عايزة فكرة مشروع صغير من ذوى الخبرة فى السوق

[الباشمهندس ياسر]

الاخت ذهبيه

قعدت افكر فيه تانى ممكن اقوله لقيت نفسى مش عارف اجمع

قلت لنفسى انت تكتب بقى عن اماكن التوريد

و من ناحيتك اى سؤال تفكرى فيه فأنا تحت امرك طبعا

اماكن التوريد

ببساطة تامة وسط البلد

انا مرة فكرت انى لو عايز اعمل قنبلة نووى اخد بعضى واروح وسط البلد و هعملها هناك ان شاء الله بس المشكلة بقى لو بعضى مرضيش يجى معايا

الموسكى القديم ... ش بورسعيد .و خصوصا ممر الشابورى... حارة اليهود ...

و بعد كده يفضل بقى الدور الكبيره زى اوريفلام و كنت بجيب م الفره بتاع مصر الجديده اللى قبل تسييباس بتاع هارون

و لتانى مرة

كده مش هيفضل غير نقطة حسابات التكاليف و هامش الربح

بالنسبة للتكاليف

هنقول المحل ايجاره كذا .. حتى لو هو ملكك ...و كهرباء كذا و مصاريف اخرى كذا زى الضرايب مثلا ( ممكن تعملى حركة كده تاخدى بيها اعفاء بيعملوها المحامين )

مرتب اللى هيبيع .. حتى لو حضرتك اللى هتبيعى ... لازم تحطى مرتب فعلى و حقيقى

تكاليف البضاعة بالانتقالات بتاعتك وبتاعت البضاعة بالتليفونات اللى هتتعمل بكل جنيه يتصرف ع القصة دى

نثريات .. نسبة كده بتجطيها علشان لو طلع حاجة بايظه ف البضاعة او ركنت عندك شوية .. متبقاش فلوسك مركونه كده وخلاص

بعد ما تحسبى الليلة دى كلها هتعرفى انتى تكاليفك الحقيقية وصلت فين

و بعد ما تكونى عارفة محلات المثل بتبيع ازاى هتبقى اخدت احساس السوق 0 نقطة مهمة جدا جدا .

سلعتها هتقدرى تنزلى باسعار كويسه تظبط معاكى الاداء

تحت امركم جميعا فى اى تساؤلات

[ذهبية]

طبعا انا معاك خطوة بخطوة يا باش مهندس ياسر مع انى مفهمتش موضوع المحامين دة اية و يتعمل اازاى عموما هاسال واحد محامى فى الموضوع دة

ام من ناحية الاماكن فادتنى جدا طيب انا بقى عايزة اسالك شوية اسئلة انا ماشية معاك خطوة بخطوة لما اروح الاماكن دى طريقة الشراء ازاى بقى بمعنى اشترى من التاجر ازاى اشترى جملة بمعنى يعنى بالدستة و لا نص دستة و لا بالقطعة اختارها انا بحيث انوع فى البضاعة اشترى ازاى

طيب انا اروح للتجار اقولة انا فاتحة مشروع و كدةعلشان يعمل ليا تخفيض او هامش مكسب ليا علشان افرق فى سعر الشراء عن الزبون العادى بحيث اى مبلغ لو بسيط قليل هيفرق معايا

ولا اشترى كزبونة عادية ؟؟؟

وحاجة تانية انا طبعا هاجيب حد يقف فى المحل بتعمل اية علشان تضمن انة ما ياخد حاجة من البضاعة

اسفة على التطويل فى اسئلتى و لك منى الف شكرااا

[الباشمهندس ياسر]

المحلات اللى بتبيع جمله بتبقى اسعارها واحده يعنى مفيش دماغ لوجع القلب بتاع القطاعى

دى بكام دى بكذا طب اتفضل بضاعتك يبقى اتفضل فلوسك و خلص الحوار

انما ممكن تشترى كميه و تاخدى عليها كمية تانية فوق البيعه و كل حاجة وليها ظروفها و كل تاجر وليه دماغه

بالنسبة للكميات شخصيا مبحبش اكتر ف الكميات قد ما بحب اكتر ف الانواع و اللى بيحكم ده كله السوق بتاعك

و بما انك ف الاول فالافضل متكتريش كميات قد ما تكترى انواع لغاية ما تحسى السوق بتاعك

موضوع الحد اللى هيقف فالمسألة ببساطة تامة ان لو عايز يسرقك هيسرقك و لو عايز يبوظلك سوق المحل فهيبوظهولك

فالافضل تنقى حد يكون امين و تديلة مرتب معقول عشان يشتغل بقلبه معاكى

و طبعا الجرد يعنى هتسلميه كميه بضاعة قد كده بالاسعار الفلانية و الطبيعى ان كل ما ربنا يوسع عليكى

لازم تظبطيه بالمعقول يعنى مش بالكتير عشان ميطمعش ومتنشفيهاش خالص عشان ميسرقكيش

بالنسبة للجرد انتى و دماغك بقى جرد يومى جرد اسبوعى

حسب ظروفك ووقتك

[ذهبية]

طبعا متشكرة على ردك يا باش مهندس ياسر و فعلا بجد فدتنى فى حاجات كتيرة كنت عايزة اخد رايك فى حاجة تانية بما انك فى السوق

اية رايك فى موضوع كل شىء ب 2 و نص دة اية رايك فية كطبيعة مشروع او مكسب هل هو مشروع كويس

اتمنى اسمع رايك او راى اى عضو لة خبرة بالموضوع دة

لكم منى جزيل الشكرااااااااا

[الباشمهندس ياسر]

سورى ع التاخير

بالنسبة للبضاعة ب 2.5 فهى مبقتش بالتمن ده دلوقتى لارتفاع الاسعار اللى حصل من 8 شهور تقريبا

و لو لقيتى حد بيبيع بالسعر القديم فده معناه ان مستوى الجوده بتاع البضاعة انتهى خالص

و السعر الجديد على ما اعرف 3.5

عموما هى حلوة جدا بس محتاجة شارع فى السوق او فى ميدان زى محظة مترو او خاجة زى كده

[ahmos1]

بما ان مساحه المحل صغيره فممكن يكون محل مثلا بيع طرح و ايشاربات محجبات مع الاكسسوارات اللى البنات كلها بتحبها و الشنط القش و الحاجات دى

مجرد فكره خطرت على بالى

الله ينور عليكى

هو ده الكلام

المشروع ده كنت عامله زمان ايام الكلية

و ميه فل و14

و عندى كل خبراته

اماكن التوريد المواسم بتاعته دنيته كلها

لو نويتى ادينى خبر و انا هنقلك كل اللى عندى

'طيب يا رين ياباشمهندس ياسر تدينا التفاصيل علشان نستفيد و ندعيلك

[nana]

السلام عليكم ورحمه الله وبركاته يا اخت ذهبيه

انا قبل ان اقراء استفساركعنمحل ابو2ونص كنت هشور عليكى بيه اذا كان فى شارعكم رجل كتير رايحه وجايه واحنا فى بلدنا لسه المحل ابو2ونص اسعاره زى مهيه وبنفس الجوده وشغالل حلو وضايف قصص وكتب مصوره للاطفال بنفس السعر وانا شخصيا بشترى منه فاعتقد انه مشر وع مناسب وغير مكلف وبضاعته لا تتلف وقد فكرت ان افتحه فى مدينه مجاورره ولكن منعنى غلو الايجار1000 جنيه فتوكلى على الله وربنا معاكى

[se_ Elsyed]

أؤيد تماماً فكرة الإبن سكوربيون ..

بُصي يا مسز جولدن ... أو ذهبية بالإنجليزي ,,

محلات البيع والشراء في مصر أكتر من الهم على القلب وبين كل محل ومحل بتلاقي محل

لكن تيجي بقى للمحلات اللي لها علاقة بالخياطة والحاجات دي .. تلاقيها قليلة جداً في أي منطقة ,,,

وبما إن المحل صغير .. فموضوع السرفلة وتركيب الزراير والعراوي والسوست لايق عليه تماماً ... ورأسمالها مكنة سرفلة وعراوي وتركيب زراير على شوية بضاعة ... وعيشي بقى ..

وتستلقطي لك بنت بنت حلال من المنطقة تكون لها في الخياطة وتشغليها في المحل ..

إلى جانب ذلك موضوع إكسسوارات الأقمشة بتمشي نار ..

يعني زراير ... سوست ( جمع سوسته ) ... ترتر ... إسمه إيه البتاع اللي بيتخيط داير ما يدور حوالين الملايات والحاجات دي مراتي كانت قالت ليه عليه بس نسيت إسمه اللي ساعات بيبقى حرير وشيفون وشكله مشرشب ... إكسسوارات الستاير شغاله برضوا حلو ..

وميزة الإكسسوارات دي إنها ما بتاخدش مكان .. يعني كام درج صغيرين للزراير .. ولفتين تلاتة سوست وهكذا ..

وطبعاً الموسكي وشارع غزة .. وميدان الأوبرا بتلاقي فيهم كل ما تتخيليه وبسعر الجُملة

ميزة الفكرة دي زي ما قلت لك .. إنك ممكن تلاقي منطقة باكلمها ما فيهاش محلين تلاتة من دول ... كمان لو إتعاملتي مع كام ترزي مش عايزين يوجعوا دماغهم بتركيب الزراير والسوست وبيفضوا بس للخياطة .. فهاتبقى العملية هنا ومربى بالقشطة .. والميزة الأكبر إن الواحد يعمل كام إعلان ويتفرقوا في الشوارع وأمام المساجد والكنائس والتجمعات .. هاتلاقي الزباين جت لك من جميع المناطق المجاورة .. ومبدئياً ممُكن نُدشن لك حملة دعاية إعلانية تحت شعار ( لا تقولي الموسكي ولا شارع عبد العزيز .. ده احنا ملوك الخياطة والتطريز .. وإذا كنت غاوي وإذا كنت ناوي .. قرب وجرب وشوف العراوي )

على فكرة .. الموضوع ده نغشش في نافوخي بعد ما نزلت مع زوجتي العام الماضي لشراء حاجات زي دي عشان زوجتي تطرز بها الكوفرتيات بتاعت البيبي - عبد الرحمن بك كعب الغزال - ونزلنا منطقة في الرياض هنا متفرعة من شارع إسمه الخزان .. وكل الشارع - مش فاكر إسمه - اللي هناك مليان محلات متخصصة في الحاجات دي وتدخلي تنبهري بكمية البضاعة المعروضة ..

والستات اللي عندها حِس الإبتكار بينزلوا هناك كتير يشتروا حاجات من دي تجدد بها الستاير والملايات إلخ ... وهناك إكسسوارات برضوا بيشتروها ويجددوا بها الملابس اللي عندهم .. يعني تشتري مش عارف إيه وتخيطه في الفستان فهووب يتقلب شكله رأساً على عقب .. وكذلك ملابس الأطفال وأي حاجه قماش في البيت ما عدا هدوم جوزها .. فمش معقول الواحد يبقى عنده بدلة رسمي محترمة يقوم بعد فترة يرجع من الشغل يلاقي مراته وكنوع من انواع التغيير وللقضاء على الرتابة والملل تروح مركبه له فيها دانتيلا أو ترتر .. شكله هايبقى بايخ وزمايله هايتضايقوا منه في الشغل .

فكري في الموضوع ده وخلي بالك إن المساحة بتحكمك ..

[nana]

المشكلهفىمشروع الزرايروالابر ده انه بيكون فى اى بلد متوارث ابا عن جد والناس فى بلد بتكون معلمه مكان اومنطقه المحل فصعب عليهم تغيره الا اذاكان بالقرب منه محل مماثل زى الصاغه مثلا محلات الذهب كلها جنب بعض لكنه بالفعل مشروع مربح اذا تم عمل الدعايه الكافيه له وخصوصا انه مجاور لمحلات سواريهات كما فهمت والله اعلم

[ذهبية]

طبعا فكرتك حلوة جدا يا سى السيد واضح فعلا ان الموضوع عجبك وهو حلو جدااا فعلا بس زى ما قالت نانا انة المشروع دة بيكون فى شارع معروف و بتكون المحلات جنب بعض وهى فى المنصورة معروف الحتة اللى بيتباع فيها الاكسسورات دى و بيكون مشوار واحد يعنى مش هتلاقى اى ست عايزة سوستة او غيرة بتجمع طلباتها و بتروح الشارع دة

ممكن يتعمل مشروع زى دة لو جنب ترزى او اتلية خياطة بالرغم برضة انة بيوفروا و بيجيبوا الالات دى عندهم توفيرا للخدمة و التكاليف

احنا عندنا فى المنصورة محل ضغير جدا فى مكان رئيسى بيشتغل فى بكر الخيط الصوف و الكروشية فقط يعنى بيشتغل الموسم بتاعة فى الشتا بس بس فعلا المحل بيدخل دخل رهيب على قد ضغرة و على قد تلاتة شهور الشتا لكن دايما تلاقى عندة زحمة مووووت لانة متخصص بس فى خيوط الصوف و بيبيع رخيص و بيجيب فعلا خيوط غريبة و الوان فعلا مش ممكن تلاقيها الا عندة و اللى مساعدة موقع المحل فى موقع حلو جدا و نوع التخصص ساعد ان المحل ينجح

و الله مكدبش عليكم انا فعلا زهقت والتردد اصبح سمة فى تفكيرى وكل ما اشوف محلات كتير فاتحة و مستواها عالى جدا و مكانها احسن ومش عليها ضغط و بيكون المحل فاضى اقول انا هاروح فين فى دول انا بجد زهقت

[ابو سامى المصرى]

الاخت ذهبية أفضل مشروع يناسب المكان دة هو طرح حريمى وايشاربات وشنط وخلافة وبرضة تاجير فساتين الزفاف وبدل الزفاف الرجالى مش محتاج راس مال كبير وفى نفس الوقت مكسبة مجى ان شاء الله خصوصا تاجير الفساتين فى مواسم الزواج ويا مكترها فى مصر العيدين واجازة نصف السنة واجازة الصيف وطالما انك من المنصورة تجيبى بنت ب 150 جنية تقفلك فى المحل وبالتوفيق

[نجوى]

السلام عليكم يا اختى ذهبية انا نجوى جارتك فى شارع الترعة انا من زمان نفسى اعمل مشروع بيع الملابس الاطفال والحريمى ولكن مكنش فيه حد مشجعنى وفى نفس الوقت الامكانيات ضعيفه وبالصدفة قرات رسالتك على المنتدى ومن كرم ربنا طلعنا كمان من بلد ومكان واحد وياريت تحاولى تردى عليا فى المنتدى علشان لو ممكن نتعرف ويبقى فيه تعامل لينا مع بعض على فكرة موضوع جلبيات كرداسة جميل جدا وانا على استعداد الذهاب الى تلك المنطقه وجلب المطلوب ويارب يكون تعارفنا خير ان شاء الله وانا فى انتظار الرد وشكرا :blink:

[وطني حر]

بعد اذن الاخت الفاضله ذهبيه

انا عندي فكره مشورع تجاري وش عارف هل تناسبك وكمان عايز اخذ رايكم فيها لاننا بصراحه معنديش فكره كامله عن المشروع

كل اللي عندي عباره عن معلومات عامه سطحيه جدا لا ترقي الي الدقه ولكن الفكره عاجباني

مضرب الرز او اننا اقوم بتخزين الرز فتره جني المحصول وابيعه بعد ثلاث اشهر

ممكن تناقش في الفكره دي .

مع اعتذاري للاخت ذهبيه حاولت اكتب موضوع مستقل ولكن.؟؟؟

[Guest رودي]

ممكن مكن اجيب منها بضاعه 2.5 

 

[Guest رودي]

اماكن بيع بضاعه 2.5

[عادل أبوزيد]

في 1/15/2009 at 03:35, الباشمهندس ياسر said:

 

الاخت ذهبيه

قعدت افكر فيه تانى ممكن اقوله لقيت نفسى مش عارف اجمع

قلت لنفسى انت تكتب بقى عن اماكن التوريد

و من ناحيتك اى سؤال تفكرى فيه فأنا تحت امرك طبعا

اماكن التوريد

ببساطة تامة وسط البلد

انا مرة فكرت انى لو عايز اعمل قنبلة نووى اخد بعضى واروح وسط البلد و هعملها هناك ان شاء الله بس المشكلة بقى لو بعضى مرضيش يجى معايا

الموسكى القديم ... ش بورسعيد .و خصوصا ممر الشابورى... حارة اليهود ...

و بعد كده يفضل بقى الدور الكبيره زى اوريفلام و كنت بجيب م الفره بتاع مصر الجديده اللى قبل تسييباس بتاع هارون

 

حضرتك بتسأل أماكن البضاعة  اللي إتنين و نص  الإجابة كا تفضل الفاضل ياسر  لو عاوزة قنبلة نووية روحي وسط البلد.

هذا الموضوع بدأته الفاضلة ذهبية و كان عندها محل صغير 12 متر و كانت تتسائل عن فكرة مشروع ينفع لهذا المحل  .. وإستمر الحوار و سيستمر لإن الآن ربما أكثر من زمان الإحتياج لفكرة مشروع

[suma]

مساء الخير.

ممكن تنظري في المكان .قلت انه مملوة بالتجار  والمحلات انظري من اين ياتي ياتون بطعمهم ومشروباتهم.وان لم تجدي مكانا يقدم هذا لهم هذا..ممكن يبقى مشوع جيد..مشروبات وجبات سريعة ..ممكن.

 

  سومه