كندا وحشة !

[ashrafsm]

السلام عليكم و رحمة الله

أنا ماشي في إجراءات الهجرة و بصراحة يا جماعة مالاقيتش لغاية دلوقتي واحد أعطي صورة إيجابية مشرقة

وكل اللي سمعته دلوقتي هي صورة قاتمة جدا

اللي جاله كساح من الصقيع و اللى لم يجد ثمن تذكرة العودة بعد البهدلة و اللي راح اشتغل شيال واللي أولاده نسيوا الدين

حتي الأطباء و المهندسين و هم خيرة شباب العرب راحو اتبهدلوا هناك و أصبح الناجح منهم أقصي أمله هو الحصول علي

الجنسية فقط لاغير و بعدين يافاكيك

هل كندا عاملة موضوع الهجرة فقط لاستخدام الكفاءات العربية لتغطية أعمال لايعملها الكنديين الأصليين

بمعني تاني لاستخدامهم كصف ثاني أو حتي خامس

أين الشباب الناجح ياجماعة

و هل كل اللي نجحوا هم فقط اللي راحوا بدري بدري

وبصراح أنا فكرت ألغي فكرة الهجرة و يادار مادخلك شر

[هادي]

يا استاذ اشرف

اولا اهلا بيك في اسرة المحاورات

ثانيا موضوع النجاح والفشل هو موضوع - في رأيي المتواضع- شخصي جدا

ونسبي ايضا

بمعنى

انا لو فكرت اترك مصر لابد ان اعلم اشياء ولابد ان اجيب نفسي بصراحة عن بعض الاسئلة ..

أول شيء لازم اعلمه

اني لن احصل على شيء بدون ان اترك شيء مقابل امامه

فلو حصلت من السفر على المال مثلا ، فسأترك أمامه فرصة الاستمتاع بابي وامي ورؤيتهم كا صباح وسماع دعواتهم الجميلة وكمان مش راح اكون جنبهم وهما بيكبروا او لو اصابهم مرض او غيره لاقدر الله.. وطبعا لحظات الفرح ستمر على الجميع بدوني .. فسيتم تجميد عضويتي في كل الجماعات الانسانية التي كنت عضو ناشط فيها.

وهكذا دواليك

بتاخد حاجة

وبتضحي بحاجه تانيه ادامها

ثم ان الغربة نفسها

من مكان لمكان

ومن عادات

ومن جغرافيا

ومن لغة

ومن طعم اتعودت عليه لكل شيء عرفته في حياتك

الى ماهو مختلف تماما عن ذلك الذي نشأت عليه

كل ده له وطأة شديدة على النفس و الروح

فالسفر لغرض ولايام

يختلف تماما عن الاغتراب لسنوات طويلة من عمرك

ثم لازم كمان تعرف ان اي غربة لازم يكون لها تمن وضريبه مدفوعه

فأنت تكبر في الغربة

وتتعود على أشياء اخرى

ثم تشعر بعد عودتك انك غير متجانس مع الجميع كما سابق عهدك

هذا كان حول المعرفة

أما عن التساؤلات .. التي يفترض ان تجيب نفسك عليها بكل صراحة

فمثال ذلك

عاوز ايه من ورا سفرك وغربتك

مال .. أد ايه بالتحديد

هل فيه مبلغ معين .. سقف .. خط نهاية

وكذلك أي هدف آخر

لابد من تحديده بمنتهى الوضوح والدقة والصدق مع النفس

احترمت جدا شاب قابلته في السعودية

كان عاوز من غربته خمسين الف جنيه

عملهم .. وسافر بعدها بيوم واحد !!! برغم كل الاغراءات الاخرى

واحترمت آخر كان عاوز يتجوز

دهز نفسه من فلوس هناك .. وخلع بدري

دي ناس عارفه هي عاوزه ايه

لكن السفر بدون هدف واضح

فده بداية العذاب

صدقني

سؤال تاني

انت مسافر طموح والا هروب

لو طموح

طب شوف .. انت فين دلوقت

وطموحك ايه

وهل أعددت ليه جودة تخصص ومهاره عاليه

ماهو عشان تكون مطلوب وليك سعر في الغربة

لازم تكون نادر

فتكون غالي

لانك مفيش منك كتير

لكن لو منك كتير

يبقى اكيد راح تقبل بسقف اقل جدا جدا جدا من احلامك وخايالك الحالي

يعني مثلا

انت محاسب

بتعرف ايه من برامج محاسبية تقيله

ساب مثلا (SAP) او اوراكل (Oracel finance) أو جي دي ادوارد

طب لغتك عاملة ايه

طب انت رايح كندا

ايه اخبار اللغة الفرنسية معاك

كده تبقى انت موظف دولي

من غير كده

يبقى سلامتك الف سلامه

خليك هنا خليك على رأي ورده

:sad:

و اشوفك بكره

لان الوقت فعلا اتأخر عندنا في تورنتو

[سقراط المصري]

اتفق تماماً مع الاخ هادي في جميع فقرات المداخله

واضيف

ان سعرك في الغربه يعتمد على الوقت الذي امضيته في تعلم شيء جديد.

ماتفعله اليوم سواء تعلمت شيء جديد او ضيعت الوقت هباءً، تجنيه غدا في الغربه.

كمان المنافسه في الغربه شديده جدا جدا

الاختيار للوظائف او العمل بيكون اختيار بين اكثر من شخص مؤهل تماما للوظيفه ، وليس بين اشخاص ليسوا بالكفاءات التامه.

ولازم تكون كفاءتك بشكل رأسي وافقي ، بمعنى تكون متخصص في شيء او اشياء كويس جداً (رأسي)، وفي نفس الوقت ملم بما حولها من موضوعات ذات صله بتخصصك (افقي).

تحياتي

سقراط

[هادي]

عزيزي سقراط

ربنا يكرمك

أنا اصلي اتبهدلت ف الغربة كتير .. ربنا ما يوريك

لكن بصراحة

انتهز المناسبة دي

وأبدي اعجابي الشديد بتوقيعك

الحالي

والسابق

والقادم

بصراحة شفت منتديات كتير وقليل

مشفتش حد بيوقع زيك

انت حدوته مصرية جميله باين عليك

تحياتي

واحترامي

[ashrafsm]

السلام عليكم كل سنة وانتم طيبين

متشكر ياأخ هادي وانت ياعم سقراط يابتاع شاي العصاري (انت لسه فاكر حاجة اسمها عصاري)

تعليقا علي كلام الأخ هادي ولو انه سياخذنا بعيد شوية عن الموضوع

أولا موضوع تحديد الهدف من الغربة أحيانا يخضع لظروف كتيرة وممكن يتغير تبعا لتغير الدوافع التي جاءت بك من بلدك

يعني مين منا لايريد العودة إلي مصر

فكلنا كانت أحلامنا في البداية حتة شقة

ثم كبر الحلم ليفكر في العروسة التي تسكن هذه الشقة (أصبح الحلم شقة + عروسة)

وكبر الحلم اكتر وأصبح سيارة تحملك انت والعروسة (أصبح الحلم شقة + عروسة + سيارة)

ثم كبر الحلم بعد الزواج وأصبح تعليم جيد للأولاد ثم كبر أكبر وأكبر وأصبح تأمين مستقبل الأولاد

ثم هاهو الحلم يتضخم لينغص عليك الحياه ويراوك في كل دقيقة (لماذا لاتستكمل تعليم أولادك في الخارج هذا هو أكبر ضمان

لهم وخصوصا اذا اكتسبوا مع هذا العلم جنسية بلد مثل كندا) هل هذا هو الحلم الصغير الذي خرجنا به من مصر اذا الهدف تغير

بتغير متطلبات الحياه وهذه هي طبيعة النفس البشرية دائما تسعي إلي ماتراه من وجهة نظرها أفضل

ثم نأتي لموضوع التميز

التميز في مجالك شئ جميل ولكن احنا بنتكلم عن قطاع كبير من عامة البشر

حتي الناس اللي معاهم شهادات نادرة كم تبلغ نسبتهم من بين الآلاف المتقدمين للهجرة أو من بين الناس اللي راحوا بالفعل

كما أن فرصة التميز غير متاحة لمعظمنا كمصريين نظرا لظروفنا الإقتصادية والعلمية والإجتماعية والــ......و الـ......

اذا تعالي نتكلم عن واحد عادي غير متميز غير نادر يوجد في تخصصه وان كان مهندسا أو طبيبا (مثلي) حاصل علي شهادة

لابأس بها يوجد مثله اللآلاف

لماذا تطلب كندا واحد مثلي للهجرة ؟

[dr/alfa]

موضوع جيد ومداخلات كويسة

أرجو ممن لديه الخبرة الادلاء برأيه .

[الصاوى]

السلام عليكم

الأخ الكريم , لا انصحك بالهجرة اذا كان هدفك جمع المال فنظام الحياة هنا لن يمكنك من ذلك أما اذا كان هدفك الاستقرار والعيش فى مجتمع جديد منظم يقوم على الحرية والمساواة وتكافؤ الفرص فسوف تكون اسعد حالا من العيش فى الدول العربية حيث لا سعر ولا كرامة للانسان

[هادي]

عزيزي أشرف

الكلام المفيد - من وجهة نظري المتواضعة -

هو تأكيداً لما سمعته حضرتك لما قلت

وكل اللي سمعته دلوقتي هي صورة قاتمة جدا

اللي جاله كساح من الصقيع و اللى لم يجد ثمن تذكرة العودة بعد البهدلة و اللي راح اشتغل شيال واللي أولاده نسيوا الدين

حتي الأطباء و المهندسين و هم خيرة شباب العرب راحو اتبهدلوا هناك و أصبح الناجح منهم أقصي أمله هو الحصول علي

الجنسية فقط لاغير و بعدين يافاكيك

يعني ممكن تيجي هنا تاخد الجنسية .. ثم بعدها .. يا فكيك

لكن خد بالك انك لازم تقعد هنا 3 سنين عشان تقدر تقدم

اكرر

تقدم فقط

على الجنسية

ثم إجراءات الجنسية نفسها قد تأخذ كمان سنة

يبقى المجموع اربع سنوات

مش راح تحوش فيهم فلوس

ويمكن تصرف من تحويشتك

بصراحه

وبعدين انت دكتور كما ورد في مداخلتك

فهل تقصد طبيب بشري .. وفي أي تخصص ؟

أم تقصد دكتور محاضر في كلية مصرية أو جامعة عربية ؟

هو مجرد سؤال

لاجيبك حول ما ينتظرك هنا في كندا

لانك لو صيدلي مصلا لقلت لك لابد من دراسة ثم امتحان

وبعد النجاح ابواب كندا كلها مفتوحه لك

مرتب كبير

عيشه فل الفل

هتعمل فلوس بصحيح

ممكن توصل (60 - 80 الف دولار سنوي)

بعد الضرائب يبقى معاك صافي 40 الف دولار

لو راح تعيش بالفين دولار شهري مع اسرتك ومصاريفك

يبقى راح تحوش - بعد النجاح بأقول - تقريبا 15 الف دولار

يعني بعد سنتين من سفرك

ممكن تقدر تحوش بداية من السنة التالتة 50- 75 الف جنيه مصري سنويا

احسبها انت بمعرفتك

و شوف ظروفك

لاني بصراحة

وبحكم غربة تزيد على 20 عام في بلاد مختلفة عربية وغربية

وآخرها كندا

بأقول لك ان الغربة هي معادلة بسيطة

مؤداها

يا بشر .. يا أهل الدار .. تاخدوا سنة من عمري و تدوني كام

هي الحسبة كده

وبعدين مسيرك لبلدك في النهاية

عاجلا أو آجلا

وشكرا

يا أخي الصاوي

تحياتي واحترامي

حضرتك عايش فين في كندا ؟

وصار لك كام سنة هنا ؟

هذا للتعارف ليس إلا

وبخصوص

والعيش فى مجتمع جديد منظم يقوم على الحرية والمساواة وتكافؤ الفرص

اتفق معك انه مجتمع منظم

والقوم هنا لم يسبقونا لا بشطارة ولافهلوة

بل بعمل دؤوب منظم

لكن

يسأل الاستاذ أشرف هو كندا عاوزه واحد زيي ليه ؟!

طبعا كندا عاوزه مهاجرين طول الوقت

عشان يشيلوا الحفلة من تحت

فاهمني

لان بعودة بسيطة سريعة للتاريخ المنظور

سنجد ان كندا شهدت أكبر موجة هجرة بعد الحرب العالمية الثانية

وكان اغلبها طلاينة و من شعوب اوربا الغربية

وبعدين البشر دي كبرت

والجيل التاني بتاعها كان متعلم تعليم عالي

فأصبح هناك عزوف على الاعمال المتوسطة والبسيطة

نجار - سباك - نقاش - .... الخ

فأصبح سعر ساعة العامل اليدوي يساوي سعر ساعة عمل طبيب الجراحة

وهذا ما تذكرة الكتب التي تتحدث عن تاريخ كندا الحديث

الامر الذي أدى الى وضع نظام الهجرة الحالي

حيث تخطط وتقوم كندا باستيعاب ربع مليون مهاجر سنويا

الحقيقة

دول بيكونوا زبدة المجتمعات

ناس حلوة .. متعلمة .. مش بتوع قتل وعنف .. معاها قرشين

الربع مليون دول بيضخوا دماء جديدة في الاقتصاد الكندي

وكمان بيشيلوا الحفلة من تحت

ليه

لانك اول ما تيجي هنا

راح تلاقي عبارة عجيبة

لا يوجد لديك خبرة كندية (Canadian Experiance)

طب مادي مسألة معروفة ياناس ومفرغ منها

تسأل يعني مش راح تشغلني عندك بشهادتي

يقول لك شهادتك لا نعترف بيها

يبقى حضرتك لازم تدرس عشان تاخد شهادة من عندهم

يبقى راح تدفع

يبقى الاقتصاد يستفاد وتدور العجلة

و توته توته خلصت الحدوته

رجلك جت ياجميل

وغرزت

معاك اسرة وعيال ف مدارس

هتروح فين وتيجي منين

وتشتغل أي حاجة وتقبل بأي عرض عشان تجيب مصاريفك

وكتير - ان لم يكن اغلب من قابلتهم -

صرفوا تحويشة العمر في كندا

وكتير منهم سافروا تاني يوم خدوا فيه الجنسية

بعضهم رجع بلده

وبعضهم رجع الخليج

يبقى الحقيقة اللي عاوز اوصل لها

ان المجتمع الكندي المثالي الجميل ده .. غير موجود ف الواقع

هو موجود ف خيالنا قبل وصولنا كندا

لكن الواقع المعاش يومياً هنا

هو انك بتقضي الايام وخلاص

هاستفاد ايه أنا من تكافوء الفرص

إن لم أعيشه وأشعر بيه واكسب فلوس تساوي مالدي من خبرات وشهادات

انفت عمري في جمعها وتحصيلها وبعدين كندا تقول لي (ميلزمنيش)

شهادتك (ممنوع من الصرف)

والذي يؤلم أكتر

هو ما وضعت تحته خط من كلام اخونا أشرف

لان ده شفته بعيني

وبالتالي فأنا مش مستعد أجرب في عيالي

وحددت ميعاد نزولي بالفعل..

اتمنى تكون الصورة أوضح شوية يا استاذ اشرف

معاك الميزات والعيوب

واختر لنفسك

وأي سؤال تحت أمرك

تحياتي

[G.G]

السلام عليكم و رحمة الله

أنا ماشي في إجراءات الهجرة و بصراحة يا جماعة مالاقيتش لغاية دلوقتي واحد أعطي صورة إيجابية مشرقة

.

.

.

أين الشباب الناجح ياجماعة

و عليكم السلام و رحمة الله و بركاته,,

أنا مش في كندا,

و لكن من خلال اطلاعى المحدود على تجارب بعض الشباب المهاجر

يبدو أن قبول عمل أقل من مستواك في البداية لا مفر منه.

و الترقي بعد ذلك ,, يعتمد على القدرة على العمل و الإمكانيات الشخصية في التعامل ..

تم تعديل 31 ديسمبر 2005 بواسطة G.G

[ashrafsm]

السلام عليكم مرة أخري وشكرا علي كل الردود :angry2:

الصورة دلوقتي أصبحت أكثر قتامة من الأول :wub: و شكرا علي النصائح

اذن الأول أنجح في امتحان المعادلة ثم أسافر (بالمناسبة أنا طبيب بشري وتخصص تخدير كمان)

ولكن يبقي السؤال في النهاية هو هل كل الملايين المهاجرة دي بس علشان يشيلوا الحفلة من تحت

ومين اللي عليه الدور يطلع فوق بعد الحفلة ماتخلص (طبعا آخر الناس هم العرب)

وهل كل هذه الحفلة فقط معمولة علشان تروح تصرف الفلوس اللي معاك والآخر تلبس البالطو وتخرج

اذا لماذا نقبل أن نكون هذا الزبون الأهبل اللي بيضحكوا عليه ويأخذوا منه فلوسه

لماذا لانضع عن عاتقنا هذه الحفلة و نطلع نقعد مع الناس اللي فوق (هو المصري ده مكتوب عليه انه يشيل طول عمره حتي في كندا :lol: )

لماذا لايدفع الشيالين العرب بعضهم بعضا لفوق حتي نطلع جميعا ونقعد معاهم ونعمل زي الهنود والفلبيين وجنسيات محترمة أخري

ياجماعة عايزيين ننجح في حاجة واحدة بس

بالمناسبة احنا 3 عائلات مع بعض بدأنا سويا في إجراءات الهجرة فهل الهجرة الجماعية تزيد من نسبة النجاح والاحنقعد مع بعض نشيل برضه الحفلة

أسأل عن امكانيه عمل المشاريع التجارية الخاصة

وياأخ هادي ياريت تكتب لنا عن نفسك شوية وتجاربك الخاصة

هل هترجع فقط علشان موضوع الأولاد والدين والا هناك أسباب أخري (بالتفصيل الله يكرمك)

وياريت ياجماعة من له خبرات معيشية هناك يستعرضها هنا وأهو نزق بعض لفوق علشان نطلع نقعد في الحفلة :blink:

[هادي]

عزيزي د.أشرف

صباح الخير

هجرة جماعية إيه !!! :)

دي للطيور بس !!

مش فاهم تقصد إيه بالتحديد !!

ملف الهجرة لحضرتك

ليس له أية علاقة بأي ملف هجرة لصديق أو قريب أو جار أو شقيق ..

كل واحد مع نفسه ..

فلا تزيد فرصك ولا تزيد فرصه هو كمان ..

وبعدين حضرتك دكتور تخدير

عاوز ايه من كندا بالتحديد

ما انت بتعمل قرشين حلوين (Tax free)

وانا وضحت لك ان الضرائب هنا هتشيل من دخلك جامد ..

وطبعا كلامك سليم من ناحية انك تعمل معادلة للشهادة الاول

ولما تنجح في الامتحان

تبدأ مشوار الهجرة

لكن .. اسمح اقف عند عبارة هامة

أسأل عن امكانيه عمل المشاريع التجارية الخاصة

انت كده ناوي على الغلط بعينه

مشاريع ايه يادكتره

صباح الخير

تقصد تقف في محل بقاله مثلا بحوالي 20-40 الف دولار ايجار سنوي

غير تمن اليضاعه اللي هتفرشها فيه

واللي تخش مثلا .. نقول 80 الف دولار ..!!!

بصراحه لو معاك 100 الف دولار .. وعاوز تهاجر تبقى راجل غلطان ..

لكن لو تقصد مشاريع مثلا زي بنزينة (ربع مليون دولار)

أقول لك ده كلام سليم

ومشروع العمر

وممكن تعمل ماتش اعتزال وتقعد تلم الغلة من بعده حتى آخر العمر ياولدي ..

لكن اسمح لي ..

لو تقصد مشروع في مجال تخصصك .. عياده أو مستشفى مثلا

يبقى انت بتسأل الشخص الغلط

وافسح المجال لغيري ليتولى الرد على حضرتك من واقع خبرته الشخصية

ولو جاز لي - او سبرتو لي - أن أتكلم عن تجربتي الشخصية

وحول سؤالك

هل هترجع فقط علشان موضوع الأولاد والدين والا هناك أسباب أخري (بالتفصيل الله يكرمك)

فأقول لك ياعزيزي الدوك

أنا بحمد الله لدي في بلدي ما يجعلني أعيش مستور

وأعيش بشكل آدمي

واعلم اولادي تعليم محترم فعلا

يبقى ليه الغربة ف بلاد الله

ما بلادنا حلوه .. خصوصاً لو معاك قرشين

تبقى جميلة كمان مش حلوة و بس

هتنسى المشاكل المصرية المعتاده

وتعمل نفسك مش واخد بالك

وتعيش خفيف

مع نفسك

وتحاول تسعد نفسك وعيالك والناس اللي يخصوك ويهموك من العائلة والمحيط اللي حواليك .. وشكراً ..

لكن لو جربت مثلا تقف تنتظر الاتوبيس في تلج كندا (45 تحت الزيرو)

هتلعن كندا

وتلعن الدول المتقدمة كلها

وبعدين يادكتور

دي كلها تجارب خاصة

لان كل انسان بيعطيك الغربة بانطباعه الخاص

ورؤيته الذاتية

وانت توازن امورك

وتشوف أي جزء من الكلام و النصيحة يناسبك

وأي جزء لا ينطبق عليك لان ظروفك فيه مختلفة

وبالنسبة لي .. فأنا مساعد مدير

لكن برضه طظ

طالما ممكن انزل بلدي

واشتغل في مالي وابقى مدير نفسي

ارجو ان اكون قدرت اوصل الرسالة

ومن ناحية الدين

فأنت لو مسلم أو مسيحي ستشعر بالغربة

اصدقائي هنا من مسلمين ومسيحيين يتفقون في هذا

لان احنا ف مصر برضه غير الخلق دي خالص

احنا ف مصر عندنا عادات تانية وتقاليد

واللي عنده أولاد هنا بيبقى قاعد حاطط عينه ف وسط راسه

تخيل حضرتك

لا يمكن تترك الاطفال أمام التلفاز والريموت معاهم

لانه ممكن تيجي الطوبة في المعطوبة

ويقلبوا القنوات - الحكومية -

في صبح أو مسى

ويلاقوا نفسهم أمام مشاهد ساخنه

من بتاعة ضربات الجزاء الترجيحية !!!

طبعا انت - كأب - هتبقى ف وسط هدومك

ووسطها ليه !! من غير خالص !!!

شيء عجيب مش كده

موقف صعب جدا على كل أب و كل ام ..

طبعا انا باتكلم عن ذلك الاب اللي واخد المسألة جد

وعاوز عياله احسن منه ف كل شيء

لكن فيه ناس تانيه شايفه هنا جنة

ومش ناويه تخرج منها أبداً

السبب بسيط

لانه ليس لديهم بدائل أو اختيارات

لكن لو وضعك المادي في بلدك مرتاح

وعيشتك - بحمد الله - أمورها مرتبه من صحة وتعليم وسكن وسيارة وخلافه

يبقى الواحد يطول ف غربته ليه ؟

دي وجهة نظري ..

الغربة زي الدوى المر

خد منه اللي ينفعك بس .. ومش شطارة انك تزود منه وتعبي وتشيل

لانك مش راح تخف منه .. هتفضل فيه على طول

والسعادة .. في الاخير .. هي حسبه .. وكيميا .. كل واحد بيخططها على مزاجه

لكني متاكد انها بتطلع من جوانا

ومنبتها الرضى

الطموح شيء جميل .. ومطلوب لكل انسان ناجح ألا يتخلى عن طموحه المشروع

لكن ..

الطموح الجامح .. لو حصل وقتل جوانا الرضى

ده أس البلا

وتمنياتي لك بالتوفيق

تم تعديل 17 نوفمبر 2005 بواسطة هادي

[shawshank]

أنا مش في كندا ، بس ألتقط ما قاله هادي بخصوص هدف المهاجر ايه و أقول:

انتا عايز ايه من الدنيا ؟ يعني هدفك ايه في الحياة ؟

هل عايز فلوس ؟ تحوشها و تصرفها و تعيش بيها عيشة مرفهة ؟

أم عايز - ذي ما الأخوة تفضلوا - حياة سهلة منظمة ؟

أم ماذا تريد من الدنيا ؟

دي كانت نفس الأسئلة اللي سألتها لشاب سعودي هنا أنهى دراسته و جاء ليستشيرني : أكمل هنا ماجستير و اللا أمشي ؟

لو أنا مكانه و عندي وظيفة منتظراني في السعودية ، أمشي تاني يوم تخرجي. و تفضل الأخ هادي بشرح الأسباب.

أنا شخصيا هدفي أن أعمل لأجد ما يكفيني أنا و عائلتي. و أعيش في مكان أعرف أعبد فيه ربنا و أربي فيه ولادي و أنصر الإسلام و المسلمين.

قال صلى الله عليه و سلم: "قد أفلح من أسلم ، و رُزق كفافا ، و قنعه الله بما أتاه"

و قال الشافعي رحمه الله:

و رزقك ليس ينقصه التأني ......... و ليس يزيد في الرزق العناء

إذا ما كنـــت ذا قــلب قنوع ......... فأنــت و مـــــالـك الدنيا سواء

أما أن تعيش حياة سهلة منظمة في بلد محترمة غير بلدك ، فهذا ثمنه غالي كما أوضح الأخ هادي بالتفصيل.

هذه رؤيتي الشخصية.

نسيت أقلك حديث رسول الله صلى الله عليه و سلم: "أنا برئ من كل مسلم يقيم بين ظهراني المشركين".

تم تعديل 17 نوفمبر 2005 بواسطة shawshank

[ashrafsm]

السلام عليكم ورحمة الله

متشكرين ياجماعة أفادكم الله

واحنا لم نناقش الموضوع من الناحية الشرعية بعد

وهناك حوار جميل هذا عنوانه

http://haridy.com/ib/showthread.php?t=53063

والسؤال كان من أخونا shawshank انت عايز ايه من الهجرة

أنا بصراحة عايز أعلم أولادي في مكان محترم

هل هذا حرام من ناحية الهدف

و هل يعتبر من الضروريات التي تبيح الهجرة لبلاد الكفار

وأنا هنا في دول الخليج المسلمة رأيت كيف يحترمون هؤلاء الكفار ويعطوهم رواتب 5 أضعاف من هم يفوقونهم

خبرة وعملا

ويفضلونهم علي كثير من المسلمين والمسيحيين العرب لمجرد أنهم حاصلون علي شهادات أجنبية ويحملون

الجنسية الأجنبية

مش بس كدة أحيانا علشان الجنسية فقط وبدون مؤهلات والله

ومعي طبيب يدعي أنه جراح دانمركي الجنسيه علي وظيفة استشاري راتبه 25000 ريال ولم يكن يعلم كيف

يكشف علي مريض و كيف يستخدم السماعة ولله المشتكي

طبعا المستقبل بيد الله والرزق بيد الله هذه مسلمات بديهية بعيدة عن المناقشة

ولكن ديننا الحنيف يأمرنا بالتعلم والسعي

والعلم هو الذي جعل هؤلاء الكفار يتحكموا في عباد الله من خلال طلقة

مدفع موجهة بالليزر بضغطة زر

[shawshank]

طيب ماهو هادي قال إنه ممكن بيعلم ولاده في مصر تعليم محترم.

أنا شخصيا شايف انه مش سبب كافي. أو الخسارة فيه أكتر من المكسب ، لو هتحسبها بالنقط.

[ashrafsm]

السلام عليكم

ياعم تعليم ايه اللي في بلادنا

أنا أولادي في مدارس international يعني المفروض هو ده أعلي مستوي تعليم متوفر حاليا

وبالرغم من كده لاتخلو طريقة التعليم العقيمة اياها من الدش و الرغي واكتشفت انهم لم يدخلوا ال LAB ولا مرة

من بداية الدراسة وكتب بأكملها لم يتم فتحها حتي الآن

يامحترم التعليم عندنا تعليم استثماري يعني سرقة في سرقة

يعني المهم يلموا القرشينات قبل نهاية الدراسة ويسكعوك أي شهادة في نهاية السنه وخلاص

ومش مهم الولد ده مستواه ايه ونسبة تحصيله قد ايه

وحيعمل ايه باللي درسه في المدرسه يعني في النهاية أحمد زي الحاج أحمد :ninja:

ولنفرض اتعلموا واتخرجوا من الجامعة - فين العمل المناسب اللي يقدر يفتح لهم بيت بدون مساعدة مننا

موظف زي أي موظف

ومواطن مهضوم حقه , مسلوب ارادته يعيش ويموت خايف يفتح فمه لاحسن حضرة الصول

يهفه قلم علي قفاه

ويصبح كل همه لقمة العيش والدروس الخصوصية وفوازير رمضان والأهلي والزمالك

أليس هذا حال البني آدم في مصر وكل الدول العربية والعالم الثالث

وعم هادي يقولك اعمل نفسك مش هنا

ياجماعة مش عيب لما نروح ناخد العلم اللي عندهم ونشوف

ليه هما أصبحوا هما واحنا ليسة احنا

[shawshank]

العلم اللي عندهم ممكن تاخدوا و تشوف ... بس مش ببلاش

أولادك هياخدوا مع العلم حاجات تانية كتير ... ببساطة "ثقافة". و لا تستطيع عزلهم عن زملائهم أو مدرسيهم أو عن المجتمع ككل.

So, it is one package

لما تشوف أمثلة هنا عن آباء هاجروا و في النهاية بنتهم سابتهم من سن الكلية و الله أعلم بتعمل ايه بأه. أو ولد ساب أبويه و راح اشتغل في أي ولاية تانية و مش بيشوفوه خالص و لا عارفينه فين و لا بيعمل ايه. دي أمثلة واقعية بشوفها كل يوم.

و أب تاني بيربي ابنه اللي في ثانوي ، ابنه طلب له البوليس.

- التعليم هنا برضه استثماري ، ذي أي حاجة هنا ، تحركها الفلوس. لكن الفرق عن مصر إن فيه قانون مطبق.

- بعد ما يتخرجوا مش هيلاقوا شغل مناسب ، يبقى مش بتدور على العلم بأه.

- "حضرة الصول يهفه على قفاه" ... يبقى بتدور على حياة محترمة ... مش بس علم لأولادك.

- "كل همه لقمة العيش والدروس الخصوصية وفوازير رمضان والأهلي والزمالك" ... و هنا برضه من أول يوم الإثنين و هوه بيستنا يوم الجمعة عشان يلحق بسرعة مكان في طابور البار. يسكر ، و يصحى تاني يوم السبت ، يروح باليل برضه يسكر. و يبدأ الأسبوع و يستنى آخره ... و هكذا دواليك. و همه ماتش مين مع مين في ولايته football.

هل كندا تختلف ؟ مش عارف. ممكن أخونا هادي يوضح لو فيه فرق.

تم تعديل 19 نوفمبر 2005 بواسطة shawshank

[عبدوس الوزير]

بص يا سيدي الفاضل، خياراتك لتعليم الأولاد في كندا غالبا لن تخلو من شيئين:

إما التعليم الحكومي وفيه ممكن يجلس ابنك بجانب طفل له أمان (يعني اتنين أم) ويناقشوا الطفل ليه مش بياكل خنزير

أو على أقل تقدير يحس بالنغلاق إن قلت له ألا يشارك في حفلات الهالوين والكريسماس

ولا أقول أن هذا الخيار يعني بالضرورة انهيار أخلاق الأولاد ولكن قد يستلزم جهد كبير جدا منك لمتابعة الأولاد وتطهير مخهم مما يسمعون

وإما المدارس الإسلامية، وهي على محاسنها ليست دائما متفوقة دراسيا وذلك لأن أغلب المدرسين من المتطوعين الغير متخصصين، كما أنها قد تكون خارج متناول البعض لكونها بمصاريف بخلاف التعليم الحكومي المجاني

وليس لي تجربة شخصية في المدراس الخاصة الكندية وإن كنت أشك في جدواها

والسلام.

[ashrafsm]

السلام عليكم ورحمة الله

يااخوانا لماذا دائما تربطوا الإسلام بالانغلاق والقوقعة والخوف من الانفتاح علي المجتمع

أنا أري أن كل شئ يعود إلي التربية والبيت وهناك بالطبع مسلمين ملتزمين يعيشون علي الكتاب والسنة وهم بين

هؤلاء في وسط مدارسهم وجامعاتهم ودول ثوابهم مضاعف ان شاء الله

ألم تعد أولادك إعدادا يؤهلهم للدفاع عن دينهم و سنة نبيهم عليه أفضل الصلاة والسلام

اذا قمت بتحفيظ أولادك القرآن ولم تخبرهم لماذا حرم الله علينا لحم الخنزير أو لماذا حرم علينا النظر إلي ماحرم الله

اذن أنت المقصر

وإذا لم تخبر ابنك بمافعله سيدنا يوسف مع امرأة العزيز في سورة يوسف إذن أنت المقصر

وإذا لم تخبر ابنتك بأهمية التستر والحجاب في سورة النور إذن أنت المقصر

وإذا لم تخبرهما معا بضرورة طاعة الوالدين في سورة لقمان فإذن أنت المقصر

ثم لماذا الهروب وتليفزيونات بلادنا العربية والإسلامية تعرض علينا بالليل والنهار سرا وعلانية ماهو أسوأ من

المدارس الكندية (وطبعا تفضل ماسك الريموت في إيديك )

ألا تعلم كم تبلغ نسبة الزواج العرفي في مدارسنا وجامعاتنا (اوعي حد يقولي أهو أسمه جواز)

ألم تطلع علي مصيبة المصائب والطامة الكبري ألا وهي انتشار زني المحارم ولاحول ولاقوة إلا بالله

وده كله نتيجة ايه

نتيجة التربية الخاطئة

ده حرام - وده حرام - ودح حرام بدون أن نوضح لهم لماذا هذا حرام ولماذا هذا حرام

انزل ياأستاذ شوف مولات مدينة نصر ومصر الجديدة والله المستعان

معلهش أنا كأي أب مسؤول عن أسرة (لايريد أن يذهب بهم إلي مجهول) أفكر معكم بصوت عالي

عايزين نخرج جميعا كمسلمين من هذه الدوامة وهذه المعادلة الصعبة

العلم والتطور أصبح مرتبط بالفسوق والإنحلال !

والجهل والتخلف أصبح مرتبط بالإسلام والإلتزام !

هل هذا هو ماتركنا عليه رسول الله صلي الله عليه وسلم

لو كان الرسول بيننا الآن ماذا كان هو بفاعل

[ashrafsm]

السلام عليكم

لي ملاحظة وهي عدم مشاركة السيدات خالص في هذا الحوار

هل قرار الهجرة يخص الرجل فقط والا الأسرة كلها

[shawshank]

و عليكم السلام و رحمة الله و بركاته

يااخوانا لماذا دائما تربطوا الإسلام بالانغلاق والقوقعة والخوف من الانفتاح علي المجتمع

<{POST_SNAPBACK}>

لأن المجمتع صار غالبه فاسدا.

يا أخي الفاضل نحن نعرض وجهات نظرنا و القرار في النهاية لحضرتك طبعا. و أنت أدرى بظروفك و قدراتك.