فن و للفن فقط - تعليقات على أفلام مصرية

[Lancelot]

ننتظر لحد بالليل من أجل التعليق ... بس علي الله ما نسهرش الليالي في إنتظاره ..... "وش مبتسم"

[فــيــروز]

الاخ قلب ابيض :) تحب اقول لك اسمك عربى ولا انجليش فور يو؟

تعليق بره الموضوع : احيان كتير مش بافهم قوانين الاسره فى امريكا يا ترى هى فعلا لحماية الطفل ولا لتعذيبه :(

الاخ proud muslim

الخبر السار ان الكثيرين يعتبر ما عرضه الفيلم امر واقعى و بيحصل !! وانا اما عرفت كده حسيت انى خرجت من القمقم قبل انتهاء فترة اقامتى فيه !!

العزيز شريف

بالقطع انا لم اقصد ان اقوم باى دعايه للفيلم .. بالعكس انا من ساعة ما شفته وانا حاسه ان راسى بتلف وفقدت اتزانى ..

وبصراحه انا لم افهم السؤال الاخير فى ردك ولهذا لم استطع الاجابه --> وش محرج

سير لانسلوت الصبان "زى رفيق الصبان كده" :)

اولا شكرا على الرد المفصل ..

بخصوص البطوله الجماعيه .. لا ادرى لم شعرت انى رايت مشكلة جيهان فاضل و علا غانم بوضوح اكبر من باقى المشكلات .. يمكن لان المشكلتين الباقيتين تقليديتين شويه !! يمكن عشان المشكلتين دول هما اللى رفعوا ضغطى خلال و بعد مشاهدة الفيلم .. الله اعلم بس الدورين دول هما اكتر دورين تاثرت بهما فى الفيلم .. وبصراحه عجبنى اداء خالد ابو النجا "معلش يا شريف ماتزعلش بس هو صعب عليا الصراحه" :)

اتفق معك جدا ان الفيلم لم يقدم اى سبب للتحسن المفاجئ فى العلاقات بين كل الناس !! وكما قال احد الاصدقاء فى منتدى تانى "المواضيع اتحلت وكله سايب ايديه" بدون اى مجهود يعنى او اى مقدمات منطقيه .. ولهذا لم اقتنع بجملة فن للفن فقط !! فالفن يجب ان يحترم عقولنا على الاقل مش يحل كل شئ فى آخر حلقه كعادة المسلسلات العربى ..

نقطة للكبار فقط دى ايضا تحدثت عنها فى موقع آخر وكل من راى الفيلم علق عليها !! من حوالى سنتين ذهبت للسينما مع بعض الاصدقاء وكان الفيلم اجنبى للكبار فقط رغم انه كان محترم جدا بالقياس الى سهر الليالى .. واحدى الصديقات كان معها ابنها عنده سنه !! ورفض المسئول ادخالها الى الفيلم لانها تصطحب طفلا و الفيلم للكبار فقط رغم ان الولد لو حتى كان فيلم عربى ماكانش فهمه !! نفس السينما شاهدت فيها سهر الليالى و العيال بتجرى و السينما تمتلئ بالاطفال و المراهقين !!

حتى الآن البعض يظن ان التدخين من مظاهر تحرر المراه و انتمائها الى طبقه عاليه فى المجتمع !! لانه -حسب علمى- نادر جدا لحد دلوقت ترى امراه تنتمى لطبقه فقيره او شعبيه تمسك بسيجاره لتدخنها عمال على بطال !! والفيلم من الاول يقول انه يتحدث عن طبقه مرتفعه فى المجتمع يبقى الشئ لزوم الشئ ..

انا من مده طويله لم ادخل افلام عربى فى السينما .. عشان كده الصراحه حسيت ان الرقابه عندنا بقت مرنه لدرجه تقلق فيما يختص بالمشاهد الساخنه .. لكنى رغم انى كنت اشاهد الفيلم مع احدى صديقاتى احسست بحرج شديد سواء من المشاهد او والالفاظ المستخدمه فى الفيلم .. ومش فاهمه بصراحه هو عشان الفيلم للكبار فقط يبقى الحوار مماثل لصفيحة الزباله !! ده احساسى تجاه كلمات كثيره قيلت فى الفيلم ..

واذا كانت حجة شريف منير فى الفيلم لتاجيل الزواج كلام فاضى فان الزواج نفسه كان كلام عبيط جدا .. البعض قال ان الفيلم واقعى .. وسالتهم طيب بصفتكم شباب من هذا الجيل الصاعد يا ترى فيه حد فى مصر بيتجوز واحده عاش معها بدون زواج !! و لم اجد اى رد و رغم كده بيصروا ان الفيلم واقعى !!

وفى رايى المشكله ليست فقط فى طرح هذه المشكله من ضمن المشكلات الاربعه ولكن ايضا فى النظر اليها !! الجميع يتعامل مع العاشقين على انهما مخطوبين حتى الزوجه المحجبه اللى مفترض يكون تفكيرها مختلف شويه !! ولا افهم الضروره الدراميه لدور زوجه محجبه فى الفيلم لو حد فاهمها يقول .. انما اللى فرسنى فعلا ان الفيلم تعامل مع هذا الموضوع ولا كأننا بنتفرج على مسلسل الجرئ و الجميلات !! و معظم النقاد يتكلموا عن علا غانم و شريف منير بصفتهما العاشقين مش اى حاجه تانيه --> حسبنا الله ونعم الوكيل

انا بصراحه انبرهت من شجاعة المؤلف فى تناول مشكله مثل مشكلة جيهان فاضل .. لكن يا فرحه ما تمت .. العلاج كان ركيك جدا خصوصا انى طول الفيلم اسال نفسى .. اذا كان لديها الشجاعه ان تواجه اخاها و طبيبها بمشكله حساسه زى دى طيب مش كان اسهل تناقشها مع زوجها !! انا ايضا لم يقنعنى ان الزوجه وصلت فقط لحافة الخيانه و تراجعت فى آخر لحظه .. حركه جبانه من المؤلف لا تتفق مع شجاعته السابقه خصوصا انها غير مقنعه و مشكلتها ظلت كما هى لم تحل .. ولكن المؤلف يمكن ان يقدم لنا زوج خائن تسامحه زوجته لكن امراه خائنه يسامحها زوجها كان الجمهور دبدب ومعاه حق فيها لكنها لا تتسق مع الفيلم فى رايى .. وده بيقود لنقطه اخرى اثارت انتباهى .. هو الخيانه فعل محدد اذا لم يتم يبقى كله عال العال و فى السليم !! لماذا افترض المؤلف ان الزوجه يمكن اعتبارها زوجه مخلصه .. فى رايى الشخصى الموضوع مش فارق كونها تراجعت او لم تتراجع ..

عى فكره ملحوظه بخصوص الراقصات و تجميلهن .. معظم افلام الصيف كما شاهدت فى الاعلانات التى سبقت الفيلم وبما فيها فيلم سهر الليالى نفسه فيها فتاة ليل خفيفة الظل !! قد تكون من العوامل المساعده فى انصلاح الاحوال وعلى اضعف تقدير هى شخصيه لذيذه بتضحك !! مش فاهمه ايه النظريه الصراحه ..

عجبنى الموسيقى التصويريه للفيلم و كذلك اماكن التصوير وطبعا غنوة فيروز .. لكن يمكن لان الفكره طغت على كل شئ آخر لم اعلق عليهم ..

عذرا لطول الرد :)

[wa7d]

التدخين ... كل الممثلين في الفيلم ماعدا مني زكي طلعوا بيشربوا سجاير

لم أرى فيلم سهر الليالى ، لكن مسألة التدخين دى فى كل الأفلام المصرية وهى طبعا مقصوده ولم تحدث كده صدفه . وأظن إن شركات السجائر تدفع للمنتج حتى يفعل ذلك . لأن ظهور البطل وهو يدخن سجائر يضع فى ألاّ وعى عند الشباب أن يفعل مثله . وقد مَنعت الدول الراقية ذلك فى الأفلام . ياريت يمنع أيضا فى الأفلام المصرية .

[Lancelot]

نقد رائع يا أخت فيـــــــــــــــروز .... أمامك مستقبل كبير إن شاء الله .. و ده رأي من لانسلوت "عن السينمائيين في المنتدي" ...

نحن نتفق في نقاط كثيرة في الفيلم ... لكن فيه نقطة عايز أركز عليها ... ليه الراجل مسموح له إن يخون مرأته في حين إن مرأته مش مسموح لها .... مش قصدي مسموح لكن قصدي ممكن نسامحه و نقول غلطة و عدت ... بنكون أقرب للتسامح مع الرجل أما الست فلا و ألف لا .... و الدليل علي كلامي إن خالد أبو النجا غلطت أما جيهان فاضل فتراجعت في اللحظة الأخيرة ... و مع هذا خرجنا من الفيلم شاعرين بالسعادة لعودتهم سوا و لا أكن حاجة حصلت ... طالما الفعل واحد يبقي لازم رد الفعل يكون واحد ... أنا عارف إن الموضوع ده ملوش أخر و مش هنخرج منه بفايدة لكن أنا حبييت أركز علي النقطة ديه ... لأنها بتفرسني أوي ....

[فــيــروز]

الاخ واحد :)

اعتقد فعلا الموضوع قد يكون داخل فيه الاعلان لان على ما اذكر علب السجاير كانت واضحه نوعا ما فى الفيلم .. ولو ان حتى لو شركات السجائر لم تدفع للاعلان عن منتجها فى الفيلم كانوا طبعا هيشربوا سجاير مستورده !! هيشربوا سجاير فرط مثلا ولا سوبر !! هاهاهاها :) مع خالص تشجيعى للمنتج المحلى :) بس مش السجاير ..

لانسلوت نقيب السينمائيين

ده شرف كبير يا فندم اللى خلعته عليا ده :)

بخصوص الخيانه بقى طيب ما ده رايى بردو .. انا قلت لصاحبتى واحنا فى السينما "ختى بالك ان المؤلف اظهر الزوج خائن و الزوجه لم تخن و رغم كده كله سعيد و مبسوط" !! ده حتى احساسنا كمشاهدين ان الزوجه قالت فى سرها اما زوجها صارحها بخيانته "خلاص كده نبقى خالصين ويا دار مادخلك شر" !! الامر الغير حقيقى على الاطلاق :(

الخيانه فعل قبيح سواء كان مرتكبه رجل او امراه لكن المؤلف لا يستطيع ان يتجاوز هذا الخط اطلاقا .. لان مجتمعنا متسامح و حبوب فيما يتعلق بانحراف الرجل لدرجة ان البعض قد يراه مدعاه للفخر و السعاده "الواد كبر يا زينب" !! والنقاد قد لا يتحدثون صراحة فى هذه النقطه باعتبارهم ينظروا للعمل الفنى نظره تختلف عن نظرة المشاهد .. لكن المؤلف مايقدرش الا انه يغازل تفكير المتفرج فى بعض المواضيع التى توضع تحت لافتة "لا مساس ولا مساس"

على فكره : قبل ما حد يفهم انى بانادى بالمساواه بين الرجل و المراه فيما يتعلق بالخيانه .. تلاته بالله العظيم ده مش قصدى خالص .. القصد ان ننظر للفعل الواحد نظره واحده وباحتقار واحد بغض النظر عن مرتكبه

[Lancelot]

نقيب للسنمائيين مرة واحدة ... لا كتير عليا .... و بعدين أنا أخاف علي اللقب ده و ناقدة بارعة زيك موجودة ... "شغل إنتخابات علي وشك أن يبدأ"

على فكره : قبل ما حد يفهم انى بانادى بالمساواه بين الرجل و المراه فيما يتعلق بالخيانه .. تلاته بالله العظيم ده مش قصدى خالص .. القصد ان ننظر للفعل الواحد نظره واحده وباحتقار واحد بغض النظر عن مرتكبه

علشان كده قلت ...

طالما الفعل واحد يبقي لازم رد الفعل يكون واحد ...

نفس نظرتك للزوجة الخائنة لازم تكون للزوج الخائن ....

[الطفشان]

بخصوص جزئية اختلاف نظرة المجتمع لنفس الفعل من الرجل و المرأة

مثلا

خطأ الشاب يمكن يغتفر و لكن البنت لأ

او القاء لوم الاغراء على البنت و اعفاء الشاب من الوقوع في الاغراء

مع ان الشرع جعل المسئولية على الاثنين و العقوبة متساوية

ناقشنا هذا الموضوع بالتفصيل من شهور، و كان فيه حوار جيد

و لكن لا يحضرني العنوان

فارجو من يتذكر ان يرفع الموضوع للاستفادة و التذكير

[Sherief AbdelWahab]

"الوجه الجديد" فيروز:

كتب العبد لله في مداخلة سابقة:

بما أنني لا أحب النقد الذي يبنى على تصوير تقديم أي شيء بأنه دعاية له

و قمتي بالتعقيب عليه قائلة:

بالقطع انا لم اقصد ان اقوم باى دعايه للفيلم

لم أقصد إطلاقا ما قلتيه...أنا أعني أن بعض حبايبنا الحلوين من النقاد الصحفيين يتصيدون الأخطاء لبعض الكتاب غير المرضي عليهم ...فإذا قدم أحد هؤلاء الكتاب رجلا يتزوج بأكثر من إمرأة اتهموه بالتحريض على تعدد الزوجات...و إذا قدم شخصية متطرف اتهموه بالدعاية للتطرف و هكذا...عدد كبير من النقاد يكتبون بتلك الطريقة...

وصلت؟

عموما سعيد بوجود أكثر من ناقد سينمائي هنا...

خلص الكلام

[tiger1411]

كالعاده اتجه النقاش الى النواحى الفنيه والتأليف والاخراج والاعلان

وتجاهل الجميع الفكره الرئيسيه التى يروج لها الفيلم وهى تجسد

نموذج انحلال اخلاقى وفساد غير مقبول اطلاقا

وهو عيش شاب وفتاه معا بدون زواج

واظن ان هذا الفيلم هو البدايه وسوف يكثر ظهور هذا النموذج

فى افلام تاليه حتى يتقبله الشباب ثم يتجه لتقليده

كما حدث فى الزواج العرفى الذى استشرى مؤخرا

[Lancelot]

مواضيع متعلقة بنقد الفيلم ....

"فيلم فاضح"

http://www.egyptiantalks.org/bforums/viewt...opic.php?t=7175