هل استمر فى خطبتى ام افسخ الخطوبة ؟؟؟؟؟

[أحمد سيف]

معليش يا اخوانا اسمحولي بمداخله ثانية بنفس الموضوع

أنا شايف البعض (وخصوصا الأخوات الكريمات) داخلين شمال في الراجل لمجرد إنه نفسه يتجوز واحد جميله ... كإنها بقت جريمه إن الواحد يدور على الجمال

أنا هنا مش بادافع عن كل اللي عمله صاحب الموضوع ... بالتأكيد عمل حاجات غلط هو نفسه معترف بيها بس ما افتكرش من بينها إنه بيدور على زوجه جميله

من حق أي شاب إنه يدور على مواصفات معينه في زوجة المستقبل ... والجمال أحد هذه المواصفات ... وفي المقابل كل واحدة من حقها تحط شروط للي هاتتجوزه قد يكون من بينها الوسامه والصفات الجسديه ... في النهاية هما هيفضلوا في وش بعض العمر كله ولو ما كانوش مقتنعين بأشكال ببعض وهما في عز شبابهم أمال هايعملوا ايه لما يكبروا

وما فيش أي تعارض بين جمال الشكل وجمال الطبع والروح ... ممكن الاثنين يجتمعوا أو يفترقوا ... وما فيش تعارض برضه بين أن تكون الواحدة بنت ناس ومتدينه ومتربيه ومتعلمه وبين انها تكون جميله ... والرسول عليه السلام ذكر من صفات المرأة الصالحة "إذا نظر اليها سرته" كأول هذه الصفات

سيبك من اللي يقولك الدين والأخلاق بيغنوا عن الجمال ... اللي بيقولك الكلام ده عمره ما بيعمله ... ولو عمله بيبقى قصر ديل ... أنا نسيبي سلفي ذقنه نص متر وجلابيته بعيده نص متر برضه عن الأرض ... قعد يدور على زوجه بمواصفات خاصه كان على رأسها الجمال والطول والقوام وحتى لون الشعر العينين لمدة سنتين وشاف أكثر من 100 واحده لحد ما فيه واحدة منهم عجبته

يا أخي الكريم ... من حقك طبعا أن تبحث عن الزوجه الجميله بالطريق الحلال ولا تقبل بأقل مما تتمناه طالما تستطيع نيله... ده مش طمع ولا حاجه ... لكن من غير ما تورط حد معاك لحد ما تشوف وتقرر

زي ما قلتلك ... توكل على الله وانهي هذه التجربه اللي بدأت معاك بفكر فترة المراهقه وربنا يوفقك ويصلح حالك

[Mohamed Fayek]

على رأى أجدادنا زمان قالوا خد اللى تحبك وماتخدش اللى تحبها

لكن لى سؤال لسعادتك ......... لو أختك وقعت فى نفس المشكلة ماذا كنت تفعل ؟ وكنت حتقول إيه على خطيب أختك اللى فى نظرى غير سوى .. إتقى الله فى بنات الناس وإحساسى إنك حتقع وقعة مع واحدة توريك النجوم فى عز الظهر وساعتها حتفتكر هذه الفتاه وكيف ظلمتها وكسرت قلبها لكن فى النهاية القرار فى إيدك وأرجو أن تحكم ضميرك وإعلم جيدا بأن الله يمهل ولا يهمل

وربنا يعفو عنك ويهديك أما خطيبتك فأدعوا الله أن يبدلها زوجا خيرا منك وأن تحمد الله على عدم الإرتباط بك

[fatfouta]

اخى الكريم

انا هقولك حاجة خلينا نمسك الموضوع حاجة حاجة

1-انت ماتستهلهاش عشان هى واحدة ذى مانت بتقول بنت صادقة معاك وعلى العكس انت مش صادق معاها ابدااااااااااا

2-افسخ الخطوبة وفورا عشان ماتظلمهاش اكتر من كده عشان كده حرام وعلى الباشمهندس ياسر ماقالك بكرة يبقى عندك بنات وتلاقى اللى انت عملته ده فيهم هما عشان ربنا مش بيسيب ظالم وانت ظلمتها يوم ماحاولت تلفت نظرها ليك

3-اما انت شايفها من الاول مش عجباك ولا شكلها جميل ذى مانت عاوز ايه اللى يخليك تحاول ترتبط بيها ولا هو عشان انت وبصراحة كده ماكنتش لاقى حد بيبصلك فقلت اهى واحدة وخلاص

4-جوازك منها مش هينجح لان انت واحد معلش يعنى مش هتكتفى بانك تبص لدى ولدى وهتقعد طول عمرك ده لو كملتوا مع بعض يعنى هتقعد علطول شايف ان انت خسارة فيها مع انى اشك فى ده يعنى

5-وذى ماقلك الباشمهندس ياسر الله ينور عليه انك حتى لو اتجوزت اية فى الجمال انك بعد الجواز خلاص هتقول ابص بقى لحاجة احسن واجمل

6-ولو عندك اخت ذى ماقلك الاخ المحترم جداااااااا محمد فايق هتقبل انه يتعمل فيها كده وهل هتسامح اللى يعمل فيها كده يا اخى حرام عليك والله

7- وده بقى اخيرا هو انت شايف نفسك جميل اوى عشان ترضى بيك واحدة جميله والله لا الراجل ولا البنت بالجمال يا سيدى خد اللى تحترمك وتحافظ على بيتك وتقدرك وتحبك بس الانسانة دى لا خلاص ماتاخدهاش عشان انت مش جدير بيها سيبها تلاقى اللى يقدرها

والله مابالجماااااااااااال

8- ذى ماقلتلك اختى بركة الله يكرمها انت لسه صغير فى السن اعطى نفسك فرصة تعقل وتكبر اكتر وتنضج وتفهم الدنيا اكتر لان والله الدنيا والجواز مابالجمال ولا الحلاوة يا خويا بالبلدى كده خد اللى تصونك

ماتزعلش منى لو كنت قاسية معاك بس انت بصراحة غيظتنى ايه ده يا خويا آل جمال و حلاوة آل

انا اكبر منك والغربة ورتنا بلاوى معلش مش عاوزاك تخلى شعور الكتئاب والملل اللى بنشوفة فى الغربة يخليك تقدم على جوازة فاشله ومش هييجى من وراهل حاجة غير تعاسة ليك انت وبنت الناس المظلومة دى

وهى بقى سيبها تشوف حد كويس يكون مقتنع بيها حاببها ويحافظ عليها لكن انت لا لا لا

والقرار ليك فى الاخر

[Emo]

معليش يا اخوانا اسمحولي بمداخله ثانية بنفس الموضوع

أنا شايف البعض (وخصوصا الأخوات الكريمات) داخلين شمال في الراجل لمجرد إنه نفسه يتجوز واحد جميله ... كإنها بقت جريمه إن الواحد يدور على الجمال

ياأستاذ أحمد..

مش انه يدور على الجمال المشكلة..

المشكلة انه أكتشف متأخر أووي أنه بيدور عليه..

بعد ماعلق بنت الناس بيه شوف كام سنة..

يعني يربط حياتهم ببعض..وبعدين يجي يقول مش قادر أكمل عشان مش جميلة..

طيب كان فين الإحساس ده من أول ماعرفها..

عموما ربنا يختارله الخير ويختارلها كمان الخير

[DIA ELDIN]

يا اخي بصراحة حرام عليك واتقي الله

يا اخي العزيز الجمال نسبي وبعدين كل جميلة فيه الاجمل منها

وبعدين الجمال جمال الروح وفين تلاقي يا اخي واحدة تحبك زي كدا وانت بنفسك بتقول على خلق وعلى فكرة دول ناس كويسين والشاهد من كلامك انت بتقول اخوها قعد معاك وسألك في قبول ولا لا بعد مشوفتها اكتر من مرة

اخي العزيز بنات الناس مش لعبة وحاول انت تصلح من نفسك المترددة طول الوقت دي بدل ما انت تكسر بخاطرها وبعد كدا تجيلك واحدة تطلعة من عنيك متزعلش مني

وبعدين يا اخي انت فعلا قاسي قوي يعني عاوز تفسخ في وقت امتحاناتها يا اخي حرام عليك

اتقي الله في البنت دي ولو انت مش شايف اي ملاحظات على اخلاقها حاول تعجل بكتب كتاب طالما انت متردد بالشكل دا

خلص الكلام

[DIA ELDIN]

وهى بقى سيبها تشوف حد كويس يكون مقتنع بيها حاببها ويحافظ عليها لكن انت لا لا لا

والقرار ليك فى الاخر

اة ماشي كلامك مظبوط بس يسبها بعد معلقها بيه اربع سنين اكيد دا ظلم مكنتش خطبتها ولا انت بتغير نظارة من وقت للتاني

[fatfouta]

وهى بقى سيبها تشوف حد كويس يكون مقتنع بيها حاببها ويحافظ عليها لكن انت لا لا لا

والقرار ليك فى الاخر

اة ماشي كلامك مظبوط بس يسبها بعد معلقها بيه اربع سنين اكيد دا ظلم مكنتش خطبتها ولا انت بتغير نظارة من وقت للتاني

طيب قوللى انت يعمل ايه يتجوزا وبعد كده يقعد طول عمره حاسس انه يستاهل احسن من كده ويظلمها دايما بالاحساس ده معاه؟؟؟

ولا يسيبها تشوف حياتها ولما تسيبه دلوقتى بقى بالبلدى كده احسن من لما تكون بينهم عيال يا اخواننا والله

دى وجهة نظرى يا اخ ضياء وانا مش عارفة اذا صح ولا غلط بس انت كمان لا يرضيك انها تتجوز واحد مش حببها وانتوا عارفين ان بعد الجواز الحب لو مكانش قوى بيقل جدا وبيروح لانه بيتحول لمسئوليه وبيت وعيال وحاجات تانية كتير

وفقكم الله

[Mohamed Fayek]

ياترى بعد ماشفت كل الآراء دى ممكن تقول لنا قرارك إيه ؟ طبعا حقنا نعرف لأنك طلبت منا المساعدة وأرجو ألا تعتبر ذلك تطفل منا ولكن إعلم ياأخى الفاضل نحن جميعا مشفقون عليك ... مشفقون عليك من مستقبل لايعلمه إلا الله سبحانه وتعالى وسامحنا على قسوتنا لإنك بصراحة فورت دمنا وإعلم جيدا أن تعاطفنا مع خطيبتك التى لم يراها أحد منا هو حب من الله سبحانه وتعالى ( من أحبه الله حبب فيه خلقه ) وأخيرا أدعوا لك بالهداية وربنا يسامحك .... بس لى رجاء أخير إذا كان قرارك الإنفصال فأرجو أن تكون رحيما بتلك الفتاه وعليك أن تصبر الى أن تنهى دراستها ولا تكن قاسى غليظ القلب

[somayasaleh]

بسم الله الرحمن الرحيم

ماتظلمهاش وسيبها تعيط يومين احسن ماتعيط العمر كله معاك.

تحياتي.......

انا مع نفس الرأي ده

سيبها فورا.......علي رأي اغنيه

فضل شاكر ------

اللي انت جاي علشان تقوله كمله....كده او كده حكايتنا مش ح يطولوا... يبقي ليه البعد بنا ناجله

سيبها وربنا معاك ومعها.....متظلمهاش اكتر من كده

[أحمد سيف]

الظاهر الأخ "مسافر ضاع منه العنوان" ضاع منه العنوان فعلا

الراجل بعد ما طرح مشكلته وطلب آراء الناس قام واخذ بعضه وماشي وساب الناس تخبّط في بعضها

يا ريت يرجعلنا بمشاركه واحده يقول فيها رأيه في الكلام ده كله أو يقول كثر خيركم تعبتكم معايا ونسّك على الموضوع أو حتى مع السلامو عليكم كده حاف

[enjisultan]

اسمحى اقولك رايى لان فعلا الموضزع مستفز اى حد انة يقولك راية واكيد مستفز اكتر للبنات ....طبعا هو تنفصلوا كدة افضل.... وهو انا عايزة اقولك على معلومة حتى لا تتكرر المشكلة مرة تانية ان فى نوع من الناس بتحب حب شخص ليها يعنى مش بتحبها هية وانا اعتقد انك النوع دا من البشر وعلى فكرة لازم تتعلم تعرف ازاى الفرق مابين انك تحب حد او تحب اهتمام حد او حب حد ليك وبلنسبة لموضوع الجمال دى حجة لانك انت اللى ابتديت تشغلها يعنى حضرتك كنت شايفها حلوة والا كنت شغلت واحدة احلى من الاول لان اسمحلى لو المشكلة مشكلة جمال يبقى كل يومين هتزهق وربنا يهدي لك نفسك للخير

[nash]

أخي الكريم المسافر

أفسخ الخطبه حتي لا تظلم نفسك وتظلمها في المستقبل حينما تقارنها بالأخريات.....

شخصيا كام لولدين ...سيكون الجمال أحد طموحاتي.....طبعا بجانب الدين والنسب....

من يقول أن الجمال شيء ثانوي ..يتكلم من منطلق العاطفه فقط..... غافلا عن المشاعر التي تتغير لسبب او لاخر....

طبعا أنت مخطيء في حق الفتاة ...لإنها تعلقت بك كثيرا..ولكن الأمور لازالت علي البر والأن افضل من أن يكون في المستقبل اطفال سيدفعون ثمن أختيار تم في لحظه طيش..

نصيحه أفسخ الخطبه الأن...ولا تتزوج لمجرد الشفقه والعطف..

[نهى حمودة]

انا من راي thatha وذهبية ياريت تسيبها من غير ما تصعب عليك البنت صدقني لانه صدقني هي الكسبانة

[شاب مصري]

على فكرة الاخ مسافر -صاحب المشكلة- على الاقل عنده ضمير

شباب كتير جدا بيكون عاوز البنت تحبه وبعد ما يخليها تحبه يرميها وينفضلها خالص

وبدون اي تأنيب ضمير

يعني ناس كتير جدا كده

فمهما كان هو راجل صاحب ضمير حي.

[somayasaleh]

الاخ صاحب المشكله راح فين يا جماعه ؟.....

ارجع للتوبك بتاعك....

اعتقد ان الاراء كلها اجتمعت علي ان الموضوع لازم ينتهي فورا......

وربنا يوفقك بالانسانه اللي تملأ قلبك وعينك

وربنا يوفقها بانسان يقدره ويعرف قيمتها

:roseop: :lol:

[ام بلال]

الأستاذ مسافر بلا عنوان :

أخي الفاضل ، أثارت تساؤلاتك أشجان كثيرة كان قد أثارها موضوع بعنوان " إنت حبيت كام مرة قبل مراتك ..ممنوع الكذب "

و قد كان لي في رأي :

- تأثرنا الشديد برومانسية الأفلام التي " ما بتأكلش عيش "فهي بعيدة كل البعد عن الواقع الفعلي .

- اهتمامنا بحاجاتنا نحن نحن دون وضع أنفسنا في نفس المكان ، بمعنى : لو واحد حب أختك ، و قعد رايح جاي معاها أربع سنين ، يروح عن نفسه ، و طبعا ما كانش بيمسك إيديها و لا بيسبل لها عينيه و بيشرح لها فيزياء ، و إنت شخصيا كنت بتسمع كلامه لها ، فلا تجد غبار عليه !!!!! و أكيد كنت فخور بهما صح ؟؟؟؟؟!!!!

- إختيار" الحب " بتاع الأفلام يكون عادة مبني على مظاهر دون النظر لأي مصالح حقيقية بعد الزواج ، مش مهم العقل مش مهم التعليم مش مهم الدين أهم حاجة : آآآآآآآآآآآآآآآآآآآآآآآه حبيتها ، "يعني مراية الحب عامية" ،و " بكرة نقعد على الحيطة و نسمع

الزيطة ".

- حدد موقفك من التجنيد ، مثل ما قال المهندس ياسر لك و كل الأفاضل ، لأن عدم إقتناعك بها سيكون الشيء الذي يأتي على ذهنك من حين لآخر بعد الزواج ، و عدم إقتناعك بجمالها سيجعل ( إحم لموآخذه يعني ) عينك زايغة على الجميلات (و القنوات الفضائية لا تقصر بصراحة في عرض الفاتنات عشان خراب البيوت ) و الهدف من الزواج الإحصان و غض البصر .

- لي صديقة تزوجها زوجها لأنها بنت حلال و وضح لها أنه تزوجها عشان الأخلاق و دينها لكنه كان يطمح في جمال أكثر ، قالها صراحة كده ، و هي للأسف حبته و تغاضت ، كل حين و آخر بعد الزواج و إنجاب طفلين ، يخبطها بكلمتين ،رغم إنها مهتمة جدا جدا بنفسها لكنه غير قنوع ، عاوز واحدة أجمل يقولها مثلا :

أنا سأتزوج عليك واحدة حلوة و إنت هخليك للعيال و الخلفة ( حاجة تفقع المرارة ) ، تيجي المخلوقة تقعد تعيط لي ، أقعد أطيب خاطرها ،

خلاصة كلامي :

- من حقك تختار من تحب من ناحية الجمال و أن تقتنع بشكلها و أن يؤدم بينكما ، و لكن لا تجعل الشكل أهم من الدين و الأخلاق و الأصل الطيب ، أسوأ إمرأة الجميلة سيئة الخلق تأكد أنها هتطلع عينك ،فإذا قررت الإنفصال أطلب الجميلة المتدينة ذات الأخلاق .

- إذا كنت قررت تتمسك بخطيبتك فاتقي الله فيها و اوعى تذلها بكلمتين كل شوية بعد الزواج، لأنها مالهاش ذنب، و هتكون علاقتك بها عبارة عن حصالة سيئات من الظلم ،و الظلم ظلمات يوم القيامة .

- المماطلة في هذه العلاقة المبتورة ظلم آخر لها ،

- صلي إستخارة و فكر و قرر و تحمل أنت فقط نتيجة إختيارك ، و اقطع عرق و سيح دمه ، يا آه ، يا لأ .

- عليك بالدعاء أخي الفاضل ربنا يوفقك ،و لا تتضايق مني إن كنت أثقلت عليك فمعذرة .

[بركة]

جبتلك خلاصة الخلاصة اقرأ الموضوع ده من محاوراتنا وشوف بعينك كلام الاخ اللي تزوج واحده

مش بيحبها بس صعب عليه انه يسيبها وشوف حاله صراع رهيب في نفسه وكمان مش عايز

يعذب ابنه من قراره لو انفصل عن زوجته وبيتهيقلي التجربة دي قدامك كفاية

الرابط

http://www.egyptiantalks.org/invb/index.php?showtopic=68393

تم تعديل 10 يناير 2009 بواسطة بركة

[مسافر بلا عنوان]

الأخ احمد سيف

انا موجود مع حضرتك بس انا لا استطيع دخول النت الا لحظات قليلة جدا

الاخ شاب مصرى شكرا على حسن الظن ( حيث وصفتنى بان ضميرى حى )

باقى الاخوة والاخوات انا متشكر جدا على الرد رغم ان فيه بعض الاخوات كانوا قاسيين شوية فى النصيحة لكن انا بتقيبل النصيحة بكافة اشكالها لانى دايما ما اضع نفسى مكان الخصم ..

انا عارف فعلا انى اجرمت فى حقها كتير وعلشان كده كتبت هنا اخد ارائكم ....

تعرفوا انا اخدت رأى اصدقاء ليا متزوجين لكن مش بالطريقة المباشرة دى .... قبل ما اخطب كنت بقلهم انا مش عاوز ادور على عروسة وقت طويل لانى بتخنق من التدوير وعارف انى صعب الاقى كل الصفات فى واحدة فياترى ايه الصفات الاساسية اللى لو لقيتها اتوكل على الله ؟؟؟؟ الكتير يقولى الطباع تكون كويسة وتحس انها تصلح ام لاولادك .... اقوله الجمال طيب ؟؟؟؟ يقولى صدقنى بعد الجواز بتحس ان الامور عادى .....

وكنت بحس فعلا انهم راضيين ... وماكنش حد نهائى يعرف انى على علاقة بخطيبتى قبل الخطوبة .

اكتر من واحد قالى وقت الخطوبة وبعدها لازم يجيلك فترة تردد وتحس انك ماخترتش الاختيار المناسب لكن ده بيكون شعور لحظى وبيروح لما تقربوا من بعض .

الاراء بتاعتهم دى دايما كانت بتقنعنى انى لسه علشان ما قعدناش مع بعض فترة كافية مخطوبين وبعد فترة التردد ده هايروح

على فكرة يا جماعة انا خاطب بقالى شهرين ونص بس

انا قلت انى قعدت معاها اسبوعين بس فى مصر .... وسافرت ... والحياة هنا فعلا غاية فى الملل والاكتئاب ..

ساعات بقول لنفسى هوا ده السبب انك بعيد عنها

اوقات كتير لما كنت بقعد معاها كنت بحس انى راضى جدا وقتنع بيها كزوجة .. لكن

انا طول عمرى كنت بنجذب لضفات جمالية مختلفة شوية عن صفاتها من حيث لون البشرة وقوام الجسم .... وده دايما هوا اللى بيخلينى افتكر ان بعد الجواز ممكن تفكيرى يختلف ...

بس اللى انا متأكد منه انى عمرى ما هاكرهها حتى لو اتجوزنا واتغير رأيى بس الفكرة انى خايف من نفسى لأنى ممكن اتجوز تانى .... وساعتها هيا هاتتعب

[Muhammad Zidan]

أوعى تزعل مني

أرد عليك بكل صراحة

إنت رجل طفس .. ما يملاش عينك غير التراب

وبعدين لما تشوف واحدة أحلى شوية .. تقلب دي

يا راجل ...

واضح إنك هوائي ومش راكز ولا مركز حتى

خطبتها عشان خايف لتكون غلطان

ده منتهى الأنانية

في حد يعمل اللي انت بتعمله ده ... دي بنت ناس وعندها قلب ومشاعر وأحاسيس

مافكرتش غير في نفسك بس .. إنت عاوز إيه ونفسك في إيه

إنما فكرت في البنت الغلبانة اللي حبتك وفضلت مخلصة ليك 4 سنين

ما فكرتش كده لما تنهي علاقتك بيها في وقت زي ده بعد كل اللي عملته فيها

مرة تفرحها ومرة تزعلها

فكرت ها تكون حالتها إيه بعد ما تسيبها

يا أخي شوف كلامها معاك .. بتقولك طيب أجل القرار لغاية ما أخلص امتحانات

وانت بمنتهى الـ.... بتقول أسيبها ازاي

الصراحة إنت لو قدامي مش عارف كنت قلتلك إيه ؟

مش عشان إن انت اللي فتحت الموضوع يبقى لازم الناس تتعاطف معاك وتبقى بتتكلم في صفك

الحقيقة انت تستاهل كلمتين أنيل من دول بشوية

بس متهيألي في حد ها يقولهملك غيري .. موضوع مستفز

[مغتربة]

سبحان الله هوه دخول بيوت الناس لعبه

الراجل بيتربط من لسانه

بصراحه لو سبتها يبقى ربنا بيحبها خلال شهرين و نص خطوبه قولتلها كام مره نسيب بعض و اخر مره تقولهالها قبل امتحانتها و لا همك مستقبلها و لا خايف على مصلحتها و لا تاثير كلام زى ده عليها و على مذاكرتها

و ابوها الى حطيت ايدك فى ايده ده ايه مالوش قيمه عندك

ز كبار عيلتك الى اخدتهم معاك فى الخطوبه

بصراحه لو انا امها و جت حاكتلى على كل ده انا بنفسى الى هفسخ الخطوبه و اخليها لواحد يعرف قيمتها صح ز معلش فىاللفظ يكون قد كلمته

لكن ده اسمه لعب عيال

ردى قاسى عارفه بس مش اقسى من اللى انت بتعمله فى البنت المسكينه ده

انا مش معترضه انك تاخد زاحده مقتنع بيها و جمالك يرضيك لكن لعب ببنات الناس و مره اه و مره لا بشكل ده ليه ملهاش اهل

و بعدين انت الى من نفسك رحت طلبت ايدها و بعد كده تقول ادبست ليه هما كانوا ضربوك على ايديك

الزواج حاجه جد مينفعش فيها التهريج اللى انت واخد بيه الموضوع ده

احسم امرك و ايا كان قرارك فنفذه و لكن لا تنظر خلفك بعده سواء كان بالاستمرار او الانفصال

اسفه مره اخرى ان كان اسلوبى جاف معك

تم تعديل 11 يناير 2009 بواسطة مغتربة