استشارة عاجلة جدا لاختكم فى الامارات

[mony]

السلام عليكم يا اخوانى

وعيد سعيد عليكم ان شاء الله

يا جماعه انا كنت عملت موضوع من فتره طويله اول ما جت الامارات كنت تعبانه قوى و الغربة كسرانى انا بقالى هنا حوالى 7 شهور دلوقتى فى الامارات و الحمد الله الان النفسيه مستريحة انا بشتغل فى شركة قطاع خاص فى دبى بمرتب ضعيف 4500 درهم و عقدى محدد المدة 3 سنين المهم انا عرفت من خلال خبرتى ان الحل الوحيد علشان اغير شغلى من غير حرمان هو انى اشتغل فى فرى زون او القطاع الحكومى المهم ربنا اكرمنى بشغل فى الميديا سيتى media city و المديا سيتى منطقة حرة فرى زون مفيش حرمان ولا بتاع يعنى حتى لو خدت حرمان 6 شهور او حتى سنه من الشركة اللى انا شغاله فيها حاليا ااقدر برده اشتغل فى الفرى زون دى

المهم دلوقتى انا ادامى مشكلتين :

انا مشكله هما طلبين من attested certificate علشان يقدمولى على الفيزا وانا شهادة التخرج عندى مش متصدقة هل ينفع اعمل التصديق ده فى السفارة ولا لازم ابعت الشهادة مصر تتصدق هناك؟

تانى حاجة ودى الاهم ، دلوقتى اللى له خبره فى قوانين الفيزا فى المنطقة الحره المديا سيتى ، انا حاليا قولت لشغلى القطاع الخاص انى هستقيل و ارجع مصر علشان ظروف عائليه خاصة بجواز و كده، ما مينفعيش ااقول جالى شغل هيقرفونى وجواز سفرى معاهم ، المهم الشركة بتاعت الميديا سيتى قالتلى مينفعيش نقدملك على الفيزا عندنا الا لما تكنسلى مع شركتك حاليا اللى هى القطاع الخاص و بعدين احنا نقدم على الفيزا المشكله ان الشركة اللى انا فيها حاليا هيبعتوا معايا مندوب للمطار يوم ما اغادر البلد هستلم باسبورى و انا خايفه الميديا سيتى تكون محتاجه باسبورى وانا مش هستلم باسبورى غير فى المطار ساعه المغادرة فى ناس بتقولى ان المديا سيتى ممكن بصوره الجواز و صوره كنسله الفيزا و الشاده الجامعيه المصدقة بيقدموا على الفيزا و تخدى الموافقه و انتى لسه فى البلد..

المهم انا محتاجة معلومات اكتر بليز افيدونى افادكم الله لانى هموت من القلق

الف شكر ليكم

[wela]

بصي يا اختي هو سهل تصدقي الشهادة من هنا عن طريق السفارة المصرية والخارجية الاماراتية

وتاني حاجة بالشهادة المصدقة وصورة الجواز وصورة الكنسلة تطلعليك فيزا عادي جدا

بس اعملي حسابيك انك لازم تغادري وترجعي علشان المندوب الي هيسلميك الجواز في المطار مش هيسلمهوليك في ايديك الا لما تعدي من كاونتر الجوازات ويكون خد ختم مغادرة وساعتها مش هتعرفي تدخلي تاني الا بالفيزا الجديدة

اهم حاجة اعملي الخطوات دي

اطلبي جوب اوفر من الشركة الجديدة وده مجرد عقد ابتدائي هتمضيه مع الشركة الجديدة بيقول انهم هيدوكي مهله مثلا 20 يوم علشان تقدمي ورقيك كامل وكمان مكتوب فيه انهم عاوزينيك بالوظيفة ..... وكمان المرتب كام .

المهم ده زي ضمان ليكي وليهم بس ليكي اولا

ثانيا وثقي الشهادة من ابوظبي

ثالثا ابعتي الشهادة وصورة الجواز للشركة واول ما يخدوا موافقة كنسلي وغادري مصر وتابعيهم في التليفون علشان يبعتوليك الفيزا وتسافري تاني

خلي باليك الفري زون احلي حاجة فيها انها لو مش عجبتيك شغلها تقدري تمشي وتشتغلي في اي مكان بدون حرمان اوي خنقة

......ربنا يوفقيك

[mony]

الف شكر يا wela

بس هو فى حاجه انا مينفعيش بعد ما اكنسل من الشركة الحالية الشركة بتاعت الفرى زون تقدم على فيزا وانا لسه فى الامارات و اغادر البلد و ارجع بيها اللى هى نفس اللى خدتها من الامارات بعد ما اتكنسلت؟

[wela]

بصي هو ممكن يطلعليك موافقة علي الفيزا بس لازم ورق الكنسلة تديه للشركة الي هي ورقة الغاء العمل بتاعة العمل والعمال وطبعا الشركة الاولي مش هتدهوليك....

احسن ضمان ليكي عرض العمل او الجوب اوفر... وده عادي في الشركات الكبيرة ده حقيك علشان مش تسيبي شغليك الاول علي الفاضي وكمان حقهم علشان يضمنوا انك تيجي .

[أسد]

الأخوة الأفاضل

تم حذف بعض المداخلات التي خرجت عن الموضوع الأساسي ..

فلم تكن الأخت صاحبة الموضوع تسأل عن فتوى دينية .. ولم تطلب من أحد التشجيع ..

سألت سؤال محدد .. ولا نفترض أننا يجب أن نغير مسار كل موضوع حتى لو كان تحويل المسار للفتوى ..

شكراً لتفهمكم

[MrPower]

الأخوة الأفاضل

تم حذف بعض المداخلات التي خرجت عن الموضوع الأساسي ..

فلم تكن الأخت صاحبة الموضوع تسأل عن فتوى دينية .. ولم تطلب من أحد التشجيع ..

سألت سؤال محدد .. ولا نفترض أننا يجب أن نغير مسار كل موضوع حتى لو كان تحويل المسار للفتوى ..

شكراً لتفهمكم

أشكرك لهذا التعقيب الذي فى محله

[mony]

الف شكر للتعقيب بس انا ممكن اطلع نسخة من الكنسله من العمل و العمال

[TAMERJ]

الف شكر للتعقيب بس انا ممكن اطلع نسخة من الكنسله من العمل و العمال

انا دخلت بالدفة على هدا موضوع...سؤالي انت ما عندك اي قريب في الامارات

[TAMERJ]

الف شكر للتعقيب بس انا ممكن اطلع نسخة من الكنسله من العمل و العمال

انا دخلت بالدفة على هدا موضوع...سؤالي انت ما عندك اي قريب في الامارات

بالصدفه مش بالدفه rs: ....ما عندك اي اقارب في الامارات

[makarawad]

الاخت الفاضله معنديش جديد كتير

ولكن انا عايش فى دبى بقى لى خمس سنين واليومين دول اقصد الظروف الحاليه ليها وضع خاص

الازمه الماليه العالميه اثرت على كله وفيه شركات فى كل حته بتخفض مرتبات وبتصفى عمال واول ناس بيمشوهم هما الناس الجديده اللى اقل من ست شهور لان الشركه بموجب القانون ممكن تمشيهم من غير مكافاه نهايه خدمه فى يوم

فالخلاصه الوقت ده مش وقت مناسب لتغيير الشغل خالص خالص

والحاجه التانيه المهمه موضوع الجوب اوفر ده مهم جدا ولازم يكون مختوم ومبين كل حاجه وزى ما قال الاخوه ممكن يقدم لك على موافقه سلطه المنطقه الحره قبل الكنسله

فيه شويه اسئله مهمه زى ايه هو مجال عملك اقصد تسويق ولا مبيعات ولا سكرتاريه ولا ايه

والسوال التانى نقل الشغل عمليه مكلفه ومش سهله فمن اربع الالاف وخمسميه محتاج على الاقل تمن الالاف علشان يغير

انا اسف لو كلامى محبط لكن دى الحقيقه

خلى بالك

[mony]

الف شكر makarawad

على النصيحه انا عارفه الازمه الماليه بس يعنى فرصه و جاتلى بمرتب كويس ارفضها علشان فى ازمه ماليه يبقى اسمها بقطع رزقى عموما انا شغاله فى الموارد البشرية

تانى حاجه انا مش بنقل كفاله علشان ادفع فلوس انا هنقل على فرى زون من غير فلوس ولا حاجة بس هتكلف ان هيكون قلق فى سكن و مصاريف شخصية ليا لحد ما ااقبض اول مرتب ليا

ودى حاجه ربنا يقدرنى عليها

وربنا يستر بقا ولا حد فى يوم يتقطع رزقه و يرزقنا جميعا

[الممول العجيب]

متابع بدقه