أخبار الشقق في التجمع أيه دلوقت

[nile flower]

عايز أعرف أسعار الشقق وصلت كام في التجمع بالنسبة لموقع خلف الميراج سيتي على طول و بجوال السوان ليك , حد عنده فكرة و ممكن يساعدني في الموضوع

[dongol]

عيب المنطقه اللي ورا الميراج سيتي هي بعدها شويه ولكن هي منطقه واعده والاسعار ما تزال مرتفعه حيث ان معظم المقاولين ما زالوا متمسكين بالاسعار السابقه

الاسعار في المنطقه دي بين 500 الف و ستمائه الف علي حسب المساحه و تاريخ التسليم

انا كمان كنت بدور في المنطقه دي علشان اشتري شقه لكن لسه ما اتوفقتش في حاجة مناسبه

بالتوفيق

[abuAdham]

المنطقة الوحيدة ال الاسعار مبتنزلش فيها هي التجمع الاول اما قبالنسبة لسؤالك قصدك الشقق العائلي ولا في فيلات ولا اسكان البنك ولا اسكان الصندوق ارسل طلبك بالتحديد وان شاء الله الرد موجود بخصوص اي شيئ في التجمع

[nile flower]

يعني أنا عندي حتة أرض في جمعية النخيل التابعة لأكاديمية الشرطة و عاوزة أبنيها و أبيع فيها شقتين , علشان كده عايزة أتأكد البناء على كام بالظبط من مساحة الأرض و المتر هناك بكام , و الأرض بالقرب من نادي وادي دجلة, الرجاء المساعدة على وجه السرعة

[dongol]

أعتقد ان نسبه البناء في هذه المنطقه هي 59% من المساحه الكليه اما بالنسبه لسعر المتر فبصراحه مش عارف بقي كام دلوقتي و احسن حل انك تاخدي جوله في المنطقه و تسألي السماسره

[abuAdham]

السلام عليكم الاخت الفاضلة صاحبة ارض النخيل

اولا : المساحة المقررة للبناء 60 % من مساحة الارض لان ارضك تخصيص وليست قرعة تخصيص للداخلية وهذا سوف يتضح عند التقدم لعمل التراخيص اللازمة للبناء

ثانيا : يجب عليكي التوجة لجهة اصدار التراخيص وانا اظن انها جهاز التجمع الاول وسحب استمارة شروط التراخيص في النخيل وتسليمها الي مهندس مختص لعمل الرسومات واخذ موافقة الجهاز واصدار الرخصة ويسلمك الرخصة كاملة

ثالثا : اختيار مقاول بمعرفتك او معرفة المهندس للبدء في التنفيذ ولو بمعرفة هيكون للمهندس ساعتها اتعاب اشراف

رابعا : قطعة الارض ال عندك كنز ربنا يبارك لكي فيها اوعي تفكري تبيعيها ولو بنيتيها لا تتعجلي ببيع الشقق مهما كان السعر مغري وانتظري لانها في اول القاهرة الجديدة بكرة محدش هيلاقي شبر فيها انا جارك في التجمع الاول وعارف الامور هناك كويس

رابعا : بالنسبة لسعر المتر فهو وحدات بدون تشطيب ( حلوق ومحارة ومواسير صرف وماء ) فقط يبدا من 2800 ج الي 3500 قابلة للزيادة وليس النقصان حسب الموقع وهل ناصية ام داخلي عائلي ام فيلات متميز حديقة ام بدون امامي ام خلفي ارضي وبدروم ام متكرر دوبلكس ام فيلات ام شقة عادية في فيلا الخ يعني كل حاجة لها سعرها

خامسا : واخيرا انصحك ابني اولا وسعر المتر بيتغير من يوم للثاني متفكريش هتبيعي بكام لكن فكري فقط في ان بنائك للارض يؤكد ملكيتك لها في ظل اي تقلبات وبأعلان في الوسيط الف من هيتصل بيكي ولو السعر اقل من السوق 50 ج مش هتقعد وممكن تبيعي قبل صب السقف وربنا معاكي ( ملاحظة ) انصحك بعمل بدروم له فوائد كثيرة جدا جدا مثلا هيرفع البناء \ هيبقي عندك دور زيادة \ ممكن تأجرية \ ممكن تضيفية علي الارضي وتبيعية دورين دوبلكس مع الحديقة ومش هيفرق في التكلفة الا بسيط جدا والله الموفق

[osaimi]

مش عارف زيادة إييه اللي عمالين تتكلموا عليها والدنيا كلها واقعة ، يا ناس خليكوا واقعيين شوية

تم تعديل 12 يناير 2009 بواسطة osaimi

[أبو عمر المصري]

العقار هو الابن البار كما يسمونه مستثمرين العقارات والعقاريمرض ولا يموت فاعتقد ان الأزمه الأقتصاديه هذه هي مسالة وقت وبعدها هايرجع العقار لاسعاره العادله فلا خوف من أنهيار أسعار العقارات في مصر على ما أظن أن المطلوب أكثر من المعروض في سوق العقار

[عاشق]

هل فعلا الاسعار في نزول