هل سيطال هذا الإنهيار العقارات في مصر أيضا

[عطر الجنة]

الإنخفاض بدأ في بعض الشركات وسيطال قريبا مجموعة طلعت مصطفى وهذا الخبر يؤيد ذلك

شركات العقارات تلجأ لتخفيض أسعارها ومد فترات السداد لتسويق وحداتها

كتب أمير حيدر ٥/ ١/ ٢٠٠٩

دفعت حالة الركود التى سيطرت على سوق العقارات مؤخراً، العديد من الشركات العاملة فى هذا المجال إلى طرح تسهيلات كبيرة، تنوعت بين تخفيض أسعار الوحدات ومد فترات السداد مع تقليص الحدود الدنيا للمقدم المدفوع وإلغاء الفائدة على الأقساط، وذلك فى خطوة للخروج من حالة الجمود والتخلص من المخزون، خاصة فى نوعية الإسكان الفاخر الذى استحوذ على نشاط كثير من العاملين فى السوق الفترة الماضية.

وقال الدكتور ماجد عبدالعظيم، رئيس شركة «إيدار» للتسويق العقارى، إن الشركات بدأت مراجعة سياستها التسعيرية من خلال أمرين، إما تخفيض أسعار بيع الوحدات بشكل مباشر أو من خلال زيادة فترة التقسيط.

وأشار عبدالعظيم إلى أن هناك شركات أعلنت بوضوح تام عن تخفيض الأسعار، نظراً لانخفاض أسعار الخامات، ومنها حديد التسليح الذى تراجع بأكثر من ٥٠٪ خلال الشهر الجارى، مقارنة بمنتصف العام الماضى ٢٠٠٨، فضلا عن تراجع أسعار الأراضى نسبياً.

وأضاف أن الشركات التى تهدف إلى بيع وحداتها فى الوقت الحالى، تتبع المرونة فى أسعارها، خاصة التى تعمل فى الإسكان الفاخر الذى تعرض لحالة من الركود واختفى المضاربون فيه فى ظل هذه الأجواء.

ولفت إلى أن الأسعار تراجعت فى الفترة الأخيرة بنسب تتراوح بين ٥ و١٥٪، خاصة فى المناطق الجديدة التى يوجد فيها فائض فى المعروض وتكثر فيها البدائل، والتى يتوقع أن تكون أكثر تأثراً بانخفاض الأسعار سواء فى ثمن الأراضى أو الوحدات العقارية، وذلك بخلاف المناطق القديمة مثل الأحياء الراقية، كالمهندسين والدقى، التى يلعب عامل الندرة فى توفر العقارات عنصراً مهماً فى الحفاظ على ثبات الأسعار.

وتوقع أن يشهد العام الحالى ٢٠٠٩ تراجعاً فى أسعار العقارات بنسبة تتراوح بين ٢٠ و٣٠٪، معتبراً أن هذا الانخفاض يعد طبيعياً بعد أن قفزت الأسعار إلى مستويات غير منطقية العام الماضى.

وقال محمد علاء، المسؤول فى إدارة التسويق بشركة «بيتا إيجبت» للاستثمار العقارى، إن شركته بدأت تطبيق سياسة تسويقية جديدة منذ أكتوبر الماضى، تقوم على تقديم تسهيلات أكبر فى السداد ومد أجل الأقساط.

ولم يعد اتجاه شركات العقارات إلى تغيير سياستها التسويقية، هو الوحيد الذى لجأت إليه للتخلص من مخزونها، إنما لجأ بعضها لتغيير خططها ونوعية نمط الوحدات التى تعمل بها، وسط اتجاه جماعى إلى الإسكان المتوسط الذى بات ينظر له على أنه قاطرة سوق العقارات فى مصر الفترة المقبلة.

وتشير التقديرات الحكومية إلى حاجة مصر إلى ٥.٣ مليون وحدة سكنية بحلول عام ٢٠١٧، فضلاً عن أن ١٣٪ من الثروة العقارية الحالية بحاجة إلى إحلال.

وقال أحمد عبدالدايم، الخبير العقارى، إنه يمكن تفادى تداعيات الأزمة المالية العالمية على سوق العقارات المصرية بالتوجه نحو نوعيات جديدة من الإسكان، خاصة المتوسط، الذى يستهدف شرائح واسعة من متوسطى ومحدودى الدخل، داعياً شركات الاستثمار العقارى إلى ضرورة تغيير استراتيجيتها خلال الفترة المقبلة، للاستمرار فى نشاطها.

جريدة المصري اليوم بتاريخ 5/1/2009

يا استاذ امير الكلام شئ و ارض الواقع شئ اخر

فمتر الشقة فى مدينة الشروق فى بعض المناطق المتميزة لم يهبط كما يشاع و اللى هبط هى الشقق الغير مميزة و هبط سعر المتر بمعدل 100 جنيه وده بالنسبة للتعاقد على شقة لسه حتتسلم بعد سنتين

و ذريعة المقاولين قولهم ان لو الحديد ارتفع مع مواد البناء التانية مش حنزود السعر

و بعدين يا اخوة رجاءا المقاول انسان حتتعطل فلوسه 4 سنوات وهى متوسط سنين التقسيط فلازم برده يكون واخد حقه

ولا ننسى ان التقسيط حل مشكلة ناس كتير فى الحصول على مسكن

ولو معاك كاش ده حيقلل فى السعر اكتر من 10 %

و وقتها انت اللى ممكن تحدد السعر على رأى فيلم السفارة فى العمارة

ساعة الكاش الغالى يبقى ببلاش

تم تعديل 5 يناير 2009 بواسطة عطر الجنة

[سكر]

وبالتالي ناس كتير من اللي بيشتروا في الرحاب ومدينتي هم من هذه النوعية ... وده مش عيب ..

يعني عشان يتمنظر ويقول أنا ساكن في الرحاب أو مدينتي وهكذا

انا مش معترض بس المشكله ان دة بيكون موشر لاسعار العقار على مستوى مصر

يعنى رحاب لما ترفع السعر الكل بيرفع ورها

ولما نتخيل ان اماكن بجمال الرحاب مدينتى ققررت انها تخفض الاسعار

والله دة احسن من اقوى ازمة مالية على مستوى العالم ممكن توثر فعلا بقوة على اسعار العقار على مستوى مصر كلها

بس هو هيخفض لية اذا كان فى طلب

فى سوال نفسى حد يرد عليه من زمان

الفوس دة كلها جات منين

الشقة اصبحت بمليون جنية فى الرحاب 131*6000

هو المليون بقى سهل قوى كدة فى مصر

طيب احنا بنهبب اية بقى فى الغربة

وعن تجربه لف ودوران فى عقارات مصر فى اكتوبر ونوفمبر كانت وجهه نظرى

1- لايوجد زيادة فى الاسعار ولكن ثبات فى الاسعار

2- معظم الانخفاضات غير حقيقة (بمعنى زيادة فى فترة التقسيط &تقليل الخدمات والتشطيب )

3- يوجد حاله ركود فعلا وهو ركود الانتظار وليس ركود نقص السيوله

4- نظرية العقار لاياكل ولا يشرب هى النظرية المفضلة لكل من اشترى ويرغب فى البيع بسعر اعلى

5-اكثر من 70 % من المشتريين شارى بغرض الاستثمار للبيع وقت الزيادة

يبقى لو فى فرص استثمار اخرى احسن من العقار هتنزل اسعار العقارات

[أشرف محمد]

بسم الله الرحمن الرحيم

السادة الكرام أعضاء المنتدى

أخي الكريم / sami ragab

تحية طيبة وبعد 000

هذا ما قلته في موضوعي ( تقييم السعر العادل للعقار ) والذى تشرفت بنشرة في المنتدى منذ ما يقرب من ثلاثة أشهر حيث حذرت من أن أسعار العقارات في مصر غير حقيقية و أنه يوماً ما سيحدث إنفجار في الفقاعة وستنخفض الأسعار ولكن وقتها قوبل كلامي بالهجوم الشديد من بعض الأعضاء معتبرين أن سوق العقارات في مصر لا يمكن أن يتعرض إلى أي هزات إستناداً للأسف إلى بعض التصريحات الحكومية الكاذبة والتي تضحك علينا وتحاول أن تقنعنا بأن الإقتصاد المصري قوي وبعيد عن الأزمة المالية و أنها لن تطولنا !

الآن وبعد مرور أقل من ثلاثة أشهر يظهر صدق تحليلي و يبدأ إنفجار الفقاعة بهبوط في الأسعار مابين 10 : 15 % و تخرج علينا التصريحات الحكومية الحقيقية لتخبرنا أن الأزمة المالية ستطول مصر ! ولكن للأسف بعد إيه ؟

الأخت الفاضلة عطر الجنة

تحية طيبة وبعد 000

المركز المالي لطلعت مصطفي قوي فقط بقروض البنوك التي حصل عليها بضمان أراضي مدينتي والتي لم يدفع فيها مليم واحد بالإتفاق طبعاً مع الوزارة بالإضافة إلى المقدمات التي حصل عليها من الناس التي قامت بالشراء وبالتالي فهو لا يعمل بأمواله وإنما للأسف بأموال الناس ! والدليل على ذلك ما ذكرتيه في مشاركتك الكريمة 0

الأخ الكريم / hanzalah

تحية طيبة وبعد 000

وقت المضاربات لا يفكر أحد في ثمن السلعة هل هو مناسب لها أم لا ، المهم أن أشتري السلعة وأبيعها بعد ذلك بربح كبير وهذا ما حدث خلال الفترة من 2006 وحتى 2008 والتي تسمى بهوجة العقارات أي أنها لم تكن للسكن كالمراحل الأولى من مشروع الرحاب والتي كانت الأسعار فيها طبيعية ومنطقية 0 بل كانت مضاربات فقط

وقد وجد المضاربون المدن الجديدة فرصة لتنفيذ مخططاتهم تحت سمع وموافقة وزارة الإستثمار وأقصد بها وزارة الإسكان التي شجعتهم بإشعال أسعار الأراضي بتعطيش السوق بحجة عدم توافر أراضي بها 0

فلا يعقل أن يزيد سعر شقة في مدينة جديدة تبعد العاصمة 40 كم عن سعر شقة في وسط المدينة 0 فهل هذا منطق مهما كانت مميزات المدن الجديدة ؟

هل من المنطق أن يصل سعر فيلا دوبليكس في القاهرة الجديدة لأكثر من 1.1 مليون جنيه ؟ وهي في الحقيقة عبارة عن جزء من الدور الأرضي وجزء من بدروم العمارة قام صاحبها بتقفيلة وبيعه على أنه فيلا دوبليكس !

بالله عليك من سيشتري مثل هذه الفيلا ؟

في نظرى هو واحد من ثلاثة :-

1 - أن يكون مضارب فلا يهمه قيمة السلعة التي يشتريها لأنه سيبيعها بأكثر من ثمنها0

2- أنه لا يعرف قيمة القرش الموجود في يده 0

3- أنه مجنون وفي هذه الحالة لابد من الحجر عليه 0

الأخت الكريمة سهيلة :

تحية طيبة وبعد 000

من المعروف إقتصادياً أن سعر أي حاجة في الدنيا مرتبط بقانون العرض والطلب فكلما قل العرض وزاد الطلب إرتفع السعر والعكس صحيح 0 وهذا ما يحدث الآن في سوق العقارات فعندما ضعفت القوة الشرائية لأسباب كثيرة منها طبعاً الأزمة المالية والإمتناع عن الشراء خوفاً من إنخفاض الأسعار وزاد المعروض خوفاً من تحقيق مزيد من الخسائر بدأت الأسعار تنخفض 0

يقابل هذا إزدياد الطلب على الإيجار هروباً من الشراء فيقل المعروض من الإيجار فترتفع أسعاره 0

الأخوة الكرام

أرجو من الله أن أكون وفقت في التحليلات السابقة ولكم مني خالص تحياتي

مهندس / أشرف محمد

[Falcon Crest]

mr: Asaad

could you please, tell me the name of that company as i would like to but flat next period

[م بـدران]

أعتقد انه سيطاله بشكل نسبي

فمن يعيش في دولة تعاني حالة انهيار عقاري كامل مثل الإمارات يعلم تماما أن كل البنوك وشركات العقارات الكبيرة مثل داماك ومنازل وخلافه اللاتي شاركن في

العديد من المشاريع الكشخه على رأي الأخ الفاضل سي سيد تقوم الآن بتسريح فيما لا يقل عن 70% من عمالتهم وأن هناك عجز رهيب في السيوله بعدما

قام معظم المودعين بسحب مدخراتهم من تلك البنوك خوفا من تبددها ...

وبالتالي هناك قسم كبير من العاملين سيسرحون من أعمالهم ولن يجدوا فرصة عمل بسهولة في ظل هذا الإنهيار الكامل ...

وذلك يؤثر بشكل مباشر على كمية الأموال التي كانت تحول إلى مصر ..

أما بالنسبة لسوق العقارات في مصر فوضعه مختلف ... ومختلف تماما عن المهزلة التي حدثت في الخليج ..

في مصر

90 % من الإستثمار العقاري في مصر بيكون من جيب المستثمر والباقي عن طريق القروض ..

في الخليج

98% من الستثمار العقاري بيكون قروض من البنوك ..

أسعار العقارات أنخفضت في مصر نعم

ولكن بنسبة لا تتجاوز ال 10%

وذلك يرجع لحرص الناس وترقبهم لما سينتج عن الأنهيار الإقتصادي الكبير الذي نعيش مراحله الأولى الآن..

ولأن معظم المستثمرين أشتروا وبنوا من جيوبهم ومحدش عليه للبنك شيك واحد ..

ولذلك قام البعض وانا أولهم :)

باللجوء إلى تسهيل عمليات الدفع وإطالة مدة الأقساط ..

وندعوا الله أن يفرجها علينا وعلى الجميع لحسن الأيام اللي جايه ماطمنش

[se_ Elsyed]

هو المليون بقى سهل قوى كدة فى مصر

طيب احنا بنهبب اية بقى فى الغربة

أسهل مما تتصور

كان نفسي تكون في مصر الصيف الماضي وتنزل تبحث عن شقة في مدينة نصر مثلاً وتروح لمكتب سمسرة ويسألك عن ميزانيتك اللي يبحث لك من خلالها ولما تقول له نصف مليون مثلاً .... يقوم باصص لك من فوق لتحت ويقول لك : مع نفسك .. روح ألعب بعيد !!!!!!!!!!!!!!!

[سكر]

ولما تقول له نصف مليون مثلاً .... يقوم باصص لك من فوق لتحت ويقول لك : مع نفسك .. روح ألعب بعيد !!!!!!!!!!!!!!!

طيب اسمع دى بقى وقولى

فى يوم من الايام قررت انى انتحر وادخل احد الاحياء الفيلات فى الشيخ زايد فى شهر ديسمبر الماضى 2008

والله كان غرضى شريف بس مش الشراء الفرجة بس

ودخلت على طول على مكتب المبيعات نافخ ريشى وقلتله قوم اقف وانت بتكلمنى وهاتلى اصغر فله فى المنطقة

راح لرجل بكل ذوق وادب خرج معايا وفرجنى على اصغر فله تقريبا 150 متر او اكثر والبناء على دورين لزوم الكشحة على راى

حببنا سى السيد

قوم سالت الراجل كام السعر ياعم انت قالى

اربعة وتلتمية

بصيت كدة بستغراب وقلت هى صغيرة فعلا بس لما تقارن باسعار الشقق المولعة تبقى يعنى فيها امل

وعملت الحسبة

4300*150=645000 تحت العجز او الزيادة

طيب يا عم فى تقسيط

ايوة يا استاذ

طيب الاربعة وتلتمية الف بيندفعوا ازاى

راح الراجل بصلى من فوق لتحت بصة مقرفة وقالى

الاربعة وتلتمية الف اية يا استاذ اصحه

اربعة مليون وتلتميت الف جنية :ninja:

تم تعديل 6 يناير 2009 بواسطة ataamer

[hanzalah]

أهو ده اللي يجنن فعلا ..

فيلا 150 متر ثمنها اربعة مليون جنيه ..

نفس المبلغ ده ممكن اشتري بيه شقه في لندن .. او فيينا وما ادراك ما فيينا يا جميل ..

بس بدي اقول .. انه لن يطلب هذا السعر لو لم يكن هناك مشتري ..

اذن هناك قوة شرائية فعلا ..

ولو ذهبنا نراهن على انخفاض الاسعار .. ثم اكتشفنا ان الاسعار ارتفعت فعلا .. فقد نبكي على الفرصة الضائعة ..

ونقول بعد عام ياه .. أهي الشقة دي راحت مني .. كانت بحوالي 700 الف جنيه بس .. شوف دلوقت تعد لها كام ..

شيء بشع انا عارف لكنه واقعي جدا ..

دلوقت احنا بنقول فيه كساد في العالم ..

شوف ياعزيزي سوق مصر بيحسبها ازاي وحاول تفهم وجهة نظر الآخر .. البائع .. أو شركة العقار .. او السمسار ..

سيأتي مصريين انهوا عملهم بالخليج ومعهم اموال

سيأتي عرب من اهل الخليج لايشعرون بالامان في استثمار مالهم في اسواق اوربا وامريكا

سيأتي من أهل فلسطين والعراق ولبنان بعض الاثرياء يضخون المزيد من القوة الشرائية

سيأتي اجانب يعملون في مصر بمرتبات خرافية ويريدون تأجير سكن مفروش فاخر (5 الف دولار ايجار الشقة ياسيدي)

كل ذلك يجعل الطلب على العقار موجود فعلا

والآن دعنا من وجهة نظر البائع .. ولننظر الى الواقع ..

عندما يبيع جارك شقته بسعر مثلا 200 الف جنيه في منطقة عادية وليكن السبب مجرد ضربة حظ

مثلا شاب من قرية عائد من ايطاليا .. شاب من مدينة عائد من الخليج .. أو غيره من الامثلة

عملية البيع هذه خلقت واقع جديد يا عزيزي

ربطت دماغك بسعر جديد وواقعي لن تتنازل عنه لو فكرت تبيع شقتك بعد حين

بل ان بعد شهرين راح تقول .. اذا كان فلان باع من كام شهر بمبلغ 200 الف .. يبقى انا بعد غلاء الاسعار والنار دي لابد اطلب 250 الف

وهكذا دواليك

عزيزي .. انت نمت مني ..

لا ..

ارجوك .. ماذا تفعل لو كنت مكاني ..

[عطر الجنة]

يا جماعة الخير

مما لاشك فيه ان كل انسان بيحلم يستثمر فلوسه فى مشاريع تدر عليه عائد مادى جيد و سريع وبما اننا معظمنا المصريين مدخرتنا على ادها نتيجة رواتبنا الهزيلة فى الدول العربية و تعودنا على مستويات معيشة مريحة هناك و مستوى صرف اعلى للفلوس فكان لابد من وجود مشاريع و استثمارات عائدها عالى و سريع

فمعظم الناس لجأوا الى البورصة لان كان مكسبها ممكن نقول حلم تحول الى كابوس مرعب وبأى كمية فلوس ممكن تشترى اسهم و فى اى دولة بالعالم

و بعد خسارة الناس لفلوسها كان لازم البديل و الناس وجدت ضالتها فى العقار و معظمنا داخلهم قناعة ان العقار ما هو الا فلوس مدخرة لن تقل قيمتها الاسمية وخصووصا فى ظل ارتفاعات مواد البناء فوجدت الناس فيها ضالتها المنشودة

فكثير من الناس اعرفهم كانوا بيشتروا الشقق نصف تشطيب و يشطبوها و يبيعوها و كانوا بيكسبوا حلو جدا

ودى الناس اللى مدخرتها قليلة

اما الناس اللى مدخرتها اكبر شاركوا بعض و اشتروا اراضى و بنوا و طبعا فى ظل الغلاء و موجته الساحقة لابد ان يكون هامش الربح عالى

كمان هروب المقاولين من اثمان الاراضى المرتفعة فى الاحياء الراقية الى احياء يقال انها شعبية او احياء فقيرة و ما ان يشتروا ارض فيها و يبتدى البرج يتحفر اساسه الا وحمى ارتفاع تمن الارض يبتدى فى هذه المنطقة و هى ارتفاعات تذهب العقل تخيل متر ارض يرتفع فى شهر من 1000 جنيه الى 4000 جنيه

ده ساهم فى تفاقم الاسعار كمان التخصيصات التى كانت بتم فى السر بمئات الفدادين من ارضنا الغالية فى اكتوبر و القاهرة الجديدة

انا اتعرض عليه عن طريق بعض الوسطاء الذين لهم صلة باجهزة المدن ان بخصص لى ما اريد من فدادين فى القاهرة الجديدة بحد ادنى 5 فدادين نظير انه ياخد عمولة 5 جنيه عن كل متر مربع

يعنى احسبها كده الفدان 4700 متر *5 جنيه * 5 فدادين

ودى من طرق الثراء فى مصر مش تقولى العمل فى الخليج

عارفين انا لو ليه قلب جامد و معاية ماديات تسمح كنت اخدت لان كل اللى استثمروا الفرصة دى هناكم اصبحوا بين عشية و ضحاها مليونيرات

ده بعد تقسيم الاراضى لقطع صغيرة او بيعها على بعضها كاراضى مولات او فنادق او اشياء مشابهة

تم تعديل 6 يناير 2009 بواسطة عطر الجنة

[سكر]

الاخلاق السائدة حاليا هى اخلاق المكسب السريع مع اقل مجهود وياريت ميكونش فى مجهود اصلا

مصر كلها تحولت الى سماسرة فى كل شى

عقارات & قطع غيار بشرى & سيارات& مصالح واهية &استيراد اى شى وكل شى & اى نصب واحتيال

لا بقى سفر وغربه نافع ولا عمل داخل البلد نافع

المواطن الى بيصحى الصبح عشان يروح شغلة ويعمل عمله بما يرضى الله اصبح موضه قديمه من كلاسيكيات الحياة المصرية

المفروض تصحى الصبح تنزل الشارع تدور شمال ويمين على مصلحة حلوة ولا سبوبه مع مدير او وزير عشان تبقى مليونير

انا ليا واحد قريبى تخرج معى من نفس الكلية

من اول يوم وهو مكرر ان الشغل ملهوش لازمة وانك لازم تشغل دماغك حاجة كدة زى على بيه مظهر

انا بقى اشتغلت وتعلمت وصرفت دم قلبى واعصابى وشحتت نفسى انا واهلى فى الغربة والنتيجة مش فارقة كتير

حصيلة الغربة غرفة البواب فى الفيلا

والعلم لا يقدر بالبتنجان ولو عايز يتقدر يبقى لازم تبقى فى الغربه ولو رجعت من الغربه للبلد تتعب نفسيا من الى شايفة

هو بقى مكبر دماغة وقاعد يقلب عيشة هنا حبا وهنا حبا وقاعد مستنى ضربه الحظ فى اى محاوله

صح بقى او غلط مش دة المهم المهم انه يكون ثروة فى اسرع وقت باقل مجهود

لان قيمة العمل والمعرفة اصبحت تساوى صفر

وكمان الى بيشتغل بدراعه

لو حصله حاجة فى صحته اولاد والعيال هيتشحتته ويتبدهلوا ولو بشتغل بمرتب خلاص بح راح المرتب

والله انا اعرف مدرس رياضيات ثانويه عامة 20 سنة خبرة وتخرج من تحت ايدة جهابذه

عارف مرتبة كام

350 جنية فى بلد الفيلا 150 متر اصبحت 4300000

الاستثمار العقارى اصبح السبوبه الى بتبيض دهب للحكومة واصحاب الحكومة واقارب الحكومة والى يعرف يرش فى الحكومة

كمان انا متاكد من ان

الاستثمار العقارى استثمار من ليس له استثمار

يبقى مصر مبقاش ليها فى الاستثمار خلاص

اشتغل فى مصر وحطهم فى شقة (دة لو عرفت تعملهم اصلا)

اشتغل فى الخليج وحطهم فى اى كشحه

اشتغل فى ايطاليا وروح بورلك كام فدان وابنى عليه

حسبى الله ونعم الوكيل فى سياسة مصر مش فى الحكومة لا فى سياسة التجويع والتعطيش

مصر سنة 2020 هتستورد طبق السلطة ومش هيكون فى اكتفاء ذاتى منه

وماليزيا مكررة من سنة 2000 ان 2020 هتكون فيها الثامنة على مستوى العالم فى التصنيع

حتى وان فشلت بس سياسة

احنا بقى سياستنا طفش الناس وسرحهم برة وخليهم يلموا فلوس ويرجعوا يشتروا كشحة

[se_ Elsyed]

من اول يوم وهو مكرر ان الشغل ملهوش لازمة وانك لازم تشغل دماغك حاجة كدة زى على بيه مظهر

مش عيب طالما حلال

والله انا اعرف مدرس رياضيات ثانويه عامة 20 سنة خبرة وتخرج من تحت ايدة جهابذه

عارف مرتبة كام

350 جنية

مستحيل .... مستحيل .. مستحيل ...

مرتبات الحكومة بيبقى فيها بدلات وحركات والذي منه وممكن تعدي الألف جنيه بمراحل

[osaimi]

ماقلتلناش يا ataamer صاحبك اللي كبر دماغة عمل ايه ، اكيد ضربت معاه أو هتضرب واحنا هنا قاعدين فى الخليج دماغنا هيه اللي هتضرب

[ترنيم]

من اول يوم وهو مكرر ان الشغل ملهوش لازمة وانك لازم تشغل دماغك حاجة كدة زى على بيه مظهر

مش عيب طالما حلال

والله انا اعرف مدرس رياضيات ثانويه عامة 20 سنة خبرة وتخرج من تحت ايدة جهابذه

عارف مرتبة كام

350 جنية

مستحيل .... مستحيل .. مستحيل ...

مرتبات الحكومة بيبقى فيها بدلات وحركات والذي منه وممكن تعدي الألف جنيه بمراحل

كلامه مع الأسف صحيح واحدة من أقاربى مدرسة لغة انجليزية فى مدرسة اعدادى وبتاخد 200 وشوية ولما جالهم حوافذ 600 جنيه زى ماحضرتك بتقول(مرة فى السنة مش كل شهر)فضلوا فى انتظارها يجى 5 شهور وعقبال ما الشيكات وصلت اكتشفوا ان الشيك أبقوا 600 بقى 300 وسلم لى عالحوافز

[عطر الجنة]

من اول يوم وهو مكرر ان الشغل ملهوش لازمة وانك لازم تشغل دماغك حاجة كدة زى على بيه مظهر

مش عيب طالما حلال

والله انا اعرف مدرس رياضيات ثانويه عامة 20 سنة خبرة وتخرج من تحت ايدة جهابذه

عارف مرتبة كام

350 جنية

مستحيل .... مستحيل .. مستحيل ...

مرتبات الحكومة بيبقى فيها بدلات وحركات والذي منه وممكن تعدي الألف جنيه بمراحل

كلامه مع الأسف صحيح واحدة من أقاربى مدرسة لغة انجليزية فى مدرسة اعدادى وبتاخد 200 وشوية ولما جالهم حوافذ 600 جنيه زى ماحضرتك بتقول(مرة فى السنة مش كل شهر)فضلوا فى انتظارها يجى 5 شهور وعقبال ما الشيكات وصلت اكتشفوا ان الشيك أبقوا 600 بقى 300 وسلم لى عالحوافز

طيب ده حال المدرسين طيب لما يبقى طبيب بقاله 24 سنة متخرج و اخصائى تحاليل طبية فى مستشفى حكومى ويكون راتبه بالحوافز و البدلات وكل شئ 671 جنيه تسموا ده ايه

ده انا كنت وانا فى السعودية قاعدة مع فلسطينية وفوجئت ان راتب الطبيب الفلسطينى الحديث التخرج فى بلده فلسطين 1500 دولار يعنى بلد مستعمر و عايش فى حصارات من جميع الانواع و بيتلقى معونات

وده راتبه اقول ايه سامحكوا الله يا ساسة بلدى مصر

[se_ Elsyed]

من اول يوم وهو مكرر ان الشغل ملهوش لازمة وانك لازم تشغل دماغك حاجة كدة زى على بيه مظهر

مش عيب طالما حلال

والله انا اعرف مدرس رياضيات ثانويه عامة 20 سنة خبرة وتخرج من تحت ايدة جهابذه

عارف مرتبة كام

350 جنية

مستحيل .... مستحيل .. مستحيل ...

مرتبات الحكومة بيبقى فيها بدلات وحركات والذي منه وممكن تعدي الألف جنيه بمراحل

كلامه مع الأسف صحيح واحدة من أقاربى مدرسة لغة انجليزية فى مدرسة اعدادى وبتاخد 200 وشوية ولما جالهم حوافذ 600 جنيه زى ماحضرتك بتقول(مرة فى السنة مش كل شهر)فضلوا فى انتظارها يجى 5 شهور وعقبال ما الشيكات وصلت اكتشفوا ان الشيك أبقوا 600 بقى 300 وسلم لى عالحوافز

طيب ده حال المدرسين طيب لما يبقى طبيب بقاله 24 سنة متخرج و اخصائى تحاليل طبية فى مستشفى حكومى ويكون راتبه بالحوافز و البدلات وكل شئ 671 جنيه تسموا ده ايه

ده انا كنت وانا فى السعودية قاعدة مع فلسطينية وفوجئت ان راتب الطبيب الفلسطينى الحديث التخرج فى بلده فلسطين 1500 دولار يعنى بلد مستعمر و عايش فى حصارات من جميع الانواع و بيتلقى معونات

وده راتبه اقول ايه سامحكوا الله يا ساسة بلدى مصر

ما بتتحسبش كده يا ست الكل

هاقولك مثل

لما جم مجموعة من الفلسطينيين الي كسروا الحاجز بين مصر وغزه ودخلوا رفح والعريش وشافوا اسعار السلع المصرية وخصوصاً انابيب الغاز والاسمنت والاسمدة وخلافه .. استمعت للعديد منهم مش مصدقين ان في الدنيا اسعار زي دي

وقالوا فعلاً ان متوسط المرتبات عندهم 800 دولار يعني بالمصري حوالي 4500 ج لكنها لا تكفيهم لبضعة ايام في الشهر

اذاً هي علاقة وثيقة بين المرتب والاسعار

لا اصدق ان في موظف بقى له 20 سنة ونقول عنده 3 اولاد في الشهر والمفروض انه مدرس محترم وقادر يعيش ويعيشهم بـ 350 ج ؟

دي لا مؤخذه ما تجيش فاتورة تليفون من اللي بتندفع كل شهرين - هي كل شهرين دلوقت ولا 3 ؟ -

هو احنا كنا بنتكلم في ايه ؟ :lol: