قصتي مع كندا

[moheltohamy]

معلش يا د. هشام...

مشاركة مني كده ع الماشي (لو ما عندكش مانع طبعاً)...

آدي عربيّت البوليس يا سادة...

[Torontotruk]

مشاركة من عندي لوما عندكشي مانع طبعا...انا كنت ساكن في ايست يورك قبل فيكتوريا بارك بمحطة وحصلت حريقة في البلدنج ايلي انا ساكن فيه المكون من 20 طابق والمطافي جت بعد ما اكلت النار محتويات الشقة...تقريبا وصلوا بعد ساعة من الابلاغ عن الحريق...ورقم 911 احيانا بياخذ فترة تزيد علي 15 دقيقة لكي يرد احدهم عليك و يطلبون منك ان تغلق الهاتف علي وعد بالاتصال بعد خمس دقائق و لا يتصلون..اما تجاربي مع الشرطة فتكاد تكون معدومة و لكن يوجد بعض الناس يشكون من فظاظتهم احيانا و خاصة لكل من كانت له ملامح عربية...

[nightmare]

One man's dream is another man's nightmare

مين اللى جايب سيرتي هنا

د. هشام

كلامك واسلوبك رائع .. تسجيل متابعة بشغف

[HDarwish]

مشاركة من عندي لوما عندكشي مانع طبعا...انا كنت ساكن في ايست يورك قبل فيكتوريا بارك بمحطة وحصلت حريقة في البلدنج ايلي انا ساكن فيه المكون من 20 طابق والمطافي جت بعد ما اكلت النار محتويات الشقة...تقريبا وصلوا بعد ساعة من الابلاغ عن الحريق...ورقم 911 احيانا بياخذ فترة تزيد علي 15 دقيقة لكي يرد احدهم عليك و يطلبون منك ان تغلق الهاتف علي وعد بالاتصال بعد خمس دقائق و لا يتصلون..اما تجاربي مع الشرطة فتكاد تكون معدومة و لكن يوجد بعض الناس يشكون من فظاظتهم احيانا و خاصة لكل من كانت له ملامح عربية...

إنت بتتكلم بجد يا تورنتو ...؟ يعني أطلب المطافي تجيلي بعد ساعة من الإبلاغ عن الحريق ...؟

وأفضل رافع السماعة ربع ساعة بحالها علشان حد يرد عليا ...؟ وكمان يقولي إقفل الوقتي مش فاضينلك وإحنا هنتصل عليك كمان خمس دقايق ...؟ يا نـــهار إسود (الكلمة دي مش متعود استخدمها بس واحد صاحبي امبارح بيحكيلي عن ابنه عنده ثلاث سنين ونصف وبيقول لابوه هاتلي عجلة اقله يا حبيبي أنا مافيش معايا فلوس قاله خلاص اسحب من البنك قاله يا حبيبي الفلوس خلصت ابنه قاله يانهار اسود يا نهار اسود الفلوس خلصت! طيب حنعمل ايه الوقتي ..هههه) نرجع لموضوعنا .... وإيه كمان يوعدوني إنهم يتصلوا عليا وأنا عمال اتفرج على الحريقة وفي نفس ذات الوقت عمال ببص على التليفون علشان يتصلوا عليا ...؟ وكمان ما لاقيش حد يتصل وطبعا الحريقة شغالة وعمال تاكل في الشقة ...

وكمان الشرطة لو حد وقفني في الشارع ... وسألني إنت عربي ... وقلتله آه ... هيقوم رافع إيده ويسفعني بالألم ويقولي إمشي يا إبن ...و ....؟؟؟؟

لا يا عم خلاص حرمت وما عدتش هافكر تاني في كندا ولا عدت هاجيب سيرتها خالص .... خليني هنا في الخليج أحسن أو ألم حاجتي وأنزل على مصر أحسن أقعد معزز مكرم ....

تحياتي وشكراً لتحذيرك وتنبيهنا وتنوير بصيرتنا يا أخ تورنتو .... جازاك الله خيراً

[moheltohamy]

مش باقوللكو تجارب شخصية؟!

واللذيذ فيما يتعلّق بالنحس والتلطيش والتجارب النكد ؛ عمّكو تورونتو ليه فيها نصيب الأسد!

سبحان الله... آهو أنا كنت باتمنى حكايت إن الـ 911 دي تكبّر دماغها وتنفّض! لكن تورونتو يتأخروا عليه ، وانا يجولي زي الطلقة ، وألبس انا 382 دولار!

ولا نسيتو؟!

آهي دي الميزة يا ريّس إنك تسكن أدّام الطافي ، في وسط البلد يعني.

[newcomer]

يا ريت المرة دى السيناريو يتغير يا دكتور هشام........... هتبقى pioneer فعلا لو احتفظت بهدوء اعصابك و ما عملتش زى ما المخرج بيقول.........

السيناريو بيتكرر كل مرة ( زى ال 2 عصير ليمون او برتقال على النيل فى الكازينو بتاع المسلسلات) ..........

.حد يذم او يمدح ...... بغض النظر عن المذموم او الممدوح ( جامد اوى العربى ده !!)

بعدين نبقى فريقين و نمشى طبقا لنظرية المرحوم بوش الشهيرة " اللى مش معانا فهو بالتاكيد علينا ""

و بعدين الشخص الفاضل اللى بيحكى او بيساعد بيزهق و يتضايق و يقول طب يا جماعة سلامو عليكم انا بقى و.........

[اسكندرية تانى]

عزيزى الدكتور هشام

نقدر مشاركاتك المفيدة لنا جميعا و لكن ......عليك بالصبر

متابعون و مستمتعون والله

و تقبل تحياتى :lol:

تم تعديل 1 ديسمبر 2008 بواسطة اسكندرية تانى

[شاب مصري]

مممممم انا شايف الدكتور هشام مش متضايق من كلام تورنتو

وهو جمال الحوار (من وجهة نظري) انه يكون في اراء كتير

وناس بتتكلم في الموضوع وناس بتتكلم في حاجات تانية

ومشجعي الأهلي والزمالك والدروايش

والدنيا شغالة كدا

واللا ايه

[ابن الصعيد]

د هشام

اولا شكرا علي ردك علي سؤالي .

ثانيا لو سمحت تابع السرد بدون النظر علي التعليقات الجانبية .

وشكرا

[moheltohamy]

هوه فيه إيه يا جماعة؟!

الفيلم خلص من الصبح ؛ وكل واحد حبكت معاه الشهامة ويدخل يقول معلش يا د. هشام سيبك منهم!

وما تبصّش ع التعليقات الجانبية!

ما خلاص بأه ؛ الحدوتة انتهت يا حضرات!

على أي حال... أنا باعتذر عن تدخّلي في سير الأحداث ، وخلاص مش هاعطّل الأحداث تاني...

[د هشام ابراهيم]

اخوتي الافاضل أسمحولي افكركم باول مشاركة لي في هذا المنتدى .... تورونتو مش الجنة ..... و ما فيش في الأرض جنة .... أي حتة حيبقى فيها عيوب .... المهم العيوب ديه إيه و نسبتها إيه و كميتها إيه و فرصة تكررها إيه ..... بالمقياس ده تورنتو من أفضل الأماكن ....كندا عموما بالمعني الأصح .....

أخي الفاضل Torontotruk لو المطافي اتأخرت للدرجة ديه حقك انك ترفع على الحكومة قضية تعويض تخرب فيها بيتهم ..... و تسيحلهم في الميديا و ألف من حيصدق من الاعلاميين لانها قصة مثيرة بالنسبة ليهم .....

أخي الفاضل د تهامي قريت قصة حضرتك بتاعة صدر الفرخة و الشوربة و مطعم الأفغاني .... تهلك من الضحك ... فعلا المغتربين عامة و المصريين خاصة عليهم حاجات يا جدع .... بالمناسبة مطعم الأفغاني ده فين

[د هشام ابراهيم]

ما دام دلفنا للعيوب نقول شوية علشان الناس برضه تاخد الصورة الكاملة .... حابتدي برضه بالتعليم و الصحة

التعليم الحكومي من أفضل ما يمكن و كمان فيه مدارس خاصة بس باهظة الزمن و ملهاش لازمة في رأيي .... المشكلة تكمن في التربية مش التعليم .... طبعا احنا كشرقيين مسلمين أو مسيحيين معتقداتنا و تقاليدنا قد تصطدم (الحقيقة مش قد هي فعلا حتصطدم ) مع القيم الغربية و ديه يمكن أكبر مشكلة ممكن تواجه المهاجر مع عائلته

الحل في أيدينا .... مجهود مضاعف لا يكل و لا يمل و تركيز دائم على التربية الدينية الصحيحة ... الحقيقة برضه الكلام ده بقى لازم جدا في الزمن ده سواء كنا في كندا أو في مصر أو في الخليج .... الدنيا دلوقتي صعبة جدا و المغريات كتيرة و طرق الانحراف متعددة في أي مكان في العالم .... المراكز الأسلامية موجودة و فعالة جدا في تورنتو .... تحفيظ قرأن و دروس لغة عربية و دروس سيرة إلخ ..... حنتعب شوية آه .... بس حق ولادنا علينا إن احنا نوفر لهم وطن يحترم ادميتهم و يصون صحتهم .... بلد فيها تعليم و رعاية صحية و ديمقراطية ... بلد ما أضطرش فيها اني أكذب أو ارشي أو أعمل حاجة تخالف ضميري علشان لقمة العيش .... حكاية العادات و التقاليد ديه فيه منها مفيد و فيه منها مضر ..... الأهم الدين و أعتقد اني كده كده لازم نبذل مجهود مضاعف للحفاظ عليه وسط المغريات العديدة الموجودة دلوقت سواء كانوا في كندا أو في مصر

مثال ناس مصريين إتعرفنا عليهم هنا .... الأب و الأم مهندسين و قاعدين في ميسيسوجا مهاجرين من أكتر من ٣٠ سنة و ليهم أبن و أبنة موليدين هنا ....الأم قعدت من الشغل بعد كل ولادة ٥ سنين علشان تاخد بالها من الاطفال و إيه اللي بيشوفوه و بيتعلموه .... دروس قرآن أسبوعية و دروس لغة عربية و دروس اضافية في البيت كمان .... النتيجة ولاد زي الفل عارفين ربنا كويس قوي و صلاة و صوم و التزام .... الهدف من القصة ديه مش إن كل الولاد حيطلعوا كده لأ ...الهدف إن الوالدين عليهم مسئولية كبيرة جدا خاصة في العصر الحالي

[د هشام ابراهيم]

نيجي للصحة .... الرعاية الصحية في كندا من أفضل ما يكون و مجانية لكن المشكلة في تأخير تقديم بعض الخدمات الغير طارئة .... يعني مثلا أنا حكيتلكم على الموقف بتاع عربية الأسعاف ده ....الحالات الطارئة ما فيهاش هزار و لها الأولوية انما الحالات غير الطارئة ممكن يبقى فيها تأخير .... مثلا عملية تغيير مفصل ممكن تتأخر ٦ شهور لأن العملية بالدور ( ما تنسوش انها مجانية ) علشان تاخد ميعاد من دكتور العائلة علشان الكشف الدوري السنوي ممكن تتأخر كام أسبوع .... لو رجلك أتجزعت و رحت الطوارئ ممكن تقعد ٣ ٤ ساعات علي بال ما حد يشوفك .... الحال ده ممكن ما يعجبش ناس و ممكن يعجب ناس .... أنا عن نفسي شايف إن نظام الرعاية الصحية الشامل المجاني ما ينفعش يبقى احسن من كده و لو إن الحكومة الكندية مش موافقة على الكلام ده و بتحاول تحسن الخدمة و تقصر قوائم الأنتظار

[hgalal]

سلامو عليكم دكتور هشام:

تسجيل دخول ومتابعة وجزالك الله كل خير. :closedeyes: :closedeyes: وبجد بدعيللك ربنا يوفقك في حياتك العلمية والعملية والإجتماعية. وصحيح يادكتور اجمل حاجة تشرفني اني اسمي

هشام زيك. :blink: :lol:

[jessika]

دكتور هشام ابراهيم حقيقى انسان رائع

[د هشام ابراهيم]

ألف شكر لجميع الأخوة على المشاركة و المتابعة و التشجيع .... و شكر خاص للدكتور تهامي على صورة عربية الدورية .... في الجول To serve and protect

.... بس أنا لسه مستني عنوان المطعم الأفغاني ده :closedeyes:

نيجي للطقس .... كندا برد ما فيش كلام .... لكن تورنتو من أحسن الأماكن في كندا جوا .... فانكوفر درجات الحرارة فيها أحسن من تورنتو صيفا و شتاء انما مطر مستمر و الشمس بتطلع قليل أصلا .... اصدقاء فاضلين لي من لبنان طلعوا من تورونتو لفانكوفر و ما قدروش يستحملوا هناك و راجعين تورنتو إن شاء الله على أول السنة

جو تورنتو مميز جدا .... فاكرين كتب الأطفال المصورة عن الفصول أو أوبريت الربيع بتاع فريد الأطرش

الربيع بديع و درجات حرارة معتدلة و الشجر اللي كان عاري تماما من الورق في الشتا و شكله مات خالص بامر الله سبحانه يرجع يتغطي كاملا تاني و الورود و الأزهار تفتح في كل حتة

الصيف حار و رطوبة و الشمس ساطعة و الناس مخففين الهدوم و طالعين على الشواطئ أو الكورنيش ساعة العصاري و المغرب

الخريف بارد نوعا و الشجر بيغير ألوان ورقه لاصفر و أحمر و بني و على أخر الخريف الورق كله يقع على الارض و يبقي لعبة للرياح تاخده و تجيبه

البرد قارص و تلج و جليد ... الحرارة ممكن تنزل لناقص أربعين بس العادي بيبقى ناقص ١٥ أو عشرين بال-windcill

ديه حاجة تانية حبتها في كندا .... الحرارة بتتقال قيمة و احساس .... مثلا في مصر يقولوا الحرارة ٣٥ تنزل الشارع تقول مش ممكن تكون ٣٥ ديه مش أقل من ٤٥ ....٣٥ ديه بتتاخد في مطار القاهرة باين تحت ظروف جوية معينة انما احساس الناس في ميدان العتبة مثلا لا علاقة له بالحرارة ديه .... رطوبة و رياح و عوامل تانية بترسي على حرارة معينة ..... في الصيف الدرجة بتتقاس بال-Humidex و في الشتا بال Wind chill

الحقيقة برضه إن الدنيا هنا مصممة لجو الشتا و الحكومة ما بتكلش عن الخدمة ..... الدنيا كلها هنا مكيفة تكييف مركزي و حياه ال-Indoors قوية جدا لدرجة انك لو عايز ممكن ما تخرجش الشارع أصلا في الشتا و لو خرجت يبقى لاقل وقت ممكن ..... طبعا لبس الشتا لازم يكون محترم جدا و عازل للحرارة تماما ..... طبعا أستحمال الحرارة بيختلف من شخص لاخر ....يعني أنا استحمل البرد احسن كتير من الحر و الرطوبة .... غيري مش كده و لله في خلقه شئون

الحاجة التانية بالذات في تورنتو البلدية ما بتونش في الشتا كاسحات الجليد شغالة الله ينور .... التلج بيتشال باسرع ما يمكن .... الطرق و الكباري اللي بتتبهدل جامد من الملح و الجليد كل شوية يرصفوهم مرارا و تكرارا .... مصل الأنفلونزا ببلاش في كل حتة للي عايز .... تحذيرات الأرصاد الجوية بتتغير كذا مرة في اليوم .... يعني لو توقعوا الحرارة تبقى ١٥ و حصلت حاجة تخلي التوقع يتغير و يبقى ١٤ حتشوفه قدامك في التلفزيون و تسمعه في الراديو و تقراه على النت :closedeyes:

[bentbatota]

السلام عليكم دكتور هشام تحيه متاخره بس انا متابعة من اول القصة ابتدأت

نورت المنتدى بقصتك وكل المعلومات اللى بتقولها وبيستفيد منها الجميع وان شاء الله يكون فى ميزان حسناتك

معلش انا ليا سؤال حضرتك ذكرت ان فى بعض الاطباء اشتغلوا فى التمريض وهناك وظيفة مساعد طبيب ممكن حضرتك اى معلومات عنها والزى ندخل المهن دى؟ محتاجه دراسة هل شهادة الطب اللى معنا تنفع ولا لا فى العمل فى تلك المهن

وتسجيل اعجاب ومتابعة لكل ما تكتب وشكرا لسعة صدرك وطول بالك على كل المداخلات والاسئله

[ايهاب سالم]

التعليم الحكومي من أفضل ما يمكن و كمان فيه مدارس خاصة و ملهاش لازمة في رأيي ....

المراكز الأسلامية موجودة و فعالة جدا في تورنتو .... تحفيظ قرأن و دروس لغة عربية و دروس سيرة إلخ

بس حق ولادنا علينا إن احنا نوفر لهم وطن يحترم ادميتهم و يصون صحتهم ....

بلد فيها تعليم و رعاية صحية و ديمقراطية ...

بلد ما أضطرش فيها اني أكذب أو ارشي أو أعمل حاجة تخالف ضميري علشان لقمة العيش ....

كلام جميل وكلام معقول و محدش يزعل م الأصول

كانوا بيقولوا عليا مبالغ و فكي متدلي وباضحك ع الناس

قول كمان يا دوك

تسجيل إرتياح

عمار يا كندا

[ايناس احمد]

كلام رائع يادكتور هشام ربنا يكرمك ويزيد من امثالك

ويجزيك خير على مجهودك معانا :closedeyes: :closedeyes: :blink:

[precanadian]

د هشام :

هل عمر الطبيب قد يكون عائق او عامل تفضيل في مقابلات الرسيدينسي والدخول في السيستيم؟

لك تحياتي وتقديري