قصتي مع كندا

[bent misr]

الف شكر لك يا دكتور والله مجهود كبير و معلومات قيمه :ninja:

انتى حسستنا اننا روحنا كندا بجد :sad: :sad:

[د هشام ابراهيم]

تسلم ايدك يادوكتورنا على الرد الجميل بتاعك والسريع والمفيد.

السوال التاني الشقة الفندقية جيبتها من النت ازاي وكانت بكام في اليوم ولا في الشهر ودفعت الايجار من على النت ولا اول ماوصلت (دكتورنا التهامي هورتونز قالنا على ايلما جست هاوس وكانت تجربتة ناجحة انت عملت اية)؟

والف شكر على النصيحة الي جابت خلاصة البحث عن شقق في تورونتو خصوصا لو جديد و ماتفهمش فية حاجة دور في الغرب وسيبك من الشرق احسن واامن وانظف. نصيحة بجد من الاخر.

ربنا يخلي لينا عم جوجل

الأيجار كان باليوم ....صراحه مش فاكر كام ....و دفعت بالفيزا و أنا في كندا ....الشقة كانت كويسة بس موقعها وحش زاي ما قلت قبل كده .... و طبعا كانت شرق يونج ...غلطة ما حدش يعملها تاني بقى :)

[د هشام ابراهيم]

دكتورنا الفاضل هشام باشا

حضرتك رحت اليابان سنه كام؟؟

انا زوجي سافر اليابان زمان وقعد هناك 6 شهور ،،،،،،،

هو كان نائب تخدير في ابو الريش القصر العيني

ده كده أكيد إن شاء الله يبقى يعرفني أو علي الأقل يسمع عني .... أنا كنت في أبو الريش من أواخر النيابة في ١٩٩٩ و لغاية ما جيت كندا ٢٠٠٥

اليابان من مايو لاكتوبر ٢٠٠١ ....كنت مدرس مساعد ساعتها .... أنا حابعت لحضرتك علي الخاص

[د هشام ابراهيم]

متابعيين .....مستمتعين ...فاهمين

كده الاجتماعيات و الاسعار و الحياة

و السوبرماركيتات...

الله ينور يا دكتور!!

اجازة شوية ...من القسم الطبى ...علشان الجمهور بس يا دكتور...

:)

سعادة المنسق العام .... نورتي يا باشا و أنا تحت أمر حضرتك

[د هشام ابراهيم]

اشكرك دكتور هشام على كرم اخلاقك والى الامام ديما جزاك الله خير عن كل عضو يستفيد من معلوماتك القيمة واعلم ان كل حرف تعلمته ووضعته فى هذا البيت الكبير لكل المصريين يكتب لك بيه حسنة اللهم اثقل ميزان حسناتك انت وكل من يساهم فىالمنتدى الذى اطلق عليه بيت العيلة لكل المصريين جزاكم الله خير

آمين يا رب العالمين و لك بمثل الدعاء الصالح باذن الله و فضله يا سيدتي الفاضلة

[د هشام ابراهيم]

الف شكر لك يا دكتور والله مجهود كبير و معلومات قيمه :)

انتى حسستنا اننا روحنا كندا بجد

الحمد لله و إن شاء الله ربنا يوفقك للخير و نسمع عنك كل خير في كندا باذن الله

[د هشام ابراهيم]

نرجع تاني للاسعار .... بعد بقى ما تقدم شوية في كندا ....حتنسي Walmart و nofrills و Dollarama .... و محلات تانية حتبتدي تاخد مكان المحلات صديقة المهاجر الأولانية

مثلا Dominion ....سوبر ماركت كويس قوي .... كل ما أخشه أقول للمدام ده بيفكرني بمترو في مصر (مع الفارق طبعا :)) ....الطريف بقى انهم غيروا أسمه لمترو فعلا من كام شهر

Metro

Sears بديل walmart الأغلي سنة .... و بعدين The Bay واحد من أعرق و أقدم السوبر ستورز الكندية و أغلي من Sears سنة ( طبعا فاكرين القاعدة الذهبية الغالي تمنه فيه )

Sears

The Bay

ثقافة المولات طاغية في كندا و أغلبها فيهم نفس المحلات .... المساحة بتاعة المولات بره وسط تورنتو بتبقى مهولة .... و المول بيبقى أقرب لمدينة صغيرة فيها تقريبا كل حاجة ممكن تتخيلها من سينمات و مطاعم و ملاهي و محلات ..... كل حتة في تورنتو فيه المولات بتاعتها .... يعني وسط تورنتو مثلا أشهر واحد Eaton Center

Eaton Center

نورث يورك و إجلنتون و ميسيساجا و أوكفيل و حتي سكاربورو فيهم مولات ضخمة و شاسعة .... حتي سانت كاترين فيها مولات جامدة برضه أقربهم لي ال-Pen Center

Pen Center

بعد ما تقدم خالص بقى حتبطل تروح محلات و الشوبنج كله من علي النت .... من أول البقالة

Gateway

مرورا بالاكل الجاهز

Orderit

الموقع ده بيروح المطاعم اللي ما عندهاش خدمة توصيل و يجيب منها اللي أنت تطلبه و يوصلهولك في الوقت اللي إنت عايزه

و طبعا الالكترونيات

Best Buy

و تقريبا كل حاجة

طبعا ثقافة النت متغلغلة في الحياة الكندية في كل حاجة ..من أول الخدمات الحكومية لحد خدمات تنظيف البيوت و الحدائق

يتبع إن شاء الله

تم تعديل 14 يناير 2009 بواسطة د هشام ابراهيم

[samehelassad]

تسلم ايدك يادوكتورنا حلوة اوي الحلقة دي. خش بقى على الشقق ياريس. وياريت سيادتك لو تقدر تفتكرلنا السايت اللي اجرت منة الشقة المفروشة.

[د هشام ابراهيم]

اسعار المنازل

اسعار الاكل

اسعار الملابس

اللاب توب

الموبيلات

اسعار السيارات

تكلفة صياتة العربيات وتغير الزيت

لتر البنزين

ده الهوم ورك المطلوب ....بسم الله توكلنا علي الله :hearts:

زاي ما قلت قبل كده السكن هو أغلي ما في كندا (تورنتو تحديدا باعتبار إن معظم تجربتي الكندية كانت فيها )

السكن حاعمله توبيك خاص انما في عجالة كده أسهل حاجة في الأول تأجر شقة في تورنتو ....السوق كبير جدا و كل الطلبات موجودة ....ميزانيتك قليلة فيه حتت ممكن تأجر أوضة واحدة في بيت ....ربنا مسهلها الأيجار ممكن يعدي ٣ ٤ الاف دولار في الشهر ....المتوسط حسب المكان .....نمرة واحد في السكن هو الموقع ....و ده صحيح برضه لو بتشتري أكتر عامل حيحدد السعر بتاع الأيجار أو الشرا هو الموقع

تورنتو زيها زاي أي مدينة فيها حتت راقية و حتت متوسطة و حتت متواضعة .... قاعدة ذهبية غرب شارع يانج في الأغلب الأعم أحسن من شرق شارع يانج

الأحياء الراقية كتيرة ..... نورث يورك ، أوكفيل ، ميسيساجا

وسط تورنتو فيه و فيه .... العنوان في تورنتو بيتقال بالتقاطع لان الشوارع طويلة جدا .... يعني لما حد يسألني إنت ساكن فين لازم أقول باي اند إدوارد ....ما ينفعش أقول شارع باي لانه طويل

شارع يانج كان مفروض أطول شارع في العالم و طوله فوق ال-١٨٠٠ كم (أيوه ألف و ثمانمائة) بس تم تقسيمه بعد كده

بناء عليه فيه تقاطعات راقية و فيه أي كلام ....حتي في سكاربورو و هي من أفقر أحياء تورنتو فيها تقاطعات نضيفة جدا ....و طبعا فيها تقاطعات وحشة جدا

متوسط ايجار شقة أوضة و صالة في وسط تورنتو في موقع كويس و عمارة كويسة زاي ما قلت قبل كده حوالي ١٥٠٠ دولار ..... ده متوسط مش الاقل و لا الاكتر ....نصيحة خد فكرة من النت قبل ما تيجي بس ما تاخدش أي قرار غير لما تشوف و تعاين لايف .... أنظر تجربة العبد لله الشخصية في الموضوع ده و الحمد لله راضي تماما عليها

لما ربنا يسهل و تيجي تشتري الناس كلها هنا بتشتري بالرهن العقاري ...لو سعدتك مقيم في كندا ( مش شرط جنسية ...اقامة شرعية ) ..و ليك دخل ثابت و عندك تاريخ ائتماني كويس بتقدم طلب للبنك انك تشتري البيت اللي من اختيارك ...البنك بيدرس الطلب و لو وافق بيشتري البيت و يقسطهولك ....لحد أكتوبر اللي فات كان ممكن ما تدفعش مقدم = Zero downpayment ....بعد انهيار سوق العقارات في أمريكا كندا لغت الحكاية ديه ...دلوقتي لازم مقدم

كندا غير أمريكا في حكاية الضمان الأجتماعي ....أمريكا مبادئ السوق و الرأسمالية مطلقة ...كندا الدولة ليها دور لضمان الأمان الاجتماعي (لو حد يترجم social security أحسن يقولي )

نفس الشقة اللي بنوصفها فوق أم ١٥٠٠ في الشهر ديه ممكن تتباع ٤٠٠ ألف مثلا ....قد إيه القسط في الشهر مش حاقدر أقول الصراحة لاني ما أعرفش ...بس أكيد أكتر من ال-١٥٠٠ الميزة إن اللي بتدفعه فاضلك مش ايجار ضايع و خلاص

كل ما أتحركت بره دايرة وسط تورنتو ديه الأسعار بتقل ....بالمثل كل حي في حتة غالية و كل ما بعدت الأسعار بتقل .... تورنتو علي بعضها برضه كل ما بعدت عنها الأسعار حتقل

شوية روابط مفيدة

Yonge St

Yonge & Bloor

Horizon

الحلقة الجاية الاكل :blink:

[د هشام ابراهيم]

تسلم ايدك يادوكتورنا حلوة اوي الحلقة دي. خش بقى على الشقق ياريس. وياريت سيادتك لو تقدر تفتكرلنا السايت اللي اجرت منة الشقة المفروشة.

غالي و الطلب رخيص يا سيدي الفاضل ...أخلص الأسعار و أخش علي السكن ....إعتبر المشاركة السابقة تصبيرة :hearts:

الشقة المفروشة أنا فاكر عنوانها كويس ....الرابط أهو

Cromwell Suites

الصراحة هي كانت كويسة بس أنا ما أنصحش بيها ...شكلك ما قريتش أول صفحتين في الموضوع

[pharaon]

السلامو عليكم ازيك يا دكتور

بجد يا دكتور الف شكرا انا متوقعتش الاهتمام باستفساراتى يكون بشكل ده

بس حضرتك مثل رائع بجد لانسان كويس ونظيف من جوه ربنا يباركلك ويجازيك على اد نيتك

ويجازيك حسنات على كل حرف كتبته

:hearts: :blink:

[yassir]

دكتورنا الفاضل هشام .....تحياتى و تقديرى لمجهودك فى مساعدة أخوانك و أبناء بلدك .

عذرا لتطفلى فى الدخول لموضوعك بس ليا عتاب بسيط ليس على شخصك الكريم و لكن على مداخله و رغم أنك لست صاحب المداخله الا انها فى موضوعك ....فأسمح لى أن أعلق عليها دون تفصيل حتى لا أفسد جهدك

سكاربرو سمعتها وحشه جدا و فيها مشاكل مخدرات و جريمه و مدارسها سيئه

أعتقد أن مساحه الكراهيه و التعصب لمحافظات بعينها و اعراق بعينها و ملابس و عادات اجتماعيه و شعارات تتقلص كثيرا عندما تهاجر الى وطن يشكل التسامح فيه عمودا محوريا لخيمه التلاقى بين الثقافات و الشعوب , فلا يصح وصم منطقه بهذه الضخامه أتخذها العرب و المسلمين من جهات مختلفه فى العالم مقصدا لهم بهذه الصفات, ووضع مواطنين أشرف أن اكون واحدا منهم أختاروا هذا المكان وطنا لهم و لقوا فيه كل الخير و أمنوا على أولادهم و زوجاتهم وأعمالهم فى تصنيف متدنى كما ذكر .

أرجو ألتزام المصداقيه فى طرح المعلومه , الرأى حريته مكفوله للجميع ,أما المعلومه فألتزام الصدق فيها أمر واجب على كل مسلم و تشويه سمعه منطقه أو عرق أو مجموعه دينيه أمر غير مفبول , و أن كان يسمح به فى بلاد لا يمثل للفرد و معتقداته قيمه تذكر فهنا الأمر يختلف . و يوجد الكثير من الوسائل القانونيه التى يستطيع المتضرر أتخاذها للدفاع عن ما ينتمى اليه و يحبه و أرتضاه لنفسه و عائلته .

شكرا لسعه صدرك طبيبنا الكريم ....لك منى كل التحيه و أسأل الله أن يجعل ما تقدم من جهد لخدمه أهلنا فى ميزان حسناتك .....

[د هشام ابراهيم]

السلامو عليكم ازيك يا دكتور

بجد يا دكتور الف شكرا انا متوقعتش الاهتمام باستفساراتى يكون بشكل ده

بس حضرتك مثل رائع بجد لانسان كويس ونظيف من جوه ربنا يباركلك ويجازيك على اد نيتك

ويجازيك حسنات على كل حرف كتبته

:hearts: :blink:

العفو يا باشا و ألف شكر علي الكلام الجامد ده ...يا رب أكون عند حسن الظن دائما ....أما ردي الوحيد علي دعائك الطيب هو آااميين :flr1:

[د هشام ابراهيم]

دكتورنا الفاضل هشام .....تحياتى و تقديرى لمجهودك فى مساعدة أخوانك و أبناء بلدك .

عذرا لتطفلى فى الدخول لموضوعك بس ليا عتاب بسيط ليس على شخصك الكريم و لكن على مداخله و رغم أنك لست صاحب المداخله الا انها فى موضوعك ....فأسمح لى أن أعلق عليها دون تفصيل حتى لا أفسد جهدك

......

شكرا لسعه صدرك طبيبنا الكريم ....لك منى كل التحيه و أسأل الله أن يجعل ما تقدم من جهد لخدمه أهلنا فى ميزان حسناتك .....

أولا أهلا و سهلا بحضرتك و يا رب ما تحرمناش من مشاركاتك أبدا .....رغم القصر النسبي للفترة اللي قضيتها هنا في المنتدي انما بسم الله ما شاء الله سيرة حضرتك لا تذكر إلا بكل خير و محبة و الناس كلها تشكر شخصيتك الطيبة المساعدة

بالنسبة للوصف فاكيد مش مقصود منه أي اهانة أو تمييز أو تعالي .... كلنا بنتابع جهود سكاربورو الحثيثة لدرء شبهة العنف و الجريمة فيها .... أغلب العنف و الحوادث ليها علاقة بعصابات تجارة المخدرات و بتتركز في مناطق معينة لا علاقة لها علي الاطلاق بالجالية العربية أو الأسلامية هناك

فيه أماكن كتير برضه في سكاربورو بتتميز برقي واضح و شياكة ظاهرة ....غير طبعا أرز و الغدير حبايبي ....الواحد فعلا مش عارف كان حيعمل إيه من غير المحلات ديه :hearts:

[precanadian]

اسعار المنازل

اسعار الاكل

اسعار الملابس

اللاب توب

الموبيلات

اسعار السيارات

تكلفة صياتة العربيات وتغير الزيت

لتر البنزين

ده الهوم ورك المطلوب ....بسم الله توكلنا علي الله :hearts:

الله يكرمك ويعينك يا دكتور ( مثل المومنين في توادهم وتراحمهم وتعاطفهم كمثل الجسد الواحد.... صدق رسول الله)

[د هشام ابراهيم]

الله يكرمك ويعينك يا دكتور ( مثل المومنين في توادهم وتراحمهم وتعاطفهم كمثل الجسد الواحد.... صدق رسول الله)

صدق رسول الله عليه أفضل الصلاة و أتم التسليم ..... لك عظيم الامتنان يا أخي الفاضل

[Torontotruk]

http://www.youtube.com/watch?v=rkNzJwARQMI

[samehelassad]

تسلم ايدك يادوكتورنا حلوة اوي الحلقة دي. خش بقى على الشقق ياريس. وياريت سيادتك لو تقدر تفتكرلنا السايت اللي اجرت منة الشقة المفروشة.

غالي و الطلب رخيص يا سيدي الفاضل ...أخلص الأسعار و أخش علي السكن ....إعتبر المشاركة السابقة تصبيرة :)

الشقة المفروشة أنا فاكر عنوانها كويس ....الرابط أهو

Cromwell Suites

الصراحة هي كانت كويسة بس أنا ما أنصحش بيها ...شكلك ما قريتش أول صفحتين في الموضوع ;)

دكتور هشام تسلم الايادي بجد. والله ينور عليك. حبة معلومات من اللي في الجون.

ملجوظة انا مزاكر كويس اول صفحتين. و انشاء الله مش هضور في اي حتةشرق يونج. انا خطتي تقريبا واضحة. بس بحب اخد feed back مش ممكن الاقي حاجة افضل. وتحديدا الcommunication مع الناس دول هيطمني اكتر في حتة اني الاقي ايجار من غير مالاقي شغل ولا تاريخ ائتماني. يعني مهاجر جديد.

[enjisultan]

طبعا يا دكتور حضرتك براءة العيب من عندنا ...كان لازم بجد اشكرك عى التوبيك الرائع...فى الواقع موضوع الهجرة م يتعدي كونة مجرد فكرة لسة.... عشان كدة ما كونتش ملمة بموضوع المعادة الكندية...وشكرا مرة تانية

[د هشام ابراهيم]

http://www.youtube.com/watch?v=rkNzJwARQMI

:lol: :lol:

أصحاب العقول في راحة لاما بقي دماغ عالية جدا

دانداس ده بيبقى عيشة في الصيف و الويك اند .....بس أحلي مرة بقى كان اليوم القومي لتركيا و الميدان أتفرش بضايع و أكل تركي :)