ارجو التحقق من هذا الموضوع حتى لا يقع احد ضحية للنصب

[hany shokry]

اخواني في المنتدى قرات هذا الاعلان واريد من خبرائنا تحليله وتوضيحه حتى لا يقع احد ضحية للنصب واذا كان حقيقي حتى ننصح اخوانا بماذا يفعلوا للتاكد من مصداقته هذا هو الاعلان

السلام عليكم ورحمة الله وبركاته

الموضوع ببساطه يا جماعه عباره عن فرصه حقيقيه قانونيه من القوى العامله بعقد عمل للسفر لانجلترا

اطمن

مش هتدفع ولا مليم غير لما تستلم التاشيره فى ايدك

هتروح تقدم ورقك بنفسك فى القوى العامله

هتسافر معزز مكرم بعقد عمل رسمى مش سياحه

الوظائف المتاحه

معلش اعمال مهنيه ( نجار – سباك – عمال بناء – زراعه – مساعدين فى اعمال مختلفه ) - سواق – يعنى من الاخر مش شغل مكاتب وشهادات

بس فى اعمال معينه يشترط فيها المؤهل العالى

العرض

عقد عمل لمدة سنتين قابل للتجديد 1000 جنيه استرلينى كل شهر اى ما يعادل اكثر من 8000 جنيه مصرى فى نقطه مهمه جدا ان العمل هيكون اقامه كامله يعنى مش هتدفع فلوس فى اكل وشرب وسكن يعنى ان شاء الله هتعرف تحوش كويس

المطلوب

عندك استعداد تدفع 50000 جنيه مصرى لما تستلم التاشيره

توضيح مهم

فى ناس بتدفع اكتر من كده فى وهم سفر شبه انتحار ويطلب منها فلوس قبل اى حاجه

للتواصل والاستفسارات

************

تم تعديل 10 يناير 2009 بواسطة se_ Elsyed

[se_ Elsyed]

أنا حذفت أرقام تليفونات السيد المهندس عمرو السيسي

فلا مؤخذه لما الوظايف تبع القوى العاملة ... يبقى دور المهندس عمرو اللي حذفت إسمه وتليفوانت معاليه إيه ؟

هل هو قريب عيشه عبد الهادي وهي مكسوفة تتكلم عشان صوت المرأة عوره فالرجل بيتوسط بينها وبين الناس اللي عايزه تسافر ؟ ولا إيه بالظبط

الموضوع الأخر .. حضرتك قرات الإعلان فين هل في جريدة ولا موقع ولا فين ؟

وبعدين وزارة القوى العامل موجودة ولها موقع إلكتروني وتليفونات وممكن أي حد يتصل ويشوف

أهو الموقع

وزارة القوى العاملة والهجرة

وزارة القوى العاملة

[hany shokry]

انا قريته في منتدى اخر وهو بيرد على استفسارات الناس بكلام مش مقنع وكنت اعايز اتاكد هل هذا الكلام ممكن يكون حقيقي لاني كنت قريت مشاركة للعضو سكوربيون وفيه توضيح وكشف اعلان من هذا النوع وشكرا للمتابعة السريعة

[hany shokry]

وهذه مجموعة من اسئلة ااعضاء وردوده عليهم

السلام عليكم

1-طبعا يجماعه انا اسف اذا كنت اتاخرت فى الرد بس انا حاطت الاعلان ده بعد الفجر وبرد بعد العصر فى نفس اليوم .

2- انا فعلا ده اول مشاركه ليه بس انا مش حاطط الاعلان وخلاص علشان انا اكيد مستفيد من الموضوع يعنى مش هضحك عليك واقولك انى مليش مصلحه .

3- انا يا جماعه مستنى اسئلتكم كذا واحد قال محتاجين تفصيل اكتر بس مقلش عايز يعرف ايه بالظبط - كل واحد يسأل بخصوص التفاصبل الى تهمه او الاستفسارات الى عايز يعرفها علشان ممكن تكون حاجه مهمه بالنسبالك ومش مهمه بالنسبالى صح

وربنا يوفق الجميع لما فيه خير العباد والبلاد

[nizza la bella]

يا ابو هانى عيب كدة دةانت تفهمها وهي طايرة ,

دة نصب مية فى المية

اولا تدفع 50000الف جنيه مصرى لما تستلم التاشيره دة في حد ذاته نصب على ابوة

[hany shokry]

اولا عايز المهنه ايه فى الجواز ولا اى حاجه بالنسبه للطالب وعايز يطلع عامل ايه المطلوب ومحتاج اوراق ايه بالضبط

المهنه الموجوده فى الجواز هيه الموجوده فى البطاقه يعنى لو فى واحد مكتوب فى البطاقه مهندس وهو طالع عامل ده مش مشكله خالص علشان همه بيفضلوا المؤهل فى الاعمال المتعلقه بالتعامل مع الجمهور

شوف انته عايز تطلع عامل ايه علشان المطلوب اعمال كتير حرفيه ومهنيه يعنى شوف انته اكتر حاجه تحي تشتغلها ايه ويكون عندك فكره عنها

الاوراق المطلوبه دلوقتى

الجواز سارى طبعا

وصوره الموهل صورة طبق الاصل يعنى مختومه

وبعدين لما الموافقه تيجى من السفاره بيكون فى اوراق تانيه

----------------------------------------------------------------------

على فكره هروح ازاى القوى العامله وهى مش عرضه اى حاجه زى دى على موقعها بالضبط

بعد الموافقه ما تيجى من السفاره هيكون مرواحك طبيعى جدا للقوى العامله الى هنسق معاك حسب محل سكنك

-----------------------------------------------------------------

اولا انا جوازى طالب وانا لسه فى الكليه

ثانيا انا معايا معفى نهائى من التجنيد

ثالثا اخر مؤهل حاصل عليه ثانويه

رابعا عمال البناء او اى عامل مش محتاج اثباتها فى الجواز

خامسا معايا رخصه خاصه وطبعا بناء عليها ممكن اطلع وحده دوليه من هنا

وممكن مساعد فى اعمال مختلفه وهى ايه الاعمال المختلفه

ساسا وهو ده الاهم انا اللى يهمنى الاقامه مش الشغل

يعنى محتاج اقامه هناك

1- يعنى هتسيب الكليه وهيكون مؤهل الثانويه العامه هو الموجود فى الجواز

2- تمام

3- هوه ده الى هتسبته

4- مش محتاج منك اثبات ده انا متاج منك الموجود فى بطاقة ضرتك بس ميكنش طالب

5- ان شاء الله يكون ليك فرصه كويسه

5- يعنى مساعد نجار مساعد حداد يعنى الاعمال الى بتتطلب حرفه فعلا ونته مش عارفها ممكن تطلع مساعد

6- مش هينفع لان العقود ده موثقه من الحكومه المصريه وانجلترا مع اصحاب الاعمال الى هناك يعنى لازم تشتغل مش تسافر وخلاص انا صريح مش بحب الوهم يعنى ممكن اقولك سافر واعمل الى تعمله هناك بس كده هتعرض نفسك للمسائله القانونيه وهتعيش هناك هربان

---------------------------------------------------------

انا حاصل على بكالوريوس علوم حاسب وانا كنت بشتغل مع والدى فى مجال السباكة وهو حاليا شغال فى فرنسا

هل ممكن ان يكون لى فرصه

الموضوع ده ممكن يخلص فى وقت اد ايه

وهل فعلا الفلوس بعد التاشيره

والجواز بياخذوه هناك ولا بيفضل معاك

شكرا اجو الرد

ان شاء الله يكون فى فرصه

6 اسابيع ان شاء الله

الجواز بيخدوه فى السفاره علشان يتاخد عليه الموافقات

------------------------------------------------------------------

السلام عليكم اخى

انا حاصل على ليسانس اداب وتربيه 2007

لدى رخصه خاصه ومعرفه كبيره بقطع الغيار السيارات

هل يمكن ان اقدم فى هذه الفرصه

واريد ان اسالك عده اساله

هل العقد ده موسمى يعنى موسم الشتا مثلا 4 شهور او 6 شهور وخلاص كدا مع السلامه؟

الاوراق المطلوبه اين تقدم ؟ السفاره الانجليزيه ولا القوى العاملهولو فى شخص معين بقدمله الورق ممكن اعرفه ؟

انا هعرف ازاى ان انا اتقبلت هيتصلو بيا ولا انا هروح كل شويه اسال؟

لمااعرف انى اتقبلت مين الى بياخد الباسبور بتاعى انت ولا القوى العامله ولا السفاره؟

لما باخد التاشيره على الباسبور الفلوس بتدفع ازاى

العمل هناك كام ساعه فى اليوم

مده العقد قد ايه

هل هناك تجديدفى العقد

معلش طولت عليك رجاء الرد

وجزاك الله خيرا

1- ممكن طبعا تقدم فى الفرصه ده بس مش بضروره انك هتشتغل فى قطع الغيار

2- العقد ده مدته سنتين قابل للتجديد وفقا لحاجه العمل

3- الاوراق المطلوبه دلوقتى صورة طبق الاصل من المؤهل وجواز سفر سارى هنحدد ميعاد سوى ونتقابل علشان اخد منك الورق( المؤهل والجواز )

4- اول ما الموافقه بتيجى من السفاره بتصل بيك علشان اطلب منك باقى الاوراق مش بتروح وتيجى انا بتابع ده مع السفاره

5- لما بتيجى الموافقه الباسبور بيروح القوى العامله علشان تاخد عليه التاشيره ونته الى بتقدمه

6- بعد الموافقه من السفاره بنكتب عقد بينا باستحقاق الفلوس 50000 عند الحصول على التاشيره وفى حالة انك بعد انا ما جبتلك التاشيره الفلوس مش جاهزه او غيرت رايك بيكون فى شرط جزائى باجمالى المبلغ المصروف لاستخراج التاشيره

7- مش عارف بالظبط بس ده بيكون موضح فى العقد حسب نوع العمل

8 - سنتين

9 - حسب موفقتك واحتياج العمل وصاحب العمل

ربنا يوفق الجميع ان شاء الله

اى استفسارات اخرى انا تحت امرك

------------------------------------------------------------------

السلام عليكم

حياك الله اخى عمرو السيسي ومن الواضح ان اول مشاركه لك بالمنتدى كانت عبر هذا الموضوع

فحياك الله فى منتدانا الكريم

وبناءا عليه لا بد ان تضع شرح كافى ووافى للموضوع وان توضح ما المصادر والمبلغ المطلوب سوف يتم دفعه لمن ؟

ويتطفّل عليا شعور بان لو الموضوع بهذه السهوله لكان شعب مصر باكمله فى انجلترا فياريت توضح اكتر

خصوصا وانى اعلم ان السفاره البريطانيه لا تتعامل مع مكاتب الا فى حاله الدراسه وهذا فى السعوديه وبعض الدول الاخرى وليس فى مصر

واما فيزا السياحه والعماله عن طريق موقع وورلد بريدج

فحتى تزال الغمّه انتظر منك شرح الموضوع

خاصه انى عندما بحثت باسم الموضوع فى محرك البحث وجدت نفس الموضوع والمحتوى باسمك فى منتدى اخر

انتظر مشاركتك القادمه بالشرح والا سوف اضطر اسفا بغلق الموضوع عن طريق الاداره المعنيّه بهذا

اخيرا نصيحه للشباب اصبروا وصابروا فلا تلعبو بانفسكم بروح المغامره باشياء كهذه قد تسبب لكم كربا بعد ذلك فتحققوا اولا يا رعاكم الله

جزاك الله خيرا وجعله فى ميزان حسناتك ان كنت من المؤتمن عليهم ولا تلعب باحلام الشباب المتمسك بقشه ان كنت من هؤلاء

السلام عليكم ورحمة الله وبركاته

فى البدايه اود ان اشكر لك حرصك على المصلحه العامه للشباب

1- بالفعل انا واضع الموضوع ده فى اكثر من موقع ولم اقرا فى قوانين التسجيل تحريم الاعلان فى اكثر من موقع

معلومه اخرى للتوضيح ان جزء من عملى الخاص هو الاستثمار العقارى وبالتالى يوجد لى بنفس الاسم والبيانات اعلانات عن وحدات سكنيه خاصة فانا لست وسيط بيع ولكن امتلك تلك الوحدات وايضا اعلانات عن الديكور والتشطيبات .

2- هشرحك الموضوع ببساطه وبرده لو فى اى استفسار بعد كده انا معنديش مانع

الموضع ان فى راجل اعمال فى انجلتر عنده استثمارات متنوعه وبالتالى اعطت له الحكومه الحق فى جلب عماله من الخارج بعدد يتوافق مع حجم استثماراته

يقدم رجل الاعمال طلب الى القوى العامله بانجلتر لاحتياجه الى عمال من مصر فتقوم القوى العامله فى انجلترا بالتنسيق مع القوى العامله فى مصر

لتوفر له ذلك

4- الاوراق المطلوبه المؤهل وجواز سفر سارى مش طالب اكتر من كده

الاوراق الخاصه بالمسافر مع بعض الاوراق الخاصه بصاحب العمل بتروح الى السفاره اول ما يتوافق عليها هتصل بالشخص المسافر علشان يحضر باقى الاوراق المطلوبه والى بتحددها السفاره والقوى العامله

صاحب الجواز هيكون معاه رقم يتابع بيه الموضوع سواء على النت من الموقع الرسمى للسفاره او بالذهاب للسفاره شخصيا

بيروح وزارة القوى العامله بيقدم الاوراق ده الى بتكون عباره عن الاوراق بتاعته وعليها الموافقه + اوراق تتعلق بطلب رجل الاعمال

بيتحدد ميعاد لإمضاء العقد الموضح فيه جميع التفاصيل والتى تلزم الطرفين المسافر وصاحب العمل بما فيها من بنود ( العقد لمده سنتين بمرتب شهرى 1000 جنية استرلينى - اقامه كامله على نفقه صاحب العمل - نوع العمل ) ده الحجات الاساسيه فى العقد

بعض امضاء العقد فى القوى العامله هيكون معاك مايفيد ذلك وهتروح تطلع تصريح العمل وبعد كده الورق كله القوى العامله بتاخده وبتابع بالرقم الى القوى العامله هتدهولك على الموقع لحد طلوع التاشيره

طلعت التاشيره والحمد لله يعنى مفيش حد يقدر يمنعك من السفر او يرجع فى كلامه ليك الحق برده انك تطمن من المكان الى يريحك منها سليمه وله لا

اتاكد ان كل حاجه تمام دلوقتى هتدفعلى المبلغ المتفق عليه وهو 50000 ولى انا مخدش منك ولا مليم لحد اللحظه الى هتاخد فيها التاشيره

ادعوا الله ان يوفق الجميع وان اكون قد وفقت فى شرح الموضوع وانا لا اتعمد اخفاء اى شئ وارحب باى استفسار

[hany shokry]

يا ابو هانى عيب كدة دةانت تفهمها وهي طايرة ,

دة نصب مية فى المية

اولا تدفع 50000الف جنيه مصرى لما تستلم التاشيره دة في حد ذاته نصب على ابوة

ايوة انا شاكك بس عايز اتاكد عشان اكشفه بثقه وان كان مش نصاب يبقى نعرف نامن اخوانا

[hany shokry]

وادي رد كمان مخليني ما زلت متشكك

جزاك الله خيرا اخى الحبيب

والمبلغ ده حضرتك هتضمن منين ان بعد ضدور التاشيره صاحب التاشيره مش هياخدها ومش هيديك فلوسك وهل حضرتك قدرت مجهودك بخمسين الف جنيه؟!

الشيء الثانى انت ملزم بكل المصاريف لحد ما التاشيره تطلع

يعنى مفيش مقدّم او عربون الف الفين بتوع تخليص الورق؟

وجزاكم الله خيرا

السلام عليكم

بعد موافقه السفاره على الجواز بيكون فى لقاء مع صاحب الجواز وبيكون فى اقرار بينى وبين صاحب الجواز الاقرار ده يفيد ان بمجرد حصول الشخص ده على التأشيره للذهاب لانجلترا يتعهد بدفع المبلغ المتفق عليه وهو 50000

هياخد الاقرار ده ويروح للمحامى الى يرتاحله وبعد ما يضمن انى مش بمضيه على اى حاجه غلط بنتقابل تانى ويمضى على الاقرار

اما بالنسبه للمبلغ 50000 فلا اعتقد ان هناك افاده لاحد فى معرفه المبلغ ده مجهود مين او هيتوزع ازاى او هيتصرف فى ايه

اى مكتب عمل محترم بيطلب قبل اى حاجه الف والفين والكلام الى حضرتك عارفه

بس شوف حضرتك انا مطلبتش حاجه والناس بتعمل فيه ايه تخيل لو طلبت فلوس كانوا عملو فيه ايه

انا باكد على الكلام تانى يا جماعه انت مش هتدفع مليم لحد ما التاشيره تكون فى ايدك

معلومه مهمه

الحمد لله ياجماعه انا ماشى سليم ومش خايف من حاجه يعنى لو حد عايز وهو جى يدينى الاوراق يجيب معاه محامى او يبلغ الشرطه او اى حاجه هو شايفها فى صالحه انا معنديش مانع خالص انا مش بعمل حاجه مخالفه علشان اخاف من حد والحمد لله

[nizza la bella]

يا هانى دة نصب عينى عينك.

وانت مش مستريح فى ميلانو علشان تروح انجلترا?

[hany shokry]

يا هانى دة نصب عينى عينك.

وانت مش مستريح فى ميلانو علشان تروح انجلترا?

هو مش ليا انا باستفسر عن جدية موضوع كهذا اما عن ايطاليا فانا بالفعل تعبان فيها ومش مرتاح لا في سكن ولا في شغل ولا في الحياة فيها بشكل عام

[Torontotruk]

الحمد لله اني قرأت هذا الموضوع لاكتب لكم ذكري اليمة حدثت لي مع فيزا انجلترا التي حصلت عليها من السفارة البريطانية بالقاهرة.

من الأخر لوالدي صديق يعيش في انجلترا منذ السبعينات ووعدني بعمل دعوة زيارة لانجلترا ...هذا الكلام حدث في شتاء عام98 وبالفعل ارسل لي الدعوة و كانت مرسلة من شركة كبيرة وليست منه شخصيا وضع تحت شركة كبيرة مائة خط...حصلت علي الفيزا في مارس 98 وسافرت في ابريل من نفس العام وكانت المفاجأة الكبري عندما وصلت الي مطار هيثرو و لم يعطوني حتي فرصة للكلام كل ما فعلوه انهم وضعوا علامة اكس xعلي الفيزا الصادرة من سفارتهم في القاهرة و عدت علي نفس الطائرة الي القاهرة في نفس اليوم مساءا...ذهبت مرة اخري للسفارة وقالوا لي ان من حق سلطة جوازات المطار رفض دخولك لللاراضي البريطانية ونحن لانملك السلطة في منع ذلك...المهم لم استطع دخول بريطانيا الا بعد ان عمل صديق والدي دعوة شخصية لزيارته مع وضع مبلغ 3000 باوند استرليني باسمي في احدي البنوك البريطانية...

الخلاصة...يمكنك الحصول علي تاشيرة دخول للانجلترا ولكن من الممكن جدا ماتدخلش...وهذا الكلام لم يحدث معي فقط...فقد حدث مع ناس لن تتخيل انه يمكن حدوثه معهم..علي سبيل المثال طارق نور مخرج اعلانات التليفزيون...و الفنان حسن حسني وغيرهم..وتذكر ياعزيزى ان بريطانيا لا تتبع قوانين الاتحاد في اتفاقيات الحدود ...عموما لاقدر الله لو حدث هذا لاحد سوف يعطوك في مطار هيثرو رقم تليفون للاستفسار عن سبب منعك من الدخول و غالبا ماحدش بيرد عليك...

[amrelsisy]

السلام عليكم ورحمة الله وبركاته

1- كان ممكن بدل ما تسئ اليه انت والاستاذ هانى انكم تفهموا الموضوع كويس اعتقد ان ده كان هيكون افضل كتير

2- هل لو انا رديت لحضرتك الاساءه ده هتكون موافق ومش هتقول ده ضدد قوانين المنتدى انا بسال بس

3- لو كتبت اسم الموقع الى فيه الحوار ده كامل واللاخ هانى قراءه فيه هيكون ده صح وله ممنوع

[Torontotruk]

لو انجلترا عايزة عمالة حتاخد من اروبا الشرقية...ومافيش كلام بعد كدة.

[amrelsisy]

السلام عليكم ورحمة الله وبركاته

انا شايف ان فى كلام بعد كلام سيدتك الجامد

يريت تقولنا العمال الى هناك وبيشتغلوا بالفعل هيرجعوا امتى علشان نستقبلهم فى المطار وده طبعا بناء على كلام حضرتك

[se_ Elsyed]

هذا الموضوع مُنتهي وسيُغلق حالاً ..

وكلمة أخيرة للاخ عمرو .. أنت تقول إنك مستفيد مادياً من موضوع تسفيرك للناس لإنجلترا ... وهذا يخالف أهداف منتدانا فلسنا نسعى للربح ولا نسمح لأحد إنه يتربح من وراءنا أو من خلالنا ..

لذا يُستحسن أن تبحث عن زبائن بعيداً عن المُنتدى ...

وشكراً