قولنا اغرب ما صادفك .. فى غربتك او حتى فى داخل وطنك

[White heart]

فــيــروز كتبت:

مع اعجابى الشديد بكل ما ورد فى هذا الموضوع الا انى اريد ان اوجه تحيه خاصه للاخ وايت هارت على مختاراته الجميله جدا .. انت بتجيب الحاجات الحلوه دى منين --> وش مبسوط جدا

يا ستى كتر خيرك على المجاملة الرقيقة دى....

العملية بسيطة خالص .... ابقى تعالى صيفى عندنا و انت تشوفى العجب العجاب.....

[فــيــروز]

مع اعجابى الشديد بكل ما ورد فى هذا الموضوع الا انى اريد ان اوجه تحيه خاصه للاخ وايت هارت على مختاراته الجميله جدا .. انت بتجيب الحاجات الحلوه دى منين --> وش مبسوط جدا :)

تصدقي يا فيروز إنا شاكك فى إن وايت هارت يكون بيشتغل مصوراتي على النيل .

تنهيده عميقه .. النيل .. يا ريت .. لو النيل خد فرصه وعومل بما يستحق من اجلال و تقدير و عنايه كان فعلا اتاخد عليه صور رائعه و جميله .. بس فعلا اكتر شئ بيلفت نظرى فى مشاركات وايت هارت الصور الجميله الملحقه بالموضوع .. مبهجه جدا -->> وش مبتهج عالآخر :)

[فــيــروز]

يا ستى كتر خيرك على المجاملة الرقيقة دى....

العملية بسيطة خالص .... ابقى تعالى صيفى عندنا و انت تشوفى العجب العجاب.....

لا مش مجامله والله :) اصيف عندكم فين !! حضرتك عايش فين طيب؟ شكرا على الدعوه الجميله ربنا يخليك :)

[White heart]

se_ Elsyed كتب:

إنا شاكك فى إن وايت هارت يكون بيشتغل مصوراتي على النيل .

ياريت يابو السيد اهو كان زمانى موجود دلوقتى بين أهلى و اصحابى، ومديها أكل ترمس و ...... حواوشى..

بس يا خسارة White heart بيعشق الألوان!!!

كان ممكن أفضل و ابقى يمكن زى ما بتقول مصوراتى على النيل...

لو كان النيل بقى زى ما هو زمااااااااااان .... فاكر؟؟

بس يا خسارة .... ما بقاش !!!!

بس لسة عندى أمل فى بكرة اللى جاى.... ادعى معايا...

[White heart]

فــيــروز كتبت:

لا مش مجامله والله :) اصيف عندكم فين !! حضرتك عايش فين طيب؟ شكرا على الدعوه الجميله ربنا يخليك

شوفي يا ستى طالما بنتكلم عن المانيا وما حولها و طالما احنا فى الصيف تبقى تيجي او (تيجوا) تصيفوا عندنا، يخش الخريف و تلاقينى بتكلم عن الدنمارك او السويد تبقى تشرفينا هناك، لما يهل الشتاء و تلاقينى بتكلم عن اسبانيا او البرتغال يبقى تنورينا هناك، اما الربيع فأعتقد انك هتأنسينا فى فرنسا و ما حولها أو براغ !!!!

فالحمدلله فى كل بلد لينا بيت و باب مفتوح....و يجعلة عامر.

و ربنا يخليكى لينا يا رب.

[فــيــروز]

شوفي يا ستى طالما بنتكلم عن المانيا وما حولها و طالما احنا فى الصيف تبقى تيجي او (تيجوا) تصيفوا عندنا، يخش الخريف و تلاقينى بتكلم عن الدنمارك او السويد تبقى تشرفينا هناك، لما يهل الشتاء و تلاقينى بتكلم عن اسبانيا او البرتغال يبقى تنورينا هناك، اما الربيع فأعتقد انك هتأنسينا فى فرنسا و ما حولها أو براغ !!!!

فالحمدلله فى كل بلد لينا بيت و باب مفتوح....و يجعلة عامر.

و ربنا يخليكى لينا يا رب.

ما شاء الله ما شاء الله .. هى دى الكلمه اللى كنت هاقولها اول ما قريت الرد و لقيتك قلتها بالفعل :) يجعله عامر ان شاء الله

[Salwa]

اغرب حاجة والا اغرب حاجات كتير......

اغرب حاجة صادفتنى هنا اول ماجيت .......برضه........كنت معزومة على فرح ...// رغم ان اللى حاحكيه لكم تقليد بدأ يندثر هنا //

وطبعا احضرنا قبلها هدية للعروسين ...ووضعنا لهم نقود فى حسابهم كما طلبوا ....

والفرح كان بالنهار ...فى الكنيسة ....ثم غداء فى مطعم مشهور ...وبعد الغداء لف العريس والعروسه على المعازيم بصينية عليها هدايا للمعازيم علبة سيجار هافانى للرجل وايشارب حرير طبيعى للمرأة......آه نسيت اقوللكم ....قبلها اصحاب العريس هجموا عليه واخدوا منه الكرافت وقصقصوه قطع صغيرة بعدد المعازيم ...

وبعدها اصحاب العريس يلفوا على كل المعازيم يعطوا كل واحد قطعة من الكرافات والمعزوم يضع فى الصينية ...اللى طالع من زمته...

واصحاب العريس يضعوا النقود فى زجاجة شمبانيا فاضية ...واحدة من اللى فضيوا ..

ولما العريس يروح بيته .....يكسر الزجاجة ......وياخد الفلوس .

دى حاجة ......

تانى حاجة ........كل ده حصل من اكتر من 26 سنة .....عمر تانى..

مرة كنا معزومين فى مدينة صغيرة بجانب برشلونة تسمى ليريدا ..عند احدى العائلات الصديقة لنا ...وكان هذا اليوم عيد قومى ...ولم نكن نعرف .....لان هنا كل مدينة لها اعيادها القومية ...

والمهم ان الناس الصراحة احتفلوا بنا احتفال عظيم وكانوا فرحانين اننا ذهبنا نرد الزيارة ........وقالت المرأة صاحبة المكان انها محضرة لى مفاجأة ....

وعند ميعاد الغداء قدمت سلطات ...ثم احضرت صينية يادوب لسة طالعة من الفرن ..وقالت اجمل حاجة لسلوى ..

وكانت قواقع شجر ....................مش قواقع بحرية ..

بجانب صلصة ال ..آل اى اولى ....الاسم بالكتلان ..اى الثوم والزيت.

وكان يوم .....

طبعا لم ااكل ....

بس المشكلة كانت ......ازاى اقوم من على السفرة بدون احراج..

اكتفيت بالسلطة ...

وقلت اعلم انه من آداب المائدة ان اظل حتى ننتهى جميعا من الطعام ولكنى لا استطيع رؤية القواقع ....وتفهموا الوضع ...وكان يوم..

من اغرب المواقف .واجملها على الاطلاق....

تنسيق شوارع كاملة بالزهور .....اشكال ورسومات رائعة ...

ايضا اعياد سان فرمين فى بمبلونا ..

لسة منتهية بقالها يومين .......

وهى ان تجرى الثيران فى الشوارع ويجرى الناس امامها ......

ولمدة ثمانية ايام البلد كلها ترتدى اللبس الابيض وتضع حول العنق المنديل الاحمر ..

يشربوا وياكلوا فى كل مكان طيلة ال24 ساعة .....

اهل بامبلونا يقولون ان الاعياد ليست فقط جرى امام الثيران ولكن لها معانى كثيرة ..

وهم يعتقدوا ككل الباسك ان اعيادهم خاصة بهم فقط ...

وزى الباسك مفيش.....تمام زى الكتلان مابيقولوا زى الكتلان مفيش وايضا من اغرب الاشياء التى رأيتها ..تقريبا فى اغلب مناطق اسبانيا ..

شباب القلاع ...وكنت قلتلكم عليهم قبل كدة ...وهم اللى يتسلقوا فوق بعض ويعملوا زى برج بشرى او ابراج بشرية ...

آسفة للاطالة ......

سلامى.

[goold]

والله ياست سلوى امتعتينى بما ذكرتية واشكرك

[se_ Elsyed]

بمناسبة الأفراح

الأفراح هنا فى السعودية غريبة جداً ، اول مره اتعزمت فى فرح كان معمول فى قاعة فخمة جداً وروحت وأنا فى بالي الأفراح اللي عندنا فى مصر ، المهم روحت الساعة 10.30 مساءاً سلمنا على أهل العريس اللى كانوا مصطفين بره القاعة - زي العزاء بالظبط فى مصر - وقعدنا فى قاعة كبيرة جداً وجم الجرسونات قدمولنا عصير ، مافيش 5 دقائق فتحوا القاعة بتاعت الأكل .. أكلنا فى حوالي 20 دقيقة وقولت أنا هأخرج للقاعة بتاعت الجلوس أحبس الأكل ده بواحد شاي أو قهوه ونكمل الفرح ، لقيت كل الناس بيخرجوا من الباب اللى على الشارع وبيروحوا وبكده خلص الفرح .. وصلت لعربيتي وفضلت مبلم أنا وأصحابي نبص لبعض ... أتاري الأفراح هنا للستات بس ، يعني الرجالة يروحوا يأكلوا ويخلصوا على 11 او 12 بالليل ويتكلوا على الله .

يبدأ بقى الفرح والدلع الحقيقي الساعة 1 أو 2 بالليل فى حضور الستات فقط ومعهم العروسه ويفضلوا يتمنظروا قدام بعض بأحدث خطوط الموضه من ملابس ومجوهرات وموبيلات وبتيجي فرقة موسيقية كلها ستات برضوا يفرفشوا لحد الصبح ، وييجي العريس المسكين اللى بيكون فى الفترة ما بين أنتهاء فرح الرجالة لحد الفجر قاعد على القهوة أو فى أي حته مستني عدله يدخل القاعة يقعد شوية مع عروستة على الـ Stage وفى نفس الوقت يقفلوا النور على الستات اللى قاعده فى القاعة علشان هما يشفوه وهو مايشفهمش .. كام دقيقة كده ويقوم واخد عروسته ويمشي والستات تكمل الفرح الغيابي إلى الصباح.

وممنوع أصطحاب الأطفال ، وكل واحد من الرجالة الغلابة يوصل مراته للفرح وييجي الصبح ينده فى ميكروفون محطوط بره القاعة علشان يبلغها أن المعلم حنفي جه يالا أطلعي علشان نروح .

من ساعتها حرمت أروح أفراح تاني ده أنا أكرملي أتعشى فى بيتنا ولا أني أخبط مشوار محترم علشان نص ساعة اكل وأروح.

[goold]

بس على فكرة ده حاجة حلوة اوى انت بقه مقولتش ال بيحصل داخل الفرح الستاتى ده ..

هو انا دخلت الفرح لقيت الستتات ال لبسين اسود فى اسود ولا حتى وشهم باين يدخلوا على القاعه ويخلعوا العباية والحجاب وتلاقى ارقى ملابس السهرة والشعر السايب والرقص المصرى بتاع فيفي عبده والرقص الخليجى وحتى السمسمية وكل حاجه بصراحة شئ ومرتب وايه تسابق مين تظهر شطارتها .

بس ترجع راسك هتنفجر من الدوشة

[se_ Elsyed]

بس على فكرة ده حاجة حلوة اوى انت بقه مقولتش ال بيحصل داخل الفرح الستاتى ده ..

هو انا دخلت الفرح لقيت الستتات ال لبسين اسود فى اسود ولا حتى وشهم باين يدخلوا على القاعه ويخلعوا العباية والحجاب وتلاقى ارقى ملابس السهرة والشعر السايب والرقص المصرى بتاع فيفي عبده والرقص الخليجى وحتى السمسمية وكل حاجه بصراحة شئ ومرتب وايه تسابق مين تظهر شطارتها .

بس ترجع راسك هتنفجر من الدوشة

أيوه يا جولد جرجريني فى الكلام علشان ألبخ وتمسكوها عليه ... ما أنا عارف اللي بيحصل بالتفصيل ( بس كاتم فى قلبي ) .. الحمد لله ياختي أحنا بنروح نأكل وبس وأي نعم بيكون شعرنا سايب بس من غير رقص .

[White heart]

من ضمن التقاليد الطريفة لدى المان الجنوب، تقليد يتبعه بعض الشباب و هو عندما يقع الشاب فى حب فتاة، و كتعبير عن حبة هذا، يقوم بعد منتصف ليلة 30 من ابريل، بزرع شجرة فى حديقة منزل هذة الفتاة، واذا كانت تسكن فى شقة فيكتفى بقصيص شجرة صغيرة، و هو ما يعنى اعلانه لهذة الفتاة و اسرتها بحبة لها، او رغبته فى ان يصبحوا Coupels، لا أعلم تماما لماذا يجب ان ترى هذة االفتاة الشجرة فقط فى ال1 من مايو، و اذا ما كان وراء هذا التقليد قصة ما، ولكن سأحاول التقصى لمعرفة المزيد...

[yasser6666]

اغرب مارأيت في البلد دي هو مراسم العزاء ..وطبعأ كلنا نعرف ان الايرلنديين يحبوا موت شرب الخمور والبيرة ومشروبهم الايرلندي المفضل (Guiness)جينيس....مشروب لونه اسود وهو كحولي طبعأ ويشبه العسل الاسود بتاع مصر والله اعلم طعمه عامل ازاي ...المهم ان الشئ الاساسي عندهم في الاجازات هو الشرب حتي الثمالة وتلاقيهيم جايين يبدأوا الاسبوع يوم الاتنين ورائحة الخمور تفوح من معظمهم والاخيب من كده انهم بيتفاخروا ويحكوا لبعض شربوا اد ايه في الويك اند... وانا اتعجب من الارقام اللي بيقولوها ..يعني اتناشر زجاجة بيرة في ليلة واحدة (طب ليه .انتحار !!) .المهم اغرب مالقيت هنا هو مراسم العزاء كما قلتلكم وافتكر من كام سنه ابو واحدة زميلتنا مات وكان راجل محبوب جدأ من اسرته واصحابه ...مشينا لمكان اعداد الصندوق وكله يدخل يكلمه ويقبله وهو في صندوقه ويترك له شئ بجانبه (لقيت بجانب الجثة زجاجة جينيس والله...وطبعأ حاجات تانية كتير) وبعدين نروح للكنيسة ويصلوا عليه وبعدين المدافن ..........وبعد المدافن هو مااتعجب له الناس بيتفقوا حيتقابلوا فين وكله بيركب عربيته وجري علي (pup-الحانة) والكل لازم يروح اطفال ونساء ونفس الناس اللي حضرت العزاء بالكامل وكله يشرب ويضحك ويهيص ويلعب بلياردوا وعاشوا جو تاني خالص ....انا لساني دلدل وبقيت مش فاهم حاجة ....بس عرفت بعد كده ان ده الطبيعي بعد كل عزاء ..ايه رايكم بقي ??????????

[فــيــروز]

وكله يشرب ويضحك ويهيص ويلعب بلياردوا وعاشوا جو تاني خالص

يعنى هما مش بيزعلوا اما حد يموت ولا ايه الموضوع !! مش فاهمه

[amir]

وكله يشرب ويضحك ويهيص ويلعب بلياردوا وعاشوا جو تاني خالص

يعنى هما مش بيزعلوا اما حد يموت ولا ايه الموضوع !! مش فاهمه

و يزعلوا ليه ؟؟ واحد و مات ( مش اخونا العزيز واحد بعد الشر عليه )

دى ناس عمليه و عارفه أن الموت علينا حق يبقى ايه لازمة البكاء و النواح

و بعديـن من الاخر كده هم فرحنين بالميراث اللى حيجلهم .. يكذبوا يعنى ؟؟

[yasser6666]

لا .للامانة اقول انهم فعلأ بيزعلوا لكن زعلهم من نوع تاني غيرنا .يعني مش صويت وشد الشعر ونواح وكلام فاضي من بتاعنا ...تلقيهم كلهم واقفين بأحترام والدموع في عينهم رجال ونساء ...ودائأ يعملوا بالمثل اللي بيقول اذكروا محاسن امواتكم وعلشان كده بيكون فيه خطبة في الكنيسة من واحد او اتنين من المقربين للمتوفي مثل ابنه او اخوه يذكر فيها اعماله وصفاته الطيبة ...والحزن فعلا بيستمر لمدد طويلة والله ولكنه بيكون في القلب زي مابيقولوا يعني مش شرط التليفزيون مايشتغلش في بيت اسرة المتوفي أو الزوجة تلبس اسود مدي الحياة لانهم علأ علميين جدأ .....واكبر دليل علي انهم عمليين انهم بياخدوا حاجات المتوفي الغير ضرورية مثل ملابسه,عكازه,نظارته,احذيته,ألخ ألخ وبيتبرعوا بيها لأي محل من بتوع التشاريتي(Charity)والمحل بدوره يبيعها بأسعار زهيدة جدأ لاي شخص اخر محتاجها ...كذلك اي اشياء في البيت ليس لها لزمة مثل لعب اطفال لاولاد كبروا او ملابس ضاقت أو صغرت أو أو .. الناس تلمعها وتنضفها (لازم كده الأول) وبعدين يتبرعوا بيها لاي محل من اياهم وبيكون الدخل للمحل لمساعدة الفقراء وعادة في افريقيا مثل منظمة (Conern)الشهيرة اللي بتساعد المرضي ومحتاجي الاعانة وخاصة في الكوارث.......ياريت نتعلم منهم الحاجات الكويسة دي ......

............................

حاجة تانية عايز اقولكم عليها بالنسبة لحالات الوفاة بالمرة بقي طالما السيرة اتفتحت وهي اني لاحظت ان الناس قلبها فعلا رقيق للموت وليس عندهم الصلف بتاعنا كمصريين (دي الصراحة) ..فتجد الناس بتبكي لموت زميل في العمل أو لموت جار أو لموت قريب من الدرجة العاشرة ممكن الباكي يكون قابله مرتين تلاته بس ولكنهم فعلأ بيحترموا الموت اكتر مننا وصرحاء مع مشاعرهم ولكن التقليد المعروف ليوم العزاء اللي حكيت عليه في المداخلة السابقة ده مجرد استراحة ليوم شاق ومحاولة النسيان ومواجهة الواقع وده رأيي بصراحة

[amir]

.......ياريت نتعلم منهم الحاجات الكويسة دي ......  

............................

فعلا ياريت نتعلم منهم

[فــيــروز]

شكرا يا فندم الف شكر على التوضيحات الجميله

[ســيد مرزوق]

بمناسبة موضوع الموت ( ربنا يدينا جميعا طول العمر وحسن العمل )

عندما توفي والد شريكي ذهبت إلى المقبرة للقيام بواجب العزاء ( وهذا واجب هام جدا هنا في الكويت ) ثم الذهاب إلى منزل العزاء المحدد لتقديمه مرة ثانية ... المهم عندما ذهبت إلى المقبرة ووقفت معهم أثناء عملية الدفن ... وكانت أول مرة لي أحضر هذه العملية خارج مصر ... المهم الموضوع في غاية البساطة .... حفرة بسيطة جدا في الأرض بلا مباني ولا حوش ولا غيره .... حفر .. حفر جنب بعضها والغفير جنب الأمير ماتفرقش ( حاجة كويسة فعلا ) ... المهم عندما شاهدت أولاد المتوفى وهم يحملونه ويضعونه بهدوء وبدون كلام ولا بكاء ولا صراخ ... الصمت والرهبة والمنظر المهيب جعلني أترنح وكدت أسقط مغشيا على لولا أن سندني إثنان من الواقفين بجواري وأخذوني بعيدا ... وأخذت أبكي بعدها لا على المتوفى ولكن على نفسي عندما تخيلت أني مكانه في يوم من الأيام ....

هذه الطقوس البسيطة جدا غير ما يحدث عندنا في مصر وأنتم تعرفونها ..

المهم بعد ذلك ذهبنا مساء لمنزل العزاء .... وتدخل القاعة أو الديوانية .. وتسلم على الموجودين وتقول ( أعظم الله أجرك ) ويردوا عليك ( أحسن الله عزاكم ) .... المهم تجلس مدة حوالي خمس دقائق بالكتير ثم تقوم وتمشي بعد أن تسلم على الواقفين ...

ولا فيه تلاوة قرآن ولا أي شيء ولا حتى كلام مع بعض ... بس تقعد ساكت خمس دقايق وتقوم تروح على طول والعزاء هنا 3 أيام بس ولا يجوز أن تعزي أحد بعدها ... عيب يزعل منك.

وبعد كده كل حاجة تمشي طبيعي جدا وعادي خالص ......

ربنا يكفينا شر المصايب .... قولوا آميييييين .

شوفوا لنا حاجة تانية نتكلم فيها .....

حاجة حلوة ....

هريسة مثلا ..

[se_ Elsyed]

بمناسبة موضوع الموت ( ربنا يدينا جميعا طول العمر وحسن العمل )

عندما توفي والد شريكي ذهبت إلى المقبرة للقيام بواجب العزاء ( وهذا واجب هام جدا هنا في الكويت )  

..

نفس الشيء فى السعودية ... بساطه وسلاسه .. أهل المتوفي بيدفعوا مبلغ حوالي 20 $ رسوم دفن وخلصت العملية ، ولا فيه ستات تروح المقابر ولا تمشي ورا جنازة ولا هذه الخزعبلات .