مغترب-طبيب/ صيدلى/ تمريض اتفضل معانا

[icehearted girl]

طفل اقل من سنة مع خادمة؟؟؟

[icehearted girl]

متهيالي الموضوع دا صعب تربويا يا دكتور ...ولا إيه يعني مش اي خادمة هتنفع

[طبيبة مستجدة]

طب اية الحل فى رايك اودية حضانة احسن واية المشكلة مع الخادمة

[icehearted girl]

يعني انا اقصد ان الطفل دا هيكون زي الاسفنج هيتشرب بكل حاجة منها

متهيألي حضانة افضل هيتعاملوا معاه تربويا بس تكون حضانة نموذجية

انما خادمة في البيت هيبقي هاممها شغل البيبي ومش هيمها تفكير البيبي نفسه

والله أعلم

[drabouzeid]

سلامى لكل الاعضاء و بالاخص د حازم

تسجيل متابعة

[المر]

السلام عليكم دكتور حازم

وعليكم السلام ورحمة الله

انا استفدت من المعلومات المفيدة جدا فى الباب.

الله يكرم أصلك ويبارك لكى.

انا بكالوريوس تمريض خبرة 11 سنة قسم العمليات منها 9 سنين فى السعودية .

بكالوريوس التمريض فرصة عالية جدا! فى السعودية عن دبلوم التمريض هذا أولاً

ثانياً: حضرتك ممرضة عمليات فدى ميزة تانية ليكى وفرصك عالية جداً لو رحتى مكتب التوظيف السعودى هما محتاجين كتير اليومين دول من هذة الفئة وبيبحثوا عنها فى كل مكان.

قدمى ومش تترددى وإن شاء الله خير .

سؤالى لحضرتك انا هخلص عقدى بعد

5 شهور لو قدمت خلال مكتب التوظيف السعودى بالقاهرة هيكون فرصة جيدة فى الحصول على عقد عمل .

فرصتك كبيرة جداً جداً وراتبك محترم جداً.

و فى حالة حصولى على العقد هل ممكن اعمل استقدام

لزوجى و اولادى.

إستقدام الزوج والأولاد من حقك طبعاً محدش يستطيع يمنعك من كدة بس فية نقطة هأسئل فية بكرة وأرد عليك وهى هل هيكون الإستقدام ليكى مجاناً زى الأطباء ولا هيدفعوكى فلوس فى الجوازات بس بصفة عامة معانة كتير ممرضات مستقدمين أسرهم كلها وسكنين فى البلد هنا ومبصوطين جداً.

آسفة على الاطالة و شكرا على المعلومات التى فى الباب.

:) :blush2: :lol: :lol:

نورتينى وخدى راحتك فى الأسئلة

السلام عليكم دكتور حازم

شكرا على اجاباتك الواضحة الكافية .

انا كنت سألت حضرتك عن استقدام الزوج و الاولاد و حضرتك وعدتنى بأنك سوف تسأل و ترد عليه.

انا اسفة على ازعاج حضرتك.

جزاك الله كل خير.

:lol: :lol: :lol: :sad:

[rewsha]

شكر ا د/حازم على مجهودك الرائع . والله دايما بادعي ربنا يكرمك انت وكل الناس الي بتحب تعمل خير وتخدم زي حضرتك في كل المنتديات. وكنت عايزه اطرح فكرة ان الناس اللي سافروا عن طريق مكتب مصر الحجاز او بايونيرز يكتبوا لنا تجربتهم مع المكاتب دي بالتفصيل واخذوا منهم كام زي ماحضرتك كده كتبت عن تجربتك مع مكتب التوظيف السعودي علشان يبقى عندنا معلومات اكتر. وهل دايما المكاتب دي بيكون عندها عروض وله بتنزل اعلانات في الجرائد..........الخ ....الخ

[dentogabalo]

السلام عليكم دزحازم

جزاك اللله عنا كل خير

ويا رب ان شاء الله يكتبلك الموضوع ده صدقة جارية

انا كان ليا كذا استفسار كده

انا طبيب اسنان و مراتي شرحي دفعة 2005 وكنت كلمت حضرتك قبل كده

الكفيل عايز يطلعنا بتأشيرة واحدة ... فكان عاملها باسم مراتي وانا مرافق و قالي هنقلك كفالة هناك ... بس مراتي حامل

لما جينا نعمل كشف طبي قالولي في المستشفى انها هتطلع غير لائق بسبب الحمل وان بناء عليه السفارة مش هترضى تتطلعلها تأشيرة عمل

وبعد مشاورات مع المكتب منهم لله اللي مش فاهمين شغلهم .. قالولي انه خلاص هنطلع التأشيرة باسمك و هيا مرافق

بس منهم لله هيدفعوني رقم نت تاني لانهم بيقولوا ان دي فيزا جديدة

*سؤالي هوا هل من السهل كده ينقله الفيزا منها ليا؟

*وطب ليه من الاول كانوا عملينها باسمها؟(لما سالتهم قالولي هيا الفيزا جاية مسماها طبيبة اسنان) كلام انا مش فاهمه و حاسس انه غير منطقي

بس قالولي مش هتعيد تحليل الفيروس تاني ... هعمل بس تصحيح رقم النت من معامل الوزارة

*وهل فعلا هتقبل السفارة بسفر مراتي و هي حامل (مرافق) .. ولا هما بيرفضوا اصلا مبدأ سفر الحامل ؟

*طب لو ادونا التاشيرة على انها مرافق و كان كله تمام والاشيا معدن .. هل حملها هيسبب مشكلة لما تيجي تشتغل .. يعني مثلا ممنوع شغل الحامل هناك حتى بعد ما ينقل الكفالة او مثلا مش هيرضوا تخش امتحان الهيئة او حتى تاخد رخصة مؤقتة؟

*انا استلمت نتيجة التحليل بالايميل و مكتوب فيها انه على المفحوص مراجعة القنصلية و انهاء اجراءات التعاقد خلال شهر فهل ده معناه ان النتيجة سلبية لانهم مش كاتبين النتيجة ؟

*هل توثيق قسيمة الجواز و شهادة الميلاد مهم لحاجة معينة ... ولو مهم ... في اختام هناخدها قبل الخارجية ؟ يعني وزارة العدل و الكلام ده

*رخصة السواقة الدولية هل هيا شغالة في السعودية وايه اجراءاتها هنا في مصر؟

*هل موافقة سفر الزوجة اللي بتتعمل من الشهر العقاري محتاجة تتوثق من الخارجية برده ؟

*مكتوب في نهاية ورقة النت عبارة حبيت اسأل عنها ... (اتعهد بأن اوافق على اخذ بصمات الاصابع وقزحية العين .... وان التزم بقوانين المملكة ) ايه معنى الجزء الاول؟

* هل في حاج اسمها تامينات على العاملين بالخارج انا هعدي عليها في اجراءاتي ... و ده امتى و ليه؟

وشكراااااااااااااااا... واسف على الاطالة

تم تعديل 22 مارس 2009 بواسطة dentogabalo

[hazemtara]

السلام عليكم د0حازم

جزاك اللله عنا كل خير

ويا رب ان شاء الله يكتبلك الموضوع ده صدقة جارية

شكراً جزيلاً لك،،

يا عم إتفضل إنت صاحب بيت مش غريب، تحت أمرك على طول ، وكل الزملاء. :lol:

انا كان ليا كذا استفسار كده

انا طبيب اسنان و مراتي شرحي دفعة 2005 وكنت كلمت حضرتك قبل كده

الكفيل عايز يطلعنا بتأشيرة واحدة ... فكان عاملها باسم مراتي وانا مرافق و قالي هنقلك كفالة هناك ... بس مراتي حامل

لما جينا نعمل كشف طبي قالولي في المستشفى انها هتطلع غير لائق بسبب الحمل وان بناء عليه السفارة مش هترضى تتطلعلها تأشيرة عمل

وبعد مشاورات مع المكتب منهم لله اللي مش فاهمين شغلهم .. قالولي انه خلاص هنطلع التأشيرة باسمك و هيا مرافق

بس منهم لله هيدفعوني رقم نت تاني لانهم بيقولوا ان دي فيزا جديدة

*سؤالي هوا هل من السهل كده ينقله الفيزا منها ليا؟

*وطب ليه من الاول كانوا عملينها باسمها؟(لما سالتهم قالولي هيا الفيزا جاية مسماها طبيبة اسنان) كلام انا مش فاهمه و حاسس انه غير منطقي

فى الحكومة الست الحامل غير مسموح لها بالتعاقد مع وزارة الصحة ومن التحاليل الأساسية تحليل الحمل لو طلع إيجابى يرفض التعاقد، لكن بعد التعاقد لو راحت الست السعودية وحملت مباشرة مفيش أى مشكلة ؟؟؟!!!!!

تسئلنى وتقولى لية كدة أقول لك هو دة القانون لازم الست تروح السعودية مش حامل وبعدين براحتها بعد كدة إن ش الله حتى تحمل 10 مرات مفيش حد هيكلمها.

طبعاً فعلاً الفيزا لازم تتغير من جديد وتُعدل تماماً بإسمك إنت والزوجة تكون مرافقة ليك، بس دة بالمناسبة مش وحش ليك دة كويس ؟؟؟ لية.

لأن إنت كل التعاملات هنا هتم فى هذة الحالة بإسمك إنت يعنى حضرتك هتكون كفيل زوجتك والإقامة الأساسية بتاعتك إنت وزوجتك هتكون إنت كفيلها ودة وضع كويس ، يعنى حضرتك تعرف تنزلها فى اى وقت مصر دون اخذ رأى الكفيل او صاحب العمل لو فية ولادة ولا حاجة ولا لو حبيت غنها تنزل لأى سبب.

لما تحب تطلع رخصة قيادة كدة او تأجر بيت او تشترى سيارة كدة الأمور سهلة لأنك تعمل فى السعودية وعلى كفالة سعودى دة اسهل ليك ، وكذالك لما تحب تادم فى المدارس للأولاد او الحضانات وهكذا بس طبعاً بتأخذ إذن الكفيل ف كل دة.

بس قالولي مش هتعيد تحليل الفيروس تاني ... هعمل بس تصحيح رقم النت من معامل الوزارة

الكلام دة صحيح فعلاً مش هتعيد التحليل تانى ، التحليل على ما أذكر صالح لمدة 6 شهور وبعد كدة أظن لازم يعاد، تصحيح رقم النت ضرورى لأن الفيزا هتتغير بغسم شخص تانى وهو غنت.

*وهل فعلا هتقبل السفارة بسفر مراتي و هي حامل (مرافق) .. ولا هما بيرفضوا اصلا مبدأ سفر الحامل ؟

*طب لو ادونا التاشيرة على انها مرافق و كان كله تمام والاشيا معدن .. هل حملها هيسبب مشكلة لما تيجي تشتغل .. يعني مثلا ممنوع شغل الحامل هناك حتى بعد ما ينقل الكفالة او مثلا مش هيرضوا تخش امتحان الهيئة او حتى تاخد رخصة مؤقتة؟

الموضوع كدة أصبح خارج سلطة السفارة حيث أنك إنت المتعاقد مش الزوجة والزوجة مرافقة السفارة كدة ليس لها أى دخل بزوجتك من أساسة.

حمل الزوجة ملوش دعوة بدخول إمتحان الهيئة بس ممكن يعكسك فى حالة حبت تعمل عقد عمل هنا وتنقل كفالة، بس بصراحة من الأفضل ليك غن زوجتك تفضل على كفالتك إنت دى ميزة مش عيب لية؟

خليك إنت زوجتك ما حبتش الشغل فى المستوصف دة وكنت أنت كفيلها ممكن بسهولة تشوف لها عمل فى الحكومة أو الحرس وتنقل مباشرة لكن لو كفيلها سعودى يبقى موت يا حمار مش هيوافق خالص بالعكس هينزلها نهائى ويديها ممانعة من دخول المملكة، فهمت دى ولا إية.

*انا استلمت نتيجة التحليل بالايميل و مكتوب فيها انه على المفحوص مراجعة القنصلية و انهاء اجراءات التعاقد خلال شهر فهل ده معناه ان النتيجة سلبية لانهم مش كاتبين النتيجة ؟

لا دة مش معناة إنها سلبية دة روتين عندهم التحاليل ترسل مغلقة ولا تفتح إلا بمعرفة السعودين الى فى السفارة أو القنصلية أو الجهة السعودية المخول لها الإطلاع على التحاليل مثلاً فى حالتى كان مكتب التوظيف السعودى.

*هل توثيق قسيمة الجواز و شهادة الميلاد مهم لحاجة معينة ... ولو مهم ... في اختام هناخدها قبل الخارجية ؟ يعني وزارة العدل و الكلام ده

الى أنا فاكرة إنى طلعت قسيمة الزواج من عندى هى وشهادة ميلاد الزوجة من مكتب الأحوال المدنية ووثقت بس قسيمة الزواج

*رخصة السواقة الدولية هل هيا شغالة في السعودية وايه اجراءاتها هنا في مصر؟

طبعاً رخصة القيادة الدولية شغالة فى السعودية بس لو حصلت على الرخصة السعودية هيكون أريح لك.

لو عاوز تعملها من مصر ممكن أظن من رابعة العدوية وتفاصيلها فى موضوع الطب فى إستراليا إدخل علية وإقرئها كويس.

*هل موافقة سفر الزوجة اللي بتتعمل من الشهر العقاري محتاجة تتوثق من الخارجية برده ؟

دى معرفهاش لأنى ما عملتهاش وقت ما كنت مسافر.

*مكتوب في نهاية ورقة النت عبارة حبيت اسأل عنها ... (اتعهد بأن اوافق على اخذ بصمات الاصابع وقزحية العين .... وان التزم بقوانين المملكة ) ايه معنى الجزء الاول؟

وإنت داخل السعودية هتوقع على إقرار بإنك تلتزم بقوانين السعودية الى منها حد القصاص فى حالة تجارة المخدرات وإقامة الحدود الشرعية الأخرى.

* هل في حاج اسمها تامينات على العاملين بالخارج انا هعدي عليها في اجراءاتي ... و ده امتى و ليه؟

وشكراااااااااااااااا... واسف على الاطالة

بتدفع بس التأمينات والمعاشات بتاعة وظيفتك فى مصر. :blink:

[dentogabalo]

الف شكر يل دكتور .... انا بصراحة مش عارف اقول ايه على الاجابة الوافية دي ومعلش استحملني .. انت ما شاء الله قديم و خبرة .. واحنا لسه تاتا .. فالواحد ما بيصدق يلاقي حد خبير زيك كده

انا بس في كام حاجة ما فهمتهمش اوي

*ليه من الاول بيعملوا التأشيرات باسم الدكتورة ... موكتير عروض جاتلنا بيبقوا عايزنا احنا الاتنين .. بس بتأشيرة واحدة فيقولوا انها هتطلع باسم الدكتورة .. طب ليه وجع القلب ما طالما احنا الاتنين مسافرين و احنا الاتنين شغالين ما يطلعوها باسم الراجل .. عشان يبقى اسهل و اسرع في الاجراءات؟

حمل الزوجة ملوش دعوة بدخول إمتحان الهيئة بس ممكن يعكسك فى حالة حبت تعمل عقد عمل هنا وتنقل كفالة

*معنى الكلام ده انه مش هينفع تعمل هي هناك نقل كفالة ولا عقد عمل ... و بالتالي مش هينفع تخش امتحان الهيئة اللي لازمله عقد عمل .. صح ولا انا فاهم غلط ؟

*طب لو فضلت على كفالتي هينفع يتعملها عقد عمل .. وتشتغل عادي ويبقى ليها حقوقها حتى و هيا على كفالتي ؟

*طب و ينفع و هيا على كفالتي تاخد تصريح الهيئة ؟

*يعني ايه اوافق على اخذ بصمات الاصابع و قزحية العين ؟

والف شكر يا دكتور على انك طمنتني ... في اجاباتك الوافية دي

[طبيبة مستجدة]

السلام عليكم ورحمة اللة يا دكتور حازم

انا ارجو من حضرتك ان تشرح لى ايهم افضل ان احضر خادمة على كفالة زوجى او بطريقة غير شرعية واية طرق استقدام خادمة لو افضل واى الجنسيات افضل؟

كيف احصل على ضمانات منها علشان اسيب معها الاطفال ؟يعنى اطلب منها اية ؟

[rewsha]

السلام عليكم. ايه يا جماعه معقوله محدش سافر عن طريق مكتب بايونير او مصر الحجاز مافيش حد كتب تجربته خالص طيب مكتب التوظيف السعودي د/ حازم ربنا يكرمه حكى لنا حكايته بالتفصيل معاه. لكن مصر الحجاز في ناس مشكره فيه وناس تانيه اشتكته طيب نصدق مين؟ اما بايونير كنت عايزه اساْل طيب لو جاب للواحد عقد بس مستشفى خاص يعني مش حكومي لكن عن طريق بايونير بيبقى اخباره ايه يعني بيجيب اماكن كويسه وله لا؟واخبار العموله ايه؟ لان في مكتب مصر الحجاز ناس كتير اشتكت ان المكتب بياْخذ منهم الف جنيه اجباري في الاول علشان مصاريف اللجنه اللي جايه . وان لوطلع التحليل بتاع الفيرس سي موجب يبقى انت كده راح عليك الالف جنيه . ويا ترى الواحد بيدفع العموله للمكتب امته بعد توقيع العقد وله قبله وكمان في ناس قالت ان مصر الحجاز بيخليك تعمل اقرار في الشهر العقاري انك دفعت عموله 2% من راتب اول سنه .مع العلم بانك بتكون دافع مرتب شهر كامل يعني تقريبا 12 الف . وياترى بايونير بيعمل كده برضه؟ والى اي حد مدى مصداقية العقود الخاصه في المكتبين دول ؟

[Dr.mmfriend]

رخصه القياده الدوليه من نادى السيارات

10 شارع قصر النيل

بتاخد طلب من مرور مدينه نصر وصوره الرخصه المصريه وصوره او اتنين شخصيين و40 جنيه

بتاخدها ف نفس اليوم

بس روح الصبح بدرى

[المر]

السلام عليكم دكتور حازم

انا كنت سألت حضرتك عن امكانية استقدام الزوج و الاولاد فى حالة التعاقد مع مستشفى من مستشفيات وزارة الصحة. لو سمحت

ممكن تسألى حد من التمريض اللى بيشتغلوا مع حضرتك فى المستشفى.

جزاك الله كل خير.

:blush2: wst:: :blink: jdw::

[hazemtara]

السلام عليكم ورحمة اللة يا دكتور حازم

انا ارجو من حضرتك ان تشرح لى ايهم افضل ان احضر خادمة على كفالة زوجى او بطريقة غير شرعية واية طرق استقدام خادمة لو افضل واى الجنسيات افضل؟

كيف احصل على ضمانات منها علشان اسيب معها الاطفال ؟يعنى اطلب منها اية ؟

موضوع الشغالات دة أنا مش بحبوة لأن مشاكلهم كتيرة جداً وأنا تجربتى معاهم مش كويسة ولم أكن موفق بصراحة فى تجربتى مع الشغلات.

الحصول على شغالة لة طريقين :

1- عن طريق مكاتب الإستقدام ودة أضمن وأكثر أمناً.

2-وممكن عن طريق الشغلات من داخل السعودية ودة مش مضمون لأن ممكن تكون هربانة من كفيلها ودول معظمهم ما بينقلوش كفالة يعنى لو هربت منك مش تعرفى تعملى حاجة ولا تشتكى للشرطة ولا غيرة.

الدول الى ممكن تجيبى منها شغلات هى على حسب الراتب من الأعلى للأقل راتب.

1-الفلبين ( الراتب من 900- 1000 ريال).

2- الإندونيسية (600-800 ريال).

3- الفيتنامية ( 600-700 ريال ).

4- السريلانكية ( 400- 500 ريال).

5- الحبشية ( 400- 500 ريال ).

وفتحوا باب الإستقدام الأن من دول جديدة زى دول وسط أسيا مثل طازجيكستان وتركمستان ودُول مشكلتهم كبيرة لأن تخيلى لما وجود شغالة زى الحبشية فى بيت سعودى عاملة مشاكل فما بالك من الحريم الى من وسط أسيا.

طبعاً السعودين بيحبوا النوعية دى من الشغلات لغرض فى نفس يعقوب.

ممكن نرتب الشغلات على حسب النظافة.

1- الفلبين.

2- أندونسيا.

3- فيتنام.

4- سيريلنكا.

5- الحبشة.

ممكن نرتبهم على حسب الدين.

1- الفلبين ( معظمهم مسيحين وقلة مسلمين والمسلمة من هناك غالية فى سعرها)

2- أندونيسيا ( معظمهم مسلمين).

3- فيتنام ( المسلمين قلة وباقى الأديان موجودة زى المسيحية والبوذية والهندوس ومن ليس لهم دين ).

4- سيريلنكا (المسلمين قلة وباقى الأديان موجودة )

5- الحبشة ( كل الأديان موجودة والمسلمين قلة).

تكلفة الإستقدام حوالى 9000 ريال سعودى رسوم للمكتب هنا وهناك فى بلد الشغالة ورسوم الفيزا ( بس المبلغ كلة 9000 ريال تقريباً لكل المكاتب).

حضرتك بتروحى المكتب وبتحوطى شروطك من حيث السن والخبرة والحالة متجوزة ولا مش متجوزة عندها عيال ولا مش عندها وهكذا؟؟؟؟؟ وسبق لها الشغل ولا لم يسبق.

الشغالة الى من داخل المملكة سعرها أقل لكن مشاكلها ملهاش أخر لأن دى مش بتكون على كفالتك و مش بتبات فى البيت يعنى داخلة خارجة معظمهم بعد فترة بتهرب وممكن تسرقك.

الشغالة بصفة عامة من الأفضل إنها مش تخرج خارج بيتك ولا تحتك بأى حد لأن إحتكاكها غالباً بيجيب مشاكل وبيحرضوا بعض على الهرب والغلط.

*ملاحظة:

الإندونسيات مشهورين بالسحر.

مش معنة كلامى انة الشغلات كلها مشاكل لا إنتى وحظك ،، فية زملاء لية مرتاحين جداً مع الشغلات بتاعتهم.

أنا للأسف كان حظى وحش مع الشغالة بتاعتى من سيريلنكا بصراحة خسرتنى وخربت بيتى وفى الأخر إضررت لترحيلها.

بصراحة أفضل شغالة سمعت عنها من المكاتب والزملاء هى الفلبينية لكن سعرها غالى حبتين.

بس أنا ومراتى قررنا نخدم نفسنا بنفسنا حتى لو هنموت.

:) لكى التوفيق.

[hazemtara]

رخصه القياده الدوليه من نادى السيارات

10 شارع قصر النيل

بتاخد طلب من مرور مدينه نصر وصوره الرخصه المصريه وصوره او اتنين شخصيين و40 جنيه

بتاخدها ف نفس اليوم

بس روح الصبح بدرى

جزيل الشكر وموفق

على طول.

[hazemtara]

السلام عليكم دكتور حازم

انا كنت سألت حضرتك عن امكانية استقدام الزوج و الاولاد فى حالة التعاقد مع مستشفى من مستشفيات وزارة الصحة. لو سمحت

ممكن تسألى حد من التمريض اللى بيشتغلوا مع حضرتك فى المستشفى.

جزاك الله كل خير.

;)

عيونى بس والله بنسى وأكرر أسفى أنا عندى تمريض كتير معاهم اسرهم إن شاءالله أسئل وأرد على طول ممكن يوم بس كمان.

[طبيبة مستجدة]

طب يا دكتور حازم اللة يكرمك بس انا مش عارفة طب حضرتك بتقول انك استغنيت عن الخادمة طب حضرتك لو عندك اولاد بتعمل فيهم اية وحضرتك وزوجتك بتعملوا

طب هل ممكن انهم الخادمات يخطفوا الاطفال ولا اية المشاكل

هل ممكن ان اخدها مع الاطفال معاى العمل او المستوصف احسن علشان ماسيبهاش فى البيت

طب لو طلبت منها صورة لالاقامة هل دة يحمينى ولك جزيل الشكر والتقدير

[hazemtara]

طب يا دكتور حازم اللة يكرمك بس انا مش عارفة طب حضرتك بتقول انك استغنيت عن الخادمة طب حضرتك لو عندك اولاد بتعمل فيهم اية وحضرتك وزوجتك بتعملوا

طب هل ممكن انهم الخادمات يخطفوا الاطفال ولا اية المشاكل

هل ممكن ان اخدها مع الاطفال معاى العمل او المستوصف احسن علشان ماسيبهاش فى البيت

طب لو طلبت منها صورة لالاقامة هل دة يحمينى ولك جزيل الشكر والتقدير :closedeyes:

أنا تكلمت من قبل وقلت أنة موضوع الشغالات دة صعب شوية وكل حاجة واردة مع الشغالة طبعاً.

أنا كل الأوراق الخاصة بالشغالة من إقامة وجواز سفرها وأى حاجة خاصة بأوراق ثوبتها كانت معاية وكنت عاينها فى الشغل فى مكتبى مش فى البيت كمان ودة هام جداً الحذر منهم فى كل حاجة إلا من رحم ربى، وبعدين حضرتك زى الشغالات الى فى مصر دول بردة كل واحدة منهم عندها عيب ( مثلاً منهم الى تلاقيها حرامية أو مش نظيفة أو كذابة ودى زى شغالتى أنا كانت تموت فى الكذب إية الحل هى تربت على كدة من 30 سنة أنا الى هغيرها دلوقت مستحيل طبعاً(.

لكن فى بعضهم كويس ودة انا قولت لك نصيب وغالباً الشغالة الكويسة الناس بتمسك فيها بأديها وسننها ومحدش يسبها خالص.

يعنى قاعدة عامة كدة لنفسك الشغالة الى صاحبها مفرط فيها بسهولة كدة بيقبل أى تمن تعرفى إنها مشاكلها كتيرة.

معلومة مهمة

الشغالات هنا يتم إستقدامهم عن طريق مكاتب وهذة المكاتب تتعامل مع مكاتب فى البلد المُستقدم منها الشغالة والعلاقة بينهم قوية وعلاقة مكسب يعنى المكتب هنا يهمة أنة ما يخسرش المكتب هناك والعكس صحيح المكتب الى هناك يلزمة علاقتة بالمكتب الى هنا أنا وحضرتك عميل كدة على الطاير تنتهى العلاقة بيكى لما يأخذ القرشين ويجيب لكى الشغالة ، وطلعت حلوة طلعت وحشة ، خلاص الموضوع خلص بالنسبة لة نصيبك جة كدة يا دكتور ويقولك حاولى تستحملى وتسمعى كلمات التصبير ليكى واحد يقولك دول عاملين زى القرود حاولى تروضية :D هو يا عم أنا فى السيرك ولا هوة فية إية.

فية فى العقد مدة 3شهور الى من حقك قانونى إنك ترجعى الشغالة وما تخسريش غير 1000 ريال بس المدة دى الشغالات بيكونوا فيها زى الملائكة لو طلبتى عنيها تدهيلك لأنهم هناك بيكونوا واخدين عليها ضمانات وشيكات وحجات تانية تخليها تفكر مليون مرة قبل ما تطفش أو تعمل أى حاجة تانية لكن المدة لما تخلص خلاص تشوفى الوش التانى على طول.

أنا عن نفسى قررت عدم العودة لحكاية الشغالة دى تانى وبنظم دواماتى انا وزوجتى بحيث أننا يكون دوامنا عكس بعض ، يعنى أنا ليل مثلاً يبقى هى صباحاً وهكذا ولا الذل للشغالة.

وهذا رأى أنا؟؟؟؟؟؟؟؟ :lol:

أنا اكلمك على شغلتى شوية:

أول ما جت بصراحة أنا حسيت انى وقعت على كنز هيحل لى كل مشاكلى انا وزوجتى،!!!

أدب وصوت واطى ومتعلمة معاها ثنوية عامة وتجيد الإنجليزية بطلاقة لدرجة انى ما كنتش مصدق نفسى .

لكن بعد كدة العيوب ظهرت

1- الكذب لية .................... هو طبع؟!!! :blink:

2-عاوزة اتصالات دولية على طول .

3- بدأت تصاحب العيال الهنود والبنجال الى تحت البيت وعرفت أنة واحد منهم بيكلمها ؟؟؟؟ طبعاً العبد لله سيب لها التليفون وكل شيئ وخارج.

4- العيال الى كانوا بيجوا يملو لى المية الصحية عملت معاهم صدقات وهات وخذ وقصص وأنا مش فاضى طبعاً.

المهم كدة خلاص الفار بدأ يلعب فى عبى زى ما بيقولوا وفقدت فيها الثقة وبدات اخاف على العيال !!!

الموضوع أخذ منى كتير من التفكير وقررت انى أتخلص منها حاولت أبيعها لحد تانى طبعاً لما عرفت أنى مش عاوزها ورتنى الويل وبقت تلعلع وتطلع المواهب المدفونة أمامم أى حد جاى يشتريها وتورية المواهب علشان تفضل عندى لأ نها عارفة أنها لو راحت بيت سعودى هتطحن مقارنة ببيتى يدوب ولدين سنهم مش صغير 4 سنسن و5 سنين.

المهم بعد كل المهزلة دى كانت لازم أخلص منها حتى لو خسرت فلوس كتير وقد كان...... خَرجت لها نهائى ومَّشتها على طول.

[جحا]

ايه يا جماعة

تالت يوم و ما فيش اي مداخلات

فين دكتور حازم باشا

ما بحبش اشوف التوبيك الا و هو في الصفحة الاولي