رجاء افادتى فى مشكلتى مع كفيلي..

[ابوفيروز]

السلام عليكم ورحمه الله وبركاته ...

انا اعمل محاسب بالرياض وموجود فى المملكه منذ 4 سنوات ومكتوب فى العقد الراتب شامل جميع البدلات وهو راتب ضعيف جدا ولكن انا صابر حتى بعد ان زودنى كفيلي برده الراتب ضعيف اوى ... ولو اشتغلت فى اى مكان هاخد افضل منه بكتير .. لكن كنت صابر ..لحد ما كفيلي عايز ينقلنى بره الرياض ويوديني الخرج وده امر مش قادر اقبله خصوصا انى معايا زوجتى وبنتي .. وحياتى مستقره في الرياض ..

انا رافض انى اروح وهو مصر انى لازم اروح هناك وهو رافض انه يزودلى راتب او يوفرلى مواصلات من الرياض للخرج وبيقولى انت تروح تسكن هناك وتوفر ..السكن هناك رخيص.وتقدر توفر...مع انى سالت لقيت السكن ميفرقش كتير عن الرياض .ومع العلم انه ما بيدنيش بدل سكن ولا انتقال وراتى بعد اخر زياده شامل جميع البدلات 3000 ريال.. المهم انا عايز انقل كفاله من عليه وهو رافض ومصر على انى اروح الخرج وانا خدت قرار انى مش هاشتغل هناك خالص على نفس وضعى ده ... هو رافض تعديل وضع ورافض يسيبنى اشوف رزقى فى مكان تانى مع انه كفيلي التانى وانا ناقل عليه ...

انا سمعت ان من حقى اخد نقل كفاله لانى مش جاى عليه وناقل عليه كفاله ... وسمعت ان مش من حقه يدينى نهائي ... يا ريت تفيدونى ايه المخرج فى المشكله ده وايه العمل مع الراجل ده .. وعلى فكره انا قدامى فرصه وظيفيه افضل بكتير من الشغل اللى انا فيه دلوقتى ...

يا ريت يا سي السيد تقولى ايه المخرج واتصرف ازاى ... وارجو سرعه الرد ..

يا ريت يا اعضائنا الكرام المشاركة وتنصحونى اعمل ايه ؟

تم تعديل 5 ديسمبر 2008 بواسطة ابوفيروز

[DIA ELDIN]

ربنا معاك

لكن مين قال انه مش من حقه يديلك نهائي

علشان اكون صريح معاك ناقل علية او مش ناقل علية انت مش هتقدر تاخد نقل كفالة الا بشكل ودي لكن مش غصب عنه

لكن انت حاول توسط الناس اللي قريبين منه وادعي ربنا

وربنا معاك احنا عارفين والله تعسف الكفيل مع القوانين اللي بتساعدة وشوكة الاجانب المكسورة ربنا يعينك

تم تعديل 5 ديسمبر 2008 بواسطة DIA ELDIN

[khleed]

وانت ليه ما تروح الخرج!!!!

الخرج افضل بكثير من ناحية التوفير في السكن والمعيشة..

جيكات الماء اللي تشتريها بخمسة ريالات بالرياض ... تروح الخرج

وتملأ الخزان كامل بموياء الشلال المحلاة بــ 20 ريال فقط !!!

او هل لك مصالك اخرى في الرياض !!!!

ربنا يكون بعونك ...

تم تعديل 5 ديسمبر 2008 بواسطة khleed

[MZohairy]

اعتقد الحل الوحيد انك تثبت انه بيأخرلك الراتب اكثر من 3 شهور

ساعتها تقدر تشتكيه في مكتب العمل و من حقك تنقل كفاله

غير كده اعتقد لا توجد حلول الا الوديه

[بركة]

اعتقد الحل الوحيد انك تثبت انه بيأخرلك الراتب اكثر من 3 شهور

ساعتها تقدر تشتكيه في مكتب العمل و من حقك تنقل كفاله

غير كده اعتقد لا توجد حلول الا الوديه

موضوع الشكوى في مكتب العمل مش حل سريع ولا حاجه

للمزيد من التوضيح رابط آليات تطبيق القانون

تم تعديل 5 ديسمبر 2008 بواسطة بركة

[iloveegypt]

ربنا معاك

بس للامانة الكفيل ليس مجبر على نقل الكفالة حتى لو كنت انت ناقل عليه الكفالة يبقى لازم تحل الموضوع ودى

اما بالنسبة للخرج الحياة طبعا افضل واهدىء من الرياض بس ده يرجع لظروفك

واخيرا الله يعينك المرتب + السكن =3000 ريال

اذا المرتب ضعيف جدا جدا يعنى مش مستاهل تعمل عليه مشاكل

وربنا يوفقك

[Abu Reem]

أخي الحبيب

كل عام وانت بخير

أنا مريت بمشكلتك فبل كده ولكن كان وضعي مختلف كثيرا عن وضعك من حيث الوظيفة والراتب ،،، وقد كنت ناقل الكفالة على كفيلي وطبعا مش بالضرورة يوافقك لك على نقل الكفالة ولن يستطيع أحد إجباره ، ولا أنصحك بتحديه أو بالدخول في مشاكل قانونية ، فللأسف الكفيل بيده كل الخيوط ،، والحل الوحيد أن تجد كفيل أخر يعيطك تأشيرة ( وتكون متأكد من ذلك قبل الدخول في أي خطوة ) لأن التأشيرة الجديدة هي المخرج ومن ثم العودة ولابد أن تكون علاقتك إذا أردت ترك كفيلك الحالي ودية جدا بل تكون ممتازة لكي تشعره أنك رغم تعسفه معك إلا أنك عندك ضمير وتقوم بالعمل على أكمل وجه رغم كل تعسفه معك .

- ولا تنسى أنك طبعا ملام لأنك قبلت بهذا الراتب الشامل لجميع البدلات وهو ( 3000) ريال وطبعا،،، أحيانا الإحتياج يجعل الإنسان يقبل بأي وضع ،،، ولكل واحد ظروفه ،،، فما تقبله أنت قد لا يقبله الأخرين ،،، ولكل واحد وجهة نظره وظروفه ،، ولكن لا أعفيك من شيء من المسئولية لأن هذا الوضع بهذا المرتب بصراحة لو كنت استشرت قبل الموافقة لكان من الممكن أن يتغير الوضع.

على العموم من الممكن أن تنتقل إلى الخرج بالرغم من معرفتي بأن تغير المكان الذي تعود الواحد عليه يكون صعب ولكن لعلمك بعد أن تنتقل إلى هناك وتستمر هناك لفترة سنة مثلا تكون بعدت عن عينه وسوف يشيلك من دماغه وساعتها من الممكن تتغير الأوضاع,.

وللعلم عدم موافقتك على الانتقال للخرج من الممكن أن يعطيه الحق في إنهاء خدماتك ( وهذا حصل بالفعل لأحد زملائي من قبل في أحد الشركات وكان محاسب أيضا).

- تحلى بالصبر أخي الحبيب وهكذا هي الدنيا لا يتحمل قسوتها إلا الرجال و العقلاء ،،، وأنصحك بالبحث عن فرصة عمل خارج المملكة بكل قوة إن أمكن ،، فباقي دول الخليج أفضل في تعاملها من السعودية بكل أسف.

تمنياتي لك بالتوفيق ،،،،

[MrPower]

ربنا يسهللك أمورك

الافضل والأسلم تنقل للخرج علشان تخرج من دماغه

السعوديين مش بيفهموا وخصوصا فى حالتك ديه هوه حاطط فى دماغه انه يطلع عنيك ... وخصوصا ان معاك أسرة فالوضع مقلق ليك

الفرج قريب بإذن الله