ليه اخترت التوقيع ده

[عصام]

أنا استلمت العضوية بالتوقيع ومن ساعتها ما لعبتش فيه :closedeyes:

الجزء الأول من توقيعى بيعبر عن مدرسة من مدارس التعامل مع المشاكل .. واللى أنا باتبعها الحقيقة

الجزء التانى .. قررت أضيفه لما لقيت الناس بتندفع خلف شخص ما .. من هؤلاء الذين يسعون إلى الوصول إلى منصب ما .. حتى أنهم قد يفقدون أرواحهم فى فى سبيل الدفاع عن بعض المرشحين فى عملية انتخابية مثلا ..

فكان هذا التوقيع فقط .. للتذكير بأن كل ساع إلى سلطة .. هو صاحب مصلحة .. سوف تعود عليه بوصوله إلى ذلك المنصب ... قد تتفاوت أهميتها بالنسبة له .. لكنه فى النهاية بالتأكيد .. صاحب مصلحة .. سواء بقى كانت انتخابات .. زعامة .. إدارة .. إلخ يعنى هو فى النهاية مش قديس بيعمل دا عشان مصلحتى أنا وإنما عشان مصلحته هو بالأساس

بس

تم تعديل 31 ديسمبر 2008 بواسطة عصام شوقى

[الباشمهندس ياسر]

يا اهلا بالغالى

سامحنى ع التاخير لسه شايف المداخلة حالا

تعليق جميل و تفسير اجمل

بس هو استفسار صغير

يعنى ايه استلمت العضوية بالتوقيع هو حضرتك جايبها م التوكيل دايركت ولا ايه

[الباشمهندس ياسر]

لاحظت ان ناس كتير غيرت توقعاتها بعد الثورة

هيكون شيء رائع لو شرحت ايه المعني من وراء توقيعك

[تامر مصطفى]

لاحظت ان ناس كتير غيرت توقعاتها بعد الثورة

هيكون شيء رائع لو شرحت ايه المعني من وراء توقيعك

اعترف

قبل الثورة كان عندي احساس مستمر ان مصر مش بلدي

وكمان في بياناتي كنت كاتب اني مش بحلم بالرجوع لمصر

اما بعد الثورة

ابتديت احس انها بلدي بالفعل

فغيرت في بياناتي وكتبت بدأت احلم بالرجوع

وغيرت توقيعاتي لصور تعبرعن حبي لوطني مصر

[سقراط المصري]

كنت يوم محبط جداً والدنيا سودا في وشي ، وسقعان وبردان وحالتى حوسه :closedeyes:

وكنت عاوز انزل مصر اسبوع اغير جو ولكن ماسمحتش الظروف..... كنت محبط جداً... ومكنش فيه غير الشحن الذاتي.. يعني اطلع من حالة الاحباط بنفسي... عشان كده - وكنت فاتح المحاورات- كتبت ممكن اللي احصل عليه لو صبرت وتحملت.

يظهر اني ساعتها كنت سقعان وجعان..... فكتبت هذا التوقيع لتحميس الذات على الصبر.

[عبير يونس]

بأشارك يا باشمهندس

بس عشان لقيت واحد من اللي كنت أعرفهم قبل كده في المكان ده

زي ما أكون دخلت مكان غلط معرفوش

فيه وشوش غريبة عني

متعرفنيش

و لا أنا أعرفهم

و فجأة لاقيت حد أعرفه

لأول مرة من مدة طويلة بأحن للماضي

أيام ما كلنا كنا زي الإخوات مع بعض

كان الواحد بيدخل هنا يتونس

و يتدفى من برد الغربة والبعد عن الأهل

عمري ما حسيت اني متغربة زي الأيام دي

حاسة اني معرفش حد

كل حاجة اتغيرت

مع اني كنت بأحلم بالتغيير

بس مكنتش أعرف انه حيبقى بالقسوة دي

يا ترى كانت أقنعة وسقطت؟

و لا كان في غيمة كبيرة مغمية عنيا و مخلياني مش شايفة الحقيقة؟

يا ترى كانت الضلمة أحسن عشان مكنتش شايفة؟؟!!

النور اللي كنت بأنتظره كشف كل شيء

خلاني اتساءل

هل لذة الأوهام أجمل من الحقيقة المرة؟

توقيعي كان

ما تشعر به تجاه الآخرين ... حتما سيعود إليك و بنفس القوة

كنت اؤمن به بشدة

و الآن ثبت لي أن المعادلة الفيزيائية كان فيها نسبة خطأ كانت -للأسف - من نصيبي

توقيعي أثناء الثورة

مصر حق لا أتنازل عنه

التغيير يبدأ من الداخل

و بعد التنحي

مصر حق تم استرداده

التغيير بدأ بالفعل

و عندما أفقت على حقيقة أنني مغتربة

أن حماسي وفرحتي لا قيمة لهما

إلا على الكيبورد

آثرت أن أعود إلى اغترابي

و أن أعود إلى حمل وطني على كتفي

أتجول به في بلاد الله

كما كنت أفعل طيلة حياتي

و أصبح توقيعي

كن أنت التغيير الذي تريده للعالم

[ذهبية]

اتاثرت جدا باغنية حدوتة مصرية و هى بتتغنى باعلى صوت فى وسط ميدان التحرير

البنات و الشباب بيغنوها على صوت منير

كانت قمة الروعة