بقّين سياسه مع حلبه حصى..وكلام قهاوى مليان أسى

[disappointed]

"الشمس جايه من بعيد...جايه ومعاها يوم جديد

يجعل نهارنا....نهار سعيد....نهار سعيد"

يعلو صوت الراديو بأغنية شاديه التى أصبحت أحد العلامات اليومية المميزة لصباح كل يوم فى قهوة "السد العالى"...وهى قهوة بلدى فى قلب شبرا.....

= مش باين عليه يوم سعيد أبدا......

يقولها صاحب القهوه وهو جالس يعدّ فى "الماركات" على مقعده وصوت أغنية شاديه ينساب من الراديو الموضوع فوق الرف الذى يعلو رأسه

=ليه بس كده يا معلّم حامد.....مش ناقصه كآبه.....ايه اللى معكّر مزاجك كفى الله الشر

=خلّيك فى "اليك" الّى انت مزنوق فيه والنّبى يا أستاذ "ابراهيم" وبلاش نتخابث على بعض.......

=أنا حأخلّص تارك منّه يا معلّم....والله ما أنا عاتقه...لازم آخده عشرتين على ريق النوم تدغدغ له الأحلام الحلوه اللى قعد يحلم بيها طول الليل

=آه والنبى يا حاج "سعد".....أحسن أنا محروق منّه قوى

=ماكانش دورى راح منكم يا معلّم يعنى.....وبعدين اذا كنت أنا مزنوق فى اليك انتم امبارح اتمسكتوا خشب... حرام يعنى الواحد يفرح بدورى جاله من السماء؟؟؟؟ وبعدين أنا مش منفّع القهوة امبارح أنا والحاج"محمود" ونزّلنا مشاريب للكل حلاوة الدورى؟؟؟!!! ما تسيب الطباشيره والدومينو شويّه وتقولّه حاجه يا حاج "محمود"....احضرنا ياسيدى

=بيقولّك لو كان "صدّام" شاف ماتش الأهلى امبارح كان لعب مع الأمريكان بخطّة "انبى"

=ازّاى يعنى يا حاج "محمود"؟؟!!!

=وأنا اللى بأقول عليك "كورجى" قديم يا أستاذ "سامح"!!!........ دفاع منطقه وهجمات مرتدّه

=انسى.....ماتش بغداد متباع

ههههااااااهههههاااااااهههههاااا

تضج القهوة بالضحك......ويتعالى صوت الواد "سندس" وسط الضحكات :

=وعندك واحد "فريسكا" واتنين حلبه حصى........

ثم يتوجّه الى مدخل القهوة محادثا بائع الفاكهة المتجوّل الذى كان مفترشا الأرض على يمين باب القهوه:

=يا بلدينا قلنا لك ماتسدّلناش المدخل وتقريف الزباين....يعنى اللى عايز يشرب حجرين المعسّل بتوع الصبح فى الهواء يقعد براحته ازّاى وانت سادد لنا المدخل كده؟؟؟!!!!

= ما أنا بعيد آهوه يا "سندس"

=يووووه.....يا عم خد لك جنب.......وبعدين أمّا انّك صعيدى بصحيح.....ما قلنالك ماحدّش حيشترى ولا خوخ ولا برقوق طول ما سعرهم مولّع كده

=آدى الله وآدى حكمته......محصولهم شاحح السنه دى قوى

=الاّ صحيح يا باشمهندس "عادل".....ايه موضوع الخوخ والبرقوق السنه دى؟؟؟ عمرها حصلت بالصورة دى قبل ماتطلع معاش؟؟؟؟

=والله يا حاج "سعد" أنا بأحمد ربّنا انّى طلعت معاش لأنى كرهت الزراعه وسنينها من المهازل اللى كنت بأشوفها فى قرارات وتدابير الوزارة.....هيّه يعنى جت على مهزلة الخوخ والبرقوق السنه دى.... العمليّه ماشيه من سيّى لأسوأ وأحوال البلد كلّها – مش بس الزراعه- فى النازل....آهو الأستاذ " سامح" يقول لك على الفضايح اللى شافها فى الغرف التجاريّه

=يا عم مالكش دعوه بالأستاذ "سامح" ...... بس بجد ....بجد.....المحصول بتاع الخوخ والبرقوق انضربوا الضربة المنيّله دى ليه السنه دى؟؟؟

=صحيح يا باشمهندس..... ده أنا سامع ان محصول البرقوق انخفض 70% فى الانتاجيّه و55% فى المساحه المزروعه

=أمال تقول ايه بقى ياحاج محمود عن الخوخ الى انتاجيته انخفضت 80% السنه دى....عليه العوض ومنّه العوض فى البلد طول مافيها شويّة الأرزقيّه والحراميّه اللى ناهشينها

(بالسلامه يا حبيبى بالسلامه)

يأتى صوت "فايزه أحمد" بأغنيتها اليوميه الشهيره من الراديو الموضوع فوق رأس المعلّم "حامد"

=ماسمعش "يوسف والى" الأغنية دى ولا مرّه يا باشمهندس؟؟؟؟

=ياعم هوّه محوّق فيه حاجه؟؟؟؟!!!! ما البلد كلّها بتغنّيها له كل يوم.....بس على مين.....قاعد قاعد لغاية ما يجيب درفها

=بس أنا سامع من الواد "اسماعيل" ابن أختى....ما انت عارف انه فى كلية الزراعة... ان البرقوق مشاكله مش فى ايد يوسف والى....يعنى فهمت منّه طشاش كده ان فيه ظاهرة اسمها عدم التوافق الذاتي والخلطي داخل أصناف البرقوق ...وان ده بيؤدي لعدم توافق مواعيد تزهير الاصناف في وقت واحد علشان تتم عمليات التلقيح والاخصاب

=يا حاج "سعد" ده عامل هامشى.......فيه أسباب أساسيّه نتجت عن قصور أداء رهيب وسوء تخطيط وادارة غير معقوله من وزارة الزراعه أدّت الى انهيار محاصيل تمثّل دعامات أساسيّه لاقتصاد البلد و لتوريدات الشعب الغذائيّه .... ولو الكلام ده حصل فى أى دولة محترمه كان لازم وزير الزراعه والجهاز بتاعه يستقيل لو عندهم كرامه...وان ما استقالوش وكان فيه نزاهة فى البلد دى كان لازم يتشالوا فورا

=ازّاى يعنى يا باشمهندس؟؟!!!

=‏ يا راجل دى عالم يا بتهبّل يا بتستهبل وعايزه تدمّر زراعة البلد....يعنى وزارة الزراعة ماوفّرتش المواد الكاسرة لسكون البراعم والمناسبة لأصناف البرقوق المختلفة , وده شيئ أدّى لانخفاض مرعب فى مساحة البرقوق في أرض الوادي وقلّل انتاجه بصورة مريعه.... وبعدين الأنيل من كده واللى يفوّر الدم بصحيح ان وزراة الزراعه ما بتستفيدش نهائيّا من بيانات الارصاد الجوية علشان تحدّد المواعيد المثاليه والمظبوطه لاستخدام المواد الكاسرة لسكون براعم اشجار البرقوق – ده لو افترضنا انها استخدمتها أساسا-....و ما بتستفيدش نهائيّا برضه من بيانات الارصاد الجوية علشان يتم تحديد التركيزات المناسبة للرش بالنسبة لاصناف البرقوق المختلفة‏...... ده غير ان الباشا اللى راكز على نفس زراعة البلد لغاية ما كتمها بيحسّسنى انّه بيتعمّد عدم استخدام الاصول المناسبة لانواع الاراضي الزراعية المختلفة‏

=ايييييه يعنى....مؤامره يا باشمهندس؟؟؟؟

=والله بقى ما تسألنيش......اسأل وزير الزراعه ليه بيتعمّد فى موضوع الرقوق ده بالذات انّه يعرقل ويعارض نشر صنف البرقوق اللى بنسمّيه الــ"كلزي" والمعروف انّه غزير الانتاج ....و ليه متقاعس لدرجة تنقط عن نشر صنف "صن جولد" اللى النضج بتاعه بيتأخّر شويّتين وبيظهر خلال شهر اكتوبر و ده شيئ طبعا بيخليّه يتحمل عمليات النقل والتداول‏ بدل البرقوق المفعّص والمعطّن اللى الناس تقرف تأكله واللى مبدور فى السوق – وبسعر عالى- لغاية ما الطلب على البرقوق المصرى فى التصدير للدول العربية والخليجيّه بالذات ما انضرب ضربة فى الصميم ....آهى أسواق الخليج كلّها راحت للبرقوق السورى وطنّشت البرقوق المصرى زى ما البطاطس بتاعتنا تصديرها انضرب

=يا نهار أغبر.....البلد بتنهار بالطريقه دى يا جدعان

=البركه فى اللى قاعدين يمصمصوا فيها...وياريتهم بيمصّوا خيرها وبس...الاّ مصممين يدمّروا خيرها اللى ممكن يوصل للشعب.....يعنى يلهفوا الطبق الكبير و يبوّظوا طبق الشعب اللى ماحيلتوش غيره

=طب والحل؟؟؟!!!!

=والله مافيش حل غير ان البيت ينظف بقى من جوّه وييجى ناس عايزه تشتغل علشان البلد...والأهم من كده ان ايديهم تكون نظيفه وكرشهم مايكونش واسع......يعنى لو الجماعة النهّيبه بتوع وزارة الزراعه دول لو كانوا عايزين الخير للبلد وقلبهم عليها بجد مش كانوا بدل ما ضربوا محصول الخوخ بايديهم كانوا ‏توسّعوا رأسيّا وأفقيّا في زراعة أصناف الخوخ المبكرة النضج واللى تصلح للتصدير في المناطق الزراعية اللي بتعتمد علي مياه الري؟؟؟؟ ....... مش كانوا استخدموا نظم الري والتسميد والتقليم والخف المناسبة لكل صنف علي حدة؟؟؟؟؟!!!!‏.‏.......مش كانوا حاولوا على الأقل اتباع الطرق المثلي للجمع والتداول والتبريد السريع علشان يقلّلوا نسب الفاقد ويوصّلوا الخوخ بحالة جيدة للمستهلك في الاسواق الداخلية والخارجية؟؟؟!!!!....... مش كانوا رحموا أرض البلد الزراعيه شويّه من استخدام المبيدات الكيماوية المضروبه ايّاها و ركّزوا على الاعتماد علي برامج المكافحة المتكاملة؟؟؟!!!!!.....مش كانوا زرعوا الخوخ علي الاصول المقاومة لطفيليات ويرقات وديدان النيماتودا‏ بدال ما الخوخ بتاعنا بقى معطّن ومدوّد؟؟؟؟.....يا راجل بلاش كلام فارغ بقى ...فضّوها سيره أحسن ضغطى حيعلى‏

= بيقولّك الواد "سندس" باع صيغة مراته وراح اشترى 2 كيلو خوخ.....جه يأكل أول خوخه لقى فيها دوده...رماها.....جه يأكل تانى خوخه برضه لقى فيها دوده.... رماها....وفضل كل ما ييجى يأكل خوخه يلاقى فيها دوده يقوم يرميها....لغاية ما فضل خوخه واحده بس....راح طافى النور وواكلها

هههههااااااههههههههااااااهههههههاااااااا

تضج القهوة بالضحك......بينما ينبرى "سندس" محدّثا الأستاذ "ابراهيم" :

=كده برضه يا أبو خليل...ماشى......خلّيك بقى فى الخشب اللى الحاج "سعد" مسكك فيه...وايدك بقى على فلوس سندوتشات الفول علشان أروح أجيبها....مش اللعب كان على طقم سندوتشات فول برضه يا حاج سعد؟؟؟؟

=طبعا...قب يا "برهومه" بالمعلوم....احمد ربّنا اننا لعبنا على سندوتشات فول مش على حاجه تقطم الوسط

= وهوّه يعنى الفول اللى مبقاش يقطم الوسط؟؟؟؟؟ ما هو الفول هوّه كمان سعره غلى...ويا امّا بتاع الفول يبيع لك السندوتش أغلى من الأوّل يا امّا يلحّس لك السندوتش بشويّة فول قليّلين

=طبعا.....مش محصوله هوّه راخر انخفض 70%....يانهار أغبر.....من 200 ألف طن انتاج فى السنه لــ50 ألف طن بس؟؟؟ وفى سنه واحده......يادى الخراب المستعجل....طبعا لازم فول التدميس سعره ينط

=مش كنتم بتشتكوا من أكل الفول؟؟؟؟ اشربوا بقى.......آديكم مش حتشوفوه تانى

=بركاتك يا عم "يووووووسف"

=ياعم خلّص........روح يا واد هات السندوتشات...واللى مش قد الفول ما يبقاش يتراهن عليه

=العشرة بتاعة بكره على كافيار....أوفر

هههههاااااااهههههااااااهههههاااااااا

=يالاّ خلّونا نلحق المواصلات.....قوم يا مصرى مصر دايما بتناديك

=على رأيك........ده حتّى صوتها اتنبح وهيّه بتنادينا واحنا ولا احنا هنا

هههههااااااههههههااااااااهههههاااا

=ابقى شخلل جيبك بس علشان حأرزعك عشرتين صايمين بكره

=نفسى مرّه ألعب مع الحكومه عشرة طاوله ومافيش مانع أخسر بس ألم "قواشيطها" بعد ما نخلّص العشره و أخلّص البلد منهم

=ده انت كده باين عليك رايح فى حديد

=لا وانت الصادق....رايح فى "الخشب"

ههههههااااااههههههاااااههههاااا

=يالا.....نشوفكم بكره يا جماعه

=سلام

=سلام

[disappointed]

=شووووووووط

=الله يقطعك.......دى لعيبه مكسّحه....منتخب كسر

=بالذمّه دى شوطه يا حاج سعد؟؟؟!!!!!

=بس فيه تحسّن.....اللى فاتت كانت فى ساعة الاستاد.....دى جت أعلى بكثير

هههههااااااههههههاااااههههههااااا

=الواد اللى شاطها ده المخابرات حتحطّه تحت المراقبه....شفت الكورة طلعت من رجله زى الطلقه ازّاى فى صورة الريّس اللى فوق المدرّجات

=ماهو كمان يا باشمهندس موضوع حشر الصور فى كل مكان يكون الاعلام متسلّط عليه بقى حاجه مالهاش أى معنى....حاجه ماسخه بصراحه

=عرب...عرب....عرب

كلّنا فى الهم شرق

=على رأيك......هيّه هيّه......الجمعه اللى فاتت الواد ابنى –ما انت عارفه الكوره واكله دماغه- قعد يقلّب بالريموت على الفضائيّات العربيّه ويتفرّج على حتت من ماتشات الدورى فيها..... نسخه بالكربون ياجدع.... الاستاد وصورة رئيس أو ملك البلد بالحجم العملاق فوق رؤوس الجماهير فى المدرّجات...انت بس غيّر اسم الاستاد واسم الفرقتين وسيب برواز الصورة فاضى وابقى غيّر الصورة حسب البلد

=واللى ينقط بقى الجماعة اللى رايحه تتفرّج على ماتش كوره وماسكه صورة رئيس أو ملك البلد... والمصوّر أوّل مايبروز الواحد من دول وهوّه موسطن الصورة فى الكادر يقوم المخرج ناقل لك الصورة عليه انشاء الله يكون فيه بنالتى ساعتها...مش مهم...المهم الناس تشوف الصوره

=مش عارف يا أستاذ "سامح" امتى حنتخلّص بقى من الأساليب الدعائيّه الصبيانيّه الساذجه دى... عمر حد فيكم شاف صورة شيراك فى استاد "سان دنيس" والاّ صورة "بلير" او حتّى الأمير تشارلز فى مكتب حكومى فى لندن والآ صورة بوش فى ماتشات الـــ "ان.بى.ايه"؟؟؟!!!!

=دى مجتمعات ماشيه بــ"سيستم" يا عم واللى بييجى بمشّى الــ"سيستم" مش زى عندنا اللى ييجى يبقى هو "السيستم " وهوّه اللى يعمله على مزاجه ويفضل كابس على نفس السيستم لغاية ما يتّكل على الله بعد عمر طويل ربّنا يدّينا ويدّيكم طولة العمر بقى

=طبعا يا حاج محمود.....مجتمعات "مالتى سيستم"

ههههاااااهههههااااااهههههااااا

=لا...لا....لا.... الموضوع زاد عن حدّه بجد بقى

=عايز ايه من دول زيّنا ماشيه بنظام المبايعات الأبديّه وتولّى الرئاسه مدى الحياه

وهنا.....يعلو صوت المعلّم "حامد" صاحب القهوه:

=وبعدين معاكم بقىىىى.....ماتخلّيكم فى الماتش...احنا بنأكل عيش من القهوة دى

=والاّ خايف تزعّل شريكك فى القهوه؟؟!!!!

ههههههااااااههههههههااااههههههااااا

يضحك المعلم "حامد" بعنف ويخاطب الحاج "سعد" وهو يلتقط أنفاسه بصعوبة وسط ضحكاته الفائره :

=الله يجازى شيطانك يا حاج سعد.......تصدّق أول مرّه سمعت النكته دى كانت عن فرغلى بتاع عربية الكبده اللى على ناصية الشارع

=ماهو عمرنا ماكنّا حنوصل لاننا نسمع النكت دى لو كانت المدّه القصوى لرئاسة الجمهوريه متحدّده بدورتين انتخابيّتين مدّة كل واحده فيهم ماتزيدش عن 4 أو 5سنين,

=او لو كان انتخاب رئيس الجمهوريّه عن طريق انتخابات عامّه داخل فيها أكثر من مرشّح

=طب ياسيدى قول على الأقل عن طريق انتخابات برلمانيّه الأول وبعدين ربّنا يبقى يفتحها علينا ونبقى شعوب محترمه تقدر تقوم بانتخاب رئيس الجمهوريّه عن طريق انتخابات شعبيّه

=أو على الأقل نقدر نختار رئيس الوزراء بصوره دوريّه كل 4 سنوات عن طريق انتخابات شعبيّه بين مرشّحى الأحزاب على مرحلتين ابتدائيه ونهائيّه وساعتها ممكن نقترح مثلا نقل بعض السلطات من ايد رئيس الجمهوريّه لايد رئيس الوزراء

=قصدك زى النظام الفرنساوى يا حاج محمود؟؟؟

=وهوّه فيه أحلى من الفرنساوى؟؟!!!

هههههااااااهههههاااااهههههااااااا

=ده ايه الشقاوه دى يا حاج محمود؟؟؟!!!

=لا بجد ...مابهرّجش....أصل النظام الفرنساوى شكله كده أكثر نظام ملائم لينا لغاية ما يتبلور الأسلوب الخاص بنا بعد 10 قووووول 20 سنه من الممارسه الانتخابيّه الصحيحه اللى ممكن تبيّن لينا متطلّبات خصوصيّة التطبيق فى مصر

=طب مش ياخويا لمّا يبقى فيه الأول بند صريح فى الدستور ينص على وجوب ان يكون رئيس الجمهوريه ورئيس الوزراء من المدنيين وليس من العسكريين

=آهو جاى ليكم واحد مدنى عن قريب ان شاء الله

=بعينه

=متأكّد؟؟؟؟

=مش قوى يعنى

هههههااااااهههههاااااهههههااااا

=طب ماهو ده اللى كنّا بنقوله الأسبوع اللى فات....مش قلنا انه لابد من اعلان نائب لرئيس الجمهوريّه ومايكونش له أى صلة قرابه برئيس الجمهوريّه؟؟؟

=يا عمّنا مش لمّا الأوّل يحسّسونا انه فيه أساسا نيّه انهم حيسمحوا بالتداول السلمى للسلطه؟؟؟؟

=و النيّه دى بقى يورّيها لك ازّاى يا فكيك؟؟؟

=مايلغوا ياعم الفقره الدستوريه اللى بتنص على أنه لو الحزب الوطنى ما حصلش على الأغلبيه فان من حق رئيس الجمهوريه تشكيل وزارته من بين أعضاء وكوادر الحزب الوطنى

=بطّلوا ده واسمعوا ده.....ناقص تطلب نبقى زى الدول المحترمه و نضيف للدستور فقرات تؤكّد أحقّية الحزب الحاصل على الأغلبيّه فى تشكيل الوزاره

=والاّ يكون الفجر وصل بيك يا عمّنا لدرجة انك تطالب بوضع معايير الائتلافيّه الحزبيّه للحكومه حسب النسبه المئويّه لحصول كل حزب على أصوات الناخبين

=وايه المانع بس يا بشر....هوّه احنا مش زى بقية شعوب وخلق الله.... أنا مش عارف تالحزب الوطنى خايف من ايه..... ما يطّمن ويحط فى بطنه بطّيخه صيفىوليطمئن الحزب الوطنى...هوّه احنا عندنا دلوقتى أى حزب فى مصر يقدر يشكّل وزاره غير الحزب الوطنى....وأقطع دراعى ويسمّونى "ابراهيم الاكتع" لو الوضع ده مافضلشى كده 10 سنين كمان

=ازّاى بقى.....ده الوفد.....

=ياعم وفد مييييييييين......هوّه احنا عندنا أحزاب من أساسه والاّ فيه ممارسات حزبيّه....ماتحضرنا ياحاج سعد....انت مش كنت وفدى أبّا عن جد

=كنت....دلوقتى فيه وفد...بس مافيش حزب

=حتّى ولو......بس اصلاحات زى دى ممكن تفتح باب التغيير

=وممكن ترجّع الحياه مرّه ثانيه للشارع السياسى

=وممكن تنشّط الممارسه الانتخابيّه اللى الشعب مابقاش بيهتم بيها

=ياجماعه اللى بتقولوه ده محتاج تعديل جذرى واعادة هيكله كامله فى النظام الحزبى ونظام الممارسه السياسيّه فى البلد

=وماله يا باشمهندس.....أول حاجه يقرّوا نظام الانتخاب بالقوائم النسبيّه ويطمّنوا الناس على نزاهة الانتخابات ويخلّوها تحت الاشراف القضائى الكامل سواء لمجلس الشعب أو الشورى

=وليه لأ فى انتخابات المحلّيات كمان

=طب ما الأسهل والأحسن بقى انهم يشكّلوا لجنة اشراف دائمه على شئون الانتخابات من السلك القضائى... ده زيمبابوى وكينيا عاملين كده يا جدعان

=يبقى فى الحاله دى لازم يسيبوا الأحزاب تتنفّس شويّه ويلغوا قانون انشاء الأحزاب فى مجلس الشورى

= بلاش دى.....خطوه خطوه.....على الأقل يعطّلوا عمل لجنة تصاريح انشاء الأحزاب فى مجلس الشورى وبعد كده يبقوا يلغوها تماما

=أو قول يا سيدى على الأقل يلغوا شرط التميّز الحزبى

= وهو أضعف الايمان....ايه المانع ان أى حزب يعتبر قائما قانونا بمجرّد تشكيله والاعلان عنه واخطار الجهات التشريعيه والتنفيذيه المختصه

=أيوه ياحاج....بس الساحه كده حترطرط أحزاب مالهاش لازمه

=ده اللى الحكومه عايزه تفهّمه لينا.......ياسيدى يبقوا بعد كده يغربلوا كل الأحزاب التلى حتطلع

=ازاى

=سهله قوى.....يحددوا نسبة اصوات مئويّه كل حزب يكون مطالب بالحصول عليها –قولوا مثلا 5%أو6%- علشان يسمح له بوجود ممثّلين له فى المجلس

=معقول والله..... آهو ده أوتوماتيك حيخللى الأحزاب الغير جدّيه والغير مؤثّره فى العمل السياسى تتحلل وتفكك من نفسها

=مش كده برضه....و آهو بالتدريج تبان بقى ملامح الشارع السياسى اللى ساعتها مش حيفضل فيه غير الأحزاب القويّه الجدّيه واللى لها جذور وأصول فى الشارع

=والله شكلكم حتبيّتونا فى الشارع.......خلاصة الكلام......كل ده مش ممكن يحصل الاّ لو رئيس الجمهوريّه تنازل عن رئاسة الحزب الوطنى

=أكيييييد......وساعتها بقى نقدر نقول اننا رجعنا لوضعيّة حكومة الحزب مش حزب الحكومه اللى احنا عايشين فى وضعيّته دلوقتى

وهنا....يتدخّل المعلّم حامد قائلا:

=قصره........الماتش خلص يا بهوات.....فوقوا من الأحلام بتاعتكم واسمعوا الواقع

واتّجه المعلّم حامد للتليفزيون ليقوم بتعلية الصوت ... فاذا بالمعلّق يقول:

ونهدى فوز منتخبنا القومى بالطبع الى السيّد رئيس الجمهوريّه راعى الرياضة والرياضيين و أب جميع المصريين ...و..و...و....

قام الجميع بدفع الحسلب ومغادرة القهوة مطئطئى الرؤوس عندما كانت آخر صورة يتم بثّها من ملعب المباراة على شاشة التليفزيون....

هى......

كلوووووووووز....

و....

زوووووم.....

على

صورة.....

رئيس الجمهوريّه

[disappointed]

=أمّا انّك عديم الدم والاحساس صحيح

=الله اللّه الله....ايه؟؟ ..ليه كده يامعلّم؟؟....فيه ايه بس يا معلّم حامد؟؟!!!

=ايه اييييييه بس يا فتحى؟؟؟ مطرقع لك رغيفين فينو لغاية دلوقتى وانت عمّال تسقسقهم فى الشاى أبو حليب ومش مراعى احساس الأستاذ كمال اللى رجليه بتقع كل يوم فى طابور فرن العيش الأفرنجى بعد صلاة الفجر علشان يلاقى عيش فينو لسندوتشات العيال فى المدرسه...ما تراعى شعوره يا أخى

=سيبه يا معلّم حامد....ربّنا يفتح عليه كمان وكمان...الواحد ما اتعوّدش يبص للخير اللى فى ايد غيره....أنا بس اللى مجنّنى بيعرف يلاقى عيش فينو ازّاى وفين...ماتقول يا فتحى....ده احنا اخوات برضه

=يا عم ده باين عليه ماشى مشى بطّال اليومين دول و بيتاجر فى الصنف..مش شايف آثار النعمة المفاجئة ظهرت عليه ازّاى.. تلاقيه بيجيب العيش الفينو من السوق السوده

=والاّ تلاقيه بيجيب فينو متهرّب

هاهاهاهاههههههههاااااااااا

=طول عمركم ظالمينّى كده

=ظالمين مين يا وله....طب ايه العباره؟؟؟؟

=العباره فى الشيكاره

=حيهرّج أهه

=لا...بجد... العباره فى الشيكاره......أنا أصلى متّفق مع الحاج بسيونى صاحب الفرن الأفرنجى اللى تحت بيت أخويا انه كل يومين ثلاثه يدّينى العبش الفينو اللى بيبوظ أو يتحرق وهوّه بيتعمل ويحاسبنى عليه مقاوله بعد ما يعبّيه ليّا فى شوال عامل زى الشيكاره... هوّه صحيح بيبقى ناشف زى الحجر بس آهوه ...لمّا بيتسقسق فى الشاى أبو حليب السخن بيطرى و يبوش شويّه وآهو الواحد بيمشّى الحال

=لاحول الله يا رب

=ظلمناك يا أبو التّوح

=واحنا اللى افتكرناك وقعت على منجم عيش فينو وكنّا حنبتدى نتراذل عليك ونستغلّك

=يا عم تستغل مين....طب قول انا سنانى بتستحمل و عرفت أصرّف أمورى...بس انتم اللى بتصعبوا عليّا وانتم محتاسين فى سندوتشات مدارس العيال....بتعملوا ايه بس؟؟؟

= والله يا فتحى يا خويا أنا عايز أشكر الحكومة لأنّها خلّتنا كلّنا نتمسّك بديننا و نتقرّب من ربّنا

=ازّاى يعنى؟؟؟

=ماهو من ساعة أزمة الرغيف الفينو دى واحنا بقينا بنصحى من النجمه علشان ننزل نصلّى الفجر مع بعض فى الجامع ونقف نتزرع فى طابور الفرن الافرنجى بعد الصلاه على طول

=يا ساتر...ده ذل

=ده افتراء

=ده وجع قلب

=لا وانتم الصادقين....ده عار....عارفين يعنى ايه عاااار؟؟؟؟

=عار-فينو

ههههااااههههاااهههههههاااااااااا

=خلّيكو انتم بس كده ماوراكوش غير انتقاد الحكومه وتطليع القطط الفطسه فيها وعمّالين ترموا عليها كل بلاويكو والحل قدّام عينيكو

=ازّاى يا حاج سعد....قصدك ايه؟؟؟

=ماتروحوا تتفقّوا يا أخى مع ماكدونالدز يوصّل الــ"هابى ميل " لعيالكم "هوم ديليفيرى" فى مدارسهم وتريّحوا نفسكم

هههههههاااااااهههااههههااههاههااااااا

=وبعدين همّه العيال لازم ياكلو سندوتشات مربّى وجبنه نستو؟؟؟ ماله الــ "شاتون بريان" والــ"فيتوتشينى آلا جريك"؟؟!!!!

هههههههاااااااهههااههههااههاههااااااا

=على رأيك..... وبعدين هوّه يعنى لازم عيش فينو؟؟؟ ماله العيش الفرنساوى بتاع سوبر ماركتات الزمالك والمهندسين....ديّتها تاكسى رايح جاى كل يوم الصبح من شبرا لهناك ومن هناك لشبرا و يادار مادخلك شر... وآهو بالمرّه تغيّروا للعيال وتجيبولهم جبنه "بارميجيانو" و "سيمون فيميه" بدل الجبنه النستو و الجبنه الرومى اللى دبحتهم دى...مش كده والاّ ايه؟؟؟ الحكومه عايزه ترتقى بيكم يا غجر

هههههههاااااااهههااههههااههاههااااااا

=الاّ انت تقرب لــ"مارى أنطوانيت" يا معلّم؟؟؟؟

=من بعيد....أصل اللى كان واخدها كان من "مطوبس" مركز "أشمون" يمّة "كفر السنابسة" بلد أم العيال

هههههههاااااااهههااههههااههاههااااااا

=وبعدين حتفضلوا شعب متخلّف كده لغاية امتى يا بقر.... ما سمعتوش بوش وهوّه بيقول بالمفتشر : "عفوا ...أنّه عصر أمريكا"؟؟!!

=آآآآآه

=طب ما دام آآآآه يا فالح ما تفطّر عيالك "كورن فليكس" و " كلوجز"

هههههههاااااااهههااههههااههاههااااااا

=جتكم الهم شعب شكّاى بكّاى... ما المعلّبات والكومبوت و علب التونه مرطرطه فى السوبر ماركتات آهى

=الاّ التونه يا معلّم

= اشمعنى يعنى يا باشمهندس ابراهيم؟؟؟

=بعدين العيال يفجروا و يفتكروا نفسهم عايشين فى عالم البحار ويطلبوا طلبات قليلة الأدب

=زى ايه يعنى

=زى.... زى.....زى.... لسانى مش مطاوعنى يا معلّم

=يا جدع قول ما تخافشى

=مش مسألة خوف يا معلّم...الواحد مكسوف يقولها

=يا جدع قول ... احنا اخوات و نستر على بعض

=زى...زى.... انّهم يطلبوا يتغدّوا سمك.......

هههههههاااااااهههااههههااههاههااااااا

هههههههاااااااهههااههههااههاههااااااا

=شفت يا معلّم......مبسوط؟؟؟ استريّحت؟؟؟؟

=سمك مين يا أبو سمك... انت عارف كيلو السمك الصدمان العدمان فى جمعيّات السمك بقى بكام؟؟؟

=يا جماعه... يا جماعه.... بالراحه على الجدع شويّه.... الراجل ما كفرش... غلط... والغلط وارد...نتريق عليه والاّ نصلّح له غلطته؟؟!!

=نصلّح له غلطته

=بص يا كابتن.... قصدى يا باشمهندس..... أظن عيب قوى عليك وانت راجل محترم و متعلّم وفاهم انّك تهيّج الشعب بأكاذيب و شائعات مغرضة وانت أوّل واحد عارف من واقع منهج الجغرافيا اللى كنت بتذاكره من سلاح التلميذ ان مصر دولة مغلقة ليس لها أى منافذ على أى بحار أو أنهار أو مسطّحات مائية.... يبقى حييجى السمك منيييين؟؟؟

=بس يا معلّم ده مصر ساحلها الشمالى كلّه على البحر الأبيض و الشرقى على البحر الأحمر و بطولها فيه نهر النيل ده غير بحيرة ناصر اللى السمك اتوحّش فيها و بيأكل بعضه من قلّة ما احنا بنصطاده

=انت جبت الكلام ده منين؟؟؟

=من الخريطه

=لا...لا...لااااااا...دى تهيّؤات يا باشمهندس

هههههههاااااااهههااههههااههاههااااااا

=أمّا انّكم شعب مفترى .... عمّالين تولولوا انكم مش عارفين تاكلوا سمك؟؟؟...هوّه يعنى ان ماكانشى السمك مقلى أو مشوى فى محلاّت السمك ما ينفعشى؟؟؟ ما تروح يا أخى عند أى صالون حلاقه فى جاردن سيتى وسهّى الحلاّق و انتش لك سمكتين تلاته من الــ"جولدن انجل" اللى بيحطّوهم فى احواض السمك اللى عندهم وصرّف أمورك بيهم فى البيت.......وبعدين ما انتم عندكم يا نمارده يا جبابره "كومبو" السمك الــ"فيليه" فى ماكدونالدز بعشتاشر جنيه بس

=انت متأكّد يا معلّم انكم قرايب "مارى أنطوانيت " من بعيد بس؟؟؟

=يا جدع انت اعقل بقى...... احنا حنقولها كام مرّه؟؟؟ قلنا لكم يا بقر ان الزياده السكّانيه اللى اكتشفناها من 48 ساعة بس هيّه اللى أكلت كل السمك.....افهموا بقى يا غجر ...ماذا والاّ.....

=ايييييييه

=حيترفع الدعم عن الخدمات الصحّيه والتعليم....و حيتفرض عليكم ضرايب جديده........قولوا ورايا يا غجر :

أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

=أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

=أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

=بس ...حلو قوى.....كده تمام

قولوها كل يوم عشرميت مرّه .... وانتم حتشعروا بتحسّن

=يالله يا باشمهندس.... خلّينا نلحق الشغل

= خدنا معاك يا أستاذ كمال

=سلام يا معلّم حامد

=سلام...هااااااااااااااا... مش سامعكم ماشيين على العلاج يعنى

=آهو...آهو يا معلم

أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

أنا مش قصيّر أزعه...أنا طويل و أهبل

أنا مش شعب مطحون...أنا شعب قليل الأدب و منفجر سكّانيّا

[DARWEEN]

يادكتور وليد ..... عفوا

أنت مش مدرسه ........

أنت أكاديميه ياراجل

هذا هو الضحك الأكثر مرارة من البكاء

[disappointed]

العفو يا عزيزى داروين

حنعمل ايه بس

ماهو على رأى المقولة الرومانية القديمة :

"عندما ينفضح أمر اللصوص وتفوح رائحتهم فانه لا يبقى لهم سوى سلاحهم الأمضى.... وهو التبجّح والصفاقة"

[disappointed]

=والله شكلكم حتبيّتونا فى الشارع.......خلاصة الكلام......كل ده مش ممكن يحصل الاّ لو رئيس الجمهوريّه تنازل عن رئاسة الحزب الوطنى

=أكيييييد......وساعتها بقى نقدر نقول اننا رجعنا لوضعيّة حكومة الحزب مش حزب الحكومه اللى احنا عايشين فى وضعيّته دلوقتى

وهنا....يتدخّل المعلّم حامد قائلا:

=قصره........الماتش خلص يا بهوات.....فوقوا من الأحلام بتاعتكم واسمعوا الواقع

واتّجه المعلّم حامد للتليفزيون ليقوم بتعلية الصوت ... فاذا بالمعلّق يقول:

ونهدى فوز منتخبنا القومى بالطبع الى السيّد رئيس الجمهوريّه راعى الرياضة والرياضيين و أب جميع المصريين ...و..و...و....

قام الجميع بدفع الحسلب ومغادرة القهوة مطئطئى الرؤوس عندما كانت آخر صورة يتم بثّها من ملعب المباراة على شاشة التليفزيون....

هى......

كلوووووووووز....

و....

زوووووم.....

على

صورة.....

رئيس الجمهوريّه

=الواد اللى شاطها ده المخابرات حتحطّه تحت المراقبه....شفت الكورة طلعت من رجله زى الطلقه ازّاى فى صورة الريّس اللى فوق المدرّجات

=ماهو كمان يا باشمهندس موضوع حشر الصور فى كل مكان يكون الاعلام متسلّط عليه بقى حاجه مالهاش أى معنى....حاجه ماسخه بصراحه

=عرب...عرب....عرب

كلّنا فى الهم شرق

=على رأيك......هيّه هيّه......الجمعه اللى فاتت الواد ابنى –ما انت عارفه الكوره واكله دماغه- قعد يقلّب بالريموت على الفضائيّات العربيّه ويتفرّج على حتت من ماتشات الدورى فيها..... نسخه بالكربون ياجدع.... الاستاد وصورة رئيس أو ملك البلد بالحجم العملاق فوق رؤوس الجماهير فى المدرّجات...انت بس غيّر اسم الاستاد واسم الفرقتين وسيب برواز الصورة فاضى وابقى غيّر الصورة حسب البلد

=واللى ينقط بقى الجماعة اللى رايحه تتفرّج على ماتش كوره وماسكه صورة رئيس أو ملك البلد... والمصوّر أوّل مايبروز الواحد من دول وهوّه موسطن الصورة فى الكادر يقوم المخرج ناقل لك الصورة عليه انشاء الله يكون فيه بنالتى ساعتها...مش مهم...المهم الناس تشوف الصوره

ولا زال الإعلام المصرى يمارس عمله بنفس الأسلوب

(على هامش الحركات "القرعه" لمخرج مباراة مصر و الكاميرون أمس)

تم تعديل 6 سبتمبر 2004 بواسطة disappointed