كيف احصل على الفيش من فانكوفر؟

[mesh2005]

الحمد لله وصلت فانكوفر من شهر وبدأت وظيفتى

المشكله انى محتاج اعمل فيش لما النومينيشن يخلص على خير ان شاء الله بس للأسف مفيش اى وجود لأى هيئه دبلوماسيه مصريه فى فانكوفر

اقرب سفاره فى اوتاوا يعنى 600 دولار رايح جاى! طبعا شئ صعب جدا

يا ترى فى أى حل؟

سؤال جانبى: هو لا سمح الله فانكوفر بره كندا ولا حاجه؟ يعنى السفاره فى اوتاوا والقنصليه فى مونتريال رغم ان المسافه بينهم 104 ميل بس لكن المسافه بين فانكوفر و اوتاوا 2000 ميل ورغم كده مفيش حتى كشك تبع السفاره فى فانكوفر!!!

[madzoro]

اولا حمدالله على سلامة الوصول .... و كل عام و انت بالف صحة و سلامة

بالنسبة لوجود القنصلية في مونتريال اعتقد انه عشان هي العاصمة الفرنسية بكندا اما السفارة فلازم تتواجد في العاصمة الرئيسية للدولة

ربنا ييسرلك امورك

بالتوفيق

[qenawy]

من المنطقي استحالة الحل الا بتوجهك للسفارة او القنصلية

ليه بقي

لانهم عاوزين صوابعك وصعب جدا صوابعك تروح من غيرك

قايس علي 600 دولار وعوضك علي الله

ثم خد هنا

كل سنة وانت طيب

ثم احكي قصتك تاني انا بيتهيالي انك حصلت علي الوظيفة من النت واتصلوا بيك تليفونيا صح

كمل

[mesh2005]

اول الف مبروك وربنا يعود علينا الأيام بخير ومبروك للأخوه الأقباط بمناسبه اقتراب اعيادهم

ثانيا الف شكر على الردود

تمام انا سافرت بناء على عقد عمل منالنت والحمد لله الشركه ممتازه والناس هنا بيساعدونى كتير

بالتوفيق ليكم كلكم

شكرا مره تانيه

[mesh2005]

سؤال سريع: يا ترى لو روحت للسفاره وعملت طلب الفيش حيبعتوه على البيت لما يخلص ولا لازم برده اروح اوتاوا تانى عشان استلمه؟

تم تعديل 10 ديسمبر 2008 بواسطة mesh2005

[مصرية والنعم]

سؤال سريع: يا ترى لو روحت للسفاره وعملت طلب الفيش حيبعتوه على البيت لما يخلص ولا لازم برده اروح اوتاوا تانى عشان استلمه؟

اخى الكريم

دة موقع السفارة المصرية ممكن تدخل وتعرف كل اللى عايزة وممكن تتصل بيهم وتستفسر

http://www.mfa.gov.eg/Missions/canada/OTTAWA/Embassy/ar-EG/

ربنا يوفقك

[CanadianPR]

الاجابه سهله ومش عايزه لا تسافر ولا حاجه

اى حد نازل مصر يجيبلك فيش ...

تروح اي قسم فى فانكوفر ب 25 دولار تعمل الفيش وتبعته للسفارة ومعاه 40 دولار رسم فيش يجيلك بعد 21 يوم ...

ده انا عملت الحكايه دى تلات مرات 100 دولار

تم تعديل 10 ديسمبر 2008 بواسطة CanadianPR

[mesh2005]

الاجابه سهله ومش عايزه لا تسافر ولا حاجه

اى حد نازل مصر يجيبلك فيش ...

تروح اي قسم فى فانكوفر ب 25 دولار تعمل الفيش وتبعته للسفارة ومعاه 40 دولار رسم فيش يجيلك بعد 21 يوم ...

ده انا عملت الحكايه دى تلات مرات 100 دولار

انت بتتكلم جد؟؟ معلش اصل انا مش قادر اصدق ان فى اجراءات حكوميه بتتم بالسهوله دى!

[Gimie]

ممبروك يافندم

انا كنت عايز اسأل عن الموقع اللى حضرتك تنصحني اني ادور فيه على شغل في كندا او المحامي اللي ممكن يساعدني اني الاقي شغل هناك و انا في مصر

شكرا جزيلا