يوم الجمعة في مصر ... حاجه تانية

[se_ Elsyed]

مش بأقول لكم غن الراجل علي سلامه ده بأحبه لإنه بيقول الكلام اللي على لساني وفي قلبي بس بشكل مترتب وكإنه بيرص حبات لولي جنب بعض ويعمل منها عقد جميل ..

بالله عليكم إقراوا القصيدة التالية عن وصف يوم الجمعة في مصر وقولوا رأيكم

يوم الجمعة

كتب على سلامة ٢٤/ ١١/ ٢٠٠٨

الجمعة كان يوم مختلف

ريحة البخور

طعم الفطور

صوت الأدان

تحضن الميم الألف

تطلع الشمس بحنان

تروح وترجع بالسلامة

بالهنا وبالشفا

يا قلب ماما

الدنيا رايقة

وقلبى هو اللى إتملا

بعد الصلاة

رحمة وأمان

ع الناصية كان

بياع لمون

وبيت براح

من غير بيبان

يحدف لى من أجمل عيون

ضحكة بخجل

أمشى وأنا عندى أمل

وأقول يا رب أعيش

للجمعة الجاية

واللى بعدها

وأحسب خطاوى العمر

من غير ما أعدها

أكيد هييجى يوم

تقوللى وأقولها

وأحس تانى بالرضا

وأعيش كمان

وتروح سنين

وأغيب سنين

ويا خدنى من تانى الحنين

وأعدى على نفس المكان

وأمشى أفتش ف الوجوه

وأتوه وأنا ف إيدى العنوان

وأسأل فلان

وفلان يروح يسأل فلان

لا حد عارف مين أكون

ولا مين ده

بتاع اللمون

ولا البيت

ولا البراح

ولا العيون

ولا فين ده راح

يوم الجمعة بتاع زمان

التعليقات بقى كانت على نفس المستوى القصيدة المنشورة في المصري اليوم .. شيء رائع

هى جمعة بضم الميم*خير يوم طلعت علينا فيه الشمس*فيه خلق أدم .وفيه أدخل الجنه.وفيه أخر ج منهاولا تقوم الساعة إلا فى يوم جمعة**الجمعه عيد وده أفضل هدية *من رب العباد*الجمعة (عيد)*من بعده السبت الأحد**.. **أنت الجمعه عندك لازم من طبق الطعمية والفول والقولون يزعق يقول ما عدش أتحمل برطمان المخلل والبصل والتوم**فاكر معايا ريحة البخور.....ياه ديه ريحة لها تاريخ معايا لما كنت فى بيت أبويا*وركزت شوية فى الوقت عندهم*قالوا البت جالها عقدة وشنيطة.فى.يوم جمعة هاتوالها بخور، جاوى،وزعفران،ومستكه وصندل وما تنسوا اللبان* ما كنش دكر!! يبقى قلته أفضل وعرق حلاوة..ورصاص ورجلة وطشت نحاس ..عزموا عليها مخاوية جان..وجمعة على جمعة أنفك اللجام ..وجه الهمام من آخر البلاد(عقد)عليا فى يوم (سعيد)وآمى من يومها جالها حساسية من ريحة البخور**عايزنه نعيده ليه يا على **

وانا صغير اخدني والدي الله يرحمه ورحنا نصلي في الأزهر أيامها كنا ساكنين في الدرب الآحمر .. بعد الصلاة اكتشف والدي سرقة جزمته ورجعنا في تاكسي ووالدي لابس بدله على الشراب .. الله .. الذكريات جميلة .. برغم قسوتها في بعض الأحيان .. تحياتي يا علوه..

يا جماعة الخير عن على سلامة بسأل دا شاعر ولا جواهرجى بيطعم الدهب بفصوص مرصوصة عارف كل فص وهايحطة فين ولا الأويمجى التانى اللى اسمة عبالرحمن فهمى اللى عمال يطعم الخشب بالعاج الأصلى وبيغزل صنعتة باتقان ولا الدكتور عمار والاستاذ والاستاذة وكتير من الحلويين مالين علينا موقع اقل ما يقال علية دة صالون ثقافى زي صالونات زمان دة صالون العقاد ودة طة حسين ودة محمد حسين هيكل وكل صالون ولة طعمة كلكم اخر جمال ولو تقبلونى صديق ابقى متشكر ليكم

نحمد ربنا بفضله فى الجمعة الخير بيزيد """" كان زمان كنت أصلى فى جامع الرفاعى وكان الخطيب الشيخ الشرباصى الله يرحمه""" ولك طول العمر ياعلى وأنت ياغالى فكرتنى "" بالمغربلين """ أخدت المترو بسرعة على هناك أرجع أيام زمان لقيت البيوت حزينة والناس كمان إللى راح خالص وأللى أتنسى مع الزمان لفيت ورجعت أدور على ذكرى حلوة أو :::جارة كمان محدش عارف حد :::إلا ست طيبة عرفتى وأن معرفتهاش """قعدة فى الدكان تعد إللى رايح وإللى جاى """" وكل واحد بيجرى بس مش ذى زمان بيوت تهدمت وعماير طلعت بسرعة الفساد """"""""

على الجنيه .. صورة جامع قايت بيه .. وده سره . في كل الدنيا جنيهاتها .. مقلولة القيمه .. إلا جنيهنا .. عارف ليه .. ده سر قايت بيه . في يوم الجمعه كانت الغدوة "زفر" .. سمك .. أو لحمه وخضار بدمعه .. أو طيور محمرة .. والكبد والقوانص كمونية حمرا .. وخضرة الشريفة .. وعيش طري سخن .. أبيض زي القمر . وكل ده بالجنيه مع بلح زغلول ورطب .. ولبشة قصب . امبارح رحت عند بيتنا القديم .. هدوه .. عشان الكوبري يعدي .. لدوران الدائري .. بره البلد .

الدنيا ليه مالها كده .. من غير براح ... كل الشوارع ضيقه .. حتى الخلا مفهوش براح ... بيوت مخنوقه باهلها ... وشوش ضاع منها ضحكها .. حتى القلوب .. غاب عنها حبها .. والجيل الجديد ... تلاميذ تاهت فى المقرر والكتب ... والدرس امتى وبكام... وجدول الضرب ... لا مش بتاع الحساب ... ده اللى بيفضى لموت ... او لعاهة مستديمة ...او يبقى المدرس فيه محبوس فى قفص ...كل الحاجات مخنوقه ... حتى الفرح لما تشوفه .. تلاقيه زعلان .. هو كمان قرفان .. اصله كان بيفوت على الناس زمان...يلاقهم فى انتظاره ... فتحين قلوبهم ليه ... على شوقه ... كل واحد ياخد نصيبه من الفرح ... تلميذ كان او شاب او حتى عاجز ... خلاص الناس دلوقتى نسيته ... ولو خبط على القلوب ... الناس مبتعرفوش ... بيحلموا يعيشوا بس ... فى شوية براح

اللي يعيش ياما يشوف..واللي يلف يشوف أكثر..وخلاص ماتهنا من زمان ..تهنا وتوهونا..قصدوا يتهونا..ويضيعونا...لاّحنا عارفين أحنا فين ولآ رايحين علي فين ..ولاجايين منين..ولا كنا فين..ولا عارفين حد من سبت..ولاخميس من جمعه..مبقتشي فارقه الأيام..مابقاش يهم الزمان ولآّ المكان..تاه الإنسان..كنا زمان نتلم بعد الجمعه..نجّمع تحت الضله...ووسط الحاره ونعمل غديوه..واللقمه كانت هنيه وبتكفي ميه...والكل كان بيعب..والشرب م القله عسل..والصحبه حلوه مجمعه..دلوقتي..اتحداك لو تلاقي وقت..ولاّ حد تجمعه..في الانتريه ولاّ الصالون..حتي القري بقت مُدن..دلوقتي عشنا في البنادر..ونعمت أيدينا..عشان كده..الخضره قلت..والزرع جف...وغضبت الأرض علينا...ماراح اللي كانوا بيعمروا..ويحرثوا ويزرعوا ويحصدوا..وقدمولنا الحلو كله..كان مشكلتهم..نجرونا وعلمونا..ومدنونا..آه لو ييجوا يشوفنا..ويشوفوا العيش المستورد بقشره...والميه السودا المتخلطه..كانوا يضحكوا علينا..ويبهدلونا..يضربونا..ويسألوا قادرين الزاي تعيشو..!!

والله انت بقيت بالنسبه لكتير من جيلى زى فيروز كل يزم لازم الصبح . ياجميل يا احلى من القهوة ياللى حببتنى فى كلامك على سهوة.بس وأتوه وأنا ف إيدى العنوان مش تقيله شوية الجملة دى يا احلى شاعر فى مصر

الجمعة دة فى الاصل عيد*** تلاقى طفلك فى ايد ابوة ولابس جديد*** رايحين يصلوا فى جامع بعيد*** ماهو كل خطوة ثواب يزيد*** حرما ياعمى حرما ياخال حرما ياسيد*** وكمان نروح السوق نجيب سمك ومشوى*** وبلح وخضرة وجرجير كتير*** وقصب احمر وابيض لجل نمصة فوق السطوح*** واقول لبويا قبل ماهطلع حقف شوية مع منصور وعيد*** اه نسيت بعد الصلاة تلقى اللى بايع جزر واصفر وساعات دة احمر*** ودة برتقال ودة لمون ودة بعيش سخن وجميل*** جوافة جايز او موز بنقطة رمان ياباشا خد الجميل*** خد ايدى يابنى عدينى شارع لجل ماتنجح يابن السعيد*** حرنال يا بية اهرام ومصرى ووفد وبديل**** ولوزة راحة عالفرن ماشية تجيب صوانى فريك بلحمة ما الجمعة عيد*** وعيال بتلعب صلح وكورة وعيال واقفة بترغى فوق عالرصيف*** وبعد غدوة وحلو وفاكهة تأيلة مكن لجل ما نخرج مشوار بعيد*** جمعة لعمى والتانية خالى او حتى خالتى فى ترام يا صحبى عجلة حديد*** عيلة ولمة وخروج وفسحة واكلة حلوة وعبادة فيها ثواب يزيد*** مش قلت ليكم الجمعة هى فالاصل عيد**

[se_ Elsyed]

يا ترى إنت ذكرياتك إيه بقى عن يوم الجمعة ؟

[عصام]

أبويا كان ريقه بينشف مع خمس ولاد أنا واحد منهم لاجل ما حد يجبر بخاطره ويصحى عشان ينزل معاه يصلى الجمعة wst::

[HDarwish]

يوم الجُمعة هو يوم الجَمعة

يوم الجمعة يعني جلبية بيضا وريحة مسك أو فل تملى المكان

يوم الجمعة يعني فطار من اللي قلبك يحبه وهيصة وزيطة وبسرعة يلا علشان نلحق الصلاة

وفي نشوة وفرحة ماليا الوجوه وبنور تلمحه من أبعد مكان نمشي نروح للمسجد الكبير

نسمع خطبة تصحي فينا الحنين وترجعنا تاني للقلب النظيف ونحلف يمين ماعدنا تاني نعمل ذنوب

وبدون مانعرف ليه ولا إزاي نجيب من كل جرنال نسخة ولا اثنين ومعاهم شوية قصص وكتب للصغير والكبير وممكن معاهم شريط ولا إثنين لأحد المشايخ

وبالمرة نعدي على السوق شوية سمك شوية خضار شوية فاكهة لزوم بقية الاسبوع

ونروح عالبيت تلاقي كل الوجوه بتقابلك بضحكة حلوة وسلام جميل وكلمة حرماً ونرد ونقول جمعاً بإذن الله

ولمة حلوة تجمع كل العيلة وكل واحد ماسك الجرنال وقال يعني بيتثقف وشوية واحد يقول شوفت اللي حصل .. ده اسمه كلام ... وشوية الكل يسيب الجرايد ونقعد نتناقش في حاجات كثير ممكن تبقى مواضيع مثيرة وممكن تبقى ولا ليها أي لازمة ... بس في الآخر بتجمعنا روح العيلة وعمي فلان وعمي فلان وأولاد عمي اللي كثير ما كنا بنختلف وساعات بنتفق بس في الآخر بتجمعنا روح العيلة اللي ممكن تقول عليها الوقتي مجرد ذكريات

ياااااه ... فكرتني يا سي سي بأيام حلووووووووووة ....

تحياتي

[عبقرينو]

اللة عليك يا سين سين رجعتنا ستين سنة لورا

صباح الجمعة:

سهرانين من يوم الخميس نحلم ببكرة , هأعدي عليكم الفجر ونطلع اسماعيلية نقضي اليوم هناك

الجمعة الظهر:

صوت الخطيب في وداني والكلام كان من القلب , الناس بكيت وفي لحظة خشوع كلنا دعينا وقلنا يارب

الجمعة العصر:

شباك حبيبي قدامة محطة اتوبيس, وانا واقف مستني اتوبيس مابيجيش ولا بيعدي من هنا

الجمعة المغرب :

في اية في الدنيا احلي من اكلة سمك علي شط اسكندرية

ليلة جمعة :

لمتنا في الحسين في قهوة الفيشاوي والحكاوي مابتنتهيش لغاية الفجر

كانت ايام

[a m ghazi]

ياااااااااااااااااااااااه

انت بتقلب المواجع ليه يا س س يا اصيل

يوم الجمعه ده كان بيبدأ معايا ومع الشله من الخميس بالليل

سهرانيين طول الليل نتمشى

وكانو الناس البياعيين بتوع السوق بيبيتو من بالليل في السوق

وكنا نروح بالليل السوق (شارع كده الناش بتفرش فيه )

لو لاقيناهم صاحيين نشتري اللي احنا عايزينه

ولو كانو نايمين بردو بناخد اللي احنا عايزينو بس استعاره مش شراء wst::

ولف ولعب طول الليل لغايه الفجر كله يروح يصلي ونقعد في قدام الجامع نحكي ونلاقي الناس بدات تظهر بقي

اللي سارح (رايح الغيط يعني للساده المتعلمين بتوع المدارس) واللي رايحه السوق

نقوم نرجع تاني علي السوق

الله يرحمها خالتي فاديه بتاعت الطعميه (مش خالتي بس كنا بنقولها كده )

نروح نقعد عند الكشك بتاعها ودا بقي واخد موقع استراتيجي ملوش حل كاشف السوق كله

نقعد بقي نديها سندوتشات طعميه سخنه من حرارتها مش قادرين نبلعها بس بردو من حلاوتها مش قادرين نصبر عليها تبرد

ونتفرج علي اللي رايح واللي جاي واللي راحه واللي جايه

ويا سلام بقي لو واحد صاحبنا من اللي قاعدين البت بتاعته عدت تبقي مصيبه

لو بصت نحيته يحصل اعصار هيييييييييييييييييه ايو يا عم ايو يا سيدي يا جامد

ولو مبصتش بردو يحصل اعصار هييييييييييييييييييه وعمال تسرح بنا وتقول وتعيد وهي ولا تعرفك

(الحمد لله ربنا سترها معانا ) :blink:

انا عن نفسي كنت حريص ان فطار الطعميه ده يبقي نص بطن بس

لان فيه لسه ما لذ وطاب

الساعه تقريبا بقت عشره صباحا

كله يفركش

اروح ادخل اتسحب

ما هو النهارده اجازه ابويا ولو مسكني (هيديني كلمتين في العضم) :blink:

البيت دورين ابويا فوق وانا محتل الدور الارضي لحسابي

ادخل الحمام اخد دش في السريع

واغير هدومي وانط في السرير

علشان ابويا هينزل يصاحيني كمان خمس دقايق

يجي يصحيني طبعا اعمل نفسي مستقتل

يخبط علي الباب ويخبط ويخبط (معلش يابا لازم ارسم الدور )

اخيرا اقو افتح الباب وارجع تاني علي السرير

يقوم شاددني من رجلي علي الارض ويفتح الشبابيك بتاعت الغرفه

انا بردو مستمر في الدور بتاع النايم

ايه يا حج استني شويه لسه بدري

قوم يلا يله بلاش رخامه يلا علشان نفطر كلنا ولما نصلي ابقي نام

طيب يا حج

اقوم ادخل تاني الحمام واغسل وشي ومش عارف ايه

نطلع بقي علشان نفطر

طبعا شيئ اساسي الطعميه بتاعت خالتي فاديه لازم تكون علي الطبليه وجنبها طبق الفول التمام

وكبده متحمره وعجه واهم شيئ الرز اللي هقلبه في الكبده المتحمره علشان الزيت وطعمها الرائع ده

(انا ريقي جره )

فطرنا الاقي اقوم اضرب غطس في شنطه السوق الاقي الكاكا حبيبتي

اضرب كاكا يكون الشاي حضر نضرب شاي

تكون الصلاة وجبت انا بروح عند الشيخ اللي بعييييييد (لانه بيخلص بسرعه)

يا دوب علي ما اوصل عنده الاقيه بيقيم الصلاة (احسنت يا شيخ جمال )

نصلي وارجع علي البيت مش شايف

انام بس المره دي بقي بجد

اصحي علي العصر الاقي الغدا جهز وما ادراك ما الغدا

دايما ولحد دلوقتي اختي متجوزه لازم معزومه عندنا علي الغدا يوم الجمعه

هي وابنها واحيانا جوزها لو فاضي ( مش مهم انا عايز الواد ابن اختي بس والباقي مش مهم )

دا بقي عبوده بيه يجي وانا نايم من اول خابطه علي الباب او بس يقول يا خالو

اصحى افتح الباب وارجع السرير

يجي يتنطط علي السرير يا ابني اقعد

لا

طيب نام

لا

نام جنب خالو يا حبيبي

لا

انام انا ولكن مين ده وعبوده موجود انسى يا عمرو

صابعه عامل زي الدوده الاقيه مره في ودني ومره في منخيري

دا الوحيد اللي بيصحيني ومقدرش اتكلم لا وايه بيقي مزاجي حلو كمان

نطلع نتغدى

معروف يوم الجمعه ده فراخ ولحمه او سمك او بط

انا كنت بحترم يوم البط جدا جدا لانه كان بيبقي معاه مكرونه بشمل (عشقي وحبي )

بعد الغدا الواحد لازم غصب عنه يريح والواد عبوده الاقيه تنح ومش عارف اليه اللي جراله

المغرب جه صليناه والعشا جات صليناها يكون الواحد بدأ يفوق شويه من غيبوبه الغدا

وتكون الشله كذلك

نتجمع في خن من بتوعنا ونروح النادي نلعب بنج ودمينو وطاوله واحيانا لو فيه نشاط وحماس نلعب كوره في الصاله الخماسي

الساعه دلوقتي بقت واحده يلا يا شباب

انسحبووووووووووو

ننسحب من الميدان الي السرير

بس

دي زكرياتي عن يوم الجمعه

ارجو مكنش طولت عليكم

تقبلو تحياتي

احمد غازي

تم تعديل 24 نوفمبر 2008 بواسطة a m ghazi

[elshafey]

انا فاكر يوم الجمعة وانا صغير:

اصحي الصبح افتح التليفزيون وهو بيعمل تششششششششششششش .......

مستني برنامج سنيما الاطفال .....

واقعد افطر الفطار المتين .... فول ... طعمية سخنة مولعة .... بيض ..... وشوية العيش البلدي السخن الطازة ...

يااااااااااااه فكرتني بأيام حلوة يا سي السيد ...

مافيهاش مسئولية ولا جري وتنطيط عشان اكل العيش ...

وبرده جوعتني لما افتكرت الطعمية السخنة والله ريحتها في مناخيري دلوقت ...

أنا ........

انا جعااااااااااااااااااااااااااااااااااااااااااااااااااااااااااااااااااااان :blink: :rolleyes: :blush2:

موضوع رااااااااااااائع

تحياتي

تم تعديل 24 نوفمبر 2008 بواسطة amelshafey

[iloveegypt]

موضوع جامد طحن بجد

يوم الجمعة وليلة الخميس

ليلة الخميس تجمع عائلتى من ناحية الام الخالات واولادهم ونقعد نقرا كتب اللى فى مكتبة خالى كتب دينية وتاريخية وسياسية ومجلات من كل نوع اللواء الاسلامى والدعوة والتوحيد وروزاليوسف واليسار المصرى والاهلاوية والزملكاوية والمختار الاسلامى والتصوف الاسلامى وميكى وسمير وكابت ماجد والمغامرين الخمسة والشياطين 13 ورجل المستحيل والبعكوكة ونزهق من القراء نقعد نتكلم عن بكرة واحلامنا ياه كانت ايام

والجمعة تجمع الاعمام والعمات فى بيت العائلة عند جدى + جيرانا اللى فى بيت جدى فلسطينين بس كانهم اعمامى بالضبط(يعن معرفتش انهم فلسطنيين الا لما كان عندى حوالى 18 سنة)

وبعدين نخبط الغدا المتين ونتفرج على الشعراوى او انباء واراء

ونروح على المغرب للخروج مع الاصدقاء والسهر اما على النيل او عند المحطة بتاعت القطار كانت ايام

[redwany]

يوم الجمعه فى قريتنا فى الصعيد لما كان مافيش فلوس كنا بنجيب لحمه كل يوم جمعه وده كان يوم عيد

تخيل منتظر اللحمه والطبيخ اللى مع اللحمه من اسبوع

اصحى من النوم افطر حليب وعيش بتاوو

اسمع برنامج ماما عفاف (سينما الاطفال)

لازم الحموم قبل الجمعه وكل واحد فى دوره...الوالد وبعد كده اخواتى الكبار ثم انا

اروح اصلى الجمعه وكان الضحك مايحبكشى غير فى الجامع

والحاج عبدالواحد يجرى ورايه وورى كل العيال ويطلعنا من الجامع

ونرجع لما يقيموا الصلاه

وبعد الصلاه نرجع للحمه والطبيخ

وياسلام لو فيه مطش للاهلى والزمالك تبقى متعه

اما لما ربنا فتح علينا وسكنا فى المدينه لازم الاهرام بعد الصلاه

يجعله عامر