حاضر للمساعده

[EGYPTDNRD]

مساء الخير علي كل المصريين اللي ف المنتدي

انا الحقيقه مشارك جديد حبيت اشارك اخواني المغتربين ف المنتدي اللي لفت انتباهي بشده في مساعده المغتربين

انا شاب مصري وبعمل في اداره الجنسيه والاقامه في دبي في قسم خدمه العملاء

وبناء عليه حبيت اني اشارك ف المنتدي دا عشان لو حد عنده اي استفسار عن طبيعه معاملات الزياره والاقامه وخلافه في دبي واي حد عنده اي استفسار ف اي وقت انا هحاول ااقدم المساعده بالمعلومات اللي اقدر عليها

اسف للاطاله انا بس حابب اني ااقدم المساعده وفي اي وقت

كل سنه وانتوا طيبين وكل عام وانتم بخير

GEYPTDNRD

[newcomer]

كلك ذوق استاذ/ ايجيبشين

ربنا يبارك فيك

....

[EGYPTDNRD]

شكرا ليك

وربنا يوفق الجميع ويجعل مننا اسباب لمساعده الناس

[newcomer]

كلك ذوق استاذ/ ايجيبشين

ربنا يبارك فيك

....

معلش قريت الاسم و كتبته غلط.....يا استاذ /Egypt DNRD

اخر اليوم بقى ....و النظر و كده !!

[مصري اسكندراني]

السلام عليكم ورحمة الله وبركاته

اخي الفاضل EGYPTDRND اهلا بك وسهلا في منتدانا الجميل

اولا اشكرك كثيرا علي هذا الشعور الطيب وان كان ليس بغريب علينا كمصريين فالحمد لله ربنا يجعلنا دائما عونا لبعض وللاخرين

ثانيا احب ابشرك انك مش حتلاحق علي الاستفسارات الي حتوصلك انتا عارف كتير اوي ناس عندهم عشرات الاستفسارات عن امور الهجرة والجوازات في دبي

وادي اول الاستفسارات يا بطل

سمعت مت احد اصدقائي ان الحد الادني للراتب المسموح معه استقدام الزوجة والابناء سوف يرتفع من 4 الي 10 الاف درهم فهل هذا صحيح ام انها مجرد دراسة ولو كان صحيح فهل هناك وظائف مستثناه من هذا القرار

اخير اود ان اعبر سعادتي ان اكون صاحب اول استفسار

صباحك فل وعام هجري سعيد عليك وعلي جميع اخواني واخواتي في المنتدي

[EGYPTDNRD]

شكرا اخويا مصري اسكندراني وكل عام وانت بخير

اولا انا جاهز لاي استفسار لاي وقت من اخواني المصريين والا مكنتش سجلت ف المنتدي وان كان ع الوقت فالله المعين

بالنسبه لاستفسارك عن ارتفاع حد الرواتب في دبي لاستقدام الزوجه والابناء فالخبر دا نزل ف جريده الخليج وسبب قلق للناس بس لحد اليوم مفيش اي تعميم او قرار رسمي جه من الاداره نفسها في دبي ممكن في امارات تانيه هيطبقوا حاجه زي كده فدا كله كلام جرايد واحنا لسه ماشيين علي النظام القديم انك لو عايز تجيب الزوجه يكون راتبك الاساسي لايقل عن 3 الالاف درهم + السكن او 4000 درهم الاساسي بدون السكن. بس انصحك انك لو بتفكر وراتبك دلوقتي يسمح قدم الاوراق لان محدش عارف ممكن يعملوا ايه ف اي قوت ممكن قرار زي دا ينصدر

اتمني اكون جاوبتك علي سوالك اخويا مصري اسكندراني ومرحب بيك ومرحب بكل المصريين في دبي..DNRD

[EGYPTDNRD]

ولايهمك اخويا newcomer

وتحت امركوا ف اي وقت

[مصري اسكندراني]

شكرا جزيلا يا جميل بارك الله فيك وفي وقتك وجزاك خير الجزاء فخير الناس انفعهم للناس

معلش لو مش حيكون عبأ كبير عليك لما يكون فيه اي اخبار او قوانين جديدة تحس انها تهمنا كمغتربين بس القي بعض الضوء عليها عشان نكون دايما علي وعي بالي بيحصل

جزيت خيرا

[EGYPTDNRD]

اكيد اخويا مصري هيحصل

اي اخبار خاصه بالقوانين في دبي اكيد هعرف كل الاخوه هنا عشان كله يكون علي علم بيها اول باول

DNRD

[fatfouta]

اهلا بيك فى المنتدى بتاعنا ده مع انى برده لسه مابقاليش كام شهر هنا لكن لقيتهم كلهم هنا ذى اخواتى وفعلا لما طرحت مشكلتى لقيتهم كلهم ماترددوش لحظة ان كل واحد يرد عليا ويساعدنى

واتمنى انت كمان تتبسط هنا وتبقى سعيد وسطنا

وشكراااا على عرضك لخدماتك وربنا يكرمك يااارب

وايوه كده خلينا نكتر ويارب زودنا دايما وقربنا من بعض كلنا

اختك فاطمة

[Torontotruk]

عايز اعرف ماهي شروط الحصول علي الجنسية الاماراتية الأن؟وهل يمكني التقدم للحصول عليها علما باني مصري علما باني قضيت فيها 9 سنوات للدراسة .وشكرا.

[doctoratef]

اولا اشكرك يا استاذ /Egyptdrnd على شعورك الطيب دة وربنا يجعله فى ميزان حسناتك ان شاء الله ف(الله فى عون العبد ما دام العبد فى عون اخيه)او كما قال صلى الله عليه وسلم.

واحب ارحب بيك فى المنتدى(رغم انى جديد زيك بردة يا دوب بقالى اسبوع واحد لكن الحقيقة لقيت هنا فى المنتدى ناس محترمين جدا همهم هوا مساعدة غيرهم ربنا يكرمك ويكرمهم ويقدرنا نبقى زيكوا دا غير طبعا الافكار والاراء المختلفة اللى الواحد بيتابعها هنا).

وكان ليا استفسار بخصوص سفر الاطباء للعمل بدبى والشروط المطلوبة لو عندك اى معلومات بخصوص الموضوع دة هاكون شاكر جدا

وبخصوص السنة الجديدة الهجرية والميلادية ف(كل سنة وانتا طيب يا راجل يا طيب)

[EGYPTDNRD]

شكرا لترحيبك اخت فاطمه واتمني مبقاش ضيف تقيل عليكوا

اخويا Torontotruk بالنسبه للجنسيه هما مش بيدوا حد الجنسيه بسهوله دي ليها اجراءات طويله اوي ومعقده التفاصيل وبعدين في ناس بتبقي اكتر من 30 و 40 سنه ف البلد ومش عارفه تاخدها يعني في اتجاهات انهم يعدلوا قوانين الجنسيه بس هتاخد وقت طويل شويه اصبر ان الله مع الصابرين والله معاك...

شكرا ليك doctoratef علي اطرائك الجميل دا بس بالنسبه لسفر الاطباء للعمل هنا ف الامارات هما احيانا بيطلبوا اطباء للعمل ف بعض التخصصات بس للاسف الايام دي بيتجهوا للامرته يعني المواطنين اولا ثم المقيمين عموما اديني بس فرصه اسالك حبيايبنا الاطباء هنا ايه اكتر التخصصات المطلوبه وانت ياريت تعرفني ايه تخصصك عشان لو في خير ربنا يقدمه والله معاك....

ويارب اكون اتوفقت ف الرد علي الاسئله وف انتظار اي سوال من اخواني وانا تحت امركوا دايما... DNRD

[doctoratef]

الحقيقة مش عارف اقولك اية يا استاذ/EGYPTDNRD انا بشكرك جدا على ردك السريع دة وبالنسبة لتخصصى ف(مسالك بولية) وشكرا مرة تانية لاهتمامك

[Torontotruk]

شكرا لترحيبك اخت فاطمه واتمني مبقاش ضيف تقيل عليكوا

اخويا Torontotruk بالنسبه للجنسيه هما مش بيدوا حد الجنسيه بسهوله دي ليها اجراءات طويله اوي ومعقده التفاصيل وبعدين في ناس بتبقي اكتر من 30 و 40 سنه ف البلد ومش عارفه تاخدها يعني في اتجاهات انهم يعدلوا قوانين الجنسيه بس هتاخد وقت طويل شويه اصبر ان الله مع الصابرين والله معاك...

جزاك الله خير...عام سعيد