قصتي مع كندا

[د هشام ابراهيم]

نيجي بقى لل-CEHPEA دول إيه نظامهم ....ال-CEHPEA شغالة في أونتاريو بس ....كل مقاطعة تقريبا فيها هيئة مسئولة عن الأطباء المتخرجين من خارج كندا و محاولة ادخالهم داخل السيستم الكندي ....ده أول اختلاف مع ال-CaRMS اللي شغالين علي كندا كلها مش مقاطعة بعينها

مين اللي يقدم لل-CEHPEA .... في رأيي أي حد عنده خبرة في تخصصه و عايز يكمل في نفس التخصص ....في ال-CaRMS إنت ممكن تقدم على تخدير في بريتش كولومبيا يجيلك Family Medicine في أونتاريو مثلا .... (باعتبار نيابات طب الأسرة ديه بتبقى ألاكثر على الأطلاق ما بين النيابات و أونتاريو أكبر مقاطعة كندية )

حاليا يشترط النجاح في ال-Q1 للتقديم

ال-CEHPEA بتعقد امتحانات للمتقدمين المقبولين في كل تخصص .... يعني ممكن حد يقدم و ال-CEHPEA ما تقبلوش .... أيوه ممكن سعادتك بتقدم طلبك و هما بينظروا فيه و لو مش مستوفي الشروط الموضوعة في الموقع بتاعهم ممكن يرفضوا الطلب جملة و تفصيلا

بعد الموافقة على الطلب إن شاء الله تبتدي الأمتحانات ... في التخدير ٣ امتحانات ...MCQ و شفوي و عملي ... الأمتحانات بيوصلوا لبعض يعني اللي ينجح في التحريري يمتحن شفوي و هكذا

النظام الجديد اللي دخلوه إن نتيجة الأمتحان في سنة بتبقى valid لكذا مرة و الحكاية ديه فادتني شوية

أول مرة قدمت في ال-CEHPEA (كانت ساعتها اسمها IMG ) جبت سكور استشاري (Practice ready ) انما ما عدتش ال-Q1 و ما نفعش أكمل (طبعا حاجة بايخة جدا و أنا شايف انها مش عدل انما life is not fair و هي ديه قواعد اللعبة ...Take it or leave it :blush2:

تاني مرة جبت سكور أقل ١٠ نقط فقط من مستوي استشاري و ما ردتش أخد نيابة سنة تانية ( غلطة ما لهاش لازمة ...كنت مدفوع من غضبي من المرة اللي قبليها و التأخير اللي أتأخرته قبل كده في ال-EE خلاني اتكبر علي النيابة و تاخدني العزة .... يا رب ما حدش يعمل كده أبدا .... دراستك السابقة ...شهاداتك خبرتك مش معترف بيها هنا ....لو جت فرصة تبتدي و لو من أولي النيابة خدها .... فيه مزايا كتير للحكاية ديه حاقولها بعدين انما افتكر إن فيه ناس كتير نفسهم في نصف فرصة زاي ديه .... حد يقولي طب و أنا علي بايه ما خاليني في اللي أنا فيه و بكرامتي ...أقوله صح ...لو إنت شايف كده يبقى كندا مش المكان ليك .... انما اللي شايف إن كندا تستاهل تضحيات و تعب و مجهود يبقى يوافقني إن أنا ضيعت الفرصة في السنة ديه

آخر مرة بقى اتعلمت الدرس قدمت على نيابة في ال-CEHPEA بسكور السنة اللي فاتت (عالي جدا على نيابة .... ١٠ نقط بس أقل من استشاري .... لظروف خاصة ما أقدرتش أخش الأمتحان تاني ) بس امتحنت أمتحان عملي كان أول مرة يعملوه في ال-CEHPEA للتخدير (العبد لله كل مرة قدم لل-CEHPEA كانت بنظام شكل .... حتي اسمهم أتغير !!) و الحمد لله جالي نيابة سنة تانية أبتديها من يوليو ٢٠٠٩ باذن الرحمن

[د هشام ابراهيم]

الف مبروووووووووووووووك يا د/هشام ..

والله تستحقها و كنت حاسسها من اول ما بدأت حضرتك كتابة الموضوع ..

كفايه حبك لمساعدة الناس .. لازم ربنا يكرمك آخر كرم ..

ربنا يوفقك و مستنيين حكايات اكتر و تفاصيل اكتر .. احنا طماعين و حضرتك خلتنا نطمع اكتر

الله يبارك في حضرتك يا رب و ألف ألف شكر علي مشاعر حضرتك الطيبة و علي كلماتك الرقيقة ....كلك ذوق يا باشا

الحقيقة أنا ما أعرفتش حكاية النيابة ديه غير من أسبوع تقريبا .... طب كنت طمنتني ده أنا كنت قلقان جدا :blush2:

[د هشام ابراهيم]

الف مبروك يا د هشام

ربنا يوفقك.....

كل عام وانت والمدام بخير

الله يبارك في حضرتك و يوفقك لما يحب و يرضي بفضله

كل عام و حضرتك و من تحبين جميعا بالف خير و صحة و سعادة

[precanadian]

متابعين يا د/هشام .. و في انتظار اخبارك الحلوه اللي وعدتنا بيها

الله يخليك يا باشا .... الأخبار هي اني جالي نيابة في تورنتو ....الحقيقة اني مبسوط جدا و بحمد ربنا ليل و نهار .... صحيح كان نفسي في أحسن من كده انما الحق يتقال أنا أحسن من ناس كتير من أول دكاترة شغالين سواقين تاكسي مرورا بدكاترة لسه بيحاولوا يخشوا السيستم من جوه و مش عارفين ذي ما أنا كنت بالظبط ال-٣ سنين اللي فاتت .... إن شاء الله ساواليكم بالاخبار :ninja:

الف الف مليون مبروك يا دكتور هشام الموضوع ده عايزله عزومه كبيره ياباشا .سبحان الله الذي قدر وجودك معانا في المنتدي .اتمني من الله ان يكتب لنا رؤيتك والتعرف عليكم.

[precanadian]

[precanadian]

[precanadian]

[kaplan]

الف مليون مبرووووووووووووووووك يادكتور

والله انت ابن حلال وتستاهل كل خير

وربنا يعطيك من فضله وكرمه

انت بتدى لكل الناس اللى هنا امل كبير جدا ولازم ربنا يكرمك ويساعدك زى مابتساعد الناس

الف الف مبروك والله انا فرحتلك جدا ياباشا

[student]

الف الف مبروك

وان شاء الله ياتي اليوم الزي تحقق فيه كل ما تريد

:ninja:

[pharaon]

متابعين يا د/هشام .. و في انتظار اخبارك الحلوه اللي وعدتنا بيها

الله يخليك يا باشا .... الأخبار هي اني جالي نيابة في تورنتو ....الحقيقة اني مبسوط جدا و بحمد ربنا ليل و نهار .... صحيح كان نفسي في أحسن من كده انما الحق يتقال أنا أحسن من ناس كتير من أول دكاترة شغالين سواقين تاكسي مرورا بدكاترة لسه بيحاولوا يخشوا السيستم من جوه و مش عارفين ذي ما أنا كنت بالظبط ال-٣ سنين اللي فاتت .... إن شاء الله ساواليكم بالاخبار :)

الف مبروك يا دكتور والله العظيم تستاهل ربنا يبارك كمان وكمان وتبقى وزير الصحة الكندى كمان :ninja: :ninja: :ninja:

وتعمل اتفاقية تعاون مشترك لتحسين الخدمة الطبية فى مصر :lol:

ولو احتجت مدير اعمال يا ريت تفتكرنى

هعملك دعاية جامدة جدا جدا

مع تحيات

مدير اعمال وزير الصحة الكندى (دكتور هشام ابراهيم )

محمد علي

[Gimie]

Mabroooooooooooooooooooooook ya Dr Hesham

[qenawy]

الف الف مبروك يا دكتور

فعلا انت انسان خير وتستحق بالتالي الخير الكثير

[Balooshy]

الف مبروووووووووووووووك يا د/هشام ..

والله تستحقها و كنت حاسسها من اول ما بدأت حضرتك كتابة الموضوع ..

كفايه حبك لمساعدة الناس .. لازم ربنا يكرمك آخر كرم ..

ربنا يوفقك و مستنيين حكايات اكتر و تفاصيل اكتر .. احنا طماعين و حضرتك خلتنا نطمع اكتر

الله يبارك في حضرتك يا رب و ألف ألف شكر علي مشاعر حضرتك الطيبة و علي كلماتك الرقيقة ....كلك ذوق يا باشا

الحقيقة أنا ما أعرفتش حكاية النيابة ديه غير من أسبوع تقريبا .... طب كنت طمنتني ده أنا كنت قلقان جدا ;)

يا دكتور واحد بإصرارك ده و بعزيمتك دي لازم يكون شخص ناجح .. وده سر احساسي بإن نهاية الرحله دي ( اللي هي بدايه لرحله تانيه ) لازم تكون سعيده

[precanadian]

"وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ فَنَادَى فِي الظُّلُمَاتِ أَن لّا إِلَهَ إِلاَّ أَنتَ سُبْحَانَكَ إِنِّي كُنتُ مِنَ الظَّالِمِينَ * فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ"

الانبياء ٨٧ ، ٨٨

هو دا السر يا باشا . ربنا يوفقك

تم تعديل 3 يناير 2009 بواسطة precanadian

[canadawy]

ألف ألف ألف مبروك ليك يادكتور هشام ..............والى الأمام

دائما ......وربنا هايكافئك كتير مش بس علشان أصرارك لأ كمان علشان روحك الحلوة ومساعدتك دايما لينا ودى الحاجة الرئيسية اللى

بيبقى عايزها المصرى المغترب فى الخارج ولو كل المصريين زى حضرتك عمرنا ماهنسميها غربة وهانبقى مثال يحتذى للمجتمعات

الأخرى .

[Alazhar]

طبعا الموضوع مش محتاج منى اى مدح لان وجود دكتور هشام فيه يعتبر اكبر مدح للموضوع نفسه :Exclam:

انا طبعا قرات الموضوع حتة حتة وهو فعلا موضوع شيق جدا جد ا( المفروض يتعمل كتيب ارشادى )

ولى طبعا بعض الاسئلة :Exclam:

اولا انا فهمت ان الزمالة البريطانية لا تغنى عن المعادلة الكندية فهل ده صحيح ؟

ثانيا هل الافضل الحصول على المعادلة الكندية قبل القدوم الى كندا (حاليا امتحانتها فى مصر )

ثالثا هل اذا تم الحصول على المعادلة من الممكن مخاطبة العديد فى المستشقيات الكندية كما فعلت حضرتك ؟

رابعا ايه اللى يخلى طبيب انه يشتغل سواق تاكسى بالرغم من انه معاه المعادلة الكندية قبل ما يوصل كندا؟

خامسا هل الافضل عدم القدوم الى كندا قبل الحصول على سنوات خبرة من وزارة الصحة المصرية مثلا ؟

سادسا انا بحب الباطنة (لسه فى سنة خامسة ) والرعاية الحرجة(نظرا لحبى لدكتور حسام موافى )

اما مسألة طب الاسرة فاعتقادى الشخصى انها شبيهة بالباطنة العامة فهل فرص الحصول على وظيفة لهذه الاقسام

سهلة ولو نسبيا فى كندا؟

سابعا :حضرتك المبلغ اللى المفروض يكون فى رصيد الواحد قبل ما يسافر كندا كام سواء المطلوب اثباته فى السفارة

او المطلوب للمساعدة على العيش فى بادىء الامر

طولت عليك اعذرنى ;)

[اسكندرية تانى]

الف مبروك يا دكتور هشام

تستحق كل خير  فعلا

نتمنى لك المزيد من التوفيق و النجاح

و اشكرك على سردك لخبراتك فى التقديم افدتنا كتير

الله يكرمك ;) :Exclam:

[ابن الصعيد]

مبروك د هشام والله تستاهل كل الخير لطيبة قلبك

سؤال

هل هناك family medicine fellowship وبالنسبة internal medicine fellowship سهل الحصول عليها

شكرا

[newcomer]

.... الأخبار هي اني جالي نيابة في تورنتو ....الحقيقة اني مبسوط جدا و بحمد ربنا ليل و نهار ....

بما انى مش من ملائكة الرحمة ( مش طبيبة يعنى.....لحسن حد يفهم غلط....انى شريرة مثلاااااااا) :lol:

فانا مفهمتش اوى ....يعنى ايه نيابة.....بس واضح انها حاجة كويسه

بدليل التهنيئات اللى بتتكتب لحضرتك

و بدليل ان حضرتك مبسوط

فبالتالى انا كمنسق عام للاجيبشيان كنديان اكسرز......لازم اهنى حضرتك....و بشده :blush2: :happy:

هابعت لحضرتك علبة شوكلاتة باتشى ....علشان تبقى

تهنئة بالمكسرات....!!!

الف مبروك يا دكتور

[kaplan]

الاخت نيو كمر

معنى نيابه

ان الدكتور هشام كده ان شاء الله هيشتغل طبيب رسمى فى كندا

يعنى دخل السيستم الطبى الكندى خلاص ودى حاجه مش سهله خالص

لكن الحمد لله ربنا وفقه