حملة " من لا يرحم "

[se_ Elsyed]

انا مبسووووووووووووووووووووووووط قوي قوي من الحملة التليفزيونية على بعض القنوات الفضائية واللي تحت عنوان " من لا يرحم .. لا يُرحم "

واللي موجهة لكل انسان تحت ايده حد ضعيف شغال عنده

وخصوصاً خدم المنازل والسواقين وما شابه

فبالفعل نحن كعرب اغلبنا لديه مركبات نقص ..

والظاهر كانوا بيخوفونا من واحنا صغيرين بذوي السلطة والجاه وكل من يلبس بدلة ظابط " لو ما سكتتش يا ولد .. انا هنده لك العسكري " وبالتالي بنتربى على الخوف والرعب والتسلسل الهرمي للسلطة ونك ما تتدرش انك تسحل وتنفخ اللي يقع تحت ايدك ويكون اضعف منك

واللي المفروض بعد اللش بنشوفه من الحكام وذوي السلطة اننا نشعر بمعنى الظلم ونعلي معاني العدل عندنا ..

الا ان اللي بيحصل هو العكس

فتلاقي اللي عنده خدامه .. بيتفنن انه يطلع عين اللي جابوها .. وخصوصاً الستات الحلوين ... فبما ان بقى عندها عبده اشترتها من سوق الجواري وبتدفع لها كام ملطوش اخر كل شهر لا يساووا اتنين كيلو حلويات .. يبقى حلال اللي يحصل فيها .. ومافيش مانع تشغلها وتربطها في الطاحونة ا 24/7 ... واوعى تقول كلمة اجازة او انها عيانه او تعبانه ومحتاجة تريح لها ساعة في النهار ... وبرضوا لازم كنوع من انواع الرحمة اننا نختار لها اقذر مكان في البيت عشان يبقى اوضة نومها وياريت لو كان على ارضية المطبخ الجميلة السيراميك الحلو اللي بيطلع رصاص مش برد في الشتا ... اما الكسوة فهي ما تجود به انفسنا من هدوم مقطعة ومهلهلة واهي البنت مش هاتتكلم

وبالنسبة لرب البيت .. فلا مانع ايضاً ابداً انه ياخد جميع احتياطاته الامنية عشان يربطها في رجل السرير عشان ما تهربش .. ويحجز لها مرتب 6 شهور وهي نازله لعيالها اجازة بعد سنتين ... ليه يا عم الحج هي مش عقدها سنتين بس حسب اتفاقك مع مكتب المخدماتي ؟ اسكت يا عم عشان ترجع تاني ... ما هي مش هاترجع وهاتتطفش من وشك .. وكما كرت من قبل ان عادي جداً في برامج الفتاوي المقرؤء والمسموعة تلاقي واحد بيسأل عن ان ضميره بياكله ومش عارف يودي مرتب الخدامة فين اللي حجزوا لها لكذا شهر والبنت راحت وما رجعتش بعد نهاية عقدها ؟ .... طب وتحجزوا ليه ياللي الهي يحجزوك في نار جهنم عشان تذوق الويل والذل ؟

ولا مانع ابداً ان تسمع كلمة : ان الخدامة دي تعتبر مما ملكت يمني ... اقسم بالله بنسمعها جهاراً نهاراً .. مع انها ممكن تكون متجوزة في بلدها وجوزها مسكين ووافق على سفر زوجته للعمل كخادمة بدل ما يموت من الجوع هو وعياله في بلاد مش لاقيين رغيف العيش او اللي بيعملوه في سنة بتيجي السيول والفيضانات تاخده في طريقها ... يعني مافيش خدامة جاية تشتغل عندنا عشان عندها هواية السفر والترحال ولف العالم ... لكن وايه يعني .. اهي حاجه مرمية عندك في البيت وبالتالي لك مُطلق الحق انك تزوغ من الشغل وتروح تغتصبها او تقنعها انها مما ملكت يمينه ويحق له انه حتى يخلف منها .. شغال يا عم وكله ماشي واخترع شرع على كيفك واهم حاجه عندك نزواتك وغرائزك الحيوانية ... ولا ننسى الاولاد الصبيان اقصد اللي المفروض نشرح لهم معنى التربية الجنسية في مرحلة المراهقة .. عملي وعلى موديل حي ويتنفس عندنا وهو الشغالة ...

اما السائق فإوعى تندهه بإسمه احسن عيب .. ولكن دايماً حاول تدلعه .. يا حيوان مثلاً .. روح يا كلب .. تعالى يا جحش ... كده يعني ...

وبالتالي سوسو وتوتو اودلاك هايطلعوا زيك .. وتلاقيهم في السوق عادي جداً انه يسفخ السواق على قفاه او يرمي مفاتبح العربية في وشه .. ما هو ولد متربي ومتأسس وابوه وامه كانا قدوة حسنة له

اتقوا الله يا بشر .. فالدنيا اسمها " دُنيا " من التدني والتقلب ..

واللي انت عمال تعذب في اللي جابوه النهاردة .. مش بعيد يُنتزع الملك منك غداً وتتبهدل بعد العز .. وربنا يبعت لك من يسومك سوء العذاب ويعمل فيك اللي كنت بتعمله واكثر

ويرجعوا يشتكوا ويقولوا : الشغالة الاندونيسية او المغربية بتعمل لنا سحر او بتعذب العيال ويحطوا لها كايمرات مراقبة عشان يشوفوا بتعمل ايه في العيال في غياب الاسرة

وخيراً " ارحموا من في الارض .. يرحمكم من في السماء "

[ام بلال]

أشكرك أخي الفاضل جدا على هذه الكلمات الصادقة و التي تعبر عن واقع مرير يعيشه المسلمون و لا حول و لا قوة إلا بالله

[شاب مصري]

حملة ممتازة فعلا

والاعلانين بتوع الشغالة الآسيوية و العمال الهنود معبرين جدا جدا .

[ناوية ع الهجرة]

فعلا حملة رائعة وجزى الله خيراً كل من يعمل فيها فهي مثال واضح لما نراه في الخليج خاصة وفي البلاد العربية عامة

وتزامنا مع هذه الحملة قرأت خبر لخادمات أسيويات يشتكين من أنهن جاءوا الخليج على أنها ارض الأحلام ليجدوا الضرب (الطق) والتحرش والأهم حرمانهم من المعاش ولا أدري بأي منطق استعبدوا الناس وسخروهم لخدمتهم ونسي هؤلاء أن الخدم وأي عمالة وافدة في بلادهم تركت اهلها وأولادها وكل ذكرياتها وجاءت بأحلام لتستيقظ على كوابيس ولا حول ولاقوة الا بالله

[se_ Elsyed]

الغريب بقى ان هؤلاء المرضى لما بيحبوا يقضوا اجازتهم الخدم في احد الدول الغربية ويتمنظروا وياخدوا الخدم بتوعهم معاهم بيلفوا حوالين نفسهم ويدلعهم ويداديهم لانهم لما بيتصلوا بالشرطة هناك بيتسحلوا .. بالظبط زي ما عملوا في ابن القذافي في سويسرا واللي بسبب اساءه معاملة الخدم بتوعه اتاخد هناك على القسم وأكل على قفاه لحد ما ابوه قطع العلاقات مع سويسرا الوحشة وقفل حنفية البترول عنهم وسحب ارصدته من بنوك القرية بتاعتهم

وياما سمعنا عن ناس اتسجنوا عدة سنوات لانه بيشغل خدامته 7 يام في الاسبوع بدون اجازة ولاكثر من 8 ساعات يومية

بينما الموضوع ده في مجتمعنا العربي غير قابل للنقاش وغير قابل للطرح اساساً ...

[newcomer]

استاذ / سى السيد

انا الحقيقة ماتابعتش الحملة دى فين و لا على اى قناة؟؟

بس بجد برافوا على اللى فكر فيها و عملها

انا الحقيقة ماكنتش حاسة بالافتراء ده اوى

لحد ما طلعت بره مصر

و للاسف لقيت مصريين ...اتعدوا من بعض الجنسيات الاخرى

و بيعاملوا الشغالين بطريقة ؟؟؟!!!!!

مش بس غير ادمية ....و الله ساعات غير حيوانية

( على اعتبار ان اكل القطط و الكلاب و لبسهم و لعبهم ......و كل اللى يحتاجوه

الكلااااااااااب مالى رفوف السوبرماركتس ....من المحيط الى الخليج )

بس برضة الحمد لله ..... مش نسبة كبيرة من المصريين

عموما حضرتك لو عملت احصائية فى المعاملة دى بين الناس اللى حواليك

هاتلاقيهم ..اللى مابيرحموش دول .... اللى بيتقال عليهم "نوفو ريش"

او بالمصرى شبع بعد جوع.... و ده بينطبق على الافراد و الدول

ولاد الاصل....ولاد اصل برضه ( اقصد بالأصل هنا ... التربية و الأخلاق....مالهاش دعوة بغنى و لا فقر )

و الحمد لله برضة المساعدين و الشغالين فى مصر لحد كبير

لسة بيتعاملوا معاملة انسانية..... الحمد لله!!

[iloveegypt]

للاسف معاملة الكثير منا كعرب خصوصا سيئة جدا للعمال وخصوصاالعمالة المنزلية

اتذكر احد زملائى السعوديين يخكى لى عن خادمتهم الفلبيبنية بانها تاكل وتشرب معهم بل تشاهد بعض البرامج معهم كاسرة واذا مرضت البيبت كله يحزن عليها وتلبس من نفس اللبس الذى يلبس منه اخواته البنات

الغريب ان راتبها كان 800 ريال وبعض قرار الحكومة الفلبينية بزيادة المرتبات الى 1200 ريال

عرضوا عليها ان تغادر الى الفلبين وترجع براتب اكبر لان امكانياتهم المالية لا تسمح باى زيادة ورغم ذلك هى رفضت المغادرة من حسن المعاملة وبل تفكر جديا فى اشهار اسلامها

ومن لايرحم لا يرحم

[pharaon]

سبحان الله فعلا فى ناس كده وناس كده

لكن الاغلب لاسف بيعملوهم زى الزفت

و زى الطين كمان

والحمدالله رب العالمين انا كان تحت ايدى 5 عمال (كنت بشتغل فى المقاولات ) وكنت بعاملهم زى الفل وده من نعمة ربنا عليه لدرجة ان هما ساعات كانوا بيتنططوا عليه ( طبعا كنت بعاملهم بنظرية الثواب والعقاب ) بس الحمدالله بيتصلوا يسألوا عليه مع انى سيبت المجال ده من سنة

بس بجد طبيعى فى الخليج تلاقى العمال بيتضربوا او مش بيخدوا رواتب لست شهور مثلا

انا كنت براعى ربنا بخاف فى يوم من الايام ابقى فى مكانهم ويجى واحد يعاملنى وحش الحمدالله على كل حال البركة فى بوب هو الى ربنانى على كده :)

[مغتربة]

حمله ممتازة جدا تنضم للحملات الناجحه السابقه لها مثل البركه فى الشباب , هذا هو ديننا . اقم صلاتك تنعم بحياتك

كلها بصراحه حملات جميله و تحمل فكر جديد نتمنى ان تزيد اكثر و اكثر

اما بالنسبه لمعامله الخدم فبعد كل النقاط التى ناقشتها هذه اعود و اقول لك و ما خفى كان اعظم

حقيقى رايت نماذج فى معامله الخدم لا استطيع وصفها و حقا من لا يرحم لا يُورحم

[se_ Elsyed]

الغريب ان راتبها كان 800 ريال

800 ؟!!! دي كده دي انسانة رأسمالية متسلقة

يا باشا ده في سيرلانكيين واندونيسيين ونيباليين راتبهم 400 ريال ... يعني لو عندك وزة بتزغطها هاتصرف عليها اكتر من كده ... واعرف عيال في ابتدائي هنا اهاليهم بيعطوهم 1500 ريال مصروف شهري رسمي غير المعونات الخارجية والديون غير المردودة وواكل شارب نايم في البيت بلوشي وبيصرف المبلغ ده على مزاجه بس او كروت شحن الموبيل ...

نحن كعرب ومسلمين نريد ثورة شاملة في سلوكنا

فما معنى الصلاة والحج والعمرة والصيام اذا كنا في حياتنا اليومية او اللحظية نضرب عرض الحائط بتعاليم ديننا .. وببجاحة ومن غير ما نتكسف ..

واللي بيعمل كده في من لديه ... الم يقرأ الحديث الكريم عن السيدة عائشة التي اكدت فيه ان الرسول الكريم لم يضرب خادماً ولا امرأة في حياته ؟

مع ان الخدم دول هما اللي كانوا بيوهبوا نفسهم لخدمة الرسول ... ومن غير مرتب ولا يحزنون

ولابد ان يعلم الانسان ان الدنيا ضيقة ودوارة

ولو تفتكروا قصة بنت حاتم الطائي اللي ابوها كانت فضائلة ومعاملته تفوق ناس مسلمين ومؤمنين كتير بالرغم من انه كان جاهلي ومُشرك .. لكن لما مات على جاهليته وبنته اتأسرت في احدى الغزوات الاسلامية الرسول عرف انها مأسورة وكرمها بسبب فضائل ابوها ..

يعني ما نفعله يبقى لأبنائنا وللاجيال القادمة سواء سيء او حسن

[sherifhfm]

تسجيل متابعة وإعجاب بالموضوع

انا طبعا مبسووووووووط جدا من هذه الحملة على بعض القنوات وارجو من الله ان يهدى بها قلوب ليس فيها مكان للرحمة

انا عايش فى الكويت وبشوف معاملة سيئة جدا للخدم من الكثيريين سواء من الكويتيين او غيرهم وكمان فى ناس محترمه بتعامل الخدم بطريقة كويسه

[ناوية ع الهجرة]

نحن كعرب ومسلمين نريد ثورة شاملة في سلوكنا

فما معنى الصلاة والحج والعمرة والصيام اذا كنا في حياتنا اليومية او اللحظية نضرب عرض الحائط بتعاليم ديننا .. وببجاحة ومن غير ما نتكسف ..

أنا اتفق معك في هذه النقطة والتي للأسف هي الموضوع الأعم والأشمل وهي فصل الدين عن الدنيا فبالرغم من أننا تقرييا جميعا أو معظمنا على الأقل نصلي ونصوم ونحج ونزكي وووووو....

لكن السلوكيات متناقضة تماما لتعاليم الدين لابد من تصحيح السلوك وتربية ابنائنا على السلوك الصحيح ا

لناس كلها تقريبا دلوقتي عارفة الدين كويس وممكن أي حاجة تسأل فيها يجاوبك عليها ويفتيك الفتوى الصحيحة لكن فعل ما فيش بل على العكس السوكيات بتنهار

زمان كان الوعي الديني بسيط لكن الناس بتعامل بعضها أحسن من دلوقتي وكانوا بيراعوا خاطر بعض أما دلوقتي ؟؟والله المستعان !!!!

[ahmedkamal]

انا من اشد المعجبين بهذه الحمله وشيئ جميل ان اخيرا واجهنا نفسنا بالحقيقه المره وهي ان في بعض مننا بيعطي انطباعات سيئه وصورة غير صحيحه عن الاسلام والعرب والنماذج ده ف كل مكان لكن اتمنى ان الحمله ده تتعمم ع قنوات كتيره لان بجد احنا عندنا نماذج كتيره اساءت لينا كعرب ومسلمين

وصدقوني مفيش حاجه بتتنسي انا فاكر ايام غزو العراق للكويت للاسف ناس كتير كانت شمتانه ف اللي حصل لان بصراحه كان فيه نماذج كتيره اساءت معامله الناس فبقى الانطباع العام ان البلد ده مش كويسه ، فالايام دول ودوام الحال من المحال

[se_ Elsyed]

حقيقة أنا معجب أيضاً ببعض العقول التي تعمل في مجال الدعوة الإسلامية هنا بالسعودية والتي تستغل فرصة تواجد تلك العمالة وتحاول بطُرق محترمة ومشروعة ان تحببهم في الأسلام عن طريق أن تكون أنت شخصياً مرآة لدينك ... وبدون ضغط أو اتباع لأساليب تبشيرية رخيصة تستغل حاجة الفقراء وتربط العطاء المادي بتغيير الدين ..

وفعلاً تلك الطريقة بتؤتي ثمارها ومنهم ناس كتير جداً بيدخلوا الدين الإسلامي عن إقتناع

وخصوصاً الفلبينيين لإنهم أذكياء ومش سهل ينضحك عليهم بكلمتين حلوين .. ولكنهم شعب محترم ومؤدب وحساس ويقرأ ويقتنع وبالتالي لو وفرنا له الفرصة إنه يرى بعينه إنعكاس للدين على المعاملة .. فبالتأكيد ستتغير قناعاته ....

[فــيــروز]

أعتقد أن الموضوع مرتبط كذلك بالنظره الدونيه فى مجتمعاتنا للعمل اليدوى و ما دون الأعمال المكتبيه (أصحاب الياقات البيضاء و أصحاب الياقات الزرقاء) .. ربّة المنزل تتعامل مع الخادمه بوصفها بتشتغّل "عندها" و ليس "معها" !! تتعامل معها باعتبارها -أى ربّة المنزل- تحسن إليها إذ تمنحها راتبها متناسيه إنّها -أى الخادمه- بتطفح الدم مقابل ما تحصل عليه من مال و أنّه لولا وجود هذه الخادمه لظهر عجز و خيبة هذه السيده فى إدارة بيتها بشكل جيّد !! هى تقريبا نفس نظرتنا الدونيه لمن يكنسون الشوارع أو يجمعون القمامه بالرغم من أن غيابهم لأيّام قليله يحوّل الحياه إلى جحيم لا يخففه أى أموال يفرح بها أصحابها و يتعالون بها على خلق الله ..

المشكله فى ثقافة العمل التى لا تدرك أن من يمنح شخصا ما راتبا إنّما يمنحه إيّاه مقابل تعب و جهد و ليس صدقه أو حسنه !! ده حتى الحسنه أمرنا الله ألاّ نتبعها بمنّ أو أذى فما بالنا نعطى الناس أجورهم مغموره فيهما !!

[mffaswan]

الحملة التوعوية (من لا يَرحم لا يُرحم) و أيضاً عدة حملات تم عرضها على شاشات التلفزة السعودية .. هي إحدى حسنات الإعلام الهادف و التنموي .. الذي يهدف إلى تنمية عقول الناس و هو من رأيي من أهم أشكال التنمية ..

أجيئ من ناحية معاكسة و أقوم بعمل مقارنة للإعلام العربي ككل .. و المصري بالأخص .. و مدى موائمته للظروف و الأحوال المحيطة بنا .. من مشكلات إجتماعية و سياسية و علمية .. إلخ إلخ إلخ ..

هل إعلامنا قادر على مواجهة هذه المشكلات .. و ليس الوقوف عند عرضها فقط .. و لكني أتكلم عن المشاركة في حلها .. بإعتبار إن الإعلام أحد أهم و أبرز الوسائل التنموية .. المُهمَلة .. في وطننا العربي ..

للأسف .. لا .. لا يستطيع إعلامنا الهش الضحل في التحول للدور الإيجابي المطلوب منه .. و الدليل .. أفتحوا المحطات الفضائية على قمري النايل و عرب سات .. ستجدون 90% من المحطات ما بين أغاني و كليبات عراة .. و شات .. و رياضة .. و مسلسلات و دراما هايفة جداً ..

و الـ 10% الباقية .. مجرد محطات إخبارية تنقل أخبار .. و محطات دينية .. من كثرتها و كثرة الهجوم عليها .. فقدت أهم ما يميزها و هو عامل الثقة .. اللهم إلا بعض منها .. و أيضاً محطة واحدة أراها من أفضل المحطات إعلامياً .. و هي محطة طيور الجنة الموجهة للأطفال .. حيث أراها تقوم بدور ريادي في توعية و تنشئة الأطفال في الوطن العربي ..

فمثل هذه الحملات .. تحتاج لدعم قوي و مستمر من محطات تتبنى الدور الإيجابي للإعلام .. و تخاف الله فيما تبث في عقول الناس ..

و طبعاً إعلامنا المصري داخل أرض مصر .. الممثل في اتحاد الإذاعة و التليفزيون .. نايم في العسل من بدري .. و البركة في صفوت الشريف .. و قدراته الجهنمية في تحويل مسار الشعب عن طريق الإعلام .. فهو أحد أبرز أسباب فساد عقول الناس في مصر في حقبة الثمانينات و التسعينات .. عليه من الله ما يستحق

و في النهاية أحييك أخي الفاضل سي السيد على الموضوع الهام ..

[newcomer]

أعتقد أن الموضوع مرتبط كذلك بالنظره الدونيه فى مجتمعاتنا للعمل اليدوى

المشكله فى ثقافة العمل التى لا تدرك أن من يمنح شخصا ما راتبا إنّما يمنحه إيّاه مقابل تعب و جهد و ليس صدقه أو حسنه !!

هى دي النقطة اللى لازم الناس تقتنع بيها .....الأول

و بعدين ....تربى ولادها عليها

ناس كتير ....لما تيجى تهدد ولادها اللى مابيذاكروش

تقولهم " خليك ماتذاكرش ...علشان تبقى .......( اى حرفة يدوية او مهنة مساعدة فى البيوت او..او..)

لحد ما ترسخ فى اذهاننا جميعا

على عكس الدول المتقدمة

ان العمل اليدوى و المهنى ......ياااااااااى.....حاجة مشينة

فنلاقى الناس بتتكدس فى الكليات النظرية ....بس علشان يبقى مهنى او حرفى بشهادة

و هو لا استفاد من العلم ده و لا ساب لغيره المكان علشان يتعلم

بس عايز يرضى المختمع.....علشان ماجدش يبصله من فوق

لااااااااازم نعيد تفكيرنا فى حاجات كتير!!!

[newcomer]

للأسف .. لا .. لا يستطيع إعلامنا الهش الضحل في التحول للدور الإيجابي المطلوب منه ..

هوه لازم نجلد نفسنا فى اى موضوع كده ...سعادتك

:blush2: :blush2:

[mffaswan]

للأسف .. لا .. لا يستطيع إعلامنا الهش الضحل في التحول للدور الإيجابي المطلوب منه ..

هوه لازم نجلد نفسنا فى اى موضوع كده ...سعادتك

:blush2: :blush2:

تكملة العبارة:

للأسف .. لا .. لا يستطيع إعلامنا الهش الضحل في التحول للدور الإيجابي المطلوب منه .. و الدليل .. أفتحوا المحطات الفضائية على قمري النايل و عرب سات .. ستجدون 90% من المحطات ما بين أغاني و كليبات عراة .. و شات .. و رياضة .. و مسلسلات و دراما هايفة جداً ..

الكلام واضح .. و جلد النفس له معنبان .. الأول إني أعذب نفسي .. لإني سادي .. و لإني لا أعرف الصح من الخطأ .. و لأني معاق ذهنياً ..

و الثاني .. هو مُقرّ بالخطأ .. و يأست من محاولات الإصلاح .. فوجب العقاب ..

و المعنيان لا علاقة لهما بكلامي .. و لكني كعربي مسلم أرى الإعلام العربي لا يرقى للمستوى المطلوب لكي يقوم بدوره المفترض إنشاء أجهزة الإعلام لأجله ..

و أيه علاقة ((هوه لازم نجلد نفسنا فى اى موضوع كده ...سعادتك)) ؟؟ أنا مش فاهم تقدصي ايه؟؟ ياريت توضحي .. سعادتك !!!

[sherifhfm]

انته عارفين لو عاوزين الحق احنا لو بنجلد نفسنا بحق ربنا على المصايب الى فيها بلدنا وامتنا كلها كان زمان جلدنا اتقطع من كتر الجلد وكان زمنا اتجننا كلنا ودخلنا الخانكه

طلب ممكن سعادتك تقولى على حاجه واحده تخلينى متفائل حاجه واحده بس انا مش طماع