أرابيسك ميد إن تشاينا

[Scorpion]

أزور خان الخليلي بصورة شبه مستمرة .... كوب الشاي بالنعناع في الفيشاوي لا يضاهيه مشروب آخر في أي بقعة أخري في العالم .... الأزقة الضيقة بجميع منتجاتها المصرية الأصيلة ... و مآذن الأزهر تظلل عليها في أطار شرقي مصري صميم ...

أخترت تلك المنطقة بالذات لأنها أكبر رمز للصناعة اليدوية المصرية الأصيلة .... لأنه يعتبر من من أعرق شوارع القاهرة الفاطمية القديمة التي تزدحم بالورش و "الصنايعية" و "الأسطوات" القادرين علي الحفاظ علي روح العمل اليدوي في مصر .... و ظلت هكذا سنوات و سنوات .. الي ان ظهروا علي الساحة ....

ابناء الصين .....

من كان يتخيل ان فوانيس رمضان سنقوم باستيرادها يومآ من الصين

من كان يتخيل ان تماثيلنا الفرعونية سيتم تصنيعها لنا في قارة أخري

من كان يتخيل ان القطن المصري سيترك مكانه لقماش صيني رخيص

من كان يتخيل ان حتي "لاي" الشيشة سنستورده منهم .....

من كان يتخيل اني يوما ما سأشتري علبة ارابيسك مصرية لأجد اسفلها علامة بانها "ميد إن تشاينا"

و للحديث بقية

[Sherief AbdelWahab]

السبب يسهل استنتاجه من الفيلم التسجيلي القديم "عاشق ومعشوق"..

الفيلم الذي لا تزيد مدته عن الخمس وعشرين دقيقة يعلق عليه أحد كبار "المعلمين" في صناعة "العاشق والمعشوق" وهو عبارة عن قطع خشبية فائقة الصغر تستخدم في بناء مشغولات خشبية ضخمة كالمنابر دون استعمال مسامير أو مواد لاصقة كالغراء.. مشاهدة هذه الأشياء وهي تصنع جزء لا يتجزأ من متعة الفيلم..

تحدث الصنايعي العجوز - الفيلم في أواخر السبعينيات- عن ضعف التدريب المهني والخطر الذي يهدد ورش "النجارة العربي" - الوصف الجامع المانع لصناعات المشغولات الخشبية المصرية القديمة ..

لا أعرف إن كان الرجل لا يزال حياً أم توفاه الله.. لكن ما قاله تحقق .. بل تحقق ما هو أسوأ..

اختفى التدريب المهني..

توقفت ورش الصنايعية القدامى عن تخريج جيل جديد من الحرفيين المهرة..

صارت معظم منتجاتهم غير مطلوبة..

التهمت عجلة التكاليف الصناعة الحرفية.. بحيث يسهل على البضاعة الصينية المشابهة -سواء دخلت البلد بطريقة قانونية ولا بالتهريب- ضربها تنافسياً وبسهولة..

وهذه هي النتيجة..

خلص الكلام

[Scorpion]

أوافقك علي ما تقول عزيزي شريف و ان كان لي تحفظ بسيط علي جملة "صارت معظم منتجاتهم غير مطلوبة" ... نعم قد يكون من النادر الآن أن يشتري عرسان جداد طقم صالون ارابيسك .... و لكن تلك المنتجات و التي تركناها الآن الي "بلاستيك" الصينيين موجه أساسآ الي سوق السائحين .. و هو سوق لا ينضب في مصر أبدآ ..... كما ان كثيرآ من تلك المنتجات هي اساس القري السياحية و الفنادق و كل مكان يستضيف زوار أجانب ليضيف الطابع الشرقي المصري و الذي يأتي من أجله هؤلاء الزوار ....

كنت أبحث عن برواز معين ارابيسك مطعم بالصدف للوحة معينة ... و طفت الخان باحثآ عنه و لكني لم أجد ما ابحث عنه .. معظم الذي يشبهه كان ميد إن تشاينا و بدل الصدف المطعم و الذي يتفنن الأسطي المصري في وضعه قطعة بقطعة .. هناك الآن ما يشبهه تمامآ و لكنه مجرد شكل مطبوع علي بلاستيك و يتم لزقه علي الخشب بأسلوب ال"ستيكرز" ... كدت أفقد الأمل فعلآ و فجأة و في وسط هذا الغزو الصيني وجدت هذا المحل الذي تشم من خارجه عبق الأصالة ... دخلته متوجسآ و لكني وجدت كنزآ من صناعتنا اليدوية الرائعة و فيه ما ابحث عنه ... اشتريته و تركته متوسلآ اياه الا يضعف امام اغراء الصين ....

تلك كانت قمة الأيسبرج فقط لكن الوجه الآخر من المأساة .. الوجه الأكثر قتامة يظهر في انه في نفس الوقت الذي تتضاعف فيه اعداد العاطلين عن العمل في مصر ... و تتزايد زبائن القهاوي من شبابنا في جميع اطراف المحروسة من جميع الشرائح من طلاب الجامعة الي العاملين في رفاعي ... و تتكرر أخبار الغرقي من المهاجرين الغير شرعيين .. و نقرأ حوادث إنتحار أرباب أسر عجزوا عن إعالة أسرهم .. وسط كل هذا الإحباط يتزايد وصول الصينينن في افواج لا تنقطع من بنات و صبيان ليعملوا في مجال التجارة .. لا ينقص مكان منهم .. من القاهرة الي المنصورة ... من سوهاج الي طنطا ... حاملين بضائعهم علي رقابهم او في الميادين و الشوارع .. و ها هم بدأوا أيضآ في استئجار المحلات و المعارض من الشوارع الجانبية الي المولات الفخمة ... و بالطبع جميع مكاسبهم يتم تحويلها الي الصين و كأننا اصبحنا نستورد العمالة و نصدر العملة الصعبة ...

و للحديث بقية ...

[شاب مصري]

يا استاذ سكوربيون حاجات كتير في مصر تم مسخها وصارت بلا لون بلا طعم بلا رائحة

والاهتمام بالشكل والسعر فقط

حاجة تحزن والله

ربنا يستر.

[se_ Elsyed]

سكوربيون ..

عوامل كتيرة تضافرت لتحقيق ذلك ..

فاكر زمان لما كنا انا وإنت - ولو إنك أكبر مني بـ 15 سنة :sad: - في الثمانينات وأواخر السبعينات ما عندناش غير نوع بسكوت واحد بس في مصر وهو " بسكو مصر " ولازم تاكله بالأمر ... كذلك حليب وزبادي مصر للألبان ... وعصاير قها في العلبة المصدية ... مع إن طعمها كان رائع والله ... و و و و و .. كل ذلك نتاج الفكر الإشتراكي التقدمي الوحدوي الفاشل اللي بيقوم على إحتكار الدولة لكل أدوات الإنتاج والمنتج لازم تشربه غصبٍ عنك حتى لو كان لا يُطاق ..

فتطورت الدنيا يا صديقي .. وتطور القطاع الخاص وأصبح عامل زي العفريت اللي بيطلع للناس في كل خرابه ... وتطورت دول أخرى وبقت عامله زي الشربة الإنجليزي اللي لازم تاخدها غصبٍ عنك وبتفرض نفسها عليك .....

ولكن هناك ناس عقولهم تحجرت عند فترة مُعينه وفاكرين إنهم هم المحتكرون الوحيدون .. وبالتالي راحوا في الرجلين ..

كل ده والدولة سايبه الدُنيا عايمه وبالتالي إحنا مش عارفين راسنا من رجلينا .. هل إقتصادنا رأسمالي يقوم على الإقتصاد الحر ؟

أم نحن أشتراكيون والدولة هي اللي تسيطر على أدوات الإنتاج والشعب عليه ياكل ويشرب بس ؟

ولا إحنا رأسماكيين ؟ يعني كوكتيل عجيب ما بين الرأسمالية والإشتراكية ودوخيني يا لمونه واللي فاهم حاجه يبقى يفهمهم ؟

أعتقد إحنا الصنف الثالث ولو سألت حسني مبارك نفسه مش هاتلاقيه عارف حاجه ..

هل تصدق يا عزيزي إن معظم مصانع الحديد في مصر قفلت عشان سعر الحديد إنضرب في العالم كله .. إلا في سلطنة بامبوزيا العُظمى التي يحكمها الرئيس شومبونجو وولده أبو سريع ... وبالتالي أصنع وأقرف نفسي وأدفع ضرايب ومكوس ووكوس وفنتوس ليه طالما بأكسب سبوبه نضيفة قوي من الإستيراد ؟

طب هل تصدق إننا بنستورد حديد من

من

من

مكسوف أقول والله

من الأردن ؟!!!!

وسعر الطن دلوقت 2800 ج وضيف عليه نقل وحبشتكانات يبقى نقول 3200 ... وبيتباع بحوالي 4000 ج

ومش عايز علب الصدف تبقى made in china ؟

وعشان ساعات تتصل بي وتقولي : يا أخي إنت بتبالغ يا س س .. إحنا عندنا رئيس وحكومة والله وبيلبسوا بدل كمان أنا بأشوفهم على قناة المايل دي في ... وأنا أقولك : ده مونتاج !!!!!!!!!!! .. أصل التصوير التليفزيوني والسنيمائي ممكن يهيئلك حاجات غريبة وتشوف الليل نهار والنهار ليل وتشوف خيال المآته بني أدم ولابس بدله وماسك سيجار ويتقعر في كلامه وتحس إنه وزير وملو هدومه وهو أساساً خيش وقش وخيال مآته فاضي وبيحركوا بؤه في المونتاج ويخلوه يقول أنا أعتكد وفي الحكيكة وفي الواكع ...

مش مصدقني؟

طب آلاف الصينيين دول موجودين في مصر بأي صفة ؟

قصدي يعني لقصر بلادنا بلد سواح وفيها التاشينيز بتتسوح .. وكل عام وقت المرواح بتلزق عندنا وتبقى مش عايزه تروح .. وتسيب بلدنا ؟

ولا دول تجار بيدخلوا بتأشيرة رجال أعمال - سودا - ؟

هاوفر عليك ... كل دول طبعاً بيدخلوا بتأشيرة سياحة لأيام محدودة ... ولإنهم فوجئوا إن لا عندنا شرطة ولا حكومة ولا عسس .. فبيقعدوا إلى ما شاء الله طالما ما حدش بيقول لهم إنتوا فين ولا إنتي جايه إعملتوا إيه هنا ؟

وخد عندك بقى أمراض وسارس وإيدز وحركات - الصينيين برضوا غزوا دُبي وبناتهم شغالين في الاعمال المنافية للأداب زي النار وبينافسوا الدب الروسي في هذا المجال ومدمرين الأسعار - وزي ما أنت قلت .. لا ضرايب ولا حجوزات وحول يا معلم على الصين على قفا المستغفلين ..

كانوا جايبين على العاشرة مساءً قريب شاه بندر التجار الصيني في مصر والواد الزعيم بتاعهم .. وفعلاً ناس منظمين وعارفين القرد بيخبي إبنه فين .. لدرجة إنهم أقتحموا الصعيد الجواني اللي فضل صامد امام الإحتلال الفرنسي والإنجليزي لعقود طويلة وحتى على المصريين ... مين التاجر القاهري أوم اللي من الحضر كان يقدر يروح الصعيد ويلف النجوع والكفور ويربي زبون ويفتح اسواق هناك ؟

خليها على الله يا عم سكوربيون

أقول لك على حاجه شوفتها الإسبوع الماضي أبوظ لك بها اليوم بتاعك كله وأخليك في موود زي الـ ..... ولا بلاش ؟

هاقولك عشان إنت حبيبي ومصري حتى لو معاك بابزابورت شينجين

في أوخر القرن التاسع عشر .. يعني قول 1860 كده .... جاء وفد روفيع المستوى من

من

من

( ماتضحكش يابني أنا شايفك )

من اليابان

عشان يتفرجوا على الإختراع العجيب الموجود في مصر وإنجلترا فقط وإسمه ( الحلزونه ) ... القطار يعني وكانت مصر من أوائل الدول اللي أدخلت القطار في أراضيها بعد إنجلترا وجاءوا ليستفيدوا من تلك التجربة الرائدة وأنبرهوا بالحضارة والتقدم الموجود في مصر وتمنوا إدخال هذه الحلزونة في بالد السمس المشرقة ألا وهي اليابان .....

لا تعليق .. وروق كده وقوم طس وشك بشوية ميه وإشرب فنطاس قهوة وفوق يا فاروق

[اسماعيل امين]

الاخوه الاعزاء se_ Elsyed شاب مصري Scorpion Sherief AbdelWahab

تعليقات رائعه ايتأذنكم في اضافتها لكتاب نظريه سرب الحمام المصري (نظريه المعتوه ابن المعاتيه ).

1-منذ 13 عام جلست مع كبايه شاي وسجاره .افكر في المشكله التي تتحدثون عنها (منتج صيني.بكثافه .الي حد ما رخيص السعر وجيد الصنع .يغزو

السوق المصري ).اذا اشتريت مكونات اي جهاز لتحاول تصنيعه بنفسك تكون اغلي من المنتج نفسه ؟؟؟

اذن اي صناعه مصريه صغيره مكتوب عليها بالفشل .ولن ينجح سوي ان يتحول المصريين الي بائع ومشتري للمنتج الصيني ؟؟؟قلت سوف اركز علي

الصناعات الصغيره وادرسها .اخوكم معتوه لتكلف مهما تكلف من مال وجهد ووقت (للعلم اخوكم يحمل اعلي الشهادات في مصر من اعظم جامعه في مصر والخارج .بدون غرور ).

2-ذهبت الي مغلق خشب .وجدت خشب كتير كسر .بتعملوا به اه ياريس .بنبيعه بالكيلو لتدفئه غالبا.

لماذا لااصنع منه نماذج طائرات .احتاج منشار كهربي (نوعين )اركت وسير ومخرطه للخشب .مكنه الخياطه التالفه قمت بتحويلها الي منشار اركت .طيب مخرطه الخشب طول متر ونصف (ماتور غساله تالفه .وعم احمد الخراط و250 جنيه يقوم بعمل مخرطه للخشب ).باقي منشار السير اعمل ايه

اشتريت منشار اركت صيني وقمت بتحويل ليقوم بعمل منشار السير (قطع الخشب صغيره لا تحتاج لمنشار اكثر شده ).صنعت نماذج جميله لطائرات .

الطائرات يجب ان تنطق وتتحرك .هناك مواتير من حجوم مختلفه .استخدمتها في عمل المراوح .اصبحت تتحرك .اللعب الصيني التالفه بها دوائر I C

دخلتها في دائره الصوت .

3- ماسك صباع الطباشير ثمنه الالماني 11 جنيه والفرنسي 9 جنيه .تمكنت من صناعته بخشب زان شكله جميل لا يكلف سوي اشياء بسيطه .

4- عندما تريد اصلاح سيارتك ليلا في وسط طريق مظلم تحتاج ما يسمي بلا دس يهمل علي بطاريه السياره .قمت بصناعته من الخشب الكسر

باستعمال الادوات السابقه .

5- اذا كانت الطائرات شكلها جميل (يعجب بها ناس محترمه ).سوف اصبها الومنيوم ونحاس اصفر واقوم بتلميعها.ذهبت الي المسبك وقمت بذلك .

6- يوجد شئ يأكله المصريين ويلقوا بفضلاته في الزباله .هذه الفضلات تصلح لصناعه اشياء جميله

http://www.facebook.com/photo.php?pid=2264...p;id=1079778275

7-اسطوانه الكومبيوتر التالفه .اعداده كثير ولا يستعمله احد .صنعت منها شئ جميل يلعب بها الاطفال المصريين .وتعطي اصوات كلب ..قطه ..في حاله غضب .

8-الحفر علي النحاس لصناعه الواح عليها رسومات وكلمات جميله (لاختبر جودتها عرضتها علي رجل اكثر من محترم .اعجب بها ويتمني شرائها لانه

نزيه لم يطلبها كهديه ).

9- صاعق كهربي لدفاع عن النفيس لا يكلف سوي 4 جنيهات (قمت بتجريبه علي شاب مصري ...كانت النتيجه ...جلوسه علي الارض ...والتفوه بكلمات نابيه ...رغم انه اصغر مني سنا الا انني فرحت كثير بالنتيجه ).

10-فاكرين النحله والقطان بتاعه زمان الي كنا بنلعب بيها في حواري مصر قبل الوداع ...صنعت نحله تدور لمده 20 دقيقه وفي النهايه تقف علي سنها لا تقع يمين او شمال وتظل في حاله توازن غريب .لو حاولت تثبيتها في هذا الوضع المتزن من ثبات لن تستطيع لو جلست 100 عام .جنيه منك

امام عشره الاف مني اذا نفذت ذلك .

11- منذ عده ايام زارني صديق كبير السن .اعطيته عود قصب .رد كان زمان .لا يوجد سوي ضرسين باكل عليهم .احضرت له طبق به قصب تم تقشيره (من الغلاف الخارجي )وتقطيعه حلقات صغيره .والله ما خلي قطعه في الطبق .كنت فرحان فكره لكسب العيش .

12- زارني صديق ملتزم دينيا ومتفتح بمعني الكلمه .راي الاشياء التي صنعتها .اعجبته .قال لدينا شباب وشبات غلابه عاوزين يأكلوا عيش .ما رأيك

لو وفرت لك مكان متسع ومبلغ 10 الاف جنيه وتعليمهم ذلك منهم من يصنع ومنهم من يبيع .(وكلام جميل عن حل مشكله البطاله بشكل بسيط

ومشكله التصريف العاطفي لدي الشباب من منظور شرقي محافظ ).لتوضيح هذه الصوره فاكر يا se_ Elsyed شاب مصري Scorpion Sherief AbdelWahab البت المصريه الي كنت بتحبها زمان وبتحافظ عليها زي اختك .لما كنت تراها صباح يوم كنت تبقي طاير في السما طول اليوم ...عيبنا اننا لا نفكر في مشاعر ابنائنا العاطفيه .ونغمض عيوننا

ونخجل من الكلام فيها (هذه ليست دعوه للانحلال ارجو ان تفهموني جيدا ).او نتركهم لنت واصور والمجلات اياها ؟؟؟.

مامنعني من الاستمرار هو التصنيف الاتجاهي داخل دولتنا المحترمه .

انظر الي الفني المصري اري انه عظيم .يخرج من البيت المطلوب رزق يوم له ولاسرته .حتي لو طرأت علي ذهنه فكره .يحتاج فلوس ووقت وعلاقات

لو توفر ذلك لا يستطيع تسريف فكرته :-

أ- فاكر من صنع مكينه صناعه الكناف الاليه ماذا كسب من فكرته ؟؟؟

ب- من صنع اله طحن الفول لصناعه الطعميه ماذا كسب ؟؟؟حتي اسمائهم لا يزكرها احد .

يجب ان يكون هناك عقل يفكر للفني بطريقه علميه .

من هنا جاءت نظريه سرب الحمام المصري (من معتوه ابن معتوهه )ليسخر منها الاخرين لانه لا يستطيع الدفاع عنها .

يوما من الايام جاء ضابط مصري محترم بعد تجريب كل انواع الوسائل (متفجرات صواريخ الغام لهدم الساتر التربي لخط بارليف ).وفكر بهدمه باستخدام مضخات المياه .كانت الفكره ساخره في البدايه .وعند تجربتها .كانت اكثر من رائعه .انا لااقارن نفسي به فانا لااساوي مسمارفي حذاؤه .

هل تعرفوا اسم هذا الضابط ؟؟؟

في النهايه خذها كلمه من مجنون ليس لكم مخرج سوي هذه النظريه (اسخروا كما تشاؤا ).

بدونها سوف يستمر تصادم الحكومه مع الاتجاه الاسلامي ومع الاتجاه المسيحي مع المعارضه المدنيه مع الكتله الصامته ويستمر النزيف ولن تتوحدوا .

اسف اذا طولت عليكم ولن استطيع مراجعه ماكتبت .

[Scorpion]

الفاضل اسماعيل أمين ...

ما كتبته حضرتك هي تجارب مثيرة بالفعل و تحتاج الي مناقشة موسعة و موضوع منفصل خاص بها ... و لكن بها اساس "البيزنس" الذي يقوم به الصينيين ... او بمعني آخر الشاطرة التي تغزل برجل حمار ... تلك الثقافة التي نحتاج ان نزرعها في شباب بلدنا ...

سي السيد يا عزيزي ... موضوع الصينيين في مصر له ابعاد كثيرة جدآ ... فسأنحي جانبآ الآن موضوع العبث بموروثاتنا الثقافية و اليدوية التي تركناها طائعين لهم .. مما يلقي علينا المسئولية في المقام الأول ليس فقط لأننا متمثلين في حكوماتنا او علي أضعف الأيمان في مثقفين بلدنا لم نتابع هذ الأمور بجدية منذ أن بدأت .. و ليس لأننا ننتج ما يستوحي من تاريخنا الفرعوني او الشرقي بأسعار اسطورية .. و لكن لأن هناك بالطبع من الحيتان الذي يساعد علي ذلك و يتربح منه .. فكل هؤلاء الصينيين الذين يتجولون في ربوع بلدنا يجب ان يكون لهم جانب يركنون اليه وقت الحاجة بل و يأخذون الأذن منه ..

ما لا أفهمه كيف يدخل الاف الصينيين الي مصر .. سواء كانت الحجة للسياحة او لخلافه .. فعددهم و انتشارهم في السوق المصرية في كل مدينة لا علاقة له بالسياحة .. فما هي المناطق السياحية في طنطا مثلآ .... لا أعتقد مثلآ انهم يهتمون بمشاهدة الليلة الكبيرة بمولد السيد البدوي ...

هل تلك المجمعات و المراكز التجارية و المعارض المنتشرة في مدن مصر تدخل ضمن إشراف وزارة السياحة ؟؟؟

هل تلك الفتاة الصينية التي سألتك منذ فترة حاملة لوح الخشب و عليه تلك المنتجات الفشنك اذا كنت عايز تشتري منها هَاجة هِلوة أو آخرين من ابناء بلدها بذلك الثراء الذي يؤهلهم للسياحة شهورآ و سنوات متجولين في ارجاء المحروسة بين ابنائها العاطلين ؟؟؟

ما هو دور وزارة العمل و مصلحة الضرائب ... ما هو دور وزارة الداخلية او التموين .. بل وزارة الشئون الأجتماعية ؟؟؟

ما هي الأضافات التي يكتسبها الدخل القومي و سوق العمل و الضمان الأجتماعي من جراء تنامي عددهم في أسواق مصر ...

ماذا تكسب مصر من تحويل المكسب من الجنيه المصري الي أي عملة أجنبية و تحويلها الي الصين ... ماذا يكسب المجتمع من تزايد أعدادهم مع تزايد كراسي القهاوي في مصر ... الصيني يكسب و المصري يشرب معسل و شاي و ينعي حظه ...

سؤال آخير هل تسمح السلطات الصينية بدخول أفواج مصرية الي مدن الصين و ميادينه للتجارة بدون دفع مليم ضرائب و استغلال تلك الأفواج للتسهيلات الممنوحة لأبناء الصين في مجالات الأسكان و التموين و المواصلات و الأدوية ....

[Scorpion]

كنت أبحث عن برواز معين ارابيسك مطعم بالصدف للوحة معينة ... و طفت الخان باحثآ عنه و لكني لم أجد ما ابحث عنه .. معظم الذي يشبهه كان ميد إن تشاينا و بدل الصدف المطعم و الذي يتفنن الأسطي المصري في وضعه قطعة بقطعة .. هناك الآن ما يشبهه تمامآ و لكنه مجرد شكل مطبوع علي بلاستيك و يتم لزقه علي الخشب بأسلوب ال"ستيكرز" ... كدت أفقد الأمل فعلآ و فجأة و في وسط هذا الغزو الصيني وجدت هذا المحل الذي تشم من خارجه عبق الأصالة ... دخلته متوجسآ و لكني وجدت كنزآ من صناعتنا اليدوية الرائعة و فيه ما ابحث عنه ... اشتريته و تركته متوسلآ اياه الا يضعف امام اغراء الصين ....

المحل قفل و مكانه محل تيشيرتات ... صيني ..... cr((:

[Alshiekh]

المحل قفل و مكانه محل تيشيرتات ... صيني ..... cr((:

اكيد لو السيسي استمر كان قلب لبيع "سواك" صيني.

[التونسى]

دا غزو من نوع اخر .. هى مصر حتلاقيها منين والا منين

[Grandma]

أستاذنا الفاضل اسكوربيون ... احييك على حسك الوطني ... انت انسان مصري أصيل ودا شوفته ولمسته في كل كلمة من كلامك..

وفي وصفك الرائع للأجواء المصرية المميزة الموجودة في حي الحسين

أتمنى زيك نبقى في نص شطارة الصين.. مع اننا شاطرين أوي مش عارفة ايه اللي بيحصلنا دا ؟!!

الصين عملت ابو الهول صورة طبق الاصل و غاظيتنا ..ومش سايبة حاجة في العالم مش بس في مصر الا و بتقلدها وترجع تصدرها

الناس دي ايه ؟!! ذكاء و مخ تجاري وايد عاملة ماهرة ...مافيش كسل ولا تواكل

امتى بقى يارب نبقى زيهم ونرجع نعمل براويز ارابيسك تاني ؟!!

وامتى تقدر نغيظهم ونبني في مصر سور الصين العظيم

[أبو محمد]

أستاذنا الفاضل اسكوربيون ... احييك على حسك الوطني ... انت انسان مصري أصيل ودا شوفته ولمسته في كل كلمة من كلامك..

وفي وصفك الرائع للأجواء المصرية المميزة الموجودة في حي الحسين

أتمنى زيك نبقى في نص شطارة الصين.. مع اننا شاطرين أوي مش عارفة ايه اللي بيحصلنا دا ؟!!

الصين عملت ابو الهول صورة طبق الاصل و غاظيتنا ..ومش سايبة حاجة في العالم مش بس في مصر الا و بتقلدها وترجع تصدرها

الناس دي ايه ؟!! ذكاء و مخ تجاري وايد عاملة ماهرة ...مافيش كسل ولا تواكل

امتى بقى يارب نبقى زيهم ونرجع نعمل براويز ارابيسك تاني ؟!!

وامتى تقدر نغيظهم ونبني في مصر سور الصين العظيم

حيحصل إن شاء الله

أصل المصريين دول لهم عمايل جبارة بس بتظهر كل قرن من الزمان

فى القرن التاسع عشر حفر المصريون القناة بالفاس والحجارى والجاروف والغلق

فكان أكبر مشروع تنموى فى القرن التاسع عشر

وبنوا السد العالى برضه بالفاس والحجارى والجاروف والغلق

بمساعدة المتفجرات والأوناش والبلدوزورات

فكان أكبر مشروع تنموى فى العالم فى القرن العشرين

إنتظرى عمايل المصريين فى القرن الواحد والعشرين .. ربنا يديكى الصحة والعمر

[محاور]

مش عايز اخرج عن الموضوع... بس مش فاهم ازاى السد العالى اكبر مشروع تنموى فى العالم فى القرن العشرين؟

دى معلومات مضللة.

[Scorpion]

بس برضه كالعادة ( اللي ابتدت تبقي مزعجة ) خرجت عن الموضوع ...

و بما ان هناك مواضيع كتيرة بتتكلم عن السد العالي فمن فضلك دور علي واحد منهم و اسأل سؤالك ده فيه ... انا كفاية عليا امشي في البيت ادور علي حاجات ابني و هدومه المتنطورة و احطها مكانها .. مش حيبقي في البيت و في المحاورات ...

[التونسى]

امبارح كنت القاهره .. تحديدا ما بين الموسكى وحارة اليهود والحسين وخان الخليلى وشارع كده اسمه جوهرة مش عارف ايه .. الشارع ده متخصص تقريبا فى الحاجات الفرعونيه .. وانا كنت بدور على هدايا فرعونيه وبرديات لاصدقائى وزملائى الاجانب .. اشتريت حاجات كتيره جدا الصراحه وباسعار رخيصه جدا نسبيا .. وفوجئت ان اغلب الاشياء صينى وهندى وجودتها معقوله ((كتنفيذ)) مع ردائة الخامه ورخص الاسعار .. اما الحاجات القليله اللى كانت صناعه مصريه فقد كانت رديئه للاسف فى الفينشنج لكن الخامه كانت كويسه خصوصا فى التشيرتات القطن وكانت اغلى فى السعر وجبت لنفسى وصحابى بقى طاقيه اشبه بالطاقيه دى دى اللى بتفكرنى باصولى المصريه النوبيه واللى اجمل ما فيها انها صناعه مصريه وهاندميد كمان

وناوى ابقى البسها فى انجلترا ان شاء الله كنوع من الترويش والاستايل :Laie:

[أبو محمد]

أنا آخر سنة لى فى الكويت كانت الإدارة عندنا بتنفذ مشروع نادى للكومباوند

وكان مصمم الديكور الداخلى مصمم على شبابيك "مشربية"

مع إن المصمم ده ما كانش مصرى

ونزل ناس من عندنا للقاهرة وجابوا عروض وتم التركيب وكان على أعلى مستوى

اللى يدوَّر يلاقى يا سنيور

وبمناسبة اللى يدوَّر يلاقى .. خد دى يا "محاور" عن السد

وان ما عجبكشى إفتح صفحة شبكة الأخبار العربية

وافتح موضوع جديد أو دور على موضوع قديم واتكلم فيه عن السد زى ما انت عاوز

[Scorpion]

السايح مش مفروض يدور يا ابو محمد ... السايح لازم يلاقيها في وشه في اي حتة يروحها .. في الدنيا كلها بيعملوا البدع مع الزوار علشان يخلوهم يشتروا منتجاتهم ..

بالدلع .. بالأعلانات .. بالأسعار .. بالجودة و التفرد

تفتكر لو سايح عنده نص يوم في القاهرة عنده وقت يعمل مناقصة علشان يشتري سوفينير ..

[أبو محمد]

السايح مش مفروض يدور يا ابو محمد ... السايح لازم يلاقيها في وشه في اي حتة يروحها .. في الدنيا كلها بيعملوا البدع مع الزوار علشان يخلوهم يشتروا منتجاتهم ..

بالدلع .. بالأعلانات .. بالأسعار .. بالجودة و التفرد

تفتكر لو سايح عنده نص يوم في القاهرة عنده وقت يعمل مناقصة علشان يشتري سوفينير ..

أنا كنت باكلمك انت يا سنيور

:)

انت حتعمل لى فيها سايح يا شبراوى ؟

الكلام على خيبة السياحة ذو شجون وخلينى ساكت احسن

[Grandma]

حيحصل إن شاء الله

أصل المصريين دول لهم عمايل جبارة بس بتظهر كل قرن من الزمان

فى القرن التاسع عشر حفر المصريون القناة بالفاس والحجارى والجاروف والغلق

فكان أكبر مشروع تنموى فى القرن التاسع عشر

وبنوا السد العالى برضه بالفاس والحجارى والجاروف والغلق

بمساعدة المتفجرات والأوناش والبلدوزورات

فكان أكبر مشروع تنموى فى العالم فى القرن العشرين

إنتظرى عمايل المصريين فى القرن الواحد والعشرين .. ربنا يديكى الصحة والعمر

انا متأكدة ان المصريين لهم عمايل جبارة

بس زي ما حضرتك قلت ... تظهر كل قرن من الزمان للأسف .

يا ترى مين يعيش !!

انا عوزاهم يبقوا لهاليب زي الصينيين .... الاعمال الجبارة تبقى ورا بعض

من هنا بيجي التقدم ...انما هنعمل حاجة ونام وما نفوقش الا بعد قرن

مش هينفع ياريس :)

[أبو محمد]

سكوب

وانا باخد بولطة اسكندرانى فى الانترنت

لقيت مؤسسة إسمها "نبنى" فى منشية ناصر

إبقى اخطف رجلك لحد هناك .. الظاهر خان الخليلى بقى خان صينى يا بنى

دى بعض منتجاتهم

كل منتج له رقم كودى وسعره موجود وإسمه موجود

لو عندك فيس بوك اكتب "مؤسسة نبنى Nebny Foundation"