دا بعد ما يطمنوا على ماديته

ف افتكرت كلامنا هنا

وقالي اني دخلت دماغه لمجرد انه لما سالني بتتمني ايه في جوزك

قلتله انه يكون انساااااان وبس

!!!!!!!!!!!! "وش لسا تايه برضه"

المهم اني رديت عليه وقلتله

انت متقدم جوازة صالونات يعني الناس ما تعرفكش

فلازم اول حاجا يسالوا عن مادياتك عشان ما يضيعوش وقتك ووقتهم

فرضا اتعلقت انت والبنت مع بعض وبعدين مادياتك ما نفعتش يبقى الحل ايه؟؟

وان الأهل لو هما كويسين بيكونوا عارفين قدرة تحمل بنتهم كويسسسسس اكتر منها هيا نفسها.. اللي بتكون الجلالة واخداها وتفضل تقولك بحبه يا بابا وها استحمل

وتتجوز ويعدي اول شهر و التاني و التالت وهيا بتقاوح

بعد كدا تروح تستلف من اهلها شهرين

بعد كدا تقول لجوزها اتصرف

بعدها بشهرين تتطلق!!!!!

يبقى ليه دا كله

ما من الأول احسن

المهم انه عجبي منطقي جدا واحترمه!! "وش لسااااااا تاااااااايه"

اللي قلقني كمان مرة

انه حاكالي على البناااااااااااات اللي اتقدملهم وانه "ساااااابهم" عشان كل همهم المادة ها نسكن فين ونعيش ازاي (مستغربة جدا من الكلام دا لآني حاسا انه عادي)

وانه كذا بنت من اللي اتقدملهم صالونات كانوا شاريينه جدا بس هوا سابهم!!!!!!! ( اسلوب بكرهه عمى في الكلام)

وقالي

انه لما جه بشوفني ..

(هوا كان شاف صورة ليا قبل ما يجيلي )

انه لما شافها انا ما عجبتوش!!!!!!

بس قال يالله بقى اهو اي حاجا والسلام!!!!!!! (دا كلامه بالحرف)

"وش قرفان من نفسه جدا"

كل اللي اتقدملهم قبل كدا كلللللللللللللللللهم طبيبات بشري

وكللللللللهم نواب او من استاف الجامعه

حد يفهمني اي حاجا؟؟؟؟؟؟!!!!!!!! "وش بيفكر يعيد امجاده وينتحرررررر"

[se_ Elsyed]

شوفي يا شعنونة .. أنا كتبت رد واحد بس فى الموضوع المهم ده .. لكن طول الوقت كنت مجعمز ولابد فى الدره علشان أعمل هجوم مفاجيء عليكي لأني كنت حاسس أنك انت اللى عايزه تطفشي الراجل ده من الأول ( مش عارف ده أحساس شخصي )

لكن بعد الكلمتين دول

وقالي

انه لما جه بشوفني ..

(هوا كان شاف صورة ليا قبل ما يجيلي  )

انه لما شافها انا ما عجبتوش!!!!!!

بس قال يالله بقى اهو اي حاجا والسلام!!!!!!! (دا كلامه بالحرف)

"

باحمد ربنا أنه مشي من نفسه وأنك ماستعملتيش معاه أسلوب صفيحة الجاز .. أو أنك تتركبي عربيتك وتطلعي على الخامس وتشيلي عربيته من عالأرض وهو جواها .

وانا مستغرب من الجليطه اللى موجوده عند بعض الناس وتجعلهم يتلفظوا بكلام زي ده ... وللدرجة دي بقى الجواز مثله مثل شراء أي قطعة أثاث ماتفرقش خشب زان أو أسطنبولي ...

على العموم " وعسى أن تكرهوا شيء وهو خير لكم "

كلنا مرينا بالتجارب دي وممكن الواحد يكون متأثر شويه بعدها لكن لما بييجي النصيب الواحد بيحمد ربنا الف مره أن حصل كده قبل التورط فى أي خطوات متقدمة مثل كتب الكتاب أو الزواج لفترة بسيطة.

[Salwa]

شنشن حبيبة قلبى .

فى اى موضوع لازم تدعى وتقولىيارب ان كان خير قربه منى وان كان شر ابعده عنى .

وياابنتى لاتكرهوا شيئا وهو خير لكم ..

انا بس سمعت منك ....وبناء على كلامك شعرت ان هذا الشخص لا يصلح .....

خصوصا مفيش حاجة تجبرك عليه ....

مش لقطة يعنى زى ما بيقولوا ...وبيستغل الدين ../ودى مصيبة /.

مفيش معرفة قبل كدة حانقول شعرتى ....بشرارة ....زى العزيز...حشيش.

وانا مع اخونا ابو الفصاد ان ده اكيد بيكسب اكتر من كده ...ده اللى عنده مصنع غطاء للزجاجات ...بيكسب .

كلمة مصنع فى حد ذاتها ..معناها انه عايش / مستور /مش 1500.

وحكاية خطيباته السابقات ...ده مؤشر خطير جدا ...يعنى بنات الناس لعبة؟؟

يدخل البيت شهرين تلاتة اربعة ...وبعدين ...هو انا اعرفكم؟؟

ويبدأ يتكلم على الناس ....؟؟؟؟

ربنا فى بيتكم يا ابنتى ....وبكرة تشوفى ...؟

نصيبك كل خير.

سلامى.

[عادل أبوزيد]

الفاضلة شعنونة

ترددت كثيرا قبل ان اكتب لكى

اهم شئء فى الزواج سواء اولاد او بنات هو السؤال عن الطرف الآخر اتفق معك انه ليس بالأمر السهل و لكنه ضرورى و حيوى و خاصة بعد ان اختلط الحابل بالنابل بمعنى غياب اى مؤشرات واضحة تبين اصل الشخص و اخلاقياته.

و بالنسبة ل "ولاد الناس " فمشكلتهم انهم لا يتصورون حجم المخاطر التى قد يتعرضون لها لو لم يسألوا و يستقصوا الى اقصى حد

و لعلنى انصحك ايضا فى حالة اللقاء مع اى خطيب محتمل ان تدفعيله للحديث عن اهله و اسرته و اقاربه و من هذا الحديث تستشفين الكثير عنه

اما مسالة المهر و الشبكة فاحسن شئ ان تسترشدى بزيجات الأقارب من نفس الوسط

تحياتى و امنياتى

[Falcon Egypt]

السلام عليكم ورحمه الله وبركاته

وقالي  

انه لما جه بشوفني ..  

(هوا كان شاف صورة ليا قبل ما يجيلي )  

انه لما شافها انا ما عجبتوش!!!!!!  

بس قال يالله بقى اهو اي حاجا والسلام!!!!!!! (دا كلامه بالحرف)  

عزيزتى شعنونه

بعد ان قراْت هذه الجمل, انتابتنى حاله من الغضب , يعنى حتى لو كان هذا احساسه فما كان ينبغى ان يصرح لك بهذا. هذه فعلا جليطه ليس لها محل من الاعراب. وانا متفق مع كلام اخونا س.س

وعسى ان تكرهوا شيئا وهو خير لكم . لايوجد مايرغمك عليه وهو اخذ

فرصته وسقط فى امتحان الملحق وحتى لاتوْ نبى نفسك وتقولى ياريتنىكنت استنيت شويه.

الحمدلله على كل حال.

الاستاذ عادل ابو زيد كتب:

اما مسالة المهر و الشبكة فاحسن شئ ان تسترشدى بزيجات الأقارب من نفس الوسط  

مش عارف بعد اذن سعادتك . اعتقد ان كل زيجه لها ظروفها الخاصة حتى

اذا كانت من نفس الوسط.

[الطفشان]

اهم شئء فى الزواج سواء اولاد او بنات هو السؤال عن الطرف الآخر اتفق معك انه ليس بالأمر السهل و لكنه ضرورى و حيوى و خاصة بعد ان اختلط الحابل بالنابل بمعنى غياب اى مؤشرات واضحة تبين اصل الشخص و اخلاقياته.  

و بالنسبة ل "ولاد الناس " فمشكلتهم انهم لا يتصورون حجم المخاطر التى قد يتعرضون لها لو لم يسألوا و يستقصوا الى اقصى حد

اؤيدك 1000000%

و خاصة بعد القصص التي ساقتها لنا شعنونة نفسها عن شاب مستهتر عنده شقة و اهله في الخليج، و يتقدم الى بنات الناس و يخطبهن و يحاول الايقاع بهم

و هذا و ان كان استثناء، فهناك ستين سبب و سبب للسؤال عن الشخص (ماديات، مدى صدقه، طباعه، سيرته، الخ)

وقالي  

انه لما جه بشوفني ..  

(هوا كان شاف صورة ليا قبل ما يجيلي )  

انه لما شافها انا ما عجبتوش!!!!!!  

بس قال يالله بقى اهو اي حاجا والسلام!!!!!!! (دا كلامه بالحرف)

هذه ممكن ان افسرها انا على انه شخص "على سجيته" و "مدب"

و هذا و ان كان يسبب النفور لدى الاكثرية، فعموما هذه الشخصية معناها انها طيبة جدا، و اللي في قلبها على لسانها

[Katamando]

بما أنه شاف الصورة ومعاجبتهوش طب عصر لمونه على نفسه وجاي يتقدم ويجيب لنفسه شريكة حياة بالشكل اللي هو مش عاجبه تفضل لازقة فيه طول حياته ليه هو المصنع بتاعة ده كان مصنع لموناته يفضل يعصر لمون عليه كل يوم ..... أيه الناس اللي مخها فاصل دي؟؟؟؟

وبعدين يقول أنه اتقدم لبنات كتير قبل كده وكلهم كانوا مايتيين في التراب اللي بيمشي عليه وهو اللي رفضهم بإباء ةشمم لما عرف نواياهم المغرضة في حق انتقاء السكن وخلافه ......أممممم؟؟ طيب سؤال هل الأخ ده عندهم مرايات كتير في البيت ولا حاجة يعني ممكن يكون وجود المرايات الكتير في البيت سبب في الأصابة بالأعجاب بالنفس لدرجة ألعن من كده وأسألوا د/أبو حلاوه

وواضح جدا أنه عنده عقدة طبقية دراسية الظاهر أنه كان نفسه يدخل كلية الطب ولم يتمكن لسبب أو لآخر . وده اللي خلاه يتقدم بس لبنات أطباء وحتى ذوي الدرجات العلمية العالية منهم !!!!!!؟؟؟؟؟

كل ده وعايز ما يدفعش مهر ويجيب شبكة ب3000 جنيه يعني بحسبة بسيطه تقريبا 50 جرام ...... يا ولد يا فاييييييييييس والمصنع والشغل ..... وكل ده وأنا بأدور على الأخلاق

لا موأخذة ده بيدور على واحدة تصرف عليه وعلى المصنع

مش كده ولا ايه؟

[بنت شعنونة]

سلام عليكم..

لآول مرة ابقى مش عارفا اكتب ايه او اقول ايه

ولآول مرة احس بمرارة حياتي وظروفي فعلا

قرار الفركشة انا خدته بيني وبين نفسي ولم اخبر به اهلي الا امبارح بالليل بعد المكالمة دي... اسمعوا كان بيقول ايه واحكموا مين فينا الغلط؟

-انتي بتقضي وقتك ازاي؟

- لو ما ورياش حاجا بكون ع النت لآني بحب القراية جدا فبدل ما اشتري كتاب ادخل النت واقرى في كل حاجا..

- اسالك سؤال؟ انتي بتعملي شات؟؟!!

- دا كان زماااااااان اول مادخلت النت خالص.. دلوقتي كبرت ع الكلام دا وبدحل منتديات فقط

- اااه!! اصلي كنت ها ازعل جدا لو كنتي بتعملي شات و مع صبيان خصوصا "لهجة غاضبة"

- ليه؟ هوا انا كنت بعمل حاجا حرام؟

- "بقرف" ماعلينا.. انا فيا حب التملك.. صحيح موضوعنا ما ابتداش لسا.. انما عشان تكوني عارفا بس

-!!!

- انتي مالك واخدا الدنيا ببساطة كدا ليه؟

- يعني ايه!!؟؟

- يعني انا حاسس انك مش شايلة هم للدنيا خالص وعمالة تضحكي على طول!! عكس اول مرة شفتك فيها... انا كنت فاكرك عاقلة.. بس ما طلعتيش عاقلة خالص!!

- كل دا عشان بضحك وبهزر؟؟ ...حضرتك اول مرة شفتني شفت الأنسانة العاقلة مني.. وانا الحمدلله عقل يوزن بلد... بس لما يكون الموقف يستدعي اني اكون عاقلة.. لو ما يستدعيش يبقى اعيش حياتي بالشكل اللي يريحني وانا سعيدة وراضية.. ممكن تقول عليا مش عاقلة لو فيه موقف لازم اكون عاقلة فيه وانا اتصرفت بهبل...ودا ما حصلش الحمدلله

-انتي بتفكري في الجواز اصلا؟

- ما اعرفش والله!!

- اصل انا حاسس انك واخدا الموضوع اي كلام.. يعني اهو واحد والسلام جت جت ماجاتش يبقى احسن وياريت ما تجيش كمان

- ليه كدا؟

- يعني اصله البناااااااات لما بيجوا يفكروا في الجواز بيفكروا في الشقة والحياة وكدا يعني

-!!!!!! اولا حضرتك انا بكلمك دلوقتي عقل لعقل وروح لروح عشان اعرفك انت شخصيا.. وبعدين سامحني مهما قلت عن نفسك انا مش ها اصدقك لآن الرجال مواقف مش كلام بس!! وبعدين يا ابن الناس ما لما البنات فكروا معاك في الشقة و الجهاز وهانسكن فين وبتاع خفت وكشيت!!!

- لالالالالا انا ما كشيتش!!!

- بلاش .. نقول اتخنقت وسيبتها!!! هوا حضرتك عاوز ايه بالضبط؟؟

- ما علينا سيبيها للأيام...

- انتي عاوزة تتجوزي امتى؟

- مش قبل سنتين

- يلهووووووووي؟؟ ليه!!!!

- عشان اكون مستعدة نفسيا اني اكون زوجة!!

- لالا دي سيبيها لله والله انتي لو حبيتي حد ها تتمني تتجوزيه النهاردا قبل بكرا..

- اتفق معاك فعلا

- طب والخلفة؟

- مش قبل 5 سنين جواز

- يانهار اسود؟ ليييييه؟؟

- انا متحملة مسؤولية طوووووووول عمري.. كتير عليا اني اعيش لنفسي 5 سنين بدون مسؤولية حد في رقبتي؟؟

- انتي بتحبي الأطفال؟

- الحمدلله.. بس مش مستعدة اشيل مسؤوليتهم

- كل البنات بتقول كدا في الأول

- انت بتحب الأطفال؟؟ ( لما بابا ساله قاله جدا يا عمي.. ولما احنا كنا شفنا تصرفه مع اخويا النونو قلنا بيكرههم جدا فاكرين..اسمعوا الرد بقى)

- لجل الحق.. لا والله

-؟؟؟؟!!!!! امال عاوز تخلف ليه؟

- عشان نلحق نربيه واهو حاجا نلعب بيها

-!!!!! يعني انت عاوزني اخلف من تاني سنة جواز وانت كاره الأطفال !!

- ما علينا نتكلم في الموضوع دا بعدين

- ما تعرفيش نكته؟

- لا والله..ليه؟

- عشان نطري القعدة

-!!!!!!!!!

- اصل انا حاسك مش زي البنات يعني. واخدا الموضوع ضحك على طول؟!

- لو حضرتك عاوزني اسبلك بقى و اوشوشك واحنا بنتكلم واعمل فيها فاتنة السينما المصرية.. انا اسفة ما اعرفش اكون الا نفسي

- طيب يا طفلة..

وانتهت المكالمة

ومن ساعتها للحظة اللي بكتبلكم فيها دي وانا ما بطلتش عياط ثانية واحدا

كان نفسي اكون بنت تافهه عشان اعجب

كان نفسي ما كنش اتحملت مسؤولية عشان يكون لييا احلام زي البنات

كان نفسي ماما تكون عايشة عشان تقولي ازااااااي ابقى بنت

كان نفسي الزمن يكون غير الزمن عشان ما ابقاش نص راجل ونص طفلة هبلة

انا بكره نفسي جدا جدا جدا

بكرهها من كل قلبي

من امبارح لدلوقتي بفكر اولع في نفسي ازاي

انتحر؟؟ ااذي نفسي؟؟ اعيط بس..

انا تعبت مني وتعبت من جوازات الصالونات دي اللي زادتن عقد على عقدي

انا تعببببببببببببببت فعلا "وش يبكيييييييييييي"

[Katamando]

ياااه دا أحنا في عصر السرعة فعلاً

بسرعة كده فرقع والله كويس وعموماً النتيجة متوقعة ويرجى مراجعة جميع المداخلات السابقة من كافة الأعضاء و الأصدقاء ..... حتلاقي كل الناس بتقول لأ ولا كأنهم في استفتاء سياسي

المهم انت بتعيطي على ايه ؟....و ليه؟

أنت ماعملتيش حاجة غلط بالعكس انت كنت الصح وهو وجوده لم يكن في محله خلاص أعتبري انك كنتي ماشية في الشارع بالعربية ودخلتي شارع زحمة جدا بالعربية ورحتي مدوره وراجعة.... بس كده مش أكتر

وبلاش انتهاج سياسة جلد الذات ومعاقبة النفس على أخطاء لم ترتكب

استعيني بالله

[kokowawa1979]

زي ماقلت لك ياشنشن في أول مداخلة لي في هذا الموضوع ابعدي عن الشر وغني له

والحمد لله انه ظهر على حقيقته من خلال المكالمة التليفونية

-

انت بتحب الأطفال؟؟ ( لما بابا ساله قاله جدا يا عمي.. ولما احنا كنا شفنا تصرفه مع اخويا النونو قلنا بيكرههم جدا فاكرين..اسمعوا الرد بقى) 

- لجل الحق.. لا والله 

-؟؟؟؟!!!!! امال عاوز تخلف ليه؟ 

- عشان نلحق نربيه واهو حاجا نلعب بيها 

-!!!!! يعني انت عاوزني اخلف من تاني سنة جواز وانت كاره الأطفال !! 

- ما علينا نتكلم في الموضوع دا بعدين

يعني انسان كداب ومنافق قدام الوالد بوش وقدامك بوش تاني

واحد شايف الخلفة عبارة عن حاجة نلعب بيها يعني حضرته متخلف عقليا فعلا

وصدقيني يا دكتورة ربنا بعتلك المكالمة التليفونية دي نجدة من السما علشان ماتقوليش أفكر !!!

انت بنت حلال فعلا وطيبه جدا وماتستهليش انك كنت تعيشي مع شخص انتهازي ومنافق زي ده كل همه انه يقول لأصحابه انه اتجوز دكتورة بشرية ( خاصة وأن كل من تقدم لهم طبيبات بشريات ) يعني لم يفكر بالتقدم لحملة بكالريوس تجارة مثله أو أي مؤهل آخر بما يؤكد أنه عقدة نفسية صدقيني والحمد لله إن ربنا نجدك منه يابنت الحلال

صلي لله ركعتي شكر

[moody00x]

أنا عمرى ما شفت حد بيعامل نفسه بالقسوة دى زيك...

فييييييييه اييييييه؟

واحد ..اتنين...عشرين إتقدمو لك وكلهم لا يصلحو...ايه المشكلة؟؟؟

بصى أنا هاجبلك من ألآخر حتى لو الكلام هيوجع بس بعد العشرةدى أقدر أقولك

3 حاجات

1ـ قربى من ربنا قوى ...العبادات والقرآن والصلاة بخشوع والذكر والدعاء كل ده

على ألأقل هايديكى السلام مع نفسك

2ـ ـ ثقتك فى نفسك وفى أنوثتك وفى عقلك وفى مشاعرك لازم تزيد لأنها حاليآ

صفففففر فى ال 100 وده السبب الرئيسى للمشكلة...بدل اللى كتبتيه فى

آخر كلامك ليه متقوليش لنفسك إنك إنسانة عظيمة وقوية فعلآ...أى واحدة مكانى كانت ممكن تكون تافهة وشخصيتها ضايعة والمبررات موجودة وهى الظروف المحيطة والمسئولية المبكرة...لكن أنا وقفت وقاومت وعملت شخصيتى

زى ما أنا عايزة...

3ـ بكل صراحة ووضوح إنتى محتاجة راجل...راجل يحتويكى..راجل فعلآ وقولآ...

لكن كل النماذج اللى عدت عليكى..كانوا شخصيات غير متوافقة تمامآ معاكى

وألأخير ده واضح إنه بيتكلم لغة تانية مختلفة تمامآ عن لغتك...الحقيقة الموضوع

مش كونه مدب ولا بيحدف الكلام لأ...الموضوع أكبر من كده...

كل كلامه استفزنى فعلآ...هل معظم الشباب دلوقتى بيتكلم كده؟

مش بيحسس على كلامه قبل ما يقوله علشان مايجرحش اللى قدامه؟

أكيد فيه ناس راقية فى كلامها واختيار كل كلمة وهو ده رقى الشخصية..

ربنامعاكى ومع نفسك اللى إنتى بتقسى عليها أكتر من الظروف وألآخرين

[Cleo]

أنا مش قادرة اتخيل إنك فعلا زعلانة من كلام مخلوق زى ده...!!!

واحد : البنى أدم اللى مايحبش الأطفال يبقى قاسى... ما يتعاشرش...

اتنين : واحد مش عارف هو عايز إيه و بيحاول يعمل نفسه شخصية و هو أتفه من التفاهة... يقوللك انتى على طول بتضحكى ليه و لما تتكلمى جد يقوللك قوليلى نكتة...!!!!

تلاتة : طبعا أنا مش قادرة أنسى حكاية بخيلة دى و الانطباع اللى سابته عندى من إنه عاوز واحدة على رأى كتامندو تصرف عليه و على أعماله....

بقى واحد زى ده تعملى لكلامه أى حساب...!!!!!!!!!!!!!!!!!!!!!!!!!!!!

اعقلى يا بنتى و راجعى نفسك..... ده انتى رفضك ليه ده أقل واجب..

و بعدين أؤكدلك إنه رغم كل اعتراضاته عليكى و محاولاته غنه يوجد فيكى عيوب عشان يغطى عيوب نفسه أو يعمل فيها شخصية.... لو كنتى مشيتى الموضوع من ناحيتك كان هايكمل معاكى لحد الأخر... لأنه معندوش أصلا مبدأ يعترض على عدم وجوده أو يطالب بوجوده... يعنى كل اللى قاله عنك ده كلام فى الهوا....

إففففففففف.......... أعوذ بالله...!!!!!!!!

[se_ Elsyed]

أنا هاكتب الرد ده علشان أوجه لك اللوم يا شعنونة مش علشان اطبطب عليكي أو أواسيكي ...

وهالومك لأنك معقده الامور وبتتصرفي عكس طبيعتك .. لأنك من الشخصيات اللى واخده الحياة ببساطة زي ما قال المأسوف عليه لأن فعلاً ده بيبان من كلامك وده مش عيب على الأطلاق ( ياريت الواحد يعرف يعمل كده ) ... فليه بأه فى بعض الأمور تكلكعيها وتعيطي وتعملي حكايات بدل ما تحمدي ربنا أنه نجاكي من أنسان متبلد الأحاسيس ومستفز ولا يصلح إلا أنه يتجوز آله أو سيارة نيفا زي اللى معاه علشان تستحمله .

عقلي بيقولي : الحمد لله إني مش بنت علشان لو كنت سمعت كلمتين زي دول فى مكالمة كنت لفيت حبل التليفون حولين رقبته وخنقته

بس أنا عايز أسأل : هو فيه أيه ؟ هي الناس أتغيرت والا أحنا اللى أتغيرنا والا أيه ؟... ده الواحد فى فترة الخطوبة خاصة فى الاول بيتجمل ويتحفلط ويقعد يشتري فى جاتوه وشوكالتات وحركات ويرص فى كلام علشان يعجب الفتاة اللي أخترها... يجي الزبون ده يعمل عكس الناس ويرمي كلام زي الدبش من أولها !!!!!!!!!

لي ملحوظ تانية

أنت كتبتي

طب والخلفة؟ 

- مش قبل 5 سنين جواز

مع كامل إحترامي لرأيك يا شنشن لكن الواحد بيكلمك كأخ ومن عشمه ... الإجابة دي ممكن تخوف أي بني آدم .. لأنها قد تعطى انطباع عدم الثقة فى الطرف الآخر.

وأخيراً ... هوني عليكي يا عزيزتي .. الحياه مليئة بالإختبارات وبالناس الطيببين مثلك ... وزي ما عبد الوهاب مطاوع يبقول : إن جائزة السماء حتماً فى إنتظارك .

إيه رأيك فى البؤين دول .... دول مابيطلعوش اللى للناس الغاليين ... سيبك بأه وأفتحيلنا توبيك حلو كده من فوق القفص

[moody00x]

سيبك بأه وأفتحيلنا توبيك حلو كده من فوق القفص

يا شريكى فى الميكروباص...كده بتفكرها بذكريات جميلة قوى لما كانت المعلمة أم سمر أنعم وأكرم قبل ما تغلط وتفضل الطب عن البطاطس والبامية

هيييه..... ذكريات سوق العبور بقى ....كانت أيام

[إبن مصر]

شانا...

ساسرد لك قصه حقيقيه وقعت لى ومن خلال السطور سيصل اليك الرد والى كل من يقرأ ايضا..

عندما تقدمت لابنه مصر .. وسالت حمايا رحمه الله عليه ان يعطينى كلمه حيث كان اهلى مازالوا فى الخارج والعمليه كلها من خلال التليفون معاهم ....

اشترط الرجل الطيب عده اشياء قبل الكلام معى:

1- ان اضمن له ان يعيش الى ان يرى ابنائى.

2- ان اضمن له ان أتى برزقى كله مره واحده.

3- ان اضمن له الا تبكى بنت مصر ابدا.

وعندما نظر الى وانا فاغر الفم انظر اليه ببلاهه تبسم وضمنى اليه فى حنان وقال وعينيه بها مسحه دموع خفيفه..

( يابنى الجواز نتيجته خلق جديد ان اراد الله يعنى اطفال .. وهذا الخلق مكتوب منذ الازل من ابوه ومن امه فى كتاب ازلى فتاكد انك لن تختار زوجتك وانها لن ترفض زوجها )

وتبسم وفهمت كلامه ولمده 3 سنين وانا متعلق الى ان نزل اهلى وتزوجت انا وبنت مصر وسبحان الله:

مات حماى العزيز رحمه الله عليه وبنت مصر حامل فى بنتى التانيه ولم يرى الا ابنتى الاولى ....

وفتحت ابواب الرزق من حيث لا ادرى

وكلما فرحت بنت مصر ... بكت ..

فسبحان مكن له الدوام .. وارجو ان تعى ما بين السطور...

ابن مصر

[se_ Elsyed]

أبن مصر كتب

وأرجو ان تعى ما بين السطور...

عمو عمو ... أنا مش فاهم حاجة

إبن مصر من ساعت ما بقى فى الموديريت تيم وبقى يكتب كلام كبير يا رجاله .. وكل حاجة يرموا الكره فى ملعب الغلابه اللى زيينا ويقولك المعنى فى بطن الشاعر .. المعنى ما بين السطور

يعني بالبلدي كده يا أبن مصر عايز تقول أن " اللي من نصيبك لابد يصيبك " صح ؟

معليش أصل أختك شعنونة تاجرة خضار وفاكهة .. وأنا ومودي على سبيل المثال سواقين ميكروباص بنبدل عليه ورديات ... فتلاقي فهمنا على قدنا :lol: .

على فكره يا أبن مصر .. أحنا ظروفنا متشابهة .. أنا اتقدمت لزوجتي وهي فى أولى كليه وتقريباً أهلها أدوني صابونة علشان البنت لازم تخلص تعليم الأول .. روحت خطبت تاني وعملت أفلام كده وفركشت ورجعت تاني ليهم كانت هي فى سنة تالتة .. غلست وختت لحد ما اتجوزنا وأخدت البكالوريوس وأحنا متجوزين ومخلفين الواد عمر ( جوز بنتك ) إلا بالحق هي العروسة أسمها أيه أحسن الولا بيسألني كل يوم وواجع دماغي.

وش واحد ماسك جردل وبيرش ميه حوالين التوبيك علشان يطري القاعده

[إبن مصر]

( وش نفس الواحد ابو بجامه مقطعه وعلى راسه كسرولا وماسك سيجار)

شوف يا سى السيد..

الاكاده كده ان انت عبأرى وفهمتها وهيا سارحه فوق النخله بعيد عن الضوليله...

كلامك صح والبهدله واحده بس انا بقى قعدت خمس سنين لحد اما ربنا ما وفقنى وقالوا أأأأأأأأأأأأأأأأأأأأأأأأأأأأأأأأأأأأأأأأأأه...

( نفس من السيجار )

اما موضوع الميكروباز ... يا الى معاككككككككككككك هونداااااااااا موديييييييييييييييييل 98 فووول اوبيشن...ربنا يباركلك فيها ..

( نفس من السيجار تانى بعنف )

ما بخسوس ما بين السطور,, فده سهل خالص.. والمره الجايه اشرحلك....

( نفس وكحه ونفس وكحه )

اما بخسوس بنتنا فاسمها انجى .....بعنى ابنك لازم ندلعه ونقوله يا على ....

( نفس وجحوظ فى العينين وازرقاق فى الشفتين وغيبوبه )

[abofasad]

انا مش قولتلكم ..

الأخت العظيمة الدكتورة "البنت الشعنونة " فيها شيء لله

كتبت التوبيك بتاع خطوبتها يوم 25 والنهاردة 29 يعني اربع ايام فقط والموضوع وصل لأربع صفحات (اللهم لا حسد)

دي بنت شربات .. وتستاهل كل خير.. وحرام اللي بيعملوه فيها العرسان "جمع عرسة" (على رأي ........ مش فاكر اسمه)

انتي يا عروسة تقعدي في البيت زي الهانم والعرسان ييجوا لغاية عندك يتمنوا تراب رجليكي..

ما تقلقيش .. بكرة يجيلك عدلك.. وتخدي سيد سيده..

وعلشان ايه العياط.. هو العياط حيجيبلك عريس احسن منه.

طيب تصدقي بإيه .. انا لو كان ابني كبير شوية كنت خليته ييجي يخطبك.. هو لسه عند 27 سنة.. نسيت اقولك انا عندي توأم .. ايه رأيك تاخدي الاتنين واحد ليكي وتشوفي للتاني عروسة على ذوقك.

الجايات اكتر من الرايحات

Hasta luego