كيف انسي زوجي السابق

[احلام عادية]

ارجو الافادة فانا مطلقة من 3 اعوام لكن لا استطيع ان انسي طليقي هذا علي الرغم من ان كان كله عيوب لكن حتي هذه العيوب احببتها وتقدم لي العديد والعديد وكانت النهاية اني اجلس لاحكي عنه وعن ذكرياتي معه مع اي انسان يتقدم للزواج مني تعبت من هذا الشعور الذي يمتلكني فانا لا اري غير هو وتصرفاته ماذا افعل حتي انساه وهو يعيش داخلي وفكرة ايضا الرجوع له لا يمكن مرفوضة نهائيا فهو الان متزوج ولدية اطفال لكن انا لا ونفسي بالارتباط لكن لا استطيع هذا حاولت السفر للعمل لكن النتيجة انني كنت اتصل به لاسمع صوته فقط لا علاج لهذا المرض لانه يكمن بداخلي افيدوني ارغب في ان اعيش طبيعية مثلي مثل اي امراه تعيش حياتها ولا تتوقف مع العلم اني فكرت وجديا باني لي رغبة شديدة في الموت ولا استطيع ان اذهب للعلاج عند طبيب نفسي ارجو الرد سريعا في طريقة

[الباشمهندس ياسر]

يقولون ان فاقد الشىء لا يعطيه

و رغم انى مازلت اعذبا .. الا اننى اثرت ان اشاركك بنات أفكارى فأقبلى بإمعروف أو ردى بأحسان

فلتحمدى الله على ان التفريق قد تم ..فأنت لا تعرفين كيف هو المئال ان استمرت الحياة

و ابدأى بشغل نفسك عن التفكير به .. ابدأى فى اكتساب عادات جديده

غيرى من طريقة حياتك .. ابدأى فى توسيع دائرة معارفك

اكتسبى صداقات جديده ... اكتشفى نفسك..طورى مواهبك

انشغلى بدراسات جديده سواء ...دنيويه كالماجيستير و غيره... او دينيه كالعلم الشرعى مثلا

لا يسع ذهنى المزيد لاخبرك به

و لكن

كونى بخير

و

دومى قويه

[ام بلال]

أختي الفاضلة :

طليقك كان يوما من الأيام زوجك وقد كان قرار الإنفصال منكما و قد تم فقولي قدر الله و ماشاء فعل ،

شعرت بالندم على الإنفصال ، و لا رجعة لك فعليك أن تكوني قوية بتحمل النتيجة ، و أكثري من قول " إنا لله و إنا إليه راجعون ، اللهم أجرني في مصيبتي و أخلف لي خيرا منها"

عزيزتي إن إتصالك بطليقك قد يفسد حياته ، فما ذنب زوجته و أبنائه ، فلا تزيدي من حجم الخسائر ، فما فات قد فات ، و هو أولا و

أخيرا بقدر الله ، فإن كنت ترين أنك بشكل أو آخر قد وقع منك ظلم على طليقك في علاقتكما السابقة فاستغفري الله أولا ، و أطلبي

منه العفو حتى لا يكون خصما لك يوم الدين ، ثم لا يقعن منك ظلما آخر بإفساد حياته الحالية فيكون منك ظلمين ،

و إن كان هو من وقع منه ظلما عليك فما أجد ذلك إلا تهاونا و تقليلا من قدرك ، فسامحيه في عزة دون تقليل من شأنك بإتصالاتك به

و محاولاتك سماع صوته ،فذلك لن يصلح شيئا بل سيزيد معاناتك ،

فما أجد إلا أن شيطانا قد علق قلبك به سبحان الله ( مع أنه هو الرجيم من أفسد هذه العلاقة الزوجية التي كانت يوما ما قائمة )

لييأسك من الحياة :

--لا سبيل لطليقك

-- لاتتزوجي غيره

--حاولي الإستماع لصوته ، مرة لن تضر >>>> هكذا يوسوس لك هذا اللعين

بل قد يقع منك حقد على زوجته الحالية ، وتتمني أمورا لها لإفساد حياتها لا تليق بك كمؤمنة ،

عليك و بكل شجاعة :

قطع صلتك بكل ما يمت لطليقك بصلة ، إلغي أرقام هواتفه من موبيلك و كوني صادقة مع نفسك

ضعي ورقة مكتوب عليها كلمات ومعاني جديدة :

-- التفاؤل

-- المستقبل المضيء بحول الله وقوته

--السعادة أحياها بقدرة الله ، البسمة ، الضحكة

و إليك بعض المقترحات التي أضمها لإقتراحات الأستاذ ياسر:

-- مارسي رياضة أو هواية كنت تحبينها

-- شاركي في نشاطات اجتماعية و خيرية مثل : زيارة ملاجيء أو مرضى السرطان، قسم الحروق لتعرفي عظم النعمة التي تتقلبين فيها و أن الشيطان قد حصرك في بقعة ضيقة و مظلمة

-- اشتركي في حلقة لحفظ القرآن الكريم

--مارأيك تذهبي لأداء عمرة أو حج

-- إذا تيسر لك هجرة كل الأشياء التي لها علاقة بطليقك :

>>المكان اتركيه و لو حتى مؤقتا حتى تشعري أنك أقوى

>> الصداقات المشتركة التي كانت بينكما و التي تعرف أخباره أقطعي صلتك بهم و لو مؤقتا و أذكري لهم عذرك و أنك ستعودي لهم أكثر قوة

>> العطر- الأكلات - اماكن النزهات : إياك أن تنزلقي في منحدر الذكريات و الذي سيقلب عليك المواجع .

إذا كان لك صداقات أو قرابات قديمة حاولي صلتهم ، المختصر بعد إسهاب ، غيري حياتك للأفضل ، ضعي أمامك هدف جديد ، جددي علاقتك بالله

و قبل كل شيء الدعااااااااااااااااااااااااااااء و الجلوس بين يديه في ركعتين حارتين قبل الفجر ، أن يفرج الله كربك و أن يخلف عليه خيرا

منه ، و أن يبدل حزنك و همك سعادة في الدنيا و الآخرة اللهم آميييين

[redwany]

تحياتى

بالطبع لن نرجع بك الى الخلف ونسأل من منكم سبب الطلاق ورغبة الانفصال كانت ممكن الاول

ولن نجلدك اذا كنت من طلبتى الطلاق ونقول لك انك لم تفهمى معنى الزوجيه ولم تحافظى على بيتك الذى هو حياتك ولم تصبرى على عيوب زوجك وتحاولى تصليحها وبدلا من ترميم بيتك المتهاوى فضلتى هدمه

لن نقول هذا لاننا لن نبكى على اللبن المسكوب

اولا حاولى الرجوع له

ثانيا اذا تعثر عليك ان تبدأى حياة جديده مع شخص اخر لان الله سبحانه وتعالى احل الطلاق وان الله لايحل شئا فيه ضرر لنا

ابدأى حياة جديده واحسنى الاختيار وهبى حياتك لهذا الشخص الجديد

وانشاء الله سوف تنسى بمجرد دخول شخص الى حياتك

وهناك تجارب كثيرة كلا المطلقين عاشوا حياه افضل

(وان يتفرقا يغنى الله كلا من سعته)

ربنا يوفقك

[ssmaly]

الأخت العزيزة

اللى حصل حصل ونقطة واول السطر

يعنى لا تلتفتى للخلف و تعيشى فى الذكريات

كلنا عندما تمر علينا ظروف و مواقف فيها الحلو وبها المر

ولكن نتذكر الحلو منها فقط وتختفى المرارة مهما كانت نسة الحلو للمر

اقولك على مثال عيشته وانا فى الجيش

كان فى قائد للمستشفى التى اخدم فيها كضابط احتياط وكان القائد شديد جدا وكل الضباط قبل العساكر يخشوه (بكل الرتب)

وعندما انتهت مدة خدمته فى المستشفى وانتقل الى مكان اخر كنا فى قمة الفرح

ولكن بعد ان جاء قائد جديد ضعيف و طيب الى حد ما بدأ كل واحد مننا ان يمجد فى القائد القديم و يمدح فيه حتى الذين تضرروا منه

والكل نسى شدته وعيوبه

هى كدة الذكريات تمحى المر وتزيد حلاوة الحلو

لاتعيشى فى الذكريات لازم حياة جديدة وتكون لكى ذكريات جديدة

و مش لازم علشان نتسى زجك السابق نتسيه بزوج جديد

ابدأ حياة جديدة وانغمسى فيها سوف نتسى الماضى بعد ذلك ممكن ربنا يوفقك فى تكوين اسرة جديدة بدون ذكريات

هناك اخوة افاضل اقترحوا عليكى طرق لبدأ حياة جديدة من العمل والدراسة و الدين والانخراط فى حياة اجتماعية جديدة

و الله الموفق

[Excellence]

إسمحي لي أن أبدي رأيي .. بالإضافة لما تفضل به الزملاء الأفاضل...

أولا لابد أن نفرق بين أمرين:

1- هل تستدعي ذكراه بإرادتك؟ .. الحل هو عدم التفكير فيما كان بينكما

2- هل يأتي رغما عنك؟.. احتفظي به بداخلك دون أن تبيحي به لأحد.. مع تجنب ما يساعد على الذكرى .. مثل مكان ما .. أغنية أو موسيقى .. لوحة أو تذكار مهدى من أحد الطرفين للآخر .. إلى آخره

هناك ثلاث أطراف

الطرف الأول هو انت ..

حاولي ما تعذبيش نفسك

الطرف الثاني هو حبك السابق..

..طبعا مش من حقك دلوقتي على الإطلاق إنك تستمري في مشاعر الحب ناحيته ..أما إذا كان خارج إرادتك.. افتكريه فقط كحالة وممكن تستمتعي بشوية خيال.. لكن كحالة وليس كشخص ... كشحنات رومانسية استعدادا للحبيب الذي لم يأت بعد... الي هاترتبطي بيه..

الطرف الثالث هو زوجته الحالية..

أصبح فيه ظلم ليها وتعدي لمسافة خاصة بها وخارج المسموحة لك ..لأنه أصبح من حقها .. بالظبط زي ما هايكون حبك اللي جاي من حقك وحدك

وإحسان عبد القدوس قال "حبك الأول هو حبك الأخير"

يعني حبك الأول هو آخر حب بتعيش فيه .. وفي حالتك .. لم يأت بعد.. .. وأكيد هاتلاقيه..حتى لو تصورت أنك فقدت الأمل...

شدي حيلك .. قدها وقدود..

[newcomer]

طبعا انا مش هاقدر اقول حاجة بعد اللى اتقال من الزملاء الافاضل

بس هافكر معاكى شوية...... عارفة لما الواحد يبيع شقتة و يقف فى الشارع بشنطة هدومة ...... مش لاقى له سكن

بيتهيأ لى هوه ده الوضع .......... (الجواز _ برضة المفروض يكون _ سكن و مودة ) انتى بتفكرى و تندمى على الشقة القديمة

بالرغم من عيوبها ...... اهى برضه كانت سكن...... لكن لو فكرتى شويه .... ان الشقة دى خلاص مابقتشى بتاعتى

و ماينفعش ارجع لها ...... والحقيقة بقى انها كانت هاتقع عليه لو ماكنتش خرجت فى الوقت المناسب

و ان.... وان.... حتلاقى نفسك بتفكرى بشكل محايد

لحد ما تلاقى سكن جديد :unsure: خليكى مع عيلتك ... مامتك .... باباكى ..... اخواتك ..... اولادهم....... اصحابك .... قرايبك

الفراغ هوه اللى بيخلى عندك وقت تجترى احزانك و تبصى لورا....... اشغلى وقتك على قد ما تقدرى

و بعدين ..... عايزة اقولك ...... احنا بنى ادمين ..... ايه المشكلة انك تفتكرى شخص كان بينك وبينة عيش و ملح و عمر

ربنا يسهله حاله و انتى ربنا يسهلك حالك ان شاء الله مع شخص تانى محترم و تبدأى من جديد

و بصى حواليكى ..... حتلاقى كل الناس بتبتدى من جديد

و باكرر عليكى اللى كل الافاضل سبقونى فيه : استعينى بالله و ان شاء الله هايسعدك

[شاب مصري]

لازم تستشيري شخص متخصص

طبيب نفسي

او معالج نفسي(دا مش طبيب ولكن شغله حل المشاكل دي)

او مدرب تنمية بشرية

حاولي تطلعي عمرة وتدعي ربنا

وربنا يكون في عونك .

[tarek hassan]

الأخت : أحلام عادية

أنت سميتي ذلك مرضا وأتمنى لك البراءة منه

زوجك السابق أصبح أجنبيا عنك لا يصح لك التفكير فيه أو الاتصال به

زوجك السابق أصبح حليلا لأخرى ومحرم عليكي

إذا كان الرجوع لزوجك ممكنا فالتفكير فيه له ما يبرره

أما إذا كان مستحيلا فأراك نعذبين نفسك لطلب ما لا تقدرين على تحصيله ولابد من الإيمان بالنصيب

أو بمعنى أصح بالقضاء والقدر

وفقك الله للخير

[aimen]

العمل

اشغلى نفسك بالعمل

ولا تعطى نفسك اى فرصة للتفكير فيه

ببساطة كده هو غريب عنك دلوقت ولا يحق لك التفكير فيه

تناسيه وتناسى اى مكان او حاجه بتفكرك بيه

اذا كان هو اكمل حياته لماذا لا تكملى حياتك انت ؟

كفى تعذيبا لنفسك و اكملى حياتك

[شاب مصري]

اه كنت هنسى

لازم يكون ليكي قضية وتحدي جديد في حياتك

عشان تنقلي بؤرة الاحداث والاهتمام ليها

مفيش في دماغك حلم او انجاز نفسك تعمليه ؟ وهتكوني سعيدة جدا لو حققتيه ؟

[ozoozo]

اختي الفاضله انتي كل ماتيجي تفكري فيه افتكري عيوبه والمشاكل اللي كانت حاصله بينكم وده هايعمل ارتباظ شرطي بينه وبين المشاكل عندك ويخليكي تبطلي التفكير فيه ولو فكرتي بعمليه في المشاكل هاتلاقي انه لو حصل ورجعتوا علي افتراض عدم زواجه سوف يكرر الطلاق من جديد

[DIA ELDIN]

بصراحة الاخوة مسابوش حاجة بس انا برضوا هقول رأيي

اكيد طبعا الفراغ

حاولي تشغلي نفسك طول الوقت بحاجة تكوني بتحبيها دا طبعا بجانب عملك لاني اعتقد انك بتعملي

ابعدي عن الاصحاب المشتركين بينكم

ابعدي عن المناطق اللي بتفكرك بية او الحاجات اللي لما بتشوفيها بتفكرك بيه

داومي على ذكر الله وفراءة القرآن

متحاوليش تبقي لوحدك طول الوقت حاولي تعملي صداقات جديدة تبقي مع عيلتك وكدا

امسحي كل ارقام التليفونات واقطعي الورق ولا انتي مسجله الارقام على ورق

برضوا لو انتي عندك خط قديم وهوا كان يعرفة حاولي تغيرية ومتعرفيهوش برضوا للاصدقاء المشتركين بينكم

حاولي تطلعي تعملي عمرة

ادعي طول الوقت ان ربنا يلهمك الصبر وبرزقك بزوج صالح

وربنا معاكي انا حاسس بيكي

[Emo]

الأخت الفاضلة..

اولا..

قدر الله وماشاء فعل..

حقيقي..مش عندي ازود من كلام ام بلال..والأخرين..فقد اوجزوا ووفوا..

لكن أذكرك بقول الله تعالى (أفحسبتم انما خلقناكم عبثا وأنكم الينا لاترجعون)

بمعنى..ان الحياة واحدة..ومش عايشنها عبث..عايشنها لهدف..يعني لو حطينا ده نصب أعيننا مافيش حزن هياخد اكثر من وقته ف حياتنا..

لييه..

لأن مرجعنا ومردنا ف الآخر كلنا الى الله..وهو عنده العوض..اللي بإذن الله هيكرمك بيه في الدنيا قبل الآخرة..

بس قوي ثقتك بربنا..الجئي ليه في ضعفك وقوتك..

قولي يااارب من قلبك..وانتي عندك يقين بإن العوض منه سبحانه..

وقلوبنا بين ايديه وحده سبحانه قادر يخرج الماضي ده من فكرك تماما..

ثم بعد كده..حبي نفسك..حبيها أكثر من اي حاجة ..

لما تحبي نفسك لايمكن ترضي لها بإنك تعذبيها عشان خاطر شخص..خلاص صفحتك اتقفلت عنده من زماان وبدأ من أول وجديد..

ده مهما كان بشر ..زيك زيه..يعني الدنيا مش هتقف عليه..فكري في ده بجد..وثقي انك تستاهلي الخير .زوتستاهلي الأحسن..وتستاهلي تكوني سعيدة..وتستاهلي تحبي وتتحبي وتبدئي من أول وجديد مع شخص يقدرك ويعزك..

فوووقي من جواكي الأول..واعرفي ان الخيرة فيما اختاره الله..

لازم تتكلمي مع نفسك بوضوح قبل ماتحاولي تهربي بانك تشغلي نفسك بحاجة..لان الإنشغال ده وقتي..يوم مايجي عليكي الليل كل الذكريات هتتنازع في انها تثير كوامن حزنك..

عشان كده ابدئي من جواكي..وبعد كده يوم ماتزيد ثقتك بربنا .زثم بروحك..هتفيضي بشر وانسجام وتفاعل مع الكون حولك..

ووللعبرة فقط هذكرلك القصة دي..

واحدة قربتي وصديقتي اووي..اكبر مني ب 10 سنين تقريبا..

كانت متجوزة من محامي .,,وكان حبهم يضرب بيه المثل..الكل يقول نفسنا نبقى زي احمد وأميرة..المهم اختصارا للاحداث بعد 11 سنة زواج ..طبعا الكل عارف طبيعة شغل المحامين وانهم بيتعرضوا لناس اشكال والوان يسمعوا ماسيهم وخاصة لو كان محامي أحوال شخصية..

المهم في يوم بتقلب ف موبايل زوجها لقيت مسجات من واحدة من اللي رافعين عنده قضية نفقة تقريبا..

بس كان المسجات أوفر شوية..

واجهته وازاي واحدة تبعت لشخص غريب كده ومش عارف ايه..استاذ أحمد خديته الحمية راح عصب عليها وطردها من البيت ..والعند ركبهم هما الإثنين واتطلقوا..

الكلام ده من 5 سنين تقريبا..

عندهم ولدين..اميرة سبتهم مع ابوهم..قام هو عشان العند راح اتجوز نفس الإنسانة اللي حصلت بسببها المشكلة..

أميرة مكنتش بتبطل تجيب سيرته..هلوسة يعني..

وانها بتحبه ..وتحكي عن ذكرايتهم .زوده انا كنت بغسله رجله..وده انا مش عارف ايه..3 سنين وجعت دمااغ كل اللي حواليها بأحمد باشا..ومنهم انا..

جالها عرسان كثير وكانت بتعمل معاهم نفس موقفك ده..

تحكيلهم عن أحمد..

المهم باختصار احمد رجعها بعد 3 سنوات وبعد ماتجوز غيرها وجاب بنت كمان..

تعرفي..

أقسملك ان أميرة بتعيط دم دلوقتي..وامنيتها انها فعلا تطلق تااني..

يعني خلاص...عرفت بجد..ان الشيطان هو اللي كان بيكبر الإحساس ده جواها وانها مش هتقدر تعيش بدونه ومش هتشوف غيره وكده..

لأن الشيطان اصلا مابيحبش حد يفرح..

لكن ياأختي العزيزة..

اللي اتكسر ..لو اتصلح في يوم بيفضل مكسور وعمره مايرجع زي الأول..

أتمنالك من كل قلبي..جبر قلبك..وصلاح حالك وحياة سعيدة في ظل من يحبك وتحبيه.. :blush2:

**

تقريبا انا قلت ف البداية معنديش كلام كثيير ..الله يخربيت الرغي..

[هشام الكندي ان شاء الله]

الاخت الفاضله احلام عاديه:

احب اعرفك بنفسي بان انا درست علم نفس في ثانوي و في الكليه بالانجليزي و اخدت كورس في تفسير الاحلام لفرويد و ابن سيرين و ليا دراسات حره كتير في علم النفس و ليا ابحاث في تفسير الاحلام.

اولا فاللي انتي بتمري بيه لا يعتبر مرض, هو حاله نفسيه انفعاليه تجاه شخص ما في فتره معينه. اللي انتي فيه مش مرض بل هو مشكله مؤقته و حلها بياخد شويه وقت, و علشان نحل المشكله لازم نعرف اسبابها و طبقا للكلام اللي انتي كتبتيه فاقدر اقول الاسباب كالاتي:

1- الرجل الاول: فالمرأه دائما لا تنسي الرجل الاول في حياتها سواء العاطفيه او الجسديه فكل امرأه تتذكر و بتأثر اول مره سمعت فيها كلمه " بحبك" و اول يوم لها مع زوجها و لا احد يستطيع ان ينكر او يحرم المرأه من ذلك.

2- تداعي المعاني: فكلمه زوج بالنسبه لكي تمثل ذلك الرجل الذي هو طليقك حاليا. علشان كدا كل ما يتقدملك حد تتكلمي معاه عن طليقك لان عقلك الباطن بيعمل علاقه بين الانسان اللي بيتقدملك و طليقك.

3- جلد الذات: انتي عارفه كويس انه مليان عيوب, و عارفه كويس انه اتجوز واحده تانيه و ان حياته ماوقفتش بسببك, و كمان عارفه انك مش هترجعي ليه و بالرغم من كدا بتعذبي نفسك اعمالا بمبدأ " و داوني بالتي كانت هي الداء".

4- الهروب: فانا اسف ان اقول ان سفرك ليس الا هروب من هذه الذكريات و للاسف فشلتي في تجاوز الازمه وقتها بل ذهب تفكيرك الي حد الانتحار و هو كفر و العياذ بالله.

الحل:

بعد ان عرضت اسباب و جوانب المشكله من وجهه نظري اعرض لكي فكرة بسيطه عن الحل:

1- اذا كان من حقك كانثي ان تحتفظي بذكري الرجل الاول داخلك, فليس من حقك ان ترهني حياتك بحياه من هو ليس لك, بمعني مين مننا نفسه يبقي غني؟ اكيد كلنا لكن اكيد مش كلنا اغنياء فهل فكرنا في الانتحار؟ كلنا بنحب ابائنا و امهاتنا لكن لما نفقد حد فيهم الدنيا مش بتقف.

2- حقك كامرأه انك تتمتعي باسره سعيده و اطفال, هل انتي عندك اطفال؟ لو مش عندك فيا ريت تبصي لحق نفسك عليكي و تفكري ان الايام بتجري و انك لازم تبصي لحالك قبل ما يفوت الاوان و تبقي مش قادره علي الانجاب.

3- افتكري الحاجات الوحشه اللي عملها معاكي و افتكري انه انسان عملي بعد ما طلقك اتجوز واحده تانيه و خلف منها. افتكري ان لو كان فيه بينكم حب حقيقي مكانش حصل طلاق. فكري في شغلك و عيلتك و صحباتك و قرايبك و قبل كل دا فكري في حقوق نفسك عليكي كأم و ربه اسره و ان طليقك دمر جزء كبير من حياتك سواء بسببك او بسببه.

4- كوني دايما مشغوله بكورسات او بخروجات او كلام مع اسرتك او علي المنتدي هنا مع اصدقائك و اوعي تكوني فاضيه لانك اول ما هتبقي فاضيه هتفكري فيه علي طول.

5- انا مش انصار فكره انك تقطعي علاقاتك مؤقتا بالناس اللي يعرفوكوا لانك اول ما هتشفيهم بعد شهر او اتنين هتفتكريه تاني و قانون تداعي المعاني هيرجع تاني. خلي علاقتك بيهم زي ما هيا و لو هما اتكلموا عن طليقك قوليلهم ربنا يسهله.

6- مانصحكيش تتكلمي مع راجل حاليا عن الزواج لانك غير مهيأه تماما للزواج حاليا و لو اتجوزتي مجرد عند في نفسك او رغبه في انتقام من طليقك او اشباع لرغبه اهلك في البيت فالنتيجه هتكون الفشل.

7- كوني علي يقين انك بترتكبي معصيه كبيره لانك بتتصلي بيه و فكري لو حبيتي راجل و اتجوزتيه و اكتشفتي ان طليقته بتكلمه رد فعلك هيكون ايه؟

8- لو مش قادره تروحي لطبيب نفسي لاسباب ماديه فعندك المنتدي اهو ببلاش و انتي ليكي اي دي مش بيعبر عن اسمك الحقيقي فاتكلمي و شاركي معانا و سمعينا صوتك, و لو ان الكلام فيس تو فيس مع الطبيب النفسي بيكون افضل لانه بيقيس نبره الصوت و درجه الانفعال و حركات اليدين اثناء التحدث و ملامح الوجه و حاجات كتير بتساعده في تحليل الشخصيه.

9- اخيرا فان كل مشكله و لها حل و ان كنتي تعتبري التفكير في طليقك مرض فانا اقول لكي ان لكل داء دواء طالما عندك النيه في التخلص من هذه الالام, و خلي عندك ثقه كبيره في الله و انه هيعوضك خيرا منه ان شاء الله و ان طلاقك دا كان مجرد سبب علشان تقابلي انسان تاني هيخليكي اسعد زوجه و ام في الدنيا و انك لو كنتي فضلتي متجوزة طليقك كان هيفوتك قدر كبير من السعاده مع انسان اخر.

بالتوفيق و تحت امرك في اي وقت:

هشام الكندي ان شاء الله

[melhamy]

تم حذف المداخلة لما بها من أسلوب غير لائق

عن فريق المشرفين

فلانة

[newcomer]

بالتوفيق و تحت امرك في اي وقت:

هشام الكندي ان شاء الله

ياهلاااااااااااااااان استاذ هشام

فين حضرتك من زمان ؟؟؟

و بالنسبة لمداخلتك فاسمحلى احييك عليها.....مقنعه جدا....

[هشام الكندي ان شاء الله]

انا في الدنيا بتوديني و تجيبني, المهم انت ايه الاخبار؟

[fatmah]

وفكرة ايضا الرجوع له لا يمكن مرفوضة نهائيا

[وسط][/وسط]

أنا شايفة انك ترجعي له

تم تعديل 3 فبراير 2009 بواسطة fatmah

[ريحانة]

حببتى خلينا نفكر بمنطقية وواحدة واحدة

1- المشكلة تنحصر فى ايه؟ "انك بتحبيه جدا ومش قادرة تعيشى من غيره وفى نفس الوقت عايزة تنسيه عشان تقدرى تواصلى حياتك عادى ومن غير مشاكل زي ما هو عمل على الاقل"

2- الحلول المطروحة حاجتين

ترجعيله " وده من وجهة نظرك امر مرفوض تماما يمكن عشان هو متزوج وانتى ترفضى تعيشى زوجة تانية

او مرفوض عشان هو اصلا مش عايز يرجع معاكى ومبسوط فى حياته الجديدة

المهم ان الحل ده بعيد عن الاختيارات لانه غير متاح اصلا"

طيب تانى حاجة زى ما انتى عاوزة انك تنسيه

مبدئيا لو مين اللى قالك كلام وحاول معاكى وانتى من جواكى مش عايزة تنسيه

ومش ناوية تنسيه مش حايأثر فيكى الكلام

يبقى اول خطرة تعمليها انك تقعدى مع نفسك كده وتقنعيها ان نسيانه ضرورى وواجب

طب ازاى؟

نصيحة مش بالهروب من الأمر مينفعش ان حد يقول اشغلى نفسك بالشغل ليل ونهار واقعدى مع الناس علطول ومتقوميش من النت

كل دى حاجات فعلا حاتشغلك عوامل هروب ممتازة

بس حاتفضل جواكى الذكريات بركان مكبوت مستنى لحظة عشان ينفجر وتكتشفى بعد مجهود مضنى انك منستيش حاجة

الحل انك تحاصرى مشكلتك

اعترفى لنفسك اه انا بحبه بس خلاص الحياة مش كلها سعادة لازم اتعذب شوية بس انساه فى الاخر ولو مصر يخرج بحته من قلبك مفيش مشاكل بس يطلع

حايسيب جرح

اه

شوية وحايبدأ يطيب لغاية ما يبقى اثر بسيط

ابدئى اعترفى لنفسك انك دلوقتى مجروحة جدا بس لازم انشغل فى حياتى مش اهرب

كلامى واضح

اشغلى نفسك طول اليوم بالشغل بالقراءة بالدعاء

بالمطبخ بالبيت

بهواية بتحبيها

بصحابك

ومفيش مانع تسيبى نفسكباليل تفتكرى حاجات وتتوجعى انها راحت

شوية شوية حاتملى من كتر اللى افتكرتيه وانك كل يوم تفتكرى وتتحسرى

يمكن مملتيش لغاية دلوقتى عشان انتى كنتى بتمنعى نفسك

والممنوع مرغوب

مبنشبعش منه

انما لما تقنعى نفسك ان عادى لو عايزة تفتكريه افتكريه براحتك

وافتكرى كمان انه عايش مبسوط مع زوجته واولاده ولا على باله حاجة

ساعتها حاتحسى ان الموضوع حايبدأ يصغر والحياة حاتبقى احلى

جربى

واسفة جدا للتطويل