مالنا و مال أمريكا (نحن أمة الثبات على المبدأ) حمدي قنديل وقلم رصاص

[ebregi]

بصراحة شاهدت هذا البرنامج لحمدي قنديل في قناة دبي و طبعا كان نفسي أسجله بس للأسف كنت برة

وبحثت عنه كثير على الأنترنت حتى وجدت منه مقطع صغير جدا من هذا البرنامج وطبعا احببت أن أشارككم

إياه لنرى أذ كان هناك من يشاركني نفس الشعور و ألا لأ و لو لأ تبقى المشكلة فين عندي و ألا عندكم

ده المقطع:

http://www.youtube.com/watch?v=e866Pg8ieYU

ودة الكلام تقريبا: (منقول الكلام من أحد المنتديات) شكرا لكم

احنا أمة الثبات على المبدأ .. أمريكا تتغير ، هيه حرة .. احنا اللي بنعرفه احسن من اللي مانعرفوش !..

امريكا تتغير هيه حره .. كانت امبارح بتعامل السود زي ما بتعامل الكلاب ، تقوم النهاردة تنتخب رئيس اسود ، موش مشكلتنا .. احنا اساسا لا بننتخب اسود ولا ابيض !..

امريكا بتتغير هيه حرة .. أوباما يراهن على الشباب ، طبعا لأن سنة 47 سنة ، احنا حكمتنا الخالدة ان الدهن في العتاقي !..

امريكا تتغير هيه حرة .. تنتخب المرشح اللي ماكانشي معروف لحد من 10 سنين بس ، احنا لو حد غريب أتجرأ يرشح نفسه زي ايمن نور يتحط في السجن بتهمة تزوير !..

امريكا تتغير هيه حرة .. تلامذة امريكا يراقبوا صناديق الانتخاب .. احنا تلامذتنا ممنوع عليهم السياسة ، ممنوع ينضموا لحزب ، ممنوع يترشحوا لاتحاد الطلبة ، ممنوع يتكلموا في الانترنت !..

امريكا تتغير هيه حرة .. اذا كانت طريقتهم ان عموم الناس هيه اللي بتعمل التغيير ، يغيروا من تحت همه احرار ، همه .. احنا بنورّث من فوق !..

امريكا تتغير هيه حرة .. والله حتى ان شاء الله مااتغيرت .. مالنا ومال امريكا .. عندهم نائب الرئيس بينتخب زيه زي الريس في نفس الانتخابات .. احنا عندنا لو كان فيه نائب رئيس ، لو ، لازم يتعين !..

مالنا ومال امريكا .. عندهم يطلع الرئيس زي ما طلع اوباما امبارح باغلبية 53% .. ده يبقى بالشكل ده رئيس مهزوز مالوش قاعدة شعبية متينة .. احنا رئيسنا لازم يطلع بـ 99% ، واذا يعني فيه استثنا يبقى كذا و80 !..

مالنا ومال امريكا .. يروحوا 66% من ناخبينهم يصوتوا في الانتخابات ، احنا صحيح حتى لو راح 23% ، إحنا غير...... إحنا شعبنا عن بكرة أبيه بيصوت ، بيصوت طول العمر ، بانتخابات ومن غير انتخابات !..

مالنا ومال امريكا .. عندهم لازم الانتخابات تببقى فيه مناظرات .. احنا مرشحنا الاوحد عبقريته فذة في النقاش والحوار والجدل .. بيناظر نفسه .. بيناظر على روحه !..

امريكا تتغير هيه حرة .. يغيروا رئيسهم بعد دورة واللاّ دورتين ، ذنبهم على جنبهم ده اللي بيعمل شرخ بين عموم الشعب الامريكي ..إحنا غير كل إيشي و له أيشي لكم دينكم و لي دين

لا بنتغير و ل بنتأثر بالتغيير في العالم إحنا غير .................إحنا أمة الثبات على المبدأ إحنا أمة اللي نعرفه أحسن من اللي مانعرفوش

أمريكا تتغير هيه حرة .. عندهم حزبين رئيسيين ، ده غير الاحزاب الفرط ، طبعا ده لأنهم 100 أمة وأمة .. احنا يكفينا حزب واحد لأن أمتنا امة واحدة ذات رسالة خالدة .. بالروح ، بالدم ، حنكمل المشوار !..

مالنا ومال امريكا .. اذا كانوا هناك بيهلكوا الناخبين ، يوقفوهم طوابير في انصاص الليالي في عز التلج .. احنا بنوفر لهم كل اساليب الراحة .. لو استدعى الامر وهوه غالبا بيستدعي .. رؤساء اللجان بيصوتوا نيابة عن الجماهير !..

مالنا ومال امريكا .. اذا كانوا هناك بيستخدموا الكمبيوتر في التصويت وفي العد .. ولأن الكمبيوتر بيغلط ، وحضراتكم عارفين ازاي غلط في فلوريدا .. عندنا الشرطة اللي هيه في خدمة الشعب ، هيه اللي بتعد ، بالطريقة الديموقراطية السليمة .. مفيش عندها لا جمع ولا طرح .. كله ضرب في ضرب !..

تم تعديل 16 ديسمبر 2008 بواسطة ebregi

[ebregi]

تحياتي للجميع و لو حد سجلها أو عنده لينك كامل للحلقة ياريت يشاركنا هذا اللينك

وشكرا لكم

[عصام أبوالفتح]

ان الله لا يغير ما بقوم حتى يغيروا ما بأنفسهم

فاحنا طبعا مش هانتغير .. وامريكا تتغير هى حرة .. بنعند مع نفسنا ومع غيرنا ومع ربنا حتى !! .. لغاية ما نموت ويورث ولادنا حب العكوف على اصنامنا التى ظللنا لها عاكفين طوال حياتنا ؟

شكرا ebregi

تم تعديل 16 ديسمبر 2008 بواسطة عصام أبوالفتح