قصتي مع كندا

[د هشام ابراهيم]

]

بجد المدام ديه ليها الجنة ...ربنا يخليها و يكرمها يا رب ...قولوا أمين :happy:

ااااااااااااااااااااااااامييييييييييييييييييييييييييييين

:lol::)

كلك ذوق يا دكتورتنا الفاضلة :lol:

[ehabtaher]

بعد اذن د هشام انا ارد

ال 3 تخصصات اللى انت قلتيهم يا اخت dreamy تخصصات كويسه جدا ولو كان عند فرصه تدرسى اى واحده فيهم حسب ميولك وقدرتك الماديه وتوافرها فى الكليه القريبه من منزلك فانت الكسبانه وحسب الكليه اللى تقبل تدرسى فيه

تخصص neuclear medicine مطلوب جدا واكيد انت تقدرى تعرقى المرتبات فى المنطقه عندكم

تخصص السونوجرافى كويس جدا بس يعتمد على الشغل باليد والرؤيه الجيده و مذاكره التشريح وخلافه

تخصص المعمل كويس بس اعتقد مرتبه مش زى الاتنين السابقين

يبقى ميولك لاى واحد فيهم و انت دارسه ايه قبل كده فى مصر

يعنى لو صيدله او علوم يبقى تخصص المعامل مناسب و حتلاقيه ساهل

لو طب يبقى الاتنين التانيين اسهل

وان كان الدراسه مادام حاتبداى فيها من سنه اولى يبقى مافيش حاجه صعبه

وتفضل فى الاخر ميولك الشخصيه

مش حانعمل زى مصر ونقول للطالب انت جبت مجموع كبير يبقى تروح طب

ولكن انت ميولك ايه وايه المتوفر فى حدود امكانياتك

[د هشام ابراهيم]

السلام عليكم اخي الفاضل د.كتور هشام وكل عام وانت والاسرة الكريمة بالف خير.

اخي كان عندي استشارة دراسية بما انك في المجال الطبي. انا اريد تغيير المجال وافكر في دبلوم اطب النووي Nuclear Medical technology او دبلوم المختبرات الطبية Medical Labortoary Technology او دبلومة السونار Diagnostic Sonography Technology من كلية سيت هنا في كالجري.

اتمني ان تفيدني برايك حول افضل هذه المجاالات من ناحية فرص العمل والتقدم الوظيفي اذا كانت لديك اي فكرة عنها...وجعله الله في ميزان حسناتك.

عفوا سيدتي الفاضلة ...فعلا اللي ما يعرفك يجهلك ...بما إن حضرتك خارج أونتاريو قد يكون من الأفضل مراسلة السايت ده باستفسارات حضرتك .... و باذن الله يدوا لحضرتك معلومات عن احتياجات سوق العمل في كالجاري و ما حولها

صراحة أنا بافضل الحصول علي المعلومات من جهات مختصة بدلا من التكهنات و الظنون

جزاك الله كل خير علي مساعدتك للناس و معلوماتك القيمة مع أطيب التمنيات بالتوفيق

[kaplaan]

dr hesham

alf milion salama 3aleeek

ma3lesh met2a5arra awy

tamenna 3amel eh delwa2ty

[د هشام ابراهيم]

dr hesham

alf milion salama 3aleeek

ma3lesh met2a5arra awy

tamenna 3amel eh delwa2ty

كله تمام يا دكتورنا العزيز ...الله يسلمك يا سفير الطب

الصراحة أنا كان مفروض ألبس البتاعة ديه ٦ اسابيع ...بعد اسبوعين بالظبط كنت خالعها ...ما تقولش لحد بقي اني ما باسمعش كلام الدكاترة :lol:

عارف حقيقة حتشوفها كتير أسوأ مرضي علي الاطلاق هما الدكاترة

ربنا معاك يا صديقي العزيز

[adamdec]

ياترى يا د هشام كل الخضار و المنتجات الزراعيه لازم الواحد يشتريها من المولات يعنى

مافيش حاجه زى الوكاله او سوق العبور الواحد يشترى منها بالصندوق

سوق جمله يعنى او سوق مواشى يعنى اللى عايز يفتح محل خضار بيجيب الحاجات الجمله للمحل منين

الحقيقة السنة ديه احنا دبحنا في مصر بس .....ربنا يسهل الأمور و بعد كده ندبح في مصر و في كندا

السنين اللي دبحنا فيها في كندا النظام ببساطة بتدفع فلوس للجهة المسئولة عن ذبح الضواحي .....جامع ....جزار مسلم ...جمعية اسلامية .... هما بيتولوا الذبح و التجهيز و ساعات كمان التوزيع علي الفقراء لو أردت و سعادتك بتستلم اللحمة باولوية الحجز أول تاني أو تالت أيام العيد

بالنسبة لشراء الجملة صراحة ما أعرفش مكان تقدر تشتري منه جملة بنظام سوق العبور انما فيه ماكن كتير بيبيعوا باسعار الجملة و بالكميات اللي إنت عايزها

اسمحلى اجاوب يا دوك

هو فى ما يشبه سوق العبور بس احسن شوية اسمه Farmers Market. و ده مشهور اوى فى امريكا و لقيت ان فيه منه فى كندا كمان

و دى كل عناوينهم فى Ontario:

http://www.farmersmarketsontario.com/Markets.cfm

Calgary:

http://www.calgaryfarmersmarket.ca/index.p...20the%20Vendors

British Columbia:

http://www.bcfarmersmarket.org/vendors.htm

معظمهم فلاحين هما الى زارعين بنفسهم و عشان كده الحاجة كلها organic و زى الفل و الحكومة هى الى بتراقب الجودة فمضمون مضمون يعنى.

ممكن تسأل على الويب سايتس دول ازاى تبقى certified vendor و أكيد حايرضوا عليك يا أستاذ ايهاب

تم تعديل 3 ديسمبر 2009 بواسطة adamdec

[dreamy]

اخي الفاضل د.هشام وأخي الفاضل ehabtaher شكرا على الاجابة الوافية وجزاكم الله الف خير..بالنسبة لي انا دراستي السابقة كانت في مجال الهندسة الصناعية وبالتالي لا توجد لدي اي معلومات عن المجال الطبي لكني ميالة لتكنولوجيا الطب النووي حسب ما قرأت عنها وان شاء الله ساقوم بمراسلة الجهة التي اشار لها د.هشام لمزيد من المعلومات بهذا الخصوص...ووفقنا الله واياكم لما يحب ويرضى.

[حسام يوسف]

عذرا يا دكتور هشام

ماكنتش واخد بالي من موضوع اصابة رجل حضرتك

الف الف سلامة عليك

أجر وعافية ان شاء الله

تحياتي ليك دائما

[صعيدي من مونتريال]

بالنسبة لي انا دراستي السابقة كانت في مجال الهندسة الصناعية وبالتالي لا توجد لدي اي معلومات عن المجال الطبي لكني ميالة لتكنولوجيا الطب النووي

الطب النووي

مجال كويس جدا في كندا وغير كندا

واعتقد ان من مميزات المجال ده ان العاملين بياخدوا تقاعد بدري

عشان خطورة الاشعه على صحتهم

[د هشام ابراهيم]

السيدة الفاضلة adamdec

السيدة الفاضلة dreamy

دكتورنا العزيز حسام باشا

الفاضل صعيدي

شاكر للمشاركة و المعلومات و الدعاء الصالح و نواصل الأرسال :)

[د هشام ابراهيم]

كان يا مكان يا سادة يا كرام عبد لله غلبان أسمه الدكتور هشام

كان مهاجر بلاد الهدوء و الوئام بس لازم ينزل مصر كل كام شهر بالتمام علشان يشوف أهله و أهل المدام

عادي أغلب المغتربين بيبتدوا قصة اجازتهم كده :blink:

اللي مش عادي ان الأجازة ديه كانت بعد سنة كاملة من أخر نزولة لمصر ...من ساعة ما جيت كندا و أنا بانزل كل ٦ - ٩ شهور ..... ظروف شخصية و مهنية طولت غيابي المرة ديه و فعلا كنت خايف من الأجازة ديه مش عارف ليه ...حاسس إن أحساسي ببلدي حيتغير ....حبي لمصر امتداد لحبي و احترامي لذاتي .... مهما حصل فيها أو في شئت أم أبيت أنا مصري ..... و ركن أساسي من أركان اعتزازي بنفسي و كرامتي مستمد من اعتزازي بهويتي ...كلام كبير قوي مش وقته انما باحاول انقل لكم أحاسيسي المرتبكة قبل ما أسافر ....المهم اللي حصل يومين قبل السفر و أثر علي اجازتي كلها ما كانش ليه دعوة بكل كده ......

أنا كنت مسافر الجمعة من تورنتو ...يوم التلات اللي قبل السفر خطفت رجلي لحد سانت كاثرين أجيب شنطة من شنط المدام ....و أنا نازل بيها علي السلم تعثرت و خدت كام سلمة و نزلت بكل تقلي و تقل الشنطة علي قدمي الشمال

حد يقولي يا كابتن لطيف ده أكيد بسبب الشنطة انما الحقيقة ده عيب في مفصل القدم عندي ...الحقيقة القدمين فيهم اصابات قديمة من أيام الرياضة و بتاع ....العبد لله كان بيلعب رياضات كتير قوي قبل المدعوقة كلية الطب .... الباسكت و التنس بالذات بوظوا الانكلين بتوعي و الصراحة كمان أنا من يومي لا باحب الدكاترة و لا باحب أروحلهم و لا باحب اشتكي و ده برضه اللي حصل المرة ديه لحد يوم الخميس ليلة السفر لما رجلي بقيت قد البالونة رغم المحاولات المستميتة للتطنيش ...... سعادتكم بقيت مش عارف أنزل من السرير أصلا .....السفر الجمعة و الشنط كالعادة ما تحضرتش

الصراحة ما كانش فيه حلول كتير ما دامت القدم ورمت قوي كده يبقى أكيد فيها كسر مش مجرد أوتار و أربطة ينفع معاها الطناش خصوصا إني ما بقيتش عارف أحط رجلي علي الأرض أصلا ...طيب يالا بينا علي الطواريء .... شقتي في تورنتو علي بعد دقائق من أكبر مستشفيات في تورنتو ..نقيت واحدة و اتكلنا علي الله و رحنا

وصلت و عديت ال-triage و أتكشف علي و أتعملي أشعة و أتكتبلي ادوية و أتوصفلي الجبيرة الهوائية ديه إلي في الصورة تحت و استلمتها و لبستها في أقل من ساعة ...قال بيقولك الناس بتتأخر في الأستقبال قال ....بس الحقيقة عمرها ما حصلت مع حد قبل كده ...ربك لما يريد

المشكلة بقي اني لما رجعت شقتي راسي و ألف سيف ما البسش البتاعة ديه .....حتتعبني في السفر و المطارات ..لا مش حالبسها .....بجد المدام ديه ليها الجنة ...ربنا يخليها و يكرمها يا رب ...قولوا أمين :P

المهم ما أطولش عليكم اللي جبرني ألبس الجبيرة إن ما مفيش جزمة عرفت أدخل فيها رجلي المتورمة ببشاعة ....لا أسافر بشبشب بقي لا أسافر بالآير كاست :) .....الحقيقة انها ما ضايقتنيش خالص بالعكس ريحت رجلي جدا في السفر و ساعدت علي الالتئام السريع .....و عسي أن تكرهوا شيئا ..سبحان الله

العيب الوحيد انها كانت محجمة حركتي ....طبعا السبب الأساسي القدم المكسورة انما برضه ساهمت في تحديد اقامتي في مصر لحد كبير .....انما الحقيقة برضه مش ده اللي ضايقني في مصر خالص :)

[EmanRasmy]

ألف سلامه عليك يا دكتور .. و ان شاء الله تخف بسرعه .... و كل سنه و حضرتك وكل المحاورين بألف خير ...بالمناسبه ... إيه أخبار لقاء القمه الرباعي؟؟؟ أنا قلبت في كل المحطات.. CNN, BBC و جزيره و عربيه ... مالقيتش أخبار ... شكله كان اجتماع سري للغايه.. ربنا يستر .....كل سنه و انتوا طيبين

[د هشام ابراهيم]

الله يسلم حضرتك و كل سنة و حضرتك و الجميع في أتم صحة و سعادة و رضا :closedeyes:

الصراحة يا سيدتي الفاضلة الوحيد اللي ما خادش صور يوميها هو العبد لله ..... الكنج ايهاب و الزعيم الشامي و المعلم الزناتي كلهم صوروا يا باشا و ما حدش بعتلي أنا شخصيا الصور .....شكلي طلعت مالي الصورة زي كل مرة :happy:

بالنسبة لملخص القمة بقي فشكلي حاسيبها للباشمهندس زناتي في التوبيك الجديد بتاعه

[د هشام ابراهيم]

طبعا كل حكاية رجلي المكسورة ديه كانت مقدمة لرحلتي لمصر ...عقلي الباطن بيبرر الملاحظات الناقدة اللي جاية ...يمكن .... بس أنا حاسيب الحكم ليكم ليا حق انقد و لا لأ

التوجس و الخيفة و الريبة بدوا كالعادة من مطار شارل ديجول .....طيارة القاهرة تقدر تعرفها من وسط ألف طيارة من غير ما تتعب نفسك و تدور علي يفط ........دايما كومبليه و دايما المسافرين المنتظرين في المطار بيتكلموا في الموبايل بصوت عالي لدرجة انك ما ينفعش ما تتابعش المناقشة ..... و لازم العيال يكونوا بيزنوا ...نفسي أعرف السبب إن أطفالنا فلذات أكبادنا ما بيبطلوش زن و الصوت اللي بنقول عليه أويئ.....أكيد عارفينه ...الموضوع أكيد جيني بحت ...أطفال بلاد الفرنجة لا بيزنوا و لا بيأوائوا

المهم ركبت الطيارة و اصارحكم القول أول ما دخلنا مجال مصر عنيا ابتديت تدمع .... شحنة شجن علي حب علي اشتياق و وسط مخاوفي من الزيارة اكتشفت إني ما خدتش بالي من حقيقة مهمة جدا : مصر فعلا وحشتني

[moheltohamy]

...أطفال بلاد الفرنجة لا بيزنوا و لا بيأوائوا

الملحوظة دي لاحظتها في شرم الشيخ ، أسرة (أب وأم وطفل) بيفطروا ، في قمة الهدوء ، والواد ما كمّلش سنتين ، وحاطّين له الأومليت بتاعه قدامه ع الترابيزة بتاعة البيبيهات دي ، ومقطعينهوله ، وسايبين الشوكة في إيده ، وهوّه بيأكّل نفسه!

وجمب الأومليت ع الترابيزة علبة لبن جهينة مكس ، والواد بيتعامل بالشوكة زي الفل ، مش زي الفل أوي ، بس آهو بيتعامل!

خيبة علينا! :lol:

نسيت أقول لك... الناس دول كانوا من الكتلة الشرقية (روسيا وتوابعها) يعني مش هاي أوي! ناس غلابة وعلى قد حالهم زينا يعني :lol:

المهم ركبت الطيارة و اصارحكم القول أول ما دخلنا مجال مصر عنيا ابتديت تدمع .... شحنة شجن علي حب علي اشتياق و وسط مخاوفي من الزيارة اكتشفت إني ما خدتش بالي من حقيقة مهمة جدا : مصر فعلا وحشتني

طالما قلت الكلمتين دول ، يبقى أنا Anticipating مقدماً اللي هيجرالك... زي بالظبط المرة الوحيدة اللي لساني عياره فلت وقالها (تصدق يا عم منير مصر وحشتني أوي؟)...

ومن بعدها عينك ما تشوف الا النور :lol:

وأقدر أتوقع برضه... آخر مصر معاك توحشك الشوية من باب الطيارة لطابور الجوازات... ويمكن - لو محظوظ شوية - تكمّل الوحشة معاك شوية لغاية خارج المطار ؛ لغاية ما تاخد صلاح سالم أو الأوتوستراد...

وشكراً على كده بقى wst::

[ابنه النيل]

يا تري ممكن اعرف من حضرتك يا دكتور هشام اخبار اخصائين العلاج الطبيعي ايه

يعني واخدين وضعهم ولا زي مصر

وياتري امكانيه ايجاد عمل طبعا بعد المعادله عامله ازاي

وطبعا لو هتقل عليك لو تقدر تسألي حد تعلرفه عن المعادله سهله ولا مكلكعه زي الطب والهندسه

وياتري الاحسن ابدأ فيها من قبل الهجره يعني من بره كندا ولا استني لما ربنا يكرمنا بالفيزا

[Biochemistry forever]

هذه اول مشاركة لى فى هذا المنتدى وهذا الموضوع الجميل الشيق الممتع

اولا : الف سلامة للدكتور هشام وادعو المولى عز وجل ان يتمم لحضرتك الشفاء واحب انا ابدى اعجابى بموضوع حضرتك ولغتة وافكاره

ثانيا :اتمنى من حضرتك ان تتقبل مشاركاتى .

[bent misr]

ياااااه يا دكتور هشام مش عايزه أقولك قد ايه

مشتاقه أعرف قصتك في مصر و بأسلوبك الروائي الجميل

ده لأني جوايا حاجات كتير حاسه اني هجد لها مبررات

لما أسمع تعليقك انت شخصيا :closedeyes:

و موضوع الأطفال ده بقى حدث و لا حرج فعلا

أكيد الموضوع ده وراثي

ده احنا عيالنا مش زانانين بس :cry1:

دول حضرتك مجانين :baby: stnd::

[mohamed mongy]

دكتور هشام .........

مساء الفل................

انا عايز اسألك في حاجة

انا دكتور رمد لو فرضنا ان ما جاليش ال ماتشينج من اول مرة

ايه هيا فرص الشغل في ال clinical fellowships وهل لازم تكون في الرمد بس ولا ينفع اي تخصص

وايه هي ال reserch jobs دي و ازاي الواحد يدور عليها لان انا معايا مراتي واتنين اطفال صغيرين ومش معقول هاروح هناك من غير اي

صورة واضحة للشغل......

يعني من الاخر الواحد ماينفعش يقعد عاطل ولا ايه ..........

انا عارف اني تقلت عليك بس انا عايز نصيحتك الشخصية من خلال خبرتك لو سمحت

ولك جزيل الشكر.............

[د هشام ابراهيم]

أقدر أتوقع برضه... آخر مصر معاك توحشك الشوية من باب الطيارة لطابور الجوازات... ويمكن - لو محظوظ شوية - تكمّل الوحشة معاك شوية لغاية خارج المطار ؛ لغاية ما تاخد صلاح سالم أو الأوتوستراد...

وشكراً على كده بقى :blink:

سيبك يا تومي يا أخويا ...الكبير كبير برضه ...بس توقعك مش مظبوط قوي ...... أحاسيس الحنين و الاشتياق و الكلام دهوت انقشع مع التاتش داون بتاع عجلات الطيارة سعادتك :rolleyes:

نفسي أفهم ليه عبده المهم بيفتح الموبايل النوكيا أول ما الطيارة تلمس الأرض ...خلاص يعني مش قادر يستني الكام دقيقة دول .....و طبعا رنة المسج بتاعة نوكيا الشهيرة تتوالي الواحدة تلو الأخري ممزوجة بصوت فك الحزام مع إن الأشارة بتاعة الحزام قدام كل واحد منورة قد كدهوت سمفونية متتالية تقريبا بعدد المصريين اللي علي الطائرة

حد يقولي يا سلام يا كابتين لطيف إنت محبكها قوي ....يمكن .... المشكلة إن سعادتك لما بتسافر كتير ...مش بس كندا .... و تقارن سلوكيات الشعوب ......حاجات صغيرة زي كده بتقولك الكتير و الكتير و بتبتدي تاخد بالك منها مع انك في ألاول لا إما مش شايفها لا إما شايفها و متعايش .....العين الناقدة ديه أو في الحالة بتاعة الطيارة الأذن الناقدة بتيجي لما بتقارن ولاد بلدك ببقية الناس .... من ثقافتنا المعاصرة كمصريين عدم الألتزام ....لا بقواعد و لا باداب و لا بقوانين ....ده بالعكس كل ما علي قدرك و زادت فهلوتك كل ما كنت بتكسر القانون و تضرب بالتعليمات عرض الحائط .....من أول الموبايل علي الطائرة مرورا بالمرور و حتي نظام الحكم و حقوق المواطنة .....