هل استمر فى خطبتى ام افسخ الخطوبة ؟؟؟؟؟

[مسافر بلا عنوان]

[size="4"]

السلام عليكم ورحمة الله وبركاته

الاخوة الافاضل انا عندى مشكلة وياريت تحلوها لى

انا شاب خلصت دراستى من اربع سنوات .... واشتغلت سنتين فى مصر واثناء عملى عرفت بنت فى تالتة ثانوى وبصراحة حاولت انى الفت نظرها ليا علشان تحبنى لانى بجد كان نفسى طول عمرى اعيش قصة حب بالرغم من انها مش الجمال اللى نفسى فيه .... وبالفعل حبتنى

اخدنا فترة سنتين واهم نفسى بقصة الحب دى لكن هيا الواضح انها حبتنى بجد وبعدين جالى فرصة عمل بره مصر ... سافرت وكانت هيا فى اول سنة فى الكلية ... قعدت فترة ماتصلش بيها لانى كنت قررت انهى العلاقة ... ثم مع الوحدة والحياة الكئيبة اللى عشتها هناك بدأت اتصل بيها وقعدت سنتين بره مصر بينا تليفونات وكلمتنى كذا مرة وقالتلى لازم يكون فيه نهاية لعلاقتنا بالجواز والا تبقى بتتسلى بيا ...

قلت لها مش هاقدر اتجوزك

وقعدنا فترة فى توتر ... اسبوع نتكلم واسبوع لا وهكذا

بدأت تقولى فلان اتقدملى وفلان بيسأل عنى

طوال الاربع سنوات اللى عرفتها فيهم كان جوايا اضطراب من ناحية انى اتجوزها ... بس فى الفترة اللى قعدتها بره مصر كان جوايا صراع رهيب وتعب نفسى ارقنى ... اتجوزها ولا لا ؟؟؟؟ هيا مش الجمال المطلوب ... نفسى فى واحدة اجمل من كده ..... وكان بيصعب عليا طيبتها وحبها ليا

جيت فى يوم فجأة اخدت القرار واتصلت باهلها من غير ما تعرف وطلبتها منهم

قالوا لى ناخد فترة كذا وبعدها نرد عليك

فى فترة دى انا بصراحة ترددت وكنت هارجع فى قرارى تماما ولكن بعدها اتصلوا هما عليا وقالوا بالنسبة لموضوعنا احنا موافقين والعروسة موافقة ...

حسيت انى اتدبست .... رحت قعدت معاها مرة واتنين واخوها سألنى ... ايه رأيك ؟؟؟ مرتاح ولا نقول كل شىء نصيب ؟؟؟ قلتله مرتاح ونتوكل على الله ... .

تمت الخطوبة

يوم الخطوبة ماكنتش حاسس بفرحة نهائى .... بعدها بكام يوم بدأت ارتاح نفسيا .... اخدت معاها اسبوعين فى مصر ثم سافرت ... كنت فى اغلب اللحظات معاها مبسوط او على الاقل راضى بيها كزوجة .

بمجرد انى سافرت تانى بره مصر بدأت احس انى ندمان على الخطوبة دى وانى اتسرعت

اتصلت بيها قلتلها انا بفكر نبعد عن بعض ... طبعا قالت خلاص ننهى موضوعنا مدام رجعلك التردد تانى .

بعدها بكام يوم بدأت اهدأ وقلت انسانة طيبة ومن اسرة كويسة وتعليمها كويس وبتحبنى ... صعب الاقى المواصفات دى ....

رجعت فى كلامى وقلت لها معلش لانى بعيد عنك التردد بيرجعلى كل فترة والتانية

طبعا هيا انجرحت بس علشان بتحبنى سكتت وقعدنا فترة شهر كويسين

وبعدين رجعلى الارق تانى ...

الارق بيرجعلى لما اشوف واحدة جميلة الجمال اللى نفسى فيه ... بحس انى ناقصنى حاجة هافضل طول عمرى محروم منها ... مع انى فى بعض المرات كنت بحس انها مش وحشة وجمالها كويس لكن مش المرضى ليا ...

اليومين دول قررت انهى علاقتنا وبعتلها رسالة بكدا

قعدت تعيط وقالت طيب اصبر عشرين يوم انهى فيهم امتحاناتى علشان اهلى مايتأثروش

انا عارف انها عاوزانى اهدا يمكن ارجع فى كلامى بعد كام يوم

انا تعبت

بجد

مش قادر افكر ... ياترى استمر فى الخطوبة دى ...... علما بأنى طول عمرى بحلم بانسانة جميلة تشرح صدرى لما اشوفها .... وبتأثر نفسيا لما اشوف انسانة جميلة وبحس بالحرمان فعلا ..... ومن ناحية تانية خطيبتنى بتحبنى اوى ... وروحها طيبة وبتتمنى رضايا .....

انا كنت سخيف معاها اوى وقلت لها كذا مرة انى عاوز انهى خطوبتنا ومع ذلك اتحملتنى كتير....

ياجماعة ياريت حد يحللى الموضوع ده نفسيا .... ويقولى اعمل ايه

اكمل معاها ولا لا

؟؟؟؟؟؟؟؟؟؟؟؟؟؟؟؟؟؟؟

تم تعديل 8 يناير 2009 بواسطة مسافر بلا عنوان

[tantrum]

[size="4"]

وكل ما افتكر انى هاتجوزها واخلف منها بنات مش حلوين ويقعدوا ينتظروا حد يحن عليهم علشان يتجوزهم ... ويحسوا انهم اقل من غيرهم .... بموت من الخوف ..... لانى عشت الاحساس ده مع انسانة قريبتى ... فاتها قطر الجواز بسبب انها مش جميلة ..

انا كنت سخيف معاها اوى وقلت لها كذا مرة انى عاوز انهى خطوبتنا ومع ذلك اتحملتنى كتير....

ياجماعة ياريت حد يحللى الموضوع ده نفسيا .... ويقولى اعمل ايه

اكمل معاها ولا لا

؟؟؟؟؟؟؟؟؟؟؟؟؟؟؟؟؟؟؟

بص يا سيدى إنت ممكن تجوز واحدة حلوة جدا...و برضة تخلف منها بنات يطلع شكلهم مش عاجبك أو ممكن يطلع لا قدر الله طفل معوق أو حاجة وممكن تتجوز دى و تخلفوا صبيان و بنات حلوين أو وحشين وأمورهم فى الدنيا هاتلاقيها زى الفل.

الموضوع ده مش بيتحسبش كده خاص

وإنت زهقت لأنك عرفتها فترة طويلة و لو إتجوزت ملكة جمال أمريكا اللاتينية برضة بعد فترة من التعود هاتحس إنها عادى.

أهم حاجة طالما البنت كويسة وإنت ربطها معاك كل ده ماتشيلش بقى ذنبها و تسيبها وإتكل على الله و إتجوزها. وربنا هايكرمك

[مسافر بلا عنوان]

بص يا سيدى إنت ممكن تجوز واحدة حلوة جدا...و برضة تخلف منها بنات يطلع شكلهم مش عاجبك أو ممكن يطلع لا قدر الله طفل معوق أو حاجة وممكن تتجوز دى و تخلفوا صبيان و بنات حلوين أو وحشين وأمورهم فى الدنيا هاتلاقيها زى الفل.

الموضوع ده مش بيتحسبش كده خاص

وإنت زهقت لأنك عرفتها فترة طويلة و لو إتجوزت ملكة جمال أمريكا اللاتينية برضة بعد فترة من التعود هاتحس إنها عادى.

أهم حاجة طالما البنت كويسة وإنت ربطها معاك كل ده ماتشيلش بقى ذنبها و تسيبها وإتكل على الله و إتجوزها. وربنا هايكرمك

انا متشكر على رد حضرتك

انا يعتبر ما ربطهاش معايا ولا حاجة

دى لسه قدامها سنة فى الكلية ... وكده كده منتظره الدراسة تنتهى ....

وبعدين موضوع انى حتى لو شفت ملكة جمال امريكا هازهق منها بعد الجواز بيتهيألى ده مش لازم يحصل

انا دلوقتى اللى فى ذهنى انى هاتجوز جوازة انا مش مقتنع بيها وكده حكمت على نفسى بالتعاسة طول العمر

اما لو بحثت عن انسانة فيها المواصفات اللى عاوزها .... احتمال انى الاقى الافضل واعيش حياة افضل ....

تم تعديل 8 يناير 2009 بواسطة مسافر بلا عنوان

[الباشمهندس ياسر]

بص يا عم المسافر و مش لاقى عنوان انت

انا هكلمك م الاخر

بصرااااااااااااحة انت انسان طماع و انانى جدا كمااااااااااااااان

و متستاهلش البنت دى ولا اخلاقها و لا صبرها عليك

ايه يا عم اللى انت فيه !!!!!! مش كده يا اخى

كل ما تشوف واحدها قصتها احلى ولا ضحكتها اصفى و لا خصرها انحل

تتجنن وتسخن ع الغلبانه اللى انت اصلا علقتها بيك م الاول

مش كده يا اخى...هى بنات الناس لعبة

ولا دخول بيوت الناس بالساهل ولا ايه الموضوع بالظبط

استهدى بالله كده و انوى نية واحدة

يا تكمل على خير و تشيل الاوهام دى كلها من دماغك

و تنسى موضوع المقارنات و الهباب ده

و تعرف انها اكيد فيها مميزات انت مش عارف تدور عليها

ولا مدى نفسك فرصة انك تشوفها اصلا

يا اما تتصل بالناس وتعتذرلهم و تخترع اى حاجة علشان شكل البنت قدام اهلها حتى

و تسيبها تشوف نصيبها مع حد يستاهلها

انما كده انت ظالم

نسيت اقولك حاجة الدنيا كأس وداير

و بكره تطلعلك بنات يا معلم

[مسافر بلا عنوان]

شكرا يا معلم على الرد القاسى بتاعك

فعلا انا انسان انانى ومش كويس

انا عارف كده

عموما هاحاول اعمل بنصيحتك وادور على الحاجات الكويسة اللى مش شايفها

بلاش هايطلعلك بنات دى انا بخاااااااااااااااااااااااااااااااااف من كده

[أحمد سيف]

شوف يا سيدي ... من الآخر ... إذا ما كنتش مقتنع بالجواز منها ألف بالمية أنصحك تنهي الموضوع ... أنت لسه على البر وكل ما تاخذ قرار بدري هايكون ده في مصلحتك ومصلحتها ... واحدة اتفسخت خطوبتها وضعها أحسن من واحدة مطلقة أحسن من واحده مطلقه ومعاها عيال

المفروض فترة الخطوبه دي بتكون أحلى فترة وأكثر فترة الطرفين متعلقين فيها ببعض، بعد الزواج الانجذاب العاطفي عادة بيقل (وهنا مش عاوز أعمم) ومسؤوليات الحياة بتزيد وبتتغير طبيعة العلاقة بين الزوجين خصوصا لو فيه أولاد، ولذلك فبما إنك متردد من البداية فتأكد إنك هاتفضل تفكر بنفس الطريقة طول عمرك وهاتقارن بين وضعك معاها ووضعك مع البنت اللي في خيالك، وفي النهاية إما إنك تعيش حياتك في قلق وهم وندم أو إنك تنهي الموضوع متأخر وتدفع ثمن أكبر في سبيل ذلك

حسب ما فهمت من كلامك إنك خطبتها أول ما اتخرجت، وعادة السن دي بيتغير فيها تفكير الإنسان كثير لإنه بيخرج من جو الدراسه الى جو العمل والمسؤولية ويفهم الدنيا ماشيه ازاي وبالتالي فإن اللي بيحصل معاك هو وضع طبيعي خصوصا إنك كمان سافرت بره مصر وبقت رؤيتك وخياراتك أوسع

نصيحتي إنك تنهي العلاقه دي بالمعروف وبطريقة محترمه وتتحمل مسؤولياتك كاملة أمام أهل خطيبتك، والنصيحة الثانية إنك ما تستعجلش في الارتباط مره ثانيه لحد ما تتأكد إنك طلعت تماما من جو التجربه دي وتستقر أوضاعك النفسية والمادية

آخر كلمه، طبعا أنا ليا وجهة نظر في اللي سعادتك عملته وبتعمله لكن بما إني ما أعرفش كل التفاصيل فما أقدرش أحكم، كل حاله وليها ظروفها الخاصه

ربنا يوفقك ويهديك.

[thatha]

بص ياعم كمالاخر انا حقولك الي في ضميري.والي شايف انه صح. انت يمكن شاب صغير .حقولك من الاخر نصيحه واحده اتعلنتها من35 سنه جواز. و الحمدلله. في الحجات دي لو مش مرتاح .ارجع بدون تفكير والا حياتك حتبى .جهييييييييييييم. و حترفها و تظلمها اكتر و اكيد حتخونها او تجوز عليها.او تطلقها و بكده بدل ما تظلمها في خطوبه كام شهر.حتحسب عليها جوازه ودمرها.فسيبها في حالها دي شابه صغيره.و حبتك في سن مراهقه.سيبها حتعيط شويه وبعد كده تلاقي الاحسن منك وتنساك.وتقول الحمدلله انها متجوزتاكش.سيب البت في حالها و انسها .وبطل تفكر في نفسك بس وبكره تلاقي الي تعجبك وتفرح بيها وكفايه لعب عيال.انسسسسسسسهاااااااااااااااااا .حرام عليك لغايه كده انت مش بتحبها.

[ذهبية]

انا هاكلمك بصراحة من غير زعل طالما انت سالت فكل واحد يقول راية بالطريقة اللى تعجبة

انهى معها العلاقة فوراااااا مش علشانك انت لانك من غير زعل ما تستهلش لانك بجد كنت ندل معاها من الاول نيتك من اول يوم عرفتها فية مش صافية وداخل تتسلى لمجرد ان يكون ليك علاقة مع واحدة و فضلت تضحك عليها على مدى سنين وانت لا مقتنع بيها ولا عمرك فكرت فيها و كملت خداعك وكدبك بانك دخلت البيت والبنت المخدوعة فاكرة انك بتحبها ومش اكتفيت بكدة لا فاضل تحرق دمها انك مش عايزاها لا احترمتها ولا احترمت اهلها ولا دخول البيت داخل البيت تتسلى نيتك من الاول سيئة و بكرة ربنا هيوقعك فى شر اعمالك لان الدنيا دين ودائن زى ما انت اتسليت على بنات الناس بكرة تيجى اللى تتسلى عليك وتخدعك بالضبط بس ساعتها افتكر الىل عملتة فى البنت الغلبانة دى و ربنا حب يدوقك من نفس الكاس فارجوك خليك راجل و سيبها فى حالها

بلاش تكمل عليها حياتها ذل وعذاب و حرقة دم لمجرد انك اتنازلت و بصيت ليها ومخدتش ملكة الجمال و كفاية عذاب ليها وللبيت اللى انت لا عملت لة احترام وكل ذنبها انها حبتك بجد هى ما ضربتك على ايدك وكفاية انها استحملت معاك سنين التردد و التقلب بتاعتك لية علشان اية ؟؟؟؟؟

دة حتى انت مارحمتها وقت امتحانها ولا رحمت صدمة اهلها بجد ابعد عنها هى خسارة فيك و حرام عليك لحد كدة

انت ترضى حد يعمل كدة لاختك ترضى ؟؟؟؟؟؟؟

[الجدار]

بسم الله

شوف يا عم مسافر بلا عنوان احنا كرجاله طبيعتنا وحشه قوي أقولك ليه تفضل تجري ورا البنت لغاية ما تقع في غرامك وبمجرد انك تحس انها اتعلقت بيك تزهق منها وتبقى مش طايقها حتى لو كانت ملكة جمال. شوف انا برضو مسافر زيك وخاطب وبجد السفر بيجيب للواحد حالة اكتئاب مش ممكن تتوصف ازاي الواحد بيحاول يلاقيلها حل ومش بيلاقي غير انه يلبسها للغلبانه اللي خاطبها واللي بيطلع عينها وبيقولها كلام زي الدبش وهي صابرة. انا بقالي فترة الحالة متوترة بيني وبين خطيبتي احنا تقريباً بقالنا 3 سنين مخطوبين منهم سنتين ونص بعاد عن بعض اكيد مشاعرنا بتختلف لكن بمجرد اني بنزل وبشوفها بجد بنحس اننا مخطوبين امبارح. صدقني كبت الغربه هو السبب وزي ما بيقولوا الغربه زي ما بتديك بتاخد منك.. وانا بقول الغربه بتديك فلوس وبتاخد منك حبايبك وصحتك وذكرياتك وبلدك بتاخد أد مابتديك ألف مرة.

وحكاية اخلف بنات وحشين ولا الحاجات دي فسيبها لله في بنات حلوين من بره وانا معاك بيبقوا مغريين وبيلمعوا لكن من جوا مستودع قاذورات بجد توكل على الله وكمل مشوارك صدقني هي بتحبك وماتقساش عليها علشان هي اللي حتشيلك بعد كده.

بجد بنات مصر جدعان. وليك الإختيار.

ممكن نصيحة برضوا نسيناها عليك بصلاة الإستخارة والدعاء.

[pharaon]

السلامو عليكم

بص يا باشا

انتا على فكرة من سنى تقريبا

سكة 24 او 25

المهم ان الموقف بتاعك ده يا باشا حصل معايه بالضبط مع اختلاف بعض التفاصيل

بص يا باشا

لو هى مش عجباك سيبها طبعا

جمال مراتك لازم يكون مالى عينك عشان ترتاح فى حياتك بعدين

انا لما كنت فى نفس موقفك ده نهيت العلاقة مع اهلها ومعاها وسيبتها وبعد فترة بدات استريح بجد وحسيت انى عملت الصح وضميرى مستريح

بس المشكلة انى من ساعتها مبفكرش فى الموضوع ده لانى عاوز اختار صح ومش عاوز اظلم نفسى تانى

عموما انتا سيد قرارك فى الموقف ده

بس فكر فى كلامى كويس

لانى شايف ان التجربتين (بتاعتى وبتاعتك) قريبين لبعض جدا جدا

وربنا يوفقك فى حياتك انشاء الله :)

[basem mohsen]

انا شايف انى المشكله كلها افيك انت مش فى البنت ولو اتجوزت اى واحده هيبقى ده رايك حتى ولو كانت جميلة الجميلات لانى اكيد مهما اتجوزت واحده هيبقى فى اللى احلى منها زى مانت اكيد برده انى فيه اللى اوسم منك الموضوع مش للرجل وبس ليه دايما بنقول انى الرجل بس هو اللى لازم يلاقى احلى واحده , البنت برده نفس الشىء ممكن تحلم بواحد يكون اوسم من خطيبها او جوزها علشان كده بنقول الحب هو الحاجه الوحيده اللى بيخليك تشوف اللى انت بتحبه احلى الناس على الاقل فى عينيك . فكر كويس واعرف انى الفرصه الكويسه مبتجيش كتير وربنا يهديك للى فيه خير ليك

[شاب مصري]

بصراحة مشكلة قوية

والافتاء فيها صعب جدا

كل اللي اقدر عليه ادعيلك ربنا يكرمك ويوفقك الى الخير.

[شاب مصري]

بس موضوع انك تتجوز ارضاء لضميرك ده مش كويس

انا متفق مع رأي أحمد سيف

واحدة خطوبتها اتفركشت احسن من مطلقة

بس في ناس بتقول بعد الجواز ربنا هيألف القلوب

بجد الموضوع صعب ومش قادر اديك نصيحة .

[brooonze]

بسم الله الرحمن الرحيم

بصراحة الموضوع واضح جدا ... ده قرار مصيري للعمر كله وطالما فيه تردد ولو بسيط لازم تنهيه لأنه في اعتقادي لو خطبت واحده وقالت لك ننهي علاقتنا هتاخدك الحماسة والرجولة وهتسيبها حتى لو كنت بتموت فيها .

العلاقة دي الحب فيها من طرف واحد ولو تم الزواج هينتهي الحب بعد أول شهر ولن يعود الحب مرة أخرى لانك حتى وانت متزوج هتشوف بنات احلى منها كتير ويمكن وقتها لو شاءت الظروف انك اشتغلت في مكان في بنات حلوين واتعرفت على واحده منهم مش هترفض اي علاقة من اي نوع ويمكن وقتها تهدم حياة واحدة حبتك عشان خاطر واحده غيرها .. زواجك منها يظلمها هي اكتر وصغر سنها وحبها الكبير اللي متستحقوش مشاعر هتنتهي لما تسبها واكيد هتلاقي الانسان اللي يقدر مشاعرها.

وانت بتتكلم عن الجمال ويمكن تكون انت شخصيا ماتملاش عين بنات كتير ويمكن يكونوا اقل جمالا من خطيبتك ....

حب الشخصية اكتر لأنها هي اللي بتدوم لكن الشكل الخارجي ممكن يكون مؤقت .

الله سبحان وتعالى خلق الروح بشكل واحد قال تعالى ( ويسألونك عن الروح قل الروح من أمر ربي وما أوتيتم من العلم إلا قليلا ) ولم يقل الأرواح .... للانسان روح ولكن له اشكال مختلفة , خلق الله كل شخص بشكل معين ليس لجعل بعضهم أجمل من بعض وحاشا لله أن يظلم أحدا وإنما خلق اختلاف الاشكال لنتعرف على بعضنا البعض ليس إلا.

ماتظلمهاش وسيبها تعيط يومين احسن ماتعيط العمر كله معاك.

تحياتي.......

[شاب مصري]

عليك بصلاة الإستخارة والدعاء زي ما الأخ الجدار قالك .

[Torontotruk]

العضو الفاضل...رايي انك تفسخ الخطوبة علشان ماتندمش طول حياتك...ويمكن هذا الندم يوقعك في الخطيئة....وهذه الخطبة يمكنها ان تجعلك حزين طوال حياتك ومش راضي...حاول تبحث عن الجمال الذي يرضيك...و الموضوع سهل مادام يخص الجمال الخارجي...ربنا يوفقك في فسخ هذه الخطبة سريعا.

[بركة]

أنا دخلت أرد عليك لسبب واحد فقط

علشان ذنب البنت دي يبقى في رقبتك لوحدك وإحنا مبلغين

اللهم إني قد بلغت اللهم فاشهد

يا أخي الصغير العزيز للأسف أنا ما شفت أبدا حكاية زي حكايتك دي وانتهت على خير

سيب بنت الناس للي هايشوفها أجمل واحدة في الكون

وأوعى تسمعلك كلمتين يعقلوك النهارده ويخلوا دماغك تتظبط وبعدها ب.........

بس واحده حلوه تعدي وكل سنة وأنت طيب

لازم تكون واخد اللي عاوز فيها كل اللي بتحبة حتى لا تدخل في النظرات الحرام

بعد زواجك لأن ربنا لا يرضى أن تترك لعينيك العنان وتشتهي ما لا تملك

ستحول حياتك وحياة المسكينة الى عذاب مستمر...........

واستغفر الله من ذنبها ولا تظلمها ألف مرة .........

أنا حاسه بيها جدا لأني كنت مخطوبة لإنسان زي حضرتك كده بس أنا اللي فسخت الخطوبة

لأني بصراحه ماكانش عندي إستعداد أكون غير نفسي

مهما بلغت الانثى من جمال فهناك من هي أجمل وليس للجمال مقياس ........

إنتظر حتى تفهم الدنيا وتنضج وترى فتاة أحلامك ...

وربنا يرزقها باللي يعوضها عن الأيام السوده اللي جرحتها فيها وهزيت فيها ثقتها بنفسها.........

[عاشق]

انا مريت وحبيت اقرأ الموضوع

بس حسيت اني لازم اقول وانصح والرأى الاخير لك

اولا : العلاقة ابتدت انك بس عاوز تحب وتتحب

ثانيا : حتى الان انك متردد في الخطوبة

انت منتظر ايه

لما تتجوز وخلاص وبعدين تقول لها انا مش عوزك

اعتقد الصورة واضحه تماما مش عوزة اي تفكير

اعتذر لها ولأهلها وانسحب من هذه الخطوبة

وعلى فكرة انا حاسس ان مسألة الجمال دي مش هي السبب

ساعات عقلنا الباطن بس بيخيل لنا اشياء او يعطينا سبب منطقي لانهاء العلاقة

بس بجد لو انت حبتها ولو هي وحشه صدقني حتحس بيها اجمل انسانه

ولو انت من الان متردد وعامل موضوع جملها حجه يبقى مؤكد انت مبتحبهاش

بس في صراع داخلك خطوبتك ليها ده كان مجرد ارضاء لها لانها صعبت عليك ومش عاوز تبقى الراجل الندل الى عشمها بالجواز وخلع

انت حاسس بذنب كبيرة

وصدقني لو اتجوزت الصراع ده هيدنو جواك ويمكن يتطور وسعتها هتبقى بجد ظلمتها لانها اصبحت متزوجة ومطلقة ... افضل انهي العلاقة بكل احترام .. وربنا يوفقك بوحدة تانية

بس نصيحة

الانسانه الى هتقبلها وتكون نصيبك تأكد هتكون اجمل انسانة في عينك .. بس مش شرطة تكون فعلا جميله

هو ده الحب ونظرة الانسان للحبيب .. مش بيقولوا مرايه الحب عميه .. وكل فوله لها كيال .. الامثال دي مغلطتش

تحياتي

وبالتوفيق

[مسافر]

شوف بأه لأني مسافر حديك الخلاصة

لأننا مش فاضيين تدعي علينا بعد كده

سيب بنت الناس في حالها وربنا يكرمها بأحسن منك

ويكرمك بأحسن منها وأجمل وإن كنت أظن ده صعب عليك لأنك

مبتغضش بصرك وحتفضل تقول أنا عايز من ده ومن ده

وفي الاخر حتقع وقعة فل ميأعقش الا الشاطر

[Emo]

الأستاذ مسافر..

رغم ضيقي الشديد من المنطق اللي حضرتك تبنيته في الحكم على انسانة كل غلطتها في الكون انها لاترقى للمستوى المرسوم في خيالك عن الجمال ..الا اني آليت على نفسي اني مش هاهجم حضرتك..

ده لأن مجرد اعترافك بحاجة زي كده وطلبك المساعدة..وتحملك لأنفعالتنا على موقفك ..ده في حد ذاته بيدل على انك انسان ضميرك حي وان كان بيدخل في غيبوبة أحيانا..

اسمحلي أكلمك كأخ..

متهيقلي ان اللي محتاج تغير في الموقف كله هو قناعاتك الشخصية..مش خطيبتك..

لأن الوضع مش متعلق بواحدة خاطبها ومش عاجبك جمالها..

وانما بالفكرة نفسها..

فكرة إن لازم تبقى خطيبتي ملكة جمال..

لازم تتذكر حاجتين..

اولا:إن الكمال لله..يعني اللي هتلاقيها كاملة في الجمال(زي ماتحب يعني) لابد انها هتفتقد حاجة لاتقل أهمية عن الجمال اللي هامك..

ثانيا:أن اللي جواك ده مش مجرد اعتراض بسيط لا ده طمع..وهتفضل كده لو نظرتك ماتغيرتش..لأن كل جميلة في الأجمل منها..هتفضل طول عمرك تدور..!

ياأستاذ مسافر..

ممكن تتجوز ملكة جمال..وفي لحظة يحصل اي حاجة لاقدر الله يضيع جمالها ده كله..

ومع الوقت أصلا الواحد بيعتاد الشكل مابيبقاش شايف فيه جمال ولا قبح..

مهما كان بيعتاده..

لو أنت بتحب الإنسانة دي أو حبيتها لحظة بصدق..كنت هتشوف مواصفاتها هي أصلا مقياس الجمال..اللي هتقيس عليه كل البنات..

مش هتعقد تدور في البنات على اللي ناقصها..

انت حبيت حبها ليك..

حبيت طقوس الحب والمشاعر والإهتمام..

حبيت انك تحس بالإهتمام وبرغبة النثى فيك..

حبيت تعيش قصة انت المتحكم في بدايتها ونهايتها..

حبيت نفسك..لكن ماحبيتش الإنسانة الطيبة اللي ادتك كثير من عمرها..

واسمحلي استنكر جملتك..

انا يعتبر ما ربطهاش معايا ولا حاجة

دى لسه قدامها سنة فى الكلية ... وكده كده منتظره الدراسة تنتهى ....

يعني إيه مايعتبرش ربطتها معاك...!!

ومشاعرها..وحبها..وقلبها البكر اللي حضرتك أغتصبته لمزاجك الشخصي..!!

ده كله مش ربط...!!!!

ماتحاولش تغالط نفسك عشان تريح ضميرك...

انت كده كده جرحت البنت جرح الله أعلم هتقوم منه إمتى..!

بس ده مايمنعش اننا ننصحك ..كفاية لحد كده..

كفاية عشان خاطرها..

وسيب البنت ربنا يعوض عليها باللي يجبر كسرها منك..

بس حط في اعتبراك ان المشكلة هتفضل قائمة مع كل واحدة ترتبط بيها ..لأنها مشكلة جواك..

ربنا يهديك للخير..ويصلحلك أحوالك..

كن بخير..