قصتي مع كندا

[qenawy]

يادكتور هشام ماشاء الله عليك وعلي موضوعك ومبروك المائة صفحة

[حسام يوسف]

بجد يا دكتور هشام

فعلا صور تشرح القلب

بس فين الناس يا دكتور هشام؟

دي تورنتو أكبر مدن كندا؟

عموما الروقان حلو برضة

أوعدنا يارب

[د هشام ابراهيم]

يادكتور هشام ماشاء الله عليك وعلي موضوعك ومبروك المائة صفحة

يا باشا الله يخليك ...سعادتك من أول الناس اللي شجعوني اكتب الموضوع كله و حقيقي مجهودك و أدبك و طيبتك أمثلة تحتذي

باذن الله تنورنا في كندا قريب بقي

[د هشام ابراهيم]

بجد يا دكتور هشام

فعلا صور تشرح القلب

بس فين الناس يا دكتور هشام؟

دي تورنتو أكبر مدن كندا؟

عموما الروقان حلو برضة

أوعدنا يارب

آمين

الحقيقة يا دكتورنا العزيز إن الصور ديه كانت متاخدة يوم السبت صباحا في وسط البلد علشان كده الدنيا فاضية كده :blink: .......السبت و الأحد بتبقى الدنيا زحمة (نسبيا ) في المولات و الحدائق و الشواطيء ....إلخ

وسط البلد بيبقى زحمة في أيام الاسبوع العادة وقت الذروة ..... إنما أكيد الزحمة لا تقارن بالقاهرة مثلا .....كندا كلها علي بعدها حاجة و تلاتين مليون بني آدم

تورنتو أزحم حتة في كندا دون شك

[د هشام ابراهيم]

طب حد يسألني يا كابتن لطيف هي الدنيا فلة شمعة منورة و كندا ما فيهاش مشاكل و لا عيوب

طبعا الأجابة واضحة .....زاي أي مجتمع بشري فيه نواقص انما علي المقياس الانساني أكيد كندا من أحسن ما يكون

حاحكيلكم كام حكاية كده حصلوا الأسبوع اللي فات

١- الاخوة التاميل كانوا عاملين مظاهرات ضخمة و صاخبة كذا يوم ورا بعض في وسط تورنتو أمام مقر القنصلية الامريكية ... معترضين علي الحرب الأهلية اللي في سريلانكا و متهمين العالم بالتغاضي عن التطهير العرقي اللي بيحصل ضدهم و بيطالبوا بالتدخل خاصة من الولايات المتحدة

المظاهرات قفلت وسط البلد وسط تصميم المتظاهرين انهم يقفلوا الشوارع ....يوم اتنين تلاتة ....البوليس طلب من المتظاهرين انهم يفتحوا الشارع لمرور عربيات الأسعاف و الطواريء خصوصا إن الشارع ده من أهم شوراع تورنتو و لو عايزين يتظاهروا ما فيش داعي يربكوا المرور

المتظاهرين رفضوا و حصل اشتباكات مع البوليس أصيب فيها ناس اصابات طفيفة ....الموضوع وصل للحكومة .....الحكومة سمحت للمتظاهرين بتكملة التظاهر حتي لو الربكة المرورية استمرت

التعليق متروك ليكم

-----------------------------------------------------

٢ - يوم الجمعة نبطشي نساء و ولادة .... استدعوني لقيصرية عاجلة ..... فيه إيه .... المولود متشخص بعيب خلقي خطير يلزمه جراحة عاجلة أول ما يتولد .....نسقوا مع مستشفي الأطفال بحيث إن العملية تتم في خلال ساعات من الولادة .....كل ده مش مهم و بيحصل حتي في أبو الريش .....المشكلة إن الأم عندها ١٦ سنة ..... أنا أصابتني مشاعر مختلفة حاولت انها ما تبانش علي ......١٦ سنة ديه طفلة ..... الصراحة الأول ما كنتش طايق الأم .....طبعا ما أثرش علي الرعاية الطبية أو أي قرار طبي انما كنت واخد موقف نفسي منها .....شوية و ابتديت ألوم الاهل اللي ما حدش فيهم أصلا كان موجود .....الوحيد اللي كان معاها هو الأب ....طفل تاني عنده ١٧ سنة .....بعد ولادة ابنهم.... الحقيقي مشاعري كلها تحولت ..... كل اللي حاسه كان انهم صعبانين علي .......

ما فيش مرة صادفت مشكلة أخلاق إلا و كان سبب من اسبابها غياب دور الأهل ....كندا زاي السعودية زاي مصر زاي فرنسا ...... مسئولية تربية الأولاد مش سهلة و ما ينفعش نسيبها لحد تاني .....للاسف الكتير من الأباء و الأمهات بينشغلوا عن اولادهم و النتيجة ضياع الاولاد

في حالة الطفلة الأم ديه جمعية رعاية الأطفال الكندية كانت موجودة و هي اللي حتتولي رعاية الطفل بما إنهم شايفين إن الابوين غير أهلين لرعاية الطفل (موقع المؤسسة : Children Aid Society )

-----------------------------------------------------

٣ - أخر قصة بقي من كام يوم ...ثقافة الاعتراف بالخطأ سواء في المجال الطبي أو غير المجال الطبي مش موجودة عندنا ....مع إن أول خطوة في الاصلاح هو الاعتراف بوجود خطأ

ما علينا مريضة ٨٣ سنة و فيها علل الدنيا .....سكر ،ضغط ، قلب (عاملة عمليتين تغيير شرايين و تغيير الصمام الأورطي و بتاخد أدوية علشان فشل عضلة القلب و أدوية مسيلة للدم علشان الصمام و كمان عندها AF ) و فشل كلوي و كام حاجة تانية كده .....راحت استقبال مستشفي بتشتكي من تورم في الركبة .....التشخيص المبدئي كان رشح دموي بسبب الأدوية المسيلة للدم اللي بتاخدها (warfarin ) .....صرفولها أدوية و روحوها ..... بعد كام يوم ابتدي يجيلها حرارة و رعشة و التورم زاد ...رجعت للمستشفي و طلع إنه خراج .....دكتور العظم و هو بيشرح للمريضة و اولادها إنه حصل خطيء في التشخيص و انهم بيعتذروا عليه و بيوعدوا باصلاحه .....رد فعل الأهل و هما بيشكروا الطبيب علي صراحته و بيطلبوا منه بذل أقصي رعاية لامهم ...... الطرفين صراحة كانوا يستحقوا الاعجاب ....قمة في الأدب و الرقي

المريضة احتاجت تخدير علشان معالجة التهاب المفصل و الحمد لله عدت كويس و طلبت لها سرير في العناية المركزة لتاني يوم

الملخص نفس الكلام اللي كنت باقوله للنواب في القصر العيني : مش عيب إن بني بشر يغلط ...العيب اننا نصر علي الخطأ و نكابر ....ربنا يهدي الجميع

[الجدار]

بصراحة يعجز اللسان عن وصف الجمال ده

بجد تصويرك فوق الرائع

والبلد بجد نضيفة جداً حتى وهما بيعملوا الإصلاحات المرورية مش مبهدلين الدنيا

مستمتعين معاك يا دوك

تسلم ايدك

[precanadian]

دكتور هشام حبيب اللكل

تحياتي وتقديريري لك .

ما حكيته حضرتك عن شوارع طوكيو اثار اعجابي واندهاشي . والحقيقه تسلئلت واستغربت ليه الناس محور تفكيرها هو الاخر .... كيف اسعدهم كيف احترمهم . كيف نقدم ما يمكن ان يحلم به المواطن

وقارنت ما يناله المواطن العربي بل والاسلامي في الدول الاسلاميه من حقوق . تذكرت حديث النبي صلي الله عليه وسلم ( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى )

اصبحنا اليوم اذا وجدنا عمل انساني او تراحم بين المسلمين ننظر له بانبهار ان الحاجه دي موجوده بيننا علي الرغم ان الناس في دول الفرنجه بتعمل الحاجه وربنا مش في دماغها ومش منتظره مكافئه ربنا لهم في عمل الخير قد مهما بيحسوا بلذه شخصيه في اسعاد الاخر وخدمته واحساس كل فرد في عمله بالمسئوليه مهما كان عمله صغير وتلذذه بقدرته علي الاتقان.

اما نحن لا تواد ولا تراحم ولو وقعت ابقي شوف مين الي هيشيلك وخصوصا وانت في الخليج مسلم من الدرجه الثالثه.

الحكومة سمحت للمتظاهرين بتكملة التظاهر حتي لو الربكة المرورية استمرت

مش بقولك يا دكتور في احترام للاخر حتي ولو مش واقف معانا في نفس الصف.

مسئولية تربية الأولاد مش سهلة و ما ينفعش نسيبها لحد تاني .....للاسف الكتير من الأباء و الأمهات بينشغلوا عن اولادهم و النتيجة ضياع الاولاد

بمناسبه الشوارع يا دكتور هشام : هل كباين الاتصالات في الشارع بتلصق داخلها اعلانات لبنات ليل ولا الموضوع عليه كنترول.

الحاجه التانيه هي تركيبه المجتمع الغربي هل كل الشباب والبنات بتكون عندهم اباحيه والا الموضوع بيكون علي جزء من المجتمع وهناك جزء اخر لا يحب الاباحيه يعني زي مجتمعاتنا كده بتلاقي في اسر ملتزمه بمبادء الاسره وخري بتكون سايبه الحبل علي الغارب .

[Princesse]

دكتور هشام الصور رائعة

كل دا ورد في الشارع؟

حكاية الام الي عندها 16 سنة مؤثرة جداا.

استمر يا دكتور في الكتابة، فكلنا أذان صاغية و عقول واعية

[newcomer]

...... الطرفين صراحة كانوا يستحقوا الاعجاب ....قمة في الأدب و الرقي

مش عيب إن بني بشر يغلط ...العيب اننا نصر علي الخطأ و نكابر ....ربنا يهدي الجميع

زى ما حضرتك قلت قبل كده

هيه منظومة متكاملة.....

و زى ما ا.precanidian ما قال....الغريب انهم بيعملوا

اللى المفروض ديننا احنا بيقول عليه

هم فكرونى بالاحاديث ان من لا يرحم ، لا يرحم

وأن حب لأخيك ما تحب لنفسك....و التمس لأخيك بضع و سبعون عذرا

اللهم اهدنا فيمن هديت

[terminator]

تخيلو أنا قريت 104 صفحة فى يومين !!!!!

بجد موضوع هايل يا دكتور هشام .. وصور رائعة جدا ...

[د هشام ابراهيم]

بصراحة يعجز اللسان عن وصف الجمال ده

بجد تصويرك فوق الرائع

والبلد بجد نضيفة جداً حتى وهما بيعملوا الإصلاحات المرورية مش مبهدلين الدنيا

مستمتعين معاك يا دوك

تسلم ايدك

صديقي العزيز رافع روحي المعدنية

الله يسلمك يا باشا مرورك شرفني

الشيء بالشيء يذكر نقدر نقول إنه حالة من الاحترام المتبادل ....العمال بيحاولوا دايما يحافظوا علي الطريق و المكان و قائدي العربيات دايما بيهدوا تماما - خصوصا لو علي طريق سريع - و هما بيعدوا جنب العمال و هما بيشتغلوا

[د هشام ابراهيم]

دكتور هشام حبيب الكل

تحياتي وتقديريري لك .

ما حكيته حضرتك عن شوارع طوكيو اثار اعجابي واندهاشي . والحقيقه تسلئلت واستغربت ليه الناس محور تفكيرها هو الاخر .... كيف اسعدهم كيف احترمهم . كيف نقدم ما يمكن ان يحلم به المواطن

.

يا أفندم الله يخليك

دكتورنا العزيز فعلا سعيد بعودتك للمشاركة ما تحرمناش منها تاني بقي

نفس اللي قاله الأمام محمد عبده ...الغرب بيطبق تعاليم الاسلام من غير ما يعرف ....و المسلمين اللي مفروض عارفين ما ميبطبقوهاش

عارف حضرتك هو كل واحد بيعمل اللي عليه لانه عارف إنه حيرجعله تاني بصورة أو باخري

All for one and one for all

[د هشام ابراهيم]

بمناسبه الشوارع يا دكتور هشام : هل كباين الاتصالات في الشارع بتلصق داخلها اعلانات لبنات ليل ولا الموضوع عليه كنترول.

الحاجه التانيه هي تركيبه المجتمع الغربي هل كل الشباب والبنات بتكون عندهم اباحيه والا الموضوع بيكون علي جزء من المجتمع وهناك جزء اخر لا يحب الاباحيه يعني زي مجتمعاتنا كده بتلاقي في اسر ملتزمه بمبادء الاسره وخري بتكون سايبه الحبل علي الغارب .

علي قد تورنتو .... فيه بؤرتين .....منطقتين في وسط تورنتو كل ما بعدت عنهم عمرك ما حتشوف أي مناظر مؤذية بما فيها إعلانات فتيات الليل

منطقة "The Village " و ديه خاصة بمثلي الجنس ...... في يوليو ليهم كرنفال ضخم بيجيله الناس من كل الدنيا للمشاركة أو الفرجة ....غير الكرنفال الزفت ده ما بتسمعلهمش صوت و لا تشوفهم ما دام بعيد عن منطقتهم

منطقة "The red district " و ديه خاصة بفتيات الليل ..... بره المنطقة كمان بشوية ممكن تلاقي ملاهي ليلية حطة صور مؤذية انما ده كله في وسط البلد قريب جدا من المنطقة بتاعتهم ....كل ما رحت للضواحي المناظر ديه بتختفي تماما

أغلب كباين الأتصالات بتبقى داخل المباني و المولات و عليه عمري ما شفت إعلانات من أي نوع فيها

بالنسبة للجزء التاني من سؤال حضرتك المهم جدا

أنا حاتكلم علي الدول اللي شفتها في العالم الغربي

كندا

اليابان

أوروبا

مبدئيا الألتزام الخلقي و الديني بيختلف من بلد لبلد و من منطقة لمنطقة جوه نفس البلد و من طبقة إجتماعية لاخري .....عادة الطبقة الأجتماعية المتوسطة خاصة بعيد عن المدن الكبيرة هي أكثر طبقة ملتزمة أخلاقيا

كندا تعتبر من الدول المحافظة بمقاييس العالم الغربي ...لا تقارن مثلا باوروبا ....خصوصا وسط أوروبا ....ما شفتش في حياتي فجور و اباحية أكتر من منطقة وسط أوروبا ...ألمانيا و هولندا تحديدا

بجانب المسلمين ..المسيحيين الكاثوليك و الشرقيين عموما و اليهود الأرثوذكس كلهم ملتزمين جدا أخلاقيا و يندر ما تلاقي حالات انحراف ...أنا بتكلم طبعا عن الملتزمين دينيا مش المتسمين بالدين فقط

بره الدين ..... الألتزام الاخلاقي موجود .....فيه ناس لا دين لهم أصلا انما التزامهم بالاخلاق .....من صدق و اخلاص و عمل خير و اتقان العمل إلخ ...أكتر من ناس بتدعي الدين و بتعملش بيه

تعريف الانحلال الأخلاقي بيتعدي مجرد الزنا أو الشذوذ الجنسي ......الزنا من الكبائر و كذلك اليمين الغموس و شهادة الزور و السرقة و غيرها ...رد فعل المجتمعات الشرقية عموما ناحية كبيرة مثل الزنا أو الشذوذ الجنسي لا يساوي رد الفعل ناحية السرقة أو شهادة الزور ......في المجتمعات الغربية عموما رد الفعل ناحية الكذب أو شهادة الزور أو السرقة أقوي بكتير .....التعبير الشائع هو لا شأن لنا بامور غرفة النوم و لكنا يهمنا ما يحدث خارجها

رأيي الشخصي المتواضع الموقفين غلط .....الكبائر كلها تستاهل نفس رد الفعل ...الرفض المطلق ... الزنا يساوي الكذب .....الشذوذ الجنسي يساوي اليمين الغموس إلخ ..........

كل اللي أقدر أقوله إن دور الأبوين محوري في المحافظة علي الأبناء .....في تورنتو شفت قصص كتير من الجيل التاني و التالت من العرب و المصريين المهاجرين ......الألتزام الديني و الأخلاقي في النماذج اللي شفتها كان أكتر بكتير من الأنفلات .....ساعات باحس إن إدراك الأبوين إن فيه خطر بيخلوهم ياخدوا بالهم أكتر من الأولاد ..... ألشعور الزائف بالامان مكن يخلي الأبوين مش مدركين إن الأولاد في خطر حتي لو المجتمع محافظ "شكليا"

[د هشام ابراهيم]

دكتور هشام الصور رائعة

كل دا ورد في الشارع؟

حكاية الام الي عندها 16 سنة مؤثرة جداا.

استمر يا دكتور في الكتابة، فكلنا أذان صاغية و عقول واعية

سمو الأميرة ..... متابعتك تشرفني .......بجد الربيع في كندا أحلي فصل في السنة ....لو الواحد يقدر كان خده اجازة و طلع بره المدينة للطبيعة الساحرة .....البلدية بتحاول تعوضنا باحواض الزهور ديه ....جهد مشكور طبعا

[د هشام ابراهيم]

زى ما حضرتك قلت قبل كده

هيه منظومة متكاملة.....

و زى ما ا.precanidian ما قال....الغريب انهم بيعملوا

اللى المفروض ديننا احنا بيقول عليه

هم فكرونى بالاحاديث ان من لا يرحم ، لا يرحم

وأن حب لأخيك ما تحب لنفسك....و التمس لأخيك بضع و سبعون عذرا

اللهم اهدنا فيمن هديت

آمين

سعادة المدير العام طبعا اترقينا من هنا و ابتدينا نغيب و ما نتابعش .....انذار بالخصم يا باشا

أو أقول لحضرتك نبتدي نلتمس الأعذار لبعض و بدل الانذار تبقي ديه

[د هشام ابراهيم]

تخيلو أنا قريت 104 صفحة فى يومين !!!!! :ninja:

بجد موضوع هايل يا دكتور هشام .. وصور رائعة جدا ... :lol:

أهلا و سهلا بحضرتك وسط اخوانك يا باشا ..... شاكر لحضرتك المتابعة و الثناء :roseop:

الموضوع ده أسهل واحد عندنا ....عليك بقي بموضوع د الشامي و د تهامي و د قناوي ......دول حيضمنوا بقية الأسبوع :lol:

تحياتي يا باشا

[د هشام ابراهيم]

خاطرة سريعة بمناسبة دور البرد اللي عندي ( ما تخافوش مش H1N1 )

فرق كبير بين أدوية كندا و مصر إن أدوية مصر ما لهاش أثار جانبية ...حتي الايبوبروفين .....في كندا بيقلب البطن و بيسبب الآم ...المصري آخر حلاوة ....حاجة من اتنين لا إما في مصر الدوا ما فيهوش المادة الفعالة أو مش متعايرة صح و الدوا بيشتغل بالبركة أو الأيحاء (placebo )

لا إما مصر توصلت لسر تكنولوجي كندا ما وصلتلوش في عالم تصنيع الأدوية

[أحمد سيف]

خاطرة سريعة بمناسبة دور البرد اللي عندي ( ما تخافوش مش H1N1 )

فرق كبير بين أدوية كندا و مصر إن أدوية مصر ما لهاش أثار جانبية ...حتي الايبوبروفين .....في كندا بيقلب البطن و بيسبب الآم ...المصري آخر حلاوة ....حاجة من اتنين لا إما في مصر الدوا ما فيهوش المادة الفعالة أو مش متعايرة صح و الدوا بيشتغل بالبركة أو الأيحاء (placebo )

لا إما مصر توصلت لسر تكنولوجي كندا ما وصلتلوش في عالم تصنيع الأدوية

ألف سلامه عليك يا د. هشام

بخصوص موضوع الأدوية ... بناء على خبرتك الطبية ... ترجح أي احتمال من الاثنين ؟؟

[د هشام ابراهيم]

ألف سلامه عليك يا د. هشام

بخصوص موضوع الأدوية ... بناء على خبرتك الطبية ... ترجح أي احتمال من الاثنين ؟؟

الله يسلم حضرتك يا أفندم

لا مادام سألتني بقي عن خبرتي الطبية فممكن أفتي و أقول إن المصريين الجبابرة محتفظين بسر من أيام الفراعنة .... ملهاش حل تاني

[ايهاب سالم]

سمو الأميرة ..... متابعتك تشرفني .......بجد الربيع في كندا أحلي فصل في السنة ....لو الواحد يقدر كان خده اجازة و طلع بره المدينة للطبيعة الساحرة

تسجيل متابعه متقطعه و إعجاب و تقدير و يا دكتورنا

صور رائعه و تحليلات متميزه

كندا في الربيع ...... هي جنة الأرض

زي ما قال د / شيكو يا جماعه

الواحد لو يقدر كان إستقال من شغله عشان يتفرغ بس للإستمتاع بجمال الطبيعه في الربيع

بس طبعا خارج تورونتو .... في الضواحي

أمس يا دوك ذهبنا في زياره لميلتون لتفقد مدى التقدم في بناء البيت

وإستغلينا باقي اليوم في زيارة pond سمعت عنها هناك إسمها mill pond

لم أكن أتخيل مدى الجمال اللي شفناه هناك

مكناش عاوزين نرجع مسيساجا أخر اليوم

للأسف مكنتش واخد معايا الكاميرا لكن جبت كام صوره من النت للمكان .. عشان نيفشواليز المسائل مع بعض ... و لو إن الحقيقه أحلى

معلش .. الزياره الجايه .. و اللي هيا الاسبوع القادم بإذن الله .. هأخد معايا الكاميرا و أصورلكم صور أحلى من دي

وإن شاء الله هأنزلها في قهوتي الجديده

قهوة "عمار يا كندا .. البيت بيتك"

محدش يضرب

تم تعديل 4 مايو 2009 بواسطة ايهاب سالم