قولنا اغرب ما صادفك .. فى غربتك او حتى فى داخل وطنك

[goold]

ممكن تقولنا اية اغرب شئ صدفك فى غربتك

زى عادة غريبة فى البلد المقيم فيه

أو

اكلة غريبه عن اكلنا المصرى

او

لبس غريب

او .. او

[White heart]

فكرة جميلة يا goold ،

و مشاركه منى فى موضوعوك يحضرنى هنا تقليد موجود لدى الألمان،

و هو خاص بما يمكن تسميته لدينا بال "نجار المسلح"؟

Zimmerman، اما التقليد فيطلق عليه لديهم:

Richtfest

هذا التقليد يعود تاريخة تقريبا الى عام 1200 م، و يقوم به هؤلاء النجارين بوضع شجرة و يقوموا بتزيينها بشرائط ملونة على سطح المنزل بمجرد انتهائهم من عملهم فيه، و هو نوع من انواع الشكر الى الله على انتهائهم من عملهم بدون وقوع أى خسائر او مكروة خلال عملية بناء هذا المنزل...

انهم يعتبروة ايضا نوع من التعبير على "فخرهم" بمهنتهم، و سعادتهم بانتهاءة و كذلك كشكر الى اصحاب المنزل ممن أعطوا لهم هذا العمل و للمهندس المعمارى....

بوضعهم هذة الشجرة يتمنون ايضا كل الحظ الى هذا المنزل، و ان ينعم كل من يدخل و يخرج منه بالحماية و الأمان..

خاصة انه هناك بعض بعض الأقوال التى يرددونها فى اثناء هذا الأحتفال:

Richtfest

[فــيــروز]

طيب و اللى جوه مصر يعمل ايه :(

كده مش هاعرف اشترك فى الموضوع ده يا جولد يا جميله

وش واحده مكبوسه اوى :(

[farasha79]

انا من امبارح عماله افكر يا جولد مش لاقيه عاده غريبه بس هو اكيد في و انا مش واخده بالي

بالنسبه للاكل اكيد كل بلد ليها اكلاتها و اشهر اكله معروفه هنا طبعا المجبوس ( مجبوس دياي على رأيهم )

قصدهم مجبوس دجاج و طبعا لذيذ جدا ب لا تسألوني على الطريقه لان فيها مليون حاجه..

[se_ Elsyed]

( مجبوس دياي على رأيهم )

..

على فكره يا جماعه فى الكويت بينطقوا الـ ج على أنها ي علشان كده شفطوا الجيمين اللى فى دجاج وبقدرة قادر بقت دياي ( ولله فى خلقه شئون )

[farasha79]

ايوه ايوه يا سي السيد والله انت خاليك معايه كده وشك بشوش و بيخليني افتكر

فعلا هنا حرف الجيم في الكلام بيكون ي ..

يعني لما احب اقول يوم الجمعه ( جايه من دمعه)(دمعه باميه )

دجاجه .....ديايه ( فى النطق بس و ليس في الكتابه فقط)

عموما دي مش تريقه طبعا

بس فعلا اعتقد مافيش دوله تانيه بينطقوا الجيم ياء

[goold]

طيب و اللى جوه مصر يعمل ايه :(

كده مش هاعرف اشترك فى الموضوع ده يا جولد يا جميله 

وش واحده مكبوسه اوى :(

شكرا يافيروز

لكن العنوان بيقول ( قولنا اغرب ماصادفك فى غربتك او داخل وطنك )

يالا بقه شاركى لان الواحد بيقبله غرائب كثير فى اى مكان كان

يعنى على سبيل المثال أنتى راجعه من مصر تقولى اصحابها ( ال من الريف ) بيذكروا لها اسماء اكلات غريبة احنا المصريين مش عارفنها او عادات اخرى بتوع المدن مش بيعرفوها او يهتموا بها ..

[goold]

ياسلام عليك ياويت

انت دايماً كدة تجى بالمفيد

ده عادة جميلة فعلاً ..

بالنسبة للأكل يافراشتنا

فى اكلة كويتية أسمها بلاليط

هى عبارة عن شعرية محمرة وعليها سكر + قرص بيض رقيق فوقها بس طبعا علية ملح ويأكل البيض مع الشعرية .

هو عندنا فى مصر بنعمل الشعرية بالسكر بس بدون قرص البيض

تقريبا معظم المصريين مش بيعرفوا يكلوا اكل بسكر وملح فى آن واحد

[فــيــروز]

طيب على بال ما افتكر حاجه مصريه غريبه حبيت بس اقول انى لو قلت لحد كلمة دياى -قصدى دجاج يعنى- زى ما بتتنطق فى الكويت هيقول عندها لدغه فى الجيم يا عينى .. طبعا دى مش تريقه بس حاولت انطقها لقيتنى باضحك .. صباح جميل عليكم كلكم :)

[amir]

.. صباح جميل عليكم كلكم :)

صباحك أيمل ( أجمل )

[goold]

:) حلوه .. عموماً صباح الانوار

بالمناسبة افتكرت وحدة وانا صغيرة بتتخانق معاى وهى لدغة وانا كنت رفيعه اوى وانا صغيرة فقالت : اية انت هتقولى عليه اوفأعه :lol:

المسيبه ان كان عندها اخ اسمه ابياهيم ( ابراهيم ) واخت اسمها انده ( رنده ) بس انا بحب الناس ال عندهم لدغه اوى

بحس ان الحديث معاهم بيتقلب ضحك دايماً وفرفشة :lol:

[ابو حلاوه]

الحقيقة انا قابلتني هنا مواقف كثيره غريبة

اولها اول يوم لي في البلد حيث وجدت ملصقات علي الحوائط و علي اشارات المرور مكتوب عليها .. هنا ليست فرنسا .. نعم للاستقلال

و كان دافع لي لأن اقرأ تاريخ المقاطعة التي اعيش فيها بتمعن بالرغم من انني بذلت مجهود لقرأءة تاريخ فرنسا قبل مجيئي للاقامة هنا و لكن اكتشفت ان هناك الكثير ممن يتم غض النظر عنه في التاريخ او تناوله بسرعه .......حتي في فرنسا يا جدعان !!!!!

الشئ الاخر عند حضوري دعوة لزواج صديق و صديقة من العمل و كان هناك دي جي و لكن العادة ان يغني المدعوون و الحقيقة بعد الحاح قمت بافتتاح الغناء لأغنية لحكيم .. ناسي ناسي ناسي حبي و اخلاصي .. و طبعا لان اللي ما يعرفش يقول خل .. حصلت علي اعجاب و تهليل من الحاضرين .. اللي اتخضيت منه ان معظم المدعوات تركوا مقاعدهم و تقدموا ناحيتي في صف طويل لتقبيلي و اتضح ان دي العادة... مكافاءة علي التبرع بالغناء

و طبعا كان لي عدة تعليقات

لا بلاش انت يا تيته

ممكن بعد البوسة دي حضرتك تقفي في الصف تاني

للاسف كل الافراح التي حضرتها بعد ذلك كنت متزوج ..و السيدة ام حلاوه رفيقة الكفاح بجانبي.... و كنت اكتفي بالمشاهده و الجلوس في مكاني و علي وجهي ابتسامة الزوج الاليف

[amir]

و علي وجهي ابتسامة الزوج الاليف

( وش واحد أليف برضه بس مش بمزاجه )

[فــيــروز]

و علي وجهي ابتسامة الزوج الاليف

( وش واحد أليف برضه بس مش بمزاجه )

وش واحده بتضحك بخبث و شماته

[se_ Elsyed]

.. اللي اتخضيت منه ان معظم المدعوات تركوا مقاعدهم و تقدموا ناحيتي في صف طويل لتقبيلي و اتضح ان دي العادة... مكافاءة علي التبرع بالغناء  

دي أسمها النقطه يابو حلاوه .... يا ســــــــلام ياما أنتوا متهنين يا مطربين فرنسا ..

مش عندنا الواحد يخلص الوصلة بتاعته يلاقى البيض والطماطم نازل زي المطر عليه .

( وش جعوره مطرب الأخبار المشهور )

[White heart]

ولنبق فى المانيا، وقد اعجبنى هذا التقليد الغاية فى البساطة و هم حريصون علية منذ القدم....

اول يوم يذهب فية الطفل الى مدرسته...

مصحوبا بوالدية او احداهما و قد حمل حقيبة مدرسته و ال Schultuate

و هو عبارة عن قرطاس كبير ملون ملئ بالحلوة مهدى من والدية او احد اقرباءة المقربين كنوع من تهنئة الطفل و تشجيعة...

[se_ Elsyed]

- أول حاجة غريبة قابلتني هنا فى السعودية ، ماكنتش أعرف فى الأول أن كل المحلات بتقفل ساعة الصلاه فأول يوم ليه فى الشغل ماكنتش أكلت حاجة من الصبح ودخلت مطعم ولسه بأمد أيدي أكل جاءوا العاملين فى المطعم علشان يخرجونا نصلي العصر ... طبعاً أنا ماكنتش قادر انا وزمايلي من الجوع وأصرينا أن أحنا نأكل الأول وفعلاً قفلوا علينا وراحوا صلوا .. بعد كده الواحد بقى يظبط نفسه على مواعيد الصلاة.

- ثاني موقف هو أن كتير من الخليجيين بياكوا فى المطاعم بأيديهم ( من غير ملاعق ) .. طبيخ ، أرز .. أى حاجة .... فالواحد ماشافش كده فى مصر فكانت حاجة غريبة نسبياً .

- حاجة تالتة ، بالنسبة لأسواق الدهب فى السعودية حاجة غريبة جداً ... كثيراً منها يعرض حاجات خزعبلية من المشغولات الدهبية .. مثل قميص نسائي ( زي الصديري كده ) كله دهب ... حزام وسط دهب .. حاجات كده بتتلبس زي العقد تيجي اتنين كيلو ولا حاجة .... وقولت لنفسي ناقص يعملوا جلاليب وفساتين دهب خالص. يعني الواحد متعود أنه يشوف خواتم ، كوليهات ، أساور .. لكن الأحجام دي أبداً ماشفتهاش غير هنا.

- حاجة أخيره وهي أختلاف الأستعمالات اللغوية لنفس الجمل اللى مستخدمه فى مصر ...

على سبيل المثال كنت أسمع من ناس أصدقائي سعوديين يقول " يا س س أنا زعلان عليك " فكنت أسأل نفسي ليه يعني أنت زعلان عليه وأنا مش زعلان على نفسي .. أتاري زعلان عليك = زعلان منك .

يقولك بأتصل على فلان .. فى حين أحنا فى مصر بنقول بأتصل بفلان.

ومفردات تانية كتير لما أفتكرها هأقولهالكم.

[White heart]

الفاسكينج كارنيفال او schmutziger Donnerstag

هل ترتدى كرافتة (رابطة عنق) في المكتب عادة ؟

فان كنت ممن يرتدونها فأحذر يوم "الخميس المتسخ" او "شمتزيجر دونيرستاج" حيث قامت احداهن بقص نصف كرافتتى!!!

اذ ان ربطات العنق رمز ذكري نموذجي . و نساء "الشمتزيجر دونيرستاج" و معهن المقصات . يريدون تخفيض ربطات عنق الرجال و هذا كناية او رمز لأنتهاء سيطرة الرجال!!

بالتأكيد السيدات في المكتب يردن تخفيض روابط عنق زملاءهم .

و لهذا يرتدى الرجال فى هذا اليوم خصيصا "كرافتات" قديمة نوعا ما، مشاركه منهم بهجه و متعة هذا اليوم!!

و وراء هذة الدعابة او العادة قصة طريفة....

فى ألمانيا خمسة فصول . الفصل الخامس هو فصل احتفال ال: فاسكينج, فاسنيت, فاستناتشت, كارنيفال, هناك أسماء مختلفة له لكنهم جميعا يقصدون نفس الشيء . هنا أريد وصف ماذا يحدث ....

يعتقد البعض ان هذا الاحتفال يرجع الى عهود قبل الميلاد حيث كان يعتقد الناس فى هذا الوقت بتحكم الشياطين فى الفصول المختلفة!!

و ان بعضهم احتفظ بفصل الشتاء، و كان الناس يضيقون بهذا الفصل المظلم البارد، و بأنه لابد من ايجاد وسيلة ان يغادر الشتاء ...لكن كيف؟

يجب اخافة هؤلاء الشياطين حتى يغادروا و يغادر الشتاء معهم !! و ذلك عن طريق أرتداء اقبح و ارعب ما يمكن من ملابس، و يقيموا حفلات راقصة مخيفة مستخدمين ادوات عالية!!!

هذة هى احدى نسخ ماهية هذا الاحتفال و هذه النسخة القديمة جدا هى من يعتقدون بها في سويسرا و في جنوبي ألمانيا ( أكثر نحو ألبين-ريجيونز ) . هذه الطريقة التقليدية للاحتفال تسمى "فاسنيت أليمانيسك" . المواكب في كثير الأماكن الألمانية الجنوبية, على سبيل المثال في روتفايل و في باسل ( سويسرا ) .

اذا كنت تقيم فى المانيا فالأحتفال يشتهر بأزياءة و ينقسم الى احتفالين واحد يبدأ بعد الظهر و هو للأطفال و الأخر فى المساء للبالغين!

و الأيام الرئيسية لأحتفال الأزياء هى الستة أيام الاولى حتى نصل الى اليوم السابع و هو ما يسمى ب"فاسكينجز-دينستاج "..

اليوم الأول يطلق علية "شمتزيجر دونيرستاج" او "الخميس المتسخ"!!

في هذا اليوم النساء يطلبن المفاتيح من المدينة و يحصلون عليها و يحكمن المدينة حتى أول أيام الصوم الكبير!!

و بروجرام هذا الاحتفال الأسبوعى يبدأ كما قلنا بيوم "الخميس المتسخ" او"شمتزيجر دونيرستاج" , يوم الجمعة, يوم السبت, يوم الأحد و يوم الإثنين ويسمى بال( روزنمونتاج ) . يذهب بعض النّاس من احتفال الى اخر و لمدة أسبوع بالكامل . معظم البارات, النّوادي, و مطاعم كثيرة تزين خلال هذه الأيام !!

وعادة عطلى نهاية الأسبوع السابقين ليوم الأثنين هذا هى ايام للأحتفال بذات المهرجان و لكن فى مختلف مدن الولايات الألمانية..

ليس لدى الأطفال عادة أي مدرسة يوم الإثنين و يوم الثلاثاء .

و مهرجنات الأطفال تنظم في كل مكان . لدى مهرجان المدارس, الأطفال يجيئون بالأزياء المميزة إلى الحضانة,كذلك فى مراكز التسوق و في مناطق المشاة فى وسط المدينة .

فى مدن كثيرة تغلق المحال بعد الظهر لهذة المناسبة...

و بالطبع كل مدينة تشتهر بأغانيها و كلماتها الخاصة بها فى اثناء تلك المهرجانات!!!

[فــيــروز]

مع اعجابى الشديد بكل ما ورد فى هذا الموضوع الا انى اريد ان اوجه تحيه خاصه للاخ وايت هارت على مختاراته الجميله جدا .. انت بتجيب الحاجات الحلوه دى منين --> وش مبسوط جدا :)

[se_ Elsyed]

مع اعجابى الشديد بكل ما ورد فى هذا الموضوع الا انى اريد ان اوجه تحيه خاصه للاخ وايت هارت على مختاراته الجميله جدا .. انت بتجيب الحاجات الحلوه دى منين --> وش مبسوط جدا :D

تصدقي يا فيروز إنا شاكك فى إن وايت هارت يكون بيشتغل مصوراتي على النيل .