صباح الخير يا سعودية

[hakeem]

2.بندالزياده السنويه مش مكتوب فى العقد وبيقولى الزياده بتكون تبع قانون العمل هناك بس مش متحدده ولا مذكوره

3.سالته على الكفيل قالى كفيلك هيكون الشركه ..مش شخص يعنى...فى كده فعلا..؟

طيب ياجماعه بند الزياده السنويه ده ايه نظامه..؟

كمان هو فى السعوديه ممكن فعلا يكون الكفيل هو الشركه ولا لا...؟..لان بصراحه معرفش ايه النظام هناك بس اللى واصلنى يعنى وممكن يكون صح او غلط الله اعلم ان الكفيل فى السعوديه اشخاص..ولا ممكن يكون شركات بردوا..؟

توريطة طبعا لان معناها انك طالع على فيزا عامل وده معناته انك متقدرش تجيب مراتك معاك ولا مامتك ولا اي حد خالص يعني هتشتغل سخرة سنتين محروم فيهم من اهلك على ماربنا يفرجها وتلم ثمن التذكرة وترجع غير آسف على شيء ..

شكرا يا استاذه ضحى ع التوضيح..بس انا الحمد لله لا متجوز ولا بفكر حاليا..بس فى حاجه كنت عايز اسال عليها انا كتير قريت فى المنتدى هنا مواضيع عن فتح باب الاستقدام لجميع المهن..ولا ده كان فتره وخلصت..؟

وبالنسبه بقا للمهنه بتاعت عامل..انا بعد ما كتبت استفسارى رد عليا محاسب فى السعوديه وبلغنى انه رايح بردوا بمهنه عامل من سنه ونص ..وان فى حل من اتنين يا اما الشركه بتتكفل بتغير المهنه هناك يا اما هو بيغيرها وقالى انه غير مهنته لمحاسب عام وكلفته بالتحديد 4000 ريال.......ايه رايكم فى الكلام ده...؟

استخير كتير قبل ماتقبل العرض ده الي متاكده ان راتبك فيه مش هيحصل ثلاثه الاف ريال وهو الحد الادنى الي منصحكش تقبل باقل منه ..

انا فعلا بستخير ربنا الحمد لله..بس بردوا محتاج راى الناس الموجوده فى السعوديه لانهم ادرى منى بظروف البلد..وفعلا كلام حضرتك مظبوط الراتب اقل من 3000 ريال..بس حضرتك بتقولى ان ده الحد الادنى..لمين بالظبط..للمحاسب حديث التخرج ولا خبره كام سنه...؟

انا جيت اخد راى الناس هنا لانهم ادرى منى لان كان فى عرضين واحد عمان وسالتكم هنا وطلع مرتب ضعيف ومحتاج رايكم بقا فى عرض السعوديه ده.........؟

تم تعديل 19 أكتوبر 2010 بواسطة hakeem

[خالد شحاته]

الاخ الفاضل

السلام عليكم ورحمة الله وبركاته

انت بتقول انك طلع بمهنة عامل وهتشتغل محاسب معني كدا ان العقد الا معك هيكون مكتوب فيه انك عامل انما لو كتب لك انك محاسب وحصل اي ظروف لقدر الله بينك وبين الكفيل هتروح مكتب العمل هتقول ايه بالعقد الا معك اقل شي في مكتب العمل لما بشوف اقامتك هيحسابك علي انك عامل وليس محاسب لان تاشيرتك طلعه من مكتب العمل عامل وزاي ما الاخت ضحي قالت لك استخير ربنا اكتر

[hakeem]

الاخ الفاضل

السلام عليكم ورحمة الله وبركاته

انت بتقول انك طلع بمهنة عامل وهتشتغل محاسب معني كدا ان العقد الا معك هيكون مكتوب فيه انك عامل انما لو كتب لك انك محاسب وحصل اي ظروف لقدر الله بينك وبين الكفيل هتروح مكتب العمل هتقول ايه بالعقد الا معك اقل شي في مكتب العمل لما بشوف اقامتك هيحسابك علي انك عامل وليس محاسب لان تاشيرتك طلعه من مكتب العمل عامل وزاي ما الاخت ضحي قالت لك استخير ربنا اكتر

شكرا يا استاذ خالد شحاته..بس هل ممكن فعلا المهنه تتغير زى ما حد قالى وكتبتلكم فى المشاركه اللى قبل دى....؟

ومستنى ردكم على باقى اسالتى

[doha]

وبالنسبه بقا للمهنه بتاعت عامل..انا بعد ما كتبت استفسارى رد عليا محاسب فى السعوديه وبلغنى انه رايح بردوا بمهنه عامل من سنه ونص ..وان فى حل من اتنين يا اما الشركه بتتكفل بتغير المهنه هناك يا اما هو بيغيرها وقالى انه غير مهنته لمحاسب عام وكلفته بالتحديد 4000 ريال.......ايه رايكم فى الكلام ده...؟

هقول لحضرتك حاجه ثلاث قواعد اساسية .. حطها حلقة في ودنك انت او اي حد عاوز يسافر السعودية ..

اولا ان مفيش حاجه اسمها مش ممكن .. كل شيء ممكن بس تعرف السكه بتاعته والاهم يكون معاك فلوسه ..

انك تغير مهنتك من عامل لغيره دي ممكنه جدا مفيش مشكلة بس هل تضمن ان كفيلك يطلع ابن حلال ويديلك الاوراق اللازمه لكده ولا يطلع عينك وحاوريني ياكيكه ودوخني ياشادر الليمون على ماتعرف تطلع اوراقك النظامية زي الاقامه فضلا عن انك تعدل فيها ؟

ثانيا مفيش حاجه اسمها اقل راتب لمهنة ما .. في اقل راتب لجنسية ما ..

كمحاسب حديث التخرج ممكن جدا يديلك الف وميتين ريال بل والف وممكن اقل كمان .. دي وراده وفي مصريين كتير جدا بتطلع على السعر ده معندهمش مشكلة .. لكن هل هيكفيك الالف ده ويجيب مصاريفك في الغربة ولا لاه ؟؟

هم ميهمهمش كده .. فكرتهم عننا ان مرتباتنا في مصر من خمسين لستين جنيه في الشهرـ ان لقيناهم ـ واننا عايشين في عزب صفيح ندخن سبارس .. فبدال ماستاتنا تبيع لحمها على الارصفة بعشرة ولا عشرين جنيه فهم يدوهملك ويبقى كفايه عليك اوي وبوس ايدك وش وظهر ..

القاعده الاساسية ان الي هيطلع على شغل مستحيل يشتغل شغل تاني جنبه اوفر تايم ومستحيل اكتر منه انه ينقل على شركه تانيه او ناس تانيين لو معجبوش الشغل ..فتعمل حسابك المكتوب في العقد هو ده بالظبط الي هتاخذه مش هيزيد مليم واحد وان الحياه في السعودية غاليه جدا تماثل الحياه في مدينة نصر مثلا او احياء القاهرة الراقية من حيث تكاليفها ومتطلباتها ..

كتير جدا من الكفلاء معتمدين على جهل الغالبية من الي معاشوش في السعودية بالحقائق دي فبيحطوا شروط عمل مجحفه تبدوا براقة للي عايش برا لكنها جهنم الحمرا للي يفهمها ويعرفها .. هم معتمدين ان مده العقد سنتين وانك هتبقى مضطر تكمله او تكمل معظمه عشان تجيب على الاقل تكاليف سفرك .. وبعد ماتمشي في عشرين غيرك ـ على عماهم ـ يوافقوا يجوا مكانك وباقل من الي كنت جاي بيه كمان ..

الخلاصة .. لا تعتمد على حسن نية الكفيل وانه هينصفك فدي مش مضمونه ابدا واستخير كتير فمش دائما فرصة السفر بتكون فرصة تستاهل فحصها والتفكير فيها فضلا عن قبولها .. وكقاعده عامه برضه الشركات التعبانه بس هي الي مبتقدرش تجيب فيز بمسميات حقيقية وبتضطر للتلاعب بفيز العماله وغيره ..

وبالنسبة لسؤالك فممكن كفيلك يكون شركه دي مش مشكلة وطبعا هي افضل كتير من لو كان كفيل فردي .

واخيرا ..بالعربي كده وبدون مااطلب منك اجابة على اسئلتي .. لو انت من بيئة تعبانه وظروفك المادية ملطشة تلطيش جامد ولسه متخرج جديد ومعندكش ادنى امل تشتغل السنة دي او الي بعدها ومش ناوي تتجوز دلوقت خالص يبقى توكل على الله واطلع السعودية على اي عقد يجي لك واهي خبرة ان منفعتش مش هتضر .. لكن لو اي مما سبق غير منطبق عليك خاصة لو كنت ابن ناس اوي او ناوي على جواز قريب او قدامك فرصة ولو تعبانه للعمل في مصر يبقى فكر الف مرة قبل ماتطلع على اقل من الفين ريال ومش عاوزه اقول ثلاثه عشان محبطكش ..

ربنا معاك ويفتحها في وشك في مصر او السعودية ويخليك راضي فين ماتكون ..

تم تعديل 19 أكتوبر 2010 بواسطة doha

[hakeem]

اولا ان مفيش حاجه اسمها مش ممكن .. كل شيء ممكن بس تعرف السكه بتاعته والاهم يكون معاك فلوسه ..

كويس الكلام ده يامدام ضحى..

ثانيا مفيش حاجه اسمها اقل راتب لمهنة ما .. في اقل راتب لجنسية ما ..

يعنى المصرى متشاط جوه وبره بلده.......

القاعده الاساسية ان الي هيطلع على شغل مستحيل يشتغل شغل تاني جنبه اوفر تايم ومستحيل اكتر منه انه ينقل على شركه تانيه او ناس تانيين لو معجبوش الشغل ..فتعمل حسابك المكتوب في العقد هو ده بالظبط الي هتاخذه مش هيزيد مليم واحد

طيب لو جت على اد كده كويس...انا خايف اصلا لا ميطبقوش بنود العقد اللى هيتمضى..بس من كلام حضرتك كده ان اللى فى العقد هيتطبق..

واخيرا ..بالعربي كده وبدون مااطلب منك اجابة على اسئلتي .. لو انت من بيئة تعبانه وظروفك المادية ملطشة تلطيش جامد ولسه متخرج جديد ومعندكش ادنى امل تشتغل السنة دي او الي بعدها ومش ناوي تتجوز دلوقت خالص يبقى توكل على الله واطلع السعودية على اي عقد يجي لك واهي خبرة ان منفعتش مش هتضر .. لكن لو اي مما سبق غير منطبق عليك خاصة لو كنت ابن ناس اوي او ناوي على جواز قريب او قدامك فرصة ولو تعبانه للعمل في مصر يبقى فكر الف مرة قبل ماتطلع على اقل من الفين ريال ومش عاوزه اقول ثلاثه عشان محبطكش ..

ربنا معاك ويفتحها في وشك في مصر او السعودية ويخليك راضي فين ماتكون ..

لا ده انا بستفاد جدا من كلام حضرتك وعايزك تسالينى فى كل نقطه تيجى على بالك لان انا لسه ع البر..

انا اولا من بيئه متوسطه يعنى لا تعبانه قحط ولا مرحرحه..زى عامه الشعب يعنى

ظروفى الماديه طبعا ملطشه تلطيش جامد جدا جدا..زى عامه الشعب بردوا..

بالنسبه بقا للامل انى اشتغل هنا..انا فعلا اشتغلت هنا بس كانت ايه النتيجه..صفر..

الجواز مش ناوى عليه دلوقتى خالص..لان دى التزامات كبيره جدا وانا حاليا مقدرش عليها..

والمرتب فوق الالفين فعلا بس مش تلاته..

وانا حاضر لاى اساله حد محتاج يسالنى فيها وهتفيدنى بالنسبه للعقد اللى بتكلم عنه

ومتشكر جدا يا مدام ضحى ع النصايح

[doha]

انا اولا من بيئه متوسطه يعنى لا تعبانه قحط ولا مرحرحه..زى عامه الشعب يعنى

ظروفى الماديه طبعا ملطشه تلطيش جامد جدا جدا..زى عامه الشعب بردوا..

بالنسبه بقا للامل انى اشتغل هنا..انا فعلا اشتغلت هنا بس كانت ايه النتيجه..صفر..

الجواز مش ناوى عليه دلوقتى خالص..لان دى التزامات كبيره جدا وانا حاليا مقدرش عليها..

والمرتب فوق الالفين فعلا بس مش تلاته..

طالما الراتب فوق الالفين وانت من كلامك ( معندكش حاجة تخسرها ) فتوكل على الله بعد الاستخاره واقبل العرض .. واعمل حسابك في السنتين دول انت رايح تجمع خبرة في الدنيا فمتخليش فرصة تروح عليك من غير ماتستفيد منها ( يعني يقتضي شغلك التنقل في اكتر من مدينة يبقى تنقل .. يعرضوا شغل مش من تخصصك بس حاسس انك هتتعلم منه شيء خذه .. وهكذا ) وثانيا حوش كل مليم او لنقل هللة تطلع لك لانك بسفرك مضحي فلازم تكون تضحيتك دي بفايده ..

وربنا معاك والي معاه ربه عمره مايضيع ..

[hakeem]

السلام عليكم ياجماعه...عندى استفسارات ..معلشى تاعبكم معايا

دلوقتى المندوب اللى ورقى معاه عمال يتصل بيا لماوجع راسى لانى قلت اسيبنى منه شويه..فى الاخر رديت عليه..قالى غيرت الجواز قلتله لا لسه بغير البطاقه..قالى طيب انجز شويه..قلتله عرفت ان فى ناس طالعين شغل السعوديه بردوا ومكتوبلهم بند الزياده صريحه فى العقد..مكتوب لهم زياده سنويه 500 ريال..هتتصرف ازاى قالى خلاص هكلم المكتب وهخلص معاهم..بقلق انا بصراحه من اللى بيسهل كل حاجه ده...!

وقلتله يجيبلى اسم الشركه النهارده والا مش مكمل الورق ولا مغير الجواز..قالى مفيش مشكله اجيبهالك اخر النهار..مع انه رفض يدهانى فى اول كلامى معاه..مش عارف ايه اللى اتغير بصراحه...؟..المهم لو جابها وخليتحد سالى عنها ده يطمن ولا ممكن فخ بردوا...؟

عايز اعرف ايه الحاجات اللى اامن بيها نفسى فى العقد ده علشان مرحش هناك الاقى كلام مختلف لان المندوب ده مسهلها خالص...

صحيح مش المفروض ان تذاكر الطيران دى على حساب الشركه او داخله فى عموله المكتب معرفش بس المفروض ان مش انا اللى اجيبها..صح..؟

عايز الناس الخبره بقا ترد علياابقى فى الامان ازاى...؟.

على ما اجيب منه اسم الشركه هناك..واشوفه هيعمل ايه فى بند الزياده وهكلمه فى التذكره كمان..

[hakeem]

السلام عليكم يا جماعه محتاج حد فى الرياض يدينى معلومات عن شركه مقاولات اسمها..النمط للمقاولات..

ياريت اللى يعرف عنها اىمعلومه كويسه او وحشه يرد عليا سريعا

[hakeem]

هو معدش حد بيدخل المنتدى يشارك ولا يرد ولا اى حاجه..فى ايه مش مظبوط...............؟

[anis71]

هو معدش حد بيدخل المنتدى يشارك ولا يرد ولا اى حاجه..فى ايه مش مظبوط...............؟

ولا تزعل يا عم حكيم .. الناس بس داخلة على عيد وحج وكل واحد مشغول وكل سنة وانت طيب ، انا مثلا بقالي اسبوعين مادخلتش مابين مرض ومشغوليات وغيره

المهم اجاوبك على بعض الاسئلة :

في حالة "المجهول الغامض" - دي تسمية من اختراعي لأن في م"جهول واضح" - المهم حالتك دي مجهول غامض يعني مافيش عندك اي معلومات عن الطرف الآخر غير اللي بتقولهولك شركة التوظيف.أنصح سعادتك بما يلي...

بالنسبة للشركة مش هتلاقي حد عارف عنها حاجة اكيد شركة مقاولات صغيرة ودول آلاف هنا ،إلا لو جبت العنوان وخليت حد يروح يزورهم ويشوف وضع المكتب ويتكلم مع حد هناك بأي حجة ويحاول يديك معلومة.

عاجباني طريقة تعاملك معاهم بجد bv:- ...طنش تعش ... اديك ممكن تاخد كام ميزة زيادة، المشكلة لو إنهم ادوك وعود غير حقيقية بالزيادة .

حكاية إنك تبقى في الأمان دي صعبة جداً جداً .... وكمان جداً... هتقولي ليه ...

أقولك ... فرضاً ( لا قدر الله )إنت جيت ولقيت في بعض الكلام اللي اتفقتوا عليه ومكتوب في العقد مش متنفذ هتعمل ايه؟؟

مثال: قالك ادفع التذكرة ولما تيجي هنردلك فلوسها ولحس كلامه؟؟، قالك في زيادة سنوية ، وآخر السنة قالك مافيش !!، اتفق على 3000 مرتب وجيت قالك هم 2000 مافيش غيرهم..

هل هتدخل معاه في مشاكل وشكاوي في مكتب العمل؟ هيروح واقف مرتبك ويقولك روح خد حقك من المحكمةوهينشف ريقك كام شهر وهتبتدي تصرف من جيبك ده غير محامين وشفنا ناس عاشت في نزاع شهور طويلة وخرجت في الاخر خسرانة. لأنها في الاخر بترسي خروج نهائي.

بص الناس دي درستنا من سنين وفاهمين إن الواحد مننا بيبقى خارج مديون وعاوز يجيب قرشين باي شكل فبيضغط عليك من الحتة دي، وطبعا هو عارف إن كل همك في البداية تلم القرشين اللي سالفهم وترفع راس أهلك اللي طايرين بيك إنك لقيت شغل في أرض البترول، ومش معقول هتحرق كل احلامك وآمالهم وترجعلهم بعد يومين وتقول مالتزمش معايا.

يبقى زي ضحى ماقالتلك لو مافيش التزامات جدية او مسئوليات او حاجة تخسرها في مصر دلوقتي يبقى سافر وجرب، بس حاول تحوش على قد ماتقدر اول سنة.

طالما المندوب بيزن عليك يبقى حاجة من اتنين ، إما هو عامل مصلحة جامدة من وراك أو إنهم عاوزين حد ضروري بسرعة ومش لاقيين غيرك، المهم في كلتا الحالتين حاول توصل معاهم لأخرهم في كل الشروط.

ناقص بس نقطتين تدرسهم كويس ، هيوفرلك سكن ولا لأ؟؟ لأن السكن غالي جداً ، وكمان في مواصلات تبعهم للشغل ولا هيدولك بدل مواصلات وانت تتصرف؟

اتمنى لك التوفيق وربنا معاك ty:)

[hakeem]

ولا تزعل يا عم حكيم .. الناس بس داخلة على عيد وحج وكل واحد مشغول وكل سنة وانت طيب ، انا مثلا بقالي اسبوعين مادخلتش مابين مرض ومشغوليات وغيره

طيب مقلناش حاجه بس حد يعرفنا فى ايه..والف الف سلامه على خضرتك..وربنا يعين الجميع

بالنسبة للشركة مش هتلاقي حد عارف عنها حاجة اكيد شركة مقاولات صغيرة ودول آلاف هنا ،إلا لو جبت العنوان وخليت حد يروح يزورهم ويشوف وضع المكتب ويتكلم مع حد هناك بأي حجة ويحاول يديك معلومة.

كلامك سليم فعلا كلمت ناس اعرفهم فى السعوديه وسالوا ع الشركه دى ولا حد عمره سمع عنها

عاجباني طريقة تعاملك معاهم بجد bv:- ...طنش تعش ... اديك ممكن تاخد كام ميزة زيادة

كويس انى عملت حاجه صح..على فكره انا كنت طنشتهم خالص وكنت بدات اخد خطوات نحو الامارات(حلوه دى)..قلت ارد على المندوب واريح قلبه..قلتله الشركه محدش عرفها وابعدنى عن السكك دى..قالى تعالى معايا هنروح المكتب..تقابل الراجل..وخد عنوانها.قلتله طيب ومش هروح ولو اتصل تانى هقوله ع المهنه يا يجيبلى تأشيره بمهنه محاسب يا بلاشه..ده عملا بنصيحه الاخوه هنا

يبقى زي ضحى ماقالتلك لو مافيش التزامات جدية او مسئوليات او حاجة تخسرها في مصر

لا طبعا مفيش اى التزامات خالص والسفر علاجى ..لانى تعبان من هنا جدا

طالما المندوب بيزن عليك يبقى حاجة من اتنين ، إما هو عامل مصلحة جامدة من وراك أو إنهم عاوزين حد ضروري بسرعة ومش لاقيين غيرك، المهم في كلتا الحالتين حاول توصل معاهم لأخرهم في كل الشروط.

لاطبعا المندوب هيطلع بمصلحه ومصلحه كبيره كمان..بيقولى عايز 8000 جنيه..كنت ......ولا بلاش قلتله مقدرش ادفعهم قالى مش هنختلف..وعلى فكره سالت ناس خريجين جداد يعنى مسافرين على مرتب 1500 ودافعين 5000 جنيه..يعنى معدش مكتب محترم لا بياخد 2.5%ولا حتى مرتب شهر..بس انا طبعا عمرى منا دافعله اللى بيقول عليه ده

ناقص بس نقطتين تدرسهم كويس ، هيوفرلك سكن ولا لأ؟؟ لأن السكن غالي جداً ، وكمان في مواصلات تبعهم للشغل ولا هيدولك بدل مواصلات وانت تتصرف؟

لا فى سكن عندهم..وكمان مواصلات عليهم..حتى قالى اعمل رخصه لان ممكن يدوك عربيه تروح بيها وكده..قلتله لا بسوق ولا عايز اسوق..

متشكر لاهتمامك وردك..ولو اىاضافه تانيه متبخلش علينا بيها..وربنا يكرمك

[droyoon]

السلام عليكم

اتمنى ان تقبلوني بينكم

من فضلكم اريد أن أستشيركم في هذا العرض

معايا ماجستير حديث رمد

جالي عرض من مستشفى مغربي في السعوديه فرع الرياض

العرض اني اطلع طبيب مقيم براتب 8 الاف ريال

مده العقد سنتين قابله للتجديد

مع توفير سكن او بدل سكن 3 شهور

اجازه 30 يوم بعد 11 شهر مع تذكره عوده

ممكن أعرف رأيكم

والدكاتره في الرياض ايه رأيهم في المستشفى و التعامل فيها و الحي اللي هيا فيه في مكان كويس وللا لأ؟

لو حد اشتغل هناك و عنده تجربه ياريت يفيدني

ارجو السرعه في الرد جزاكم الله خيرا لأن المفروض أرد عيهم

شكرا جزيلا

[se_ Elsyed]

السلام عليكم

اتمنى ان تقبلوني بينكم

من فضلكم اريد أن أستشيركم في هذا العرض

معايا ماجستير حديث رمد

جالي عرض من مستشفى مغربي في السعوديه فرع الرياض

العرض اني اطلع طبيب مقيم براتب 8 الاف ريال

مده العقد سنتين قابله للتجديد

مع توفير سكن او بدل سكن 3 شهور

اجازه 30 يوم بعد 11 شهر مع تذكره عوده

ممكن أعرف رأيكم

والدكاتره في الرياض ايه رأيهم في المستشفى و التعامل فيها و الحي اللي هيا فيه في مكان كويس وللا لأ؟

لو حد اشتغل هناك و عنده تجربه ياريت يفيدني

ارجو السرعه في الرد جزاكم الله خيرا لأن المفروض أرد عيهم

شكرا جزيلا

المغربي إسم على علم

أنا مش طبيب ولا أشتغلت هناك ... لكنني أتعامل معهم إما كمريض ;) أو بحكم طبيعي عملي اللي من ضمنها مجال التأمين الطبي ...

وأنا باعتبر كل الأطباء اللي هناك بصراحة elites

المغربي دايماً بيفتح فروع شراكة مع مستشفى المواساة .. مش عارف إيه الحكمة .. لكنهم بيقسموا التخصصات بينهم ... يعني المغربي ما بيشتغلش إلا عيون وجلدية وأنف واذن ... والمواساة بيشتغلوا الباقي ... لكنهم كيان مستقل تماماً ...

المغربي له فروع كثير بالمملكة .. وبصراحة هي والمُستشفى الألماني دائماً ما يُشعروني بالفخر كمصري لما يُنشر عنهم على الدوام من إنجازات يحققها أطباء مصريون والإنجازات دي بتبقى عالمية بالمناسبة خصوصاً في مجال العيون ... وهم رقم واحد بدون منازع في هذا المجال بالسعودية ..

الراتب والمزايا لا أدرى صراحة هل هو مناسب لخبرتك أم لا .. لكن يقدر يجاوبك عليها السادة الزملاء الأطباء ..

لكنني أعرف مكانهم جيداً وهم على الطريق الدائري الشرقي للرياض .. والحي يُعتبر حي راقي جداً ... وبه كثير من الخدمات ... ويكفي جنبهم كذا مول محترمين ... وإيكيا للأثاث قريب منهم .... وكمان إنتم قريبين من وسط البلد .. ووسط البلد هنا يتمثل في أحياء " الملز السليمانية والعُليا " .... يعني حتى لو سكنت هناك على حسابك ... فممكن بـ 24 الف تلاقي شقة جيده جداً .... والطريق في الصبح بيبقى كويس جداً إذا كنت تتحرك من وسط البلد نحو الطريق الدائري ... على العكس لو إنت جاي في نفس التوقيت بيبقى زحمه مووووووت لأن كل الناس جايه مش رايحه .... وتقريباً يستغرق 10 دقائق بالسيارة ...

وبرضوا في أمور يجب أن تؤخذ في الحسبان .. هل لديك أولاد ... وفي مدارس ولا لأ ... وإيه نوعية المدارس التي ترغب في إلحاقهم بها .... إلخ

من ناحية المعيشة والسكن والأثاث والسيارة فما تشغلش بالك خالص لأن كل دي أمور بسيطة في ظل شروط ومزايا عقد عمل جيد ...

وربنا يوفقك

[droyoon]

جزاك الله خيرا

شكرا جزيلا للافاده

[droyoon]

هي المشكله الوحيده اني لازم اجتاز امتحان الهيئه السعوديه قبل السفر

لو ممكن حد يساعدني يدلني على المصادر اللي اذاكر منها بالنسبه لتخصص الرمد

ارجوكم اللي عنده خبره في الموضوع ده يفيدني لاني خلاص هامتحن

جزاكم الله خيرا

[ahmed hanafy]

بشرااااااااااااااااا

لكل المحتاسين زيي

لقد تم فتح باب تغيير المهنة لجميع المهن بما فيهم السائق الخاص وبكل سهولة

وانا شخصيا غيرت مهنتي في اربع ايام بدون اي عقبات

من عامل شحن وتفريغ الي كيميائي عام

وربنا يوفق الجميع

[se_ Elsyed]

بشرااااااااااااااااا

لكل المحتاسين زيي

لقد تم فتح باب تغيير المهنة لجميع المهن بما فيهم السائق الخاص وبكل سهولة

وانا شخصيا غيرت مهنتي في اربع ايام بدون اي عقبات

من عامل شحن وتفريغ الي كيميائي عام

وربنا يوفق الجميع

الكلام ده أكيد ؟

وايه الاجراءات ؟

يا ريت تشرح للناس عشان يستفيدوا

[ابن مالك]

معلش انا متطفل

صباح الخير اختى مسافرة لزوجها ومعاه بيبى حديث الولادة وكانت بتسالنى على نظام التطعيمات فى السعودية ايه لاقينى مش عارف قلت اسئلكم علشان تقرر تسافر ولا تستنى لما الولد يخلص التطعيمات ودايما عامر

[ozoozo]

معلش انا متطفل

صباح الخير اختى مسافرة لزوجها ومعاه بيبى حديث الولادة وكانت بتسالنى على نظام التطعيمات فى السعودية ايه لاقينى مش عارف قلت اسئلكم علشان تقرر تسافر ولا تستنى لما الولد يخلص التطعيمات ودايما عامر

تسافر عادي وتاخد شهاده تطعيمات مصر معاها والدكتور بيقارن ويشوف ناقصله ايه وياخده

والتطعيمات في السعوديه ازيد من مصر واحسن

[akramgroup]

معلش انا متطفل

صباح الخير اختى مسافرة لزوجها ومعاه بيبى حديث الولادة وكانت بتسالنى على نظام التطعيمات فى السعودية ايه لاقينى مش عارف قلت اسئلكم علشان تقرر تسافر ولا تستنى لما الولد يخلص التطعيمات ودايما عامر

نظام التطعيم هنا زى الفل وزى بتاع مصر وليه جدول وتطعيماته اكتر من مصر كمان وممكن تطعم المولود على التامين الصحى او فى اى مستشفى خاص

ولو حبيت بردو فى مراكز صحيه التطعيم فيها ببلاش وكله تبع وزارة الصحه يعنى مضمون

بس اوعى تنسى تجيب شهاده الميلاد ودفتر التطعيمات المصرى

اوعى تنسى ضرووووووووووورى