كندا وحشة !

[هادي]

عزيزي د. أشرف

انت حاسم أمرك

وواخد قرارك وعاوز حد يشجعك ويقول لك تمام ده الاختيار السليم :sad:

.. ابتسامة محبه ..

يا عزيزي

الحدوته باختصار

وبعدما عدت الى الموضوع من أول مداخلة وقرأته من جديد حتى آخر مداخله

الحدوته هي التالي

احنا جايين الدنيا نقعد شويه وماشيين

شوف انت عاوز تقعد فين .. وتقعد أد إيه ..

أنا مشيت من مصر وكان عمري خمسة وعشرين سنة

ولم أعد اليها إلا أجازات متفرقة

ولست نادم على أي اختيار في حياتي - ولله الحمد وحده -

اليوم .. أقول بكل ثقة .. حان الوقت

نعم

حان الوقت أن أغرس نفسي في بلدي من جديد

لكن

غربة على طول

من غير هدف ؟!

لا يا علام ياخويا لأ ..

أبداً .. أبداً

مش انت يا علام

- حته من فيلم لحن الوفا -

ويا دكتوري العزيز

احنا اخواتك

بنعرض وجهة نظرنا فقط

وبنحذر من السلبيات

لكن الأمر لا يخلو من ايجابيات - مادية - بكل تأكيد (( وليست روحيه))

وبالتأكيد كل منا بيحاول أن يخلص لك النصيحة قدر الامكان

لكن في الاخير

هو قرارك

وهي حياتك

وانت قائد السفينة

والمهم انك تكون راضي عن قرارك في كل حال

وهي دي كيميا السعادة

اللي كل واحد فينا بيدور عليها

أنا هاستأذن منك بقى

لحسن البنج عامل عمايله معايا

نهارك سعيد

على فكره

مت قفلش الخط

ممكن أضيف

طيب

حبيت أقول

النجاح هو خلطة من عناصر كتير

وجزء كبير من الخلطة

صفات شخصية في الانسان نفسه

والتعليم جزء من العوامل الخارجية المساعدة بلا شك - لمن أحسن استغلاله-

لكن التعليم - بمفرده - ليس الوصفة السحرية للنجاح

والسلام عليكم ورحمة الله

تم تعديل 21 نوفمبر 2005 بواسطة هادي

[Horus]

عزيزي أ. هادي

السلام عليكم ورحمة الله

.... ممكن أقول حاجة

قبل ما تنفذ

و تنزل مصر

عاوزك تعمل

test drive

و تجرب

شهر ولا اتنين

عشان تكون متاكد انك هتقدر فعلا تعيش فى مصر على طول

وتكون راضي عن قرارك و ربنا يوفقك للى فيه الخير

[الرافعي]

عزيزي أ. هادي

السلام عليكم ورحمة الله

....  ممكن أقول حاجة 

قبل ما تنفذ

و تنزل مصر

عاوزك  تعمل

test drive

و تجرب 

شهر ولا اتنين

عشان تكون متاكد انك هتقدر فعلا تعيش فى مصر على طول

  وتكون  راضي عن قرارك و ربنا يوفقك للى فيه الخير

<{POST_SNAPBACK}>

أخويا hours وأخويا هادي

كلام هادي قطع قلبي (عيااااااااااااااااااااااااااط كتير معلش مفيش أيكون)

hours برضه قطعت قلبي (بس ضحححححححححححححححك) رائد الواقعية في سينما المحاورات .. عندك حق

وهادي برضه عند حق.. والأمرو يتوقف على ماذا تفعل وما يمكنك أن تفعل والمكان الذي يستحق بقاءك فيه هو الذي يمكنك فيه تحقيق ما تحب وخدمة دينك ووطنك وأهلك حتى لو في كندا أو حتى في بلاد تركب الأفيال mfb:

[Elham]

السلام عليكم

انا عايشه فى امريكا بقالي 4 سنوات و عندي اطفال و بيروحوا المدارس الحكوميه و الحمد لله يعرفون الصح من الغلط

طبعا الحكايه عاوزة مجهود كبير من الام و الاب كمان لتربيه الابناء فى الغربه علي مبادئ الدين بس الامر مش مستحيل و البلد اللي انا عايشه فيها الحمد لله فيها نماذج ما شاء الله لبنات و اولاد اتولدوا و اتربوا هنا بس ما شاء الله عليهم منته الادب و التدين يعنى الموضوع عاوز مجهود زياده شويه من الوالدين و لا اعتقد ان تربيه الاولاد فى بلادنا اسهل و لا احسن حالا.

[هادي]

والله ياجماعه

وبجد

صحبه جميلة زي حضراتكم

بتخفف عن الواحد كتير جداً

ويعلم الله كم ادعو للجميع بالصحة و دوام العافية

عزيزي حورس

مش عارف

اسمك بصراحة بيثير جوايا شجون كبيره على بلدي

يوم ان كنا ملوكاً

نسود .. ولا نـُ متطى ..

ربنا كبير

وندخل ف الموضوع

انت عندك كل الحق

وبالفعل شكرك واجب عليا

لكن حبيت أوضح نقطه

هي وردت برضه في كلمات اخويا الكبير حلاوة بيه العنتبلي -اللي مغرقنا بصراحه بجمايله ف كل موسم -

ان كل واحد ظروفه بتختلف عن التاني

وبالتالي فالغربة ليست شيء واحد محدد المعالم

بل هي انطباعات ورؤى شخصية وتجارب ذاتية

وعادة مايتم صبغ التجربة والنصيحة بصبعة ذاتيه

فالحكيم

من استخلص منها ماهو عام و مناسب لاحواله

وأنا بحمد الله

المادة في مصر لا تشكل لي أي عائق - بفضل الله -

والناس بحمد الله برضه

باحافظ على شعره معاويه معاهم

وكما ذكرت سابقا

الواحد بيركز في اللي منه واللي يخصوه من أقارب وعيله واصدقاء مقربين

والباقي

كأنك سائح ياعم

وممكن برضه تعمل مش واخد بالك من سلبيات كتير ف مصر

وتحاول تصلح قدر الامكان

والتوفيق على الله

تحياتي و احترامي

العزيزة الهام

اتفق معك بالتأكيد

فالغربة ليست أبيض أو أسود

بل يوجد هذا و يوجد ذاك

لكن المشكلة تكمن في ان حظك غير حظ اخوك غير حظ جارك

كل واحد فيه نصيب وقدر مستنيه

بس بيحاول يرشد قراره قدر الامكان

بجمع المعلومات مثلا لجلاء المجهول

باستشارة صديق

بصلاة استخاره

بأشياء ووسائل كثيرة تجعل من خطوته القادمة

خطوة مدروسة بعناية

وليست عشوائية

حتى لا يندم بعد ذلك لا قدر الله

ودعواتي للجميع باغتراب سعيد و مؤقت

بارك الله في أوقاتكم

[wagdi]

أتابع الموضوع منذ بدايته..

وكل ما أقول أكتب..أرجع أقول لأه...

جايز لأن ظروفي وظروف مجيئي لكندا تعتبر لحد ما غير عادية، وجايز برضه لأن مبقاليش هنا في كندا غير سنة واحدة بس... وقبلها لفيت بلاد الله خلق الله... حتى أصبحت ممن يعيشون في حقائبهم... كل مكان أذهب إليه أعرف أني لن أمكث فيه إلا قليلاً... الشنط دائماً مفتوحة... السكن دائماً متغير... السيارة دائماً مؤجرة... حتى الملابس لا أعرف حين أشتريها أللحر سأرتديها أم للصقيع...

وعلى مدى السنين حاولت أن أوجد مقارانات بيننا وبين خواجات بني الأصفر... وخاصة في مجال العمل... ووجدت أننا كمصريين لو أعطينا الفرصة نكون أفضل من أفضل خواجة...ونتفوق عليهم علمياً وعملياً... بس خد بالك من كلامي "لو أعطينا الفرصة"...

والمشكلة هو إننا دائماً ما نتطلع لهذه الفرصة لإقتناصها ونظن أنفسنا بذلك من ذوي الطموح... والفارق أن خواجات بني الأصفر لا يتطلعون للفرص بل يصنعونها صنعاً بأنفسهم...

فنحن بحكم تربيتننا في بيوت ابائنا حتى نتزوج... وتكفلهم بنا وبمصاريفنا من مأكل وملبس وتعليم، بل وتعليم جامعي ومساعدة في الزواج...بل وفي كثير من الأحوال المساعدة في إيجاد الزوجة نفسها... تولدت عندنا قناعة مزمنة أن الدنيا تدين لنا بمتطلباتنا...

فأنا مطيع لوالدي إذن سيعطيني والدي المصروف...

أنا بذاكر وبادح إذن من حقي على الدنيا أن أدخل الكلية التي أشاء...

أنا تخرجت إذن من حقي على الدنيا أن أعمل في الوظيفة التي أحلم بها...

أنا جاهز من مجاميعه إذن من حقي على الدنيا أن أجد الزوجة التي أريد...

أنا معايا شهادة كذا وخبرة كذا إذن من حقي على الدنيا وعلى الفرنجة بنو الأصفر أن أعمل بمهنة تليق بي...

والمصيبة أن الدنيا لا تدين لأحد فينا بأي شئ من الأساس...

لا بزوجة ولا بشهادة ولا بعمل...

والفرصة تأتي لشخص ولكنها لا تأتي لمائة شخص...

وقد وجدت أن هذا الفرق بيننا وبينهم... خاصة في موضوع الشغل....

فشباب بنو الأصفر (حتى ميسوري الحال منهم) يعملون من سن 15 و 16 سنة في الأجازات في وظائف بسيطة ليدخروا نفقات تعليمهم الجامعي (ومن منا يفعل ذلك) وأثناء الجامعة ينتقلون من بيوت أبائهم إلى المدينة التي فيها جامعتهم ويعملون في الفترات المسائية لسد حاجاتهم ونفقاتهم... ومن السنة الثانية لهم في الجامعة يبتدوا يحطوا عينهم على شركات معينة يريدون العمل بها...ويبتدوا يراسلون هذه الشركات ويجمعون المعلومات عنها ويبحثون عن اي شخص يعرفونه أو يتعرفون عليه بداخلها ليمدهم بمعلومات عن الشركة وطريقة إدارتها ومنتجاتها وحتى شخصية من يعملون في قسم الموارد البشرية بها...حتى يعرفوا عن هذه الشركة والوظيفة التي يتطلعون إليها فيها أكثر من العاملين فيها...

ثم يبدأون بكتابة سيرتهم الذاتية وإرسالها إليهم... وقد رأيت بعض هذه السير الذاتية ونظامها وما فيها من عرض لخبرات وأبحاث ودراسات (ولاحظ كل ده لواحد لسة ماتخرجش من جامعة)... وقارنته بين ما كان يعرض علي من سير ذاتية في مصر بحكم عملي...والله العظيم كده...

صورة!!!

بسم الله الرحمن الرحيم واخدة نص الصفحة...

الأسم،

العنوان،

الكلية، التقدير،

الموقف التجنيدي،

الديانة: مسلم!!!

وخلاص كده...

لما كنت أعمل مقابلة مع واحد...طب يابني تعرف الشركة الي انت جاي تشتغل فيها دي منتجاتها إيه؟ يقوللي معرفش..

طب يابني عندك أي خبرة غير دراستك؟ يقوللي لأة

طب تعرف تقوللي 10 أس تلاتة بكام...يقوللي تلاتلاف!!(وهذا السؤال سألته بنفسي لما لا يقل عن عشرة من كليات تجارة وعلوم وهندسة وماعرفوش يجاوبوا...)

الأستاذ أشرف يقول خبير نرويجي وبياخد كذا وكذا وهو لا يعرف يمسك سماعة...

وأنا ايضاً يا سيدي اعرف طبيب أمتياز تخرج ولا يعرف يدي حقنة وعندما أستغربت اكد لي أن معظم زملاءه لا يعرفون أيضاً...

الفكرة إن بنو الأصفر يعلمون هذا...وخاصة في مجتمع مثل المجتمع الكندي قائم على المهاجرين...ويعلم القائمون بالأعمال هنا جيداً أي البلاد تصدر شهادات وتعليم بجد وأي منها شهاداتها لا تساوي الحبر المكتوبة بها...

فالموضوع مش موضوع ناس بتشيل الحفلة من تحت أو من فوق...الموضوع بالنسبة لصاحب العمل مقارنة بين وافد من بلاد مشكوك في نظامها التعليمي، لا يعرف شيئاً عن أساليب العمل هنا ولا عن طباع وعادات البشر المفروض فيه أنه سيعمل بينهم رئيساً أو مرئوساً، ولا قوانين العمل وقوانين النقابات ووو.... وبين واحد من أهل البلد معه شهادة من جامعة يعرفها ويعرف مستواها وعنده خبرة ويعرف طبيعة العمل والسوق والمنافسين والقوانين وماله وما عليه...

والمقارنة طبعاً غير متكافئة وترجح في معظم الأحوال لإبن البلد...

لذلك فكل من اعرفهم ممن نجحوا في هذا البلد بدأوا بأعمال أقل مما كانوا عليه في بلادهم بكثير ولكن لم يتوقفوا عند ذلك وبدأوا في الدراسة من جديد وتحصيل شهادات وخبرات جعلتهم يتقدمون للمناصب التي يستحقونها...

وعلشان ماطولش (وإن كنت طولت أوي) بس شوف يا اخ اشرف...

إن كنت ممن على استعداد أن تكون ممن لا ينتظرون من هذه الدنيا شيئاً بل ينطون في كرشها ويقاتلون حتى يدركوا ما يريدون فسافر وتوكل على الله واعلم أنك مصيب ما رزقه الله لك بأسبابه...

وإن كنت لست على أستعداد لعمل أقل أو دراسة مستمرة... أو كنت ممن لا يحبون المجازفة ويتبعون مبدأ أعيش بين اهلي متهان ولا أعيش بين الغريب سلطان... (وهي وجهة نظر معتبرة لا تقلل من شأن احد) فأبق في بلدك وحاول أن تخلق لنفسك فرصاً في بلدك، وإن كانت البلد مش بتاعة الكلام ده..

بالمناسبة يا دكتور أشرف...

الدين هنا...زي الدين في مصر...زي الدين في السعودية...

وفرص الإنحلال صدقني واحدة...

وإمكانية التربية الدينية السليمة برضه واحدة...

والحكمة ضالة المؤمن...إن وجدها هو أحق الناس بها....

وكذلك الحياة الكريمة... فالمؤمن أحق الناس بها...أكانت في كندا، أكانت في جنوب أفريقيا...

والمواضيع خلاص بقت بطرميخ...فمصر لم تعد قوقعة الإسلام زي زمان علشان تقول أقعد وأنا مطمن على عيالي...

فلا في مصر إسلام ولا في كندا إسلام...وصار المسلمون المتمسكون بدينهم كالغرباء في كل مكان...حتى في مصر...

أنا طولت أوي...بس الواحد كان شاحن في نفسه كتير...

أعذروني على إطالتي...وأعذروني إن كان كلامي قليل المعنى كثير الخطأ...

وربنا يوفق الجميع...

[ashrafsm]

السلام عليكم جميعا ورحمة الله

أشكر جميع الأخوة والأخوات الذين قاموا بقراءة الموضوع و ابداء الرأي والنصيحة اللي الواحد فعلا محتاجها قوي

هذه الأيام :)

وأقول للأخ هادي تاني فكر تاني ياابني (أهو انتم كده ياشباب اليوم.......... :D )

سبحان الله - واحد بيفكر علشان ينزل وواحد بيفكر علشان يطلع - سبحان الله

الدنيا مش فلوس وشراء دماغ ولمة وصحبة حلوة في مصر وخلاص

صدقني كل ده ستشعر بحلاوته فقط يوم والا اتنين وعلي الأكتر شهر من تاريخ رجوعك طيب وبعدين

مع أول احتكاك في أي مصلحة ومع أي موظف غلبان سوف تلعن اليوم الذي فكرت فيه بالرجوع لمصر

وتقول فينك يابرد كندا ووقفة المحطة (علي فكرة هو ازاي مفيش محطات تحت الأرض)

للأسف في مصر حتي في الخليج الآن كل حاجة ماشية بالرشوة والواسطة وقلة الأدب أحيانا

أجازاتي لاتتجدد إلا بعد اكرامية للموظف ومن غير كده مفيش حاجة حتخلص (أليس هذا حرام)

تشيل مخالفة سيارة (السيارة مرفوعة في الجراج خللي بالك ) لازم اكرامية (برضه غلط)

كيف يتصرف ابني عندما يراني اعمل كده

تحاول تدور علي مكان محترم تقعد فيه انت والعيال شوية !!!! مفيش

أصبحت تشك في الماء الذي تشربه والأكل الذي تطعمه لعيالك (علي فكرة اللحمة ممكن تطلع لحمة حمير) أعزكم الله

ياأخي الواحد عايز يطلع أولاده بعيد عن الكذب والغش والنفاق

اذن المسألة مش فلوس

ياعم هما اللي معاهم فلوس في مصر عارفين يتمتعوا بيها !

علي فكرة أنا مش باقل كدة علشان أنا مقرر السفر خلاص وعايز حد يشجعني أبدا - خالص

الواحد فقط بيفكر معاكم بصوت عالي

وأراء زي آراء حضرتك والأستاذ وجدي والأخت الفاضلة الهام والعنتبلي بيه والأستاذ حورس وshow والصاوي

آراء قيمة ويجب الأخذ بها (اعتذر اذا نسيت اسم)

ومازالت كندا بهذه البشاعة :sad: !

[ashrafsm]

خلاص ياجماعة اتخذت قراري والحمد لله :angry:

الحمد لله الذي هدانا لهذا وماكنا لنهتدي لولا أن هدانا الله

أنا مش مسافر ولو جابوا لي كندا علي الباب ومعاها رئيس الوزارا بتاعهم ومعاه الجنسية

سوف أرفضها

فبعد كل ماعرفته - لايشرفني أن أحمل جنسية بلد كهذه

عايز حد يبارك لي علي القرار والفضل لله أولا ثم لكل من شارك ونصحني :blush:

[هادي]

الف مبروك يا دكتورنا الحبيب

مبروك أولا انك اتخذت قرار وخرجت من منطقة الحيرة

ومبروك جدا ثانيا انك مرتاح لقرارك

ربنا يجعل الرضى بين عينينك على الدوام

فتسعد بما وهبك

ولا تبك على ما فاتك

قرار أصفة أنا شخصيا بانه حكيم وشجاع

ربنا يفتح عليك و يزيدك ولا يحرمنا من صالح دعاك

و يارب نشوفك في مصر على خير في يوم من الايام

مين عارف

اللقى نصيب زي ما بيقول المثل

احترامي وتقديري

[ايهاب سالم]

أنا مش مسافر ولو جابوا لي كندا علي الباب ومعاها رئيس الوزارا بتاعهم ومعاه الجنسية سوف أرفضها "

يا راجل .. طب عيني في عينك كده :angry:

فبعد كل ماعرفته - لايشرفني أن أحمل جنسية بلد كهذه

يا راااااجل .. طب برضه عيني في عينك .. ايه في رأيك البلد اللي جنسيتها تشرف ؟ :sad:

احنا كده .. عاطفيين .. نحب قوي و نكره قوي

لما يكون مزاجنا في حاجه نطلع بيها السما و نعظم ايجابياتها و نقلل من سلبياتها و العكس صحيح أيضا

عايز حد يبارك لي علي القرار 

ليه أنت مش متأكد ؟

انا بس حبيت الفت النظر لتطرف المشاعر الموجود عندنا كلنا مش انت بس

عموما ده قرارك .. مبروك و بالتوفيق

وطز في كندا الف مره :P

[ashrafsm]

أخي الحبيب هادي

الشرف لي ياأخي اني أتعرف بك في مصر أو في أي مكان إلا كندا :angry:

ولا أنسي فضل الله ثم فضلك وجاءت مداخلاتك والأخوة لتضئ لي الطريق

ولن تقدر أخي الحبيب كم أنا سعيد بهذا القرار

كما لو كان جبل فوق صدري ثم أراحني الله منه

ولكنني نفسي أعمل حاجة قبل أن أغلق الحوار في هذا الموضوع وإلي الأبد

نفسي أعمل حاجة لأخواني وحبايبي اللي بيفكروا يروحوا كندا أحذرهم بها من الخدعة الكبري

نفسي أطلب طلب من القائمين علي هذا المنتدي الجميل - أن يقوموا بتثبيت هذا الموضوع ولو لأسبوع واحد

فقط لما فيه من نقاشات هادفة وبناءة ومن باب قول الله عز وجل "وتعاونوا علي البر والتقوي ولاتعاونوا علي

الإثم والعدوان"

وأكرر شكري لأخي الغالي هادي الذي كان من أول المهنئين

[ايهاب سالم]

أخي الكريم / أشرف

وراك وراك :angry2:

أنا بس جت لي معلومات جديده من أصدقائي اللي مقيمين في كندا ومن اللي كانوا مقيمين في كندا و وبيشتغلوا معايا في قطر حاليا

حالات فرديه بس يمكن تلقي بعض الضوء على المجتمع ده و توريك جوانب أخرى يمكن تساعدك تاخد القرار

1- حكى لي صديقي الفلسطيني الكندي عندما كان هناك كان له صديق فلسطيني في منتصف العمر عنده 5 أولاد كان يعمل بالخليج منذ شبابه و ذهب الى كندا بتأشيرة رجال أعمال عشان يعمل مشروع هناك و الانجليزي بتاعه تعبان .. المهم دخل في بيزنس لا يفهم فيه و نصحه الاصدقاء ان يتمهل قليلا حتى يتعرف على القوانين و طبيعة البلد و يدرس السوق و المنافسين و يقوي الانجليزي بتاعه الا أنه أصر و دخل بصدره و بعقلية الفهلوه العربيه و طبعا ده سوق مفتوح و المنافسه شرسه و البقاء للأصلح .. ابتدى يخسر .. نصحه الأصدقاء بتصفية البزنس و استرجاع جزء من رأس المال الا ان الكرامه أخدته و أكمل للنهايه و خسر كل فلوسه و مع ذلك رفض أن يبحث عن أي عمل يعول به أسرته (العنجهيه العربيه)

نصحه صديقي بالاتصال بالضمان الاجتماعي الكندي و طلب مساعده .. الا أنه رفض وكانت وجهة نظره أنه دخل كندا رجل أعمال و حول كل فلوسه الى كندا بعلم الحكومه و خسرها بسبب سوء ادارته للبزنس يبقى ليه الحكومه هتساعده و المنطقي انها تساعد الناس اللي دخلوا skilled workers لأنها اختارتهم عشان مؤهلاتهم مش فلوسهم .. المهم صديقي قالوا له بس جرب مش هتخسر حاجه

الراجل اتصل و ردت عليه الموظفه و بعد أخذ بياناته و رقم الضمان الاجتماعي و شرح مشكلته كانت المكالمه تسير بصوره روتينيه الى أن قال لها

i can't feed my children

طبعا هو كان لا يقصد المعنى الحرفي للجمله لأنه كان يسكن في بيت من طابقين و عنده سياره و يأكل و يشرب و لكن فلوسه قربت تخلص .. بس لأن الانجليزي بتاعه تعبان .. كان قصده يقول أن لو أستمر الحال على ما هو عليه .. لن يقدر على إطعام أولاده في القريب العاجل .. فخرجت منه الجمله في صيغة المضارع بدل المستقبل

المهم الموظفه سكتت و قالت له

sir, could you pleasee repeat what you've just said

كرر نفس الجمله

i can't feed my children

قالت له .. سيدي .. سوف نرى ما نستطيع أن نفعله و نتصل بك مره أخرى

افتكر أنها زحلقته .. بعد نصف ساعه وجد 3 سيارات أمام المنزل .. سيارة شرطه و سيارة إسعاف و سيارة الضمان الاجتماعي

و استأذن الناس في الدخول بمنتهى الأدب .. دخل بتوع الاسعاف .. فين الأولاد .. ابتدوا يكشفوا عليهم ويسألوا الراجل .. من امتى أولادك ما بياكلوش و ازاي تسكت و ما تطلبش المساعده من بدري .. إزاي تعرض أولادك لسوء التغذيه و لقى الناس بتوع الضمان الاجتماعي داخلين بصناديق أكل .. لبن و معلبات و فاكهه الخ

الراجل فهمهم الوضع .. و الحكومه عملت له معاش ضمان اجتماعي له و لزوجته و لكل ابن من ابناءه و بتدفع عنه إيجار البيت

عايزك تتخيل لو الموقف ده في مصر كان الراجل هيحصلوا ايه ..

لو اتصل بالشؤون الاجتماعيه و قال لهم انا مواطن مصري .. مش مهاجر من دوله تانيه و لسه ما خدتش الجنسيه و كان معايا فلوس كتير قوي و خسرتها في التجاره وولادي مش لاقيين ياكلوا .. موظف الشؤون الاجتماعيه هيقولوه ايه !!!!!

قول انت بقى .. أكيد كلمه أبيحه :rolleyes:

عشان بس نحاول نوصل للجنسيه اللي تشرف و اللي ما تشرفش

هاكملك باقي الحكايات مره ثانيه عشان الوقت ضيق

تحياتي ..

تم تعديل 6 ديسمبر 2005 بواسطة ايهاب سالم

[ashrafsm]

أخي الحبيب إيهاب :)

أطال الله في عمرك وبارك لك في أولادك

لاأنكر أنهم متقدمين من الناحية الإنسانية والتنظيمية ولكن كما قالوا كل الأخوة في المداخلات من قبل

هي بمثابة package take it or leave it

فكما أن لها مزايا معيشية فإن لها مساؤئ معيشية وأخروية أيضا (وراجع المداخلات)

وانت طبعا لايرضيك اني بعد العمر والخبرة دي كلها في غرف العمليات والمستشفيات اللي منها قائم وحصيد

أروح أشتغل في مطعم والا سواق تاكسي

والا أنت ترضاها لابن بلدك :D

[ايهاب سالم]

أخي الحبيب إيهاب  :)

أطال الله في عمرك وبارك لك في أولادك

لاأنكر أنهم متقدمين من الناحية الإنسانية والتنظيمية ولكن كما قالوا كل الأخوة في المداخلات من قبل

هي بمثابة package take it or leave it

فكما أن لها مزايا معيشية فإن لها مساؤئ معيشية  وأخروية أيضا (وراجع المداخلات)

وانت طبعا لايرضيك اني بعد العمر والخبرة دي كلها في غرف العمليات والمستشفيات اللي منها قائم وحصيد

أروح أشتغل في مطعم والا سواق تاكسي

والا أنت ترضاها لابن بلدك :D

<{POST_SNAPBACK}>

بالضبط يا صديقي

هذا ما أريد نصل اليه .. ان الحياه في كندا أو مصر ليست شر مطلق و لا خير مطلق و لكن الأمر نسبي

و يختلف حسب ظروف الشخص و مهنته و ثقافته

لذلك إختار البلد التي تستطيع فيها ممارسة مهنتك التي تحبها

وفقك الله

[الرافعي]

أخي الحبيب هادي

الشرف لي ياأخي اني أتعرف بك في مصر أو في أي مكان إلا كندا  :)

ولا أنسي فضل الله ثم فضلك وجاءت مداخلاتك والأخوة لتضئ لي الطريق

ولن تقدر أخي الحبيب كم أنا سعيد بهذا القرار

كما لو كان جبل فوق صدري ثم أراحني الله منه

ولكنني نفسي أعمل حاجة قبل أن أغلق الحوار في هذا الموضوع وإلي الأبد

نفسي أعمل حاجة لأخواني وحبايبي اللي بيفكروا يروحوا كندا أحذرهم بها من الخدعة الكبري

نفسي أطلب طلب من القائمين علي هذا المنتدي الجميل - أن يقوموا بتثبيت هذا الموضوع ولو لأسبوع واحد

فقط لما فيه من نقاشات هادفة وبناءة ومن باب قول الله عز وجل "وتعاونوا علي البر والتقوي ولاتعاونوا علي

الإثم والعدوان"

وأكرر شكري لأخي الغالي هادي الذي كان من أول المهنئين

<{POST_SNAPBACK}>

وفقك الله في أي مكان يا أخ أشرف

فقط أريد أن أعرف الزملاء وضعوا website يتحدث عن حقائق ضد كندا في موقع اسمه www.notcanada.com لكنه لا يعمل أبداً.

ممكن أعرف فيه إيه ؟

[ايهاب سالم]

انا وضعت رابط الموقع و ما زال يعمل و لسه مجربه حالا

تم تعديل 7 ديسمبر 2005 بواسطة ايهاب سالم

[الصعيدى]

السلام عليكم ورحمة الله وبركاته

احب ان اعرفكم بنفسى انا اخوكم الصعيدى اتابع المنتدى منذ حوالى الاربعة شهور الماضية وذلك لاننى قدمت اوراقى الى الهجرة الى كندا.

واحب ان اضيف تعليق الى كل من يريد الهجرة

لا تنسوا الله والتوفيق من عند الله والله معنا فى كل مكان واوان واتوكلوا على الله فى اى شى فمن توكل على الله فهو حسبه .

[haivi]

من رأيي المتواضع

1- أعلى وأرقى مستوى معيشه على الكره الأرضيه هي كندا .

2- جميع الديانات المعروفه والرسميه والغير رسميه متوفره في كندا .

3- شهادات جامعيه وخبرات إقليميه لا تفيد ولا تعتمد في كندا.

4- رعاية الأطفال حتى من الأهل الغير معتدلين هي في كندا

والكثير الكثير مما يجعلها في المرتبه الأولى لمقرري (الهجره) وليس العمل المؤقت

عن نفسي أنصح كل من تهمه شهادته التي درسها وأتقنها وأحبها ويصعب عليه التنازل عن العيش دونها أن لا يفكر في كندا لا من قريب ولا من بعيد

فلك أن تظل مهندساً ذو خبره أو جراحاً متخصصاً ومشهوراً داخل بلدك على أن تأتي لكندا وتعاند نفسك قبل القانون الكندي الذي لا يعترف بأي شهادات علميه جامعيه إلا بعد سنوات المعادله والتمكن من الإنجليزيه(الرفيعه) أو الفرنسيه الكنديه(بمقاطعة كيباك)

أما فمن هو مثلي ومن المؤمنين بأن العمل والتقدم في مستوى المعيشه لا يجب ربطه بمؤهلي إن كنت مكتسباً لخبرات (شريفه) ومتنوعه من الأعمال فأهلاً به في كندا ناسياً بل متأكداً من نجاحه دون شك مادامت هناك الصحه والرغبه والجديه في العمل

الأكل الحلال له أماكنه ومعلون عنه بكلمتين : إما بالعربيه ومكتوب (حلال) وإما بالإنجليزيه ومكتوب (كوشر) وهذا لليهود الذين لا يأكلون اللحوم مع الألبان وخلافه

بكل المقاييس وبكل الأعراف كندا أرقى وأرحم من جيراننا الدول العربيه والتي تسخر المهندس والطبيب ومهما كانت مادياته عاليه فهو مجرد آتٍ لهبش أموالنا وسيرحل !!

(ده في نظرات عينيهم للمصريين اللي بالطبع مستواهم التعليمي والحرفي أعلى من مدير إدارة الشركه اللي هو بيشتغل فيها في إحدى هذه البلاد

هنا في كندا

لا يهم أحد دينك إيه ولا ملتزم ولا لأ وجيت منين وليه ولإمتى

حتى لو حتموت في الشارع حيقولولك مفيش مانع من موتك بس موت على جنب علشان متقلقش الناس في الشارع

يعني بالعربي إيدك هي رزقك وعقلك هو هويتك وإحترامك لنفسك بيفتحلك أبواب كل الكنادوه لو وثقوا فيك ووثقوا في إمكانياتك في عملك

ولا أجد عيباً في طبيب جراح يقتني محلاً صغيراً لبيع الخردوات أو المأكولات بل ولا أجد سبباً لرفضه بالذات لو كان من حر مالي وحلال فأرباحه قد تعوضني عن شهادتي التي أفتخر بها ويهينها الغير أو لا يعترف بها

: أصدقائي وإن كانت الغربه صعبه وقاسيه إلا إنها السبيل أحياناً لشراء الكرامه والحفاظ على الكيان قبل أن يتوه في حضيض الصراعات السياسيه في الشرق الأوسط

ومهما باعدت الأيام بالمصري (شريفاً كان أم خسيس ) لا يرضى عن مصر بديلا وإلا

اللي ملوش خير ف أهله ... ملوش خير ف الناس

**

كلمة النهايه للسائلين عن كندا والهجره .

إن كنت تتطلع لكيان ديني أسري في كندا ستجده

إن كنت صاحب سواعد فنانه وخبرات ييترجمها يديك لأعمال فستنجح

إن كنت جاي تلم فلوس وتمشي فمعطلكش أصلها مش بالسهل ومش بالسرعه دي

آسف للإطاله

[ايهاب سالم]

أخ / هايفي

و اضح انك دماغ

ممكن بس توضح معنى الجمله دي أكتر

4- رعاية الأطفال حتى من الأهل الغير معتدلين هي في كندا

<{POST_SNAPBACK}>

و بالمناسبه .. بدافع الفضول فقط .. يعنى ايه haivi

[haivi]

إيهاب سالم :

تحياتي وشكراً على وصفك لي بدماغ

أقصد في جملتي هذه ولو أنه خانني التعبير بها :

(رعاية الأطفال حتى من الأهل الغير معتدلين هي في كندا )

أنه ولو صادف وصول عائله (منحطه أو سوقيه ) ومع معرفتهم بكندا وبقوانين كندا وصرامة كندا في حقوق الأبناء وسبل الرعايه والتربيه . سيعتدلون يا صاحبي أعدل من الخط المستقيم .

أما حكاية إسمي فهذا خطأ مطبعي وقع منذ عشرون سنه على أقل تقدير في الكارت الشخصي الذي يحمل إسمي ومهنتي في مصر

وعجبتني اللعبه فسوق فيها

حاول تلزق الحرفين التالت والرابع وتطلع منهم حرف واحد حتعرف فين اسمي :blink: