مشكلة المشكلات.. من خواطر مغترب مصري

[سهل جدا]

مشكلة المشاكل أن تأتي المشكلة للإنسان فيظن أنها ليست مشكلة، فيتصرف على أساس أنه لا مشكلة, ثم يضيفها إلى مشاكله القديمة؛ فتتفاقم بذلك المشكلات..

أما لو نظر للمشكلة على أنها فعلا مشكلة وإذا لم يحلها فستحدث مشاكل أخرى غير مشكلته فعنئذ سيحل المشكلة دون أدنى إشكال, وبالتالي سيشعر أنه ليس هناك أي مشكلة على الإطلاق، وإذا أتته مشكلة فيما بعد فسيفعل مثلما فعل في المشكلة الأولى.. فيبقى بدون مشاكل.. وهكذا في سائر المشكلات التي تشكل عليه إلى أن يتعود على المشاكل...

إيه اللي أنا بقوله ده !!

:) :blink:

المهم

أنا خلاص تعبت من الغربة يا ناس ..

الغربة مشكلة ..

والرجوع إلى الوطن مشكلة ..

والموت على حالتي هذه من التقصير في حق الله مشكلة

طيب أعمل إيه يا ناس .. لا الغربة نافعلة ولا الرجوع نافع ولا حتى الموت نافع ..

حد عنده حل لمشكلة المشاكل اللي عندي

[ام بلال]

تسأل الله الرضا بما قسم لك و أن يقنعك بالمكتوب ، و استعن بالله و لا تعجز و احرص على ما ينفعك دنيا و آخرة، و لا تفتح باب كلمة " لو " الشيطانية الخايبة، تذكرة لك و لنا جميعا

أخت لك في الله مغتربة

[aimen]

زى ما الحكيم تيمون قالها فى الملك الأسد

اضربها طبنجة

يعنى هاكونا مطاطا

يعنى احمد ربنا على ما انت فيه وارضى به ولا تقارن ابدا نفسك بغيرك لأنها - اى المقارنة هى مشكلة المشكلات - فى رأيى - فقط الحمد لله على ما انت فيه

[jamalpody]

"](من اصبح امنا في سربه معافا في بدنه عنده قوت يومه فقد حيزت له الدنيا )

حديث جميل جدا من احاديث المصطفي صلي الله عليه وسلم يجسد القتاعه بالعيش بكل تفاصيلها

فمهما عشنا وجمعنا من مال ومنصب وجاه وسيارات واراضي وووووو

فكل ذلك الي ذوال

فكر بهذه الطريقه ولا تعيش غير يومك في طاعة الله

صدقني حترتاح سواء هنا او في مصر او في اي مكان علي ارض الله الواسعه

[redwany]

حضرتك عامل مشكله من لا مشكله لان المشكله عند حضرتك ان الغربه مشكله طيب ايه المشكله فى الغربه لو فيه مشكله فى الغربه مافيش مشكلة ارجع بلدك بدون مشاكل اما ان تكون المشكله هى الرجوع الى بلدك فتلك فعلا هى المشكله ومابين المشكله الاولى والمشكله الثانيه حضرتك دخلت نفسك فى مشكله تالته لان المشكله الاعظم ان مشكلتك انك خايف من الموت بس المشكله انك شايف حل مشاكلك فى الموت بس المشكله الخوف من عقاب الله....انسى كل مشاكلك لان مشكتلك لاتقارن بمشكلتى واللى يشوف مشكلة غيره تهون عليه مشكلته....مشكلتى فعلا انا مش عارف حل لمشكتك

[سهل جدا]

((الأخت أم بلال)) شكرا على مرورك وكلامك الطيب , وفقك الله

((الأخ aimen)) حلوة اضربها طبنجة ديه , وعلى رأيك كله محصل بعضه .. شكرا على تعليقك

((الأخ جمال بودي)) فعلا هذا الحديث الجميل عن رسولنا الحبيب صلى الله عليه وسلم ينعش القلب ويريح الإنسان , وسأضعه نصب عيني دائما بإذن الله , بارك الله فيك

((الأخ رضواني)) تصدق كلامك جيه على الجرح !! شكرا على مرورك

[fatfouta]

اخى العزيز

شكرا على الموضوع ده وكلامك ده بجد خلانى ابكى لانى انا كمان ويمكن كلنا تعبنا من الغربة جداااااااا

انا مثلا ليا ظروفى اللى تخلينى قاعدة فى الغربة انا واسرتى وزوجى

لكن هى المشكلة لو نزلنا هنلاقى شغل فى بلدنا يقضى احتياجاتنا ونعرف نربى ونعلم بيه ولادنا وهى دى مشكلتنا

واكيد كل واحد مغترب بيفكر فى حاجة او مشكلة لو نزل هتواجهه

يا شيخ ده احنا كووووووووووولنا مشاكل

والنبى ماتقلب علينا المواجع بقى وخلينا ساكتين

اختك المغتربة المعذبة فاطمة

[newcomer]

طيب أعمل إيه يا ناس .. لا الغربة نافعلة ولا الرجوع نافع ولا حتى الموت نافع ..

حد عنده حل لمشكلة المشاكل اللي عندي

سمعت مرة كلمة جميلة مش فاكرة مين اللى قالها

بس قريتها فى بريد الجمعة للاستاذ عبد الوهاب مطاوع

معناها ان الانسان لما يكون عنده وقت مش بيستغلة صح

بيبتدى يتسائل....هو انا سعيد و لا تعيس

اشغل نفسك على قد ما تقدر

و ساعتها و لا هاتحس بمشكلة اللى هى مش مشكلة

و نسميها مشكلة و لا مش مشكلة

ربنا يسعد ايامك و يرضيك بقدرك كلة!!!

[newcomer]

عارف حضرتك ....لما الاقى نفسى

هادخل فى مود الغربة و البعد و الاحاسيس دى

و خصوصا فى ايام الاعياد و المناسبات

بافكر نفسى ان احنا بنتدلع !!!

من قريب ...من يمكن 10 سنين فاتوا او اكتر

كان اللى بره مصر ...ده حقيقى اللى فى غربة

لا فيه فضائيات ....تقولنا اللى بيحصل دقيقة بدقيقة فى بلدنا

و لا كان فيه ياهو ماسينجر.....نشوف و نسمع حبايبنا

و لا "محاورات المصريين" اللى بتدينا فرصة الفضفضة

و لا مكالمات ( نسبيا ) رخيصة زى دلوقتى

و لا .....و لا....

يعنى الواحد لما كان ليه حد بره .... يادوب يسمع اخباره من المقربين ليه

و الموضوع ...تليفونات كل فترة ....و شرايط كاسيت ....و جوابات....غلب بجد !!!

غير بقى نقطة تانية مهمه جدا

ايه هى السيناريوهات التانية اللى كانت مطروحة بديل لوضعى دلوقتى؟؟؟

بس اجاوب نفسى ....بواقعيه!!

الاقى ان الاختيار اللى اخترته ...فى وقته ....و ظروفة

ماكنش يجى احسن منه

بس ....اقوم احمد ربنا و اشكر فضلة على نعمة الكتير

و استعيذ بالله من الشيطان الرجيم

و اروح اعملى فنجان نسكافية مضروب و بوش مظبوط !!

جرب ....و قوللى !!

[ozoozo]

ااااه فكرتيني يالشرايط والجوابات ونعلمكم ان فتحي دخل الجيش والحاجات دي انا كان ليا قرايبي مسافرين وانا صغير وماكناش بنكلهم في التليفون الا لو في مصيبه وكانت الدقيقه او المده اللي هي 3 دقايق مش فاكر ب15 جنيه زكنا نقعد اكتر من ساعه لما النمره تجمع......الحمدلله علي النعمه اللي الواحد فيها

[tarek nokia]

كلامك يدل على انك بعيد عن ربنا تقرب من الله وسوف ترتاح يستفسر عن الآية الكريمة في سورة طه: ((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))[طه:124-126]، يقول: هل هذه الآية على كل شخص يغفل عن ذكر الله؟

هذا وعيد شديد لمن أعرض عن ذكر الله وعن طاعته فلم يؤد حق الله، هذا جزاؤه، تكون له معيشة ضنكا وإن كان في مال كثير وسعة لكن يجعل في عيشته ضنكاً، لما يقع في قلبه من الضيق والحرج والمشقة فلا ينفعه وجود المال، يكون في حرج وفي مشقة بسبب إعراضه عن ذكر الله وعن طاعة الله جل وعلا، ثم يحشر يوم القيامة أعمى. فالمقصود أن هذا فيمن أعرض عن طاعة الله وعن حقه جل وعلا، ولم يبالِ بأمر الله بل ارتكب محارمه وترك طاعته جل وعلا، فهذا جزاؤه، نسأل الله العافية.

[Dr.mmfriend]

المشكله فعلا فى الفراغ

لما الواحد يكون عنده وقت غير مستغل بيبدأ يفكر ودماغه تودى وتجيب

وخصوصا لما بيكون وحده سنجل لسه

ربنا يعيننا جميعا ويهدينا

[سهل جدا]

الأخت فتفوتة .. أنا لا أقصد تقليب المواجع، هو بس كان من باب الفضفضة ..

عجل الله فرجك وكتب لك الخير حيث كان (سواء في مصر أم في غيرها)

الأخت (نيو قمر) أتفق معك في أكثر ما قولتيه ..

واحنا فعلا أحسن حالا من غيرنا .. وكما قال صلى الله عليه وسلم: (انْظُرُوا إِلَى مَنْ أَسْفَلَ مِنْكُمْ وَلَا تَنْظُرُوا إِلَى مَنْ هُوَ فَوْقَكُمْ فَهُوَ أَجْدَرُ أَنْ لَا تَزْدَرُوا نِعْمَةَ اللَّهِ)

جرب ....و قوللى !!

مش عارف قصدك أجرب النسكافيه ولا أجرب أطبق الكلام اللي قولتيه !!

[سهل جدا]

مرحبا بالأخ عزوز .. والله عندك حق الواحد دلوقتي في ثانية بيطمن على كل حبايبه في مصر

كلامك يدل على انك بعيد عن ربنا تقرب من الله وسوف ترتاح يستفسر عن الآية الكريمة في سورة طه: ((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))[طه:124-126]،

يعني هي الحمد لله ما وصلتش للضنك , وإنما مجرد فضفضة ومشاركة في الهموم زي ما قالت الخنساء تعزي نفسها لما مات أخوها :

ولولا كثرة الباكين حولي *** على إخوانهم لقتلت نفسي

وما يبكون مثل أخي ولكن *** أعزِّي النفس عنه بالتأسي

يعني اللي هون عليها همومها إن فيه غيرها مات لهم أقارب .. وأنا كذلك اللي يهون علي غربتي إنو يكون في ناس زي حالاتي ..

(دكتور إم إم فريند) أشكرك على مرورك .. فعلا الفراغ أس البلاء , لكن الفراغ اللي عندي مش كبير .. وفقك الله

[newcomer]

جرب ....و قوللى !!

مش عارف قصدك أجرب النسكافيه ولا أجرب أطبق الكلام اللي قولتيه !!

md2:

لأ .....سيبلى انا سعادتك النسكافية

و جرب تتكلم مع نفسك ....زى ماانا قلت لحضرتك...

[سهل جدا]

mfb: :)

لأ .....سيبلى انا سعادتك النسكافية

و جرب تتكلم مع نفسك ....زى ماانا قلت لحضرتك...

جربت الاتنين وما فيش نتيجة :yahoo:

[newcomer]

طب هاقول لحضرتك على حاجة

بجد و الله

لما باكون متضايقة و الاكتئاب مش لاقيلة زباين غيرى

بافتح المصحف و اقرأ سورة يوسف

و باخلى نيتى ان ربنا يفرج همى

الحمد لله الحمد لله ....مافيش مرة مالاقيتش نفسى مستريحة

و حاسه ان المشكلة فى حجمها ....مش هاقولك اتحلت.....

لكن الاكتئاب خف ....و اقدره افكر احسن

جرب و قولي......

و بلاش النسكافية يا سيدى

اللهم لا تدع لنا هما الا فرجته .....امين!!

[newcomer]

علشان بس كلامى يبقى واضح (يعنى ده مش اختراع منى....انا قرأت الكلام ده ل اكتر من شيخ محترم )

سورة يوسف نزلت على الرسول عليه الصلاة و السلام

فى عام عرف انه عام الحزن

العام اللى ماتت فيه زوجتة الحبيبة سيدة نساء الجنة السيدة خديجة

و اللى مات فيه عمه ابو طالب ...اللى كان بيحميه من قريش

و طبعا حضرتك عارف مضمون و معنى السورة

يعنى ماافتكرش ان فيه حد فينا مهما عنده مشاكل

مر عليه اللى مر على سيدنا يوسف

و مع كده حاله اتغير و ربنا ارضاه

بس حبيت اوضح .... علشان محدش يفهمنى غلط

[ناوية ع الهجرة]

,والله الرضا ده نعمة عظيمة من ربنا لأن في ناس عندها بلاوي ولكن راضية وفي ناس ماعندهاش مشاكل لكن مش راضية (الرضا لمن يرضى)

الغربة فعلا صعبة لكن مش نهاية العالم ولو مش راضي صدقني حتى لما ترجع مصر برضه هتلاقى نفسك مش راضي

عايز ترضى فكر في الناس اللي عندهم أمراض عافانا الله واياك وشفى مرضانا ومرضى المسلمين

فوالله الذي لا اله الا هو لا شئ اشد بلاء من المرض سواء لنا او لعزيز علينا لانملك ان نفعل له شيئا

فلنحمد الله على نعمة الصحة وبعدها كل شئ يهون

وانا احيانا يعدي عليا فترات اكتئاب ومش بيطلعني منها غير أني افتكر ناس مرضى بأمراض خطيرة

وربنا معاك اختك في الله مصرية مغتربة

[honda]

ايه يا اخوانا متصلوا عالنبي امال دانا مستنى زيارة هتجيلي بعد شهر الامارات بفارغ الصبر هتخلونى ارجع في كلامي ولا ايه بقة يعني ايه بقة بلاش اروح ولا ايه؟؟؟